လေ့လာရန် ဆောင်းပါး ၄၈
ကိုယ်စခဲ့တဲ့ အလုပ်ကို ပြီးစီးအောင်လုပ်ပါ
‘အစပြုလုပ်ဆောင်ခဲ့တဲ့ အလုပ်ကို အပြီးသတ်လိုက်ပါ။’—၂ ကော. ၈:၁၁။
သီချင်း ၃၅ ‘ပိုအရေးကြီးတဲ့အရာတွေကို ပိုင်းခြားသိပါ’
အကြိုသုံးသပ်ချက် *
၁။ ယေဟောဝါ ကျွန်တော်တို့ကို ဘာလုပ်ခွင့်ပေးထားသလဲ။
ကိုယ့်ဘဝလမ်းစဉ်ကို စိတ်ကြိုက်ရွေးချယ်ဖို့ ကျွန်တော်တို့ကို ယေဟောဝါ ခွင့်ပြုထားတယ်။ ဆုံးဖြတ်ချက်ကောင်း ချနိုင်ပုံကို သင်ပေးပြီး ဘုရား နှစ်သက်တဲ့ ဆုံးဖြတ်ချက်တွေ ချတဲ့အခါ အောင်မြင်အောင် ကူညီပေးတယ်။ (ဆာ. ၁၁၉:၁၇၃) ကျမ်းစာအကြံဉာဏ်ကို လိုက်နာလေ ဆုံးဖြတ်ချက်ကောင်းတွေ ပိုချနိုင်လေပဲ။—ဟီ. ၅:၁၄။
၂။ ဆုံးဖြတ်ချက် ချပြီးနောက် ဘာလုပ်ဖို့ ခက်နိုင်သလဲ။
၂ ဆုံးဖြတ်ချက်ကောင်း ချပြီးရင်တောင် အဲဒီအတိုင်း ပြီးစီးအောင် လုပ်ဖို့ ခက်နိုင်တယ်။ ဥပမာတချို့ သုံးသပ်ကြည့်ပါ– ညီအစ်ကိုငယ်တစ်ဦးဟာ ကျမ်းစာတစ်အုပ်လုံး အပြီးဖတ်ဖို့ ဆုံးဖြတ်တယ်။ အပတ်အနည်းငယ် ကြာပြီးနောက် ဆက်မဖတ်ဖြစ်တော့ဘူး။ ညီအစ်မတစ်ယောက် မှန်မှန်ရှေ့ဆောင် လုပ်ဖို့ ဆုံးဖြတ်ပေမဲ့ မလုပ်ဖြစ်ဘဲ အချိန်ဆွဲနေတယ်။ အကြီးအကဲအဖွဲ့ကလည်း အသင်းတော်မှာ သိုးထိန်းလည်ပတ်မှု များများလုပ်ဖို့ သဘောတူ ဆုံးဖြတ်ပေမဲ့ လအတော်ကြာတဲ့အထိ မလုပ်ဖြစ်ဘူး။ အဲဒီဖြစ်ရပ်တွေမှာ တူညီချက်တစ်ခု ရှိတယ်။ ဆုံးဖြတ်တဲ့အတိုင်း ပြီးစီးအောင် မလုပ်နိုင်ခြင်းပါပဲ။ ပထမရာစုတုန်းက ကောရိန္သုမြို့မှာရှိတဲ့ ခရစ်ယာန်တွေလည်း အဲဒီလို ဖြစ်ခဲ့တယ်။ သူတို့ဆီကနေ ဘာသင်ခန်းစာ ယူနိုင်သလဲ။
၃။ ကောရိန္သုအသင်းတော်ဟာ ဘာလုပ်ဖို့ ဆုံးဖြတ်သလဲ။ ဒါပေမဲ့ ဘာဖြစ်ခဲ့သလဲ။
