၁-၂။ ယေဟောဝါ​က ကျွန်တော်တို့ကို မိမိရဲ့ မိသားစုဝင်​ဖြစ်ဖို့ ဘာကြောင့်၊ ဘယ်လို လမ်းဖွင့်​ပေး​သလဲ။

ယေဟောဝါ​က ကျွန်တော်တို့ကို မိမိရဲ့ မိသားစုဝင် ဖြစ်ဖို့ ဖိတ်ခေါ်ထားတယ်။ သိပ်​ကောင်းတဲ့ ဖိတ်ခေါ်ချက်​ပါပဲ။ ဘုရားရဲ့ မိသားစု​ထဲမှာ ဘုရားဆီ ဆက်ကပ်​အပ်နှံထားသူ​တွေ၊ သားတော်ရဲ့ ရွေးဖိုး​ပူဇော်သက္ကာ​ကို ယုံကြည်​ကြောင်း တင်ပြ​သူတွေ ပါဝင်တယ်။ ပျော်ရွှင်တဲ့ မိသားစု​ပါပဲ။ လောလောဆယ် အဓိပ္ပာယ်​ရှိတဲ့​ဘဝ ရထားတဲ့​အပြင် ကောင်းကင်မှာ​ဖြစ်စေ၊ မြေကြီး​မှာ​ဖြစ်စေ အဆုံးမဲ့​အသက် မျှော်လင့်ချက် ရထားလို့ ပျော်ရွှင်​နေကြတယ်။

^၂ ယေဟောဝါဟာ မေတ္တာ​ရှိလို့ အကြီးအကျယ် အနစ်နာခံ​ပြီး ကျွန်တော်တို့ကို မိမိရဲ့ မိသားစုဝင် ဖြစ်ဖို့ လမ်းဖွင့်​ပေးတယ်။ (ယော. ၃:၁၆) ကျွန်တော်တို့ကို “တန်ဖိုးကြီး​ကြီး​ပေးပြီး ဝယ်ထား” တယ်။ (၁ ကော. ၆:၂၀) ရွေးဖိုး​အားဖြင့် မိမိ​နဲ့ ရင်းနှီးတဲ့ ဆက်ဆံရေး ရရှိ​စေတယ်။ စကြဝဠာမှာ အကြီးမြတ်ဆုံး ပုဂ္ဂိုလ်​ကို အဖ​လို့ ကျွန်တော်တို့ ခေါ်​ခွင့်​ရထားတယ်။ ရှေ့​ဆောင်းပါး​မှာ လေ့လာခဲ့တဲ့​အတိုင်း ယေဟောဝါဟာ အကောင်းဆုံး​ဖခင်​ပါ။

၃။ ယေဟောဝါရဲ့ ကောင်းမြတ်မှု​အကြောင်း စဉ်းစား​တဲ့အခါ ဘယ်​မေးခွန်းတွေ မေး​မိ​နိုင်သလဲ။ (“ ငါ့ကို ယေဟောဝါ သတိထားမိရဲ့လား” လေးထောင့်ကွက်​ကို ကြည့်ပါ။)

^၃ “ယေဟောဝါ လုပ်​ပေးခဲ့တဲ့ ကောင်းမှု​အားလုံး​အတွက် ငါ ဘယ်လို ကျေးဇူးဆပ်​ရမလဲ” လို့ ရေးခဲ့တဲ့ ဆာလံ​ဆရာလို​ပဲ ကျွန်တော်တို့ တွေးမိ​နိုင်တယ်။ (ဆာ. ၁၁၆:၁၂) ကောင်းကင်ဖခင်ကို ဘယ်တော့မှ ကျေးဇူးဆပ်​လို့ ကုန်​မှာ မဟုတ်ဘူး။ ဘုရားရဲ့ မေတ္တာက ဘုရားကို ပြန်​ချစ်​ဖို့ ကျွန်တော်တို့ကို လှုံ့ဆော်​ပေးတယ်။ “ဘုရားသခင်က အရင်​ဦးဆုံး​ချစ်​ခဲ့လို့ ကျွန်တော်တို့လည်း ချစ်တတ်​ကြတာပါ” လို့ တမန်တော် ယောဟန် ရေးတယ်။ (၁ ယော. ၄:၁၉) ကောင်းကင်ဖခင်ကို ချစ်ကြောင်း ဘယ်နည်းတွေနဲ့ ဖော်ပြ​နိုင်သလဲ။

