၂၀၂၀၊ ခရိုင်အစည်းအဝေးဟာ ကြိုတင် ရိုက်ကူးပြီး အင်တာနက်ကနေ ထုတ်လွှင့်ပေးတဲ့ ပထမဆုံး ကမ္ဘာချီ အစည်းအဝေးအဖြစ် သမိုင်းတွင်ခဲ့ပြီ။ ဒါပေမဲ့ မာလာဝီ၊ မိုဇမ်ဘစ်မှာ ညီအစ်ကို/မများစွာကတော့ အင်တာနက် မလိုဘဲ အစည်းအဝေးကို တက်ရောက်နိုင်ကြတယ်။ ဘယ်လိုနည်းနဲ့လဲ။

 မာလာဝီ၊ မိုဇမ်ဘစ်မှာ တီဗီနဲ့ ရေဒီယိုလိုင်းကနေ အစည်းအဝေးကြီးကို ထုတ်လွှင့်ပေးဖို့ အုပ်ချုပ်ရေးအဖွဲ့ရဲ့ ညှိနှိုင်းရေးမှူး ကော်မတီနဲ့ သွန်သင်ခြင်း ကော်မတီက ခြွင်းချက်အနေနဲ့ ခွင့်ပြုခဲ့တယ်။ ဘာကြောင့် ဒီလိုခွင့်ပြုချက် လိုသလဲ။ ကမ္ဘာမှာ အင်တာနက် အသုံးပြုစရိတ် စျေးအကြီးဆုံး နိုင်ငံတွေထဲမှာ မာလာဝီ နိုင်ငံလည်း ပါဝင်တယ်။ ဒါကြောင့် သက်သေခံ အနည်းစုပဲ အင်တာနက် သုံးနိုင်ကြတယ်။ မာလာဝီ ဌာနခွဲ ကော်မတီဝင် ဝီလျံ ချွန်ဘီက “အစည်းအဝေးကြီး အစီအစဉ်ကို ညီအစ်ကို/မတွေ ကြည့်ရှုနားဆင်လို့ ရမယ့် တစ်ခုတည်းသော နည်းကတော့ ရေဒီယိုနဲ့ တီဗီတွေပါပဲ” လို့ ပြောတယ်။ မာလာဝီ ဌာနခွဲ ကော်မတီဝင် လုကာ စီဘီကိုက “တီဗီနဲ့ ရေဒီယိုကတစ်ဆင့် မရနိုင်ဘူးဆိုရင် ကျွန်တော်တို့ ဌာနခွဲ နယ်မြေမှာ ရှိတဲ့ ညီအစ်ကို/မ အနည်းစုပဲ အစည်းအဝေးကြီးကနေ အကျိုးခံစားနိုင်ကြမယ်” လို့ ပြောတယ်။ မိုဇမ်ဘစ်မှာလည်း အင်တာနက် သုံးဖို့ အသာထားဦး၊ အစည်းအဝေး ကြည့်ရှုလို့ ရတဲ့ အီလက်ထရောနစ် စက်ပစ္စည်းတွေကိုတောင် ညီအစ်ကို/မတချို့ပဲ ကိုင်နိုင်ကြတယ်။

 ကိုဗစ်-၁၉ ကပ်ရောဂါကြောင့် ရေဒီယို၊ ရုပ်မြင်သံကြား အသံလွှင့်ရုံတချို့မှာ အသင်းတော် အစည်းအဝေးတွေကို ထုတ်လွှင့်ပေးတဲ့ အစီအစဉ် ရှိထားတယ်။ a ညီအစ်ကိုတွေက အဲဒီအသံလွှင့်ရုံတွေကို ဆက်သွယ်ပြီး အစည်းအဝေးကြီးကိုလည်း ထုတ်လွှင့်ပေးဖို့ တောင်းဆိုကြတယ်။

