၁။ မေတ္တာရှင် ဖခင် ယေဟောဝါကို ဘယ်လို တုပ​နိုင်မလဲ။

ယေဟောဝါ​က ကျွန်တော်တို့ကို အလွန်​ချစ်တယ်။ (ယော. ၃:၁၆) မေတ္တာရှင် ဖခင်​ကို ကျွန်တော်တို့ တုပ​ချင်တယ်။ ဒါကြောင့် လူအားလုံးကို၊ အထူးသဖြင့် “ယုံကြည်ခြင်း​တူတဲ့​သူတွေကို” ‘ကိုယ်ချင်းစာ​မှု၊ ညီရင်း​အစ်ကို​မေတ္တာ၊ ချစ်ခင်​စာနာမှု’ ပြဖို့ ကြိုးစား​ကြတယ်။ (၁ ပေ. ၃:၈။ ဂလ. ၆:၁၀) စိတ်ဖိစီး​စ​ရာ ပြဿနာ​တွေ ကြုံနေ​ရတဲ့ ညီအစ်ကို/မ​တွေကို ကျွန်တော်တို့ ကူညီ​ပေးချင်တယ်။

၂။ ဒီ​ဆောင်းပါး​မှာ ဘာ​အကြောင်း သုံးသပ်ကြ​မလဲ။

^၂ ယေဟောဝါရဲ့ မိသားစုဝင် ဖြစ်ချင်​သူ​အားလုံးဟာ စိတ်ဖိစီး​စ​ရာ အခြေအနေ​တွေ ကြုံ​ကြရတယ်။ (မာ. ၁၀:၂၉၊ ၃၀) ဒီ​စနစ်ရဲ့​အဆုံး နီး​လာတာ​နဲ့​အမျှ စမ်းသပ်မှုတွေကို ပို​ကြုံ​ရနိုင်တယ်။ အချင်းချင်း ဘယ်လို ကူညီ​နိုင်မလဲ။ လောတ၊ ယောဘ၊ နောမိ​တို့ရဲ့ ကျမ်းစာ​မှတ်တမ်းကနေ ဘာသင်ယူ​နိုင်ကြောင်း သုံးသပ်​ကြည့်ကြစို့။ ညီအစ်ကို/မ​တွေ ရင်ဆိုင်​နေရတဲ့ အခက်အခဲ​တချို့​အကြောင်း၊ သူတို့​ကို ဘယ်လို ကူညီပေး​နိုင်ကြောင်းကို​လည်း သုံးသပ်​ကြမယ်။

၃။ ၂ ပေတရု ၂:၇၊ ၈ မှာပါတဲ့​အတိုင်း လောတ ဘယ်​ဆုံးဖြတ်ချက်​အမှား​ကို ချ​ခဲ့သလဲ။ ဘာ​ရလဒ်​တွေ ရခဲ့သလဲ။

^၃ အကျင့်ပျက်​တဲ့ သောဒုံ​မြို့သားတွေ​နဲ့​အတူ နေထိုင်ဖို့ လောတ ရွေးချယ်တာ​ဟာ မှားယွင်းတဲ့ ဆုံးဖြတ်ချက်​ပါပဲ။ (၂ ပေတရု ၂:၇၊ ၈ ကိုဖတ်ပါ။) အဲဒီ​ဒေသ​ဟာ သီးနှံ​ဖြစ်ထွန်း​ပေမဲ့ လောတ အခက်အခဲ​များစွာ ကြုံခဲ့​ရတယ်။  (က. ၁၃:၈-၁၃။ ၁၄:၁၂) လောတရဲ့​ဇနီးဟာ မြို့ကို ဒါမှမဟုတ် မြို့ထဲက လူတချို့ကို ခင်တွယ်​နေလို့ ယေဟောဝါကို မနာခံ​ခဲ့​တာ ဖြစ်နိုင်တယ်။ ဒါကြောင့် မြို့​အပေါ် မီး​နဲ့ ကန့်​ကို ဘုရား ရွာ​ကျစေ​တဲ့အခါ သူ​အသက်ဆုံးရှုံး​ခဲ့​တယ်။ လောတရဲ့ သမီး​နှစ်ယောက်​နဲ့ စေ့စပ်​ထားတဲ့ အမျိုးသားတွေ​လည်း သောဒုံ​မြို့ ဖျက်ဆီး​ခံရချိန်မှာ သေဆုံးသွားတယ်။ လောတဟာ အိမ်နဲ့ ပစ္စည်းဥစ္စာ​တွေ ဆုံးရှုံး​သွားတယ်။ အဆိုးဆုံး​ကတော့ ဇနီးကို ဆုံးရှုံး​လိုက်ရ​တာ​ပဲ။ (က. ၁၉:၁၂-၁၄၊ ၁၇၊ ၂၆) အဲဒီလို စိတ်​ဖိစီးမှုတွေကို လောတ ကြုံရ​ချိန်မှာ ယေဟောဝါ စိတ်မရှည်​နိုင်​ဘဲ ဖြစ်ခဲ့သလား။ မဖြစ်ခဲ့​ပါဘူး။

