လေ့လာရန် ဆောင်းပါး ၄၈
“ရှေ့တည့်တည့်ကိုပဲ ကြည့်ပါ”
“ရှေ့တည့်တည့်ကိုပဲ ကြည့်ပါ။ ရှေ့တည့်တည့်ကိုပဲ စူးစိုက်ကြည့်ပါ။” —ပညာ. ၄:၂၅။
သီချင်း ၇၇ မှောင်မိုက်လောကထဲက အလင်း
အကြိုသုံးသပ်ချက် *
၁-၂။ ပညာအလိမ္မာ ၄:၂၅ မှာ ပါတဲ့ အကြံဉာဏ်ကို ဘယ်လို လိုက်နာနိုင်သလဲ။ ဥပမာပေးပါ။
ဒီအခြေအနေတွေကို မြင်ယောင်ကြည့်ပါ။ သက်ကြီး ခရစ်ယာန် ညီအစ်မတစ်ယောက် အရင်က ပျော်ရွှင်စရာ အချိန်တွေအကြောင်း တွေးနေတယ်။ အခုချိန်မှာ ဘဝက ပိုခက်လာပေမဲ့ ယေဟောဝါအတွက် တတ်နိုင်သလောက် ဆက်အမှုဆောင်နေတယ်။ (၁ ကော. ၁၅:၅၈) ကမ္ဘာသစ်မှာ ချစ်ရသူတွေနဲ့အတူ နေထိုင်နေတယ်လို့ နေ့တိုင်း မြင်ယောင်ကြည့်တယ်။ နောက်ညီအစ်မက ယုံကြည်သူချင်း တစ်ယောက်ကြောင့် စိတ်ထိခိုက်ခဲ့ရတာကို မှတ်မိနေပေမဲ့ စိတ်မနာကြည်းဖို့ ဆုံးဖြတ်လိုက်တယ်။ (ကော. ၃:၁၃) ညီအစ်ကိုတစ်ယောက်လည်း အတိတ်က လုပ်ခဲ့တဲ့ အမှားတွေကို သတိရပေမဲ့ အခုချိန်ကစပြီး သစ္စာရှိနေဖို့ကိုပဲ အာရုံစိုက်တယ်။—ဆာ. ၅၁:၁၀။
၂ ဒီခရစ်ယာန် သုံးယောက်မှာ ဘာတူညီချက် ရှိသလဲ။ သူတို့အားလုံး အတိတ်ကို သတိရပေမဲ့ အတိတ်မှာပဲ တဝဲလည်လည် ဖြစ်မနေဘူး။ “ရှေ့တည့်တည့်ကိုပဲ ကြည့်” ကြတယ်။—ပညာအလိမ္မာ ၄:၂၅ ကိုဖတ်ပါ။
၃။ “ရှေ့တည့်တည့်ကိုပဲ ကြည့်” ဖို့ ဘာကြောင့် အရေးကြီးသလဲ။
၃ “ရှေ့တည့်တည့်ကိုပဲ ကြည့်” ဖို့ ဘာကြောင့် အရေးကြီးသလဲ။ နောက်ကိုပဲ တစ်ချိန်လုံး ကြည့်နေမယ်ဆိုရင် လမ်းကို ဖြောင့်အောင် လျှောက်နိုင်မှာ မဟုတ်သလို အတိတ်ကိုပဲ တစ်ချိန်လုံး တွေးနေမယ်ဆိုရင် ယေဟောဝါရဲ့ အမှုတော်မှာ ရှေ့ဆက်နိုင်တော့မှာ မဟုတ်ဘူး။—လု. ၉:၆၂။
၄။ ဒီဆောင်းပါးမှာ ဘာအကြောင်း ဆွေးနွေးမလဲ။
၄ အတိတ်မှာပဲ တဝဲလည်လည် ဖြစ်စေနိုင်တဲ့ ထောင်ချောက် သုံးခုအကြောင်း ဒီဆောင်းပါးမှာ ဆွေးနွေးပါမယ်။ * (၁) အတိတ်ကို တသသ ဖြစ်နေခြင်း၊ (၂) စိတ်နာကြည်းနေခြင်း၊ (၃) အပြစ်ရှိတယ်လို့ အလွန်အကျွံ ခံစားနေရခြင်းတို့ ဖြစ်တယ်။ “နောက်မှာ ချန်ရစ်ခဲ့တာတွေကို” မဟုတ်ဘဲ “ရှေ့မှာ ရှိတာတွေကို” အာရုံစိုက်ဖို့ ကျမ်းစာမူတွေက ဘယ်လို ကူညီပေးနိုင်ကြောင်း သိရပါမယ်။—ဖိ. ၃:၁၃။