၄။ ယာကုပ် ၄:၈ အရ ယေဟောဝါနဲ့ ရင်းနှီး​ဖို့ ဘာကြောင့် ကြိုးစား​အားထုတ်​သင့်သလဲ။

^၄ ယေဟောဝါ​က ကျွန်တော်တို့ကို မိမိ​နဲ့ ရင်းနှီး​စေချင်တယ်။ ဆက်သွယ်​စေချင်တယ်။ (ယာကုပ် ၄:၈ ကိုဖတ်ပါ။) “ဇွဲမလျှော့​တမ်း ဆုတောင်း” ဖို့ တိုက်တွန်း​ပြီး နားထောင်​ပေးဖို့ အမြဲ​အသင့်​ရှိတယ်။ (ရော. ၁၂:၁၂) အလုပ်များ​လို့၊ ပင်ပန်း​လို့ ဆုတောင်းချက်တွေကို နားမထောင်​တာ​မျိုး မရှိဘူး။ ကျွန်တော်တို့လည်း ကျမ်းစာနဲ့ ကျမ်းစာကို နားလည်ဖို့ ထောက်ကူ​ပေးတဲ့ စာပေတွေကို ဖတ်ရှုခြင်း၊ ခရစ်ယာန် အစည်းအဝေးတွေမှာ အာရုံစိုက် နားထောင်ခြင်း​အားဖြင့် ဘုရား​စကားကို နားထောင်​ကြတယ်။ ဆက်သွယ်ရေး ကောင်းခြင်းက မိဘ​နဲ့ ရင်းနှီး​ဖို့ ကူညီပေး​သလို ယေဟောဝါနဲ့ ပုံမှန် ဆက်သွယ်ခြင်းက ဘုရားနဲ့ ရင်းနှီး​စေတယ်။

၅။ ကျွန်တော်တို့ရဲ့ ဆုတောင်းခြင်း အရည်အသွေးကို ဘယ်လို တိုးတက်​စေနိုင်သလဲ။

^၅ သင့်ရဲ့ ဆုတောင်းခြင်း အရည်အသွေးကို ဆန်းစစ်​ကြည့်ပါ။ ယေဟောဝါ​က ကျွန်တော်တို့ကို ရင်ဖွင့်​ဆုတောင်း​စေချင်တယ်။ (ဆာ. ၆၂:၈) ‘ငါ့​ဆုတောင်းချက်​တွေ​က အပေါ်ယံ​ပဲ ဖြစ်နေ​သလား။ တစ်​ခါလာ​လည်း ဒီ​စကားလုံးတွေ​ပဲ​လား ဒါမှမဟုတ် ကိုယ့်ရဲ့ ရင်တွင်း​စကားတွေ​လား’ လို့ ကိုယ့်ကိုယ်ကိုယ် မေးသင့်တယ်။ သင်ဟာ ယေဟောဝါကို အလွန်​ချစ်​ပြီး ဘုရားနဲ့ ဆက်ဆံရေး ကောင်း​ချင်​မှာ သေချာတယ်။ အဲဒီလို ကောင်း​ဖို့ ပုံမှန် ဆက်သွယ်​ရမယ်။ ပျော်စရာ​ဖြစ်စေ၊ ဝမ်းနည်းစရာ​ဖြစ်စေ ခံစားချက်တွေကို ရင်ဖွင့်​ပြောပြပါ။ ဘာဖြစ်ဖြစ် အကူအညီ တောင်း​နိုင်တယ်ဆိုတာ စိတ်ချပါ။

