၁-၃။ (က) ဘုရားသခင်နဲ့ ကျွန်တော်တို့ မိတ်ဆွေဖြစ်နိုင်မှန်း ဘာကြောင့် စိတ်ချနိုင်သလဲ။ (ခ) ဒီဆောင်းပါးမှာ ဘယ်သူတွေအကြောင်း လေ့လာကြမလဲ။

ကျမ်းစာမှာ အာဗြဟံကို ဘုရားသခင့်မိတ်ဆွေလို့ သုံးကြိမ် ခေါ်ဆိုထားတယ်။ (၆ ရာ. ၂၀:၇; ဟေရှာ. ၄၁:၈; ယာ. ၂:၂၃) ဘုရားသခင့်မိတ်ဆွေအဖြစ် ကျမ်းစာမှာ တိုက်ရိုက်ခေါ်ဆိုခံရတဲ့ တစ်ဦးတည်းသောပုဂ္ဂိုလ် ဖြစ်တယ်။ အဲဒီလိုပြောလို့ အာဗြဟံတစ်ယောက်တည်း ယေဟောဝါရဲ့မိတ်ဆွေဖြစ်တယ်လို့ ဆိုလိုသလား။ မဆိုလိုပါဘူး။ ကျွန်တော်တို့အားလုံး အဲဒီအခွင့်အရေးရရှိနိုင်တယ်လို့ ကျမ်းစာပြောတယ်။

^၂ ယေဟောဝါကို ကြောက်ရွံ့တဲ့၊ ယုံကြည်တဲ့၊ ကိုယ်တော်နဲ့မိတ်ဆွေဖြစ်ခဲ့တဲ့ သစ္စာရှိအမျိုးသားအမျိုးသမီးများစွာရဲ့ မှတ်တမ်းတွေ ကျမ်းစာမှာ အပြည့်ရှိတယ်။ (ဆာလံ ၂၅:၁၄ ကိုဖတ်ပါ။) သူတို့အားလုံးဟာ ပေါလုပြောခဲ့တဲ့ “အလွန်ကြီးမားသော သက်သေအုပ်စုကြီး” ထဲမှာပါပြီး ဘုရားသခင့်မိတ်ဆွေတွေ ဖြစ်တယ်။ သူတို့ထဲမှာ လူအမျိုးမျိုးအဖုံဖုံ ပါဝင်တယ်။—ဟေဗြဲ ၁၂:၁။

^၃ ကျမ်းစာမှာဖော်ပြထားတဲ့ ယေဟောဝါရဲ့မိတ်ဆွေ သုံးဦးအကြောင်း အသေးစိတ် လေ့လာကြည့်ကြစို့။ သူတို့ကတော့ (၁) မောဘပြည်က သစ္စာရှိမုဆိုးမငယ် ရုသ၊ (၂) သစ္စာရှိ ယုဒဘုရင် ဟေဇကိ၊ (၃) ယေရှုရဲ့ နှိမ့်ချတဲ့ မိခင် မာရိတို့ ဖြစ်တယ်။ ဘုရားသခင်နဲ့ မိတ်ဆွေဖြစ်အောင် သူတို့တစ်ဦးစီ လုပ်ဆောင်ခဲ့ပုံကနေ ကျွန်တော်တို့ ဘာသင်ယူနိုင်သလဲ။

၄၊ ၅။ ခက်ခဲတဲ့ ဘယ်ဆုံးဖြတ်ချက်ကို ရုသ ချရတော့မလဲ။ အဲဒီလိုဆုံးဖြတ်ဖို့ ဘာကြောင့် ခက်သလဲ။ (ဆောင်းပါးအစမှာပါတဲ့ ရုပ်ပုံကိုကြည့်ပါ။)