အတိတ်ကို တသသ ဖြစ်နေခြင်း ထောင်ချောက်
အနာဂတ်ကို အာရုံမစိုက်နိုင်အောင် ဘာတွေက အတားအဆီး ဖြစ်စေနိုင်သလဲ (စာပိုဒ် ၅၊ ၉၊ ၁၃ ကိုကြည့်ပါ) *
၅။ ဒေသနာ ၇:၁၀ မှာ ဘယ်ထောင်ချောက်အကြောင်း သတိပေးထားသလဲ။
၅ ဒေသနာ ၇:၁၀ ကိုဖတ်ပါ။ “အရင်ခေတ်က ကောင်းလိုက်တာ” လို့ ပြောတာ မှားတယ်ဆိုပြီး ဒီကျမ်းချက်က မပြောဘူး။ အမှတ်တရကောင်းတွေဟာ ယေဟောဝါဆီက လက်ဆောင်ပါ။ “‘အရင်ခေတ်က အခုခေတ်ထက် ပိုကောင်းတယ်’ လို့ မပြောပါနဲ့” ဆိုပြီး အဲဒီအခန်းငယ်က ပြောနေတာ။ တစ်နည်းအားဖြင့် လက်ရှိ အခြေအနေကို အရင် အခြေအနေနဲ့ နှိုင်းယှဉ်တာ၊ အခုချိန်မှာ ဘာမဆို ပိုဆိုးလာတာချည်းပဲလို့ တွေးတာဟာ ထောင်ချောက်ပဲ။
အီဂျစ်ပြည်ကနေ ထွက်လာပြီးနောက် အစ္စရေးတွေ ဘာအမှား လုပ်သလဲ (စာပိုဒ် ၆ ကိုကြည့်ပါ)
၆။ လက်ရှိထက် အတိတ်က ပိုကောင်းတယ်လို့ တွေးတာ ဘာကြောင့် ပညာမဲ့ရာ ရောက်သလဲ။ ဥပမာပေးပါ။
၆ လက်ရှိထက် အတိတ်က ပိုကောင်းတယ်လို့ တွေးတာ ဘာကြောင့် ပညာမဲ့ရာ ရောက်သလဲ။ အတိတ်ကို တသသ ဖြစ်နေခြင်းက ကောင်းတာတွေကိုပဲ မှတ်မိနေစေပြီး ကြုံခဲ့ရတဲ့ အခက်အခဲတွေကိုတော့ မေ့သွားစေတယ်။ ရှေးအစ္စရေးလူမျိုးအကြောင်း သုံးသပ်ကြည့်ပါ။ အီဂျစ်ပြည်ကနေ ထွက်လာပြီးနောက် ဘဝ ဘယ်လောက် ကြမ်းခဲ့တယ်ဆိုတာ ချက်ချင်း မေ့သွားပြီး အစားအသောက် ကောင်းခဲ့တာကိုပဲ မှတ်မိနေတယ်။ “အီဂျစ်ပြည်မှာ အလကား စားခဲ့ရတဲ့ ငါး၊ သခွားသီး၊ ဖရဲသီး၊ ကြက်သွန်မြိတ်၊ ကြက်သွန်နီ၊ ကြက်သွန်ဖြူတွေကို သတိရလိုက်တာ” လို့ ပြောကြတယ်။ (တော. ၁၁:၅) တကယ်ပဲ “အလကား” စားခဲ့ရတာလား။ မဟုတ်ပါဘူး။ ကျွန်အဖြစ် မညှာမတာ ခိုင်းစေခံရပြီး အကြီးအကျယ် ပေးဆက်ခဲ့ရတာ။ (ထွ. ၁:၁၃၊ ၁၄။ ၃:၆-၉) ဒါတောင် အခက်အခဲတွေကို မေ့ပြီး အဲဒီဘဝကို ပြန်တမ်းတနေကြတယ်။ သူတို့အတွက် ယေဟောဝါ လုပ်ပေးခဲ့တာတွေကို အာရုံစိုက်မယ့်အစား အတိတ်က ကောင်းစားခဲ့တာကိုပဲ အာရုံစိုက်ကြတယ်။ သူတို့ရဲ့ သဘောထားကို ယေဟောဝါ မနှစ်သက်ဘူး။—တော. ၁၁:၁၀။
၇။ အတိတ်ကို တသသ ဖြစ်နေခြင်း ထောင်ချောက်ကို ရှောင်ဖို့ ညီအစ်မတစ်ယောက်ကို ဘာက ကူညီပေးသလဲ။