၆။ ကောင်းကင်ဖခင်​နဲ့ ရင်းနှီး​ဖို့ ဘာလုပ်ရမလဲ။

^၆ ကောင်းကင်ဖခင်​နဲ့ ရင်းနှီး​ဖို့ ကျေးဇူးတင်​တတ်တဲ့​စိတ် ဆက်ရှိ​နေရမယ်။ “ယေဟောဝါဘုရား၊ ကိုယ်တော်ရဲ့ လုပ်ဆောင်မှုတွေ၊ အံ့ဖွယ်​အမှုတွေ၊ ကျွန်တော်တို့နဲ့​ပတ်သက်တဲ့ အကြံအစည်​တွေဟာ များပြား​လိုက်တာ။ ကိုယ်တော့်​ကို ယှဉ်​နိုင်တဲ့​သူ မရှိဘူး။ အဲဒီ​အကြောင်း​တွေကို ပြော​ကြည့်လိုက်တဲ့​အခါ ပြော​မကုန်နိုင်​အောင် များ​လှတယ်” လို့ ရေးခဲ့တဲ့ ဆာလံ​ဆရာလို ကျွန်တော်တို့ ခံစား​ကြရတယ်။ (ဆာ. ၄၀:၅) ယေဟောဝါကို ကျေးဇူးတင်တဲ့​စိတ် ရှိရုံ​သာမက ကျေးဇူးတင်ကြောင်း စကားနဲ့​ရော လုပ်ရပ်​နဲ့​ပါ ဖော်ပြ​ရမယ်။ ဒါက ဒီနေ့​ခေတ် လူများစွာ​နဲ့ ကွာခြားစေ​တယ်။ ဘုရား လုပ်ပေး​ထားတာ​တွေ​အတွက် ကျေးဇူး​မတင်​တတ်​သူတွေ ကြားမှာ ကျွန်တော်တို့ အသက်ရှင်​နေ​ရတယ်။ ကျေးဇူးကန်းသူ​တွေ များ​လာတာဟာ “နောက်ဆုံး​ကာလ” မှာ အသက်ရှင်နေ​ရတယ်ဆိုတဲ့ သက်သေ​တစ်ခု​ပဲ။ (၂ တိ. ၃:၁၊ ၂) အဲဒီလို သဘောထားမျိုး ကျွန်တော်တို့ မတင်ပြ​ချင်​ကြဘူး။

၇။ ကျွန်တော်တို့ကို ယေဟောဝါ ဘာလုပ်​စေ​ချင်​သလဲ။ ဘာကြောင့်လဲ။

^၇ မိဘတွေဟာ သားသမီးတွေကို ချစ်ချစ်ခင်ခင် ရှိစေချင်တယ်။ ယေဟောဝါလည်း မိမိရဲ့ သားသမီးတွေကို အချင်းချင်း သင့်မြတ်​စေချင်တယ်။ အချင်းချင်း ချစ်တဲ့ မေတ္တာဟာ ခရစ်ယာန်စစ်​တွေရဲ့ အမှတ်အသား​ဖြစ်တယ်။ (ယော. ၁၃:၃၅) “ညီအစ်ကို​တွေ စည်းစည်းလုံးလုံး အတူ​နေထိုင်ကြ​တာ ကောင်း​လိုက်တာ။ ကြည်နူးစရာ ကောင်း​လိုက်တာ” လို့ ပြောခဲ့တဲ့ ဆာလံ​ဆရာလို ကျွန်တော်တို့ ခံစား​ရတယ်။ (ဆာ. ၁၃၃:၁) ညီအစ်ကို/မ​တွေကို ချစ်တာက ယေဟောဝါကို ချစ်ကြောင်း ဖော်ပြရာ​ရောက်တယ်။ (၁ ယော. ၄:၂၀) ‘အချင်းချင်း သနား​ကြင်နာ​ပြီး ကရုဏာ​ပြ​တဲ့’ ညီအစ်ကို/မ​တွေ​နဲ့ မိသားစုဝင် ဖြစ်​ရတာ အလွန်​ကြည်နူးစရာပါ​ပဲ။—ဧ. ၄:၃၂။

