၁၊ ၂။ (က) ယေဟောဝါ​ကို ယုံ​ကြည်​လာ​အောင် သား​သမီး​တွေ​ကို သွန်သင်​ပေး​ရ​တာ မိ​ဘ​တွေ​အတွက် ဘာ​ကြောင့် မလွယ်​သလဲ။ ဘာ​အကူ​အညီ​နဲ့​ပဲ ဒီ​တာဝန်​ကို ထမ်း​ဆောင်​နိုင်​သလဲ။ (ခ) ဘယ်​အချက်​လေးချက်​ကို ဆွေး​နွေး​ကြ​မလဲ။

ပြင်​သစ်​နိုင်​ငံ​က မိ​ဘ​နှစ်​ပါး အခု​လို ပြော​တယ်– “ယေဟောဝါ​ကို ကျွန်​တော်​တို့ ယုံ​ကြည်​လို့ သား​သမီး​တွေ​လည်း ယုံ​ကြည်​မယ်​လို့ ပြော​လို့​မရ​ဘူး။ ယုံ​ကြည်​ခြင်း​ဆို​တာ အမွေ​ပေး​လို့ရ​တဲ့​အရာ မဟုတ်​ဘူး။ သား​သမီး​တွေ​ကိုယ်​တိုင် တ​ဖြည်း​ဖြည်း ရ​ယူ​ရ​မယ်။” ဩစ​တြေး​လျ ညီ​အစ်​ကို​တစ်​ယောက်​လည်း ဒီ​လို​ပြော​တယ်– “က​လေး​ရဲ့ နှလုံး​ထဲ​မှာ ယုံ​ကြည်​ခြင်း တည်​ဆောက်​ပေး​ရ​တာ​ဟာ အခက်​ခဲ​ဆုံး​အလုပ် ဖြစ်​နိုင်​တယ်။ မေး​ခွန်း​တစ်​ခု​ကို သူတို့​စိတ်​ကျေ​နပ်​အောင် အဖြေပေး​လိုက်​ပြီလို့ ထင်​ပေမဲ့ နောက်​ပိုင်း​မှာ အဲဒီ​မေး​ခွန်း​ကို​ပဲ ထပ်​မေး​တတ်​ကြ​တယ်။ ဒီ​နေ့ ပေး​လိုက်​တဲ့​အဖြေကို ဒီ​နေ့ ကျေ​နပ်​ပေမဲ့ နောက်​တစ်​နေ့ ကျေ​နပ်​ချင်​မှ ကျေ​နပ်​မယ်။ အကြောင်း​အရာ​တချို့ကို ထပ်​ခါ​တ​လဲ ပြန်​ပြော​ပြဖို့ လို​အပ်​နိုင်​တယ်။”

^၂ သင်​ဟာ မိ​ဘ​တစ်​ယောက်​ဆို​ရင် သား​သမီး​တွေ ယုံ​ကြည်​ခြင်း ရှိ​လာ​အောင် သင်​ကြား​ပေး​ဖို့ အရည်​အချင်း မပြည့်​မီ​ဘူး​လို့ တစ်​ခါ​တ​လေ ခံစား​ရ​သလား။ ဘယ်​သူ​မှ ကိုယ့်​အစွမ်း​အစ​နဲ့​ကိုယ် မတတ်​နိုင်​ဘူး။ (ယေ. ၁၀:၂၃) ဒါ​ကြောင့် ယေဟောဝါ​ရဲ့ လမ်း​ညွှန်​မှု​ကို အား​ကိုး​ဖို့ လို​အပ်​တယ်။ သား​သမီး​တွေ​ကို ဘယ်​လို ကူညီ​ပေး​နိုင်​သလဲ။ (၁) သူတို့​အကြောင်း ကောင်း​ကောင်း သိ​ပါ။ (၂) စိတ်​နှစ်​ပြီး သင်​ပေး​ပါ။  (၃) ထိ​ရောက်​တဲ့ ပုံ​ဥပမာ​တွေ သုံး​ပါ။ (၄) ဆုတောင်း​ပါ၊ စိတ်​ရှည်​ပါ။

၃။ ယေရှု​ရဲ့ သွန်သင်​နည်း​ကို မိ​ဘ​တွေ ဘယ်​လို တု​ပနိုင်​သလဲ။

^၃ ယေရှု​က တ​ပည့်တွေ ယုံ​ကြည်​တဲ့​အရာ​ကို မေး​မြန်း​လေ့​ရှိ​တယ်။ (မ. ၁၆:၁၃-၁၅) ယေရှု​ရဲ့ ပုံသက်သေ​ကို တု​ပပါ။ သား​သမီး​တွေ​နဲ့ စကား​ပြော​တဲ့​အချိန်၊ တစ်​ခု​ခု လုပ်​တဲ့​အချိန်​မှာ သူတို့​ရဲ့ ထင်​မြင်​ချက်​ကို မေး​ပြီး ခံစား​ချက်​ကို ပြော​ပြစေ​ပါ။ သံ​သယ​တွေ ရှိ​နေ​သလား။ ဩစ​တြေး​လျ​နိုင်​ငံ​က ညီ​အစ်​ကို​တစ်​ယောက် ဒီ​လို​ပြော​တယ်– “အဖေက ကျွန်​တော့်​ယုံ​ကြည်​ချက်​အကြောင်း ဆွေး​နွေး​ပြီး ကျိုး​ကြောင်း​ဆင်​ခြင်​တတ်​အောင် ကူညီ​ပေး​တယ်။ ‘ကျမ်း​စာ​မှာ ဘာ​ပြော​ထား​သလဲ။ ကျမ်း​စာ​မှာ ပြော​ထား​တာ​ကို ယုံ​သလား။ ဘာ​ကြောင့် ယုံ​တာ​လဲ’ ဆို​ပြီး မေး​တတ်​တယ်။ ကိုယ့်​စကား​နဲ့ ပြန်​ပြော​စေ​ချင်​တယ်။ အဖေအမေ ပြော​တဲ့​အတိုင်း လိုက်​ပြော​တာ​မျိုး မဖြစ်​စေ​ချင်​ဘူး။ အသက်​ပို​ကြီး​လာ​တာ​နဲ့​အမျှ ပို​ပြီး​တော့ ဖြေတတ်​လာ​တယ်။”

