နိုင်ငံ​အတွင်း ဝင်ရောက်​လာတဲ့ ဒုက္ခသည်၊ ပြောင်းရွှေ့​လာ​သူများ​စွာ​ကြောင့် ဂျာမနီ​နိုင်ငံရဲ့ ဘာသာခြား​စကားပြော လယ်ကွင်း ကြီးမား​လာတယ်။ မကြာသေး​ခင် ကိုးလ​အတွင်း ဘာသာခြား​စကားပြော အုပ်စု​နဲ့ ပဏာမ​အုပ်စု ၂၂၉ ခု​ကို စတင်​ဖွဲ့စည်း​ခဲ့တယ်။ ကြေညာသူ ၈၀၀ လောက်​ဟာ ဘာသာစကား ၁၃ မျိုး​ရဲ့ ဘာသာစကား​သင်တန်း ၃၀ လောက်​ကို တက်ရောက်​နေကြတယ်။

ညီအစ်ကိုတွေ​က ကြိုဆို​ရေး​ဌာန​တွေမှာ ဒုက္ခသည်​တွေကို ဟောပြော​ကြ​တယ်။ နေရာ ၂၀​၀ ကျော်​မှာ လူထုရှေ့​သက်သေခံ လက်​တွန်း​စင်​တွေကို သုံးပြီး​ စာပေ ၆​၄၀,၀၀၀ လောက် ဝေငှ​ကြရတယ်။

 အုပ်ချုပ်ရေးအဖွဲ့​က ၂၀​၁၆၊ မေ​လ​က​နေ ဇူလိုင်​လ​အထိ အထူးကင်ပိန်း ပြုလုပ်​ခွင့် ပြု​ခဲ့တယ်။ ခုနစ်​နိုင်ငံ​က အာရဘီ​စကားပြော ကြေညာသူ ၇၀၀ လောက်​ဟာ အာရဘီ​စကားပြော အုပ်စုကြီး​ကို ဟောပြော​ဖို့ ဩ​စ​တြီး​ယား​နဲ့ ဂျာမနီမှာ​ရှိတဲ့ ဆယ်​နေရာ​ကို ခရီးနှင်​လာကြတယ်။

ဘလီဇ်​နိုင်ငံ၊ ဖာ​ဘာ​ရု​တ်​ခရီအော အသင်းတော်မှာရှိတဲ့ ကြေညာသူ ၅၀ ဟာ ရပ်ကွက်​မှာ ခြေကျင်​လျှောက်​ပြီး သက်သေခံ​လေ့ရှိတယ်။ ညီအစ်​ကို​အများစုဟာ ချို့တဲ့​ပေ​မဲ့ ရက်ရောမှု​ပြဖို့ အခွင့်အရေး ရှာယူ​ကြ​တယ်။ လွန်ခဲ့​တဲ့​နှစ်တွေ​တုန်းက ညီအစ်ကိုတွေ တစ်အိမ်တက်ဆင်း ဟောပြော​ရင်း ဖုန်ထူ​တဲ့ လမ်းပေါ်​မှာ အ​ကြွေ​စေ့​တွေ ကောက်​ရကြ​တယ်။ အဲဒီအချိန်ကစပြီး နှစ်​ကုန်ခါနီး​တိုင်း ကောက်​ရထားတဲ့ အ​ကြွေ​စေ့​တွေကို ဆေးကြော၊ အမျိုးအစား ခွဲ​ပြီး ရေတွက်​ကြ​တယ်။

အ​ကြွေ​စေ့​အများစုက တန်ဖိုး​နည်း (အမေရိကန် ဆင့်​ဝ​က်) ပေ​မဲ့ နှစ်​တိုင်း အမေရိကန် ဒေါ်လာ ၂၂၅ နဲ့ ညီမျှ​တဲ့ အ​ကြွေ​စေ့​တွေ ရရှိ​ကြ​တယ်။ ညီအစ်ကိုတွေ​က တစ်ဝက်​ကို ဒေသခံ နိုင်ငံတော်ခန်းမ ကုန်ကျစရိတ်​အတွက်​ပေးပြီး ကျန်​တစ်ဝက်​ကိုတော့ ကမ္ဘာချီလုပ်ငန်း ထောက်ပံ့​ဖို့ ပို့ပေး​ကြ​တယ်။

