၂၀၁၂၊ အောက်တိုဘာ ၂၀ ရက်နေ့မှာ ကိုရီးယားနိုင်ငံမှာရှိတဲ့ ယေဟောဝါသက်သေတွေဟာ ပြန်လည်မွမ်းမံထား၊ အသစ်ဆောက်လုပ်ထားတဲ့ ဌာနခွဲအဆောက်အဦတွေကို ယေဟောဝါထံ အပ်နှံရလို့ ဝမ်းသာခဲ့ကြတယ်။ အဲဒီအခါသမယက အထူးအဓိပ္ပာယ်ရှိခဲ့တယ်၊ ဘာကြောင့်လဲဆိုတော့ ညီအစ်ကိုညီအစ်မတွေဟာ သူတို့သစ္စာရှိရှိလုပ်ဆောင်ခဲ့ကြတဲ့ အနှစ် ၁၀၀ ကို ပြန်အမှတ်ရကြလို့ပဲ။ ဒါ့အပြင် ၂၀၁၂ ခုနှစ်မှာ ကြေညာသူအရေအတွက်က ပထမဆုံးအကြိမ်အနေနဲ့ ၁၀၀,၀၀၀ ကျော်သွားတယ်။ နိုင်ငံတွင်းက စေတနာ့ဝန်ထမ်း ၁,၂၀၀၊ ကိုးနိုင်ငံက အပြည်ပြည်ဆိုင်ရာဝန်ထမ်းနဲ့ စေတနာ့ဝန်ထမ်းပေါင်း ၂၃၉ ယောက်တို့ဟာ အဆောက်အဦသစ်တစ်ခု၊ ပုံနှိပ်စက်ရုံတစ်ခု၊ ရုပ်/သံစတူဒီယိုနဲ့ ကားပြင်တဲ့အလုပ်ရုံတစ်ခုကို ဆောက်လုပ်ခဲ့ကြတယ်။ အဲဒီအပြင် ရှိပြီးသားအဆောက်အဦတွေကိုလည်း အသစ်နီးနီး မွမ်းမံပြင်ဆင်ခဲ့ကြတယ်။

 အုပ်ချုပ်ရေးအဖွဲ့ဝင်ဖြစ်တဲ့ အန်တိုနီမောရစ်က အားရှိစရာ အပ်နှံပွဲဟောပြောချက်ပေးခဲ့ပြီး တက်ရောက်သူ ၃,၀၃၇ ယောက်ရှိခဲ့တယ်။ နောက်တစ်နေ့မှာ ခန်းမကြီးတစ်ခုမှာ အထူးစည်းဝေးလုပ်ခဲ့တယ်၊ ကိုရီးယားနိုင်ငံမှာရှိတဲ့ အသင်းတော် ၁,၃၀၀ ကျော်ကို အင်တာနက်နဲ့ ချိတ်ဆက်ပေးခဲ့တယ်။ အစီအစဉ်ကို ယေဟောဝါသက်သေတွေနဲ့ စိတ်ဝင်စားသူ ၁၁၅,၇၈၂ ယောက် တက်ရောက်ခဲ့တယ်။

လိုင်ဘေးရီးယားနိုင်ငံက ယေဟောဝါကိုဝတ်ပြုသူတွေရဲ့သမိုင်းမှာ ၂၀၁၃၊ မတ် ၉ ရက်နေ့ဟာ မမေ့နိုင်တဲ့မှတ်တိုင်တစ်ခု ဖြစ်နေပါလိမ့်မယ်။ ၁၁ နိုင်ငံက ဧည့်သည်တွေဟာ ပြန်လည်မွမ်းမံထား၊ တိုးချဲ့ထားတဲ့ဌာနခွဲရုံး အပ်နှံပွဲကို တက်ရောက်ခဲ့ကြတယ်။ အားလုံးက အုပ်ချုပ်ရေးအဖွဲ့ဝင် ဂိုင်းပီယပ်စ်ရဲ့ ဟောပြောချက်ကို ပျော်ပျော်ရွှင်ရွှင် နားထောင်ခဲ့ကြတယ်။ ဆယ်နှစ်ကျော်ဖြစ်ပွားခဲ့တဲ့ ပြည်တွင်းစစ်ကြောင့် ရပ်ထားခဲ့ရတဲ့ ဆောက်လုပ်ရေးစီမံကိန်းတွေ ပြန်လုပ်ဆောင်ခဲ့တယ်။ အရင်တုန်းက သူပုန်တွေပုန်းခိုတဲ့နေရာနဲ့ ဒုက္ခသည်စခန်းဖြစ်ခဲ့တဲ့ ဌာနခွဲနဲ့ကပ်ရက် မြေကွက်ပေါ်မှာပါ တိုးချဲ့ဆောက်လုပ်ခဲ့တယ်။ ဗေသလအိမ်သား ၅၁ ယောက်ဟာ ၃၅ ခန်းပါတဲ့ လူနေအဆောက်အဦ၊ ပြန်မွမ်းမံထားတဲ့ ရုံးခန်း၊ ထုပ်ပို့ရေးဌာန ဂိုဒေါင်အသစ်၊ ပြုပြင်ထိန်းသိမ်းရေး  အဆောက်အဦအသစ်၊ စားဖိုဆောင်နဲ့ စားသောက်ခန်းအသစ်တွေ ရတဲ့အတွက် ဝမ်းသာကြတယ်။

