၁။ ထာဝစဉ် အသက်ရှင်ရမယ်ဆိုတာနဲ့ပတ်သက်ပြီး တချို့ ဘယ်လို တွေးကြသလဲ။

 လူတော်တော်များများ သက်ရှည်ကျန်းမာချင်လို့ အစားအသောက် ဂရုစိုက်ကြတယ်၊ လေ့ကျင့်ခန်း ပုံမှန် လုပ်ကြတယ်။ ဒါပေမဲ့ အစားအသောက် ဘယ်လောက် ဂရုစိုက်စိုက်၊ လေ့ကျင့်ခန်း ဘယ်လောက် လုပ်လုပ် ဇရာနဲ့ သေခြင်းတရားကို မလွန်ဆန်နိုင်မှန်း သိထားကြတယ်။ ဇရာနဲ့အတူ ဒုက္ခတွေ တွဲပါလာတတ်လို့ ထာဝစဉ် အသက်မရှင်ချင်ဘူး၊ ထာဝစဉ် အသက်ရှင်ဖို့ မဖြစ်နိုင်ဘူးလို့ တွေးကြတယ်။ ဒါပေမဲ့ ယောဟန် ၃:၁၆ နဲ့ ၅:၂၄ မှာ ယေရှု ပြောသလိုပဲ လူတွေ “ထာဝရအသက်” ရနိုင်တယ်။

၂။ ထာဝရအသက်နဲ့ပတ်သက်ပြီး ယောဟန် အခန်းကြီး ၆ မှာ ဘယ်လို ဖော်ပြထားသလဲ။ (ယောဟန် ၆:၃၉၊ ၄၀)

^၂ ရှေ့ဆောင်းပါးမှာ ဆွေးနွေးခဲ့တဲ့အတိုင်း လူထောင်ချီ စားဖို့ မုန့်နဲ့ ငါးကို ယေရှု ပွားများစေတယ်။ (ယော. ၆:၅-၃၅) အံ့ဩစရာပါပဲ။ ဒါပေမဲ့ နောက်တစ်ရက်မှာ ဂါလိလဲအိုင်နား ကပေရနောင်မြို့အထိ မိမိကို လိုက်ရှာသူတွေကို ယေရှု ပြောလိုက်တဲ့ စကားက ပိုအံ့ဩဖို့ကောင်းတယ်။ လူတွေ ရှင်ပြန်ထမြောက်လာနိုင်တယ်၊ ထာဝစဉ် အသက်ရှင်နိုင်တယ်လို့ ပြောလိုက်တာပါ။ (ယောဟန် ၆:၃၉၊ ၄၀ ကို ဖတ်ပါ။) သေဆုံးသွားတဲ့ သင့်မိတ်ဆွေတွေ၊ မိသားစုဝင်တွေအတွက် ဘာအဓိပ္ပာယ် ရှိတယ်ဆိုတာ စဉ်းစားကြည့်ပါ။ သေဆုံးသွားသူများစွာ ရှင်ပြန်ထမြောက်လာနိုင်တယ်၊ ချစ်ခင်ရသူတွေနဲ့အတူ သင် ထာဝစဉ် အသက်ရှင်နိုင်တယ်ဆိုတာ ယေရှုရဲ့ စကားက ဖော်ပြနေတယ်။  ဒါပေမဲ့ နောက်ထပ် အခန်းငယ်တွေမှာ ယေရှု ဆက်ပြောတဲ့ စကားကို လူအုပ်ထဲက တော်တော်များများ နားမလည်ကြဘူး။ ဒီနေ့ခေတ်မှာလည်း နားမလည်သူ တော်တော်များများ ရှိတယ်။ ယေရှု ဘာများ ပြောလိုက်လို့လဲ။