၄။ သား​သမီး​တွေ​ကို စိတ်​ရှည်​ဖို့၊ မေး​ခွန်း​တွေ​ကို ဖြေပေး​ဖို့ ဘာ​ကြောင့် အရေး​ကြီး​သလဲ။ ဥပမာ​ပေး​ပါ။

^၄ ကျမ်း​စာ​သွန်သင်​ချက်​တစ်​ခု​ကို သား​သမီး​တွေ ချက်​ချင်း မယုံ​ကြည်​တဲ့​အခါ စိတ်​ရှည်​ပါ။ မေး​ခွန်း​တွေ​အတွက် အဖြေရ​အောင် ကူညီ​ပေး​ပါ။ ဖခင်​တစ်​ယောက် ဒီ​လို​ပြော​တယ်– “က​လေး​ရဲ့ မေး​ခွန်း​ကို အလေး​အနက် ထား​ပါ။ အရေး​မပါ​သလို မထား​လိုက်​နဲ့။ ကိုယ်​မဖြေချင်​တာ​နဲ့​ပဲ အကြောင်း​အရာ​တစ်​ခု​ကို မရှောင်​လွှဲ​ပါ​နဲ့။” တ​ကယ်​တော့ က​လေး​တွေ မေး​ခွန်း​မေး​တာ ကောင်း​တယ်။ အဲ​ဒါ​ကို သူတို့​နား​လည်​ချင်​တယ်​ဆို​တဲ့ သဘော​ပဲ။ ယေရှု​လည်း ငယ်​ငယ်​တုန်း​က မေး​ခွန်း​တွေ မေး​ခဲ့​တယ်။ (လုကာ ၂:၄၆ ကို​ဖတ်​ပါ။) ဒိန်း​မတ်​နိုင်​ငံ​က လူငယ်​တစ်​ယောက် ဒီ​လို​ပြော​တယ်– “ကျွန်​တော်​တို့​ရဲ့ ဘာ​သာ​က စစ်​မှန်​တဲ့​ဘာ​သာ​မှ ဟုတ်​ရဲ့​လားလို့ ပြော​တဲ့​အခါ မိ​ဘ​တွေ စိုး​ရိမ်​သွား​မှာ​ပဲ။ ဒါ​ပေမဲ့ တည်​တည်​ငြိမ်​ငြိမ်​ပဲ။ ကျွန်​တော့်​မေး​ခွန်း​အားလုံး​ကို ကျမ်း​စာ​သုံး​ပြီး အဖြေပေး​ကြ​တယ်။”

၅။ သား​သမီး​တွေ ယေဟောဝါ​ကို ယုံ​ကြည်​နေ​တယ်​လို့ ထင်​ရရင်​တောင် မိ​ဘ​တွေ ဘာ​လုပ်​သင့်​သလဲ။

^၅ သား​သမီး​တွေ​အကြောင်း ကောင်း​ကောင်း သိ​ပါ။ သူတို့ အစည်း​အဝေး တက်​ရုံ၊ အမှု​ဆောင် ထွက်​ရုံ​နဲ့ ယေဟောဝါ​ကို ယုံ​ကြည်​နေ​သား​ပဲ​လို့ မတွေး​လိုက်​ပါ​နဲ့။ ယေဟောဝါ​နဲ့​ပတ်​သက်​ပြီး သူတို့ ဘယ်​လို ခံစား​ရ​သလဲ။ ကျမ်း​စာ​ကို ဘယ်​လို ထင်​ကြ​သလဲ။ ယေဟောဝါ​အပေါ် ဆက်​သစ္စာ​ရှိ​ဖို့ အခက်​တွေ့​စေ​တဲ့​အရာတွေ​ကို သိ​အောင် အတတ်​နိုင်​ဆုံး ကြိုး​စား​ပါ။ နေ့​တိုင်း တွဲ​လုပ်​တဲ့​အခါ ဘုရား​သခင်​အကြောင်း ပြော​ဆို​ပါ။ သူတို့​နဲ့​အတူ ရှိ​နေ​ချိန်​မှာ​ရော၊ သီး​သန့်​အချိန်​မှာ​ပါ သူတို့​အတွက် ဆုတောင်း​ပေး​ပါ။

၆။ ယေဟောဝါ​နဲ့ ကျမ်း​စာ​အကြောင်း မိ​ဘ​တွေ ဆက်​လေ့​လာ​တာ​က သား​သမီး​တွေ​ကို သွန်သင်​ပေး​ရာ​မှာ ဘယ်​လို အထောက်​အကူ ပြု​သလဲ။