ဂျော်ဂျီယာသမ္မတနိုင်ငံဟာ ဘုရားရေးရာဘက်မှာ စိတ်ထက်သန်သူတွေ နေထိုင်တဲ့နေရာဖြစ်တယ်။ ဆိုဗီယက်ပြည်ထောင်စုပြိုကွဲပြီးနောက်မှာ ယေဟောဝါသက်သေတွေရဲ့လုပ်ငန်း တစ်ရှိန်ထိုးတိုးတက်လာတာနဲ့ ပြင်းထန်တဲ့ နှိပ်စက်ညှဉ်းပန်းတွေ စတင်လာတော့တယ်။ အခုချိန်မှာတော့ ဆန့်ကျင်မှုတွေ တော်တော်လေး လျော့နည်းသွားပြီ။ ၂၀၁၃၊ ဧပြီ ၆ ရက်နေ့မှာ ဂျော်ဂျီယာနိုင်ငံမှာ ထူးခြားတဲ့သမိုင်းမှတ်တိုင်တစ်ခု စိုက်ထူနိုင်ခဲ့တယ်။ အုပ်ချုပ်ရေးအဖွဲ့ဝင် ဒေးဗစ်စပလိန်းက ပြန်လည်မွမ်းမံ၊ တိုးချဲ့ထားတဲ့ ဌာနခွဲအဆောက်အဦတွေ၊ နယ်လှည့်ကြီးကြပ်မှူးတွေနဲ့ သူတို့ရဲ့ဇနီးတွေအပါအဝင် ဧဝံဂေလိသတင်းကောင်း ဟောပြောသူတွေအတွက် သင်တန်းကျောင်းဆောင်သစ်တစ်ခုကို ဆပ်ကပ်အပ်နှံတဲ့ ဟောပြောချက် ပေးခဲ့တယ်။ ၂၄ နိုင်ငံက ဧည့်သည်ညီအစ်ကိုညီအစ်မ ၃၃၈ ယောက်ဟာ ဂျော်ဂျီယာနိုင်ငံကသက်သေခံ ၈၀၀ နဲ့အတူ အပ်နှံပွဲအစီအစဉ် တက်ရောက်ခဲ့ကြတယ်။

နောက်တစ်နေ့မှာ ညီအစ်ကိုစပလိန်းရဲ့ အထူးဟောပြောချက်ကို ဂျော်ဂျီယာနိုင်ငံတစ်ဝန်းလုံးမှာရှိတဲ့ အသင်းတော်တွေမှာ ရုပ်/သံချိတ်ဆက် ပြသခဲ့ပြီး တက်ရောက်သူ ၁၅,၂၀၀ ရှိခဲ့တယ်။ ဒီအပြည်ပြည်ဆိုင်ရာ အခါသမယက လူအများကြီးကို စိတ်လှုပ်ရှားစေခဲ့တယ်။ ညီအစ်ကိုလေးတစ်ယောက်က “ကမ္ဘာသစ်က ဘာနဲ့တူမလဲဆိုတာ အခု ကျွန်တော်သိသွားပြီ” လို့ပြောခဲ့တယ်။

