မိမိအား စိတ်ထက်သန်စွာ ရှာဖွေသူကို ယေဟောဝါ ဆုချ
“ဘုရားသခင်ထံတော်သို့ ချဉ်းကပ်သူသည် ကိုယ်တော် တည်ရှိကြောင်းကို ယုံကြည်ရမည်။ ကိုယ်တော်သည် မိမိအား စိတ်ထက်သန်စွာ ရှာဖွေသူကို ဆုချသောအရှင်ဖြစ်ကြောင်းကိုလည်း ယုံကြည်ရမည်။”—ဟေဗြဲ ၁၁:၆။.
၁၊ ၂။ (က) ချစ်ခြင်းမေတ္တာနဲ့ ယုံကြည်ခြင်း ဘယ်လို ဆက်စပ်နေသလဲ။ (ခ) ဘယ်မေးခွန်းတွေကို သုံးသပ်ကြမလဲ။
ယေဟောဝါကို ကျွန်တော်တို့ ချစ်ကြတယ်။ အကြောင်းကတော့ ကိုယ်တော်က “[ကျွန်တော်]တို့ကို ဦးစွာချစ်” လို့ပါပဲ။ (၁ ယော. ၄:၁၉) ယေဟောဝါ မေတ္တာပြတဲ့ နည်းတစ်နည်းကတော့ သစ္စာရှိ ကျေးကျွန်တွေကို ကောင်းချီးပေးဖို့ အစပြုလုပ်ဆောင်ခြင်းပဲ။ ဘုရားသခင်ကို ချစ်လေ၊ ယုံကြည်ခြင်း ခိုင်မာလေပဲ။ ဘုရား တည်ရှိကြောင်းသာမက ချစ်မြတ်နိုးသူတွေကို မပျက်မကွက် ဆုချကြောင်း ပိုယုံကြည်လေပဲ။—ဟေဗြဲ ၁၁:၆ ကိုဖတ်ပါ။
၂ ယေဟောဝါဟာ ဆုချတဲ့အရှင် ဖြစ်တယ်။ ဒီအချက်က ဘုရားသခင့် အဖြစ်တော်နဲ့ လုပ်ဆောင်မှုရဲ့ အရေးကြီးတဲ့ အစိတ်အပိုင်း ဖြစ်တယ်။ “ယုံကြည်ခြင်းသည် မျှော်လင့်သောအရာများကို စိတ်ချစွာ စောင့်မျှော်ခြင်း” ဖြစ်တဲ့အတွက် မိမိကို စိတ်ထက်သန်စွာ ရှာဖွေသူတွေကို ဆုချမယ်ဆိုတာ အခိုင်အမာ ယုံကြည်မှသာ ကျွန်တော်တို့ရဲ့ ယုံကြည်ခြင်း ပြည့်စုံမယ်။ (ဟေဗြဲ ၁၁:၁) ယုံကြည်ခြင်းမှာ ဘုရားသခင် ကတိပြုထားတဲ့ ကောင်းချီးတွေကို စိတ်ချစွာ စောင့်မျှော်ခြင်း ပါဝင်တယ်။ ဆုရမယ်ဆိုတဲ့ မျှော်လင့်ချက်က ဘယ်လို အကျိုးပြုသလဲ။ ရှေးခေတ်နဲ့ မျက်မှောက်ခေတ် ကျေးကျွန်တွေကို ယေဟောဝါ ဘယ်လို ဆုချခဲ့သလဲ။ သုံးသပ်ကြည့်ကြစို့။
ကျေးကျွန်တွေကို ကောင်းချီးပေးဖို့ ယေဟောဝါ ကတိပြု
၃။ မာလခိ ၃:၁၀ မှာ ဘယ်လို ကတိပေးထားသလဲ။
