၁။ ယေဟောဝါ​ကို ဝတ်ပြုဖို့ ဘယ်​အချိန်​မှာ ခက်ခဲ​နိုင်​သလဲ။

ယေဟောဝါ​ကို ဝတ်ပြုဖို့ ဘယ်​အချိန်​က အခက်ခဲဆုံး ဖြစ်​မယ်​လို့ သင် ထင်​သလဲ။ ပြဿနာ​တွေ ရင်ဆိုင်​ရချိန်​လား၊ သင့်​ဘဝမှာ အတော်အသင့် အေးချမ်း​နေချိန်​လား။ ပြဿနာ​တွေ ကြုံ​တဲ့​အခါ ယေဟောဝါ​ကို ကျွန်တော်​တို့ အားကိုးကြတယ်။ ဒါပေမဲ့ ဘဝ အေးချမ်း​နေချိန်မှာ​ကော။ ဘုရား​ကို မေ့သွား​သလား။ အဲဒီလို ဖြစ်​နိုင်တယ်​လို့ အစ္စရေး​တွေ​ကို ယေဟောဝါ သတိပေး​ခဲ့​တယ်။—တရား. ၆:၁၀-၁၂။

၂။ ဘုရင် အာသ ဘယ်လို ပုံသက်သေ ပြ​ခဲ့​သလဲ။

^၂ ဘုရင် အာသ​ဟာ ယေဟောဝါ​ကို အပြည့်အဝ အားကိုးခြင်း​အားဖြင့် ပညာရှိ​စွာ ပြုမူ​ခဲ့​တဲ့ မင်းကောင်း ဖြစ်တယ်။ အခြေအနေ မကောင်း​ချိန်မှာ​သာမက အေးချမ်း​ချိန်မှာ​ပါ ယေဟောဝါ​ကို ဝတ်ပြုတယ်။ “ယေဟောဝါ​ကို တစ်သက်လုံး စိတ်နှလုံး အကြွင်းမဲ့ ဝတ်ပြု​ခဲ့​တယ်။” (၁ ဘု. ၁၅:၁၄) ယုဒပြည်​ကနေ မှားယွင်း​တဲ့ ဝတ်ပြုမှု​ကို ဖယ်ရှားခြင်း​အားဖြင့် ယေဟောဝါ​ကို အကြွင်းမဲ့ ဝတ်ပြု​ကြောင်း ပြ​ခဲ့​တယ်။ “တိုင်းတစ်ပါး​ဘုရား​တွေ​ရဲ့ ပူဇော်ရာ​ပလ္လင်​တွေ​နဲ့ အထွတ်အမြတ်​နေရာတွေကို ဖယ်ရှားပစ်​တယ်။ ကိုးကွယ်​ရာ ကျောက်တိုင်​တွေ​ကို ဖြိုဖျက်​ပြီး ကိုးကွယ်​ရာ သစ်တိုင်​တွေ​ကို ခုတ်လှဲ​ပစ်​တယ်” လို့ ကျမ်းစာ ပြော​တယ်။ (၂ ရာ. ၁၄:၃၊ ၅) အဘွား မာခါ​ကို​တောင် မယ်တော်​ကြီး ရာထူး​ကနေ ဖယ်ရှားပစ်​တယ်။ မာခါ​က ရုပ်တု​တစ်ခု လုပ်ပြီး မှားယွင်း​တဲ့ ဝတ်ပြုရေးကို အားပေး​အား​မြှောက် လုပ်လို့​ပဲ။—၁ ဘု. ၁၅:၁၁-၁၃။