ဘူရွန်ဒီ​နိုင်ငံ ဘုရားရေးရာ သမိုင်း​မှာ အထူးခြားဆုံး​ဖြစ်ရပ်​တစ်ခု ၂၀​၁၆၊ မတ် ၅ ရက်မှာ ဖြစ်ပျက်​ခဲ့တယ်။ ဌာနချုပ်​ကိုယ်စားလှယ် အန်​တို​နီ ဂ​ရစ်​ဖင်​ရဲ့ ဌာနခွဲ​လည်ပတ်မှု​အတွင်းမှာ​ပေါ့။ အသင်းတော်တွေ​အတွက် အထူး​အစီ​အစဉ် တစ်ခုလုံး​ကို နိုင်ငံ​ပိုင် အဓိက ရေဒီယို​အသံလွှင့်ရုံ​က​နေ ထုတ်လွှင့်​ခဲ့တယ်။ လူ​လေး​သန်း​လောက် နားဆင်​ခဲ့တယ်​လို့ ခန့်မှန်း​ရတယ်။

ရေဒီယို အသံလွှင့်​မှုက သက်သေခံမှု​ကောင်း ဖြစ်စေပြီး မှတ်ချက်​ကောင်း အတော်များများ ကြားခဲ့​ရတယ်။ အသံလွှင့်​တာ​ကို ကူညီပေး​တဲ့ ရေဒီယို  နည်းပညာ​ရှင်​တစ်ယောက်က “ဒီလို​အစီအစဉ်​တွေ ထပ်​လုပ်​ရမှာ” လို့ပြောတယ်။ ရေဒီယို​အရာရှိ​တစ်ယောက်က​လည်း “အသက်​ပေါင်း​များစွာကို ကျိန်းသေ​ကယ်တင်​နိုင်မယ့် ဒီလို​အစီအစဉ်​တွေ ဆက်​ထုတ်လွှင့်​ဖို့ အားပေးပါ​တယ်” ဆိုပြီး ရေးခဲ့တယ်။ မြို့ထဲ​က ဘတ်စကား၊ တ​က္က​စီ​များစွာ​မှာ အစီအစဉ်​ကို ဖွင့်​ခဲ့ကြတယ်။

၂၀​၁၆ အောက်မေ့ရာပွဲ မတိုင်ခင်​ရက်မှာ နီပေါ​နိုင်ငံ၊ သီးခြား​အုပ်စု​တစ်ခု​က ညီအစ်ကိုတွေ​ဟာ ငှားရမ်း​ထားတဲ့ ခန်းမ​ဘေး​က ကျောင်းမှာ ဂီတ​ဖျော်ဖြေပွဲ​ကြီး ရှိနေ​မှန်း သိလိုက်​ရလို့ စိတ်ညစ်​သွား​ကြ​တယ်။

အဲဒီလို​ပွဲ​မျိုး​က သိပ်​ဆူညံ​တယ်။ အောက်မေ့ရာပွဲ မနက်​မှာ ခန်းမ​ကို ညီအစ်​ကိုတွေ သန့်ရှင်းရေး​လုပ်​နေတုန်း ပွဲ​စီစဉ်​သူက “ဂီတ​သံ​ကလွဲလို့ ခင်ဗျား​တို့ ဘာမှ ကြား​ရမှာ မဟုတ်ဘူး” လို့ပြောတယ်။

