“ယေဟောဝါရဲ့ အကြောင်းကို မိခင်ဘာသာစကား​နဲ့ ကြားခွင့်​ရလို့ သိပ်​ကျေးဇူးတင်​ကြောင်း ဆုတောင်း​တိုင်း ပြောလေ့ရှိ​တယ်” လို့ ဂူလီဇာ ပြောတယ်။

ဂူလီဇာ ယေဟောဝါသက်သေ​တွေနဲ့ ပေါင်းသင်း​နေတာ ရှစ်နှစ်​လောက် ရှိပြီ။​ ဒါပေမဲ့ မိခင်ဘာသာစကား​ဖြစ်တဲ့ ကာဒစ်ရှ်​စကားနဲ့ အစည်းအဝေးတွေကို တက်ရောက်​ပြီးမှ​ပဲ နှစ်ခြင်းခံ​ခဲ့တယ်။ ဂူလီဇာ​ဟာ မကြာသေး​ခင်​နှစ်တွေ​အတွင်း​ အမှန်တရားကို တုံ့ပြန်​ခဲ့တဲ့ ကာဒစ်ရှ်​လူမျိုးများ​စွာ​ထဲက တစ်ယောက် ဖြစ်တယ်။ ကာဒစ်ရှ်​လူမျိုး​ဆိုတာ ဘယ်သူ​တွေလဲ။

 ကာဒစ်ရှ်​လူမျိုးဟာ အရှေ့အလယ်ပိုင်း​မှာ အခြေချ​နေထိုင်ခဲ့​တာ ရာစုနှစ်​များစွာ ရှိနေ​ပြီ။ ကျမ်းစာမှာ ဖော်ပြထားတဲ့ ရှေးခေတ်​မီးဒီးယား​မျိုးဆက် ဖြစ်တယ်လို့ ကျမ်းပညာရှင်​တချို့ ယူဆကြတယ်။ (၂ ဘု. ၁၈:၁၁။ တ. ၂:၉) သူတို့ရဲ့ ဘာသာစကား​ဟာ အီရန်​ဘာသာစကား​အုပ်စု​တွေမှာ ပါဝင်တယ်။

အခုခေတ်​မှာ အာမေးနီးယား၊ အီရန်၊ အီရတ်၊ ဆီးရီးယား၊ တူရကီ အပါအဝင် နိုင်ငံများ​စွာ​မှာ ကာဒစ်ရှ်​လူမျိုး သန်းပေါင်းများစွာ နေထိုင်​ကြ​တယ်။ ဂျော်ဂျီယာမှာ ကာဒစ်ရှ်​လူဦးရေ ၂၀,၀၀၀ လောက် ရှိတယ်။ အများ​အားဖြင့် သူတို့ဟာ ဘုရားသခင်ကို ကြောက်ရွံ့​ပြီး ဘာသာရေး​ကိစ္စတွေ​ကို အလွန်​လေးစား​ကြ​တယ်။

အခု ဂျော်ဂျီယာမှာ ကာဒစ်ရှ်​ကြေညာသူ ၅၀၀ ရှိပြီး ကာဒစ်ရှ်​စကားပြော အသင်းတော် သုံးခု ရှိတယ်။ ၂၀​၁၄ ခုနှစ်မှာ ပထမဦးဆုံး ကာဒစ်ရှ် ခရိုင်​အစည်းအဝေး​ကို တဘီလီစီ​မြို့မှာ ကျင်းပ​နိုင်ခဲ့​လို့ ဝမ်းသာပီတိ ဖြစ်ခဲ့​ကြရတယ်။ အာမေးနီးယား၊ ဂျာမနီ၊ တူရကီ၊ ယူကရိန်း​နိုင်ငံ​တို့​က ကိုယ်စားလှယ်​တွေ တက်ရောက်​ခဲ့တယ်။