^၄ နောမိဟာ ရုသနဲ့ သြရပလို့ခေါ်တဲ့ ချွေးမနှစ်ယောက်နဲ့အတူ မောဘလွင်ပြင်ကို ဖြတ်လျှောက်လာတယ်။ လျှောက်လာရင်း သြရပက မောဘပြည်မှာရှိတဲ့ အိမ်ကိုပြန်ဖို့ ဆုံးဖြတ်လိုက်တယ်။ နောမိကတော့ နေရင်းပြည်ဖြစ်တဲ့ အစ္စရေးကို ဆက်သွားဖို့ ဆုံးဖြတ်ထားတယ်။ ရုသ ဘယ်လို ဆုံးဖြတ်မလဲ။ သိပ်ခက်ခဲတဲ့ဆုံးဖြတ်ချက်တစ်ခု ချရတော့မယ်။ မိသားစုရှိရာ မောဘပြည်ကို လှည့်ပြန်မလား၊ ယောက္ခမနောမိနဲ့အတူ ဘက်သလီဟင်မြို့ကို ခရီးဆက်မလား။—ရု. ၁:၁-၈၊ ၁၄။

^၅ ရုသရဲ့မိသားစုဟာ မောဘပြည်မှာ နေထိုင်တယ်။ သူတို့ဆီ ပြန်သွားရင် သူ့ကို ကူညီစောင့်ရှောက်ကြမှာပေါ့။ သူ့လူမျိုး၊ သူ့ဘာသာစကား၊ သူ့ယဉ်ကျေးမှု ဖြစ်နေတာကိုး။ ဘက်သလီဟင်မြို့မှာ အဲဒါတွေကို ရုသရမယ်လို့ နောမိ အာမ,မခံနိုင်ဘူး။ ရုသကို နောက်အိမ်ထောင် မပြုပေးနိုင်မှာ၊ နေစရာ မစီမံပေးနိုင်မှာကို နောမိ စိတ်ပူတယ်။ ဒါကြောင့် မောဘပြည်ကိုပြန်ဖို့ တိုက်တွန်းတယ်။ သိတဲ့အတိုင်း သြရပကတော့ ‘အမျိုးသားရင်း၊ ဘုရားရင်းတွေဆီ ပြန်သွားပြီ။’ (ရု. ၁:၉-၁၅) ဒါပေမဲ့ ရုသကတော့ သူ့လူမျိုးနဲ့ သူတို့ကိုးကွယ်တဲ့ မှားယွင်းတဲ့ဘုရားတွေဆီ ပြန်မသွားဖို့ ဆုံးဖြတ်ထားတယ်။

၆။ (က) ရုသ ဘယ်လို ပညာရှိရှိ ရွေးချယ်ဆုံးဖြတ်ခဲ့သလဲ။ (ခ) ရုသဟာ ယေဟောဝါရဲ့ ‘အတောင်တော်အောက်မှာ ခိုလှုံ’ ရာ ရှာတယ်လို့ ဗောဇ ဘာကြောင့် ပြောတာလဲ။