၄။ လောတ​ကို ယေဟောဝါ ဘယ်လို စိတ်ရှည်မှု ပြခဲ့သလဲ။ (မျက်နှာဖုံး​ပုံကို ကြည့်ပါ။)

^၄ သောဒုံ​မြို့မှာ နေဖို့ လောတ ရွေးချယ်​ပေမဲ့ ယေဟောဝါ​က သူနဲ့ မိသားစုကို ကယ်ဖို့ ကောင်းကင်တမန်တွေကို ထောက်ထား​စာနာ​စွာ စေလွှတ်​ပေးတယ်။ ဒါပေမဲ့ လောတ​ဟာ ကောင်းကင်တမန်တွေရဲ့ စကားကို နာခံပြီး သောဒုံ​မြို့ကနေ ချက်ချင်း ထွက်မယ့်​အစား “အချိန်ဆွဲ” နေတယ်။ ဒါကြောင့် ကောင်းကင်တမန်တွေ​က လောတ​ကို လက်ဆွဲ​ပြီး မြို့ပြင်​ထွက်ပြေးဖို့ ကူညီ​ပေးခဲ့​ရတယ်။ (က. ၁၉:၁၅၊ ၁၆) တောင်ပေါ်ကို ပြေး​ဖို့ ကောင်းကင်တမန်တွေ ပြောတဲ့​အခါမှာလည်း နာခံ​မယ့်​အစား အနီးအနားက မြို့ကို ပြေး​ပါ​ရစေလို့ တောင်းဆိုတယ်။ (က. ၁၉:၁၇-၂၀) ယေဟောဝါ စိတ်ရှည်​စွာ နားထောင်ပြီး ခွင့်ပြု​လိုက်တယ်။ နောက်ပိုင်း အဲဒီမြို့မှာ မနေရဲလို့ ယေဟောဝါ​ပြောတဲ့ တောင်တန်း​ဒေသ​ကိုပဲ ပြောင်း​ခဲ့​ရတယ်။ (က. ၁၉:၃၀) လောတ​ကို ယေဟောဝါ အလွန် စိတ်ရှည်ခဲ့​တယ်။ ဘုရားကို ကျွန်တော်တို့ ဘယ်လို တုပ​နိုင်သလဲ။

၅-၆။ ဘုရားသခင်ကို တုပ​ရာ​မှာ ၁ သက်သာလောနိတ် ၅:၁၄ ကို ဘယ်လို ကျင့်သုံး​နိုင်သလဲ။

^၅ ညီအစ်ကို/မ​တစ်ယောက်ဟာ လောတ​လို ဆုံးဖြတ်ချက် အမှားတွေ ချ​မိ​ပြီး ကြီးလေး​တဲ့ ပြဿနာ​တွေ ကြုံနေ​ရတယ် ဆိုရင်ကော။ သင် ဘာလုပ်မလဲ။ စိုက်​တဲ့​အတိုင်း ရိတ်​ရတာပဲ​လို့ ပြော​မိ​နိုင်တယ်။ အဲဒါ မှန်​နိုင်ပါတယ်။ (ဂလ. ၆:၇) ဒါပေမဲ့ လောတ​ကို ကူညီ​ခဲ့​တဲ့ ယေဟောဝါကို တုပ​ရင် ပို​ကောင်းပါတယ်။ ဘယ်လို တုပ​နိုင်မလဲ။