၃။ ဒီ​ဆောင်းပါး​မှာ ဘာ​အကြောင်း ဆွေးနွေး​ကြ​မလဲ။

 ^၃ အာသ​ဟာ မှားယွင်း​တဲ့ ဝတ်ပြုရေးကို ဖယ်ရှား​ရုံ​သာမက ယုဒ​တစ်မျိုးသားလုံး ယေဟောဝါ​ဆီ ပြန်​လှည့်လာ​ဖို့ ကူညီ​ပေးခြင်း​အားဖြင့် စစ်မှန်​တဲ့ ဝတ်ပြုရေးကို အားပေးခဲ့တယ်။ အေးချမ်း​တဲ့​ကာလ * ရှိစေ​ခြင်း​အားဖြင့် အာသ​နဲ့ အစ္စရေး​တွေ​ကို ယေဟောဝါ ကောင်းချီး​ပေး​တယ်။ အာသရဲ့ နန်းသက်​အတွင်း ဆယ်နှစ်​လုံးလုံး “တိုင်းပြည် ငြိမ်းချမ်း​သာယာ” တယ်။ (၂ ရာ. ၁၄:၁၊ ၄၊ ၆) အဲဒီ​အေးချမ်း​တဲ့​ကာလ​ကို အာသ ဘယ်လို အသုံးပြု​ကြောင်း ဒီ​ဆောင်းပါး​မှာ ဆွေးနွေး​ပါ​မယ်။ အာသလိုပဲ အေးချမ်း​တဲ့​ကာလ​ကို အကျိုးရှိရှိ သုံးခဲ့​တဲ့ ပထမ​ရာစု ခရစ်ယာန်​တွေ​အကြောင်း၊ လွတ်လပ်​စွာ ဝတ်ပြုခွင့် ရထားတဲ့ နိုင်ငံ​မှာ သင် နေထိုင်​နေတယ်​ဆိုရင် အဲဒီ​အေးချမ်း​တဲ့​ကာလ​ကို ဘယ်လို ပညာရှိရှိ သုံးနိုင်​ကြောင်း​လည်း ဆွေးနွေး​ပါ​မယ်။

၄။ ၂ ရာဇဝင်ချုပ် ၁၄:၂၊ ၆၊ ၇ အရ အေးချမ်း​တဲ့​ကာလ​ကို အာသ ဘယ်လို သုံးခဲ့​သလဲ။

^၄ ၂ ရာဇဝင်ချုပ် ၁၄:၂၊ ၆၊ ၇ ကို​ဖတ်ပါ။ “အရပ်ရပ်မှာ ငြိမ်သက်​အေးချမ်း​စေ” သူဟာ ယေဟောဝါ ဖြစ်​ကြောင်း လူတွေကို အာသ ပြော​တယ်။ အဲဒီ​အေးချမ်း​တဲ့​ကာလမှာ အေးအေးလူလူ နေဖို့ အာသ မစဉ်း​စား​ဘူး။ မြို့​တွေ၊ မြို့ရိုး​တွေ၊ မျှော်စင်​တွေ၊ မြို့တံခါး​တွေ တည်ဆောက်​တယ်။ “တိုင်းပြည်​ဟာ ငါ​တို့​လက်ထဲမှာ​ပဲ ရှိနေတယ်” လို့ ယုဒလူ​တွေကို ပြော​တယ်။ ဘာကို ဆိုလို​သလဲ။ လူတွေဟာ ဘုရား​ပေး​တဲ့ ပြည်​မှာ လွတ်လပ်​စွာ သွား​လာနိုင်​ပြီး ရန်​သူ့ ဆန့်ကျင်မှု မရှိဘဲ တည်ဆောက်​နိုင်တာ​ကို ဆိုလို​တယ်။ အဲဒီ​အေးချမ်း​တဲ့​ကာလ​ကို အကျိုးရှိရှိ သုံးဖို့ လူတွေကို အာသ တိုက်တွန်း​တယ်။

၅။ စစ်​အင်အား တောင့်တင်း​အောင် အာသ ဘာကြောင့် လုပ်ဆောင်​သလဲ။

^၅ အာသ​ဟာ အေးချမ်း​တဲ့​ကာလ​မှာ စစ်​အင်အား တောင့်တင်း​အောင်​လည်း လုပ်ဆောင်တယ်။ (၂ ရာ. ၁၄:၈)  ယေဟောဝါ​ကို မကိုးစား​လို့လား။ မဟုတ်ပါဘူး။ အနာဂတ်​မှာ ကြုံ​ရနိုင်တဲ့ ပြဿနာ​တွေ​အတွက် လူတွေကို အသင့်​ပြင်ပေး​ဖို့ ဘုရင်​တစ်ယောက်​အနေ​နဲ့ တာဝန်​ရှိတယ်ဆိုတာ သိထားလို့ပဲ။ ယုဒပြည်မှာ အေးချမ်း​တဲ့​ကာလ အမြဲ ရှိ​မှာ မဟုတ်ဘူးဆိုတာ အာသ သိတယ်။ အဲဒီအတိုင်း​လည်း ဖြစ်​ခဲ့​တယ်။