^၆ ရုသဟာ ခင်ပွန်းဖြစ်သူ မဟာလုန်ဆီက ဒါမှမဟုတ် နောမိဆီကနေ ယေဟောဝါအကြောင်း သိခဲ့တာဖြစ်နိုင်တယ်။ ယေဟောဝါဟာ မောဘဘုရားတွေနဲ့ မတူမှန်း ရုသ သိတယ်။ ယေဟောဝါကို သူ ချစ်တယ်။ သူ့ရဲ့မေတ္တာနဲ့ ဝတ်ပြုမှုကို ယေဟောဝါရထိုက်မှန်းလည်း သိတယ်။ ဒါပေမဲ့ အသိပညာရှိရုံနဲ့ မလုံလောက်ဘူး။ ပညာရှိရှိ ရွေးချယ်ဆုံးဖြတ်ခဲ့တယ်။ ‘အမေ့လူမျိုးဟာ ကျွန်မလူမျိုး။ အမေ့ဘုရားဟာ ကျွန်မဘုရားပါပဲ’ လို့ နောမိကို ရုသပြောတယ်။ (ရု. ၁:၁၆၊ ကဘ) နောမိအပေါ်ထားတဲ့ ရုသရဲ့မေတ္တာအကြောင်း စဉ်းစားတဲ့အခါ သိပ်နှလုံးထိမိတယ်။ ပိုအထင်ကြီးလေးစားစရာကောင်းတာက ယေဟောဝါအပေါ်ထားတဲ့ ရုသရဲ့မေတ္တာပဲ။ ဗောဇလည်း အဲဒီအချက်ကို အထင်ကြီးလေးစားသွားပြီး ယေဟောဝါရဲ့ ‘အတောင်တော်အောက်မှာ ခိုလှုံ’ ရာ ရှာတဲ့အတွက် နောက်ပိုင်းမှာ ရုသကို ချီးမွမ်းခဲ့တယ်။ (ရုသ ၂:၁၂ ကိုဖတ်ပါ။) ဗောဇရဲ့စကားက အကာအကွယ်ရရှိဖို့ မိခင်ငှက်မကြီးရဲ့ အတောင်အောက်မှာ ခိုလှုံတဲ့ ငှက်ပေါက်စလေးကို မြင်ယောင်မိစေနိုင်တယ်။ (ဆာ. ၃၆:၇; ၉၁:၁-၄) အဲဒီမိခင်ငှက်မကြီးလိုပဲ ယေဟောဝါလည်း ရုသကို မေတ္တာပါပါကာကွယ်ပေးပြီး သူ့ရဲ့ယုံကြည်ခြင်းအတွက် ဆုချခဲ့တယ်။ သူ့ဆုံးဖြတ်ချက်အတွက် နောင်တရစရာအကြောင်း လုံးဝ မရှိခဲ့ဘူး။

၇။ ကိုယ့်ဘဝကို ယေဟောဝါဆီ ဆက်ကပ်အပ်နှံဖို့ ဘာကြောင့် မတွန့်ဆုတ်သင့်သလဲ။

^၇ လူများစွာဟာ ယေဟောဝါအကြောင်း သိပေမဲ့ ကိုယ်တော့်ဆီ ခိုလှုံဖို့ မရွေးချယ်ကြဘူး။ ကိုယ့်ဘဝကို ဘုရားဆီ ဆက်ကပ်အပ်နှံပြီး နှစ်ခြင်းခံဖို့ တွန့်ဆုတ်နေကြတယ်။ သင် အဲဒီလိုဖြစ်နေတယ်ဆိုရင် တွန့်ဆုတ်နေရတဲ့ အကြောင်းရင်းကို ပြန်ဆန်းစစ်ပါ။ လူတိုင်းဟာ ဘုရားတစ်ပါးမဟုတ် တစ်ပါးကိုတော့ ဝတ်ပြုနေကြတာပဲ။ (ယောရှု ၂၄:၁၅) စစ်မှန်တဲ့ဘုရားသခင်ကို ဝတ်ပြုခြင်းကသာ ပညာရှိရွေးချယ်မှုဖြစ်တယ်။ ယေဟောဝါဆီ ဆက်ကပ်အပ်နှံတာက ဘုရားသခင်ကို ခိုလှုံရာအဖြစ် ယုံကြည်ကြောင်း ဖော်ပြရာကျတယ်။ ဘယ်ပြဿနာပဲ ကြုံရပါစေ ဆက်အမှုဆောင်နိုင်အောင် သင့်ကို ဘုရားသခင် ကူညီပေးပါလိမ့်မယ်။ ရုသကို အဲဒီအတိုင်း ကူညီခဲ့တယ်။

