ပြီးခဲ့တဲ့နှစ်ရဲ့ ပေါ်လွင်ချက်များ
JW ရုပ်သံအစီအစဉ်က ‘အားရှိစေပြီး လန်းဆန်းမှု ဖြစ်စေ’
JW ရုပ်သံလို့ခေါ်တဲ့ အင်တာနက်တီဗီ အစီအစဉ်ဟာ စတင်ထုတ်လွှင့်ချိန် ၂၀၁၄ ခုနှစ်ကစပြီး ကမ္ဘာတစ်ဝန်းမှာရှိတဲ့ ကြည့်ရှုသူများစွာကို အားပေးမှု၊ လန်းဆန်းမှု ရရှိစေခဲ့ပါပြီ။ ဒီအစီအစဉ်ကို အခု ဘာသာစကား ၉၀ ကျော်နဲ့ ရရှိနိုင်ပါပြီ။ ဥပမာ၊ အခုဆိုရင် အစီအစဉ်ကို အွီ၊ ဂါ၊ တွီ (ပုံမှာပြထား) ဘာသာစကားတွေနဲ့ ဘာသာပြန်နေလို့ ဘီနင်၊ ကုတ်ဒီဗွား၊ ဂါနာ၊ တိုဂိုမှာရှိတဲ့ ကြေညာသူ ၁၃၀,၀၀၀ ကျော်တို့ ဝမ်းသာပီတိ ဖြစ်နေကြတယ်။ *
“အုပ်ချုပ်ရေးအဖွဲ့ဝင်တွေ၊ သူတို့ကို ကူညီပေးသူတွေရဲ့ ဟောပြောချက်ကို နားထောင်တဲ့အခါ ကျွန်မကို ယေဟောဝါ အိမ်တိုင်ရာရောက် လာစကားပြောနေသလို ခံစားရတယ်။ ကမ္ဘာ့ထောင့်တစ်နေရာက ကျွန်မလို ဆင်းရဲသားမိန်းကလေးအတွက် ဒီအစီအစဉ်သာ မရှိရင် ဒီလောက်အခွင့်ထူးကြီး ဘယ်ရနိုင်ပါ့မလဲ။ ကမ္ဘာတစ်ဝန်းမှာရှိတဲ့ ညီအစ်ကို/မတွေနဲ့လည်း ပိုရင်းနှီးလာစေတယ်” ဆိုပြီး ဂါနာနိုင်ငံက တိုက်နယ်ကြီးကြပ်မှူးတစ်ယောက်ရဲ့ ဇနီး အဂါသာ ပြောတယ်။
ဇမ်ဘီယာနိုင်ငံကလည်း ဒီလိုမှတ်တမ်း ရရှိတယ်– “အသင်းတော်များစွာက ကြေညာသူတွေဟာ ဆင်းရဲချို့တဲ့ပေမဲ့ JW ရုပ်သံအစီအစဉ်ကနေ အကျိုးရရှိဖို့ ကြိုးစားအားထုတ်ကြတယ်။ ဥပမာ၊ မီစာကို အသင်းတော်ဟာ အနီးဆုံးမြို့နဲ့ မိုင် ၂၀ လောက် ဝေးပြီး မိုးရာသီမှာဆို ရေစီးသန်တဲ့ ချောင်းတွေ အတော်များတဲ့ လယ်မြေဒေသမှာ တည်ရှိတယ်။” ပိုလိုအပ်တဲ့ဒေသမှာ အမှုဆောင်ဖို့ အသင်းတော်ကို ရောက်လာတဲ့ အသင်းတော်အမှုထမ်း ဆိုင်မွန် ပြောပြတယ်– “အသင်းတော်မှာရှိတဲ့ တစ်ယောက်ယောက်က လတိုင်း လမ်းမကြီးကို ရောက်ဖို့ နှစ်နာရီ လမ်းလျှောက်၊ အဲဒီကနေ မြို့ကိုသွားဖို့ ဘတ်စကားစီး၊ မြို့ရောက်တဲ့အခါ အစီအစဉ်တွေကို ကူးယူကြတယ်။ အသက် ၇၀ အရွယ် ဦးလေးကြီးနဲ့ သားနှစ်ယောက်က ယေဟောဝါသက်သေတွေရဲ့ အစည်းအဝေးတွေကို တစ်ခါမှ မတက်ဖူးဘူး။ ဒါပေမဲ့ ဒီလောက်ခေါင်တဲ့ တောရွာ အစည်းအဝေးမှာ ဗီဒီယိုပြမယ်ဆိုတော့ စိတ်ဝင်စားသွားတယ်။ အဲဒီဦးလေးကြီး လာတက်ပြီးနောက် ‘ဘုရားအကြောင်းကို ဒီလိုပဲ သင်ယူရမှာ’ ဆိုပြီး ပြောသွားတယ်။