၆။ အေးချမ်း​တဲ့​ကာလ​ကို ပထမ​ရာစု ခရစ်ယာန်​တွေ ဘယ်လို သုံးခဲ့​ကြသလဲ။

^၆ ပထမ​ရာစု ခရစ်ယာန်​တွေ မကြာခဏ နှိပ်စက်​ညှဉ်းပန်း ခံရ​ပေမဲ့ အေးချမ်း​တဲ့​ကာလ​လည်း ရှိပါတယ်။ အဲဒီကာလ​ကို ဘယ်လို သုံးခဲ့​ကြသလဲ။ အဲဒီ​သစ္စာရှိ အမျိုးသား/သမီးတွေဟာ ‘ယေဟောဝါ​ကို ကြောက်ရွံ့​ရိုသေ’ ပြီး သတင်းကောင်းကို အားသွန်ခွန်စိုက် ဟောတယ်​လို့ တမန်​တော် ကျမ်း​မှတ်တမ်းမှာ ပြော​တယ်။ ဒါ​ကြောင့် “တပည့်​အရေအတွက် များသည်ထက် များ​လာတယ်။” အေးချမ်း​တဲ့​ကာလ​အတွင်း သူတို့ ဇွဲရှိ​ရှိ ဟောပြောတာကို ယေဟောဝါ ကောင်းချီး​ပေး​ခဲ့​တာ ထင်ရှား​တယ်။—တ. ၉:၂၆-၃၁။

၇-၈။ အခွင့်အရေး ရှိနေတုန်း ပေါလု​နဲ့ တခြား​သူတွေ ဘာလုပ်ခဲ့​ကြသလဲ။ ရှင်းပြပါ။

^၇ ပထမ​ရာစု ခရစ်ယာန်​တွေ​ဟာ အခွင့်အရေး မှန်သမျှကို သုံးပြီး သတင်းကောင်း ပျံ့နှံ့​စေ​ကြတယ်။ ဥပမာ၊ ဧဖက်​မြို့မှာ ရှိ​တုန်း အမှုဆောင်ဖို့ အခွင့်အရေး တံခါးကြီး ပွင့်​နေမှန်း တမန်​တော် ပေါလု သိတဲ့​အတွက် အဲဒီမြို့မှာ အတတ်နိုင်ဆုံး ဟောပြော​သွန်သင်​ပေး​တယ်။—၁ ကော. ၁၆:၈၊ ၉။

^၈ အေဒီ ၄၉ မှာ အရေပြား ဖြတ်​ခြင်း ကိစ္စ​ကို ဖြေရှင်းပြီး​နောက် ပေါလု​နဲ့ တခြား ခရစ်ယာန်​တွေ​အတွက် အခွင့်အရေး ထပ်​ပေါ်လာ​တယ်။ (တ. ၁၅:၂၃-၂၉) အဲဒီ​ဆုံးဖြတ်ချက်​အကြောင်း အသင်းတော်တွေကို ပြော​ပြီး​နောက် “ယေဟောဝါ​ရဲ့ တရား​စကား​နဲ့​ဆိုင်​တဲ့ သတင်းကောင်း” ကို အားသွန်ခွန်စိုက် ဟောပြော​ကြတယ်။ (တ. ၁၅:၃၀-၃၅) ဘာ​ရလဒ် ရခဲ့​သလဲ။ “အသင်းတော်​တွေ​ဟာ ယုံကြည်ခြင်း ခိုင်ခံ့​မြဲမြံ​လာပြီး ယုံကြည်သူ​အရေအတွက် တစ်နေ့​တခြား တိုးများ​လာတယ်” လို့ ကျမ်းစာ ပြော​တယ်။—တ. ၁၆:၄၊ ၅။