^၆ ယေရှု​ဟာ ယေဟောဝါ​နဲ့ လူ​တွေ​ကို ချစ်​ပြီး ကျမ်း​စာ​ကို ကောင်း​ကောင်း သိ​တဲ့​အတွက် သူ​ပြော​တာ​ကို လူ​တွေ နား​ထောင်​ချင်​ကြ​တယ်။ (လု. ၂၄:၃၂။ ယော. ၇:၄၆) အဲဒီ​လို​ပဲ ယေဟောဝါ​ကို သင်​ချစ်​မှန်း သား​သမီး​တွေ သိ​လာ​တဲ့​အခါ သူတို့​လည်း ချစ်​တတ်​လာ​ပါ​လိမ့်​မယ်။ (တ​ရား​ဟော​ရာ ၆:၅–၈ နဲ့ လုကာ ၆:၄၅ တို့​ကို​ဖတ်​ပါ။) ဒါ​ကြောင့် ကျမ်း​စာ​နဲ့ ကျမ်း​စာ​အခြေ​ပြု စာပေ​တွေ​ကို မှန်​မှန် လေ့​လာ​ပါ။ ယေဟောဝါ​ရဲ့ ဖန်​ဆင်း​ရာတွေ​အကြောင်း ပို​သိ​အောင် လုပ်​ပါ။ (မ. ၆:၂၆၊ ၂၈) ယေဟောဝါ​အကြောင်း ပို​သိ​လာ​တာ​နဲ့​အမျှ ကိုယ်​တော့်​အကြောင်း သား​သမီး​တွေ​ကို ပို​သင်​ပေး​နိုင်​ပါ​လိမ့်​မယ်။—လု. ၆:၄၀။

၇၊ ၈။ ယေဟောဝါ​အကြောင်း တစ်​ခု​ခု သိ​လာ​တိုင်း သင်​ဘာ​လုပ်​နိုင်​သလဲ။ ဒီ​အချက်​နဲ့​ပတ်​သက်​ပြီး မိ​ဘ​တ​ချို့ ဘာ​လုပ်​ခဲ့​ကြ​သလဲ။

^၇ သင့်​စိတ်​နှလုံး​ထဲ​မှာ ကျမ်း​စာ​အမှန်​တ​ရားတွေ ပြည့်​နေ​မယ်​ဆို​ရင် မိသား​စု​နဲ့ ပြော​ဆို​ချင်​ပါ​လိမ့်​မယ်။ အစည်း​အဝေး​အတွက် ပြင်​ဆင်​ချိန်၊ မိသား​စု​ဝတ်​ပြု​မှု ပြု​လုပ်​ချိန်​မှာ​သာ မဟုတ်​ဘဲ အချိန်​မရွေး ပြော​ဆို​ပါ။ အမေရိ​ကန်​နိုင်​ငံ​က မိ​ဘ​နှစ်​ပါး အဲဒီ​လို လုပ်​ခဲ့​တယ်။ လှ​ပတဲ့​ဖန်​ဆင်း​ခြင်း​လက်​ရာ​တစ်​ခု​ခု တွေ့​တဲ့​အခါ​ဖြစ်​စေ၊ အရ​သာ​ရှိ​တဲ့ အစား​အစာ စား​ရ​တဲ့​အခါ​ဖြစ်​စေ ယေဟောဝါ​အကြောင်း  သား​သမီး​တွေ​နဲ့ ပြော​ဆို​ကြ​တယ်။ “ဖန်​ဆင်း​ခြင်း​လက်​ရာ​အားလုံး​မှာ​ပါ​တဲ့ ယေဟောဝါ​ရဲ့ မေတ္တာ​နဲ့ ကျွန်​တော်​တို့​အတွက် ကြို​တင်​စဉ်း​စား​ပေး​ထား​တာ​တွေ​အကြောင်း သား​သမီး​တွေ​ကို သတိ​ပေး​ပြော​ပြလေ့​ရှိ​တယ်” လို့ သူတို့​ပြော​တယ်။ တောင်​အာ​ဖရိ​က​မှာ နေ​ထိုင်​တဲ့ ဇနီး​မောင်​နှံ​လည်း ပန်း​ခြံ​ထဲ​မှာ သမီး​နှစ်​ယောက်​နဲ့​အတူ အလုပ်​လုပ်​တဲ့​အခါ ဖန်​ဆင်း​ရှင်​အကြောင်း ပြော​လေ့​ရှိ​တယ်။ မျိုး​စေ့​က​နေ အပင်​ပေါက်​လာ​တာ ဘယ်​လောက် ဆန်း​ကြယ်​တဲ့​အကြောင်း ပြော​လေ့​ရှိ​တယ်။ “အသက်​နဲ့ အသက်​ရဲ့ ရှုပ်​ထွေး​ဆန်း​ကြယ်​မှု​ကို သမီး​တွေ လေး​မြတ်​တတ်​ဖို့ သင်​ပေး​တယ်။”

^၈ သား​ရဲ့ ယုံ​ကြည်​ခြင်း ခိုင်​မာ​လာ​အောင်၊ ယေဟောဝါ ဖန်​ဆင်း​ရှင်​ဖြစ်​တယ်​ဆို​တဲ့ အထောက်​အထား​တွေ သိ​မြင်​လာ​အောင် ဩစ​တြေး​လျ​က ဖခင်​တစ်​ယောက်​က ဆယ်​နှစ်​အရွယ်​သား​ကို ပြတိုက်​တစ်​ခု​ဆီ ခေါ်​သွား​တယ်။ သူ ဒီ​လို​ပြော​တယ်– “အဲဒီ​မှာ ရှေး​ခေတ် ပင်လယ်​သတ္တ​ဝါ​တွေ ပြထား​တယ်။ အခု​ခေတ် ရှိ​နေ​တဲ့ သတ္တ​ဝါ​တွေ​လို​ပဲ မျိုး​သုဉ်း​သွား​တဲ့ ဒီ​သတ္တ​ဝါ​တွေရဲ့ လှ​ပဆန်း​ကြယ်​မှု၊ ပြီး​ပြည့်​စုံ​မှု​ကို အံ့​သြခဲ့ရ​တယ်။ အသက်​ဟာ ရိုး​ရှင်း​တဲ့​အရာ​က​နေ ရှုပ်​ထွေး​တဲ့​အရာ​အဖြစ် ဆင့်​ကဲ​ပြောင်း​လဲ​လာ​တယ်​ဆို​ရင် ဒီ​ရှေး​ဟောင်း​သတ္တ​ဝါ​တွေ​ဟာ ဘာ​ကြောင့် ရှုပ်​ထွေး​ဆန်း​ကြယ်​ရ​တာ​လဲ။ ဒီ​အချက်​ကို ကျွန်​တော် သိပ်​သဘော​ကျ​သွား​ပြီး သား​ကို​လည်း ရှင်း​ပြခဲ့​တယ်။”

၉။ ပုံ​ဥပမာ​တွေ​ဟာ ဘာ​ကြောင့် ထိ​ရောက်​သလဲ။ မိ​ခင်​တစ်​ယောက် ဘာ​ပုံ​ဥပမာ သုံး​ခဲ့​သလဲ။

^၉ ပုံ​ဥပမာ​တွေ​ကို ယေရှု သုံး​လေ့​ရှိ​တယ်။ ဇာတ်​လမ်း​တစ်​ပုဒ်၊ ဥပမာ​တစ်​ခု ပြော​ပြပြီး အရေး​ကြီး​တဲ့ သင်​ခန်း​စာ​တွေ သင်​ပေး​လေ့​ရှိ​တယ်။ (မ. ၁၃:၃၄၊ ၃၅) ဥပမာ​တွေ သုံး​တဲ့​အခါ သင့်​သား​သမီး​တွေ မြင်​ယောင်​လာ​အောင် ပြော​ပြပါ။ ဒါ​က သင်​ပေး​ချင်​တဲ့​အကြောင်း​ကို စဉ်း​စား​တတ်​အောင်၊ ရှင်း​ရှင်း​လင်း​လင်း နား​လည်​အောင်၊ မှတ်​မိ​နေ​အောင် ကူညီ​ပေး​ပါ​လိမ့်​မယ်။ အဲဒီ​လို သင်​ယူ​ရ​တာ​ကို​လည်း သူတို့ ကြိုက်​နှစ်​သက်​ပါ​လိမ့်​မယ်။ ဥပမာ၊ ဂျ​ပန်​နိုင်​ငံ​က မိ​ခင်​တစ်​ယောက်​က ကမ္ဘာ့​လေ​ထု​ကို ယေဟောဝါ ပြု​လုပ်​ထား​ပုံ​က ကျွန်​တော်​တို့​ကို ဘယ်​လောက် ဂရု​စိုက်​မှန်း​ပြတယ်​ဆို​တာ သား​နှစ်​ယောက်​ကို သင်​ပေး​ချင်​တယ်။ သား​တစ်​ယောက်​က ရှစ်​နှစ်၊ တစ်​ယောက်​က ဆယ်​နှစ်။ ဒါ​ကြောင့် သူတို့​နား​လည်​နိုင်​မယ့် ဥပမာ​တစ်​ခု အသုံး​ပြု​ခဲ့​တယ်။ သား​တွေ​ကို နွား​နို့၊ သကြား၊ ကော်​ဖီ​မှုန့် ပေး​ပြီး ကော်​ဖီ​တစ်​ခွက်​စီ ဖျော်​လာ​ဖို့ ပြော​လိုက်​တယ်။ “ကျွန်​မ ကြိုက်​တဲ့​အရ​သာ​ဖြစ်​အောင် ဂရု​တ​စိုက် ဖျော်​ပေး​ကြ​တယ်။ ယေဟောဝါ​လည်း ကျွန်​မတို့​အတွက် အနေ​တော်​ဖြစ်​အောင် ကမ္ဘာ့​လေ​ထု​မှာ​ပါ​ဝင်​တဲ့ ဓာတ်​ငွေ့တွေ​ကို ပေါင်း​စပ်​ထား​တယ်​လို့ ရှင်း​ပြလိုက်​တယ်” ဆို​ပြီး သူ​ပြော​တယ်။ သား​တွေ အဲဒီ​လို သင်​ယူ​ရ​တာ​ကို နှစ်​သက်​ပြီး သင်​ခန်း​စာ​ကို ဘယ်​တော့​မှ မမေ့​တော့​ဘူး။