၃။ ယောဟန် ၆:၅၁ မှာ ယေရှု ဘာပြောသလဲ။

^၃ ယေရှု အံ့ဖွယ်နည်းနဲ့ မုန့်ပွားများစေတာကို တောကန္တာရမှာ ဘိုးဘေးတွေအတွက် ယေဟောဝါ မန္နမုန့် ချပေးတာနဲ့ လူအုပ် ဆက်စပ်စဉ်းစားမိတယ်။ မန္နကို “ကောင်းကင်က မုန့်” လို့ ကျမ်းစာမှာ ခေါ်ထားတာကိုး။ (ဆာ. ၁၀၅:၄၀။ ယော. ၆:၃၁) ဒါနဲ့ မန္နမုန့်အကြောင်း အခြေခံပြီး ယေရှု ဆက်သွန်သင်တယ်။ မိမိဟာ မန္နမုန့်နဲ့ ဘယ်လို ကွာသလဲဆိုတာ ရှင်းပြတယ်။ မန္နမုန့်ဟာ ယေဟောဝါ အံ့ဖွယ်နည်းနဲ့ ပြင်ဆင်ပေးတဲ့မုန့် ဖြစ်ပေမဲ့ စားတဲ့သူတွေကို ထာဝရအသက် မရစေဘူး။ (ယော. ၆:၄၉) ဒါပေမဲ့ မိမိဟာ “ကောင်းကင်က စစ်မှန်တဲ့ မုန့်၊” ‘ဘုရားသခင် ပေးတဲ့ မုန့်၊’ “အသက်မုန့်” ဖြစ်တယ်လို့ ယေရှု ပြောတယ်။ (ယော. ၆:၃၂၊ ၃၃၊ ၃၅) “ကျွန်တော်ဟာ ကောင်းကင်က လာတဲ့ သက်ရှိမုန့်ပဲ။ ဒီမုန့်ကို စားတဲ့သူတိုင်း ထာဝစဉ် အသက်ရှင်လိမ့်မယ်” လို့ ဆက်ပြောတယ်။ (ယောဟန် ၆:၅၁ ကို ဖတ်ပါ။) မိမိဟာ ကောင်းကင်က လာတဲ့ “မုန့်” ဖြစ်တယ်၊ တောကန္တာရမှာ ဘိုးဘေးတွေအတွက် ဘုရားသခင် ချပေးတဲ့ မန္နမုန့်ထက် သာတယ်လို့ ယေရှု ဘာကြောင့် ပြောသလဲဆိုပြီး လူအုပ် စိတ်ရှုပ်သွားတယ်။ “ကျွန်တော် ပေးမယ့် မုန့်ဟာ ကျွန်တော့်အသားပဲ” ဆိုတဲ့ ယေရှုစကားမှာ သဲလွန်စ ပါတယ်။ ဘာအဓိပ္ပာယ်လဲ။ ကျွန်တော်တို့ကိုယ်တိုင်နဲ့ ချစ်ခင်ရသူတွေ ထာဝစဉ် အသက်ရှင်ရေးနဲ့ ဆိုင်လို့ ယေရှုစကားရဲ့ အဓိပ္ပာယ်ကို စိတ်ဝင်စားသင့်တယ်။

“သက်ရှိမုန့်၊” “အသား”

၄။ ယေရှု ဘာပြောလိုက်လို့ လူတချို့ လန့်သွားသလဲ။

^၄ “ဒီလောကမှာ ရှိတဲ့ လူတွေ အသက်ရနိုင်ဖို့ ကျွန်တော် ပေးမယ့် မုန့်ဟာ ကျွန်တော့်အသားပဲ” လို့ ယေရှု ပြောလိုက်တော့ လူအုပ်ထဲက တချို့ လန့်သွားတယ်။ သူ့အသား စားခိုင်းတယ်လို့ ထင်သွားတာများလား။ (ယော. ၆:၅၂) “လူသားရဲ့ အသားကို မစားဘူး၊ လူသားရဲ့ သွေးကို မသောက်ဘူးဆိုရင် ခင်ဗျားတို့ အသက်ရမှာ မဟုတ်ဘူး” လို့ ယေရှု ဆက်ပြောတော့ ပိုလန့်သွားကြတယ်။—ယော. ၆:၅၃။