၉။ ဒီနေ့​ခေတ် နိုင်ငံ​များစွာမှာ အခြေအနေ ဘယ်လို ရှိသလဲ။ ကိုယ့်ကိုယ်ကိုယ် ဘယ်လို မေး​နိုင်​သလဲ။

^၉ ဒီနေ့​ခေတ် နိုင်ငံ​များစွာမှာ ကျွန်တော်​တို့ လွတ်လပ်​စွာ ဟောပြောနိုင်​ကြတယ်။ လွတ်လပ်​စွာ ဝတ်ပြုခွင့် ရထားတဲ့ နိုင်ငံ​မှာ သင် နေထိုင်​နေ​သလား။ ဒါဆိုရင် ‘အဲဒီ​လွတ်လပ်မှုကို ငါ ဘယ်လို သုံး​နေသလဲ’ လို့ ကိုယ့်ကိုယ်ကိုယ် မေးပါ။ စိတ်​လှုပ်ရှား​စ​ရာ ဒီ​နောက်ဆုံး​ကာလ​မှာ ယေဟောဝါ​ရဲ့ အဖွဲ့အစည်း​က အကြီးမားဆုံး ဟောပြောခြင်းနဲ့ သွန်သင်ခြင်း​လုပ်ငန်း​ကို အရှိန်မြှင့် လုပ်ဆောင်​နေတယ်။ (မာ. ၁၃:၁၀) ယေဟောဝါ​ရဲ့ လူမျိုး​အတွက် အခွင့်အရေး​များစွာ ပွင့်​နေတယ်။

၁၀။ ၂ တိမောသေ ၄:၂ မှာ ဘာလုပ်ဖို့ အားပေးထား​သလဲ။

^၁၀ အေးချမ်း​တဲ့​ကာလ​ကို ဘယ်လို အကျိုးရှိရှိ သုံးနိုင်​သလဲ။ (၂ တိမောသေ ၄:၂ ကို​ဖတ်ပါ။) ကိုယ့်​အခြေအနေ​ကို ပြန်​ဆန်းစစ်​ပြီး ကိုယ်တိုင် ဒါမှ​မဟုတ် မိသားစုဝင် တစ်ယောက်ယောက် အမှုဆောင်​လုပ်ငန်း​ကို တိုးချဲ့​ဖို့၊ ရှေ့ဆောင်​အဖြစ် အမှုဆောင်ဖို့​တောင် ဖြစ်​နိုင်​မလား​ဆိုတာ စဉ်းစားပါ။ အခု​အချိန်​ဟာ ကြီးစွာသောဒုက္ခ​မှာ ကိုယ်​နဲ့​အတူ ပါ​လာ​မှာ မဟုတ်တဲ့ စည်းစိမ်ဥစ္စာ​တွေ ရှာဖွေ​စုဆောင်း​နေရ​မယ့်​အချိန် မဟုတ်ဘူး။—ပညာ. ၁၁:၄။ မ. ၆:၃၁-၃၃။ ၁ ယော. ၂:၁၅-၁၇။

၁၁။ လူများ​နိုင်​သမျှ များများ​ကို သတင်းကောင်း ဟောပြောနိုင်​ဖို့ တချို့ ဘာလုပ်​ကြသလဲ။

^၁၁ ကြေညာသူ​များစွာဟာ ဟောပြော​သွန်သင်ခြင်းလုပ်ငန်းမှာ သုံးနိုင်​ဖို့ ဘာသာ​စကား​အသစ် သင်ယူ​ကြတယ်။ ကျမ်းစာ​အခြေပြု စာပေ​တွေ​ကို ဘာသာ​စကား​အသစ်  များစွာနဲ့ ထုတ်ဝေ​ပေးခြင်း​အားဖြင့် ယေဟောဝါ​ရဲ့ အဖွဲ့အစည်း​က ထောက်​မပေး​နေတယ်။ ဥပမာ၊ ၂၀၁၀ မှာ ကျမ်းစာ​စာပေ​တွေ​ကို ဘာသာ​စကား ၅၀၀ လောက်​နဲ့ ရရှိ​နိုင်တယ်။ အခုတော့ ဘာသာ​စကား ၁၀၀၀ ကျော်​နဲ့ ရရှိ​နိုင်ပြီ။