၈။ ၁ ယောဟန် ၅:၃ အရ ယေဟောဝါကို နာခံ​ရတဲ့ အဓိက အကြောင်းရင်း​က ဘာလဲ။

^၈ ယေဟောဝါ​က မိဘကို နာခံဖို့ သားသမီးတွေ​ဆီက မျှော်လင့်​သလို မိမိကို နာခံဖို့ ကျွန်တော်တို့ဆီက မျှော်လင့်တယ်။ (ဧ. ၆:၁) ယေဟောဝါဟာ ဖန်ဆင်းရှင်၊ အသက်ပေး​ရှင်၊ ပညာ​အရှိဆုံး​မိဘ​ဖြစ်လို့ ကျွန်တော်တို့ရဲ့ နာခံမှု​ ကို ရထိုက်တယ်။ ဒါပေမဲ့ အဓိက​ကတော့ ယေဟောဝါကို ချစ်လို့ နာခံကြတာ​ပါ။ (၁ ယောဟန် ၅:၃ ကိုဖတ်ပါ။) နာခံမှု ရထိုက်တဲ့ အကြောင်းရင်း​များစွာ ရှိပေမဲ့ ယေဟောဝါ​က ကျွန်တော်တို့ကို အတင်း ဖိအား​မပေးဘူး။ လွတ်လပ်​စွာ ရွေးချယ်ခွင့် ပေးထားတယ်။ ဘုရားကို ချစ်လို့ နာခံ​ရင် ဘုရား ပျော်ရွှင်တယ်။

၉-၁၀။ ဘုရားသခင့် စံနှုန်းတွေကို သိ​ပြီး လိုက်နာ​ဖို့ ဘာကြောင့် အရေးကြီး​သလဲ။

^၉ မိဘတွေက သားသမီးတွေကို ဘေးကင်းလုံခြုံ​စေချင်တဲ့​အတွက် စည်းကမ်းတွေ ချမှတ်​ပေးတယ်။ အဲဒါတွေကို နာခံ​တာ​က မိဘကို ယုံကြည်​ကိုးစား​ကြောင်း၊ လေးစားကြောင်း ဖော်ပြရာ​ရောက်တယ်။ ကောင်းကင်ဖခင် ချမှတ်​ထားတဲ့ စံနှုန်းတွေကို ကျွန်တော်တို့ သိ​ပြီး လိုက်နာ​ဖို့​ဆိုရင် ပိုလို့တောင် အရေးကြီးတယ်။ အဲဒီလို လိုက်နာတယ်​ဆိုရင် ယေဟောဝါကို ချစ်ကြောင်း၊ လေးစားကြောင်း ဖော်ပြရာ​ရောက်​ပြီး ကိုယ်တိုင်လည်း အကျိုး​ရတယ်။ (ဟေရှာ. ၄၈:၁၇၊ ၁၈) ယေဟောဝါနဲ့ ဘုရား​စံနှုန်းတွေကို ငြင်းပယ်​ရင်​တော့ အကျိုး​ယုတ်မယ်။—ဂလ. ၆:၇၊ ၈။

^၁၀ ယေဟောဝါ နှစ်သက်တဲ့​နည်း​အတိုင်း နေထိုင်​ရင် ရုပ်ပိုင်း၊ စိတ်ပိုင်း၊ ဘုရားရေးရာ​ပိုင်း အကာအကွယ် ရတယ်။ ကျွန်တော်တို့​အတွက် အကောင်းဆုံး​ကို ယေဟောဝါ သိတယ်။ “ယေဟောဝါကို နာခံ​တာ​က အကောင်းဆုံး ဘဝကို ရစေ​မှန်း ကျွန်မ သိတယ်” လို့ အမေရိကန်​က အော်ရိုရာ ပြောတယ်။ အဲဒီ​စကားက တကယ် မှန်တယ်။ သင်​ကော ယေဟောဝါရဲ့ မေတ္တာပါ လမ်းညွှန်ချက်တွေကို နာခံခြင်းကနေ ဘယ်လို အကျိုး​ရ​နေသလဲ။

