လေ့လာရန် ဆောင်းပါး ၄၈
သစ္စာစောင့်သိမှု စမ်းသပ်ခံရတဲ့အခါ သတိရှိနေပါ
“အရာရာမှာ သတိရှိနေပါ။”—၂ တိ. ၄:၅။
သီချင်း ၁၂၃ ဘုရားအစီအစဉ်ကို လက်အောက်ခံခြင်း
အကြိုသုံးသပ်ချက် a
၁။ သတိရှိနေတယ်ဆိုတာ ဘာကို ဆိုလိုသလဲ။ (၂ တိမောသေ ၄:၅)
အခက်အခဲတွေ ကြုံရတဲ့အခါ ယေဟောဝါနဲ့ အဖွဲ့အစည်းအပေါ် ထားတဲ့ သစ္စာစောင့်သိမှု စမ်းသပ်ခံရနိုင်တယ်။ ဒီအခက်အခဲတွေကို ဘယ်လို ရင်ဆိုင်ကျော်ဖြတ်မလဲ။ သတိရှိနေရမယ်။ နိုးကြားနေရမယ်။ ယုံကြည်ခြင်း ခိုင်မြဲနေရမယ်။ (၂ တိမောသေ ၄:၅ ကို ဖတ်ပါ။) တည်တည်ငြိမ်ငြိမ် ရှိနေခြင်း၊ ရှင်းရှင်းလင်းလင်း စဉ်းစားတွေးခေါ်ခြင်း၊ ကိစ္စရပ်တွေကို ယေဟောဝါလို ရှုမြင်ခြင်းအားဖြင့် သတိရှိနေနိုင်မယ်။ ဒါဆိုရင် ကိုယ့်အတွေးတွေကို ခံစားချက်က လွှမ်းမိုးတော့မှာ မဟုတ်ဘူး။
၂။ ဒီဆောင်းပါးမှာ ဘာအကြောင်း ဆွေးနွေးကြမလဲ။
၂ အသင်းတော်ပြင်ပက လာနိုင်တဲ့ အခက်အခဲ သုံးခုအကြောင်း ရှေ့ဆောင်းပါးမှာ ဆွေးနွေးခဲ့ကြတယ်။ ယေဟောဝါအပေါ် သစ္စာစောင့်သိမှု စမ်းသပ်နိုင်တဲ့ အသင်းတော်ထဲက အခက်အခဲ သုံးခုအကြောင်း ဒီဆောင်းပါးမှာ ဆွေးနွေးပါမယ်။ (၁) ယုံကြည်သူချင်းတစ်ယောက် ကိုယ့်ကို မတရား ဆက်ဆံတဲ့အခါ၊ (၂) ဆုံးမခံရတဲ့အခါ၊ (၃) အဖွဲ့အစည်းရဲ့ ပြုပြင်ပြောင်းလဲမှုတွေကို လက်ခံရ ခက်နေတဲ့အခါ။ အဲဒီအခက်အခဲတွေ ကြုံရတဲ့အခါ ဘယ်လိုနည်းနဲ့ သတိရှိနေနိုင်မလဲ။ ယေဟောဝါနဲ့ အဖွဲ့အစည်းအပေါ် ဘယ်လို ဆက်သစ္စာစောင့်သိနိုင်မလဲ။
ညီအစ်ကို/မ တစ်ယောက် ကိုယ့်ကို မတရား ဆက်ဆံတဲ့အခါ
၃။ ညီအစ်ကို/မ တစ်ယောက်ယောက် မတရား ဆက်ဆံတဲ့အခါ ဘယ်လို တုံ့ပြန်မိနိုင်သလဲ။
၃ ညီအစ်ကို/မ တစ်ယောက်ယောက်၊ တာဝန်ရှိ ညီအစ်ကို တစ်ယောက်ယောက် မတရား ဆက်ဆံတာ ကြုံဖူးသလား။ သင့်ကို ထိခိုက်အောင်လုပ်ဖို့ ရည်ရွယ်ချင်မှ ရည်ရွယ်မယ်။ (ရော. ၃:၂၃။ ယာ. ၃:၂) ဒါပေမဲ့ သူ့လုပ်ရပ်ကြောင့် စိတ်ထိခိုက်မိနိုင်တယ်။ အဲဒီအကြောင်းပဲ စဉ်းစားပြီး အိပ်ရေးပျက်တာမျိုးတောင် ဖြစ်နိုင်တယ်။ ‘ညီအစ်ကိုတစ်ယောက် ဖြစ်ပြီး ဒီလိုလုပ်တာ ဘုရား အဖွဲ့အစည်းမှ ဟုတ်ရဲ့လား’ လို့ တွေးမိနိုင်တယ်။ အဲဒီအတိုင်း စာတန် တွေးစေချင်တယ်။ (၂ ကော. ၂:၁၁) ဒီလို အပျက်သဘော အတွေးတွေက ယေဟောဝါနဲ့ရော အဖွဲ့အစည်းနဲ့ပါ ဝေးကွာသွားစေနိုင်တယ်။ ဒါကြောင့် ညီအစ်ကို/မ တစ်ယောက်ယောက် ကိုယ့်ကို မတရား ဆက်ဆံတဲ့အခါ ဘယ်လိုနည်းနဲ့ သတိရှိနေနိုင်သလဲ။ အန္တရာယ်ရှိတဲ့ အတွေးအခေါ်တွေကို ဘယ်လို ရှောင်နိုင်သလဲ။
