ပြီးခဲ့တဲ့နှစ်ရဲ့ ပေါ်လွင်ချက်များ
ခရစ်ယာန်အသက်တာနဲ့ အမှုဆောင်လုပ်ငန်း အစည်းအဝေးသစ်
၂၀၁၅၊ အောက်တိုဘာ ၃ ရက်၊ ပင်စီဗေးနီးယား ကင်းမျှော်စင် သမ္မာကျမ်းစာနဲ့ ဝေစာအသင်း နှစ်ပတ်လည် အစည်းအဝေးမှာ အုပ်ချုပ်ရေးအဖွဲ့ဝင် ညီအစ်ကို အန်တိုနီ မောရစ်က ဟောပြောသွန်သင်ခြင်းသင်တန်း၊ လုပ်ငန်းတော် အစည်းအဝေးနဲ့ အသင်းတော်ကျမ်းစာလေ့လာမှုကို ခရစ်ယာန်အသက်တာနဲ့ အမှုဆောင်လုပ်ငန်း အစည်းအဝေးသစ်နဲ့ အစားထိုးလိုက်ကြောင်း ကြေညာခဲ့တယ်။ ကျွန်ုပ်တို့၏ နိုင်ငံတော်ဓမ္မအမှု ကိုလည်း ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် ဆိုတဲ့ ရောင်စုံ ရှစ်မျက်နှာ လစဉ်ထုတ် စာစောင်နဲ့ အစားထိုးမှာဖြစ်ကြောင်း ရှင်းပြခဲ့တယ်။ အဲဒီစာစောင်မှာ အပတ်စဉ် အစည်းအဝေး အစီအစဉ် ပါရှိပြီး ကိုယ်ပိုင်ကျမ်းစာဖတ်ရှုခြင်းကို ပိုစိတ်ဝင်စားဖွယ်ဖြစ်စေမယ့် သရုပ်ဖော်ပုံတွေ ပါဝင်တယ်။
အစည်းအဝေးသစ်ကို အပိုင်းသုံးပိုင်း ခွဲထားတယ်–
-
၁။ ကျမ်းစာထဲက အဖိုးတန်ဘဏ္ဍာများ။ ဒီအပိုင်းရဲ့ ပထမကဏ္ဍက အပတ်စဉ် ကျမ်းစာဖတ်ရှုမှုနဲ့ လေ့ကျင့်ခန်းစာစောင်မှာ ပါဝင်တဲ့ သရုပ်ဖော်ပုံကို အခြေခံထားတဲ့ ဆယ်မိနစ် ဟောပြောချက် ဖြစ်တယ်။ “ရှာဖွေလေ့လာ ဘုရားရေးရာရတနာ” ဆိုတဲ့ ဒုတိယကဏ္ဍကတော့ အပတ်စဉ် ကျမ်းစာဖတ်ရှုမှုအကြောင်း ရှစ်မိနစ်ကြာ မေးဖြေဆွေးနွေးခန်း ဖြစ်တယ်။ ပြီးနောက် လေးမိနစ်ကြာ ကျမ်းစာဖတ်ရှုမှုကို ဆက်ပြုလုပ်တယ်။
-
၂။ အမှုဆောင်လုပ်ငန်းမှာ ကျင့်သုံးပါ။ အများအားဖြင့် ဒီအပိုင်းမှာ ကျောင်းသားသုံးယောက်က ဦးဆုံးတွေ့ဆုံချိန်၊ ပြန်လည်ပတ်မှု၊ ကျမ်းစာသင်အံမှုမှာ ဘယ်လို သွန်သင်တယ်ဆိုတာ သရုပ်ပြတင်ဆက်ကြတယ်။
-
၃။ ခရစ်ယာန်အသက်တာလမ်းစဉ်။ ဒီအပိုင်းမှာတော့ ကျမ်းစာမူတွေကို နေ့စဉ်ဘဝမှာ လက်တွေ့ကျင့်သုံးနိုင်ပုံအကြောင်း ဆွေးနွေးတယ်။ ဒီအပိုင်းရဲ့ အဓိကဏ္ဍကတော့ အသင်းတော် ကျမ်းစာလေ့လာမှု မေးဖြေဆွေးနွေးခန်းပါပဲ။
