ချစ်​ရတဲ့ ညီအစ်ကိုညီအစ်မ​တို့–

ဘီစီ ခုနစ်ရာစု​တုန်းက ပရောဖက် ယေဇကျေလ​ဟာ ထူးဆန်းတဲ့​ စိတ်​ အာရုံ​တစ်ခု မြင်ခဲ့​ရတယ်။ စကြဝဠာ​အချုပ်အခြာအာဏာပိုင်ရှင်​ရဲ့ ထိန်း ချုပ်​မှု​အောက်မှာ​ရှိတဲ့ ဧရာမ ကောင်းကင်​ရထား​ကြီး​ကို မြင်ခဲ့​ရတယ်။ အထူးခြားဆုံး​က​တော့ ကောင်းကင်​ရထား​ကြီးရဲ့ ရွေ့လျား​ပုံ​ပါပဲ။ အလင်း​ရဲ့​အမြန်​နှုန်း​နဲ့ ရွေ့လျား​နေ​ပြီး အရှိန်​လျှော့​စရာ၊ ကွေ့​စရာ​မလို​ဘဲ ဦးတည်​ရာ​လမ်းကြောင်း ပြောင်း​နိုင်တယ်။—ယေဇ. ၁:၄၊ ၉၊ ၁၂၊ ၁၄၊ ၁၆-၂၇။

ယေဟော​ဝါ့ စကြဝဠာ အဖွဲ့အစည်းရဲ့ ကောင်းကင်ဆိုင်ရာ​အပိုင်း​ဟာ ရှေ့ကို ရွေ့လျား​နေ​ကြောင်း သတိရ​စေ​ပါတယ်။ မြေကြီး​ဆိုင်ရာ​အပိုင်း​ကော။ မြေကြီး​ပေါ်မှာ​ရှိတဲ့ ဖွဲ့စည်းထားတဲ့ မိမိရဲ့​လူတွေကို အံ့ဖွယ်​အရှိန်​နှုန်း​နဲ့ ယေဟောဝါ ရွေ့လျား​နေ​စေတယ်​ဆိုတာ လွန်ခဲ့တဲ့ လုပ်ငန်းတော်နှစ် မှတ်တမ်း​က အထင်အရှား ဖော်ပြ​ပါတယ်။

အမေရိကန်​နိုင်ငံ​က ဗေသလ​မိသားစုဝင်​တွေဟာ ဘရွတ်ကလင်​က​နေ​ ဝေါဝစ် ဌာနချုပ်​အသစ်၊ တခြား​အဆောက်အအုံ​တွေနဲ့ အမှုဆောင်​လယ်ကွင်း​တွေဆီ ပြောင်းရွှေ့​နေကြတယ်။ တခြား​ဌာနခွဲ​တွေ​က ဗေသလအိမ်သား​တချို့​လည်း ဆောက်လုပ်ရေး၊ ပြုပြင်မွမ်းမံ​ရေး၊ တခြားနေရာ​ဒေသ​တွေဆီ ပြောင်းရွှေ့​ရေး​နဲ့ အလုပ်များ​နေကြ​ပါတယ်။ သင်ကော။ နေရာဒေသ​အရ မ​ပြောင်းရွှေ့​ရ​ရင်တောင် တခြား​နည်းတွေနဲ့ အလုပ်များ​နေ​မှာပါ။

ကမ္ဘာ​တစ်ဝန်း​က ဘုရားသခင့်​လူတွေ ယေဟောဝါရဲ့ အဖွဲ့အစည်း​နဲ့ အမီလိုက်​ဖို့ ခါတိုင်းထက် အလုပ်များ​နေတာကို မြင်တွေ့ရ​လို့ အုပ်ချုပ်ရေးအဖွဲ့​ ဟာ တကယ်​စိတ်နှလုံး​ထိမိ​ပြီး အားရှိ​ပါတယ်။ တချို့က ပိုလိုအပ်​တဲ့​ဒေသ​တွေမှာ ပြောင်းရွှေ့​အမှုဆောင်​ကြ​တယ်။ တချို့ကျတော့ ဘာသာခြား​စကားပြော လယ်ကွင်း​မှာ အမှုဆောင်​ကြ​တယ်။ တချို့ကျတော့ သူတို့​အတွက် အသစ်အဆန်း​ဖြစ်ပြီး လုပ်နေကျ​မဟုတ်တဲ့ သက်သေခံနည်း​မှာ ပါဝင်လုပ်ဆောင်​နေကြတယ်။ တချို့က​တော့ တခြား​နည်းတွေနဲ့ အမှုဆောင်လုပ်ငန်း​ကို တိုးချဲ့​နေကြတယ်။ အသက်ကြီးသူ​တွေ၊ အိုမင်းမစွမ်း​တွေ အပါအဝင် သစ္စာရှိ ခရစ်ယာန်​အားလုံးဟာ ယေဟောဝါရဲ့ အမှုတော်​မှာ တိုးချဲ့​ပါဝင်ခြင်း၊ စာတန်​ကို မုသာ​ကောင်​အဖြစ် ဖော်ထုတ်ခြင်း​အားဖြင့် အသက်ပြေးပွဲ​မှာ သစ္စာရှိရှိ ပြေး​နေကြတယ်။—၁ ကော. ၉:၂၄။