 မာလာဝီက ညီအစ်ကိုတွေလည်း အခက်ကြုံကြတယ်။ ပုံမှန်အားဖြင့် အသံလွှင့်ရုံတွေက တစ်နာရီစာပဲ ထုတ်လွှင့်ပေးလေ့ရှိတယ်။ ဒီထက် ပိုကြာတဲ့ အစီအစဉ်ကို ပရိသတ်တွေ စိတ်ဝင်စားမှာ မဟုတ်ဘူးဆိုပြီး တွေးပူကြတယ်။ ဒါပေမဲ့ ညီအစ်ကိုတွေက ကျွန်တော်တို့ရဲ့ လုပ်ငန်းဟာ လူထုအကျိုးပြုလုပ်ငန်း ဖြစ်ကြောင်း ရှင်းပြတယ်။ လော့ဒေါင်းကာလအတွင်းမှာတောင် ကျမ်းစာထဲက နှစ်သိမ့်မှု ဖြစ်စေတဲ့ သတင်းကောင်း ဝေမျှနေကြတယ်။ ဒါဟာ လူတွေကို နိုင်ငံသားကောင်း ဖြစ်ဖို့၊ မိသားစု သာယာပျော်ရွှင်ဖို့ ကူညီပေးနေခြင်း ဖြစ်တယ်။ ဒီလိုရှင်းပြလိုက်တဲ့အခါ အသံလွှင့်ရုံက ညီအစ်ကိုတွေရဲ့ တောင်းဆိုချက်ကို လက်ခံလိုက်တယ်။

 မာလာဝီမှာ အစည်းအဝေးကြီး အစီအစဉ်ကို ရုပ်မြင်သံကြားဌာန တစ်ခု၊ ရေဒီယို အသံလွှင့်ဌာန တစ်ခုကနေ ထုတ်လွှင့်ပေးတဲ့အတွက် တစ်နိုင်ငံလုံးက လူသန်းနဲ့ချီ ဖမ်းယူပြီး ကြည့်ရှု နားဆင်နိုင်တယ်။ မိုဇမ်ဘစ်မှာ အစည်းအဝေးကြီးကို ရုပ်မြင်သံကြားဌာန တစ်ခု၊ ရေဒီယို အသံလွှင့်ဌာန ၈၅ ခုကနေ ထုတ်လွှင့်ပေးခဲ့တယ်။

 နှစ်နိုင်ငံစလုံးမှာ ရုပ်မြင်သံကြားကနေ ထုတ်လွှင့်မှုအတွက် ဒေါ်လာ ၂၈,၂၂၇၊ b ရေဒီယိုကနေ ထုတ်လွှင့်မှုအတွက် ဒေါ်လာ ၂၀,၀၀၀ နီးပါး ကုန်ကျတယ်။ ရေဒီယို ထုတ်လွှင့်မှုအတွက် ကုန်ကျငွေကတော့ အသံလွှင့်ရုံငယ်အတွက် ၁၅ ဒေါ်လာကနေ တစ်နိုင်ငံလုံးဆီ ထုတ်လွှင့်ပေးတဲ့ အသံလွှင့်ရုံကြီးအတွက် ၂,၇၇၇ ဒေါ်လာအထိ ကုန်ကျတယ်။

 အလှူငွေတွေကို အကျိုးရှိရှိ သုံးနိုင်ဖို့ ညီအစ်ကိုတွေ အလွန် ကြိုးစားကြတယ်။ မာလာဝီမှာ စျေးသက်သက်သာသာနဲ့ ရဖို့ ညှိနိုင်ခဲ့လို့ ဌာနတစ်ခုမှာ ၃၀ ရာခိုင်နှုန်း လျှော့စျေးနဲ့ ရတယ်။ ဒါကြောင့် စုစုပေါင်း ၁,၇၁၁ ဒေါ်လာ သက်သာသွားတယ်။ မိုဇမ်ဘစ်မှာ အသံလွှင့်ရုံတချို့က ညီအစ်ကိုတွေ ရိုးသားတယ်၊ အချိန်အတိအကျ ငွေချေတယ်ဆိုတဲ့ နာမည်ကောင်း ကြားထားလို့ စျေးလျှော့ပေးကြတယ်။