၃ အေဒီ ၅၅ လောက်မှာ ကောရိန္သုမြို့သားတွေဟာ အရေးကြီးတဲ့ ဆုံးဖြတ်ချက် ချခဲ့ကြတယ်။ ဂျေရုဆလင်နဲ့ ယုဒပြည်မှာ ရှိတဲ့ ညီအစ်ကိုတွေ ဆင်းရဲခက်ခဲနေကြောင်း၊ သူတို့ကို ကူညီဖို့ တခြားအသင်းတော်တွေ အလှူငွေကောက်ခံ၁ ကော. ၁၆:၁။ ၂ ကော. ၈:၆) လအနည်းငယ်ကြာပြီးနောက် ကောရိန္သုအသင်းတော်ဟာ ဆုံးဖြတ်တဲ့အတိုင်း မလုပ်နေမှန်း ပေါလု သိလိုက်တယ်။ ဒါကြောင့် တခြားအသင်းတော်တွေရဲ့ အလှူငွေတွေကို ဂျေရုဆလင်မြို့ဆီ ယူသွားမယ့်အချိန်မှာ သူတို့ အဆင်သင့်မဖြစ်ခဲ့ကြဘူး။—၂ ကော. ၉:၄၊ ၅။
နေကြောင်း သိလိုက်ရတယ်။ ဒါကြောင့် ကြင်နာရက်ရောတဲ့စိတ်နဲ့ လှူဒါန်းဖို့ ဆုံးဖြတ်ပြီး ဘယ်လို ဆက်လုပ်ရမယ်ဆိုတာ တမန်တော် ပေါလုကို မေးမြန်းကြတယ်။ ပေါလုလည်း ညွှန်ကြားချက်တွေ ပေးပြီး အလှူငွေ ကောက်ခံတာကို ကူညီဖို့ တိတုကို တာဝန်ပေးတယ်။ (၄။ ၂ ကောရိန္သု ၈:၇၊ ၁၀၊ ၁၁ မှာ ကောရိန္သုအသင်းတော်ကို ဘာလုပ်ဖို့ ပေါလု တိုက်တွန်းသလဲ။
၄ ကောရိန္သုအသင်းတော်ဟာ ဆုံးဖြတ်ချက်ကောင်း ချခဲ့တယ်။ သူတို့ရဲ့ ခိုင်မာတဲ့ ယုံကြည်ခြင်း၊ ရက်ရောတဲ့စိတ်ကို ပေါလု ချီးမွမ်းတယ်။ ဒါပေမဲ့ အစပြုလုပ်ခဲ့တာကို အပြီးသတ်ဖို့လည်း တိုက်တွန်းတယ်။ (၂ ကောရိန္သု ၈:၇၊ ၁၀၊ ၁၁ ကိုဖတ်ပါ။) သစ္စာရှိ ခရစ်ယာန်တွေတောင် ဆုံးဖြတ်ချက်အတိုင်း လုပ်ဖို့ ခက်နိုင်ကြောင်း အဲဒီဖြစ်ရပ်ကနေ သိရတယ်။
၅။ ဘယ်မေးခွန်းတွေ သုံးသပ်ကြမလဲ။
၅ ကောရိန္သုအသင်းသားတွေလိုပဲ ကျွန်တော်တို့လည်း ဆုံးဖြတ်တဲ့အတိုင်း လုပ်ဖို့ ခက်နိုင်တယ်။ ဘာကြောင့်လဲ။ မစုံလင်မှုကြောင့် အချိန်ဆွဲမိနိုင်တယ်။ ကြိုတင် မမြင်နိုင်တဲ့ ဖြစ်ရပ်တွေကြောင့် ဆုံးဖြတ်တဲ့အတိုင်း လုပ်ဖို့ ခက်နိုင်တယ်။ (ဒေ. ၉:၁၁။ ရော. ၇:၁၈) ဒါပေမဲ့ ဆုံးဖြတ်ချက်ကို ပြန်သုံးသပ်ပြီးနောက် ပြုပြင်ဖို့ လိုနေရင် ဘာလုပ်မလဲ။ အစပြုထားတာကို အပြီးသတ်နိုင်အောင် ဘာလုပ်ရမလဲ။