^၆ လောတ​ကို သတိ​ပေးဖို့သာမက သောဒုံ​မြို့ ပျက်စီးခြင်း​ဘေး​ကနေ လွတ်​အောင် ကူညီဖို့ ကောင်းကင်တမန်တွေကို ယေဟောဝါ စေလွှတ်ခဲ့တယ်။ ကျွန်တော်တို့လည်း ညီအစ်ကို​တစ်ယောက် ဒုက္ခရောက်​တော့​မယ်​ဆိုတာ သိရင်​ သတိ​ပေးရမယ်။ ဒါပေမဲ့ အကူအညီလည်း ပေးရမယ်။ ကျမ်းစာ​အခြေပြု ဆုံးမ​စကားကို သူ ချက်ချင်း မလိုက်နာ​ရင်တောင် စိတ်ရှည်ပါ။ ကောင်းကင်တမန်​နှစ်ပါး​ကို တုပပါ။ လက်လျှော့​ပြီး ပစ်ထားမယ့်​အစား လက်တွေ့ကျကျ ကူညီ​ပေးပါ။ (၁ ယော. ၃:၁၈) သူ့​လက်ကို ဆွဲပါ။ ဆိုလိုတာ​က ကျမ်းစာ​အကြံဉာဏ်​ကို လိုက်နာ​ဖို့ ကူညီ​ပေးပါ။—၁ သက်သာလောနိတ် ၅:၁၄ ကိုဖတ်ပါ။

၇။ လောတ​အပေါ်​ထားတဲ့ ယေဟောဝါရဲ့ သဘောထားကို ဘယ်လို တုပ​နိုင်မလဲ။

^၇ လောတရဲ့ မစုံလင်မှုတွေကို ယေဟောဝါ အာရုံမစိုက်​ခဲ့​ဘူး။ နောက်ပိုင်းမှာ လောတ​ကို ဖြောင့်မတ်သူ​အဖြစ် ဖော်ပြဖို့ တမန်တော် ပေတရု​ကို စွမ်းအားတော်​အားဖြင့်​ ညွှန်ကြားတယ်။ အမှားတွေကို ယေဟောဝါ အာရုံမစိုက်​လို့​ ကျေးဇူးတင်စရာ​ပါပဲ။ (ဆာ. ၁၃၀:၃) လောတ​အပေါ်​ထားတဲ့ ယေဟောဝါရဲ့ သဘောထားကို တုပ​နိုင်မလား။ ညီအစ်​ကို/မ​တွေရဲ့ အရည်အသွေး​ကောင်းတွေကို အာရုံစိုက်​မယ်​ဆိုရင် သူတို့​အပေါ် ပို​စိတ်ရှည်​လာပါလိမ့်မယ်။ ဒါဆို သူတို့လည်း ကိုယ့်ရဲ့ အကူအညီကို ပို​လက်ခံ​လာပါလိမ့်မယ်။