၁၀၊ ၁၁။ (က) ဖန်​ဆင်း​ရှင်​တစ်ပါး ရှိ​ကြောင်း သား​သမီး​တွေ​ကို သင်​ပေး​ဖို့ ဘယ်​ဥပမာ​ကို အသုံး​ပြု​နိုင်​သလဲ။ (ဆောင်း​ပါး​အစ​မှာ​ပါ​တဲ့ ရုပ်​ပုံ​ကို ကြည့်​ပါ။) (ခ) ဘယ်​ဥပမာ​တွေ​ကို သင် အသုံး​ပြု​ခဲ့​သလဲ။

^၁၀ ဖန်​ဆင်း​ရှင်​တစ်ပါး ရှိ​ကြောင်း သား​သမီး​တွေ​ကို သင်​ပေး​ဖို့ ဘယ်​ဥပမာ အသုံး​ပြု​နိုင်​သလဲ။ ပါ​ဝင်​ပစ္စည်း​စာရင်း​ကို ကြည့်​ပြီး သား​သမီး​တွေ​နဲ့​အတူ မုန့်​ဖုတ်​နိုင်​တယ်။ စာ​ရင်း​အတိုင်း အတိ​အကျ ထည့်​ဖို့ ဘာ​ကြောင့် အရေး​ကြီး​မှန်း ရှင်း​ပြပါ။ အဲဒီ​နောက် သင့်​က​လေး​ကို ပန်း​သီး​ဖြစ်​ဖြစ်၊ တ​ခြား​အသီး​ဖြစ်​ဖြစ် ပေး​ပြီး “ဒီ​အသီး​ရဲ့ ပါ​ဝင်ပစ္စည်း​စာ​ရင်း​ကို သိ​သလား” လို့​မေး​ပါ။ အဲဒီ​နောက် အသီး​ကို နှစ်​ခြမ်း​ခွဲ​ပြီး အစေ့​တစ်​စေ့ ပေး​လိုက်​ပါ။ အဲဒီ​ အစေ့​ဟာ ပါ​ဝင်​ပစ္စည်း​စာ​ရင်း​နဲ့ တူ​တယ်​လို့ ရှင်း​ပြပါ။ အဲဒီ​ထဲ​မှာ အသီး​တစ်​လုံး ဖြစ်​လာ​ဖို့ လို​အပ်​တဲ့ ဗီ​ဇ​အချက်​အလက်​တွေ ပါ​တယ်။ အဲ​ဒါ​က မုန့်​ဖုတ်​တာ​ထက် ရှုပ်​ထွေး​ဆန်း​ကြယ်​တယ်။ “မုန့်​ဖုတ်​ဖို့ ပါ​ဝင်​ပစ္စည်း​စာ​ရင်း​ကို တစ်​ယောက်​ယောက် ရေးခဲ့​တယ်။ ဒါ​ဆို​ရင် အသီး​အတွက် ဘယ်​သူ ရေးခဲ့​သလဲ” လို့​မေး​နိုင်​တယ်။ ပို​ကြီး​တဲ့​က​လေး​ဆို​ရင် အပင်​တစ်​ပင် ဖြစ်​လာ​ဖို့ လို​အပ်​တဲ့ အချက်​အလက်​တွေ​ကို အစေ့​ထဲ​မှာ​ပါ​တဲ့ ဆဲလ်တွေ​ထဲ​မှာ တွေ့​ရ​တယ်​လို့ ပြော​နိုင်​တယ်။ သက်​ရှိ​များ​၏​မူ​လ​အစ—မေး​သင့်​မေး​ထိုက်​သော မေး​ခွန်း​ငါး​ခု အင်္ဂ​လိပ် ဘ​ရို​ရှာ၊ စာ​မျက်​နှာ ၁၀ က​နေ ၂၀ မှာ​ပါ​တဲ့ ရုပ်​ပုံ​တွေ​နဲ့ ဥပမာ​တွေ​ကို ရှင်း​ပြနိုင်​တယ်။

^၁၁ မိ​ဘ​များ​စွာ​က “ဒါ​က သူ့​အလို​လို ဖြစ်​လာ​နိုင်​ပါ့​မလား” ဆို​တဲ့ နိုး​လော့! ဆောင်း​ပါး​တွဲ​တွေ​ကို ဖတ်​ပြကြ​တယ်။ က​လေး​တွေ အသက်​ငယ်​သေး​ရင် ရိုး​ရိုး​လေး ရှင်း​ပြနိုင်​တယ်။ ဥပမာ၊ ဒိန်း​မတ်​နိုင်​ငံ​မှာ​ရှိ​တဲ့ ဇနီး​မောင်​နှံ​က လေ​ယာဉ်​ပျံ​ကို ငှက်​တွေ​နဲ့ နှိုင်း​ယှဉ်​ပြခဲ့​တယ်။ “လေ​ယာဉ်​ပျံတွေ​ဟာ ငှက်​တွေ​နဲ့ တူ​တယ်။ ဒါ​ပေမဲ့ ဥ​မဥ​နိုင်​ဘူး။ လေ​ယာဉ်​ပျံ သေး​သေး​လေး​တွေ ပေါက်​လာ​အောင် မဝပ်​နိုင်​ဘူး။ ငှက်​တွေ မြေပေါ်​ဆင်း​ဖို့ အထူး​လမ်း​ကြောင်း မလို​အပ်​ဘူး။ လေ​ယာဉ်​ပျံ​သံ​နဲ့ ငှက်​တွေရဲ့ သီချင်း​ဆို​သံ​ကို နှိုင်း​ယှဉ်​ကြည့်​ပါ​ဦး။ လေ​ယာဉ်​ပျံ​ကို ပြု​လုပ်​သူ​နဲ့ ငှက်​တွေ​ကို ဖန်​ဆင်း​သူ ဘယ်​သူ ပို​ပညာ​ရှိ​သလဲ” လို့ သူတို့ ပြော​ခဲ့​တယ်။ သင်​လည်း သား​သမီး​တွေ​နဲ့ ကျိုး​ကြောင်း​ဆင်​ခြင်​ပြီး မေး​ခွန်း​တွေ မေး​တဲ့​အခါ “စဉ်း​စား​ဆင်​ခြင်​နိုင်​စွမ်း” ကို အသုံး​ပြု​ဖို့၊ ယေဟောဝါ​အပေါ် သူတို့​ရဲ့ ယုံ​ကြည်​ခြင်း​ကို တည်​ဆောက်​ပေး​ဖို့ ကူညီ​ပေး​ရာရောက်​တယ်။—သု. ၂:၁၀-၁၂၊ က​ဘ။