၃ သစ္စာရှိ ကျေးကျွန်တွေကို ဆုချမယ်လို့ ယေဟောဝါ ကတိပေးထားတယ်။ ဒါကြောင့် ကောင်းချီးရအောင် ကြိုးစားကြဖို့ ဖိတ်ခေါ်ထားတယ်။ ‘“ငါသည် မိုးကောင်းကင် ပြတင်းပေါက်တို့ကို ဖွင့်၍ ကောင်းချီးမင်္ဂလာကို အကုန်အစင် သွန်းလောင်းမည် မသွန်းလောင်းမည်ကို . . . စုံစမ်းကြလော့” ဟု ကောင်းကင်ဗိုလ်ခြေအရှင် ယေဟောဝါ မိန့်တော်မူ၏’ လို့ ဖတ်ရတယ်။ (မာလ. ၃:၁၀) ယေဟောဝါရဲ့ ရက်ရောတဲ့ ကမ်းလှမ်းမှုကို လက်ခံခြင်းအားဖြင့် အလွန်ကျေးဇူးတင်လေးမြတ်ကြောင်း တင်ပြနိုင်တယ်။
၄။ မဿဲ ၆:၃၃ မှာပါတဲ့ ယေရှုရဲ့ အာမခံချက်ကို ဘာကြောင့် ယုံကြည်စိတ်ချနိုင်သလဲ။
၄ ဘုရားနိုင်ငံတော်ကို ဦးစားထားရင် ဘုရားသခင် ထောက်မပေးမယ်လို့ တပည့်တွေကို ယေရှု အာမခံခဲ့တယ်။ (မဿဲ ၆:၃၃ ကိုဖတ်ပါ။) ယေရှု အာမခံရတဲ့ အကြောင်းရင်းကတော့ ယေဟောဝါရဲ့ ကတိတွေ အမြဲ မှန်ကန်ပြီး အားထားနိုင်လို့ပဲ။ ဘုရားကတိတွေ အမြဲပြည့်စုံတယ်ဆိုတာ ယေရှု သိတယ်။ (ဟေရှာ. ၅၅:၁၁) ကျွန်တော်တို့လည်း ယေဟောဝါကို အကြွင်းမဲ့ ယုံကြည်မယ်ဆိုရင် “ငါသည် သင့်ကို အလျှင်းမစွန့်၊ အလျှင်းပစ်၍မထား” ဆိုတဲ့ ကတိ တည်မယ်ဆိုတာ ယုံကြည်စိတ်ချနိုင်ပါတယ်။ (ဟေဗြဲ ၁၃:၅) ယေဟောဝါရဲ့ အဲဒီကတိက မဿဲ ၆:၃၃ မှာပါတဲ့ ယေရှုရဲ့ စကားကို ယုံကြည်စိတ်ချဖို့ ကူညီပေးတယ်။
၅။ ပေတရုကို ယေရှု ပြန်ပြောတဲ့စကားက ဘာကြောင့် ယုံကြည်ခြင်း ခိုင်ခံ့စေသလဲ။
၅ တမန်တော် ပေတရုက “ကျွန်ုပ်တို့သည် ရှိသမျှကို စွန့်၍ ကိုယ်တော်နောက်သို့ လိုက်ကြပါပြီ။ သို့ဖြစ်၍ အဘယ်အကျိုးကို ရကြပါမည်နည်း” လို့ ယေရှုကို မေးခဲ့ဖူးတယ်။ (မ. ၁၉:၂၇) အဲဒီလိုမေးလို့ ပေတရုကို အပြစ်တင်မယ့်အစား သူတို့ရဲ့ အနစ်နာခံမှုအတွက် ဆုချခံရမယ်လို့ ယေရှု ပြောတယ်။ သစ္စာရှိ တမန်တော်တွေ၊ တခြားသူတွေဟာ ကောင်းကင်မှာ ယေရှုနဲ့အတူ အုပ်စိုးကြရပါမယ်။ လောလောဆယ်လည်း ဆုလာဘ်တွေ ရရှိနေကြတယ်။ “ငါ့နာမကြောင့် အိမ်၊ ညီအစ်ကိုမောင်နှမ၊ မိဘ၊ သားသမီး၊ မြေယာများကို စွန့်သူတိုင်း အဆများစွာ ရမည့်အပြင် ထာဝရအသက်ကိုလည်း အမွေခံရလိမ့်မည်” လို့ ယေရှု ပြောတယ်။ (မ. ၁၉:၂၉) တပည့်တွေဟာ စွန့်လွှတ်ခဲ့တာတွေထက် အဆပေါင်းများစွာ ကောင်းချီးရပါလိမ့်မယ်။ အသင်းတော်မှာရရှိတဲ့ မိဘ၊ ညီအစ်ကိုမောင်နှမ၊ သားသမီးတွေဟာ နိုင်ငံတော်ကြောင့် စွန့်လွှတ်ခဲ့ရတဲ့ ဘယ်အရာထက်မဆို ပိုတန်ဖိုးရှိတယ် မဟုတ်လား။