၄။ မတရား ဆက်ဆံခံရတဲ့အခါ ယောသပ် ဘယ်လို သတိရှိနေသလဲ။ ကျွန်တော်တို့ ဘာသင်ယူနိုင်သလဲ။ (ကမ္ဘာဦး ၅၀:၁၉-၂၁)
၄ နာကြည်းမနေပါနဲ့။ ယောသပ် ဆယ်ကျော်သက်အရွယ်မှာ အစ်ကိုတွေရဲ့ မတရား ဆက်ဆံတာခံရတယ်။ အစ်ကိုတွေက ယောသပ်ကို မုန်းပြီး တချို့ဆို သတ်တောင် သတ်ပစ်ချင်ကြတယ်။ (က. ၃၇:၄၊ ၁၈-၂၂) နောက်ဆုံး၊ ကျွန်အဖြစ် ရောင်းစားလိုက်ကြတယ်။ ဒါကြောင့် ၁၃ နှစ်လောက် ပြင်းထန်တဲ့ အခက်အခဲတွေ ယောသပ် ရင်ဆိုင်ခဲ့ရတယ်။ ယေဟောဝါ တကယ်မှ ချစ်ရဲ့လား၊ အကူအညီ လိုအပ်ချိန်မှာ စွန့်သွားပြီလားလို့ တွေးမိနိုင်တယ်။ ဒါပေမဲ့ ယောသပ် နာကြည်းမနေဘူး။ အဲဒီအစား တည်တည်ငြိမ်ငြိမ် ဆက်ရှိပြီး သတိရှိနေတယ်။ အခွင့်အရေး ရချိန်မှာတောင် အစ်ကိုတွေကို လက်စားမချေဘူး။ မေတ္တာပြတယ်။ ခွင့်လွှတ်ခဲ့တယ်။ (က. ၄၅:၄၊ ၅) အဲဒီလိုလုပ်နိုင်တာ ရှင်းရှင်းလင်းလင်း စဉ်းစားတွေးခေါ်နိုင်လို့ပဲ။ အခက်အခဲတွေကိုပဲ အာရုံစိုက်မယ့်အစား ယေဟောဝါရဲ့ ရည်ရွယ်ချက်ဖြစ်တဲ့ ကိစ္စရပ် တစ်ခုလုံးကို ခြုံငုံကြည့်လို့ပဲ။ (ကမ္ဘာဦး ၅၀:၁၉-၂၁ ကို ဖတ်ပါ။) ဘာသင်ခန်းစာ ရသလဲ။ ကျွန်တော်တို့လည်း မတရား ဆက်ဆံခံရတဲ့အခါ ယေဟောဝါကို မနာကြည်းပါနဲ့။ ဘုရား စွန့်သွားပြီလားလို့ မတွေးပါနဲ့။ အဲဒီအစား အခက်အခဲကို ခံရပ်ဖို့ ဘုရား ဘယ်လို ကူညီပေးတယ်ဆိုတာ တွေးတောဆင်ခြင်ပါ။ တခြားသူတွေ မတရား ဆက်ဆံတဲ့အခါ သူတို့ရဲ့ အပြစ်အနာအဆာတွေကို မေတ္တာနဲ့ ဖုံးအုပ်လိုက်ပါ။—၁ ပေ. ၄:၈။
၅။ မတရား ဆက်ဆံခံရချိန်မှာ မီကာ ဘယ်လို ဆက်သတိရှိနေသလဲ။
၅ တောင်အမေရိကမှာနေတဲ့ အကြီးအကဲ ညီအစ်ကို မီကာ b အကြောင်း စဉ်းစားကြည့်ပါ။ တာဝန်ရှိ ညီအစ်ကိုတွေ ကြမ်းကြမ်းတမ်းတမ်း ဆက်ဆံတာ ကြုံခဲ့ရဖူးတယ်။ “အဲဒီလောက် စိတ်ဖိစီးမှုမျိုး တစ်ခါမှ မကြုံဖူးဘူး။ တော်တော် စိုးရိမ် ထိတ်လန့်မိတယ်။ ညဘက်တွေဆို အိပ်မပျော်ဘူး။ ကူကယ်ရာမဲ့သလို ခံစားရပြီး ငိုမိတယ်” လို့ ပြောတယ်။ ဒါပေမဲ့ မီကာ ဆက်သတိရှိနေတယ်။ ခံစားချက်တွေကို ကြိုးစားထိန်းချုပ်တယ်။ သန့်ရှင်းသော စွမ်းအားတော် ပေးဖို့၊ ခံရပ်နိုင်စွမ်း ပေးဖို့ မခြားမလပ် ဆုတောင်းတယ်။ အကူအညီ ဖြစ်စေမယ့် အဖွဲ့အစည်း စာပေတွေ ရှာဖတ်တယ်။ ဘာသင်ခန်းစာ ရသလဲ။ ညီအစ်ကို/မ တစ်ယောက်ယောက် ကိုယ့်ကို မတရား ဆက်ဆံတယ်လို့ ခံစားရတဲ့အခါ တည်တည်ငြိမ်ငြိမ် ဆက်ရှိနေပါ။ အပျက်သဘော ခံစားချက်တွေကို ကြိုးစားထိန်းချုပ်ပါ။ ဘယ်လို အခြေအနေတွေကြောင့် သူ ပြောမိ၊ လုပ်မိတယ်ဆိုတာ မသိနိုင်ဘူး။ ဒါကြောင့် ကိစ္စရပ်တွေကို သူ့ဘက်ကနေ မြင်နိုင်အောင် ကူညီပေးဖို့ ယေဟောဝါဆီ ဆုတောင်းပါ။ ဒါဆိုရင် အဲဒီလူကို ဆက်သံသယဝင်နေတော့မှာ မဟုတ်ဘူး။ ထိခိုက်မှုကို ဗွေယူတော့မှာ မဟုတ်ဘူး။ (ပညာ. ၁၉:၁၁) သင့်အခြေအနေကို ယေဟောဝါ သိကြောင်း၊ ခံရပ်နိုင်စွမ်း ပေးမှာ ဖြစ်ကြောင်း သတိရပါ။—၂ ရာ. ၁၆:၉။ ဒေ. ၅:၈။
ဆုံးမခံရတဲ့အခါ
၆။ ကျွန်တော်တို့ကို ချစ်လို့ ယေဟောဝါ ဆုံးမတယ်ဆိုတာ နားလည်ဖို့ ဘာကြောင့် အရေးကြီးသလဲ။ (ဟီဘရူး ၁၂:၅၊ ၆၊ ၁၁)
၆ ဆုံးမခံရတဲ့အခါ နာကျင်ခံစားမိနိုင်တယ်။ ဒါပေမဲ့ နာကျင်ရတာကိုပဲ အာရုံစိုက်နေမယ်ဆိုရင် ဆုံးမမှုကို လျှော့ပေါ့တွေးမိနိုင်တယ်။ မတရားဘူး၊ ကြမ်းတမ်းလွန်းတယ်လို့တောင် ခံစားမိနိုင်တယ်။ ရလဒ်အနေနဲ့ ကျွန်တော်တို့ကို ချစ်လို့ ယေဟောဝါ ဆုံးမတယ်ဆိုတဲ့ အချက်ကို မေ့သွားနိုင်တယ်။ (ဟီဘရူး ၁၂:၅၊ ၆၊ ၁၁ ကို ဖတ်ပါ။) ကိုယ့်ခံစားချက်ကိုပဲ အာရုံစိုက်နေမယ်ဆိုရင် စာတန်ကို အမြတ်ထုတ်ခွင့် ပေးရာ ရောက်သွားမယ်။ စာတန်က ဆုံးမမှုကို ငြင်းပယ်စေချင်တယ်။ ယေဟောဝါနဲ့ရော အသင်းတော်နဲ့ ပါ ဝေးကွာသွားစေချင်တယ်။ သင် ဆုံးမခံရတယ်ဆိုရင် ဘယ်လိုနည်းနဲ့ ဆက်သတိရှိနိုင်သလဲ။
ဆုံးမမှုကို ပေတရု နှိမ့်ချစွာ လက်ခံလို့ ယေဟောဝါအတွက် ပိုအသုံးဝင်သူ ဖြစ်ခဲ့ (စာပိုဒ် ၇ ကို ကြည့်ပါ)
၇။ (က) ရုပ်ပုံမှာ ဖော်ပြထားတဲ့အတိုင်း ဆုံးမမှုကို ပေတရု လက်ခံပြီးနောက် ယေဟောဝါ ဘယ်လို ဆက်အသုံးပြုသလဲ။ (ခ) ပေတရုဆီကနေ ဘာသင်ယူရသလဲ။
၇ ဆုံးမမှုကို လက်ခံပါ။ လိုအပ်သလို ပြုပြင်ပြောင်းလဲပါ။ တခြားတမန်တော်တွေရှေ့မှာ ပေတရုကို ယေရှု တစ်ကြိမ်ထက်မက ဆုံးမပဲ့ပြင်ခဲ့တယ်။ (မာ. ၈:၃၃။ လု. ၂၂:၃၁-၃၄) ဒါကြောင့် ပေတရု အရှက်ရမိနိုင်တယ်။ ဒါပေမဲ့ ယေရှုအပေါ် ဆက်သစ္စာစောင့်သိတယ်။ ဆုံးမမှုကို လက်ခံတယ်။ အမှားတွေကနေ သင်ယူတယ်။ ပေတရုရဲ့ သစ္စာစောင့်သိမှုကို ယေဟောဝါ ဆုချတယ်။ အသင်းတော်မှာ တာဝန်ကြီးတွေ ပေးအပ်ခဲ့တယ်။ (ယော. ၂၁:၁၅-၁၇။ တ. ၁၀:၂၄-၃၃။ ၁ ပေ. ၁:၁) ပေတရုဆီကနေ ဘာသင်ယူနိုင်သလဲ။ ဆုံးမခံရလို့ နာကျင်ခံစားရတာကိုပဲ အာရုံစိုက်မယ့်အစား ဆုံးမမှုကို လက်ခံမယ်၊ လိုအပ်သလို ပြုပြင်ပြောင်းလဲမယ်ဆိုရင် ကိုယ်တိုင်ကော တခြားသူတွေပါ အကျိုးရမယ်။ ယေဟောဝါနဲ့ ညီအစ်ကို/မတွေအတွက် ပိုအသုံးဝင်လာမယ်။
၈-၉။ ဆုံးမခံရပြီးနောက် အစပိုင်းမှာ ဘာနာဒို ဘယ်လို ခံစားခဲ့ရသလဲ။ ဒါပေမဲ့ အတွေးအခေါ်ကို ပြုပြင်ဖို့ ဘာက ကူညီပေးသလဲ။
၈ မိုဇမ်ဘစ်နိုင်ငံက ညီအစ်ကို ဘာနာဒိုအကြောင်း စဉ်းစားကြည့်ပါ။ အကြီးအကဲအဖြစ်ကနေ ဖယ်ရှားခံရတဲ့အခါ အစပိုင်းမှာ ဘယ်လို ခံစားရသလဲ။ “ကိုယ်ရတဲ့ ဆုံးမမှုကို မကြိုက်လို့ စိတ်နာကြည်းမိတယ်” လို့ ပြောတယ်။ အသင်းတော်မှာ တခြားသူတွေ ဘယ်လို မြင်မလဲဆိုတာပဲ တွေးပူမိတယ်။ “အခြေအနေကို အမှန်အတိုင်း ရှုမြင်ဖို့၊ ယေဟောဝါနဲ့ အဖွဲ့အစည်းကို ပြန်ယုံကြည်စိတ်ချလာဖို့ လအတော်များများ ကြာခဲ့တယ်” လို့ ပြောတယ်။ အမြင်မှန်ရလာဖို့ ဘာနာဒိုကို ဘာက ကူညီပေးသလဲ။
၉ ကိုယ့်အတွေးအခေါ်ကို ပြုပြင်တည့်မတ်တယ်။ “အကြီးအကဲအဖြစ် အမှုဆောင်ခဲ့တုန်းက ယေဟောဝါရဲ့ ဆုံးမမှုအပေါ် အမြင်မှန်ရှိဖို့ တခြားသူတွေကို ကူညီတဲ့အခါ ဟီဘရူး ၁၂:၇ ကို ကျွန်တော် သုံးခဲ့တယ်။ အခု ‘အဲဒီကျမ်းချက်ကို ဘယ်သူ ကျင့်သုံးရမှာလဲ’ လို့ ကိုယ့်ကိုယ်ကိုယ် ပြန်မေးတယ်။ ကျွန်တော်အပါအဝင် ယေဟောဝါရဲ့ ကျေးကျွန်အားလုံးပေါ့” လို့ ပြောတယ်။ ယေဟောဝါနဲ့ အဖွဲ့အစည်းကို ပြန်ယုံကြည်စိတ်ချလာဖို့ တခြား ပြုပြင်ပြောင်းလဲမှုတွေလည်း လုပ်ခဲ့တယ်။ ကျမ်းစာကို အရင်ကထက် ပိုအချိန်ပေး ဖတ်ရှုတယ်။ ပိုလေးလေးနက်နက် တွေးတောဆင်ခြင်တယ်။ ညီအစ်ကို/မတွေ ဘယ်လို မြင်မလဲဆိုတာ တွေးပူမိဆဲ ဖြစ်ပေမဲ့ သူတို့နဲ့အတူ အမှုဆောင်တွေ၊ အသင်းတော် အစည်းအဝေးတွေမှာ ပါဝင်တယ်။ ဒီလိုနဲ့ နောက်ပိုင်းမှာ အကြီးအကဲအဖြစ် ပြန်ခန့်အပ်ခံရတယ်။ သင်လည်း ဘာနာဒိုလိုပဲ ဆုံးမခံရတယ်ဆိုရင် နာကျင်ခံစားရတာကိုပဲ အာရုံမစိုက်ပါနဲ့။ ဆုံးမမှုကို လက်ခံပါ။ လိုအပ်သလို ပြုပြင်ပြောင်းလဲပါ။ c (ပညာ. ၈:၃၃။ ၂၂:၄) ဒါဆိုရင် ဘုရားကိုရော အဖွဲ့အစည်းကိုပါ သစ္စာစောင့်သိနေလို့ ဆုချခံရမှာ သေချာပါတယ်။
အဖွဲ့အစည်းရဲ့ ပြုပြင်ပြောင်းလဲမှုတွေကို လက်ခံရ ခက်တဲ့အခါ