ဆုံးဖြတ်ချက် မချခင်
၆။ ဘယ်အချိန်မှာ ဆုံးဖြတ်ချက်ကို ပြန်ပြင်ဖို့ လိုနိုင်သလဲ။
၆ အရေးကြီး ဆုံးဖြတ်ချက်တချို့ကိုတော့ ပြင်လို့ မရဘူး။ ဥပမာ၊ ကျွန်တော်တို့ဟာ ယေဟောဝါကို ဝတ်ပြုဖို့၊ အိမ်ထောင်ဖက်ကို သစ္စာရှိဖို့ ဆုံးဖြတ်ထားတဲ့အတိုင်း လုပ်ရမယ်။ (မ. ၁၆:၂၄။ ၁၉:၆) ဒါပေမဲ့ ဆုံးဖြတ်ချက်တချို့ကိုတော့ ပြန်ပြင်ဖို့ လိုနိုင်တယ်။ အကြောင်းကတော့ အခြေအနေတွေ ပြောင်းသွားနိုင်လို့ပဲ။ ဆုံးဖြတ်ချက်ကောင်း ချနိုင်အောင် ဘာက ကူညီပေးနိုင်သလဲ။
၇။ ဘာအတွက် ဆုတောင်းသင့်သလဲ။ ဘာကြောင့်လဲ။
၇ ဉာဏ်ပညာ ရဖို့ ဆုတောင်းပါ။ “တစ်ယောက်ယောက်က ဉာဏ်ပညာ လိုနေရင် [ရက်ရက်ရောရော ပေးတတ်တဲ့] ဘုရားသခင်ဆီ တောင်းမြဲတောင်းပါ” လို့ ယာကုပ် ရေးတယ်။ (ယာ. ၁:၅) ကျွန်တော်တို့အားလုံး “ဉာဏ်ပညာ လိုနေ” ကြတယ်။ ဒါကြောင့် ဆုံးဖြတ်ချက်ချတဲ့အခါ၊ ဆုံးဖြတ်ချက်ကို ပြန်ပြင်ဖို့ လိုတဲ့အခါ ယေဟောဝါကို အားကိုးရမယ်။ ဆုံးဖြတ်ချက်ကောင်း ချနိုင်အောင် ယေဟောဝါ ကူညီပါလိမ့်မယ်။
၈။ ဆုံးဖြတ်ချက် မချခင် ဘာလုပ်သင့်သလဲ။
၈ အသေအချာ ရှာဖွေလေ့လာပါ။ ကျမ်းစာနဲ့ အဖွဲ့အစည်းထုတ် စာပေတွေကို ဖတ်ပါ။ ယုံကြည်စိတ်ချရသူတွေနဲ့ တိုင်ပင်ပါ။ (ပညာ. ၂၀:၁၈) အလုပ်မပြောင်းခင်၊ အိမ်မပြောင်းခင်၊ အမှုဆောင်လုပ်ငန်းမှာ ကိုယ့်ကိုယ်ကိုယ် ထောက်ပံ့ဖို့ သင့်တော်တဲ့ ပညာရေးကို မရွေးချယ်ခင် အသေအချာ ရှာဖွေလေ့လာဖို့ လိုတယ်။
၉။ ကိုယ့်စိတ်ရင်းကို အသေအချာ ဆန်းစစ်မယ်ဆိုရင် ဘာအကျိုးရမလဲ။
၉ ကိုယ့်ရဲ့ စိတ်ရင်းကို ဆန်းစစ်ပါ။ ကျွန်တော်တို့ရဲ့ စိတ်ရင်းဟာ ယေဟောဝါအတွက် အရေးကြီးတယ်။ (ပညာ. ၁၆:၂) ဘုရားသခင်က ကျွန်တော်တို့ကို အရာရာမှာ ရိုးသားစေချင်တယ်။ ဒါကြောင့် ဆုံးဖြတ်ချက် ချတဲ့အခါ ကိုယ့်စိတ်ရင်းကို အသေအချာ ဆန်းစစ်ရမယ်။ ကိုယ့်ကိုယ်ကိုယ်ရော တခြားသူအပေါ်မှာပါ ရိုးသားရမယ်။ မရိုးသားရင် ဆုံးဖြတ်တဲ့အတိုင်း လုပ်ဖို့ ခက်လိမ့်မယ်။ ဥပမာ၊ ညီအစ်ကိုငယ်တစ်ယောက် မှန်မှန်ရှေ့ဆောင် လုပ်ဖို့ ဆုံးဖြတ်တယ်။ နောက်ပိုင်း နာရီပြည့်ဖို့ ခက်လာတယ်။ အမှုဆောင်မှာလည်း မပျော်တော့ဘူး။ ယေဟောဝါကို ပျော်စေချင်လို့ ရှေ့ဆောင် လုပ်တာလို့ သူ ထင်နေပေမဲ့ တကယ်တမ်းတော့ မိဘနဲ့ တခြားသူတွေ စိတ်ကျေနပ်အောင် လုပ်နေတာ ဖြစ်နိုင်တယ်။
၁၀။ ပြုပြင်ပြောင်းလဲနိုင်ဖို့ ဘာလိုသလဲ။
၁၀ ဆေးလိပ်ဖြတ်ဖို့ ဆုံးဖြတ်တဲ့ ကျမ်းစာသင်သားအကြောင်း သုံးသပ်ကြည့်ပါ။ အစပိုင်း တစ်ပတ်နှစ်ပတ်လောက် ဆေးလိပ် ဖြတ်နိုင်ပေမဲ့ ပြန်ပြန်သောက်မိတယ်။ ဒါပေမဲ့ နောက်ဆုံးတော့ အောင်မြင်သွားတယ်။ ယေဟောဝါဘုရားကို ချစ်ပြီး ဘုရားရဲ့ နှစ်သက်မှု ရချင်တဲ့စိတ်ကြောင့် အဲဒီအကျင့်ဆိုးကို ဖြတ်နိုင်ခဲ့တာ။—ကော. ၁:၁၀။ ၃:၂၃။
၁၁။ သတ်သတ်မှတ်မှတ် ပန်းတိုင်ထားဖို့ ဘာကြောင့် လိုသလဲ။
၁၁ သတ်သတ်မှတ်မှတ် ပန်းတိုင်ထားပါ။ သတ်သတ်မှတ်မှတ် ပန်းတိုင်ထားရင် အောင်မြင်ဖို့ ပိုလွယ်ကူမယ်။ ဥပမာ၊ ကျမ်းစာကို ပိုဖတ်ဖို့ ဆုံးဖြတ်ပေမဲ့ သတ်သတ်မှတ်မှတ် ဇယားမထားရင် အောင်မြင်မှာ မဟုတ်ဘူး။ * အသင်းတော် အကြီးအကဲတွေဟာ သိုးထိန်းလည်ပတ်မှု များများလုပ်ဖို့ ဆုံးဖြတ်ပေမဲ့ မလုပ်နိုင်ကြဘူး။ ဆုံးဖြတ်တဲ့အတိုင်း လုပ်နိုင်ဖို့ဆိုရင် “သိုးထိန်းလည်ပတ်ဖို့ လိုအပ်နေတဲ့ ညီအစ်ကို/မတွေရဲ့ စာရင်းလုပ်ထားပြီလား။ လည်ပတ်မယ့် အချိန်ကို သတ်မှတ်ပြီးပြီလား” စတဲ့ မေးခွန်းတွေကို သုံးသပ်နိုင်တယ်။
၁၂။ ကျွန်တော်တို့ ဘာလုပ်ဖို့ လိုနိုင်သလဲ။ ဘာကြောင့်လဲ။