၅။ လူအုပ်ကို မိမိရဲ့ သွေးသောက်ဖို့ ယေရှု ပြောတာ မဟုတ်မှန်း ဘယ်လို သိနိုင်သလဲ။

^၅ သွေးမစားဖို့ နောဧခေတ်မှာ ဘုရားသခင် မိန့်မှာခဲ့တယ်။ (က. ၉:၃၊ ၄) အစ္စရေးတွေကို ပေးတဲ့ ပညတ်မှာလည်း သွေးမစားဖို့ ပါတယ်။ သွေးစားသူ ဘယ်သူ့ကိုမဆို “ပယ်ရှင်းရမယ်။” (ဝတ်. ၇:၂၇) ယေရှုဟာ မောရှေပညတ် လိုက်နာတယ်။ (မ. ၅:၁၇-၁၉) ဒါကြောင့် လူအုပ်ကို မိမိရဲ့ အသားစားခိုင်းတာ၊ မိမိရဲ့ သွေးသောက်ခိုင်းတာ ဘယ်လိုမှ မဖြစ်နိုင်ဘူး။ တကယ်တော့ “ထာဝရအသက်” ရနိုင်ပုံကို သင်ပေးချင်လို့ စိတ်ဝင်စားအောင် ပြောလိုက်တာပါ။—ယော. ၆:၅၄။

၆။ ယောဟန် ၆:၅၃ မှာ ပါတဲ့ ယေရှုစကားဟာ တင်စားပြောထားတာ ဖြစ်မှန်း ဘယ်လို သိနိုင်သလဲ။

^၆ ယောဟန် ၆:၅၃ မှာ ပါတဲ့ ယေရှုစကားဟာ တင်စားပြောထားတာပါ။ ရှမာရိအမျိုးသမီးနဲ့ စကားပြောတုန်းကလည်း ဒီလိုတင်စားပြောခဲ့တယ်– “ကျွန်တော် ပေးတဲ့ ရေကို သောက်တဲ့သူကတော့ ဘယ်တော့မှ ရေငတ်မှာ မဟုတ်ဘူး။ သူ့အထဲမှာ အဲဒီရေဟာ ထာဝရအသက် ရစေမယ့် စိမ့်ထွက်နေတဲ့ စမ်းရေလို ဖြစ်လိမ့်မယ်။” (ယော. ၄:၇၊ ၁၄) a ရေသောက်ရုံနဲ့ ထာဝရအသက် ရမယ်ဆိုပြီး ရှမာရိအမျိုးသမီးကို ယေရှု ပြောနေတာ မဟုတ်ဘူး။ အဲဒီလိုပဲ မိမိရဲ့ အသားစားရင်၊ မိမိရဲ့ သွေးသောက်ရင် ထာဝရအသက် ရမယ်ဆိုပြီး လူအုပ်ကို ယေရှု ပြောနေတာ မဟုတ်ဘူး။

 ဖြစ်ရပ်နှစ်ခုရဲ့ ကွာခြားချက်များ

၇။ ယောဟန် ၆:၅၃ မှာ ပါတဲ့ ယေရှုစကားနဲ့ပတ်သက်ပြီး လူတချို့ ဘာပြောသလဲ။

^၇ သခင့်ညစာစားပွဲမှာ ယေရှု ပြောတဲ့ စကားဟာ ယောဟန် ၆:၅၃ မှာ ပါတဲ့ စကားနဲ့ ဆင်တူတယ်။ ဒါကြောင့် သခင့်ညစာစားပွဲမှာ ဘာတွေ လုပ်ရမယ်ဆိုတာကို ယောဟန် ၆:၅၃ က ဖော်ပြနေတာလို့ လူတချို့ ထင်ကြတယ်။ (မ. ၂၆:၂၆-၂၈) သခင့်ညစာစားပွဲမှာ မုန့်နဲ့ ဝိုင် လက်ဆင့်ကမ်းတဲ့အခါ တက်ရောက်သူတိုင်း သုံးဆောင်သင့်တယ်လို့ ပြောကြတယ်။ တကယ် ဟုတ်သလား။ ဟုတ်မဟုတ် ကျွန်တော်တို့ ရှင်းရှင်းလင်းလင်း သိဖို့ အရေးကြီးတယ်။ နှစ်စဉ် သခင့်ညစာစားပွဲကို ကျွန်တော်တို့ ကျင်းပတဲ့အခါ ကမ္ဘာတစ်ဝန်းက လူသန်းချီ လာတက်ကြလို့ပါ။ ယောဟန် ၆:၅၃ မှာ ပါတဲ့ ယေရှုစကားနဲ့ သခင့်ညစာစားပွဲမှာ ပြောတဲ့ စကားရဲ့ ကွာခြားချက်ကို သုံးသပ်ကြည့်ရအောင်။