၁၀။ ဘယ်အပြောင်းအလဲကြောင့် အစ္စရေးတချို့ရဲ့ သစ္စာစောင့်သိမှု စမ်းသပ်ခံခဲ့ရတာ ဖြစ်မလဲ။
၁၀ အဖွဲ့အစည်းရဲ့ ပြုပြင်ပြောင်းလဲမှုတွေက သစ္စာစောင့်သိမှုကို စမ်းသပ်နိုင်တယ်။ သတိမထားဘူးဆိုရင် ယေဟောဝါနဲ့တောင် ဝေးကွာသွားစေနိုင်တယ်။ ဥပမာ၊ အစ္စရေးတွေအတွက် ဘယ်လို အပြောင်းအလဲ ဖြစ်ခဲ့တယ်ဆိုတာ စဉ်းစားကြည့်ပါ။ မောရှေပညတ် မရှိခင်တုန်းက ပုရောဟိတ်တာဝန်ကို အိမ်ထောင်ဦးစီးတွေ ထမ်းဆောင်ခဲ့ရတယ်။ ပူဇော်ရာပလ္လင်တွေ တည်ဆောက်ကြတယ်။ မိသားစုကိုယ်စား ယေဟောဝါဆီ ပူဇော်သက္ကာတွေ ဆက်သကြတယ်။ (က. ၈:၂၀၊ ၂၁။ ၁၂:၇။ ၂၆:၂၅။ ၃၅:၁၊ ၆၊ ၇။ ယောဘ ၁:၅) ဒါပေမဲ့ ပညတ်တရားအောက် ရောက်လာတဲ့အခါ အဲဒီအခွင့်ထူးကို အိမ်ထောင်ဦးစီးတွေ လက်လွှတ်လိုက်ရတယ်။ ပူဇော်သက္ကာတွေ ဆက်သဖို့ အာရုန် မိသားစုထဲက အမျိုးသားတွေကို ပုရောဟိတ်အဖြစ် ယေဟောဝါ ခန့်အပ်တယ်။ အဲဒီနောက်ပိုင်း အာရုန်မျိုးဆက် မဟုတ်တဲ့ အိမ်ထောင်ဦးစီးတစ်ယောက် ပုရောဟိတ်အဖြစ် လုပ်ဆောင်မယ်ဆိုရင် သေဒဏ်ခံရနိုင်တယ်။ d (ဝတ်. ၁၇:၃-၆၊ ၈၊ ၉) ဒီအပြောင်းအလဲကြောင့် မောရှေနဲ့ အာရုန်ရဲ့ အခွင့်အာဏာကို ကောရ၊ ဒါသန်၊ အဘိရံနဲ့ မျိုးနွယ်စု ခေါင်းဆောင် ၂၅၀ ပုန်ကန်ခဲ့တာများလား။ (တော. ၁၆:၁-၃) အတိအကျတော့ မပြောနိုင်ဘူး။ ဘာပဲဖြစ်ဖြစ် ကောရနဲ့ အပေါင်းပါတွေ ယေဟောဝါအပေါ် ဆက်သစ္စာ မရှိခဲ့ကြဘူး။ သင်ကော အဖွဲ့အစည်းဆိုင်ရာ အပြောင်းအလဲတွေကြောင့် သစ္စာစောင့်သိမှု စမ်းသပ်ခံရတဲ့အခါ ဘာလုပ်နိုင်သလဲ။
ကောဟတ်အမျိုးသားတွေ တာဝန် အပြောင်းအလဲ ကြုံရတဲ့အခါ သီချင်းသည်၊ တံခါးစောင့်၊ သိုလှောင်ရုံ ကြီးကြပ်သူတွေအဖြစ် လိုလိုလားလား ဆက်အမှုဆောင် (စာပိုဒ် ၁၁ ကို ကြည့်ပါ)
၁၁။ လေဝိအနွယ် ကောဟတ်အမျိုးသားတချို့ဆီကနေ ဘာသင်ယူရသလဲ။
၁၁ အဖွဲ့အစည်း အပြောင်းအလဲတွေကို အပြည့်အဝ ထောက်မပါ။ တောကန္တာရထဲ လှည့်လည်ချိန်အတွင်း ကောဟတ်အမျိုးသားတွေ အထူးတာဝန်တစ်ခု ထမ်းဆောင်ရတယ်။ တပ်စခန်း ပြောင်းရွှေ့တိုင်း ကောဟတ်အမျိုးသားတချို့က လူအားလုံးရှေ့မှာ ပဋိညာဉ်သေတ္တာကို သယ်ကြရတယ်။ (တော. ၃:၂၉၊ ၃၁။ ၁၀:၃၃။ ယောရှု ၃:၂-၄) တကယ့်အခွင့်ထူးပါပဲ။ ဒါပေမဲ့ ကတိထားရာပြည်ထဲ အခြေချပြီးနောက်မှာတော့ အပြောင်းအလဲတွေ ဖြစ်လာတယ်။ ပဋိညာဉ်သေတ္တာကို