၈။ ဟေဇကိရဲ့ဘဝနောက်ခံကို ဖော်ပြပါ။

^၈ ဟေဇကိရဲ့ဘဝနောက်ခံဟာ ရုသနဲ့ သိပ်ကွာတယ်။ ဟေဇကိဟာ ဘုရားသခင်ဆီ ဆက်ကပ်ထားတဲ့ အစ္စရေးလူမျိုးကနေ မွေးဖွားလာသူ ဖြစ်တယ်။ ဒါပေမဲ့ အစ္စရေးအားလုံး ကိုယ့်ဆက်ကပ်မှုအတိုင်း သစ္စာရှိတာတော့ မဟုတ်ဘူး။ ဟေဇကိရဲ့ဖခင် အာခတ်ဟာ မင်းဆိုးတစ်ပါး ဖြစ်တယ်။ ဘုရားသခင့်ဗိမာန်တော်ကို မလေးမစားလုပ်ပြီး တခြားဘုရားတွေကို ဝတ်ပြုဖို့ လူတွေကို ဖိအားပေးတယ်။ ဟေဇကိရဲ့ ညီအစ်ကိုတချို့ကိုတောင် မှားယွင်းတဲ့ဘုရားရှေ့ အရှင်လတ်လတ် မီးရှို့ပူဇော်တယ်။ ဟေဇကိရဲ့ ကလေးဘဝ မလှပခဲ့ဘူး။—၄ ရာ. ၁၆:၂-၄၊ ၁၀-၁၇; ၆ ရာ. ၂၈:၁-၃။

၉၊ ၁၀။ (က) ဟေဇကိဟာ ဘာကြောင့် အလွယ်တကူ စိတ်ဆိုးနာကျည်းမိနိုင်သလဲ။ (ခ) ဘုရားသခင်ကို ဘာကြောင့် စိတ်မဆိုးသင့်သလဲ။ (ဂ) လူတစ်ယောက် ဘယ်လိုလူစားမျိုးဖြစ်လာမယ်ဆိုတာက မိသားစုနောက်ခံပေါ် မူတည်တယ်လို့ ဘာကြောင့် မယူဆသင့်သလဲ။

^၉ အာခတ်ရဲ့ ပုံနမူနာဆိုးကြောင့် သားဖြစ်သူ ဟေဇကိဟာ ယေဟောဝါကို စိတ်ဆိုးနာကျည်းမိနိုင်တယ်။ ဒီနေ့ခေတ်မှာ လူတချို့က ဒုက္ခနည်းနည်းရောက်တာနဲ့ ‘ယေဟောဝါကို စိတ်ဆိုး’ ဖို့၊ အဖွဲ့အစည်းကို စိတ်နာဖို့ ခိုင်လုံတဲ့အကြောင်းရင်းပဲလို့ ထင်ကြတယ်။ (သု. ၁၉:၃၊ ကဘ) တချို့ကျတော့လည်း ကိုယ့်ဘဝ ဆိုးပေနေတာ၊ မိဘရဲ့ ဆိုးမွေအားလုံး ဆက်ခံရတာဟာ ဆိုးရွားတဲ့ မိသားစုနောက်ခံကြောင့်လို့ ယူမှတ်နေကြတယ်။ (ယေဇ. ၁၈:၂၊ ၃) အဲဒါမှန်သလား။

^၁၀ ဟေဇကိရဲ့ဘဝက အဲဒီမေးခွန်းကို အဖြေပေးတယ်။ ယေဟောဝါကို စိတ်ဆိုးဖို့ ခိုင်လုံတဲ့အကြောင်းရင်း ဘယ်တော့မှ မရှိဘူး။ လူတွေ ဒုက္ခရောက်တာ ယေဟောဝါကြောင့် မဟုတ်ဘူး။ (ယောဘ ၃၄:၁၀) မိဘတွေရဲ့ပုံသက်သေက သားသမီးတွေအပေါ် ကောင်းကျိုးဆိုးကျိုး သက်ရောက်နိုင်တာ မှန်ပါတယ်။ (သု. ၂၂:၆; ကော. ၃:၂၁) ဒါပေမဲ့ အဲဒီလိုပြောလို့ လူတစ်ယောက် ဘယ်လိုလူစားမျိုးဖြစ်လာမယ်ဆိုတာ မိသားစုနောက်ခံပေါ် မူတည်တယ်လို့ မဆိုလိုဘူး။ ဘာကြောင့်လဲဆိုတော့ ကောင်းတာလုပ်ဖို့၊ မကောင်းတာလုပ်ဖို့ လွတ်လပ်စွာရွေးချယ်နိုင်စွမ်းကို ယေဟောဝါ ပေးထားလို့ပဲ။ (တရား. ၃၀:၁၉) အဲဒီအဖိုးတန်ဆုလက်ဆောင်ကို ဟေဇကိ ဘယ်လို အသုံးပြုခဲ့သလဲ။