၁၂။ ကျမ်း​စာ​အဆို​အမိန့်​တွေ မှန်​ကန်​ကြောင်း သင်​ပေး​ဖို့ ဘယ်​ဥပမာ​တွေ အသုံး​ပြု​နိုင်​သလဲ။

^၁၂ ကျမ်း​စာ​အဆို​အမိန့်​တွေ မှန်​ကန်​ကြောင်း သင်​ပေး​ဖို့ ထိ​ရောက်​တဲ့ ပုံ​ဥပမာ​တွေ အသုံး​ပြု​နိုင်​တယ်။ ဥပမာ၊ ယောဘ ၂၆:၇ (ဖတ်​ပါ) ကို ဖတ်​ပြနိုင်​တယ်။ အဲဒီ​ကျမ်း​ချက်​ကို ယေဟောဝါ ပြော​တာ​လို့​ပဲ မပြော​ပါ​နဲ့။ သူတို့​ရဲ့ စိတ်​ကူး​ပုံ​ဖော်​နိုင်​စွမ်း​ကို အသုံး​ပြု​စေ​ပါ။ ယောဘ​ခေတ်​တုန်း​က ကမ္ဘာ​ဟာ အာ​ကာ​သထဲ​မှာ အခု​အခံ​မရှိ လွင့်​မျော​နေ​တယ်​လို့ လူ​တွေ ယုံ​ဖို ခက်​တယ်။ ဘော​လုံး၊ ကျောက်​တုံး​စ​တဲ့ အရာ​ဝတ္ထု​မှန်​သမျှ​ဟာ တစ်​ခု​ခု​ပေါ် တည်​မှီ​နေ​ကြ​မှန်း သိ​ကြ​တယ်။ အဲဒီ​ခေတ်​မှာ အဝေး​ကြည့်​မှန်​ပြောင်း​တွေ၊ အာ​ကာ​သယာဉ်တွေ မရှိ​သေး​တဲ့​အတွက် အဲဒီ​အချက်​ကို သက်​သေမပြနိုင်​ကြ​သေး​ဘူး။ ဒါ​ကြောင့် ကျမ်း​စာ​ဟာ လွန်​ခဲ့​တဲ့​နှစ်​ပေါင်း​များ​စွာ​က ရေး​သား​ခဲ့​ပေမဲ့ ယေဟောဝါ​ဆီ​က စကား​တွေ​ဖြစ်​လို့ အမြဲမှန်​ကန်​တယ်​ဆို​ပြီး ပြော​ပြနိုင်​တယ်။—နေ. ၉:၆။

၁၃၊ ၁၄။ ကျမ်း​စာ​မူ​တွေရဲ့ တန်​ဖိုး​ကို နား​လည်​အောင် သား​သမီး​တွေ​ကို ဘယ်​လို ကူညီ​ပေး​နိုင်​သလဲ။

^၁၃ ကျမ်း​စာ​မူ​တွေရဲ့ တန်​ဖိုး​ကို နား​လည်​အောင် သင်​ပေး​ဖို့​လည်း အရေး​ကြီး​တယ်။ (ဆာလံ ၁:၁–၃ ကို​ဖတ်​ပါ။) ဥပမာ၊ ကျွန်း​တစ်​ကျွန်း​ပေါ် သွား​နေ​တယ်​လို့ သား​သမီး​တွေ​ကို မြင်​ယောင်​ကြည့်​ခိုင်း​ပါ။ ဘယ်​သူ​တွေ​နဲ့ နေ​မယ်​ဆို​တာ​ကို သူတို့ ရွေး​ချယ်​ရ​တော့​မယ်။ “လူ​တိုင်း​နဲ့ အဆင်​ပြေချင်​ရင် ဘယ်​လို လူ​တွေ​ကို ခေါ်​သွား​မလဲ” လို့​မေး​နိုင်​တယ်။ အဲဒီ​နောက် ဂလာ​တိ ၅:၁၉-၂၃ ကို​ဖတ်​ပြီး ကမ္ဘာ​သစ်​မှာ ယေဟောဝါ နေ​စေ​ချင်​တဲ့ လူ​စား​မျိုး​တွေ​ကို နား​လည်​အောင် ရှင်း​ပြပေး​နိုင်​တယ်။

