သုံးပါးပေါင်းတစ်ဆူဆိုတာ ဘုရားသခင်မှာ ခမည်းတော်၊ သားတော်၊ သန့်ရှင်းသောဝိညာဉ်တော်ဆိုတဲ့ ပုဂ္ဂိုလ်သုံးပါး ပါဝင်တယ်ဆိုတဲ့ သွန်သင်ချက်ဖြစ်တယ်။ အဲဒီပုဂ္ဂိုလ်သုံးပါးက တစ်ပါးနဲ့တစ်ပါးတူညီပြီး အတိုင်းအဆမဲ့တန်ခိုးကြီးတာနဲ့ အစမရှိခြင်းမှာ တူတယ်လို့ဆိုကြတယ်။ ဒါကြောင့် သုံးပါးတစ်ဆူ အယူဝါဒအရ ခမည်းတော်ဘုရား၊ သားတော်ဘုရား၊ သန့်ရှင်းသောဝိညာဉ်တော်ဘုရားဖြစ်တယ်၊ အဲဒါတွေအားလုံးက တစ်ဆူတည်းသာဖြစ်တယ်။

သုံးပါးပေါင်းတစ်ဆူကို ယုံကြည်သူများစွာက အဲဒီသွန်သင်ချက်ကို ရှင်းမပြနိုင်ဘူးလို့ ဝန်ခံကြတယ်။ ဘာပဲဖြစ်ဖြစ် ဒါက ကျမ်းစာသွန်သင်ချက်ဖြစ်တယ်လို့ သူတို့ ယူဆကောင်းယူဆ နေမယ်။ ဒါပေမဲ့ မှတ်သားစရာက “သုံးပါးပေါင်းတစ်ဆူ” ဆိုတဲ့စကားလုံးကို သမ္မာကျမ်းစာရဲ့ ဘယ်နေရာမှာမှ မတွေ့ရဘူး။ ဒါဆိုရင် သုံးပါးပေါင်းတစ်ဆူအယူအဆကိုရော ကျမ်းစာမှာတွေ့ရသလား။ အဲဒီမေးခွန်းကို ဖြေဆိုဖို့ သုံးပါးပေါင်းတစ်ဆူကို ယုံကြည်လက်ခံသူတွေ မကြာခဏကိုးကားပြလေ့ရှိတဲ့ ကျမ်းချက်တစ်ချက်ကို သုံးသပ်ကြည့်ကြစို့။

ယောဟန် ၁:၁ မှာ ဒီလိုဖော်ပြထားတယ်– “အစအဦး၌ နှုတ်ကပါဌ်တော်ရှိ၏။ နှုတ်ကပါဌ်တော်သည် ဘုရားသခင်နှင့်အတူရှိ၏။ နှုတ်ကပါဌ်တော်သည်လည်း ဘုရားသခင်ဖြစ်တော်မူ၏။” (ယုဒသန်ပြန်ဆိုတဲ့ သမ္မာကျမ်း) ဒီစကားတွေကို ရေးသားခဲ့သူ တမန်တော်ယောဟန်က “နှုတ်ကပါဌ်တော်” ဟာ ယေရှုဖြစ်တယ်ဆိုတာ ရှင်းရှင်းလင်းလင်း ဖော်ပြခဲ့တယ်။ (ယောဟန် ၁:၁၄) ဒါပေမဲ့ နှုတ်ကပါဌ်တော်ကို ဘုရားသခင်လို့ခေါ်ထားတဲ့အတွက် တချို့သူတွေက ‘သားတော်နဲ့ ခမည်းတော်ဟာ တစ်ဆူတည်းသောဘုရားရဲ့ အစိတ်အပိုင်းဖြစ်ရမယ်’ လို့ ကောက်ချက်ချကြတယ်။