၈။ ဖြစ်ရပ်နှစ်ခုရဲ့ ကွာခြားချက်တချို့က ဘာလဲ။ (ရုပ်ပုံကိုလည်း ကြည့်ပါ။)

^၈ ဖြစ်ရပ်နှစ်ခုရဲ့ ကွာခြားချက်နှစ်ချက်ကို သုံးသပ်ကြည့်ပါ။ ပထမ၊ ယောဟန် ၆:၅၃ မှာ ပါတဲ့ စကားတွေကို ဘယ်အချိန်၊ ဘယ်နေရာမှာ ယေရှု ပြောသလဲ။ အေဒီ ၃၂၊ ဂါလိလဲနယ်မှာပါ။ ဒါဟာ ဂျေရုဆလင်မြို့မှာ သခင့်ညစာစားပွဲ မကျင်းပခင် တစ်နှစ်လောက်အလို ဖြစ်တယ်။ ဒုတိယ၊ ဘယ်သူတွေကို ဦးတည်ပြီး ယောဟန် ၆:၅၃ မှာ ပါတဲ့ စကားတွေ ယေရှု ပြောသလဲ။ ဘုရားနိုင်ငံတော် အကြောင်း သင်ယူဖို့ထက် အစာစားရဖို့ အာရုံစိုက်နေသူတွေကိုပါ။ (ယော. ၆:၂၆) အစာစားရဖို့ပဲ အာရုံစိုက်နေလို့လည်း နားလည်ဖို့ ခက်တဲ့ အကြောင်းအရာတစ်ခု ယေရှု ပြောလိုက်တာနဲ့ သူတို့ ယုံကြည်ခြင်း ပျောက်သွားကြတယ်။ တပည့်တချို့ဆိုရင် ယေရှုနောက် ဆက်မလိုက်ကြတော့ဘူး။ (ယော. ၆:၁၄၊ ၃၆၊ ၄၂၊ ၆၀၊ ၆၄၊ ၆၆) ဒီဖြစ်ရပ်ဟာ တစ်နှစ်လောက်အကြာ အေဒီ ၃၃ မှာ ကျင်းပတဲ့ သခင့်ညစာစားပွဲနဲ့ ဘယ်လို ကွာသလဲ။ သခင့်ညစာစားပွဲမှာ ယေရှုနဲ့အတူ ရှိနေတဲ့ တမန်တော် ၁၁ ယောက်ဟာ ဂါလိလဲနယ်က လူအုပ်လို မဟုတ်ဘူး။ ယေရှု ပြောသမျှ အပြည့်အဝ သဘောမပေါက်ပေမဲ့ သစ္စာရှိကြတယ်။ ယေရှုဟာ ကောင်းကင်က လာတဲ့ ဘုရားသားတော်ဆိုတာ ယုံကြည်ကြတယ်။ (မ. ၁၆:၁၆) ဒါကြောင့်လည်း “ခင်ဗျားတို့က ကျွန်တော် စမ်းသပ်မှု ကြုံရချိန်တွေမှာ ကျွန်တော့်ကို မစွန့်ခွာကြဘူး” လို့ ယေရှု ပြောတာ။ (လု. ၂၂:၂၈) ဒီကွာခြားချက်နှစ်ချက်နဲ့တင် ယောဟန် ၆:၅၃ မှာ ပါတဲ့ ယေရှုစကားဟာ သခင့်ညစာစားပွဲနဲ့ မသက်ဆိုင်မှန်း သိနိုင်တယ်။ နောက်ထပ် ကွာခြားချက်တွေ ရှိသေးတယ်။

