၂၀၂၂ ခုနှစ်အတွင်းမှာ စစ်၊ စီးပွားရေး အကျပ်အတည်း၊ သဘာဝဘေးအန္တရာယ်တွေအကြောင်း သတင်းတွေမှာ မပြတ် ကြားခဲ့ရတယ်။ ဒါတွေဖြစ်ရတဲ့ နောက်ကွယ်က အကြောင်းရင်းကို သမ္မာကျမ်းစာကပဲ ရှင်းပြနိုင်ပါတယ်။

၂၀၂၂ အဖြစ်အပျက်တွေရဲ့ နောက်ကွယ်က အကြောင်းရင်း

 ၂၀၂၂ အဖြစ်အပျက်တွေက ကျမ်းစာမှာ ပြောထားတဲ့ “နောက်ဆုံးကာလ” အတွင်း ကျွန်တော်တို့ အသက်ရှင်နေရတယ်ဆိုတာ ပိုသိသာထင်ရှားသွားစေပါတယ်။ (၂ တိမောသေ ၃:၁) နောက်ဆုံးကာလဟာ ၁၉၁၄ ခုနှစ်မှာ စတင်တယ်။ ကျမ်းစာကြိုဟောချက်နဲ့ လတ်တလောဖြစ်ပျက်နေတဲ့ အဖြစ်အပျက်တွေ ကိုက်ညီနေပုံကို သတိပြုကြည့်ပါ–

 “စစ်မက်သတင်းတွေ။”—မဿဲ ၂၄:၆။

•   “ဥရောပမှာ ကြောက်စရာကောင်းတဲ့ စစ်ဒဏ်ကို ၂၀၂၂ မှာ တစ်ကျော့ပြန် ခံစားရ။” a

 “အစာခေါင်းပါးတာ။”—မဿဲ ၂၄:၇။

•   “၂၀၂၂ ခုနှစ်ဟာ မကြုံစဖူး အငတ်ဘေး ကြုံရတဲ့ နှစ်ပဲ။” b

 “ကပ်ရောဂါဘေးတွေ။”—လုကာ ၂၁:၁၁။

•   “ပြန်ခေါင်းထောင်လာတဲ့ ပိုလီယိုရောဂါ၊ ကူးစက်ပျံ့နှံ့လာတဲ့ မျောက်ကျောက်ရောဂါ၊ ဆက်ပြီးဒုက္ခပေးနေတဲ့ ကိုဗစ်-၁၉ ရောဂါတွေကြောင့် ကူးစက်ရောဂါရဲ့ အန္တရာယ်ကို အထင်းသား မြင်နေရပြီး လူသားတွေ အလူးအလဲ ခံနေရတယ်။” c

 “ကြောက်လန့်စရာ မြင်ကွင်းတွေ။”—လုကာ ၂၁:၁၁။

•   “အပူလှိုင်း၊ မိုးခေါင်ရေရှားမှု၊ တောမီး၊ ရေကြီးရေလျှံမှုများ။ ၂၀၂၂ နွေရာသီကို ပြင်းထန်တဲ့ ရာသီဥတု ဖြစ်ရပ်များစွာနဲ့ တွဲမှတ်မိနေကြပါလိမ့်မယ်။ အကြီးအကျယ် ပျက်စီးခဲ့တယ်၊ လူထောင်နဲ့ချီ သေဆုံးခဲ့တယ်၊ သန်းနဲ့ချီတဲ့သူတွေ အိုးအိမ်တွေ ဆုံးရှုံးသွားရတယ်။” d

 “ဆူပူအုံကြွတဲ့သတင်းတွေ။”—လုကာ ၂၁:၉။

•   “စီးပွားရေးအကျပ်အတည်း၊ အထူးသဖြင့် ငွေကြေးဖောင်းပွမှုကြောင့် လူတွေ ဒေါသထွက်ပြီး ၂၀၂၂ ခုနှစ်အတွင်းမှာ အစိုးရကို ဆန္ဒပြမှုတွေ ပိုတိုးလာတယ်။” e

နောက်နှစ်မှာ ဘာတွေ ဖြစ်လာမလဲ

 ၂၀၂၃ ခုနှစ်အတွင်း ဘာတွေဖြစ်လာမယ်ဆိုတာကိုတော့ ဘယ်သူမှ တတ်အပ်မပြောနိုင်ဘူး။ ဒါပေမဲ့ သိပ်မကြာခင် ဘာတွေ ဖြစ်လာမယ်ဆိုတာကိုတော့ သိထားပါတယ်။ ကောင်းကင်မှာ တည်ထောင်ထားတဲ့ ဘုရားသခင့်အစိုးရက ကမ္ဘာ့အခြေအနေတွေကို ပြောင်းလဲပေးပါတော့မယ်။ (ဒံယေလ ၂:၄၄) လူသားတွေကို ဆင်းရဲဒုက္ခရောက်စေတဲ့ အရာတွေကို ဖယ်ရှားမယ်။ ဘုရားအလိုတော် ကမ္ဘာပေါ်မှာ ပြည့်စုံလာမှာ သေချာတယ်။—မဿဲ ၆:၉၊ ၁၀။

 ကမ္ဘာ့အဖြစ်အပျက်တွေက ကျမ်းစာကြိုဟောချက်တွေ ပြည့်စုံနေတာဖြစ်လို့ “သတိနဲ့ စောင့်နေကြပါ” လို့ ပြောခဲ့တဲ့ ယေရှုခရစ်ရဲ့ အကြံပြုချက်ကို လိုက်နာကြဖို့ အားပေးပါတယ်။ (မာကု ၁၃:၃၇) အခုအချိန်မှာ သင်နဲ့ သင့်မိသားစု ကျမ်းစာကနေ အကူအညီ ရနိုင်ပုံ၊ ကောင်းမွန်တဲ့ အနာဂတ်မျှော်လင့်ချက် ရရှိနိုင်ပုံတို့ကို ပိုသိချင်ရင် ကျေးဇူးပြု၍ ယေဟောဝါသက်သေတွေကို ဆက်သွယ်ပါ။