ကမ္ဘာတစ်ဝန်းမှာရှိတဲ့ ကြေညာသူတွေဟာ အစည်းအဝေးသစ်မှာ ရရှိတဲ့ လက်တွေ့လေ့ကျင့်မှုအတွက် ကျေးဇူးတင်ကြောင်း ဖော်ပြကြတယ်။ ဩစတြေးလျနိုင်ငံက ညီအစ်ကိုတစ်ယောက် ရေးတယ်– “အသက်တာနဲ့ အမှုဆောင်လုပ်ငန်း အစည်းအဝေးက သိပ်ကောင်းတယ်။ အကြောင်းအရာက ကျွန်တော်တို့ရဲ့ လက်ရှိအသက်တာနဲ့ ပိုကိုက်ပြီး တင်ဆက်မှုတွေက ရိုးရှင်းတယ်။ အပိုင်းတွေက လိုရင်းတိုရှင်းဖြစ်ပြီး အထူးသဖြင့် ဗီဒီယိုတွေ၊ ကလေးတွေရဲ့ ပါဝင်မှုတွေကြောင့် စိတ်ဝင်စားစရာ သိပ်ကောင်းလို့ အစည်းအဝေး ပြီးသွားတာ သိပ်မြန်သလိုပဲ။”
အီတလီနိုင်ငံက အကြီးအကဲအဖွဲ့တစ်ဖွဲ့ ရေးတယ်– “ဒီအစည်းအဝေးသစ်က အသေအချာ ပြင်ဆင်ဖို့ ယောက်တိုင်းကို လှုံ့ဆော်ပေးလို့ သွန်သင်ခြင်းစွမ်းရည် တိုးတက်လာတာ ကျွန်တော်တို့ သတိထားမိတယ်။ ဒီကြားရက် အစည်းအဝေးသစ်က မိမိလူမျိုးကို ယေဟောဝါရဲ့ သွန်သင်နည်း တိုးတက်
ပြောင်းလဲလာတာ ထင်ရှားစေတယ်။ ၁၅ နှစ်အရွယ် ကြေညာသူတစ်ယောက်က ‘အရင်ကဆိုရင် အစည်းအဝေးတစ်ခုလုံးကို အာရုံစိုက်ဖို့ သိပ်ခက်တယ်။ ဒီအစည်းအဝေးသစ်က အာရုံစိုက်နိုင်ဖို့၊ အိမ်မှာကတည်းက ပြင်ဆင်လာဖို့ ကူညီပေးတယ်’ လို့ ရေးခဲ့တယ်။”ဩစတြီးယားနိုင်ငံက မိသားစုတစ်စု ဒီလိုရေးတယ်– “ဆယ်နှစ်အရွယ်သမီးနဲ့အတူ အပတ်စဉ် ကျမ်းစာဖတ်ရတာ သိပ်ခက်တယ်။ ဒါပေမဲ့ ‘ကျမ်းစာထဲက အဖိုးတန်ဘဏ္ဍာများ’ ဆိုတဲ့အပိုင်းက လွတ်လွတ်လပ်လပ် မှတ်ချက်ပေးဖို့ လှုံ့ဆော်ပေးတယ်။ အခုတော့ သုံးယောက်စလုံး အပတ်စဉ် ကျမ်းစာဖတ်ရှုခြင်းအတွက် ပြင်ဆင်ရတာ ပျော်နေပြီ။ ပိုကောင်းတာက သမီးနဲ့ ယေဟောဝါရဲ့ ဆက်ဆံရေး တိုးတက်လာတာပါပဲ။”
ဂျာမနီနိုင်ငံက အဲနက်စ်လည်း ဒီလိုပြောတယ်– “အကြောင်းအရာကို ပြင်ဆင်ဖို့၊ ပိုနက်နက်နဲနဲ တွေးတောဖို့ အားတက်လာတယ်။ တစ်ခါမှ ဒီလောက်ရှာဖွေလေ့လာမှု မလုပ်ဖူးဘူး။ အခု ယေဟောဝါနဲ့ ဆက်ဆံရေး ပိုကောင်းလာတယ်။ စာတန့်လောကကြောင့် ပင်ပန်းနွမ်းနယ်ရပေမဲ့ အစည်းအဝေးတွေကြောင့် အားပြည့်လာပြီး ဆက်ခံရပ်ဖို့ အကူအညီ ရတယ်။”