ရုရှားနိုင်ငံက ကျေးဇူးတင်စာတစ်စောင်မှာ ဒီလိုရေးထားတယ်– “JW ရုပ်သံအစီအစဉ်ကို ကြည့်လာတာ တစ်နှစ်လောက် ရှိပြီ။ ဒီလိုအခွင့်အရေးရရှိလို့ သိပ်ကျေးဇူးတင်ပါတယ်။ ဦးဆုံးရုပ်သံအစီအစဉ်ကို ကြည့်ပြီးနောက် ညီအစ်ကိုအသင်းအပင်း တစ်ရပ်လုံးနဲ့ ပိုစည်းလုံးလာတယ်လို့ ချက်ချင်း ခံစားလိုက်ရတယ်။ သိပ်အံ့ဩစရာပါပဲ။ မိသားစုကြီးတစ်ခုလို ခံစားရတယ်။ အုပ်ချုပ်ရေးအဖွဲ့ ညီအစ်ကိုတွေကို တွေ့ရလို့လည်း ဝမ်းသာလိုက်တာ။ ကျွန်တော်တို့ကို အချိန်တန်အစာ ကျွေးဖို့ သူတို့ အားကြိုးမာန်တက် ကြိုးစားနေတာ။ အခုတော့ ကျွန်တော်တို့အားလုံးဆီ သူတို့ ရောက်နိုင်ပြီ။ ရုပ်သံအစီအစဉ်တိုင်းကို ကျွန်တော်တို့ မျှော်နေရပြီ။ ယေဟောဝါသက်သေဆိုတဲ့ နာမည် ခံယူရတာကို ပိုပြီးတော့တောင် ဂုဏ်ယူမိတယ်။ ကျေးဇူးတင်ပါတယ်၊ ညီအစ်ကိုတို့။ အံ့ဖွယ်လုပ်ဆောင်မှုအားလုံးအတွက် ယေဟောဝါနဲ့ ခရစ်တော်ကို ကျေးဇူးတင်ပါတယ်။ ဒါက ကျွန်တော်တို့ကို အားရှိစေပြီး လန်းဆန်းမှု ဖြစ်စေတယ်။”
ဂျာမနီနိုင်ငံက ဟို့စ်နဲ့ ဟဲဂါ လို့ခေါ်တဲ့ အိုမင်းမစွမ်း ဇနီးမောင်နှံလည်း အခုလိုရေးတယ်– “JW ရုပ်သံအစီအစဉ်က ကောင်းလိုက်တာ။ အထူးသဖြင့် မသန်စွမ်း ညီအစ်ကို/မတွေရဲ့ တွေ့ကြုံမှုတွေကြောင့် သိပ်အားရှိတယ်။ ကျန်းမာရေး မကောင်းပေမဲ့ အကောင်းဆုံး ပေးဆက်ဖို့ သူတို့ရဲ့ ပုံသက်သေက လှုံ့ဆော်ပေးတယ်။ အောက်ပိုင်းသေနေတဲ့ ညီအစ်ကို အကြီးအကဲအဖြစ် အမှုဆောင်နေတာ မြင်ရတော့ လူတိုင်း တန်ဖိုးရှိတာတစ်ခုခု ယေဟောဝါကို ပေးနိုင်မှန်း သိလာရတယ်။ အဲဒီလို စံပြညီအစ်ကို/မတွေကို မြင်ရလို့ ယေဟောဝါကို သိပ်ကျေးဇူးတင်ပါတယ်။ သူတို့ကို ကောင်းချီးပေးဖို့ အသနားခံဆုတောင်းပါတယ်။”
အင်္ဂလန်နိုင်ငံက ကိုဒီ ပြောပြတယ်– “jw.org ဝက်ဘ်ဆိုက်၊ JW ရုပ်သံ၊ အောင်အောင်နဲ့ ရွှေစင် ဗီဒီယိုတွေ ပြင်ဆင်ရာမှာ အသုံးပြုတဲ့ အချိန်နဲ့ ကြိုးပမ်းမှုအားလုံးအတွက် ကျေးဇူးတင်ပါတယ်။ ကျမ်းစာကို နားလည်ရ ပိုလွယ်စေတဲ့အတွက်လည်း ကျေးဇူးတင်ပါတယ်။ ကျွန်တော် အသက်ရှစ်နှစ်မှာ နှစ်ခြင်းခံခဲ့တာပါ။ နည်းနည်းကြီးလာရင် နိုင်ငံတော်ခန်းမ ဆောက်လုပ်ရေးမှာ စေတနာ့ဝန်ထမ်း လုပ်ပါမယ်။ ဗေသလမှာလည်း လုပ်ချင်တယ်။ အခု ကျွန်တော် အသက် ကိုးနှစ်ဆိုတော့ သိပ်စောင့်ဖို့ မလိုတော့ပါဘူး။”
အင်္ဂလန်နိုင်ငံက အသက်ရှစ်နှစ်အရွယ် အာရာဘဲလာ ဒီလိုရေးတယ်– “ဗီဒီယိုတွေ၊ လက်တွေ့လုပ်ကြည့်နိုင်တဲ့ ကဏ္ဍတွေအတွက် ကျေးဇူးတင်ပါတယ်။ ဒါတွေက ယေဟောဝါကို ပိုသိလာအောင် ကူညီပေးတယ်။ jw.org ဝက်ဘ်ဆိုက်မှာပါတဲ့ လက်တွေ့လုပ်ကြည့်နိုင်တဲ့ ကဏ္ဍတွေက ယေဟောဝါအကြောင်း ပျော်ရွှင်စွာ သင်ယူနိုင်ဖို့ ကူညီပေးတယ်။ မှတ်မိရလွယ်တဲ့ သီချင်းတွေ စပ်ထားတာလည်း တော်လိုက်တာ။ အောင်အောင်နဲ့ ရွှေစင် ဗီဒီယိုကလည်း ကူညီပေးတယ်။ သင်တို့ရဲ့ ကြိုးစားအားထုတ်မှုအားလုံးအတွက် ကျေးဇူးတင်ပါတယ်။”
^ စာပိုဒ်၊ 3 tv.pr418.com မှာ ဝင်ပြီး JW ရုပ်သံအစီအစဉ်ကို ကြည့်ရှုနိုင်တယ်။