၈။ ထောက်ထား​စာနာမှုက ဘာလုပ်ဖို့ လှုံ့ဆော်ပေး​မလဲ။

^၈ ယောဘ ဒုက္ခရောက်​တာ​ကျတော့ ဆုံးဖြတ်ချက်​အမှား​ကြောင့် မဟုတ်ဘူး။ သူဟာ ဒုက္ခ​မျိုးစုံ ကြုံခဲ့​ရတယ်။ ပစ္စည်းဥစ္စာ​တွေ ဆုံးရှုံး​တယ်။ အသိုင်းအဝိုင်းမှာ နာမည်ပျက်​ ရတယ်။ ရောဂါဆိုး ခံစား​ရတယ်။ သားသမီး​အားလုံး သေဆုံးသွားတယ်။ မိတ်ဆွေ အတုအယောင် သုံးယောက်ရဲ့ မဟုတ်မမှန် စွပ်စွဲ​တာ​ကို ခံရတယ်။ သူတို့​သုံးယောက်​က ယောဘ​ကို ဘာကြောင့် မစာနာ​ကြတာလဲ။ အပေါ်ယံ​ကိုပဲ ကြည့်​လို့​ပါ။ ဒါကြောင့် တလွဲ​ကောက်ချက်ချ​ပြီး ပြင်းပြင်းထန်ထန် ဝေဖန်​ခဲ့​ကြတယ်။ အဲဒီလို​အမှား​မျိုး ကျွန်တော်တို့ မလုပ်မိအောင် ဘယ်လို ရှောင်နိုင်​မလဲ။ လူတစ်ယောက်ရဲ့ အခြေအနေကို ယေဟောဝါပဲ အတိအကျ သိတယ်ဆိုတာ အသိအမှတ်​ပြုရမယ်။ သူ​ပြောတာကို ဂရုစိုက် နားထောင်ပါ။ နားထောင်​ရုံသာမက ထပ်တူ မျှဝေ​ခံစားပါ။ ဒါမှသာ စစ်မှန်တဲ့ ကိုယ်ချင်းစာနာ​မှု ပြ​နိုင်မယ်။

၉။ ထောက်ထား​စာနာမှုက ဘာ​မ​လုပ်ဖို့ ကူညီပေးသလဲ။ ဘာကြောင့်လဲ။

^၉ ထောက်ထား​စာနာမှုက တခြားသူ ကြုံနေ​ရတဲ့ ပြဿနာ​တွေ​အကြောင်း အတင်းအဖျင်း မပြောဖို့ ကူညီ​ပေးတယ်။ အတင်းအဖျင်း ပြောသူဟာ အသင်းတော်ကို မတည်ဆောက်ဘဲ ပြိုကွဲ​စေတယ်။ (ပညာ. ၂၀:၁၉။ ရော. ၁၄:၁၉) ကြင်နာမှုမဲ့​သူ၊ စာနာမှုမဲ့သူ ဖြစ်တယ်။ သူ့​စကားက ဒုက္ခ​ရောက်နေ​သူကို ပို​နာကျင်စေ​နိုင်တယ်။ (ပညာ. ၁၂:၁၈။ ဧဖက် ၄:၃၁၊ ၃၂) ဒါကြောင့် အတင်းအဖျင်း ပြောမယ့်​အစား အခက်အခဲ ကြုံနေ​ရသူ​ရဲ့ အရည်အသွေးကောင်း​ကို ရှာပြီး ဘယ်လို ကူညီ​ပေးနိုင်​မလဲ​ဆိုတာ စဉ်းစားရင် ပိုကောင်းတယ်။

၁၀။ ယောဘ ၆:၂၊ ၃ က ကျွန်တော်တို့ကို ဘာသင်ပေးသလဲ။

^၁၀ ယောဘ ၆:၂၊ ၃ ကိုဖတ်ပါ။ ယောဘ “မဆင်မခြင် ပြော” မိ​တဲ့အခါ​တွေ​လည်း ရှိတယ်။ နောက်ပိုင်း စကား​တချို့ကို ပြန်​ရုပ်သိမ်း​ခဲ့​တယ်။ (ယောဘ ၄၂:၆) ယောဘ​လို​ပဲ ဖိစီးမှု​ကြုံနေ​ရသူ​ဟာ နောက်​မှ နောင်တ​ရမယ့် စကားတွေကို မဆင်မခြင် ပြော​မိ​နိုင်တယ်။ ကျွန်တော်တို့ ဘယ်လို တုံ့ပြန်​မလဲ။ ပြစ်တင်​ဝေဖန်မယ့်​အစား ထောက်ထား​စာနာမှု ပြသင့်တယ်။ ကျွန်တော်တို့​အားလုံးကို ဒီလို ပြဿနာ​ တွေ၊ ဖိစီးမှုတွေ ယေဟောဝါ မကြုံ​စေချင်ဘူး​ဆိုတာ သတိရပါ။ ဒါကြောင့် ယေဟောဝါရဲ့ သစ္စာရှိ ကျေးကျွန်​တစ်ယောက် စိတ်ဖိစီးမှု​ကြောင့် မဆင်မခြင် ပြော​မိ​တဲ့အခါ နားလည်​ပေးပါ။ ယေဟောဝါ​အကြောင်း၊ ကျွန်တော်တို့​အကြောင်း မဟုတ်မမှန်တာတွေ သူ​ပြောလာရင် ချက်ချင်း စိတ်မဆိုး​ပါ​နဲ့။ မဝေဖန်​လိုက်ပါ​နဲ့။—ပညာ. ၁၉:၁၁။