ပြောင်းရွှေ့နေစရာ မလိုတော့ဘူး။ ဒါကြောင့် ဘုရင် ရှောလမုန် နန်းစံချိန်အတွင်း ကောဟတ်အမျိုးသားတချို့က သီချင်းသည်တွေ၊ တံခါးစောင့်တွေ၊ သိုလှောင်ရုံ ကြီးကြပ်သူတွေအဖြစ် ခန့်အပ်ခံရတယ်။ (၁ ရာ. ၆:၃၁-၃၃။ ၂၆:၁၊ ၂၄) ဒါကို ကောဟတ်အမျိုးသားတွေ ညည်းညူတယ်၊ ပိုထင်ပေါ်တဲ့ တာဝန် တစ်ခုခု တောင်းဆိုတယ်ဆိုတဲ့ မှတ်တမ်း မရှိဘူး။ ဘာသင်ခန်းစာ ရသလဲ။ အဖွဲ့အစည်းရဲ့ ပြုပြင်ပြောင်းလဲမှုတွေကြောင့် ကိုယ့်တာဝန် ထိခိုက်လာတဲ့အခါမှာတောင် စိတ်နှလုံး အကြွင်းမဲ့ ထောက်မပါ။ ဘယ်တာဝန်ပဲရရ ဝမ်းမြောက်ဝမ်းသာ အမှုဆောင်ပါ။ ကိုယ့်တန်ဖိုးဟာ ကိုယ့်တာဝန်ပေါ် မမူတည်ကြောင်း သတိရပါ။ တာဝန်ထက် သင့်နာခံမှုကိုသာ ယေဟောဝါ ပိုတန်ဖိုးထားတာ။—၁ ရှ. ၁၅:၂၂။
၁၂။ ဗေသလကနေ တာဝန် အပြောင်းအလဲ ရတဲ့အခါ ဇိုင်နာ ဘယ်လို ခံစားရသလဲ။
၁၂ တာဝန် အပြောင်းအလဲ ကြုံရပြီး မြတ်နိုးတဲ့ အခွင့်ထူး ဆုံးရှုံးသွားတဲ့ ညီအစ်မ ဇိုင်နာအကြောင်း စဉ်းစားကြည့်ပါ။ ဒီညီအစ်မက အရှေ့အလယ်ပိုင်းမှာ နေထိုင်တယ်။ ဗေသလမှာ ၂၃ နှစ်ကျော် အမှုဆောင်ပြီးနောက် အထူးရှေ့ဆောင် ပြန်လုပ်ဖို့ တာဝန်ရတယ်။ “တကယ့်အပြောင်းအလဲကြီးပါပဲ။ အသုံးမဝင်တော့ဘူးလို့ ခံစားရတယ်။ ‘ဘာအမှား လုပ်မိလို့လဲ’ လို့ တွေးမိတယ်” ဆိုပြီး ပြောတယ်။ အသင်းတော်က ညီအစ်ကို/မ တချို့ကလည်း “သိပ်မတော်လို့ ဗေသလမှာ ဆက်ရှိမနေတာ” လို့ ပြောပြီး ပိုခံရခက်အောင် လုပ်ကြတယ်။ အချိန်အတော်ကြာ စိတ်ဓာတ်ကျပြီး ညတိုင်း ငိုခဲ့ရတယ်။ ဒါပေမဲ့ “အဖွဲ့အစည်းကိုရော ယေဟောဝါရဲ့ မေတ္တာကိုပါ ကျွန်မ ဘယ်တော့မှ သံသယမဝင်ဘူး” လို့ ပြောတယ်။ ဇိုင်နာ ဘယ်လိုနည်းနဲ့ ဆက်သတိရှိနေနိုင်ခဲ့သလဲ။
၁၃။ အပျက်သဘောထား ခံစားချက်တွေကို ဇိုင်နာ ဘယ်လို ကျော်လွှားနိုင်ခဲ့သလဲ။
၁၃ အပျက်သဘောထားတွေကို ဇိုင်နာ တိုက်ထုတ်နိုင်ခဲ့တယ်။ ဘယ်လိုနည်းနဲ့လဲ။ ကိုယ်သတ်သတ်မှတ်မှတ် ကြုံနေရတဲ့ အခက်အခဲအကြောင်း ရေးထားတဲ့ အဖွဲ့အစည်းစာပေတွေ ဖတ်တယ်။ ၂၀၀၁၊ ဖေဖော်ဝါရီ ၁ ရက်ထုတ် ကင်းမျှော်စင် “စိတ်ပျက်အားလျော့ခြင်းကို သင်အောင်မြင်ကျော်လွှားနိုင်” ဆိုတဲ့ ဆောင်းပါးက တော်တော် အကူအညီ ဖြစ်စေတယ်။ တာဝန် အပြောင်းအလဲ ကြုံရတဲ့အခါ ကျမ်းရေးသူ မာကုလည်း အဲဒီလို ခံစားရနိုင်တယ်လို့ ဆောင်းပါးမှာ ရှင်းပြထားတယ်။ “မာကုရဲ့ ပုံသက်သေက စိတ်ဓာတ်ကျမှုကို ကျော်လွှားဖို့ ဆေးစွမ်းကောင်းတစ်လက်ပဲ” လို့ ဇိုင်နာ ပြောတယ်။ မိတ်ဆွေတွေနဲ့လည်း ဇိုင်နာ ရင်းရင်းနှီးနှီး ဆက်ပေါင်းသင်းတယ်။ တစ်သီးပုဂ္ဂလ မနေဘူး။ ကိုယ့်ကိုယ်ကိုယ် သနားမနေဘူး။ အဖွဲ့အစည်း ဆုံးဖြတ်ချက်တွေကို သန့်ရှင်းသော စွမ်းအားတော် လမ်းညွှန်နေကြောင်း၊ ဦးဆောင်နေတဲ့ ညီအစ်ကိုတွေ မိမိကို အလွန်ဂရုစိုက်ကြောင်း ဇိုင်နာ သဘောပေါက်လာတယ်။ အဖွဲ့အစည်းအတွက် အရေးကြီးဆုံးက ဘုရားအလုပ် ပြီးစီးဖို့ပဲ ဆိုတာလည်း သဘောပေါက်လာတယ်။
၁၄။ ဗလာဒိုအတွက် အဖွဲ့အစည်းဆိုင်ရာ ဘယ်အပြောင်းအလဲကို လက်ခံဖို့ ခက်သလဲ။ သူ့ကို ဘာက ကူညီပေးသလဲ။
၁၄ စလိုဗေးနီးယားမှာနေတဲ့ အသက် ၇၃ နှစ်အရွယ် အကြီးအကဲ ညီအစ်ကို ဗလာဒိုအကြောင်း စဉ်းစားကြည့်ပါ။ သူ့အသင်းတော်ကို တခြားအသင်းတော်နဲ့ ပေါင်းလိုက်ပြီး သူတက်နေတဲ့ နိုင်ငံတော်ခန်းမကို ဆက်မသုံးတော့တဲ့အခါ တော်တော်ခံစားခဲ့ရတယ်။ “ဒီလောက်လှတဲ့ နိုင်ငံတော်ခန်းမကို ဘာလို့ ဆက်မသုံးတော့တာလဲဆိုတာ နားမလည်နိုင်အောင် ဖြစ်ခဲ့ရတယ်။ မကြာသေးခင်ကမှ ခန်းမကို ပြုပြင်မွမ်းမံထားတော့ တော်တော် စိတ်ပျက်မိတယ်။ ကျွန်တော်က လက်သမားပါ။ ပရိဘောဂအသစ်တွေကို ကျွန်တော် လုပ်ပေးခဲ့တာ။ အသင်းတော် ပေါင်းလိုက်လို့ ပြုပြင်ပြောင်းလဲရမှာတွေက ကျွန်တော်တို့လို သက်ကြီးကြေညာသူတွေအတွက် မလွယ်ဘူး” လို့ ပြောတယ်။ ဒီဆုံးဖြတ်ချက်ကို ထောက်မပေးဖို့ ဗလာဒိုကို ဘာက ကူညီပေးသလဲ။ “ယေဟောဝါအဖွဲ့အစည်းရဲ့ အပြောင်းအလဲတွေကို လက်ခံတာ အမြဲ ကောင်းချီးရစေတယ်။ အနာဂတ်မှာ ကြုံရမယ့် ပိုကြီးမားတဲ့ အပြောင်းအလဲတွေအတွက် အသင့်ပြင်ပေးတယ်” လို့ ပြောတယ်။ အသင်းတော် ပေါင်းလိုက်လို့၊ တာဝန်ပြောင်းသွားလို့ ပြုပြင်ပြောင်းလဲဖို့ သင် ခက်နေသလား။ သင့်ခံစားချက်ကို ယေဟောဝါ နားလည်တယ်ဆိုတာ စိတ်ချပါ။ ဒီအပြောင်းအလဲတွေကို ထောက်မပြီး ယေဟောဝါကိုရော ဘုရားအသုံးပြုနေတဲ့ အဖွဲ့အစည်းကိုပါ ဆက်သစ္စာစောင့်သိနေရင် ကောင်းချီး ခံစားရမှာ သေချာပါတယ်။—ဆာ. ၁၈:၂၅။
အရာရာမှာ သတိရှိနေပါ
၁၅။ အသင်းတော်ထဲက လာတဲ့ အခက်အခဲတွေ ကြုံရတဲ့အခါ ဘယ်လို ဆက်သတိရှိနေနိုင်သလဲ။