“ခိုင်ခံ့သေချာသော ကျောက်ဆူး”
၆။ ဝတ်ပြုသူတွေကို ဆုချမယ်လို့ ယေဟောဝါ ဘာကြောင့် ကတိပေးထားသလဲ။
၆ ဆုချမယ်ဆိုပြီး ယေဟောဝါ ကတိပေးခြင်းအားဖြင့် စမ်းသပ်မှု ကြုံရချိန်တွေမှာ ခံရပ်နိုင်ဖို့ ကူညီပေးတယ်။ ဘုရားသခင့် သစ္စာရှိ ကျေးကျွန်တွေဟာ လောလောဆယ် ကောင်းချီး အလျှံပယ် ရရှိနေတဲ့အပြင် အနာဂတ်မှာ ရရှိမယ့် ပိုကြီးမားတဲ့ ကောင်းချီးတွေကိုလည်း စောင့်မျှော်နေကြတယ်။ (၁ တိ. ၄:၈) ယေဟောဝါဟာ “မိမိအား စိတ်ထက်သန်စွာ ရှာဖွေသူကို ဆုချသောအရှင်” ဖြစ်ကြောင်း ကျွန်တော်တို့ အခိုင်အမာ ယုံကြည်စိတ်ချမယ်ဆိုရင် ယုံကြည်ခြင်း ခိုင်မာနေပါလိမ့်မယ်။—ဟေဗြဲ ၁၁:၆။
၇။ မျှော်လင့်ချက်က ကျောက်ဆူးနဲ့ ဘယ်လို တူသလဲ။
၇ “ကောင်းကင်ဘုံ၌ သင်တို့၏ဆုလာဘ်သည် ကြီးမြတ်သောကြောင့် ပျော်ရွှင်မြူးထူးကြလော့။ သင်တို့ရှေ့က ပရောဖက်များကိုလည်း ထိုနည်းအတိုင်း ညှဉ်းဆဲခဲ့ကြပြီ” လို့ တောင်ပေါ် တရားတော်မှာ ယေရှု ပြောတယ်။ (မ. ၅:၁၂) ကောင်းကင်မှာ ဆုရမယ့်သူတွေအပြင် မြေကြီးပေါ် ထာဝစဉ် အသက်ရှင်ရမယ့် အလားအလာ ရှိသူတွေလည်း “ပျော်ရွှင်မြူးထူး” စရာအကြောင်း ရှိပါတယ်။ (ဆာ. ၃၇:၁၁။ လု. ၁၈:၃၀) ကောင်းကင် မျှော်လင့်ချက်ဖြစ်စေ၊ မြေကြီး မျှော်လင့်ချက်ဖြစ်စေ ကျွန်တော်တို့ရဲ့ မျှော်လင့်ချက်ဟာ “ခိုင်ခံ့သေချာသော ကျောက်ဆူးသဖွယ် ဖြစ်” နိုင်ပါတယ်။ (ဟေဗြဲ ၆:၁၇-၂၀) မုန်တိုင်းထန်ချိန်မှာ ကျောက်ဆူးက သင်္ဘောကို ခိုင်ခံ့မြဲမြံစေသလို ဆုရမယ်ဆိုတဲ့ မျှော်လင့်ချက်ကလည်း ကျွန်တော်တို့ရဲ့ စိတ်ပိုင်း၊ ဝတ်ပြုရေးပိုင်းကို ခိုင်ခံ့မြဲမြံစေနိုင်တယ်။ အခက်အခဲတွေကို ခံရပ်နိုင်ဖို့ ခွန်အားရှိစေနိုင်တယ်။
၈။ မျှော်လင့်ချက်က ဘယ်လိုနည်းနဲ့ စိုးရိမ်ပူပန်မှုကို လျော့နည်းစေနိုင်စွမ်း ရှိသလဲ။