သင် ပါဝင်ပတ်သက်နေပုံ

၉။ သခင့်ညစာစားပွဲမှာ ယေရှု ပြောတဲ့ စကားဟာ ဘယ်သူတွေနဲ့ သက်ဆိုင်သလဲ။

^၉ သခင့်ညစာစားပွဲမှာ တမန်တော်တွေကို ယေရှု တဆေးမဲ့မုန့် ဝေပေးတယ်။ ဒါဟာ မိမိကိုယ်ခန္ဓာကို ကိုယ်စားပြုတယ်လို့ ပြောတယ်။ အဲဒီနောက် ဝိုင် ဝေပေးတယ်။ ဒါဟာ “ပဋိညာဉ်နဲ့ဆိုင်တဲ့ သွေး” ကို ကိုယ်စားပြုတယ်လို့ ပြောတယ်။ (မာ. ၁၄:၂၂-၂၅။ လု. ၂၂:၂၀။ ၁ ကော. ၁၁:၂၄) အဲဒီပဋိညာဉ်ကို ပဋိညာဉ်သစ်လို့ ယေရှု ခေါ်ထားတယ်။ ပဋိညာဉ်သစ်ဟာ “[ပုံဆောင်] အစ္စရေးအမျိုး၊” တစ်နည်းအားဖြင့် “ဘုရားသခင့်နိုင်ငံတော်” မှာ ယေရှုနဲ့အတူ အုပ်ချုပ်မယ့်သူတွေနဲ့ ယေဟောဝါ ဖွဲ့ထားတာ ဖြစ်တယ်။ လူတိုင်းနဲ့ ဖွဲ့ထားတာ မဟုတ်ဘူး။ (ဟီ. ၈:၆၊ ၁၀။ ၉:၁၅) ပဋိညာဉ်သစ်အကြောင်း ယေရှု ပြောတုန်းက တမန်တော်တွေ လုံးစေ့ပတ်စေ့ သဘောမပေါက်ပေမဲ့ မကြာခင်မှာပဲ သန့်ရှင်းသော စွမ်းအားတော်နဲ့ ဘိသိက်ပေးခံကြရတယ်။ ယေရှုနဲ့အတူ ကောင်းကင်မှာ နေရာရဖို့ ပဋိညာဉ်သစ်အဝင် ဖြစ်လာကြတယ်။—ယော. ၁၄:၂၊ ၃။

၁၀။ သခင့်ညစာစားပွဲမှာ ယေရှု ပြောတဲ့ စကားနဲ့ ယောဟန် ၆:၅၃ မှာ ပါတဲ့ စကားရဲ့ ကွာခြားချက် နောက်တစ်ချက်က ဘာလဲ။ (ရုပ်ပုံကိုလည်း ကြည့်ပါ။)

^၁၀ သခင့်ညစာစားပွဲမှာ ယေရှု ပြောတဲ့ စကားဟာ “သိုးစုငယ်” နဲ့ သက်ဆိုင်တယ်။ အဲဒီအုပ်စုမှာ ဦးဆုံး ပါဝင်သူတွေကတော့ သခင့်ညစာစားပွဲမှာ ယေရှုနဲ့အတူ ရှိနေတဲ့ သစ္စာရှိ တမန်တော်တွေ ဖြစ်တယ်။ (လု. ၁၂:၃၂) တမန်တော်တွေ၊ နောက်ပိုင်းမှာ သိုးစုငယ်အဝင် ဖြစ်လာမယ့်သူတွေပဲ သခင့်ညစာစားပွဲ အထိမ်းအမှတ်တွေ ဖြစ်တဲ့ မုန့်နဲ့ ဝိုင်ကို သုံးဆောင်သင့်တယ်။ သူတို့ဟာ ယေရှုနဲ့အတူ ကောင်းကင်မှာ နေရာရမယ့်သူတွေ ဖြစ်တယ်။ ဒါဟာ သခင့်ညစာစားပွဲမှာ ယေရှု ပြောတဲ့ စကားနဲ့ ယောဟန် ၆:၅၃ မှာ ပါတဲ့ စကားရဲ့ ကွာခြားချက် နောက်တစ်ချက် ဖြစ်တယ်။ သခင့်ညစာစားပွဲမှာ တမန်တော်တွေကို ယေရှု ပြောတဲ့ စကားဟာ လူနည်းစုနဲ့ပဲ သက်ဆိုင်တယ်။ ဂါလိလဲနယ်မှာ ပြောတဲ့ ယောဟန် ၆:၅၃ ပါ စကားကတော့ မရေတွက်နိုင်အောင် များတဲ့ လူတွေနဲ့ သက်ဆိုင်တယ်။

၁၁။ ဂါလိလဲနယ်မှာ ယေရှု ပြောတာဟာ လူနည်းစုပဲ ရမယ့် ကောင်းချီးအကြောင်း မဟုတ်မှန်း ဘယ်လို သိရသလဲ။