၇ အတိတ်ကို တသသ ဖြစ်နေခြင်း ထောင်ချောက်ကို
ဘယ်လို ရှောင်နိုင်သလဲ။ ၁၉၄၅ တုန်းက ဘရွတ်ကလင် ဗေသလမှာ စအမှုဆောင်ခဲ့တဲ့ ညီအစ်မ တစ်ယောက်အကြောင်း စဉ်းစားကြည့်ပါ။ နှစ်အနည်းငယ် ကြာပြီးနောက် ဗေသလအိမ်သားတစ်ယောက်နဲ့ အိမ်ထောင်ပြုတယ်။ နှစ်ပေါင်းများစွာ ဗေသလမှာ အတူ အမှုဆောင်ကြတယ်။ ဒါပေမဲ့ ၁၉၇၆ မှာ ခင်ပွန်းဖြစ်သူ မကျန်းမမာ ဖြစ်လာတယ်။ သေရတော့မယ်ဆိုတာ သိတဲ့အချိန်မှာ ခင်ပွန်းက ဇနီးဖြစ်သူ မုဆိုးမဘဝကို ရင်ဆိုင်နိုင်ဖို့ ပြင်ဆင်ပေးခဲ့တယ်။ “ငါတို့ဟာ ပျော်ရွှင်ချမ်းမြေ့တဲ့ အိမ်ထောင်သည်ဘဝကို ပိုင်ဆိုင်ခဲ့ကြတယ်။ အဲဒီဘဝကို လူအများ မခံစားကြရဘူး” လို့ ပြောတယ်။ “မင်းရဲ့ မှတ်ဉာဏ်တွေထဲမှာ ပြန်ပေါ်လာမှာ ဖြစ်ပေမဲ့ အတိတ်အတွက် အသက်မရှင်နဲ့။ အချိန်က မင်းကို ကုစားပေးသွားလိမ့်မယ်။ မနာကြည်းနဲ့၊ ကိုယ့်ကိုယ်ကိုယ် သနားမနေနဲ့။ မင်းဆီမှာ ဒီရွှင်လန်းမှုတွေ၊ ကောင်းချီးတွေ ရှိတာကို ဝမ်းသာပါ။ . . . မှတ်ဉာဏ်တွေဟာ ဘုရားသခင် ပေးတဲ့ ဆုကျေးဇူး ဖြစ်တယ်” လို့လည်း အားပေးတယ်။ သိပ်ကောင်းတဲ့ အကြံဉာဏ်ပဲ မဟုတ်လား။၈။ အတိတ်မှာ တဝဲလည်လည် ဖြစ်မနေတဲ့အတွက် ညီအစ်မ ဘယ်လို အကျိုးရသလဲ။
၈ ခင်ပွန်းရဲ့ အကြံဉာဏ်ကို ညီအစ်မ လိုက်နာတယ်။ အသက် ၉၂ နှစ်မှာ သေဆုံးတဲ့အထိ သစ္စာရှိရှိ အမှုဆောင်ခဲ့တယ်။ “ယေဟောဝါရဲ့ အမှုတော်ကို ၆၃ နှစ်ကျော် အချိန်ပြည့် လုပ်ဆောင်ခဲ့တာကို ပြန်ပြောင်းကြည့်ရင် ကျွန်မရဲ့ ဘဝဟာ တကယ့်ကို အားရကျေနပ်စရာကောင်းတယ်လို့ ပြောနိုင်ပါတယ်” ဆိုပြီး မသေဆုံးခင် နှစ်အနည်းငယ်မှာ ညီအစ်မ ပြောတယ်။ “ဘဝကို အမှန်တကယ် ကျေနပ်အားရစေတာကတော့ ကျွန်မတို့ရဲ့ ညီအစ်ကို/မတွေနဲ့အတူ ပရဒိသု မြေကြီးပေါ်မှာ နေထိုင်ပြီး ကျွန်မတို့ရဲ့ မဟာဖန်ဆင်းရှင်၊ တစ်ဆူတည်းသော စစ်မှန်တဲ့ ဘုရားသခင် ယေဟောဝါရဲ့ အမှုတော်ကို ထာဝစဉ် အမြဲ ထမ်းဆောင်သွားမယ်ဆိုတဲ့ မျှော်လင့်ချက်နဲ့ ထူးမြတ်လှတဲ့ ညီအစ်ကို အသင်းအပင်းပဲ ဖြစ်ပါတယ်” လို့ ဆက်ပြောတယ်။ * ရှေ့တည့်တည့်ကိုပဲ ကြည့်ခဲ့တဲ့ ဒီညီအစ်မဆီကနေ ကျွန်တော်တို့ များစွာ သင်ယူနိုင်ပါတယ်။