သင်တို့​ပြ​တဲ့ စိတ်သဘောထား​ကို ယေဟောဝါ မမြင်​ဘဲ​မနေ​ဘူးဆို​တာ စိတ်ချ​ပါ။ (ဟီ. ၆:၁၀) သင်တို့​ရဲ့ တလိုတလား​စိတ်ဓာတ်​က အာဗြဟံ​နဲ့ စာရာ​ကို ပြန်အမှတ်ရ​စေ​ပါတယ်။ အာဗြဟံ​ဟာ အသက် ၇၀ ကျော်​မှာ  မိသားစု​ကို ဦးဆောင်​ပြီး ခါလဒဲ​ပြည်၊ ဥရမြို့​က​နေ ဝေးလံ​လှတဲ့ ခါနန်ပြည်​ကို ပြောင်းရွှေ့​ခဲ့တယ်။ အသက်​တစ်​ရာ​ကျော်​တဲ့အထိ ကျန်​တဲ့ သက်တမ်း​တစ်လျှောက်လုံး အဲဒီမှာ​ပဲ တဲ​နဲ့ နေရ​မှာ​ဖြစ်တယ်။ သူနဲ့ သူ့​ဇနီး​ပြခဲ့​တဲ့ တလိုတလား​စိတ်ဓာတ်​ပါပဲ။—က. ၁၁:၃၁။ တ. ၇:၂၊ ၃။

သင်ကော အဲဒီလို စိတ်ဓာတ်​မျိုး ပြ​နေ​သလား။ ခက်ခဲတဲ့ ဒီ​ကာလ​မှာ သစ္စာရှိရှိ ခံရပ်​နေတဲ့ သင်တို့​ဟာ ယေရှုရဲ့ မိန့်မှာချက်​အတိုင်း လုပ်ဆောင်​နေကြတယ်။ “ဒါကြောင့် လူမျိုးတကာ​ဆီ သွားပြီး လူတွေကို ကျွန်တော့်​တပည့် ဖြစ်လာ​အောင် သွန်သင်ပေး​ကြပါ။ အဖဘုရား​ရဲ့​နာမည်၊ သားတော်​ရဲ့​နာမည်၊ သန့်ရှင်းသော စွမ်းအားတော်​ရဲ့​နာမည်​နဲ့ နှစ်ခြင်းပေး​ကြပါ” လို့ ယေရှု​ပြောခဲ့တယ်။—မ. ၂၈:၁၉။

“သွား” ဆိုတဲ့ စကားလုံး​ကို ယေရှု သုံးခဲ့​တဲ့အတွက်​ကြောင့် တက်ကြွလှုပ်ရှား​နေရ​မယ်ဆို​တဲ့ သဘော​ပါပဲ။ လွန်ခဲ့တဲ့ လုပ်ငန်းတော်နှစ်​အတွင်းမှာ ခရစ်တော်ရဲ့ ထက်သန်တဲ့ နောက်လိုက်​တွေကြောင့် ပြီးမြောက်​ခဲ့ရာ​တွေကို မြင်ရ​တာ ကျေနပ်အားရ​စရာ ကောင်း​လှပါတယ်။ လူမျိုးအပေါင်း​ကို နိုင်ငံတော်သတင်း​ကောင်း ဟောပြောခြင်းလုပ်ငန်း​မှာ ယေဟောဝါရဲ့ အားကြီးတဲ့လက်​တော် ကောင်းချီးပေး​နေတယ်​ဆိုတာ အလွယ်တကူ မြင်တွေ့​နိုင်ပါတယ်။—မာ. ၁၃:၁၀။

သတင်းတရား​ကို လူများစွာ တုံ့ပြန်​နေကြတယ်။ လွန်ခဲ့တဲ့​နှစ်မှာ အများဆုံး​ကြေညာသူ နှုန်းသစ်​က ၈,၃၄၀,၈၄၇ ယော​က် ဖြစ်ပြီး လတိုင်း ပျမ်းမျှ​ကျမ်းစာသင်အံမှု ၁၀,၁၁၅,၂၆၄ ခု​ရှိတယ်။ ကောင်းကင်​ရထား​နဲ့ သင်​ရွေ့လျား​နေတယ်​ဆိုတာ ထင်ရှား​ပါတယ်။ ကယ်တင်ခြင်း​တံခါး​ကို ယေဟောဝါ မ​ပိတ်​ခင် လက်ကျန် အချိန်တို​အတွင်း ဒီ​အလုပ်​မွန်​မှာ ဆက်ကြိုးစား​ပါဝင်​နေ​ပါ။