၁၂။ သတင်းကောင်းကို မိခင်​စကား​နဲ့ ကြား​တဲ့​အခါ လူတွေ ဘယ်လို အကျိုး​ရသလဲ။ ဥပမာ​ပေး​ပါ။

^၁၂ မိခင်​ဘာသာ​စကား​နဲ့ ကျမ်းစာ​အမှန်တရား​အကြောင်း ကြား​ရတဲ့အခါ လူတွေ ဘယ်လို ခံစား​ရသလဲ။ အမေရိကန်​နိုင်ငံ၊ တန်​နက်​စီး​ပြည်နယ်၊ မ​မ်းဖစ်​မြို့ ခရိုင်​အစည်းအဝေးကနေ ညီအစ်မ​တစ်ယောက် ဘယ်လို အကျိုး​ရခဲ့ကြောင်း စဉ်းစား​ကြည့်​ပါ။ အဲဒီ​အစည်းအဝေး​ကို ရဝမ်ဒါ၊ ကွန်ဂို (ကင်ရှာ​ဆာ) နဲ့ ယူဂန္ဓာ​နိုင်ငံ​တွေ​မှာ အဓိက​ပြော​တဲ့ ကင်ညာ​ရဝမ်ဒါ စကား​နဲ့ ကျင်းပ​တာ။ အစည်းအဝေး​ပြီး​နောက် အဲဒီ ကင်​ညာ​ရဝမ်ဒါ စကားပြော ညီအစ်မ​က “အမေရိကန်​ကို ပြောင်း​လာတဲ့ လွန်ခဲ့တဲ့ ၁၇ နှစ်​ကစပြီး အစည်းအဝေးကြီး​ကို အပြည့်အဝ နားလည်တာ ဒါ ပထမ​ဆုံး​ပဲ” လို့ ပြော​တယ်။ အစီအစဉ်ကို မိခင်​စကား​နဲ့ ကြား​ရတဲ့အခါ သိပ်​စိတ်ထိမိ​ကြောင်း ထင်ရှား​တယ်။ သင်လည်း အခြေအနေ​ပေး​မယ်​ဆိုရင် သင့်​ဒေသက လူတချို့ကို ကူညီ​ဖို့ ဘာသာ​ခြား​စကား သင်ယူ​နိုင်​မလား။ သင့်​အသင်းတော် ရပ်ကွက်မှာ တချို့က မိခင်​စကား​နဲ့ ပြော​မှ သတင်းကောင်း ပို​နားထောင်တယ်​ဆိုရင် အဲဒီ​စကား​ကို သင်ယူတာ ပို​အကျိုးရှိ​နိုင်​မလား။ ကြိုးစား​ရ​ကျိုး နပ်​ပါ​လိမ့်မယ်။

၁၃။ အေးချမ်း​တဲ့​ကာလ​ကို ရုရှား​နိုင်ငံ​က ညီအစ်ကို/မ​တွေ ဘယ်လို အသုံးပြု​ခဲ့​သလဲ။