စိတ်နာကြည်းနေခြင်း ထောင်ချောက်
၉။ ဝတ်ပြုရာ ၁၉:၁၈ အရ အထူးသဖြင့် ဘယ်အချိန်မှာ ခွင့်လွှတ်ဖို့ ခက်နိုင်သလဲ။
၉ ဝတ်ပြုရာ ၁၉:၁၈ ကိုဖတ်ပါ။ ကိုယ့်အပေါ် အမှားလုပ်တဲ့သူဟာ ယုံကြည်သူ၊ မိတ်ဆွေ၊ ဆွေမျိုး ဖြစ်နေတယ်ဆိုရင် ခွင့်လွှတ်ဖို့ ခက်တတ်တယ်။ ဥပမာ၊ ညီအစ်မတစ်ယောက်ကို နောက်ညီအစ်မတစ်ယောက်က ပိုက်ဆံခိုးတယ်ဆိုပြီး စွပ်စွဲတယ်။ နောက်ပိုင်း၊ စွပ်စွဲတဲ့ ညီအစ်မ ပြန်တောင်းပန်ပေမဲ့ စွပ်စွဲခံရတဲ့ ညီအစ်မက ဖြစ်ခဲ့တာကို မမေ့နိုင်ဘူး ဖြစ်နေတယ်။ သင်ကော အဲဒီလို ကြုံဖူးသလား။ အဲဒီလို တစ်ထပ်တည်း မကြုံဖူးရင်တောင် ကျွန်တော်တို့ အများစုဟာ တစ်ယောက်ယောက်ကို စိတ်နာကြည်းနေပြီး ဘယ်တော့မှ ခွင့်လွှတ်နိုင်မှာ မဟုတ်ဘူးလို့ ခံစားရတာမျိုး ရှိနိုင်တယ်။
၁၀။ စိတ်နာကြည်းခြင်းကို ကျော်လွှားဖို့ ဘာက အကူအညီ ဖြစ်စေနိုင်သလဲ။
၁၀ စိတ်နာကြည်းခြင်းကို ကျော်လွှားဖို့ ဘာက အကူအညီ ဖြစ်စေနိုင်သလဲ။ တစ်ချက်ကတော့ အရာအားလုံးကို ယေဟောဝါ မြင်ကြောင်း သတိရခြင်းပါပဲ။ မတရားမှု အပါအဝင် ကျွန်တော်တို့ ကြုံရတဲ့ အရာအားလုံးကို ဘုရား သိတယ်။ (ဟီ. ၄:၁၃) ကျွန်တော်တို့ နာကျင်ခံစားရတဲ့အခါ ဘုရားလည်း ထပ်တူ ခံစားရတယ်။ (ဟေရှာ. ၆၃:၉) မတရားမှုတွေကြောင့် ဖြစ်ပေါ်လာတဲ့ နာကျင်မှု မှန်သမျှကို ဖယ်ရှားပေးမယ်လို့လည်း ကတိပြုထားတယ်။—ဗျာ. ၂၁:၃၊ ၄။
၁၁။ တခြားသူတွေကို ခွင့်လွှတ်တဲ့အခါ ဘာအကျိုးရသလဲ။
၁၁ တခြားသူတွေကို ခွင့်လွှတ်တဲ့အခါ ကိုယ်တိုင်လည်း အကျိုးရတယ်ဆိုတာ သတိရပါ။ ဒီအချက်ကို စွပ်စွဲခံရတဲ့ ညီအစ်မ သတိရပြီး ခွင့်လွှတ်နိုင်ခဲ့တယ်။ တခြားသူတွေကို ခွင့်လွှတ်ရင် ကိုယ့်ကိုလည်း ယေဟောဝါ ခွင့်လွှတ်မယ်ဆိုတာ ညီအစ်မ သိတယ်။ (မ. ၆:၁၄) တစ်ဖက် ညီအစ်မ မှားမှန်း သိတယ်။ ဒါပေမဲ့ ခွင့်လွှတ်ဖို့ ဆုံးဖြတ်လိုက်တယ်။ ဒါကြောင့် ပိုပျော်လာပြီး ယေဟောဝါရဲ့ အမှုတော်ကို ပိုအာရုံစိုက်လာနိုင်တယ်။
အပြစ်ရှိတယ်လို့ အလွန်အကျွံ ခံစားနေရခြင်း ထောင်ချောက်
၁၂။ ၁ ယောဟန် ၃:၁၉၊ ၂၀ ကနေ ဘာသိရသလဲ။