‘ယေဟောဝါကို ယုံကြည်ကိုးစား​ပြီး ကောင်းတာကို လုပ်ပါ’ ဆိုတဲ့​ နှစ်ချုပ်ကျမ်းချက်​က သင့်တော်​လှပါတယ်။ (ဆာ. ၃၇:၃) ဒီ​စကား​တွေကို နာခံပြီး ယေဟောဝါရဲ့ အမှုတော်မြတ်​မှာ ပါဝင်​နေတာ​က ဘုရားကို  ယုံကြည်​ကိုးစား​နေတာ​ဖြစ်တယ်။ သင်​တစ်ယောက်တည်း မဟုတ်ဘူး​ဆိုတာ အမြဲ​သတိရပါ။ “လောကစနစ်​နိဂုံးပိုင်း​အထိ ခင်ဗျား​တို့​နဲ့အတူ ကျွန်တော် အမြဲ​ရှိနေ​မယ်” ဆိုတဲ့ စကားက အမြဲ​မှန်ကန်​နေ​ပါလိမ့်မယ်။—မ. ၂၈:၂၀။

သင်တို့ သစ္စာရှိရှိ အမှုဆောင်​နေတာကို ယေဟောဝါ ဆက်​ကောင်းချီးပေး​နေမယ်​ဆိုတာ စိတ်ချ​ပါ။ သင်တို့​ရဲ့ ပါဝင်မှု​ဟာ နည်း​သည်​ဖြစ်စေ၊ များသည်​ဖြစ်စေ ယေဟောဝါ​အတွက် အရေးကြီးတာက စိတ်ရင်းမှန်နဲ့ အကောင်းဆုံး​ကို ပေးဆက်​နေဖို့​ပါပဲ။ ဒီလို​လက်ဆောင်​မျိုး​က ကိုယ်တော့်​စိတ်နှလုံး​ကို ထိမိ​စေပြီး ကိုယ်တော့်​မျက်နှာသာ အပြုံး ရရှိ​စေ​ပါတယ်။ (၂ ကော. ၉:၆၊ ၇) ဒါကြောင့် မှန်မှန် ဆုတောင်းခြင်း၊ ကျမ်းစာလေ့လာခြင်း၊ အစည်းအဝေး​တွေ တက်ရောက်ခြင်း၊ အမှုဆောင်လုပ်ငန်းမှာ တက်ကြွ​စွာ ပါဝင်ခြင်း​အားဖြင့် ချစ်​ရတဲ့​ဖခင်​နဲ့ ဆက်​ရင်းနှီး​အောင် လုပ်ပါ။

ဆိုးညစ်​တဲ့ ပုန်ကန်သူ မာရ်နတ်​ဟာ ကျန်ရှိ​နေတဲ့ ‘အချိန်​အနည်းငယ်’ အတွင်းမှာ ယေဟောဝါအပေါ် ကျွန်တော်တို့ရဲ့ သစ္စာသမာဓိ​လမ်းစဉ်​ကို ချိုးဖျက်​ဖို့ ရှိသမျှ​နည်းလမ်း​ကို အသုံးပြု​နေ​မှာ​ဖြစ်တယ်။ (ဗျာ. ၁၂:၁၂) ယေဟောဝါနဲ့ နီးနီးကပ်ကပ်​နေ​ပါ၊ စာတန့်​ကြိုးစားမှု မှန်သမျှ ၡုံးနိမ့်​ရပါလိမ့်မယ်။ (ဆာ. ၁၆:၈) သင်တို့ကို ကျွန်တော်တို့ သိပ်ချစ်​မြတ်နိုး​ကြောင်း၊ ဒီ​နောက်ဆုံးကာလ​မှာ သခင့်​နိုင်ငံတော်​လုပ်ငန်း တိုးတက်​ဖို့ လုပ်ဆောင်​ရာမှာ သင်တို့​ရဲ့ ကူညီမှု​ကို ကျေးဇူးတင်​လေးမြတ်​ကြောင်း စိတ်ချ​ပါ။

သင်တို့​ရဲ့ ညီအစ်ကို​များ၊

Governing Body of Jehovah’s Witnesses (ယေဟောဝါ​သက်​သေတွေ​ရဲ့ အုပ်​ချုပ်​ရေး​အဖွဲ့)