၁၂ လက်တွေ့ကျပါ။ လုပ်ချင်တာအားလုံး လိုက်လုပ်ဖို့ ကျွန်တော်တို့မှာ အချိန်၊ ဥစ္စာ၊ ခွန်အား မရှိကြဘူး။ ဒါကြောင့် လက်တွေ့ကျပါ။ အကျိုးသင့်အကြောင်းသင့်ရှိပါ။ မပြည့်မီနိုင်တဲ့ ဆုံးဖြတ်ချက်တွေကို ပြန်ပြင်ဖို့ လိုနိုင်တယ်။ (ဒေ. ၃:၆) ဆုံးဖြတ်ချက်ကို ပြန်သုံးသပ်၊ ပြန်ပြုပြင်ပြီးနောက် အဲဒီအတိုင်း လုပ်နိုင်မယ်လို့ ခံစားရတယ် ဆိုပါစို့။ ဆုံးဖြတ်တဲ့အတိုင်း ပြီးစီးအောင်လုပ်နိုင်ဖို့ ကူညီပေးမယ့် အချက်ငါးချက်ကို သုံးသပ်ကြည့်ပါ။
ဆုံးဖြတ်ချက်အတိုင်း လုပ်စေနိုင်တဲ့ အချက်များ
၁၃။ ဆုံးဖြတ်ချက်အတိုင်း လုပ်ဆောင်နိုင်စွမ်း ရှိဖို့ ဘာလုပ်ရမလဲ။
၁၃ လုပ်ဆောင်နိုင်စွမ်း ရှိဖို့ ဆုတောင်းပါ။ ဆုံးဖြတ်တဲ့အတိုင်း လုပ်နိုင်ဖို့ “လုပ်ဆောင်နိုင်စွမ်းကို” ဘုရားသခင် ပေးနိုင်တယ်။ (ဖိ. ၂:၁၃) ဒါကြောင့် သန့်ရှင်းသော စွမ်းအားတော်ကနေ ခွန်အားရဖို့ ယေဟောဝါဆီ ဆုတောင်းပါ။ အဖြေ ရဖို့ ကြန့်ကြာနေပုံပေါက်ရင်တောင် ဆက်ဆုတောင်းပါ။ “တောင်းမြဲတောင်းပါ၊ [သန့်ရှင်းသော စွမ်းအားတော်] ရလိမ့်မယ်” လို့ ယေရှု ပြောတယ်။—လု. ၁၁:၉၊ ၁၃။
၁၄။ ပညာအလိမ္မာ ၂၁:၅ မှာပါတဲ့ ကျမ်းစာမူက ဆုံးဖြတ်တဲ့အတိုင်း လုပ်ဖို့ ဘယ်လို ကူညီပေးသလဲ။
၁၄ ဇယားဆွဲပါ။ (ပညာအလိမ္မာ ၂၁:၅ ကိုဖတ်ပါ။) လုပ်ငန်းတစ်ခုခုကို အပြီးသတ်နိုင်ဖို့ ဇယား ရှိရမယ်၊ ဇယားအတိုင်း လုပ်ရမယ်။ အလားတူပဲ၊ ဆုံးဖြတ်ချက် ချပြီးပြီဆိုရင် သတ်သတ်မှတ်မှတ် လုပ်ရမယ့် အချက်တွေကို စာရင်းလုပ်ပါ။ လုပ်စရာ သိပ်များလွန်းရင် တစ်ခုချင်းစီ ခွဲလုပ်ဖို့ စီစဉ်ပါ။ ပေါလုက သူရောက်လာမှ အလှူငွေ ကောက်တာမျိုး မဖြစ်အောင် “သီတင်းပတ်ရဲ့ ပထမနေ့တိုင်း” အလှူငွေကို သီးသန့်ဖယ်ထားဖို့ ကောရိန္သုအသင်းတော်ကို တိုက်တွန်းတယ်။ (၁ ကော. ၁၆:၂) လုပ်စရာတွေကို တစ်ခုချင်းစီ ခွဲလုပ်ဖို့ စီစဉ်ထားရင် မပြီးမှာ စိုးရိမ်စရာ မလိုတော့ဘူး။