၈ ကျမ်းစာကို အခြေခံတဲ့ ကျွန်တော်တို့ရဲ့ မျှော်လင့်ချက်က စိုးရိမ်ပူပန်မှုတွေကို လျော့နည်းစေနိုင်စွမ်း ရှိတယ်။ ဆီက အရေပြားကို ချောမွတ်စေသလို ဘုရားသခင့် ကတိတွေက စိုးရိမ်ပူပန်နေတဲ့ စိတ်နှလုံးကို ငြိမ်သက်စေတယ်။ ‘ထမ်းရွက်ရသောဝန်ကို ယေဟောဝါ၌ ချထား’ ရင် “မစ” မယ်ဆိုတာ သိရခြင်းက အားရှိစရာပါပဲ။ (ဆာ. ၅၅:၂၂) ဘုရားသခင်ဟာ “ငါတို့ တောင်းလျှောက်ကြံစည်သမျှထက် အလွန်များပြားစွာ ပြုနိုင်” ကြောင်း အပြည့်အဝ ယုံကြည်စိတ်ချနိုင်ပါတယ်။ (ဧ. ၃:၂၀) များပြားစွာလောက်သာ မဟုတ်ဘဲ “အလွန်များပြားစွာ” လုပ်ဆောင်ပေးနိုင်တယ်ဆိုတာ စဉ်းစားကြည့်ပါ။
၉။ ယေဟောဝါရဲ့ ကောင်းချီးကို ဘယ်လို ရရှိနိုင်သလဲ။
၉ ဆုရဖို့ဆိုရင် ယေဟောဝါကို အကြွင်းမဲ့ ယုံကြည်ပြီး လမ်းညွှန်ချက်တွေကို နာခံရမယ်။ ‘သင်၏ဘုရားသခင် ယေဟောဝါသည် အမွေခံဖို့ရာ အပိုင်ပေးတော်မူသောပြည်၌ သင့်ကို အလွန်ကောင်းချီးပေးတော်မူမည်။ ယနေ့ ငါမှာထားသမျှသော ဤပညတ်တို့ကို ကျင့်မည်အကြောင်း စောင့်ရှောက်ခြင်းငှာ သင်၏ဘုရားသခင် ယေဟောဝါ၏ စကားတော်ကို စေ့စေ့နားထောင်လော့။ သင်၏ဘုရားသခင် ယေဟောဝါသည် ကတိတော်ရှိသည့်အတိုင်း ကောင်းချီးပေးတော်မူ . . . လိမ့်မည်’ လို့ အစ္စရေးတွေကို မောရှေ ပြောတယ်။ (တရား. ၁၅:၄-၆) ယေဟောဝါကို သစ္စာရှိရှိ ဝတ်ပြုရင် ကောင်းချီးရမယ်ဆိုတာ အပြည့်အဝ ယုံကြည်စိတ်ချသလား။ ယုံကြည်စိတ်ချဖို့ အကြောင်းကောင်းတွေ ရှိပါတယ်။
သူတို့ကို ယေဟောဝါ ဆုချ
၁၀၊ ၁၁။ ယောသပ်ကို ယေဟောဝါ ဘယ်လို ဆုချခဲ့သလဲ။
၁၀ ကျမ်းစာမှာ ရေးထားသမျှဟာ ကျွန်တော်တို့ရဲ့ အကျိုးအတွက် ဖြစ်တယ်။ သစ္စာရှိ ကျေးကျွန်တွေကို ဘုရားသခင် ဆုချခဲ့တဲ့ မှတ်တမ်း များစွာပါတယ်။ (ရော. ၁၅:၄) ယောသပ်ဟာ ထူးခြားတဲ့ ပုံနမူနာပါပဲ။ အစ်ကိုတွေရဲ့ ပူးပေါင်းကြံစည်မှု၊ နောက်ပိုင်း သခင့်မယားရဲ့ မဟုတ်မမှန် စွပ်စွဲမှုကြောင့် အီဂျစ်ပြည်မှာ ထောင်ကျခဲ့တယ်။ အဲဒီအချိန်မှာ ဘုရားသခင်နဲ့ အဆက်ဖြတ်လိုက်သလား။ မဖြတ်ခဲ့ပါဘူး။ ‘ယေဟောဝါသည် [ယောသပ်]ဘက်၌ ရှိ၍ ကယ်မသနားတော်မူ၏။ . . . ယေဟောဝါသည် ယောသပ်ဘက်မှာရှိ၍ သူပြုလေရာရာ၌ အောင်စေတော်မူသတည်း’ လို့ ကျမ်းစာ ဆိုတယ်။ (က. ၃၉:၂၁-၂၃) အဲဒီခက်ခဲချိန်တစ်လျှောက် ဘုရားသခင်ကို ယောသပ် စိတ်ရှည်စွာ စောင့်မျှော်ခဲ့တယ်။