၁၂ ၁ ယောဟန် ၃:၁၉၊ ၂၀ ကိုဖတ်ပါ။ ကျွန်တော်တို့အားလုံး အပြစ်ရှိတယ်လို့ ခံစားဖူးကြတယ်။ ဥပမာ၊ တချို့က အမှန်တရား မသိခင် လုပ်ခဲ့တဲ့ အမှားတွေကြောင့်၊ တချို့ကျတော့ နှစ်ခြင်းခံပြီးနောက် လုပ်ခဲ့တဲ့ အမှားတွေကြောင့် အပြစ်ရှိတယ်လို့ ခံစားနေရတယ်။ ဒါ သဘာဝပါပဲ။ (ရော. ၃:၂၃) ကျွန်တော်တို့အားလုံး မှန်တာ လုပ်ချင်ပေမဲ့ “ခဏခဏ မှားတတ်ကြတယ်။” (ယာ. ၃:၂။ ရော. ၇:၂၁-၂၃) အပြစ်ရှိတယ်ဆိုတဲ့ ခံစားချက်ဟာ နှစ်မြို့စရာ မဟုတ်ပေမဲ့ အကျိုးပြုနိုင်တယ်။ ကိုယ့်လမ်းစဉ်ကို ပြုပြင်ဖို့၊ အမှားတွေ ထပ်မလုပ်မိအောင် စိတ်ပိုင်းဖြတ်ထားဖို့ လှုံ့ဆော်ပေးလို့ပါပဲ။—ဟီ. ၁၂:၁၂၊ ၁၃။
၁၃။ အပြစ်ရှိတယ်လို့ အလွန်အကျွံ ခံစားနေရခြင်း ထောင်ချောက်ကို ဘာကြောင့် သတိထားရမလဲ။
၁၃ ဒါပေမဲ့ ကျွန်တော်တို့ နောင်တယူပြီးနောက်၊ ယေဟောဝါ ခွင့်လွှတ်ပြီးနောက်မှာတောင် အပြစ်ရှိတုန်းပဲလို့ အလွန်အကျွံ ခံစားနေရနိုင်တယ်။ အဲဒါကတော့ အန္တရာယ် ရှိတယ်။ (ဆာ. ၃၁:၁၀။ ၃၈:၃၊ ၄) ဘာကြောင့်လဲ။ အတိတ်က အမှားတွေကြောင့် အပြစ်ရှိနေတုန်းပဲလို့ ခံစားရတဲ့ ညီအစ်မတစ်ယောက်အကြောင်း စဉ်းစားကြည့်ပါ။ “ဘယ်နည်းနဲ့မဆို ကျွန်မအတွက် သိပ်နောက်ကျသွားပုံရတဲ့အတွက်ကြောင့် ယေဟောဝါရဲ့ လုပ်ငန်းတော်မှာ ကျွန်မ ဘာမှ မလုပ်တာပဲ ကောင်းမှာပါလို့ ခံစားခဲ့ရပါတယ်” ဆိုပြီး ညီအစ်မ ပြောတယ်။ လူများစွာ အဲဒီလို ခံစားရတယ်။ ဒါပေမဲ့ အပြစ်ရှိတယ်လို့ အလွန်အကျွံ ခံစားနေရခြင်း ထောင်ချောက်ကို သတိထားရမယ်။ ကျွန်တော်တို့ကို ယေဟောဝါတောင် လက်မလျှော့တာ ကိုယ့်ကိုယ်ကိုယ် လက်လျှော့လိုက်ရင် စာတန် သိပ်ပျော်မှာ။—၂ ကောရိန္သု ၂:၅-၇၊ ၁၁ နဲ့နှိုင်းယှဉ်ပါ။
၁၄။ သင့်ကို ယေဟောဝါ လက်မလျှော့ဘူးဆိုတာ ဘယ်လို သိနိုင်သလဲ။
၁၄ ‘ကိုယ့်ကို ယေဟောဝါ လက်မလျှော့ဘူးဆိုတာ ဘယ်လို *