၁၁။ ဆုတောင်းခြင်းက ဘယ်လို ကူညီပေး​သလဲ။

 ^၁၁ နာခံဖို့ ခက်ခဲချိန်​တွေ​မှာ​တောင် ဆုတောင်းခြင်းက ကူညီ​ပေးတယ်။ တစ်ခါတလေ ယေဟောဝါကို နာခံဖို့ ခက်တဲ့​အချိန်တွေ ရှိ​နိုင်တယ်။ ဒါပေမဲ့ အပြစ်​လုပ်ချင်စိတ်​ကို မပြတ် တိုက်ထုတ်​ရမယ်။ “စိတ်ပါလက်ပါ နာခံ​ချင်စိတ်​ရှိအောင် လှုံ့ဆော်ပေး​ပါ” လို့ ဆာလံဆရာ အသနား​ခံခဲ့တယ်။ (ဆာ. ၅၁:၁၂) မှန်မှန်ရှေ့ဆောင် ညီအစ်မ ဒဲန်နီ ဒီလို ပြောတယ်– “ယေဟောဝါရဲ့ ပညတ်​တစ်ခုကို နာခံဖို့ ခက်​နေတယ်​ဆိုရင် မှန်ရာ​လုပ်နိုင်အောင် ခွန်အားပေး​ပါလို့ ဆုတောင်း​လိုက်တယ်။” အဲဒီလို အသနားခံ​တဲ့အခါ ယေဟောဝါ အမြဲ အဖြေပေး​မယ်​ဆိုတာ ကျွန်တော်တို့ စိတ်ချ​နိုင်တယ်။—လု. ၁၁:၉-၁၃။

၁၂။ ဧဖက် ၅:၁ အရ ဘာ​လုပ်သင့်သလဲ။

^၁၂ ဧဖက် ၅:၁ ကိုဖတ်ပါ။ ယေဟောဝါ “ချစ်​ရတဲ့ သားသမီးတွေ” အနေနဲ့ ဘုရားကို ကျွန်တော်တို့ အတတ်နိုင်ဆုံး တုပ​ကြတယ်။ မေတ္တာပြ​ခြင်း၊ ကြင်နာခြင်း၊ ခွင့်လွှတ်ခြင်း​အားဖြင့် ဘုရားသခင့် အရည်အသွေးတွေကို တုပ​ကြတယ်။ ဘုရားကို မသိတဲ့​သူတွေဟာ ကျွန်တော်တို့ရဲ့ အမူအကျင့်ကောင်း​ကို မြင်တဲ့အခါ ဘုရား​အကြောင်း ပို​သိချင်​လာနိုင်တယ်။ (၁ ပေ. ၂:၁၂) ခရစ်ယာန်​မိဘတွေဟာ သားသမီးတွေကို ဆက်ဆံ​ရာ​မှာ ယေဟောဝါကို တုပ​သင့်တယ်။ ဒါဆိုရင် သားသမီးတွေလည်း ကောင်းကင်ဖခင်​နဲ့ ရင်းနှီး​ချင်​လာပါလိမ့်မယ်။