၁၁။ အကြံဉာဏ် ပေးတဲ့​အခါ ဧလိဟု​ကို အကြီးအကဲ​တွေ ဘယ်လို တုပ​နိုင်သလဲ။

^၁၁ တစ်ခါတလေ ဖိစီးမှု​ကြုံရသူ​ဟာ အကြံဉာဏ် ဒါမှမ​ဟုတ် အထောက်အကူ​ပြု ဆုံးမ​စကား လိုအပ်​နိုင်တယ်။​ (ဂလ. ၆:၁) ဒီ​အခြေအနေကို အကြီးအကဲ​တွေ ဘယ်လို ကိုင်တွယ်သင့်သလဲ။ ယောဘ​ပြောတာကို စာနာ​စွာ​ နားထောင်​ပေးတဲ့ ဧလိဟု​ကို တုပသင့်တယ်။ (ယောဘ ၃၃:၆၊ ၇) ဧလိဟု​က ယောဘရဲ့ ခံစားချက်တွေကို နားလည်ပြီး​နောက်​မှ အကြံပေး၊ ဆုံးမတယ်။ ဧလိဟု​ရဲ့ ပုံသက်သေကို တုပ​တဲ့ အကြီးအကဲ​တွေဟာ ဂရုစိုက် နားထောင်ပြီး အခြေအနေကို နားလည်ဖို့ ကြိုးစားတယ်။ ပြီးမှ အကြံပေး၊ ဆုံးမ​မယ်​ဆိုရင်​ နား​ထောင်​သူ​ရဲ့​စိတ်​ကို ပို​ထိမိ​စေနိုင်​မယ်။

၁၂။ ယော​က်ျား​နဲ့ သား​နှစ်ယောက် သေဆုံး​တာ​က နောမိ​အပေါ် ဘယ်လို သက်ရောက်မှု ရှိသလဲ။

^၁၂ နောမိဟာ ယေဟောဝါကို ချစ်တဲ့ သစ္စာရှိ​အမျိုးသမီး ဖြစ်တယ်။ ယော​က်ျား​နဲ့ သား​နှစ်ယောက် သေဆုံး​ပြီးနောက် မိမိ​နာမည်ကို “ခါးသီးခြင်း” လို့ အဓိပ္ပာယ်​ရှိတဲ့ “မာ​ရ” လို့​ပဲ ခေါ်ကြပါ​ဆိုပြီး ပြောခဲ့တယ်။ (ရု. ၁:၃၊ ၅၊ ၂၀၊ အောက်ခြေမှတ်ချက်၊ ၂၁) ချွေးမ ရုသဟာ နောမိ ဒုက္ခရောက်​ချိန်​တစ်လျှောက်လုံးမှာ အတူ​ရှိနေခဲ့တယ်။ ရုသဟာ နောမိ​ကို လက်တွေ့ကျကျ ကူညီ​ရုံသာမက ကြင်ကြင်နာနာ ပြောဆိုတယ်။ ရိုးရှင်းတဲ့​စကားတွေကို စိတ်ရင်းမှန်နဲ့​ပြောပြီး မေတ္တာပါပါ ထောက်မ​ပေးတယ်။—ရု. ၁:၁၆၊ ၁၇။