၁၁ နှစ်တွေကြာပြီးတဲ့နောက် ဖာရောက ယောသပ်ကို ထောင်ကနေ လွှတ်ပေးပြီး အီဂျစ်ပြည်မှာ ဒုတိယ အုပ်စိုးရှင်အဖြစ် ခန့်အပ်ခဲ့တယ်။ (က. ၄၁:၁၊ ၃၇-၄၃) ယောသပ်ရဲ့ ဇနီး သားနှစ်ယောက် မွေးလာတဲ့အခါ ‘သားဦးကို “ငါကြုံရတဲ့ ဆင်းရဲဒုက္ခတွေ၊ အဖေ့အိမ်သားတွေကို ဘုရားသခင် မေ့ပျောက်စေပြီ” ဆိုပြီး မနာရှေ လို့နာမည်ပေးတယ်။ ဒုတိယသားကို “ငါဆင်းရဲဒုက္ခရောက်တဲ့ပြည်မှာ ဘုရားသခင်က ငါ့ကို သားသမီး ထွန်းကားစေပြီ” ဆိုပြီး ဧဖရိမ်လို့ နာမည်ပေးတယ်။’ (က. ၄၁:၅၁၊ ၅၂၊ ကဘ) ဘုရားသခင်ကို ယောသပ် သစ္စာရှိခဲ့တဲ့အတွက် အစ္စရေးတွေရော၊ အီဂျစ်တွေပါ အငတ်ဘေးကနေ လွတ်မြောက်ခဲ့ကြတယ်။ မိမိကို ဆုချပြီး ကောင်းချီးပေးသူဟာ ယေဟောဝါ ဖြစ်မှန်း ယောသပ် အသိအမှတ်ပြုခဲ့တယ်။—က. ၄၅:၅-၉။
၁၂။ စမ်းသပ်မှု ကြုံရချိန်မှာ ယေရှု ဘယ်နည်းနဲ့ သစ္စာရှိခဲ့သလဲ။
၁၂ ယေရှုခရစ်လည်း ယုံကြည်ခြင်း စပ်သပ်မှု အမျိုးမျိုး ကြုံရတဲ့အခါ ဘုရားသခင်ကို နာခံတဲ့အတွက် ဆုချခံခဲ့ရတယ်။ နာခံဖို့ ဘာက ကူညီပေးခဲ့သလဲ။ “မိမိရှေ့၌ရှိသော ဝမ်းမြောက်စရာ အကြောင်းကြောင့် အရှက်ခွဲခံရခြင်းကို ဂရုမစိုက်ဘဲ ညှဉ်းဆဲရာသစ်တိုင်တွင် အသေခံ” ခဲ့တယ်လို့ ကျမ်းစာမှာ ရှင်းပြထားတယ်။ (ဟေဗြဲ ၁၂:၂) ဘုရားသခင့် နာမတော်ကို သန့်ရှင်းမြင့်မြတ်စေနိုင်ခဲ့တဲ့အတွက် ယေရှု ဝမ်းမြောက်ခဲ့တယ်။ အဲဒီအပြင် ဖခင်ရဲ့ မျက်နှာသာနဲ့ တခြားအခွင့်ထူးတွေကိုလည်း ဆုချခံခဲ့ရတယ်။ “ဘုရားသခင်၏ပလ္လင် လက်ယာတော်ဘက်တွင် ထိုင်နေ” တယ်လို့ ကျမ်းစာမှာ ဖော်ပြတယ်။ “ဘုရားသခင်သည် ကိုယ်တော်ကို သာလွန်မြင့်မြတ်သော အခွင့်အရာသို့ ချီးမြှောက်၍ ဘွဲ့နာမတကာတို့ထက် ကြီးမြတ်သောဘွဲ့နာမကို ပေးသနားတော်မူ၏” လို့လည်း ဖတ်ရတယ်။—ဖိ. ၂:၉။