^၁၁ အေဒီ ၃၂၊ ဂါလိလဲနယ်မှာ လူအုပ်ထဲက အများစုဟာ မုန့်စားရဖို့ပဲ အာရုံရောက်နေကြတယ်။ ဒါနဲ့ ပကတိမုန့်ထက် ပိုအရေးကြီးတဲ့၊ ထာဝရအသက် ရစေနိုင်တဲ့ မုန့်အကြောင်း သူတို့ကို ယေရှု ပြောပြတယ်။ သေဆုံးသွားသူတွေ နောက်ဆုံးသောနေ့မှာ ရှင်ပြန်ထမြောက်လာနိုင်တယ်၊ ထာဝစဉ် အသက်ရှင်နိုင်တယ်လို့ ပြောတယ်။ ဒါ လူတိုင်း ရနိုင်တဲ့ ကောင်းချီး ဖြစ်တယ်။ နောက်ပိုင်း၊ သခင့်ညစာစားပွဲ မှာ ပြောတဲ့ လူနည်းစုပဲ ရမယ့် ကောင်းချီး မဟုတ်ဘူး။ ဘယ်လို သိရသလဲ။ “ဒီမုန့်ကို စားတဲ့သူတိုင်း ထာဝစဉ် အသက်ရှင်လိမ့်မယ်။ ဒီလောကမှာ ရှိတဲ့ လူတွေ အသက်ရနိုင်ဖို့ ကျွန်တော် ပေးမယ့် မုန့်ဟာ ကျွန်တော့်အသားပဲ” လို့ ပြောလို့ပါပဲ။—ယော. ၆:၅၁။

၁၂။ ယေရှု ပြောတဲ့ ကောင်းချီး ရဖို့ ဘာလိုအပ်သလဲ။

^၁၂ ကမ္ဘာပေါ်မှာ အသက်ရှင်ခဲ့သူတိုင်း၊ မွေးလာမယ့်သူတိုင်း ဒီကောင်းချီး ရမယ်လို့တော့ ယေရှု မပြောဘူး။ “ဒီမုန့်ကို စားတဲ့သူ၊” တစ်နည်းအားဖြင့် ယေရှုကို ယုံကြည်သက်ဝင်သူပဲ ဒီကောင်းချီး ရမှာ။ “[ယေရှု]ကို ယုံကြည်” ရင်၊ ကယ်တင်ရှင်အဖြစ် လက်ခံရင် ကယ်တင်ခြင်း ရပြီလို့ အမည်ခံ ခရစ်ယာန် တော်တော်များများ ထင်ကြတယ်။ (ယော. ၆:၂၉၊ ယုဒဿန်ကျမ်း) ဒါပေမဲ့ ယေရှုကို ယုံကြည်ရုံနဲ့ မလုံလောက်ဘူး။ ဂါလိလဲနယ်က လူအုပ်ထဲက တချို့ဆိုရင်လည်း အစပိုင်းမှာ ယေရှုကို ယုံကြည်ကြတယ်။ ဒါပေမဲ့ နောက်တော့ ယေရှုနောက် ဆက်မလိုက်ကြတော့ဘူး။ ဘာကြောင့်လဲ။

၁၃။ ယေရှုရဲ့ နောက်လိုက်စစ် ဖြစ်ချင်ရင် ဘာလုပ်ရမလဲ။

^၁၃ လူအုပ်ထဲက အများစုဟာ အစာစားရလို့သာ ယေရှုနောက် လိုက်ကြတာ။ အံ့ဖွယ်နည်းနဲ့ ကုသခံချင်ကြတယ်၊ အစာစားချင်ကြတယ်၊ သူတို့အကြိုက်နဲ့ ကိုက်တဲ့ သွန်သင်ချက်တွေလောက်ကိုပဲ နားထောင်ချင်ကြတယ်။ ဒါပေမဲ့ ယေရှု မြေကြီးပေါ်လာတာ လူတွေရဲ့ လိုအင်ဆန္ဒ ဖြည့်ဆည်းပေးဖို့သက်သက် မဟုတ်ဘူး။ မိမိရဲ့ နောက်လိုက်စစ် ဖြစ်ချင်ရင် ဘာလုပ်ရမယ်ဆိုတာ သွန်သင်ပေးဖို့ ရောက်လာတာ။ နောက်လိုက်စစ် ဖြစ်ချင်ရင် ယေရှုဆီ “လာ” ရမယ်။ ဆိုလိုတာက ယေရှု သွန်သင်သမျှကို လက်ခံပြီး လိုက်နာရမယ်။—ယော. ၅:၄၀။ ၆:၄၄။