၁၅။ ဇယား ဆွဲပြီးနောက် ဘာလုပ်နိုင်သလဲ။
၁၅ ဇယားကို ရှင်းရှင်းလင်းလင်း ချရေးထားရင် ဆုံးဖြတ်တဲ့အတိုင်း လုပ်ဖို့ လွယ်ကူစေတယ်။ (၁ ကော. ၁၄:၄၀) ဥပမာ၊ အကြီးအကဲအဖွဲ့ရဲ့ ဆုံးဖြတ်ချက်တိုင်းကို ရေးမှတ်ဖို့ အကြီးအကဲတစ်ယောက်ကို တာဝန်ပေးပါဆိုတဲ့ ညွှန်ကြားချက် ရှိတယ်။ ဆုံးဖြတ်ချက်အတိုင်း လုပ်ဖို့ ဘယ်သူ့ ကို တာဝန်ပေးထားတယ်၊ ဘယ်အချိန်မှာ ပြီးရမယ်ဆိုတဲ့ အချက်တွေကိုပါ သူ ရေးထားသင့်တယ်။ အဲဒီလိုလုပ်တဲ့ အကြီးအကဲတွေဟာ ပိုအောင်မြင်ကြတယ်။ (၁ ကော. ၉:၂၆) သင့်ရဲ့ နေ့စဉ်အလုပ်တွေကိုလည်း အဲဒီအတိုင်း စီစဉ်နိုင်တယ်။ ဥပမာ၊ နေ့စဉ် လုပ်ရမယ့်အရာတွေကို စာရင်းလုပ်ပါ။ ဦးစားပေးရမယ့်အရာကို ထိပ်မှာ ရေးပါ။ ဒါက ဆုံးဖြတ်ချက်အတိုင်း အချိန်တိုအတွင်း ပြီးစီးအောင် လုပ်ဖို့ ကူညီနိုင်တယ်။
၁၆။ ဆုံးဖြတ်ချက်အတိုင်း လုပ်နိုင်ဖို့ ဘာလုပ်ရမလဲ။ ဒီအချက်ကို ရောမ ၁၂:၁၁ က ဘယ်လို ထောက်ခံသလဲ။
၁၆ ကြိုးစားအားထုတ်ပါ။ ဇယားအတိုင်း အပြီးလုပ်နိုင်ဖို့ ကြိုးစားအားထုတ်ရမယ်။ (ရောမ ၁၂:၁၁ ကိုဖတ်ပါ။) သွန်သင်သူကောင်း ဖြစ်ဖို့ “အမြဲ ကြိုးစားလုပ်ဆောင်ပါ၊” “မဆုတ်မနစ် လုပ်ဆောင်ပါ” ဆိုပြီး တိမောသေကို ပေါလု ပြောတယ်။ အဲဒီအကြံပြုချက်ကို တခြားဘုရားရေးရာ ပန်းတိုင်တွေမှာလည်း ကျင့်သုံးနိုင်တယ်။—၁ တိ. ၄:၁၃၊ ၁၆။
၁၇။ ဆုံးဖြတ်တဲ့အတိုင်း လုပ်တဲ့အခါ ဧဖက် ၅:၁၅၊ ၁၆ ကို ဘယ်လို ကျင့်သုံးနိုင်သလဲ။
၁၇ အချိန်ကို ပညာရှိရှိ စီမံပါ။ (ဧဖက် ၅:၁၅၊ ၁၆ ကိုဖတ်ပါ။) ဆုံးဖြတ်တဲ့အတိုင်း လုပ်မယ့် အချိန်ကို သတ်မှတ်ပါ။ သတ်မှတ်ထားတဲ့အတိုင်း လုပ်ပါ။ အကောင်းဆုံး အချိန်ကို စောင့်မနေပါနဲ့။ အကောင်းဆုံး အချိန်ဆိုတာ ရှိချင်မှ ရှိမယ်။ (ဒေ. ၁၁:၄) အရေးမကြီးတာတွေနဲ့ အချိန်ကုန်သွားပြီး ပိုအရေးကြီးတာတွေအတွက် အချိန်နဲ့ ခွန်အား မရှိတော့တာမျိုး မဖြစ်အောင် ဂရုစိုက်ပါ။ (ဖိ. ၁:၁၀) ဖြစ်နိုင်ရင် အနှောင့်အယှက် သိပ်မရှိတဲ့ အချိန်ကို ရွေးပါ။ ကိုယ် အာရုံစိုက် လုပ်တော့မယ်ဆိုတာ တခြားသူတွေကို သိစေပါ။ ဖုန်းပိတ်ထားပါ။ အီးမေးလ်တွေ၊ လူမှုမီဒီယာတွေကို နောက်မှ ကြည့်ပါ။ *
၁၈-၁၉။ အတားအဆီးတွေ ကြုံတဲ့အခါ ဆုံးဖြတ်တဲ့အတိုင်း ဆက်လုပ်နိုင်ဖို့ ဘာက ကူညီပေးနိုင်သလဲ။
၁၈ အကျိုးရလဒ်ကို အာရုံစိုက်ပါ။ ဆုံးဖြတ်ချက်ရဲ့ အကျိုးရလဒ်ကို ခရီးစဉ်တစ်ခုရဲ့ အဆုံးနဲ့ နှိုင်းယှဉ်နိုင်တယ်။ ခရီးဆုံးပန်းတိုင် ရောက်ဖို့ဆိုရင် လမ်းပိတ်နေရင်တောင် လမ်းကြောင်းပြောင်းပြီး ဆက်သွားရမယ်။ အလားတူပဲ၊ ကိုယ့်ဆုံးဖြတ်ချက်ရဲ့ အကျိုးရလဒ်ကို အာရုံစိုက်မယ်ဆိုရင် အတားအဆီးတွေ ကြုံတဲ့အခါ အလွယ်တကူ လက်လျှော့မှာ မဟုတ်ဘူး။—ဂလ. ၆:၉။
၁၉ ဆုံးဖြတ်ချက်ကောင်း ချဖို့၊ အဲဒီအတိုင်း လုပ်ဖို့ မလွယ်ပါဘူး။ ဒါပေမဲ့ အစပြုထားတာကို ပြီးစီးအောင် လုပ်ဖို့ ဉာဏ်ပညာနဲ့ အစွမ်းခွန်အားကို ယေဟောဝါ ပေးနိုင်ပါတယ်။
သီချင်း ၆၅ တိုးတက်နေပါ
^ အပိုဒ်၊ 5 ဆုံးဖြတ်ချက်တချို့အတွက် နောင်တရဖူးသလား။ ဆုံးဖြတ်ချက်ကောင်း ချဖို့၊ ဆုံးဖြတ်ချက်အတိုင်း လုပ်ဖို့ တစ်ခါတလေ ခက်နေသလား။ ဒီစိန်ခေါ်ချက်တွေကို ကျော်လွှားနိုင်ဖို့၊ ကိုယ်စခဲ့တဲ့ အလုပ်ကို ပြီးစီးအောင်လုပ်နိုင်ဖို့ ဒီဆောင်းပါးက ကူညီပေးပါလိမ့်မယ်။
^ အပိုဒ်၊ 11 ကိုယ်ပိုင်ကျမ်းစာလေ့လာဖို့ စီစဉ်တဲ့အခါ jw.org® မှာပါတဲ့ “ကျမ်းစာဖတ်ရှုခြင်းအတွက် အစီစဉ်ဇယား” ကို သုံးနိုင်တယ်။
^ အပိုဒ်၊ 17 အချိန်ကို စီမံခြင်းနဲ့ပတ်သက်ပြီး ၂၀၁၀၊ ဧပြီလထုတ် နိုးလော့! မှာပါတဲ့ “အချိန် ပို၍ ရနည်း ၂၀” ဆောင်းပါးကို ကြည့်ပါ။