နေ့လယ်​ပိုင်း​လောက်မှာ ပွဲစ​တယ်။ ထင်​တဲ့အတိုင်း ကျယ်ကျယ်လောင်လောင်​ပါပဲ။ ညီအစ်ကိုတွေ​က အရင်​အသုံးပြု​ဖို့ စီစဉ်​ထားတဲ့ အသံချဲ့စက်​ထက် အဆ​မတန် ပိုကြီး​တဲ့​စက် ငှား​ခဲ့​ပေ​မဲ့ အသံချဲ့စက် စမ်း​တဲ့​အသံ​ကို​တောင် မကြား​ရဘူး။ စိတ်ပျက်​သွားပေ​မဲ့ ထက်ထက်သန်သန် ဆုတောင်း​ကြ​တယ်။ ဒီလိုနဲ့ ညီအစ်ကို အတော်များများ​လည်း ရောက်လာ​ကြပြီ။ အောက်မေ့ရာပွဲ မစ​ခင် မိနစ် ၃၀ လောက်မှာ တေးသံ ရုတ်တရက် ရပ်သွား​တယ်။ ပွဲ​မှာ အမူး​သမား​တချို့ ရန်ဖြစ်​လို့ ရဲ​က ပွဲ​ကို ပိတ်​သိမ်း​လိုက်တယ်။ တိတ်ဆိတ်​အေးချမ်း​ပြီး လေးစား​စရာ ဝန်းကျင်​မှာ ညီအစ်ကိုတွေ အောက်မေ့ရာပွဲ ကျင်းပ​နိုင်ခဲ့​ကြ​တယ်။

ဂျူဇီ​ပါ​ဟာ အီတလီ​နိုင်ငံ​က မှန်မှန်ရှေ့ဆောင်​ပါ။ အင်တာနက် အတိုင်ပင်ခံ​လုပ်ငန်းကို အိမ်​က​နေ လုပ်တယ်။ လွန်ခဲ့တဲ့ မေ​လ​တုန်းက ကုမ္ပဏီ​ လုပ်ဆောင်​မယ့် အစီအစဉ်​သစ်​တွေကို ဆွေးနွေး​ဖို့ အလုပ်ဖော် ၇၀ လောက်​နဲ့ အစည်းအဝေး တက်ရောက်​ခဲ့တယ်။ ကုမ္ပဏီ​ရဲ့ စီအီး​အို​က ကုမ္ပဏီ​လုပ်ချင်​တဲ့ ပုံစံကို တခြား​ဝက်ဘ်ဆိုက်​တွေကနေ ကြည့်နိုင်တယ်​လို့ စပြော​တယ်။ ဖန်သား​ပြင်​ပေါ်မှာ နမူနာ​တစ်ခု ပြ​တယ်။ jw.org ဝက်ဘ်ဆိုက်​ရဲ့ ပင်မ​စာမျက်နှာ ပေါ်လာ​လို့ ဂျူဇီ​ပါ အံ့ဩ​သွားတယ်။ “ဒါက ကမ္ဘာပေါ်မှာ အကောင်းဆုံး ဝက်ဘ်ဆိုက်​ပဲ” လို့ စီအီး​အို ပြောတယ်။ ပြီးတော့ jw.org ဝက်ဘ်ဆိုက်​ရဲ့ နည်းပညာ​ကဏ္ဍ​တွေကို ဆန်းစစ်​တယ်။ ရှာ​ရလွယ်​တဲ့ လင့်​ခ်​တွေ၊ အာရုံ​ဖမ်းစား​တဲ့ ရုပ်ပုံ​တွေကို ချီးမွမ်း​တယ်။