ကျွန်တော်တို့ရဲ့ လုပ်ဆောင်မှုကို ယေဟောဝါ မမေ့
၁၃၊ ၁၄။ ယေဟောဝါအတွက် ကျွန်တော်တို့ လုပ်ဆောင်တာတွေကို ကိုယ်တော် ဘယ်လို သဘောထားသလဲ။
၁၃ ယေဟောဝါကို ဝတ်ပြုဖို့ ကျွန်တော်တို့ရဲ့ ကြိုးစားအားထုတ်မှု မှန်သမျှကို ကိုယ်တော် တန်ဖိုးထားကြောင်း စိတ်ချနိုင်တယ်။ ကျွန်တော်တို့ ခံစားရနိုင်တဲ့ မသေချာ မရေရာမှုတွေကို ကိုယ်တော် နားလည်ပေးတယ်။ ငွေကြေးခက်ခဲတဲ့အခါ၊ ကျန်းမာရေးနဲ့ စိတ်ဓာတ်ရေးကြောင့် လုပ်ငန်းတော်မှာ အပြည့်အဝ မပါဝင်နိုင်တဲ့အခါ ကိုယ်တော် ကရုဏာပြတယ်။ မိမိအပေါ် သစ္စာရှိဖို့ ကျေးကျွန်တွေရဲ့ ကြိုးစားမှုကို ယေဟောဝါ တန်ဖိုးထားကြောင်း အပြည့်အဝ ယုံကြည်စိတ်ချနိုင်ပါတယ်။—ဟေဗြဲ ၆:၁၀၊ ၁၁ ကိုဖတ်ပါ။
၁၄ ကျွန်တော်တို့ရဲ့ စိုးရိမ်မှုတွေကို နားထောင်ပေးမယ်ဆိုတဲ့ ယုံကြည်စိတ်ချမှု အပြည့်နဲ့ ‘ဆုတောင်းသံကို နားထောင်တဲ့အရှင်’ ဆီ ချဉ်းကပ်နိုင်ပါတယ်။ (ဆာ. ၆၅:၂၊ ကဘ) “သနားကြင်နာတတ်သည့်အဖ၊ နှစ်သိမ့်ခြင်းရှိသမျှတို့၏ ဘုရားသခင်” ဟာ ကျွန်တော်တို့ရဲ့ စိတ်ပိုင်း၊ ဝတ်ပြုရေးပိုင်း လိုအပ်ချက်တွေကို မတွန့်မတို ထောက်မပေးပါလိမ့်မယ်။ ယုံကြည်သူချင်းတွေအားဖြင့် ထောက်မပေးနိုင်တယ်။ (၂ ကော. ၁:၃) တခြားသူတွေအပေါ် ကျွန်တော်တို့ ကရုဏာပြတာကိုလည်း ယေဟောဝါ နှစ်သက်တယ်။ ‘ဆင်းရဲသားကို သနားသောသူသည် ယေဟောဝါအား ချေးငှားသောသူဖြစ်၍ သူပြုသောအမှု၏အကျိုးကို ဆပ်ပေးတော်မူလိမ့်မည်။’ (သု. ၁၉:၁၇။ မ. ၆:၃၊ ၄) ဒါကြောင့် ဒုက္ခရောက်နေသူတွေကို ကိုယ်ကျိုးစွန့် ကူညီပေးတဲ့အခါ မိမိကို ချေးငှားတယ်လို့ ယေဟောဝါ ယူမှတ်တယ်။ အဲဒီအတွက် ဆုချမယ်လို့ ကတိပေးထားတယ်။
လောလောဆယ်နဲ့ ထာဝစဉ် ဆုချ
၁၅။ ဘယ်ဆုတွေကို သင်စောင့်မျှော်နေသလဲ။ (ဆောင်းပါးအစမှာပါတဲ့ ရုပ်ပုံကို ကြည့်ပါ။)
၁၅ ဘိသိက်ခံ ခရစ်ယာန်တွေဟာ “ဖြောင့်မတ်ခြင်း သရ၂ တိ. ၄:၇၊ ၈) သင့်မှာ တခြားမျှော်လင့်ချက် ရှိနေရင် သင့်ကို ဘုရားသခင် သိပ်တန်ဖိုးမထားလို့ မဟုတ်ပါဘူး။ ယေရှုရဲ့ “အခြားသိုး” သန်းပေါင်းများစွာဟာ မြေကြီးပေါ်မှာ ထာဝရအသက်ရဖို့ ထက်သန်စွာ စောင့်မျှော်နေကြတယ်။ သူတို့ဟာ “များပြားသော ငြိမ်သက်ခြင်း၌ မွေ့လျော်ကြ” ပါလိမ့်မယ်။—ယော. ၁၀:၁၆။ ဆာ. ၃၇:၁၁။
ဖူကို” ဆုလာဘ်အဖြစ် ရရှိကြပါလိမ့်မယ်။ (၁၆။ ၁ ယောဟန် ၃:၁၉၊ ၂၀ မှာ ဘယ်နှစ်သိမ့်စကား တွေ့ရသလဲ။
၁၆ တစ်ခါတလေ ယေဟောဝါရဲ့ အမှုတော်မှာ သိပ်မအောင်မြင်ဘူး၊ ကိုယ့်ကြိုးစားမှုတွေကို ယေဟောဝါ ကျေနပ်ရဲ့လားလို့ ခံစားရနိုင်တယ်။ ဆုရဖို့ ထိုက်တန်ရဲ့လားလို့တောင် သံသယဝင်မိနိုင်တယ်။ “ဘုရားသခင်သည် ငါတို့၏စိတ်နှလုံးထက် ကြီးမြတ်တော်မူသောကြောင့် အရာခပ်သိမ်းကို သိတော်မူ၏” ဆိုတဲ့အချက်ကို ဘယ်တော့မှ မမေ့ပါနဲ့။ (၁ ယောဟန် ၃:၁၉၊ ၂၀ ကိုဖတ်ပါ။) ယုံကြည်ခြင်းနဲ့ မေတ္တာကို အရင်းခံပြီး စိတ်နှလုံးထဲက ထွက်လာတဲ့ ဝတ်ပြုမှု မှန်သမျှဟာ ဘယ်လောက်ပဲ သေးငယ်နေပုံရပါစေ ကိုယ်တော် ဆုချတယ်။—မာ. ၁၂:၄၁-၄၄။
၁၇။ ကျွန်တော်တို့ လောလောဆယ် ခံစားနေရတဲ့ ဆုလာဘ်တချို့ကို ဖော်ပြပါ။
၁၇ စာတန့် စနစ်ဆိုးရဲ့ ဒီနောက်ဆုံးကာလမှာတောင် မိမိလူမျိုးကို ယေဟောဝါ ကောင်းချီးပေးနေတယ်။ အဖွဲ့အစည်းထဲမှာ အသိပညာနဲ့ ပျော်ရွှင်မှု အလျှံပယ်ရရှိအောင် အသေအချာ ပြင်ဆင်ပေးနေတယ်။ (ဟေရှာ. ၅၄:၁၃) ယေရှု ကတိပေးခဲ့သလို တစ်ကမ္ဘာလုံးမှာရှိတဲ့ ညီအစ်ကို/မတွေနဲ့ ဖွဲ့စည်းထားတဲ့၊ မေတ္တာရှိတဲ့ မိသားစုအားဖြင့် လောလောဆယ် ယေဟောဝါ ကောင်းချီးပေးနေတယ်။ (မာ. ၁၀:၂၉၊ ၃၀) အဲဒီအပြင် ဘုရားသခင်ကို ထက်သန်စွာ ရှာဖွေသူတွေဟာ စိတ်ငြိမ်သက်မှု၊ ရောင့်ရဲမှု၊ ပျော်ရွှင်မှုဆိုတဲ့ အနှိုင်းမဲ့ ကောင်းချီးတွေ ခံစားနေကြတယ်။—ဖိ. ၄:၄-၇။
၁၈၊ ၁၉။ ယေဟောဝါရဲ့ ကျေးကျွန်တွေဟာ ရရှိတဲ့ဆုတွေကို ဘယ်လို သဘောထားကြသလဲ။