သမ္မာကျမ်းစာရဲ့ ဒီအပိုင်းကို မူလက ဂရိစကားနဲ့ ရေးသားတယ်ဆိုတာ သတိရပါ။ နောက်ပိုင်းမှာ ဘာသာပြန်သူတွေက ဂရိစကားကနေ တခြားစကားတွေကို ဘာသာပြန်ခဲ့ကြတယ်။ ဒါပေမဲ့ သမ္မာကျမ်းစာဘာသာပြန်သူအတော်များများက “နှုတ်ကပါဌ်တော်သည်လည်း ဘုရားသခင်ဖြစ်တော်မူ၏” ဆိုတဲ့စကားစုကို အသုံးမပြုခဲ့ကြဘူး။ ဘာကြောင့်လဲ။ ကျမ်းစာသုံးဂရိစကားနဲ့ပတ်သက်တဲ့ သူတို့ရဲ့အသိပညာပေါ်အခြေခံပြီး အဲဒီဘာသာပြန်သူတွေက “နှုတ်ကပါဌ်တော်သည်လည်း ဘုရားသခင်ဖြစ်တော်မူ၏” ဆိုတဲ့စကားစုကို တခြားနည်းနဲ့ပြန်ဆိုသင့်တယ်လို့ ကောက်ချက်ချခဲ့ကြတယ်။ ဘယ်လိုပြန်ဆိုခဲ့ကြသလဲ။ သာဓကတချို့ကတော့– “လိုဂေါ့စ် [နှုတ်ကပါဌ်တော်] သည် မြင့်မြတ်တော်မူသည်။” (သမ္မာကျမ်းစာဘာသာပြန်ကျမ်းသစ်) “နှုတ်ကပါဌ်တော်သည် ဘုရားတစ်ပါးဖြစ်တော်မူ၏။” (ပြင်ဆင်တည်းဖြတ်ထားသော ဓမ္မသစ်ကျမ်း) “နှုတ်ကပါဌ်တော်သည် ဘုရားသခင်နှင့်အတူရှိတော်မူပြီး ကိုယ်တော်၏သဘောသဘာဝမျိုး ရှိတော်မူ၏။” (ဘာသာပြန်သူ၏ဓမ္မသစ်ကျမ်း) အဲဒီဘာသာပြန်ကျမ်းတွေအရ နှုတ်ကပါဌ်တော်ဟာ အနန္တတန်ခိုးရှင် ဘုရားသခင်ကိုယ်တော်တိုင်မဟုတ်ဘူး။ * အဲဒီအစား ယေဟောဝါရဲ့ဖန်ဆင်းခံသတ္တဝါတွေထဲမှာ နှုတ်ကပါဌ်တော်ရဲ့ မြင့်မားတဲ့ရာထူးကြောင့် ကိုယ်တော့်ကို “ဘုရားတစ်ပါး” အဖြစ် ရည်ညွှန်းခြင်းဖြစ်တယ်။ “ဘုရား” ဆိုတဲ့စကားလုံးက “တန်ခိုးကြီးသူ” ကိုဆိုလိုခြင်းဖြစ်တယ်။ အနန္တတန်ခိုးရှင်မဟုတ်ဘူး။

လူအများစုက ကျမ်းစာသုံးဂရိစကားကို မသိကြဘူး။ ဒါဆိုရင် တမန်တော်ယောဟန် အမှန်တကယ် ဘာကိုဆိုလိုတယ်ဆိုတာ ကျွန်ုပ်တို့ ဘယ်လိုသိနိုင်သလဲ။ ဒီဥပမာကို သုံးသပ် ကြည့်ပါ– ကျောင်းဆရာတစ်ယောက်က သူ့တပည့်တွေကို အကြောင်းအရာတစ်ခု ရှင်းပြတယ်။ ကျောင်းသားတွေက အဲဒီရှင်းပြချက်ကို တစ်ယောက်တစ်မျိုးစီ နားလည်ကြတယ်။ ဒီကိစ္စကို ကျောင်းသားတွေ ဘယ်လိုဖြေရှင်းနိုင်သလဲ။ ထပ်ဆင့်အချက်အလက်တွေနဲ့ရှင်းပြဖို့ ဆရာကို တောင်းဆိုနိုင်တယ်။ ထပ်ဆင့်အချက်အလက်တွေကို သိရှိလာတဲ့အခါ အဲဒီအကြောင်းအရာကို ပိုနားလည်ဖို့ အထောက်အကူဖြစ်မယ်ဆိုတာ သေချာတယ်။ အလားတူပဲ ယောဟန် ၁:၁ ရဲ့ဆိုလိုချက်ကို နားလည်သဘောပေါက်ဖို့ ယေရှုရဲ့အနေအထားနဲ့ပတ်သက်တဲ့ ထပ်ဆင့်အချက်အလက်တွေကို ယောဟန်ခရစ်ဝင်ကျမ်းမှာ ရှာဖွေနိုင်ပါတယ်။ ဒီအကြောင်းအရာနဲ့ပတ်သက်တဲ့ ထပ်ဆင့်အချက်အလက်တွေကို သိရှိခြင်းက မှန်ကန်တဲ့ကောက်ချက်ချဖို့ အထောက်အကူပြုတယ်။