၂၀၁၃၊ ဇွန် ၂၉ ရက်နေ့မှာ မြန်မာနိုင်ငံ၊ ရန်ကုန်မြို့မှာ သုံးထပ်ရှိတဲ့ ဗေသလအဆောက်အဦသစ်ကို အပ်နှံခဲ့တယ်။ အုပ်ချုပ်ရေးအဖွဲ့ဝင် ဂိုင်းပီယပ်စ်က အပ်နှံပွဲဟောပြောချက်ပေးခဲ့ပြီး ၁၁ နိုင်ငံက ဧည့်သည်တွေအပါအဝင် တက်ရောက်သူ ၁,၀၁၃ ယောက်ရှိခဲ့တယ်။ ရန်ကုန်အပြည်ပြည်ဆိုင်ရာလေဆိပ်မှာ ဧည့်သည်တွေကို ကြိုဆိုနေတဲ့ ညီအစ်ကိုညီအစ်မတွေဆီကို ယေဟောဝါသက်သေတွေကို ပိတ်ပင်ထားတဲ့နိုင်ငံတစ်ခုကလာတဲ့ လူတစ်ယောက် ချဉ်းကပ်လာတယ်။ သူက ညီအစ်ကိုတွေကိုင်ထားတဲ့ “ယေဟောဝါသက်သေတွေကို ကြိုဆိုပါတယ်” ဆိုတဲ့ ဆိုင်းဘုတ်ကို လက်ညှိုးထိုးပြီး “ခင်ဗျားတို့က အမှုတစ်ခုအတွက် သက်သေလိုက်ပေးမယ့်သူတွေကို ကြိုဆိုနေတာလား” လို့မေးတယ်။  ညီအစ်ကိုတွေက “မဟုတ်ပါဘူး၊ ကျွန်တော်တို့ရဲ့မိတ်ဆွေတွေကို လာကြိုတာပါ” လို့ပြန်ဖြေတယ်။ ဒါနဲ့ အဲဒီလူက “ဒါဆို ယေဟောဝါက ဘယ်သူလဲ” လို့မေးတယ်။ ညီအစ်ကိုညီအစ်မတွေ သူ့ကို ကောင်းကောင်းသက်သေခံလိုက်မယ်ဆိုတာ ပြောနေစရာတောင် မလိုပါဘူး။ အပ်နှံပွဲပြီးတဲ့နောက်တစ်နေ့မှာ မြန်မာကွန်ဗင်းရှင်းစင်တာမှာ အထူးစည်းဝေးလုပ်ခဲ့တယ်၊ ညီအစ်ကို ပီးယပ်စ်က “သိနားလည်မှုရှိတဲ့စိတ်နှလုံးနဲ့ ယေဟောဝါကို အမှုဆောင်ပါ” ဆိုတဲ့ ဟောပြောချက်ကို ဟောခဲ့တယ်။ အစီအစဉ်ကို မြန်မာနိုင်ငံတစ်ဝန်းမှာရှိတဲ့ နေရာခြောက်ခုမှာ တယ်လီဖုန်းလိုင်းနဲ့ ချိတ်ဆက်ပေးခဲ့ပြီး စုစုပေါင်း ၂,၉၆၃ ယောက်က ဟောပြောချက်ကို တစ်ပြိုင်တည်း နားထောင်ခဲ့ရတယ်။ ရန်ကုန်မြို့ကညီအစ်ကိုညီအစ်မတွေကို အထူးစည်းဝေးကိုပို့ပေးခဲ့တဲ့ ဘတ်စကားဒရိုင်ဘာတစ်ယောက်က ဒီလိုပြောတယ်– “ခင်ဗျားတို့လူတွေက တခြားဘာသာကလူတွေနဲ့ တခြားစီပဲ။ ခင်ဗျားတို့က ယဉ်ကျေးတယ်၊ သပ်သပ်ရပ်ရပ် ဝတ်စားတယ်၊ ပြီးတော့ ကြင်နာတတ်တယ်။ ကျွန်တော် အငှားလိုက်တဲ့ဘတ်စကား မောင်းလာတာ နှစ်အတော်ကြာပြီ။ ခင်ဗျားတို့လို ဣန္ဒြေသိက္ခာရှိတဲ့သူတွေကို မတွေ့ဖူးဘူး။”