သိနိုင်သလဲ’ လို့ တချို့ တွေးမိမယ်။ အဲဒီလို တွေးမိတာကိုက သင့်ကို ယေဟောဝါ လက်မလျှော့ဘူးဆိုတဲ့ အဓိပ္ပာယ်ပဲ။ “ကိုယ်ထင်တာထက် ပိုအမြစ်စွဲနေတဲ့ ဘဝလမ်းစဉ်ဟောင်းရဲ့ အကျင့်ဆိုးတွေကြောင့် အကြိမ်ကြိမ် တိုက်မိလဲပြီး ကျရှုံးမိနိုင်တယ်။ . . . ဒါပေမဲ့ စိတ်မပျက်ပါနဲ့။ ခွင့်မလွှတ်နိုင်တဲ့ အပြစ် ကျူးလွန်လိုက်ပြီလို့ မတွေးပါနဲ့။ စာတန် အဲဒီလိုပဲ ထင်စေချင်တယ်။ ယူကျုံးမရ ဖြစ်ပြီး စိတ်အနှောင့်အယှက် ဖြစ်နေတာကိုက သင့်အခြေအနေ သိပ်မဆိုးသေးဘူးဆိုတဲ့ သက်သေပဲ။ ဘုရားဆီ နှိမ့်ချစွာ၊ စိတ်အားထက်သန်စွာ ပြန်လှည့်လာပါ။ ဘုရားရဲ့ ခွင့်လွှတ်မှု၊ ဆေးကြောသန့်စင်ပေးမှုနဲ့ အကူအညီ ရဖို့ ကြိုးစားပါ။ အမှားတစ်ခုကို ဘယ်နှစ်ကြိမ်ပဲ လုပ်မိပါစေ ဒုက္ခရောက်ချိန်မှာ ဖခင်ဆီ ပြေးသွားတဲ့ ကလေးတစ်ယောက်လို ဘုရားဆီ ချဉ်းကပ်ပါ။ မဟာကရုဏာရှင် ယေဟောဝါ လိုလိုလားလား ကူညီပေးပါလိမ့်မယ်” လို့ ကင်းမျှော်စင် တစ်စောင်မှာ ဖော်ပြတယ်။၁၅-၁၆။ ကိုယ့်ကို ယေဟောဝါ လက်မလျှော့ဘူးဆိုတာ သိရလို့ တချို့ ဘယ်လို ခံစားရသလဲ။
၁၅ မိမိကို ယေဟောဝါ လက်မလျှော့ဘူးဆိုတာ သိရလို့ ဘုရားကျေးကျွန်များစွာ စိတ်သက်သာရာ ရကြတယ်။ ဥပမာ၊ “သမ္မာကျမ်းစာက ဘဝပုံစံကို ပြောင်းလဲပေးနိုင်” ဆောင်းပါးတွဲတစ်ခုမှာ ညီအစ်မတစ်ယောက်က အတိတ်တုန်းက အမှားလုပ်ခဲ့ဖူးလို့ သူ့ကို ယေဟောဝါ ချစ်တယ်ဆိုတာ လက်ခံဖို့ ခက်နေတယ်။ နှစ်ခြင်းခံပြီးနောက် နှစ်ပေါင်းများစွာ ကြာတဲ့အထိ အဲဒီလို ခံစားနေရတုန်းပဲ။ ဒါပေမဲ့ ရွေးဖိုးအကြောင်း စဉ်းစားလိုက်တဲ့အခါ ကိုယ့်ကို ယေဟောဝါ ဘယ်လောက် ချစ်မှန်း သဘောပေါက်လာတယ်။ *
၁၆ အဲဒီတွေ့ကြုံမှုကနေ ညီအစ်ကိုတစ်ယောက် ဘယ်လို အကူအညီ ရသလဲ။ “ကျွန်တော် ငယ်ငယ်တုန်းက ညစ်ညမ်းတဲ့ ရုပ်ပုံစာပေတွေ၊ ရုပ်ရှင်တွေ ကြည့်တဲ့ အကျင့် ရှိခဲ့တယ်။ သိပ်မကြာခင်တုန်းက အဲဒီအရာတွေကို ကျွန်တော် ပြန်ကြည့်မိတယ်။ ဒါနဲ့ ခရစ်ယာန် အကြီးအကဲတွေရဲ့ အကူအညီကို ရယူလိုက်တယ်၊ နောက်ပိုင်း ကျွန်တော့်အခြေအနေ တဖြည်းဖြည်း တိုးတက်လာတယ်။ အကြီးအကဲတွေက ဘုရားသခင် ကျွန်တော့်ကို ချစ်တယ်၊ ကြင်နာထောက်ထားတယ်ဆိုတာကို စိတ်ချစေတယ်။ ဒါပေမဲ့ တစ်ခါတလေ ငါဟာ တန်ဖိုးမရှိတဲ့သူပါ၊ ဘုရားသခင် ငါ့ကို ချစ်မှာ မဟုတ်ပါဘူးဆိုပြီး ခံစားနေရတုန်းပဲ။ [အဲဒီညီအစ်မ] ရဲ့ အကြောင်းက ကျွန်တော့်အတွက် အရမ်း အထောက်အကူ