၁၁။ ဟေဇကိဟာ ဘာကြောင့် အကောင်းဆုံးဘုရင်တစ်ပါး ဖြစ်ခဲ့သလဲ။

^၁၁ ဟေဇကိရဲ့ဖခင်ဟာ အဆိုးဆုံးယုဒဘုရင်တစ်ပါးဖြစ်ပေမဲ့ ဟေဇကိကတော့ အကောင်းဆုံးဘုရင်တစ်ပါး ဖြစ်လာတယ်။ (၄ ဓမ္မရာဇဝင် ၁၈:၅၊ ၆ ကိုဖတ်ပါ။) ဖခင်ခြေရာအတိုင်း မလိုက်ဖို့ သူဆုံးဖြတ်တယ်။ အဲဒီအစား ဟေရှာယ၊ မိက္ခာ၊ ဟောရှေ စတဲ့ သစ္စာရှိပရောဖက်တွေရဲ့ ဆုံးမစကားနဲ့ ပဲ့ပြင်မှုကို ဂရု စိုက်နားထောင်ဖို့ သူရွေးချယ်တယ်။ ဒါက ဖခင်မွှေးခဲ့တဲ့ပြဿနာမီးတွေကို ငြိမ်းသတ်ဖို့ သူ့ကို တွန်းအားပေးခဲ့တယ်။ ဗိမာန်တော်ကို သန့်ရှင်းရေးလုပ်တယ်။ လူတွေရဲ့အပြစ်ကို ခွင့်လွှတ်ဖို့ ဘုရားသခင်ဆီ အသနားခံပြီး တစ်ပြည်လုံးမှာရှိတဲ့ ရုပ်တုတွေကို ဖျက်ဆီးပစ်ခဲ့တယ်။ (၆ ရာ. ၂၉:၁-၁၁၊ ၁၈-၂၄; ၃၁:၁) နောက်ပိုင်း၊ ဂျေရုဆလင်ကို တိုက်ခိုက်ဖို့ အာရှုရိဘုရင် သနာခရိပ် ခြိမ်းခြောက်တဲ့အခါ ဟေဇကိဟာ ယုံကြည်ခြင်းအပြည့်နဲ့ သတ္တိရှိရှိ လုပ်ဆောင်ခဲ့တယ်။ ယေဟောဝါရဲ့ ကာကွယ်မှုကို ယုံကြည်ကိုးစားပြီး လူတွေကို အပြောနဲ့ရော အလုပ်နဲ့ပါ အားပေးခဲ့တယ်။ (၆ ရာ. ၃၂:၇၊ ၈) တစ်ခါမှာဆိုရင် သူ မာနတက်လာလို့ ယေဟောဝါပဲ့ပြင်တဲ့အခါ ကိုယ့်ကိုယ်ကိုယ် နှိမ့်ချပြီး နောင်တယူခဲ့တယ်။ (၆ ရာ. ၃၂:၂၄-၂၆) မိသားစုနောက်ခံကြောင့် ဘဝပျက်ခံမယ့်အစား ယေဟောဝါနဲ့ မိတ်ဆွေဖွဲ့ခဲ့တယ်။ ဟေဇကိဟာ ကျွန်တော်တို့ တုပထိုက်တဲ့ စံနမူနာရှင်ဖြစ်တာ ထင်ရှားတယ်။

၁၂။ ဒီနေ့ခတ်လူများစွာဟာ ယေဟောဝါရဲ့ မိတ်ဆွေဖြစ်ကြောင်း ဟေဇကိလိုပဲ ဘယ်လို သက်သေပြနေသလဲ။