ဂျူဇီ​ပါ ဒီလိုပြောတယ်– “ဝက်ဘ်ဆိုက်​ရဲ့ ဘာသာစကား အရေအတွက်​ကြောင့် အလုပ်ဖော်​တွေ အံ့ဩ​သွားတယ်။ တင်ဆက်မှု​အဆုံး​မှာ ကျွန်တော့်​အလုပ်​ကြပ်​က ပရိသတ်​တွေနဲ့ စီအီး​အို​ကို ‘ဂျူဇီ​ပါ​က ယေဟောဝါသက်သေ​ပါ’ လို့ ပြောလိုက်​တယ်။ ဒါနဲ့ စီအီး​အို​က ‘ခင်ဗျား​တို့ရဲ့ အဖွဲ့အစည်း​ ကို ချီးမွမ်း​ရမယ်။ ကမ္ဘာ​တစ်ဝန်း​က ကုမ္ပဏီ၊ အဖွဲ့အစည်း​တွေ မနာလို​ဖြစ်​လောက်တဲ့ ဝက်ဘ်ဆိုက်ကို ခင်ဗျား​တို့ ဒီဇိုင်းဆွဲ​ထားတာ​ပဲ။ ဝက်ဘ်ဆိုက်ကို နောက်ဆုံး အချက်အလက်​နဲ့အညီ​ဖြစ်အောင်၊ သုံး​ရ လွယ်ကူ​အောင် လုပ်ဖို့ တော်တော် အားထုတ်​ရမှာ။ အသေးစိတ်​အချက်​တွေ၊ ပါဝင်တဲ့ အကြောင်းအရာတွေ​ကိုလည်း တော်တော် အာရုံစိုက်​လုပ်​ရမှာ’ လို့ပြောတယ်။ ကိုယ်​မလုပ်​တဲ့​အရာ​အတွက် ဒီလောက် ချီးမွမ်းခံ​ရလို့ နည်းနည်း​တော့ အ​နေ​ခက်​သွားတာ​ပေါ့။ ဒါပေမဲ့ ယေဟောဝါသက်သေ​အကြောင်း ဘာမှ မသိ​သူများ​စွာကို သက်သေခံ​နိုင်​လိုက်လို့ ဝမ်းသာ​မိတယ်။ အခု အလုပ်ဖော်​တချို့​နဲ့ ပုံမှန်​ စကားပြော​ဆိုပြီး သူတို့​ထဲက သုံးယောက်​က သင်အံမှု​တောင် လက်ခံ​ခဲ့​တယ်။” ဂျူဇီ​ပါ အလုပ်လုပ်​တဲ့ ကုမ္ပဏီ​က jw.org ဝက်ဘ်ဆိုက်ကို ဆက် “လေ့လာ” နေ​ပြီး ဂျူဇီ​ပါ​လည်း အလုပ်ဖော်​သုံးယောက်​နဲ့ ကျမ်းစာ​ ဆက်ဆွေးနွေး​နေတယ်။

ဟော်​ဟာ​ဆိုတဲ့ လူငယ်​ဟာ အာဂျင်တီးနား​နိုင်ငံမှာ နေထိုင်တယ်။ ၂၀၁၀​ အစပိုင်းမှာ အတန်းဖော်​တစ်ယောက်​ဆီကနေ သတင်းကောင်း စကြားတယ်။ ပြီးနောက် သမ္မာကျမ်းစာ အမှန်တကယ် သွန်သင်ရာ​က ဘာလဲ​ စာအုပ်နဲ့ ကျမ်းစာ စလေ့လာ​တယ်။ ဘောလုံး​လည်း ကစား​တယ်။ အားကစား​မှာ ထူးချွန်​ပြီး အောက်ပိုင်း ပြည်နယ်၊ အဓိက​ဘောလုံး​အသင်း​မှာ ကစား​ဖို့ အရည်အချင်း ပြည့်မီ​တယ်။ ၂၀​၁၄၊ ဧပြီလ​မှာ ဂျာမနီ​က အသင်း​တစ်ခုမှာ ကစား​ဖို့ ကမ်းလှမ်း​ခံရ​တယ်။ ကြေးစား​ဘောလုံးသမား ဖြစ်​ရမှာ​ကို တွေး​ပြီး ကမ်းလှမ်းမှု​ကို လက်ခံ​လိုက်တယ်။ ဥရောပ​ကို မ​ထွက်ခွာ​ခင် ရက်​အနည်းငယ်​မှာ နည်းပြ​က “မင်း ယေဟောဝါသက်သေ မဟုတ်လား။ နိုင်ငံ​ခြား​သွားပြီး ကိုယ့်​ဘဝကို မ​ဖျက်ဆီး​ပါနဲ့။ ငါလည်း ငယ်ငယ်​တုန်းက သက်သေခံ​ပဲ။ အာရှနိုင်ငံ​တစ်ခု​ရဲ့ အသင်း​မှာ ကစား​ဖို့ ဖိတ်ခေါ်​ခံရ​တယ်။ သူတို့​ပေးတဲ့ မက်လုံး​တွေကို သဘောကျ​မိခဲ့တယ်။ မိသားစုနဲ့​အတူ  အဲဒီ​ကို သွား​လိုက်တယ်။ တော်တော်​စိတ်ပျက်ပြီး ဒီ​ကို ပြန်လာ​ရတယ်” လို့ပြောတယ်။ “သူ့​စကားက တော်တော် အကျိုးသက်ရောက်​ခဲ့တယ်။ ဥရောပ​ကို မသွား​ဖို့ ကျွန်တော် ဆုံးဖြတ်​လိုက်တယ်။ ၂၀​၁၅ ခုနှစ်မှာ ကျွန်တော် ကြေညာသူ ဖြစ်လာ​ပြီး နှစ်ခြင်းခံ​ခဲ့တယ်” လို့ ဟော်​ဟာ ပြောတယ်။