၁၄။ ထာဝရအသက် ရချင်ရင် ကျွန်တော်တို့ ဘာလုပ်ရမလဲ။

 ^၁၄ မိမိရဲ့ အသားနဲ့ သွေးကို ပူဇော်သက္ကာအဖြစ် ပေးဆက်ခြင်းအားဖြင့် လူတွေ ထာဝစဉ် အသက်ရှင်နိုင်အောင် လုပ်ပေးမယ်လို့ ယေရှု ပြောတယ်။ ဒီအချက်ကို လူအုပ် ယုံကြည်သက်ဝင်ဖို့ လိုသလို ကျွန်တော်တို့လည်း ယုံကြည်သက်ဝင်ဖို့ လိုတယ်။ (ယော. ၆:၄၀) ထာဝရအသက် ရချင်ရင် ယေရှုရဲ့ ရွေးဖိုးကို ယုံကြည်သက်ဝင်ရမယ်ဆိုတာ ယောဟန် ၆:၅၃ က ဖော်ပြတယ်။ ထာဝရအသက်ဟာ မရေတွက်နိုင်အောင် များတဲ့ လူတွေ ရမယ့် ကောင်းချီးပါပဲ။—ဧ. ၁:၇။

၁၅-၁၆။ ယောဟန် အခန်းကြီး ၆ ကနေ ဘာတွေ သင်ယူခဲ့ရသလဲ။

^၁၅ ကိုယ်တိုင်နဲ့ ချစ်ခင်ရသူတွေအတွက် သိပ်အဖိုးတန်တဲ့ သင်ခန်းစာတွေကို ယောဟန် အခန်းကြီး ၆ ကနေ သင်ယူခဲ့ကြရပြီ။ လူတွေကို ယေရှု ဘယ်လောက် ဂရုစိုက်သလဲဆိုတာ သိရတယ်။ လူနာတွေကို ယေရှု ကုသပေးတယ်၊ ဘုရားနိုင်ငံတော်အကြောင်း ဟောပြောတယ်၊ ကျွေးမွေးဖို့ လိုတဲ့အခါ ကျွေးမွေးတယ်။ (လု. ၉:၁၁။ ယော. ၆:၂၊ ၁၁၊ ၁၂) အဓိကကတော့ မိမိဟာ “အသက်မုန့်” ဖြစ်တယ်ဆိုတာ သွန်သင်ပေးတယ်။—ယော. ၆:၃၅၊ ၄၈။

^၁၆ နှစ်စဉ် သခင့်ညစာစားပွဲမှာ “တခြားသိုးတွေ” ဟာ မုန့်နဲ့ ဝိုင် မသုံးဆောင်ကြဘူး။ သုံးလည်း မသုံးဆောင်သင့်ဘူး။ (ယော. ၁၀:၁၆) “အသက်မုန့်” ကိုတော့ သုံးဆောင်ကြတယ်။ ယေရှုရဲ့ ပူဇော်သက္ကာနဲ့ ပူဇော်သက္ကာကြောင့် ရလာမယ့် ကောင်းချီးတွေကို ယုံကြည်သက်ဝင်ခြင်းအားဖြင့်ပါ။ (ယော. ၆:၅၃) ပဋိညာဉ်သစ်မှာ ပါဝင်သူတွေ၊ နိုင်ငံတော်မှာ အုပ်ချုပ်ဖို့ မျှော်လင့်ချက် ရှိသူတွေကတော့ မုန့်နဲ့ ဝိုင် သုံးဆောင်ကြတယ်။ ဘာပဲဖြစ်ဖြစ် ယောဟန် အခန်းကြီး ၆ မှာ ပါတဲ့ မှတ်တမ်းမှာ ဘိသိက်ခံတွေအတွက်ကော တခြားသိုးတွေအတွက်ပါ အရေးကြီး သင်ခန်းစာ ရှိတယ်။ ထာဝရအသက် ရချင်ရင် ရွေးဖိုးကို ယုံကြည်သက်ဝင်ရမယ်ဆိုတဲ့ သင်ခန်းစာပါပဲ။