ဆော်လ်မွန်ကျွန်းစုမှာရှိတဲ့ အသင်းတော်တွေလည်း ကြားရက်အစည်းအဝေးသစ်ကို ပျော်မွေ့နေကြပြီး အကျိုးရရှိဖို့ ကြိုးစားအားထုတ်နေကြတယ်။ အသင်းတော်များစွာဟာ လျှပ်စစ်မီး၊ အင်တာနက် မရှိတဲ့ ဝေးလံတဲ့ဒေသတွေမှာ တည်ရှိပြီး ညီအစ်ကို/မတွေဟာ တော်တော်ရိုးရိုးရှင်းရှင်း နေထိုင်ကြတယ်။ အစည်းအဝေးမှာ ဗီဒီယိုပြဖို့ လိုအပ်တဲ့စက်ပစ္စည်းတွေနဲ့ လစဉ် ဗီဒီယိုကို ဘယ်လို ရနိုင်မလဲ။ မာလိုင်တာကျွန်း အသင်းတော်တစ်ခုမှာရှိတဲ့ ကြေညာသူတွေက အုန်းသီးခြောက် အတူရောင်းဖို့၊ ရလာတဲ့ ရန်ပုံငွေကို အသင်းတော်ကို ပေးဖို့ ဆုံးဖြတ်လိုက်ကြတယ်။ ဒါမှ ဆိုလာအားနဲ့ လည်ပတ်နိုင်မယ့် ဗီဒီယိုပြစက်လေးတစ်လုံး ဝယ်နိုင်မယ်။ လတိုင်း ဗီဒီယိုတွေ ရနိုင်ဖို့ ညီအစ်ကိုတွေက အင်တာနက်လိုင်းရှိတဲ့ အနီးဆုံး နေရာကို သွားပြီး ဖိုင်တွေ ကူးယူကြတယ်။ ပြီးနောက် အသင်းတော်မှာရှိတဲ့ တခြားညီအစ်ကို/မတွေကို ဝေမျှပေးကြတယ်။
“ကျွန်တော်က အမြင်အာရုံနဲ့ဆို ပိုသင်ယူနိုင်သလိုပဲ။ ဒီလိုပဲ ယက်ကန်ယက်ကန်နဲ့ ကြိုးစားလာတာ နှစ် ၄၀ ကျော်ပြီ။ တခြားတစ်ယောက်ကို ပြန်ရှင်းပြနိုင်လောက်တဲ့အထိ နားလည်လာအောင် အကြိမ်ပေါင်းများစွာ ဖတ်ရတယ်။ ဒါကြောင့် ရုပ်မြင်သင်ထောက်ကူပစ္စည်းနဲ့ သွန်သင်ပေးတာအားလုံးအတွက် အုပ်ချုပ်ရေးအဖွဲ့ကို သိပ်ကျေးဇူးတင်တယ်။ ကျမ်းနိဒါန်း ဗီဒီယိုတွေက အံ့မခန်းပဲ။ လေ့ကျင့်ခန်းစာစောင်မှာပါတဲ့ သရုပ်ဖော်ပုံတွေကလည်း ကျွန်တော် တကယ်လိုအပ်နေတာတွေပါ။ လူမျိုးတော်အတွက် သင်တို့ရဲ့ ကြိုးစားအားထုတ်မှုကို ယေဟောဝါ ကောင်းချီးပေးနေတာ ထင်ရှားတယ်။ ကျေးဇူးအများကြီးတင်ပါတယ်” ဆိုပြီး အမေရိကန်ပြည်ထောင်စုက ညီအစ်ကိုတစ်ယောက် ရေးခဲ့တယ်။