^၁၃ ညီအစ်ကို/မ​အားလုံး လွတ်လွတ်လပ်လပ် ဟောပြောနိုင်​ကြ​တာ​တော့ မဟုတ်ဘူး။ တစ်ခါ​တ​လေ အစိုးရ ပိတ်ပင်မှု​တွေ​ကြောင့် အမှုဆောင်​လုပ်ငန်းမှာ အကန့်အသတ်​နဲ့​ပဲ ပါဝင်​နိုင်တယ်။ ဥပမာ၊ ရုရှား​နိုင်ငံ​က ညီအစ်ကို/မ​တွေအကြောင်း စဉ်းစား​ကြည့်​ပါ။ ဆယ်စုနှစ်​များစွာ နှိပ်စက်​ညှဉ်းပန်း ခံရ​ပြီး​နောက် ၁၉၉၁၊ မတ်​လမှာ အစိုးရ​က အဖွဲ့အစည်းကို တရားဝင် အသိအမှတ်ပြု​ပေး​တယ်။ အဲဒီတုန်းက ရုရှား​မှာ သတင်းကောင်း ကြေညာသူ ၁၆,၀၀၀ လောက် ရှိတယ်။  နှစ် ၂၀ ကြာပြီးနောက် ကြေညာသူ ၁၆၀,၀၀၀ ကျော် တိုးတက်​လာတယ်။ လွတ်လပ်​စွာ ဟောပြော​ခွင့်​ကို ညီအစ်ကို​တွေ ပညာရှိရှိ သုံးခဲ့​တာ ထင်ရှား​ပါ​တယ်။ ဒါပေမဲ့ အဲဒီ​အေးချမ်း​တဲ့​ကာလ ကြာကြာ​မခံ​လိုက်​ဘူး။ အခြေအနေ ပြောင်းလဲ​သွားပေ​မဲ့ ယေဟောဝါ​အတွက် ဇွဲ​ထက်သန်မှု​ကတော့ မ​လျော့​သွားပါ​ဘူး။ ယေဟောဝါ​ကို အတတ်နိုင်ဆုံး ဆက်​ဝတ်ပြု​နေကြ​တယ်။

၁၄-၁၅။ အာသ​ကို ကူညီ​ဖို့ မိမိ​တန်ခိုး​ကို ယေဟောဝါ ဘယ်လို အသုံးပြု​ခဲ့​သလဲ။

^၁၄ အာသ​လက်ထက်မှာ အေးချမ်း​တဲ့​ကာလ အမြဲ ရှိခဲ့တာ မဟုတ်ဘူး။ အီသီယိုးပီးယား​ကနေ စစ်သည် တစ်သန်း ချီတက်​လာတယ်။ ဗိုလ်ချုပ် ဇေရ​က ယုဒပြည်​ကို ကျိန်းသေ အနိုင်​ရမယ်​လို့ ယုံကြည်​နေတယ်။ ဘုရင်​အာသ​က​တော့ စစ်​အင်အား​ကို မဟုတ်ဘဲ ဘုရား ယေဟောဝါ​ကို ယုံကြည်​ကိုးစား​တယ်။ “ကျွန်တော်​တို့​ရဲ့ ဘုရား ယေဟောဝါ၊ ကိုယ်တော့်​ကို အားကိုး​တဲ့​အတွက် ကူညီ​ပေး​ပါ။ ဒီ​လူစု​ကြီး​ကို တိုက်​ဖို့ နာမတော်​နဲ့ လာ​ခဲ့​ပါ​ပြီ” လို့ ဆုတောင်း​တယ်။—၂ ရာ. ၁၄:၁၁။

^၁၅ အီသီယိုးပီးယား စစ်​အင်အား​ဟာ အာသရဲ့ စစ်အင်အား​ထက် နှစ်ဆ​နီးပါး ပို​များ​ပေမဲ့ အာသ​က​တော့ ယေဟောဝါရဲ့ ကယ်တင်​နိုင်စွမ်း​ကို ယုံကြည်တယ်။ အာသ စိတ်မပျက်​ခဲ့​ရ​ပါဘူး။ အီသီယိုးပီးယား​စစ်တပ်​ကို ယေဟောဝါ အရေးနိမ့်​စေ​ခဲ့​တယ်။—၂ ရာ. ၁၄:၈-၁၃။