၁၈ ကမ္ဘာတစ်ဝန်းမှာရှိတဲ့ ယေဟောဝါရဲ့ ကျေးကျွန်တွေဟာ အံ့ဖွယ်ဆုလာဘ်တွေကို ရရှိခံစားနေကြတယ်။ ဥပမာ၊ ဂျာမနီနိုင်ငံက ဘီယန်ကာ ဒီလိုပြောတယ်– “နေ့တိုင်း ကျွန်မ ဘေးမှာ ရှိနေပြီး စိုးရိမ်သောကတွေကို ကူညီဖြေရှင်းပေးနေတဲ့အတွက် ယေဟောဝါကို ကျေးဇူးတင်လို့ မဆုံးပါဘူး။ ပြင်ပလောကဟာ ရှုပ်ထွေးပွေလီပြီး စိတ်ပျက်စရာ ကောင်းပေမဲ့ ကျွန်မကတော့ ယေဟောဝါနဲ့ အနီးကပ် ရှိနေတဲ့အတွက် ဘုရားလက်တော်မှာ လုံခြုံမှု ခံစားနေရတယ်။ ဘုရားအတွက် စွန့်လွှတ်အနစ်နာခံတိုင်း အဆတစ်ရာ ကောင်းချီးပြန်ရရှိတယ်။”
၁၉ ကနေဒါနိုင်ငံက အသက် ၇၀ အရွယ် မွေးရာပါ ကျောရိုးကွဲရောဂါသည် ပေါ်လာအကြောင်း စဉ်းစားကြည့်ပါ။ “သိပ်မလှုပ်ရှားနိုင်တာနဲ့ပဲ အမှုဆောင်လုပ်ငန်းမှာ သိပ်မပါဝင်နိုင်တော့တာ မဟုတ်ပါဘူး။ ဖုန်းနဲ့ သက်သေခံတာ၊ အလွတ်သဘော သက်သေခံတာစတဲ့ အမှုဆောင်လုပ်ငန်း အမျိုးမျိုးမှာ ပါဝင်တယ်။ ကိုယ့်ကိုယ်ကိုယ် အားပေးဖို့ ကျမ်းချက်တွေ၊ စာပေတွေထဲက စာသားတွေကို မှတ်စုစာအုပ်မှာ ရေးမှတ်ပြီး မကြာခဏ ပြန်ဖတ်တယ်။ အဲဒါက ကျွန်မအတွက်တော့ ‘အသက်ကယ်မှတ်စု’ ပေါ့။ ယေဟောဝါရဲ့ ကတိတွေကို အာရုံစိုက်နေရင် စိတ်ပျက်စရာဆိုတာ တစ်ခဏပါပဲ။ ဘယ်အခြေအနေမှာမဆို ကူညီပေးဖို့ ယေဟောဝါ အမြဲ အသင့်ရှိတယ်” လို့ ပေါ်လာ ပြောတယ်။ သင့်အခြေအနေဟာ ဘီယန်ကာ၊ ပေါ်လာတို့နဲ့ တူချင်မှ တူမယ်။ ဒါပေမဲ့ သင်နဲ့ သင့်ဝန်းကျင်ကလူတွေကို ယေဟောဝါ ဆုချနေတဲ့ နည်းလမ်းတွေအကြောင်း စဉ်းစားကြည့်နိုင်တယ်။ ယေဟောဝါ ဘယ်လို ဆုချနေတယ်၊ အနာဂတ်မှာ ဘယ်လို ဆုချမယ်ဆိုတာ စဉ်းစားခြင်းက အကျိုးကြီးလှပါတယ်။
၂၀။ ယေဟောဝါကို စိတ်နှလုံး အကြွင်းမဲ့ ဆက်အမှုဆောင်နေရင် ဘာကို မျှော်လင့်နိုင်သလဲ။
၂၀ လှိုက်လှိုက်လှဲလှဲ၊ လွတ်လွတ်လပ်လပ် ဆုတောင်းခြင်းက “ဆုကျေးဇူးများစွာ ရရှိ” စေကြောင်း ဘယ်တော့မှ မမေ့ပါနဲ့။ “ဘုရားသခင်၏ အလိုတော်ကို ဆောင်ရွက်ပြီးနောက် ကတိထားရာများကို ရရှိ” မယ်ဆိုတာ ယုံကြည်စိတ်ချနိုင်ပါတယ်။ (ဟေဗြဲ ၁၀:၃၅၊ ၃၆) ဒါကြောင့် ယုံကြည်ခြင်းမှာ ဆက်ခိုင်မာနေပါ။ ယေဟောဝါအတွက် စိတ်နှလုံး အကြွင်းမဲ့ အမှုဆောင်ပါ။ ဒါဆိုရင် ယေဟောဝါ ဆုချမယ်ဆိုတာ ယုံကြည်စိတ်ချနိုင်ပါတယ်။—ကောလောသဲ ၃:၂၃၊ ၂၄ ကိုဖတ်ပါ။.