 ဒေသတွင်း အသံလွှင့်ရုံတွေကနေ ထုတ်လွှင့်ပေးတဲ့ အစည်းအဝေးကြီး အစီအစဉ်ကို ကြည့်ရှုခွင့်၊ နားထောင်ခွင့်ရလို့ ညီအစ်ကိုတွေ အလွန် ကျေးဇူးတင်ကြတယ်။ မာလာဝီက အကြီးအကဲ ပက်ထရစ်က “ကပ်ရောဂါကာလအတွင်း ဒီလို စီစဉ်ပေးတဲ့အတွက် အုပ်ချုပ်ရေး အဖွဲ့ဝင် ညီအစ်ကိုတွေကို သိပ်ကျေးဇူးတင်တယ်” လို့ ပြောတယ်။ မာလာဝီက အိုင်းဇက်ကလည်း “ကျွန်တော်တို့မှာ ဖုန်းတို့၊ တက်ဘလက်တို့ မရှိဘူး။ အစည်းအဝေးကြီးကို ရေဒီယိုကနေ နားထောင်နိုင်အောင် ယေဟောဝါရဲ့ အဖွဲ့အစည်း စီစဉ်ပေးလို့ သိပ်ကျေးဇူးတင်တာပဲ။ ဒီလိုစီစဉ်ပေးမှုကြောင့် ကျွန်တော်တို့ တစ်မိသားစုလုံး အစည်းအဝေးကနေ အကျိုးခံစားရတယ်။ ဒါက ယေဟောဝါဟာ မိမိရဲ့ လူတွေကို ချစ်တယ်ဆိုတဲ့ သက်သေပါပဲ” လို့ ပြောတယ်။

 မိုဇမ်ဘစ်က ကြေညာသူတစ်ဦးအတွက်တော့ ၂၀၂၀ အစည်းအဝေးကြီးဟာ ပထမဆုံးအကြိမ် တက်ဖူးတဲ့ အစည်းအဝေးကြီးပါ။ “အစည်းအဝေးကြီး အစီအစဉ်ကို တီဗီကနေ ကြည့်ရလို့ ယေဟောဝါဟာ အနန္တတန်ခိုးရှင် ဖြစ်မှန်း အမှတ်ရမိတယ်။ ကပ်ရောဂါကြောင့် ယုံကြည်ခြင်း ခိုင်ခံ့စေတဲ့ ကျမ်းစာအကြောင်းအရာတွေ လက်လွတ်မသွားရုံမက ကိုယ့်အိမ်ခန်းထဲအထိ ရောက်အောင် ဘုရား ပို့ပေးနေတာ။ ယေဟောဝါရဲ့ လူတွေ အချင်းချင်းအပေါ် ထားတဲ့ မေတ္တာကိုလည်း မြင်ရတယ်။ ဒါဟာ စစ်မှန်တဲ့ ဘာသာပဲ ဆိုတာ ကျွန်တော် တထစ်ချ ယုံကြည်တယ်” လို့ ပြောတယ်။

 ဝေစန်လို့ ခေါ်တဲ့ အကြီးအကဲက “ကပ်ရောဂါကာလအတွင်း ကျွန်တော်တို့ကို သစ္စာရှိကျွန် ဂရုစိုက်စောင့်ရှောက်ပုံဟာ သိပ်ကျေးဇူးတင်စရာ ကောင်းတယ်။ ရေဒီယို၊ တီဗီကတစ်ဆင့် အစည်းအဝေးကြီးကို ထုတ်လွှင့်ပေးတာက ဒီလိုဆင်းရဲတဲ့ နိုင်ငံမှာ ငွေကြေးကျပ်တည်းတဲ့ ကျွန်တော်တို့အတွက် အများကြီး အကူအညီ ဖြစ်စေတယ်၊ အကျိုးခံစားရစေတယ်” လို့ ပြောတယ်။

 ၂၀၂၁ ခရိုင်အစည်းအဝေးအတွက်လည်း ရွေးချယ်ထားတဲ့ ဒေသတွေမှာ တီဗီ၊ ရေဒီယိုကတစ်ဆင့် အစည်းအဝေး အစီအစဉ်ကို ထုတ်လွှင့်ပေးဖို့ ညှိနှိုင်းရေးမှူး ကော်မတီ၊ သွန်သင်ခြင်း ကော်မတီက စီစဉ်ထားတယ်။ ဒီလို အစည်းအဝေးကြီး အစီအစဉ်ကို ထုတ်လွှင့်ပေးနိုင်ဖို့ ကုန်ကျစရိတ် ဘယ်လို ကာမိကြသလဲ။ donate.pr418.com ကနေ နည်းအမျိုးမျိုးနဲ့ ပေးလှူတဲ့ ကမ္ဘာချီ လှူဒါန်းမှုတွေအားဖြင့် ဖြစ်တယ်။ အခုလို ရက်ရက်ရောရော ပေးလှူကြလို့ ကျေးဇူးတင်ပါတယ်။