၁၆။ အေးချမ်း​တဲ့​ကာလ အမြဲ ရှိနေမှာ မဟုတ်​ကြောင်း ဘယ်လို သိရ​သလဲ။

^၁၆ ကျွန်တော်​တို့ တစ်ယောက်စီ အနာဂတ်​မှာ ဘာတွေ ကြုံ​ရမယ်ဆိုတာ အတိအကျ မသိပေမဲ့ ဘုရား​လူမျိုး ရထားတဲ့ အေးချမ်း​တဲ့​ကာလ အချိန်မရွေး ကုန်​သွားနိုင်တယ်​ဆိုတာတော့ သိထားတယ်။ နောက်ဆုံး​ကာလ​မှာ “လူတွေက ကျွန်တော့်​နာမည်​ကြောင့် ခင်ဗျား​တို့ကို မုန်း​လိမ့်မယ်” လို့ ယေရှု ကြိုပြော​တယ်။ (မ. ၂၄:၉) တမန်​တော် ပေါလု​က​လည်း “ခရစ်တော်​ယေရှုရဲ့ နောက်လိုက်​အနေ​နဲ့ ဘုရားတရား​ကိုင်းရှိုင်း​တဲ့ အသက်တာနဲ့ နေချင်​သူတိုင်းဟာ ညှဉ်းဆဲ​ခံရ​မှာပဲ” လို့ ပြော​တယ်။ (၂ တိ. ၃:၁၂) စာတန် “ဒေါသတကြီး” ဖြစ်နေ​တယ်။ သူ့​ဒေါသ​ကနေ လွတ်​မယ်​လို့ ထင်​နေရင်​တော့ ကိုယ့်ကိုယ်ကိုယ် လှည့်စား​နေတာပဲ။—ဗျာ. ၁၂:၁၂။

၁၇။ ဘယ်နည်း​တွေ​နဲ့ သမာဓိ စမ်းသပ်ခံ​ရနိုင်သလဲ။

^၁၇ မဝေးတော့​တဲ့ အနာဂတ်​မှာ ကျွန်တော်​တို့အားလုံး သမာဓိ စမ်းသပ်ခံ​ရမယ်။ ‘ဒီ​လောက တည်​ချိန်​ကနေ အခုထိ  မဖြစ်​ဖူး​သေး​တဲ့ ကြီးစွာသောဒုက္ခ’ ရောက်လာ​တော့​မယ်။ (မ. ၂၄:၂၁) အဲဒီအချိန်မှာ မိသားစုဝင်​တွေ​ရဲ့ ဆန့်ကျင်မှု ကြုံရနိုင်တယ်။ လုပ်ငန်း ပိတ်ပင်​ခံရ​နိုင်တယ်။ (မ. ၁၀:၃၅၊ ၃၆) အကူအညီ​နဲ့ အကာအကွယ် ရဖို့ ကျွန်တော်​တို့ ယောက်​တိုင်း အာသလိုပဲ ယေဟောဝါ​ကို ယုံကြည်​ကိုးစား​ကြ​မလား။

၁၈။ ဟီဘရူး ၁၀:၃၈၊ ၃၉ အရ မအေး​ချမ်း​တော့​မယ့် အချိန်ကာလ​အတွက် ဘယ်လို ပြင်ဆင်​ထား​နိုင်​သလဲ။

^၁၈ ရှေ့မှာ​ကြုံ​ရမယ့် အရာ​တွေ​အတွက် ကျွန်တော်​တို့ကို ယေဟောဝါ ပြင်ဆင်​ပေး​နေတယ်။ ယုံကြည်ခြင်း ခိုင်ခံ့​စေမယ့် ‘အချိန်တန်​အစာ’ ပြင်ဆင်​ပေး​ဖို့ “သစ္စာနဲ့ သတိ​ပညာ​ရှိတဲ့ ကျွန်” ကို ဘုရား လမ်းညွှန်​နေတယ်။ (မ. ၂၄:၄၅) ဒါပေမဲ့ ကျွန်တော်​တို့​လည်း ကိုယ့်​ဘက်က လုပ်စရာ​ရှိတာ လုပ်ရမယ်။ ယေဟောဝါ​အပေါ် မယိမ်းယိုင်​တဲ့ ယုံကြည်ခြင်း ရှိအောင် တည်ဆောက်​နေ​ရမယ်။—ဟီဘရူး ၁၀:၃၈၊ ၃၉ ကို​ဖတ်ပါ။