^၁၂ ဒီနေ့ခေတ်လောကဟာ မေတ္တာကင်းမဲ့ပြီး သိပ်ရက်စက်တယ်။ ကလေးများစွာဟာ မိဘရဲ့အရိပ်အာဝါသအောက်မှာ မကြီးပြင်းကြရဘူး။ (၂ တိ. ၃:၁-၅) ဒီနေ့ခေတ်ခရစ်ယာန်များစွာဟာ ကြမ်းတမ်းတဲ့မိသားစုနောက်ခံတွေ ရှိပေမဲ့ ယေဟောဝါနဲ့ မိတ်ဆွေဖွဲ့ကြတယ်။ ရှေ့ဆက်ရမယ့်ဘဝလမ်းဟာ မိသားစုနောက်ခံအပေါ် မမူတည်မှန်း ဟေဇကိလိုပဲ သူတို့ သက်သေပြနေကြတယ်။ ဘုရားသခင်က လူတွေကို လွတ်လပ်စွာရွေးချယ်ခွင့် ပေးထားတယ်။ ဟေဇကိလိုပဲ ယေဟောဝါကို ဝတ်ပြုဂုဏ်တင်ဖို့ ကျွန်တော်တို့ ရွေးချယ်နိုင်တယ်။

၁၃၊ ၁၄။ မာရိမှာ ဘယ်လိုစိုးရိမ်မှုတွေ ရှိနိုင်သလဲ။ ဂါဗြေလကို မာရိ ဘယ်လို ပြန်ပြောသလဲ။

^၁၃ ဟေဇကိခေတ်နောက်ပိုင်း နှစ်ပေါင်းများစွာကြာပြီးနောက် မာရိလို့ခေါ်တဲ့ နှိမ့်ချတဲ့မိန်းမပျိုဟာ ယေဟောဝါနဲ့ သိပ်ရင်းနှီးတဲ့ မိတ်ဆွေနှောင်ကြိုးရှိပြီး အထူးတာဝန်တစ်ခု ရရှိခဲ့တယ်။ ဘုရားသခင့်သားတော်ကို ကိုယ်ဝန်လွယ်၊ မွေးဖွားပြီး ကျွေးမွေးစောင့်ရှောက်ရမယ်။ မာရိကို ယေဟောဝါ သိပ်ချစ်ပြီး ယုံကြည်စိတ်ချလို့ ဒီလောက်ကြီးမားတဲ့တာဝန် ပေးတာ ဖြစ်ရမယ်။ ဒါပေမဲ့ အဲဒီတာဝန်ရတဲ့အခါ မာရိ ဘယ်လို တုံ့ပြန်သလဲ။

^၁၄ မာရိရရှိတဲ့အခွင့်ထူးအကြောင်းပဲ ကျွန်တော်တို့ ပြောလေ့ရှိတယ်။ ဒါပေမဲ့ သူ့မှာ ဘယ်လို စိုးရိမ်မှုတွေ ရှိနိုင်သလဲ။ ဥပမာ၊ အမျိုးသားတစ်ယောက်နဲ့ အတူအိပ်စရာမလိုဘဲ အံ့ဖွယ်နည်းနဲ့ ကိုယ်ဝန်ရမယ်လို့ မာရိကို ကောင်းကင်တမန်ဂါဗြေလ ပြောတယ်။ ဒါပေမဲ့ မာရိရဲ့ မိသားစုတွေ၊ အိမ်နီးချင်းတွေကိုတော့ အဲဒီအကြောင်း ဂါဗြေလ မရှင်းပြဘူး။ သူတို့ ဘယ်လို ထင်ကြမလဲ။ သစ္စာမဖောက်ပါဘူးဆိုတဲ့အကြောင်း ယောသပ်ကိုရော မာရိ ဘယ်လို ရှင်းပြမလဲ။ အဲဒီအပြင် ဘုရားသခင့်သားတော်ကို လူသားတစ်ယောက်အနေနဲ့ ကျွေးမွေးစောင့်ရှောက်ရမယ့် တာဝန်ကြီးက လည်း ရှိသေးတယ်။ မာရိရဲ့ စိုးရိမ်မှုအားလုံးကိုတော့ ကျွန်တော်တို့ မသိပေမဲ့ ဂါဗြေလကို ဘာပြန်ပြောတယ်ဆိုတာတော့ သိထားတယ်။ “ကျွန်မသည် ယေဟောဝါဘုရား၏ကျွန်မ ဖြစ်ပါ၏။ အရှင့်စကားအတိုင်း ကျွန်မ၌ ဖြစ်ပါစေ” လို့ မာရိပြောတယ်။—လု. ၁:၂၆-၃၈။