ရတယ်။ ဘုရားသခင် ကျွန်တော့်ကို ခွင့်လွှတ်မှာ မဟုတ်ပါဘူးလို့ ယူဆတာက ဘုရားသခင့် သားတော် ပေးဆက်တဲ့အရာက ကျွန်တော့်အပြစ်တွေကို မဖုံးအုပ်ပေးနိုင်ဘူးလို့ ပြောတာနဲ့ အတူတူပဲဆိုတာ အခု နားလည်သွားပါပြီ။ အဲဒီဆောင်းပါးကို ကျွန်တော် ညှပ်ယူထားလိုက်တယ်။ ဒါမှ ငါဟာ တန်ဖိုးမရှိဘူးဆိုတဲ့ အတွေးဝင်လာတဲ့အခါတိုင်း [အဲဒီညီအစ်မ] အကြောင်းကို ပြန်ဖတ်ပြီး စဉ်းစားဆင်ခြင်နိုင်မယ်” လို့ ပြောတယ်။၁၇။ အပြစ်ရှိတယ်လို့ အလွန်အကျွံ ခံစားနေရခြင်း ထောင်ချောက်ကို တမန်တော် ပေါလု ဘယ်လို ရှောင်ခဲ့သလဲ။
၁၇ အဲဒီလို တွေ့ကြုံမှုတွေက တမန်တော် ပေါလုအကြောင်း သတိရစေတယ်။ ပေါလုဟာ ခရစ်ယာန် ဖြစ်မလာခင် ကြီးလေးတဲ့ အပြစ်တွေ ကျူးလွန်တယ်။ လုပ်ခဲ့တဲ့ အမှားတွေကို သတိရပေမဲ့ အတိတ်မှာပဲ တဝဲလည်လည် ဖြစ်မနေဘူး။ (၁ တိ. ၁:၁၂-၁၅) ရွေးဖိုးကို မိမိအတွက် ယေဟောဝါ ပြင်ဆင်ပေးတဲ့ လက်ဆောင်အဖြစ် ရှုမြင်တယ်။ (ဂလ. ၂:၂၀) အပြစ်ရှိတယ်လို့ အလွန်အကျွံ ခံစားမနေဘူး။ ရှေ့လျှောက် ယေဟောဝါကို အကောင်းဆုံး ပေးဆက်ဖို့ပဲ အာရုံစိုက်တယ်။
အနာဂတ်အတွက် အသက်ရှင်ပါ
ရှေ့တည့်တည့်ကိုပဲ ကြည့်ဖို့ စိတ်ပိုင်းဖြတ်ထားကြပါစို့ (စာပိုဒ် ၁၈-၁၉ ကိုကြည့်ပါ) *
၁၈။ ဒီဆောင်းပါးကနေ ဘာသိရသလဲ။
၁၈ ဒီဆောင်းပါးမှာ ဆွေးနွေးခဲ့တာတွေကနေ ဘာသိရသလဲ။ (၁) အမှတ်တရကောင်းတွေဟာ ယေဟောဝါဆီက လက်ဆောင် ဖြစ်တယ်။ ဒါပေမဲ့ အရင်က ကိုယ့်ဘဝအခြေအနေ ဘယ်လောက် ကောင်းကောင်း အနာဂတ် ကမ္ဘာသစ် အသက်တာလောက်တော့ မကောင်းနိုင်ဘူး။ (၂) တခြားသူတွေကြောင့် စိတ်ထိခိုက်မိနိုင်ပေမဲ့ ရှေ့ဆက်နိုင်ဖို့ဆိုရင် ခွင့်လွှတ်ရမယ်။ (၃) အပြစ်ရှိတယ်လို့ အလွန်အကျွံ ခံစားနေရခြင်းက ရွှင်လန်းတဲ့ စိတ်နဲ့ အမှုဆောင်ဖို့ အတားအဆီး ဖြစ်စေနိုင်တယ်။ ဒါကြောင့် ကျွန်တော်တို့ကို ယေဟောဝါ ခွင့်လွှတ်လိုက်ပြီဆိုတာ ပေါလုလို ယုံကြည်စိတ်ချနေရမယ်။
၁၉။ ကမ္ဘာသစ် ရောက်တဲ့အခါ အတိတ်ကို တွေးပြီး စိတ်မကောင်းဖြစ်ရတာမျိုး မရှိတော့ဘူးဆိုတာ ဘယ်လို သိရသလဲ။