၂၀၁၃၊ ဇူလိုင် ၃ ရက်နေ့မှာ အုပ်ချုပ်ရေးအဖွဲ့ဝင် စတီဗင်လတ်က တိုးချဲ့ထားတဲ့ ဌာနခွဲအဆောက်အဦသစ်တွေကို အပ်နှံတဲ့ဟောပြောချက် ဟောတဲ့ အခါ မော်လ်ဒိုဗာနိုင်ငံက ယေဟောဝါရဲ့သစ္စာရှိကျေးကျွန်တွေ ပျော်ရွှင်ခဲ့ကြတယ်။ တိုးချဲ့အဆောက်အဦတွေမှာ စာအုပ်သိုလှောင်ရုံတစ်ခု၊ လူနေအိပ်ခန်း ဆယ်ခန်းပါတဲ့ သုံးထပ်အဆောက်အဦတစ်ခုနဲ့ အသင်းတော်ခုနစ်ခု အသုံးပြုနေတဲ့ အထပ်နှစ်ထပ်ရှိတဲ့ နိုင်ငံတော်ခန်းမတစ်ခုပါတယ်။ မော်လ်ဒိုဗာဗေသလအိမ်သား ၃၃ ယောက်ဟာ ဂျာမနီ၊ အိုင်ယာလန်၊ နယ်သာလန်၊ ရိုမေးနီးယား၊ ရုရှား၊ ယူကရိန်းနဲ့ အမေရိကန်နိုင်ငံတွေက ဧည့်သည်တွေကို တပျော်တပါး ကြိုဆိုခဲ့ကြတယ်။ တက်ရောက်သူတွေထဲမှာ သက်သေခံတွေရဲ့အလုပ်ကို ပိတ်ပင်ခဲ့ချိန်က ယေဟောဝါကို သစ္စာရှိရှိ အမှုဆောင်ခဲ့တဲ့ ညီအစ်ကိုညီအစ်မတွေလည်းပါတယ်။ သူတို့ထဲက တချို့ဆိုရင် စာပေတွေကို ကူးပြီး ဖြန့်ဝေတဲ့နေရာမှာ ကူညီပေးခဲ့သူတွေဖြစ်တယ်။ ပရိသတ်ထဲမှာ ရောက်ရှိနေသူများစွာဟာ အရင် ဆိုဗီယက်ပြည်ထောင်စုခေတ်က ယေဟောဝါသက်သေတွေကိုဆန့်ကျင်တဲ့ ကင်ပိန်းအမျိုးမျိုးမှာ မိဘတွေနဲ့အတူ ဆိုက်ဘေးရီးယားကို နယ်နှင်ဒဏ်ပေးခံခဲ့ရသူတွေဖြစ်တယ်။ တနင်္ဂနွေနေ့မှာ ညီအစ်ကိုလတ်ဟောတဲ့ စိတ်လှုပ်ရှားစရာ ဟောပြောချက်ကို ပရိသတ် ၁၄,၇၀၅ ယောက်အတွက် ရိုမေးနီးယားစကား၊ ရုရှားစကားနဲ့ ဘာသာပြန်ပေးခဲ့တယ်။ အဲဒါက မော်လ်ဒိုဗာနိုင်ငံက ယေဟောဝါသက်သေတွေအတွက် လူအများဆုံး စုဝေးမှုတစ်ခုပဲ။

“အားမလျှော့ဘဲ အစဉ်အမြဲဆုတောင်း” သင့်တယ်လို့ ယေရှုပြောခဲ့တယ်။ (လု. ၁၈:၁) ဆုတောင်းတာက သင့်မျှော်လင့်ချက် ပိုခိုင်ခံ့လာစေတယ်။ ဒါကြောင့် “မခြားမလပ်ဆုတောင်း” ပါ၊ ‘ဆုတောင်းခြင်းမှာ စွဲမြဲပါ။’ (၁ သက်. ၅:၁၇; ရော. ၁၂:၁၂) သင် အဲဒီလိုလုပ်တဲ့အခါ “ငြိမ်သက်ခြင်း၏အရှင် ဘုရားသခင်သည် သင်တို့ကို မိမိအလိုတော်ဆောင်ရွက်ရန် ကောင်းသောအရာရှိသမျှနှင့် ပြည့်စုံစေတော်မူပါစေ။ မျက်မှောက်တော်တွင် မိမိနှစ်သက်တော်မူရာကို ငါတို့အထဲသို့ ယေရှုခရစ်အားဖြင့် လုပ်ဆောင်နေ . . . တော်မူပါစေ။”—ဟေဗြဲ ၁၃:၂၀၊ ၂၁။