၁၅။ မာရိရဲ့ ယုံကြည်ခြင်းက ဘာကြောင့် စံထားလောက်စရာကောင်းသလဲ။

^၁၅ မာရိရဲ့ ယုံကြည်ခြင်းကတော့ စံထားလောက်စရာပဲ။ ကျွန်မဆိုတာ သခင် ထားရာနေ၊ စေရာသွားရမယ့်သူပါ။ ဒါကြောင့်လည်း သခင်ဖြစ်သူယေဟောဝါ စေခိုင်းသမျှကို လုပ်ဆောင်ဖို့ မာရိ အသင့်ပဲ။ မာရိဟာ စိုးရိမ်မှုအားလုံးကို ယေဟောဝါလက်ထဲ ပုံအပ်လိုက်တယ်။ ဒီလောက်ခိုင်မာတဲ့ယုံကြည်ခြင်းကို မာရိ ဘယ်လို ရရှိခဲ့တာလဲ။ ယုံကြည်ခြင်းဆိုတာ မွေးရာပါမဟုတ်ဘူး။ ကြိုးစားမွေးမြူမှ၊ ဘုရားသခင်ကောင်းချီးပေးမှ ရရှိနိုင်မယ့်အရာ ဖြစ်တယ်။ (ဂလ. ၅:၂၂) မာရိဟာ ယုံကြည်ခြင်းခိုင်မာအောင် ကြိုးစားတည်ဆောက်ခဲ့တယ်။ ဘယ်လိုသိရသလဲ။ သူ့ရဲ့ နားထောင်ပုံ၊ စကားပြောဆိုပုံတို့ကို သုံးသပ်ကြည့်ကြစို့။

၁၆။ မာရိဟာ ကောင်းကောင်းနားထောင်သူဖြစ်တယ်ဆိုတာ ဘယ်အချက်တွေက ဖော်ပြသလဲ။

^၁၆ မာရိ နားထောင်ပုံ။ ‘နားထောင်ခြင်း၌ လျင်မြန်ရမည်။ စကားပြောခြင်း၌ နှေးရမည်’ လို့ ကျမ်းစာပြောတယ်။ (ယာ. ၁:၁၉) မာရိဟာ ကောင်းကောင်းနားထောင်သူ ဖြစ်တယ်။ အဓိပ္ပာယ်နက်နဲတဲ့ စကားတွေကို ဂရုတစိုက် နားထောင်ပြီး နောက်ပိုင်းမှာ အဲဒါတွေကို အချိန်ယူတွေးတောတယ်လို့ လုကာကျမ်းမှာ နှစ်ကြိမ် ဖော်ပြထားတယ်။ တစ်ကြိမ်ကတော့ ယေရှုမွေးဖွားတဲ့အခါ ကောင်းကင်တမန်တွေပြောတဲ့ စကားကို သိုးထိန်းတွေ ပြန်ပြောပြချိန်မှာ ဖြစ်တယ်။ နောက်တစ်ကြိမ်ကတော့ ၁၂ နှစ်အရွယ်လေးနဲ့ အံ့သြစရာစကားတွေကို ယေရှု ပြောခဲ့ချိန်မှာ ဖြစ်တယ်။ အဲဒီနှစ်ကြိမ်စလုံးမှာ မာရိဟာ ကြားတဲ့အရာတွေကို နားထောင်၊ မှတ်သားပြီး သေချာတွေးတောခဲ့တယ်။—လုကာ ၂:၁၆–၁၉၊ ၄၉၊ ၅၁ ကိုဖတ်ပါ။