၁၃။ အိမ်ထောင်ဖက် ဆုံးသွားလို့ ကျန်ရစ်​ခဲ့​သူကို ဘာကြောင့် ထောက်မ​ပေးဖို့ လိုသလဲ။

^၁၃ ညီအစ်ကို/မ​တစ်ယောက်ဟာ အိမ်ထောင်ဖက် ဆုံးပါး​သွားတဲ့အခါ ကျွန်တော်တို့ရဲ့ ထောက်မမှု လိုအပ်တယ်။ လင်မယားတွေကို ဘေးချင်းကပ်​ပေါက်​တဲ့ သစ်ပင်​နှစ်​ပင်​နဲ့ နှိုင်းယှဉ်​နိုင်တယ်။ နှစ်တွေ​တစ်လျှောက် အမြစ်​တွေ ရစ်ပတ်​နှောင်​တွယ်​နေတဲ့​အတွက် တစ်ပင် သေတဲ့​အခါ နောက်​တစ်ပင်​လည်း ထိခိုက်​တယ်။ အလားတူပဲ အိမ်ထောင်ဖက်​တစ်ဦး သေဆုံး​တဲ့အခါ ကျန်ရစ်သူ​ဟာ နှစ်ရှည်လများ စိတ်ဒဏ်ရာ ခံစား​ရနိုင်တယ်။ ပေါ်လာ​ရဲ့ * ခင်ပွန်း ရုတ်တရက် ဆုံးသွားတယ်။ သူ ဒီလို​ပြောတယ်– “ကျွန်မ​ဘဝ​တစ်ခုလုံး ဇောက်ထိုး​မိုး​မျှော် ဖြစ်ပြီး ကူကယ်ရာမဲ့ ဖြစ်သွားတယ်။ အကောင်းဆုံး မိတ်ဆွေ​ကို ဆုံးရှုံး​လိုက်ရ​တာ​ပဲ။ သူ့ကို ကျွန်မ ဘာ​မဆို အကုန်​ပြောပြတယ်။ ကျွန်မ ပျော်​ရင် သူလည်း ပျော်တယ်။ ခက်ခဲချိန်​တွေ​မှာ သူ ထောက်မ​ပေးတယ်။ ရင်ဖွင့်​ပြောတာတွေကို နားထောင်​ပေးတယ်။ အခုတော့ ကျွန်မ​ရင်​တွေ ကွဲကြေ​ကုန်​ပါပြီ။”

၁၄-၁၅။ အိမ်ထောင်ဖက် ဆုံးသွားလို့ ကျန်ရစ်​သူကို ဘယ်လို နှစ်သိမ့်​ပေးနိုင်သလဲ။

^၁၄ အိမ်ထောင်ဖက် ဆုံးသွားလို့ ကျန်ရစ်​ခဲ့​သူကို ဘယ်လို နှစ်သိမ့်​ပေးနိုင်​မလဲ။ အရေးကြီးဆုံး​က ဘာ​ပြော​ရ​မှန်း မသိ​ရင်တောင် တစ်ခုခု ပြောပေးပါ။ အစောပိုင်းမှာ ပါတဲ့ ညီအစ်မ​ ပေါ်လာ​က “သေခြင်း​အကြောင်း လူတွေ မပြော​ချင်​ကြ​မှန်း သိ​ပါ​တယ်။ စကားပြော​မှား​မှာ သူတို့ စိုးရိမ်​ကြတယ်။ ဒါပေမဲ့ ဘာမှ မပြောတာက အပြော​မှားတာ​ထက် ပို​ဆိုးတယ်” လို့ ပြောတယ်။ ကြီးကျယ်တဲ့ စကားတွေနဲ့ နှစ်သိမ့်​ပေးဖို့ ဝမ်းနည်း​ကြေကွဲနေသူ​တွေ မမျှော်လင့်​ပါဘူး။ “‘စိတ်မကောင်း​ပါဘူး’ လို့ မိတ်ဆွေ​တွေ ပြောရုံနဲ့​တင် ကျေနပ်​ပါတယ်” ဆိုပြီး ပေါ်လာ ပြောတယ်။