၂၀​၁၅၊ စက်တင်ဘာ​လ​တုန်းက ယူ​ဂ​န္ဓာ​နိုင်ငံ၊ ကန်​ပါ​လာ​မြို့မှာ​ “ယေရှု​ကို တုပ​ပါ” ခရိုင်​အစည်းအဝေး ကျင်းပ​ခဲ့တယ်။ လူ​ဂ​န္ဓာ​စကားနဲ့ ကမ္ဘာသစ် ဘာသာပြန်ကျမ်း​ကို အုပ်ချုပ်ရေး​အဖွဲ့ဝင် ညီအစ်ကို မာ့ခ် ဆန်​ဒါ​စန် ထုတ်ဝေ​တော့ တက်ရောက်သူ​အားလုံး စိတ်လှုပ်ရှား​ခဲ့ကြတယ်။

ကျမ်းစာသင်သား​တစ်ယောက် ပြောတယ်– “လှပတဲ့ ဒီ​ကျမ်းစာ ရလို့ သိပ်ပျော်​တယ်။ အခုအချိန်မှာ လူတွေ​က ပုပ်ရဟန်းမင်း လည်ပတ်မှုအတွက် ပြင်ဆင်​နေကြတယ်။ ရန်ပုံငွေ ရှာ​ဖို့ ‘ကောင်းချီး’ ပုတီး​ကို အမေရိကန်​ဒေါ်လာ​ ၃၀ နဲ့ ရောင်း​နေကြတယ်။ လူတွေ​က ကောင်းချီး လိုချင်​ပေ​မဲ့ ပိုက်ဆံ​ မရှိကြ​ဘူး။ ကျွန်မက​တော့ တကယ့်​ကောင်းချီး​ကို အခမဲ့ ရ​လိုက်တာ​ပဲ။ ယေဟောဝါက ခရိုင်​အစည်းအဝေး တက်ရောက်သူ အားလုံးကို​ပေးတယ်။ စေတနာအလျောက် အလှူငွေ ထည့်ဝင်​ရမှာက​တော့ တစ်ယောက်စီ​ရဲ့ တာဝန်​ပဲ။ ယေဟောဝါရဲ့ စကားကို နေ့တိုင်း ကိုယ့်​မိခင်​စကားနဲ့ ဖတ်ပြီး​ ကိုယ်တော့်ကို ပို​သိကျွမ်း​လာ​မှာ တကယ့်​ကောင်းချီး​ပါပဲ။ ဒီ​ကျမ်းစာအုပ် ပေး​လို့ ယေဟောဝါကို ကျေးဇူးတင်​လိုက်တာ။”

www.pr418.com ဝက်ဘ်ဆိုက်ကို သိက္ခာ​ချဖို့ ကွန်​ဂို (ကင်​ရှာ​ဆာ) နိုင်ငံ၊ ဒေသ​တစ်ခုမှာ ချာ့ခ်ျ​ခေါင်းဆောင်​တချို့က ယေဟောဝါသက်သေ​တွေရဲ့ စာပေတွေကို ဝိညာဉ်​လောကမှာ ပုံနှိပ်​တယ်လို့ အသင်းသား​တွေကို သင်ပေး​ကြ​တယ်။ အဲဒီ​အဆို​ကို လက်ခံ​စေဖို့ “www” ဆိုတဲ့ စကားလုံးတွေ​ ဟာ ဗျာဒိတ်ကျမ်း​မှာပါတဲ့ ၆၆၆ ဂဏန်း​တွေနဲ့ ညီ​တယ်လို့ ထောက်ပြ​ကြ​တယ်။ (ဗျာ. ၁၃:၁၈) ဒါကြောင့် ကျမ်းစာလေ့လာ​နေ​သူ​တချို့ ဆက်​မ​လေ့လာ​ကြ​တော့ဘူး။