၁၇။ မာရိရဲ့ စကားပြောဆိုပုံကနေ မာရိအကြောင်း ဘာသိနိုင်သလဲ။

^၁၇ မာရိ စကားပြောဆိုပုံ။ ကျမ်းစာမှာ မာရိပြောခဲ့တဲ့စကား များများစားစား မရှိဘူး။ အရှည်ဆုံးစကားကို လုကာ ၁:၄၆-၅၅ မှာ တွေ့ရတယ်။ ဟီဘရူးကျမ်းစောင်တွေကို မာရိ ဘယ်လောက်အကျွမ်းဝင်မှန်း အဲဒီစကားတွေက ဖော်ပြတယ်။ ရှမွေလမိခင်ဟန္နရဲ့ ဆုတောင်းချက်မှာပါတဲ့ စကားတွေနဲ့ ဆင်တူတယ်။ (၁ ရာ. ၂:၁-၁၀) မာရိဟာ ကျမ်းစာထဲကစကားတွေကို အကြိမ် ၂၀ လောက် အသုံးပြုခဲ့တယ်။ အကြီးမြတ်ဆုံးမိတ်ဆွေ ယေဟောဝါဆီက သင်ယူရရှိတဲ့ အမှန်တရားတွေအကြောင်း ပြောဆိုရတာကို မာရိ သိပ်နှစ်သက်မှန်း ထင်ရှားတယ်။

၁၈။ ဘယ်နည်းတွေအားဖြင့် မာရိရဲ့ယုံကြည်ခြင်းကို တုပနိုင်သလဲ။

^၁၈ မာရိလိုပဲ ကျွန်တော်တို့လည်း သိပ်ခက်တယ်လို့ ကိုယ်ထင်ထားတဲ့ တာဝန်တွေကို တစ်ခါတလေ ယေဟောဝါဆီကနေ ရရှိနိုင်တယ်။ တာဝန်ကို နှိမ့်ချစွာလက်ခံခြင်း၊ ယေဟောဝါ ကူညီပေးမယ်ဆိုတာ ယုံကြည်စိတ်ချခြင်းအားဖြင့် မာရိရဲ့ ပုံနမူနာကို တုပကြပါစို့။ ယေဟောဝါအကြောင်း၊ ကိုယ်တော့်ရည်ရွယ်ချက်တွေအကြောင်း သင်ယူရသမျှကို ဂရုတစိုက် နားထောင်ပြီး တွေးတောဆင်ခြင်ခြင်း၊ တခြားသူတွေကိုလည်း ဝမ်းမြောက်စွာ ပြောပြခြင်းအားဖြင့် မာရိရဲ့ယုံကြည်ခြင်းကို တုပကြပါစို့။—ဆာ. ၇၇:၁၁၊ ၁၂; လု. ၈:၁၈; ရော. ၁၀:၁၅။

၁၉။ ကျမ်းစာမှာပါတဲ့ စံထားလောက်စရာ ယုံကြည်ခြင်းပုံနမူနာတွေကို တုပမယ်ဆိုရင် ဘာကို စိတ်ချနိုင်သလဲ။

^၁၉ ရုသ၊ ဟေဇကိနဲ့ မာရိဟာ အာဗြဟံလိုပဲ ယေဟောဝါရဲ့မိတ်ဆွေတွေဖြစ်တာ ထင်ရှားတယ်။ ဘုရားသခင်နဲ့ မိတ်ဆွေဖြစ်ခွင့်ရခဲ့တဲ့ “အလွန်ကြီးမားသော သက်သေအုပ်စုကြီး” ထဲမှာ သူတို့လည်း ပါဝင်တယ်။ စံထားလောက်စရာ အဲဒီယုံကြည်ခြင်းပုံနမူနာတွေကို ဆက်တုပကြပါစို့။ (ဟေဗြဲ ၆:၁၁၊ ၁၂) အဲဒီလိုလုပ်ဆောင်မယ်ဆိုရင် ယေဟောဝါနဲ့ ထာဝရမိတ်ဆွေဖြစ်ခွင့်ဆိုတဲ့ဆုကို ရရှိမယ်ဆိုတာ စိတ်ချနိုင်ပါတယ်။