^၁၄ ဒီ​နည်း​နဲ့ သား​သမီး​တွေ​ကို အရေး​ကြီး​တဲ့ သင်​ခန်း​စာ​နှစ်​ခု သင်​ပေး​နိုင်​တယ်။ တစ်​ခု​က ဘု​ရား​သခင့် စံနှုန်း​တွေ​ဟာ ငြိမ်သက်​စည်း​လုံး​မှု​ကို ဖြစ်​ပေါ်​စေ​တယ်​ဆို​တဲ့ သင်​ခန်း​စာ​ပါ​ပဲ။ နောက်​တစ်​ခု​က ကမ္ဘာ​သစ်​အသက်​တာ​အတွက် အခု​က​တည်း​က ယေဟောဝါ သင်​ပေး​နေ​တယ်​ဆို​တဲ့ သင်​ခန်း​စာ​ပဲ။ (ဟေ​ရှာ. ၅၄:၁၃။ ယော. ၁၇:၃) ကျမ်း​စာ​က ညီ​အစ်​ကို/မတွေ​ကို ဘယ်​လို ကူညီ​ပေး​တယ်​ဆို​တာ​ကို​လည်း ပြော​ပြနိုင်​တယ်။ ဥပမာ၊ ကျမ်း​စာ​အခြေ​ပြု စာပေ​တွေ​ထဲ​က ဘဝ​အတ္ထုပ္ပတ္တိ​တစ်​ခု ဒါ​မှ​မဟုတ် ကင်း​မျှော်​စင် မှာ​ပါ​တဲ့ “သမ္မာ​ကျမ်း​စာ​က ဘဝ​ပုံ​စံ​တွေ​ကို ပြောင်း​လဲ​ပေး​နိုင်” ဆို​တဲ့ ဆောင်း​ပါး​တွဲ​တွေ​ကို ရှာ​ပါ။ ယေဟောဝါ​ရဲ့ နှစ်​သက်​မှု​ရ​ဖို့ ဘဝ​မှာ ကြီး​မား​တဲ့ အပြောင်း​အလဲ​တွေ လုပ်​ခဲ့​တဲ့ ညီ​အစ်​ကို/မတစ်​ယောက်​ယောက်​ကို ဖိတ်​ခေါ်​ပြီး သူတို့​အကြောင်း ပြော​ပြစေ​နိုင်​တယ်။—ဟေဗြဲ ၄:၁၂။

၁၅။ သား​သမီး​တွေ​ကို သင်​ပေး​ဖို့ ဘာ​က ကူညီ​ပေး​မလဲ။

 ^၁၅ သင်​ခန်း​စာ​ကို စိတ်​ဝင်​စား​စ​ရာ၊ စိတ်​လှုပ်​ရှား​စ​ရာ​ကောင်း​အောင် သင်​ပေး​တဲ့​အခါ သင့်​ရဲ့ စိတ်​ကူး​ပုံ​ဖော်​နိုင်​စွမ်း​ကို သုံး​ပါ။ ယေဟောဝါ​အကြောင်း လေ့​လာ​ပြီး ကိုယ်​တော်​နဲ့ ရင်း​နှီး​အောင် လုပ်​ရ​တာ​ကို ပျော်​ရွှင်​လာ​စေ​ဖို့ နည်း​အမျိုး​မျိုး အသုံး​ပြု​ပါ။ ကြီး​လာ​တဲ့​အထိ ဆက်​သင်​ပေး​ပါ။ “သိ​ပြီး​သား​အကြောင်း​အရာတွေ​ကို နည်း​သစ်​တွေ​နဲ့ သင်​ပေး​ဖို့ မပျင်း​ပါ​နဲ့” လို့ ဖခင်​တစ်​ယောက် ပြော​တယ်။

၁၆။ သား​သမီး​တွေ​ကို သင်​ပေး​တဲ့​အခါ စိတ်​ရှည်​ဖို့ ဘာ​ကြောင့် အရေး​ကြီး​သလဲ။ ဥပမာ​ပေး​ပါ။