၁၅ ဒီအစီအစဉ်စနစ် အဆုံး နီးလာတာနဲ့အမျှ အသင်းတော်အတွင်းက လာတဲ့ အခက်အခဲတွေ ကြုံလာရနိုင်တယ်။ အဲဒီအခက်အခဲတွေက ယေဟောဝါအပေါ် ထားတဲ့ သစ္စာစောင့်သိမှုကို စမ်းသပ်နိုင်တယ်။ ဒါကြောင့် သတိရှိနေရမယ်။ ညီအစ်ကို/မ တစ်ယောက်ယောက် သင့်ကို မတရား ဆက်ဆံတဲ့အခါ စိတ်နာကြည်းမနေပါနဲ့။ ဆုံးမခံရတဲ့အခါ နာကျင်ခံစားရတာကိုပဲ အာရုံမစိုက်ပါနဲ့။ ဆုံးမမှုကို လက်ခံပါ။ လိုအပ်သလို ပြုပြင်ပြောင်းလဲပါ။ ယေဟောဝါ အဖွဲ့အစည်းရဲ့ အပြောင်းအလဲတွေက ကိုယ့်ကို ထိခိုက်လာတဲ့အခါ စိတ်နှလုံး အကြွင်းမဲ့ လက်ခံပါ။ လမ်းညွှန်ချက်ကို နာခံပါ။
၁၆။ ယေဟောဝါနဲ့ အဖွဲ့အစည်းအပေါ် ယုံကြည်စိတ်ချမှု ဘယ်လို ဆက်ထိန်းထားနိုင်သလဲ။
၁၆ သစ္စာစောင့်သိမှု စမ်းသပ်ခံရတဲ့အခါ ယေဟောဝါနဲ့ အဖွဲ့အစည်းအပေါ် ယုံကြည်စိတ်ချမှု ဆက်ထိန်းထားနိုင်ပါတယ်။ အဲဒီလိုဖြစ်နိုင်ဖို့ သတိရှိနေရမယ်။ ဆိုလိုတာက တည်တည်ငြိမ်ငြိမ် ရှိရမယ်။ ရှင်းရှင်းလင်းလင်း စဉ်းစားတွေးခေါ်ရမယ်။ ကိစ္စရပ်တွေကို ယေဟောဝါ ရှုမြင်သလို ရှုမြင်ရမယ်။ ကိုယ်ကြုံနေရတဲ့ အခက်အခဲတွေကို အောင်အောင်မြင်မြင် ရင်ဆိုင်ဖြေရှင်းခဲ့တဲ့ ကျမ်းစာဇာတ်ကောင်တွေအကြောင်း လေ့လာဖို့၊ သူတို့ရဲ့ပုံသက်သေကို တွေးတောဆင်ခြင်ဖို့ စိတ်ပိုင်းဖြတ်ထားပါ။ ယေဟောဝါဆီ ဆုတောင်းပြီး အကူအညီတောင်းပါ။ အသင်းတော်နဲ့ ဘယ်တော့မှ တသီးတခြား မနေပါနဲ့။ ဒါဆိုရင် ဘာတွေပဲ ကြုံရပါစေ ယေဟောဝါနဲ့ရော အဖွဲ့အစည်းနဲ့ပါ ဝေးကွာသွားအောင် စာတန် ဘယ်လိုမှ တားဆီးနိုင်မှာ မဟုတ်ဘူး။—ယာ. ၄:၇။
သီချင်း ၁၂၆ မြဲမြံနိုးကြား၊ ခွန်အားကြီးပွား
a အထူးသဖြင့် အသင်းတော်အတွင်းက အခက်အခဲတွေ ရင်ဆိုင်ရချိန်မှာ ယေဟောဝါနဲ့ အဖွဲ့အစည်းအပေါ် သစ္စာစောင့်သိမှု စမ်းသပ်ခံရနိုင်တယ်။ အဲဒီအခက်အခဲ သုံးခုအကြောင်း၊ ယေဟောဝါနဲ့ အဖွဲ့အစည်းကို ဘယ်လို ဆက်သစ္စာရှိနိုင်ကြောင်း ဒီဆောင်းပါးမှာ ဆွေးနွေးကြပါမယ်။
b အမည်လွှဲများ။
c ထပ်သိချင်ရင် ၂၀၀၉၊ ဩဂုတ် ၁၅ ရက်ထုတ် ကင်းမျှော်စင် စာမျက်နှာ ၃၀ “သင်သည် တစ်ချိန်ကအမှုဆောင်ခဲ့သလော ပြန်၍အမှုဆောင်နိုင်မည်လော” ဆောင်းပါးကို ကြည့်ပါ။
d အိမ်ထောင်ဦးစီးတွေဟာ အသားစားချင်လို့ တိရစ္ဆာန်သတ်ရတဲ့အခါ တဲတော်ကို အရင်ဆုံးယူလာရမယ်လို့ ပညတ်တရား တောင်းဆိုထားတယ်။ တဲတော်နဲ့ ဝေးလွန်းတဲ့နေရာမှာ နေထိုင်တဲ့ အိမ်ထောင်ဦးစီးတွေအတွက်တော့ ခြွင်းချက်ဖြစ်တယ်။—တရား. ၁၂:၂၁။