^၁၅ လွန်ခဲ့တဲ့​နှစ် အနည်းငယ်မှာ ဝီလျံ​ရဲ့ ဇနီး​ သေ​ဆုံး​သွား​ တယ်။ သူ ဒီလို​ပြောတယ်– “ကျွန်တော့်​ဇနီးရဲ့ ကောင်း​ကြောင်းကို တခြားသူတွေ ပြောတဲ့အခါ သူ့ကို ချစ်ခင်​လေးစား​ကြ​မှန်း သိရလို့ ကျေနပ်​လိုက်တာ။ အဲဒါက အတော့်​ကို အကူအညီ ဖြစ်စေတယ်။ သူဟာ ကျွန်တော့်​အတွက် တန်ဖိုး​ရှိသူ၊ အရေးပါ​သူ​ဆိုတော့ အဲဒီလို စကားတွေက နှစ်သိမ့်မှု ဖြစ်စေတယ်။” ခင်ပွန်း​ဆုံးသွားတဲ့ ဘီယန်ကာ ဒီလို​ပြောတယ်– “တခြားသူတွေ ကျွန်မ​နဲ့​အတူ ဆုတောင်းပြီး ကျမ်းချက် တစ်ချက် နှစ်ချက် ဖတ်ပြ​တဲ့အခါ နှစ်သိမ့်မှု ရတယ်။ ကျွန်မ​ယော​က်ျား​အကြောင်း သူတို့​ပြောတဲ့အခါ၊ သူ့​အကြောင်း ကျွန်မ​ပြောတာကို နားထောင်ပေး​ကြ​တဲ့အခါ နှစ်သိမ့်မှု ရတယ်။”

၁၆။ (က) ချစ်ရသူ​တစ်ဦး သေဆုံးသွားလို့ ကျန်ရစ်​တဲ့​သူကို ဘာလုပ်​ပေးနိုင်သလဲ။ (ခ) ယာကုပ် ၁:၂၇ အရ ကျွန်တော်တို့မှာ ဘာ​တာဝန် ရှိသလဲ။

^၁၆ မုဆိုးမ နောမိ​နား​မှာ အမြဲ​ရှိနေ​ပေးတဲ့ ရုသလိုပဲ ချစ်ရသူ သေဆုံး​လို့ ကျန်ရစ်​သူတွေကို အမြဲ ထောက်မ​ပေးဖို့ လိုတယ်။ အစောပိုင်းမှာ ဖော်ပြခဲ့တဲ့ ပေါ်လာ ဒီလို​ပြောတယ်– “ကျွန်မ​ယော​က်ျား ဆုံး​ပြီးပြီးချင်း​မှာ အကူအညီ​တွေ အများကြီး ရတယ်။ အချိန်တွေ ကြာ​လာတာ​နဲ့​အမျှ လူတွေလည်း ပုံမှန် ပြန်​ဖြစ်သွားကြတယ်။ ကျွန်မရဲ့​ဘဝက​တော့ လုံးလုံး​ပြောင်းလဲ​သွားပြီ။ ဝမ်းနည်းပူဆွေး​သူတွေဟာ လ​နဲ့​ချီ၊ နှစ်နဲ့ချီပြီး ထောက်မမှု လို​နေဆဲပဲ​ဆိုတာကို လူတွေ အသိအမှတ်ပြု​တာ အကူအညီ​ဖြစ်စေတယ်။” တစ်ယောက်နဲ့ တစ်ယောက်​တော့ မတူ​ကြပါဘူး။ တချို့က အခြေအနေသစ်​မှာ အမြန် နေသား​ကျသွား​တယ်။ တချို့ကျတော့ အိမ်ထောင်ဖက်​နဲ့ အတူ​လုပ်ဆောင်ခဲ့​တာတွေကို အမှတ်ရ​တိုင်း နာကျင်​ခံစား​နေတတ်​တယ်။ ဝမ်းနည်း​ပုံချင်း မတူကြဘူး။ အိမ်ထောင်ဖက် သေဆုံးသွားလို့ ကျန်ရစ်​သူတွေကို ကြည့်ရှု​စောင့်ရှောက်​ဖို့ ကျွန်တော်တို့ကို​ ယေဟောဝါ​  အခွင့်ထူးနဲ့ တာဝန် ပေးအပ်​ထားကြောင်း သတိရ​ကြပါစို့။—ယာကုပ် ၁:၂၇ ကိုဖတ်ပါ။