^၁၆ ဘု​ရား​သခင့် စွမ်းအား​တော် အကူ​အညီ​ကြောင့် သား​သမီး​တွေရဲ့ ယုံ​ကြည်​ခြင်း ခိုင်​မာ​လာ​နိုင်​ပါ​တယ်။ (ဂလ. ၅:၂၂၊ ၂၃) ဒါ​ပေမဲ့ အချိန်​လို​တယ်။ ဒါ​ကြောင့် စိတ်​ရှည်​ပါ။ ဆက်​သင်​ပေး​ပါ။ သား​တစ်​ယောက်၊ သမီး​တစ်​ယောက် ရှိ​တဲ့ ဂျ​ပန်​နိုင်​ငံ​က ဖခင်​က “ကျွန်​တော်​တို့​ဇနီး​မောင်​နှံ​က က​လေး​တွေ​ကို သိပ်​ဂရု​စိုက်​တယ်။ ငယ်​ငယ်​လေး​က​တည်း​က အစည်း​အဝေး သွား​တဲ့​နေ့​တွေ​က​လွဲ​လို့ နေ့​တိုင်း ၁၅ မိ​နစ် အတူ​လေ့​လာ​တယ်။ ၁၅ မိ​နစ်​ဆို​တာ သူတို့​အတွက်​ရော၊ ကျွန်​တော်​တို့​အတွက်​ပါ မများ​ပါ​ဘူး” လို့​ပြော​တယ်။ တိုက်​နယ်​ကြီး​ကြပ်​မှူး​တစ်​ယောက်​လည်း ဒီ​လို​ရေးခဲ့​တယ်– “ကျွန်​တော် ဆယ်​ကျော်​သက်​တုန်း​က မေး​ခွန်း​တွေ၊ သံ​သယ​တွေ အများ​ကြီး ရှိ​ခဲ့​တယ်။ နှစ်​တွေ​တစ်​လျှောက် အဲဒီ​အကြောင်း​တွေ​ကို အစည်း​အဝေး​တွေ၊ မိသား​စု ဝတ်​ပြု​မှု​တွေ၊ ကိုယ်​ပိုင်​လေ့​လာ​မှု​တွေ​မှာ ကြား​သိ​လာခဲ့ရ​တယ်။ ဒါ​ကြောင့် မိ​ဘ​တွေ ဆက်​သင်​ပေး​နေ​ဖို့ အရေး​ကြီး​တယ်။”

၁၇။ မိ​ဘ​တွေရဲ့ ပုံသက်သေ​ကောင်း​ဟာ ဘာ​ကြောင့် အရေး​ကြီး​သလဲ။ ဇနီး​မောင်​နှံ​တစ်​စုံ​က သမီး​တွေ​အတွက် ဘယ်​လို ပုံသက်သေ​ကောင်း ပြခဲ့​ကြ​သလဲ။

^၁၇ သင့်​ယုံ​ကြည်​ခြင်း ခိုင်​မာ​တာ​ကို သား​သမီး​တွေ မြင်​တဲ့​အခါ အများ​ကြီး သင်​ယူ​နိုင်​တယ်။ သင်​လုပ်​နေ​တာ​တွေ​ကို သူတို့​ကြည့်​နေ​ကြ​တယ်။ ဒါ​ကြောင့် သင့်​ယုံ​ကြည်​ခြင်း​ကို ခိုင်​ခံ့​စေ​ပါ။ ယေဟောဝါ​ဟာ သင့်​အတွက် တ​ကယ့်​ပုဂ္ဂိုလ်​ဖြစ်​မှန်း သား​သမီး​တွေ မြင်​တွေ့​ပါ​စေ။ ဥပမာ၊ ဘာ​မြူ​ဒါ​ကျွန်း​က မိ​ဘ​နှစ်​ပါး​က ကိစ္စ​တစ်​ခု​အတွက် စိုး​ရိမ်​တဲ့​အခါ သမီး​တွေ​နဲ့​အတူ ယေဟောဝါ​ဆီ ဆုတောင်း​တယ်။ ကိုယ်​တိုင်​ဆုတောင်း​ကြ​ဖို့​လည်း အား​ပေး​တယ်။ “သမီး​ကြီး​ကို ‘ယေဟောဝါ​အပေါ် အကြွင်း​မဲ့ ယုံ​ကြည်​အား​ကိုး​ပါ။ အမှု​ဆောင်​လုပ်ငန်း​မှာ အလုပ်​များ​နေ​ပါ။ အရမ်း​ကြီး စိတ်​မပူ​နဲ့’ လို့​ပြော​တယ်။ အကျိုး​ရ​လ​ဒ်​ကို မြင်​တွေ့​တဲ့​အခါ ယေဟောဝါ ကူညီ​နေ​တယ်​လို့ သမီး​ကြီး ခံစား​ခဲ့ရ​တယ်။ ဒါ​ကြောင့် ဘု​ရား​သခင်​ကို​ရော၊ ကျမ်း​စာ​ကို​ပါ သူ ပို​ယုံ​ကြည်​လာ​တယ်” လို့ သူတို့​ပြော​တယ်။

၁၈။ ဘယ်​အရေး​ကြီး​အချက်​ကို မိ​ဘ​တွေ မမေ့​သင့်​သလဲ။

^၁၈ ယုံ​ကြည်​ခြင်း ရှိ​လာ​အောင် သား​သမီး​တွေ​ကိုယ်​တိုင် လုပ်​ယူ​ရ​မယ်။ မိ​ဘ​တွေ​ဟာ စိုက်​ပျိုး​သူ၊ ရေ​လောင်း​သူ​သာ ဖြစ်​ပြီး ယေဟောဝါ​ပဲ အပင်​ကို ကြီး​ထွား​စေ​နိုင်​တယ်။ (၁ ကော. ၃:၆) ဒါ​ကြောင့် သား​သမီး​တွေ​ကို ဘုရား​အကြောင်း ကြိုး​စား​သင်​ပေး​ပါ။ သူတို့​မှာ ယုံ​ကြည်​ခြင်း ရှိ​လာ​အောင် ကူညီ​ပေး​ဖို့ စွမ်းအား​တော် တောင်း​ခံ​ပါ။ ဒါ​ဆို​ရင် သင့်​ရဲ့ ကြိုး​စား​အား​ထုတ်​မှု​ကို ယေဟောဝါ ကောင်း​ချီး​များ​စွာ ပေး​ပါ​လိမ့်​မယ်။—ဧ. ၆:၄။