ဒီကိစ္စ​ကို ဆုတောင်းပြီး​နောက် ရှေ့ဆောင်​မောင်နှံတစ်စုံ​က ကျမ်းစာသင်သား​တွေ၊ သူတို့ရဲ့ အိမ်ထောင်ဖက်​တွေကို အိမ်​လာဖို့ ဖိတ်​လိုက်တယ်။ ဇနီးမောင်နှံ​သုံးစုံ လာကြတယ်။ စားသောက်​ပြီးနောက် သက်သေခံ​မောင်နှံ​က ယေဟောဝါသက်သေများ—သတင်းကောင်း​ဟောပြော​ရန် ဖွဲ့စည်းထားခြင်း ဗီဒီယိုကို ပြ​တယ်။ မြင်ရ​တဲ့​အရာက စာပေ ပုံနှိပ်ခြင်း​နဲ့ပတ်သက်ပြီး သူတို့​ကြား​ထားတဲ့ သတင်း​အမှားတွေ​ကို လုံးဝ​ပယ်ဖျက်​ပေးလိုက်​တယ်။ နောက်​တစ်ပတ်​မှာ သင်သား​တစ်ယောက်​ရဲ့ ကျမ်းစာ​မ​လေ့လာ​သေး​တဲ့ ယော​က်ျား​က ကမ္ဘာချီလုပ်ငန်း​အတွက် အလှူငွေ အမေရိကန်​ဒေါ်လာ ၁၀၀ ကို လက်ခံ​ပို့ပေး​ဖို့ ရှေ့ဆောင်​ဇနီးမောင်နှံ​ကို တိုက်တွန်း​ခဲ့တယ်။

ပါပူဝါနယူးဂီနီ​နိုင်ငံ၊ ဝေးလံတဲ့​ဒေသက ညီအစ်ကိုတွေ​မှာ အင်တာနက်​လိုင်း မရှိပေမဲ့ နောက်ဆုံး နိုင်ငံတော်​သီချင်း​တွေကို သင်ယူ​ချင်စိတ်​ ပြင်းပြ​နေကြတယ်။ ဒါနဲ့ မွန်​ဒစ်​အသင်းတော်​က ညီအစ်ကို​တစ်ယောက်​ကို အနီးဆုံး​မြို့​ဆီ သွားစေတယ်။ နှစ်နာရီ လမ်းလျှောက်​ပြီး နှစ်နာရီ ဘတ်စကား စီး​သွားရတယ်။ အဲဒီ​ကို​ရောက်တာနဲ့ အင်တာနက်​ထဲက သီချင်းစာသား​သစ်​တွေကို မှတ်စုစာအုပ်​ထဲ ကူးရေး​ပြီး အိမ်ပြန်လာ​တယ်။ ပြီးနောက် လူတိုင်း​မြင်နိုင်​အောင် သီချင်းစာသား​တွေကို နိုင်ငံတော်ခန်းမ ကျောက်သင်ပုန်း​ပေါ် ရေး​ပေးတယ်။ အသင်းတော်မှာရှိတဲ့ ကျန်​တဲ့သူ​တွေ​က အစည်းအဝေး​တွေအတွက် သီချင်း​သစ်​တွေကို ကူးရေး​ကြ​တယ်။ ဝတ်ပြုရေး​ရဲ့ တစ်စိတ်တစ်ပိုင်း​အဖြစ် ကမ္ဘာချီ အသင်းတော်တွေ​နဲ့အတူ သီချင်းဆို​ရတာ​ကို သူတို့ သိပ်တန်ဖိုးထား​ကြ​တယ်။