ဥပမာ၊ ယောဟန်အခန်းကြီး ၁၊ အခန်းငယ် ၁၈ မှာပါတဲ့ နောက်ထပ်အကြောင်းအရာကို သုံးသပ်ကြည့်ပါ– “[အနန္တတန်ခိုးရှင်] ဘုရားသခင်ကို မည်သူမျှ မမြင်ဖူး။” ဒါပေမဲ့ သားတော်ဖြစ်တဲ့ယေရှုကို လူတွေမြင်ဖူးကြတယ်။ ယောဟန် ဒီလိုပြောတယ်– ‘နှုတ်ကပါဌ်တော် [ယေရှု] သည်လည်း လူ့ဇာတိအဖြစ်ကိုခံယူ၍ ငါတို့တွင် တည်နေတော်မူသည်ဖြစ်၍ သားတော်၏ဘုန်းကဲ့သို့ သူ၏ဘုန်းတော်ကို ငါတို့သည် မြင်ရကြပြီ။’ (ယောဟန် ၁:၁၄၊ ယုဒသန်ပြန်ဆိုတဲ့ သမ္မာကျမ်း) ဒါဆိုရင် သားတော်က အနန္တတန်ခိုးရှင် ဘုရားသခင်ရဲ့အစိတ်အပိုင်း ဘယ်လိုဖြစ်နိုင်ပါ့မလဲ။ ယောဟန်က နှုတ်ကပါဌ်တော်ဟာ “ဘုရားသခင်နှင့်အတူ” ရှိတယ်လို့လည်း ဖော်ပြတယ်။ ပုဂ္ဂိုလ်တစ်ဦးက တစ်စုံတစ်ယောက်နဲ့အတူရှိနေတယ်ဆိုတော့ တစ်ချိန်တည်းမှာ ဘယ်လိုလုပ်ပြီး အဲဒီလူဖြစ်နိုင်ပါ့မလဲ။ ဒါ့အပြင် ယောဟန် ၁၇:၃ မှာပါတဲ့အချက်အရ ယေရှုဟာ မိမိရဲ့ကောင်းကင်ခမည်းတော်နဲ့ ကွဲပြားခြားနားကြောင်း ရှင်းရှင်းလင်းလင်း ဖော်ပြထားတယ်။ ယေရှုက ခမည်းတော်ကို “မှန်သောဘုရားသခင်တစ်ဆူတည်း” လို့ခေါ်ခဲ့တယ်။ ယောဟန်ခရစ်ဝင်ကျမ်းအဆုံးပိုင်းမှာ ဒီလိုအကျဉ်းချုပ်ဖော်ပြထားတယ်– “ယေရှုသည် ဘုရားသခင်၏သားတော်၊ ခရစ်တော်ဖြစ်ကြောင်းကို သင်တို့ယုံကြည်စေရန် . . . ဤအရာများကို ရေးထားလျက်ရှိသတည်း။” (ယောဟန် ၂၀:၃၁) ယေရှုကို ဘုရားသခင်လို့မခေါ်ဘဲ ဘုရားသခင့်သားတော်လို့ ခေါ်ထားကြောင်း သတိပြုပါ။ ယောဟန်ခရစ်ဝင်ကျမ်းမှာပါတဲ့ ဒီထပ်ဆင့်အချက်အလက်တွေက ယောဟန် ၁:၁ ကိုဘယ်လိုနားလည်သင့်တယ်ဆိုတာ ဖော်ပြတယ်။ နှုတ်ကပါဌ်တော်ယေရှုဟာ မြင့်မားတဲ့ရာထူးရရှိထားတဲ့သဘောနဲ့ “ဘုရားတစ်ပါး” ဖြစ်တယ်။ အနန္တတန်ခိုးရှင်ဘုရားသခင်တော့ မဟုတ်ဘူး။