၁၇။ အိမ်ထောင်ဖက်ရဲ့ စွန့်ပစ်မှု ခံရသူတွေ ဘာကြောင့် ထောက်မမှု​ လိုအပ်​သလဲ။

^၁၇ အိမ်ထောင်သည်​တချို့က အိမ်ထောင်ဖက် စွန့်​သွား​လို့ သောက​ဖိစီးမှု ကြုံရ​ကြတယ်။ ခင်ပွန်း​ဖြစ်သူ နောက်​မိန်းမ ယူသွားတဲ့​အခါ ဂျွိုက်စ် ဒီလို​ပြောတယ်– “အိမ်ထောင်ဖက် သေဆုံး​တာ​ထက် ကွာရှင်း​လိုက်ရ​တဲ့ စိတ်ဒဏ်ရာ​က ပို​ဆိုးတယ်။ မတော်တဆ​ဖြစ်လို့၊ နေမကောင်း​လို့ သေသွား​ရင် သူ့မှာ ရွေးချယ်စရာ မရှိဘူး။ အခုတော့ ကျွန်မကို တမင်​စွန့်​သွားတာ။ အရှက်ကွဲ​ပြီး သိက္ခာ​ကျတယ်​လို့ ခံစား​ရတယ်။”

၁၈။ အိမ်ထောင်ဖက် မရှိတော့တဲ့​သူတွေကို ဘယ်လို ကူညီ​ပေးနိုင်​မလဲ။

^၁၈ အိမ်ထောင်ဖက် မရှိတော့တဲ့​သူတွေကို မေတ္တာ​ပါတဲ့ လုပ်ရပ်​လေး​တွေ​အားဖြင့် ချစ်ခင်​ကြောင်း ပြ​နိုင်တယ်။​ မိတ်ဆွေ​ကောင်းတွေကို သူတို့ ပို​လိုအပ်တယ်။ (ပညာ. ၁၇:၁၇) သူတို့ရဲ့ မိတ်ဆွေ​ဖြစ်ကြောင်း သင် ဘယ်လို ပြ​နိုင်သလဲ။ ထမင်း ဖိတ်ကျွေး​နိုင်တယ်။ အတူ​အပန်းဖြေ​ဖို့၊ အတူ​အမှုဆောင်ဖို့ ဖိတ်ခေါ်နိုင်တယ်။ မိသားစု​ဝတ်ပြုမှု​မှာ ပါဝင်ဖို့ ဖိတ်ခေါ်နိုင်တယ်။ အဲဒီလိုလုပ်ရင် “စိတ်​ကြေကွဲနေသူ​တွေရဲ့ အနီးအပါး​မှာ ရှိ” ပြီး “မုဆိုးမ​တွေကို ကာကွယ်​ပေးတဲ့” ယေဟောဝါ ပျော်ရွှင်​ပါလိမ့်မယ်။—ဆာ. ၃၄:၁၈။​ ၆၈:၅။

၁၉။ ၁ ပေတရု ၃:၈ အရ ဘာလုပ်ဖို့ စိတ်ပိုင်းဖြတ်​ထားသလဲ။

^၁၉ မကြာခင် မြေကြီးကို ဘုရားသခင့် နိုင်ငံတော် အုပ်ချုပ်​တဲ့​အခါ “ဒုက္ခတွေကို မေ့လျော့​သွား” ပါလိမ့်မယ်။ “အရင်တုန်းက ဖြစ်ခဲ့တာတွေကို သတိရ​တော့​မှာ မဟုတ်ဘူး။ အဲဒါ​တွေဟာ စိတ်ထဲ​ပေါ်လာ​တော့​မှာ မဟုတ်ဘူး။” အဲဒီ​အချိန်ကို ကျွန်တော်တို့ စောင့်မျှော်​နေကြ​တယ်။ (ဟေရှာ. ၆၅:၁၆၊ ၁၇) အဲဒီ​နေ့​ရောက်တဲ့​အထိ အချင်းချင်း ထောက်မ​ကြပါစို့။ ညီအစ်ကို/မ​တွေကို ချစ်ကြောင်း အပြော၊ အလုပ်​အားဖြင့် တင်ပြ​ကြပါစို့။—၁ ပေတရု ၃:၈ ကိုဖတ်ပါ။