၁၉ ကျွန်တော်တို့မှာ ထာဝစဉ် အသက်ရှင်ဖို့ အလားအလာ ရှိတယ်။ ကမ္ဘာသစ် ရောက်တဲ့အခါ အတိတ်ကို တွေးပြီး စိတ်မကောင်းဖြစ်ရတာမျိုး မရှိတော့ဘူး။ “အရင်တုန်းက ဖြစ်ခဲ့တာတွေကို သတိရတော့မှာ မဟုတ်ဘူး” လို့ ကျမ်းစာမှာ ပြောတယ်။ (ဟေရှာ. ၆၅:၁၇) ယေဟောဝါအတွက် အမှုဆောင်ရင်း တချို့ တဖြည်းဖြည်း အသက်ကြီးလာပြီ။ ဒါပေမဲ့ ကမ္ဘာသစ်မှာ ပြန်နုပျိုလာလိမ့်မယ်။ (ယောဘ ၃၃:၂၅) ဒါကြောင့် အတိတ်မှာပဲ တဝဲလည်လည် ဖြစ်မနေပါနဲ့။ ရှေ့တည့်တည့်ကိုပဲ ကြည့်ပြီး အနာဂတ်အတွက် အသက်ရှင်ပါ။
သီချင်း ၁၄၂ မျှော်လင့်ချက်ကို ကိုင်စွဲထားခြင်း
^ အပိုဒ်၊ 5 အတိတ်ကို သတိရတာ ကောင်းပါတယ်။ ဒါပေမဲ့ အတိတ်ကိုပဲ အာရုံစိုက်နေရင် လက်ရှိ လုပ်နိုင်တာတွေ၊ အနာဂတ်မှာ ဖြစ်လာမယ့်အရာတွေကို အာရုံမစိုက်နိုင်တော့ဘူး။ အတိတ်မှာပဲ တဝဲလည်လည် ဖြစ်စေနိုင်တဲ့ ထောင်ချောက် သုံးခုအကြောင်း ဒီဆောင်းပါးမှာ ဆွေးနွေးပါမယ်။ အဲဒီထောင်ချောက်တွေကို ရှောင်ဖို့ ကူညီပေးနိုင်တဲ့ ကျမ်းစာမူတွေနဲ့ ခေတ်သစ် ပုံနမူနာတွေကိုလည်း ဆွေးနွေးပါမယ်။
^ အပိုဒ်၊ 4 စကားလုံး ရှင်းလင်းချက်– ဒီဆောင်းပါးမှာ ပါတဲ့ “အတိတ်မှာပဲ တဝဲလည်လည် ဖြစ်နေတယ်” ဆိုတာ အရင်က အကြောင်းတွေကိုပဲ တစ်ချိန်လုံး ပြောနေတာ၊ စဉ်းစားနေတာ ဒါမှမဟုတ် အရင်တုန်းက ကိုယ့်ဘဝ ဘယ်လောက် ကောင်းခဲ့တယ် ဆိုတာကိုပဲ တွေးနေတာကို ဆိုလိုတယ်။
^ အပိုဒ်၊ 8 ၂၀၀၄၊ ဇူလိုင် ၁ ကင်းမျှော်စင် စာမျက်နှာ ၂၃-၂၉ ကို ကြည့်ပါ။
^ အပိုဒ်၊ 14 ၁၉၅၄၊ ဖေဖော်ဝါရီ ၁၅ ကင်းမျှော်စင် စာမျက်နှာ ၁၂၃ (အင်္ဂလိပ်) ကို ကြည့်ပါ။
^ အပိုဒ်၊ 15 ၂၀၁၁၊ ဩဂုတ် ၁ ကင်းမျှော်စင် စာမျက်နှာ ၂၀-၂၁ ကို ကြည့်ပါ။
^ အပိုဒ်၊ 59 ပုံအညွှန်း– အတိတ်ကို တသသ ဖြစ်နေခြင်း၊ စိတ်နာကြည်းနေခြင်း၊ အပြစ်ရှိတယ်လို့ အလွန်အကျွံ ခံစားနေရခြင်းဟာ လေးလံတဲ့ ဝန်ထုပ်နဲ့ တူပြီး အသက်လမ်းမှာ ရှေ့ဆက်ဖို့ အခက်တွေ့စေတယ်။
^ အပိုဒ်၊ 66 ပုံအညွှန်း– လေးလံတဲ့ ဝန်ထုပ်လို ခံစားချက်တွေကို ဖယ်ရှားလိုက်တဲ့အခါ ကျွန်တော်တို့ စိတ်သက်သာရာ ရပြီး ပျော်ရွှင်လာတယ်။ အားသစ်အင်သစ်တွေ ရှိလာတယ်။ ဒီလိုနဲ့ ရှေ့ဆက်နိုင်ပါလိမ့်မယ်။