ကျောင်းဆရာနဲ့ ကျောင်းသားတွေရဲ့ ဥပမာကို ပြန်သုံးသပ်ကြည့်ပါ။ ဆရာရဲ့ထပ်ဆင့်ရှင်းပြချက်ကို နားထောင်ပြီးနောက်မှာတောင် တချို့ကျောင်းသားတွေက သံသယရှိနေတုန်းပဲလို့ ဆိုကြပါစို့။ သူတို့ ဘာလုပ်နိုင်သေးသလဲ။ အဲဒီအကြောင်းအရာနဲ့ပတ်သက်တဲ့ ထပ်ဆင့်အချက်အလက်အတွက် နောက်ဆရာတစ်ယောက်ဆီ သွားနိုင်တယ်။ အဲဒီဆရာက ပထမဆရာရဲ့ ရှင်းပြချက်မှန်တယ်လို့ အတည်ပြုပေးတယ်ဆိုရင် ကျောင်းသားအများစုရဲ့သံသယ  ရှင်းသွားနိုင်ပါတယ်။ အလားတူပဲ၊ ယေရှုနဲ့ အနန္တတန်ခိုးရှင်ဘုရားသခင်ရဲ့ ဆက်နွှယ်မှုနဲ့ပတ်သက်တဲ့ ကျမ်းရေးသူယောဟန်ရဲ့ ဖော်ပြချက်ကို သိပ်မသေချာဘူးဆိုရင် နောက်ထပ်အချက်အလက်တွေရရှိဖို့ ကျမ်းရေးသူနောက်တစ်ဦးဆီ သွားနိုင်ပါတယ်။ ဥပမာ၊ မဿဲကျမ်းကို သုံးသပ်ကြည့်ပါ။ ဒီလောကစနစ်ရဲ့နိဂုံးနဲ့ပတ်သက်ပြီး ယေရှုပြောခဲ့တာကို သူ ဒီလိုကိုးကားခဲ့တယ်– “ထိုနေ့ရက်နှင့် အချိန်နာရီကိုကား မည်သူမျှမသိ။ ကောင်းကင်တမန်တို့လည်း မသိ။ သားတော်လည်းမသိ။ ခမည်းတော်တစ်ပါးတည်းသာ သိတော်မူ၏။” (မ. ၂၄:၃၆) ဒီစကားတွေက ယေရှုဟာ အနန္တတန်ခိုးရှင်ဘုရားသခင်မဟုတ်ဘူးဆိုတာ ဘယ်လို အတည်ပြုပေးသလဲ။

ခမည်းတော်က သားတော်ထက် ပိုသိတယ်လို့ ယေရှုပြောနေတာဖြစ်တယ်။ ဒါပေမဲ့ ယေရှုဟာ အနန္တတန်ခိုးရှင်ဘုရားသခင်နဲ့ အတူတူဖြစ်တယ်ဆိုရင် သူ့ခမည်းတော်သိတဲ့အကြောင်းကို သူလည်းသိမှာပဲ။ ဒါကြောင့် ခမည်းတော်နဲ့ သားတော်ဟာ တန်းတူမဖြစ်နိုင်ဘူး။ ဒါပေမဲ့ တချို့က ‘ဒီစကားက ယေရှု မြေကြီးပေါ်မှာ လူသားအဖြစ် အသက်ရှင်စဉ်က ပြောခဲ့တဲ့စကားဖြစ်တယ်’ လို့ပြောကြတယ်။ အဲဒီလိုသာဆိုရင် သန့်ရှင်းသောဝိညာဉ်တော်နဲ့ပတ်သက်ပြီး ဘယ်လိုပြောမလဲ။ သန့်ရှင်းသောဝိညာဉ်တော်က ခမည်းတော်လိုပဲ ဘုရားသခင်ရဲ့အစိတ်အပိုင်းတစ်ခုဖြစ်မယ်ဆိုရင် ခမည်းတော်သိတဲ့အရာကို သန့်ရှင်းသောဝိညာဉ်တော်သိတယ်လို့ ယေရှု ဘာကြောင့် မပြောခဲ့တာလဲ။

သင်ဟာ ကျမ်းစာကို ဆက်လေ့လာတာနဲ့အမျှ ဒီအကြောင်းအရာနဲ့သက်ဆိုင်တဲ့ နောက်ထပ်ကျမ်းချက်များစွာနဲ့ အကျွမ်းဝင်လာမယ်။ အဲဒီကျမ်းချက်တွေက ခမည်းတော်၊ သားတော်၊ သန့်ရှင်းသောဝိညာဉ်တော်နဲ့ပတ်သက်တဲ့ အမှန်တရားကို ယုံကြည်စိတ်ချစေတယ်။—ဆာလံ ၉၀:၂; တမန်တော် ၇:၅၅; ကောလောသဲ ၁:၁၅။