၁၉-၂၀။ ၁ ရာဇဝင်ချုပ် ၂၈:၉ အရ ကိုယ့်ကိုယ်ကိုယ် ဘယ်​မေးခွန်းတွေ မေးသင့်​သလဲ။ ဘာကြောင့်လဲ။

^၁၉ ဘုရင်​အာသလိုပဲ ကျွန်တော်​တို့​လည်း “ယေဟောဝါ​ကို ရှာ” ရမယ်။ (၂ ရာ. ၁၄:၄။ ၁၅:၁၊ ၂) ယေဟောဝါ​အကြောင်း သိကျွမ်း​အောင် လုပ်ပြီး နှစ်ခြင်း​ခံ​ခြင်း​အားဖြင့် စ​ရှာ​ခဲ့​ကြပြီ။ အခွင့်အရေးတိုင်းကို သုံးပြီး ယေဟောဝါ​ကို ချစ်တဲ့ မေတ္တာ တိုးများ​လာအောင် ဆက်လုပ်​နေကြ​တယ်။ အဲဒီလို လုပ်​နေ​သလား​ဆိုတာ ဆန်းစစ်​ဖို့ ‘အသင်းတော် အစည်းအဝေးတွေကို ငါ ပုံမှန် တက်​နေရဲ့လား’ လို့ မေးပါ။ ယေဟောဝါ​ရဲ့ အဖွဲ့အစည်း ပြင်ဆင်​ပေး​တဲ့ အစည်းအဝေးတွေကို တက်​တဲ့​အခါ အားရှိစရာ ပေါင်းသင်းမှု​နဲ့​အတူ ယေဟောဝါ​ကို ဆက်​ဝတ်ပြုဖို့ ခွန်အား ရလာတယ်။ (မ. ၁၁:၂၈) ‘ငါ့​မှာ ကိုယ်ပိုင်​လေ့လာမှု အလေ့အထ​ကောင်း ရှိသလား’ လို့ ကိုယ့်ကိုယ်ကိုယ် မေး​နိုင်တယ်။ သင်ဟာ မိသားစုနဲ့​အတူ နေထိုင်သူ ဖြစ်စေ၊ တစ်ယောက်တည်း​သ​မား ဖြစ်စေ မိသားစု​ဝတ်ပြုမှု​အတွက် အပတ်​တိုင်း အချိန်ဖယ်​ထား​သလား။ ဟောပြောခြင်းနဲ့ တပည့်​ဖြစ်စေ​ခြင်း လုပ်ငန်းမှာ အတတ်နိုင်ဆုံး အပြည့်အဝ ပါဝင်​နေ​သလား။

^၂၀ အဲဒီ​မေးခွန်းတွေကို ဘာကြောင့် မေးသင့်​သလဲ။ ကျွန်တော်​တို့​ရဲ့ စိတ်နှလုံး​နဲ့ တွေးတော​ကြံစည်​သမျှ​ကို ယေဟောဝါ စစ်ဆေး​တယ်လို့ ကျမ်းစာ​မှာ ပြောတဲ့​အတွက် ကျွန်တော်​တို့​လည်း အဲဒီလို စစ်ဆေး​ရမယ်။ (၁ ရာဇဝင်ချုပ် ၂၈:၉ ကို​ဖတ်ပါ။) ကိုယ့်​ပန်းတိုင်၊ သဘောထား၊ အတွေးအခေါ်​မှာ ပြောင်းလဲ​ဖို့ လို​နေတာ တစ်ခုခု သတိထား​မိရင် အပြောင်းအလဲ လုပ်နိုင်ဖို့ ယေဟောဝါ​ဆီ အကူအညီ​တောင်း​ပါ။ အခု​အချိန်​ဟာ ရှေ့မှာ ကြုံ​ရမယ့် စမ်းသပ်မှု​တွေ​အတွက် အသင့်ပြင်​ရမယ့် အချိန်​ပါ​ပဲ။ အေးချမ်း​တဲ့​ကာလ​ကို ပညာရှိရှိ မ​သုံးဖို့ သင့်ကို ဘာကမှ အတားအဆီး မဖြစ်ပါစေနဲ့။