၁၃။ ရဲရင့်​လာ​အောင် ဘာ​လုပ်သင့်သလဲ။

 ^၁၃ ကလေးတွေဟာ ဖခင်​နဲ့​ပတ်သက်ပြီး ဂုဏ်ယူ​ပြောတတ်​ကြတယ်။ ကျွန်တော်တို့လည်း ကောင်းကင်ဖခင် ယေဟောဝါ​အတွက် ဂုဏ်ယူ​ပြီး တခြား​သူတွေကို ဘုရား​အကြောင်း သိစေချင်တယ်။ “ယေဟောဝါ​အကြောင်း ဂုဏ်ယူ​ဝင့်ကြွား​စွာ ပြောမယ်” လို့ ရေးခဲ့တဲ့ ဘုရင်​ဒါဝိဒ်လို ခံစား​ရတယ်။ (ဆာ. ၃၄:၂) ဒါပေမဲ့ ကိုယ်က ရှက်တတ်တဲ့​သူ ဖြစ်နေရင်​ကော။ ဘယ်လို ရဲရင့်​လာနိုင်​မလဲ။ ယေဟောဝါ​အကြောင်း ပြောတဲ့အခါ ဘုရား ဘယ်လောက် ပျော်​မယ်၊ တခြားသူတွေ ဘယ်လောက် အကျိုး​ရမယ်ဆိုတာ စဉ်းစား​ရင် ရဲရင့်​လာမယ်။ လို​နေတဲ့ ရဲစွမ်းသတ္တိ​ကို ယေဟောဝါ ပေးမယ်။ ပထမရာစု ညီအစ်ကို/မ​တွေကို သတ္တိ​ရှိဖို့ ကူညီ​ခဲ့​သလို ကျွန်တော်တို့ကိုလည်း ကူညီ​ပါလိမ့်မယ်။—၁ သက်. ၂:၂။

၁၄။ တပည့်ဖြစ်စေခြင်း​လုပ်ငန်းမှာ ပါဝင်​သင့်တဲ့ အကြောင်းရင်း​တချို့က ဘာလဲ။

^၁၄ ယေဟောဝါဟာ မျက်နှာ​မလိုက်ဘူး။ နောက်ခံ ဘယ်လို​ရှိတဲ့​သူပဲ ဖြစ်ပါစေ သူတို့ကို ကျွန်တော်တို့ မေတ္တာပြ​တဲ့အခါ ဘုရား ပျော်တယ်။ (တ. ၁၀:၃၄၊ ၃၅) တခြား​သူတွေကို မေတ္တာပြ​နိုင်တဲ့ အကောင်းဆုံးနည်း​ကတော့ သတင်းကောင်း ဟောပြောခြင်း​ပဲ။ (မ. ၂၈:၁၉၊ ၂၀) ဟောပြောခြင်းက ဘယ်လို အကျိုးပြု​နိုင်သလဲ။ နားထောင်​သူတွေရဲ့ လက်ရှိ​ဘဝကို တိုးတက်​ကောင်းမွန်စေတဲ့​အပြင် အနာဂတ်မှာလည်း ထာဝရ​အသက်​ရဖို့ မျှော်လင့်ချက် ရှိစေတယ်။—၁ တိ. ၄:၁၆။

၁၅-၁၆။ ဘယ်​အကြောင်းရင်း​တွေ​ကြောင့် ပျော်ရွှင်​နိုင်ကြ​သလဲ။

^၁၅ ယေဟောဝါဟာ မေတ္တာ​ရှိတဲ့ ဖခင်​ဖြစ်လို့ မိသားစုဝင်တွေကို ပျော်ရွှင်​စေချင်တယ်။ (ဟေရှာ. ၆၅:၁၄) အခက်​အခဲ​တွေ​ကြားမှာ​တောင် ကျွန်တော်တို့ ပျော်ရွှင်​နိုင်တဲ့ အကြောင်းရင်း​များစွာ ရှိတယ်။ ဥပမာ၊ ကျွန်တော်တို့ကို ကောင်းကင်ဖခင် အလွန်​ချစ်ကြောင်း သိထားတယ်။ တိကျ​မှန်ကန်တဲ့ ကျမ်းစာ အသိပညာ ရရှိ​ထားတယ်။ (ယေ. ၁၅:၁၆) ယေဟောဝါကို ချစ်တဲ့၊ မြင့်မားတဲ့ ကိုယ်ကျင့်တရား စံနှုန်းတွေကို မြတ်နိုးတဲ့၊ အချင်းချင်း ချစ်တဲ့ မိသားစုဝင်​တွေ ရှိ​ထားတယ်။—ဆာ. ၁၀၆:၄၊ ၅။

^၁၆ အနာဂတ်မှာ ဘဝ ပို​ကောင်း​လာမယ်​ဆိုတဲ့ မျှော်လင့်ချက် ရှိ​ထားလို့ ပျော်ရွှင်​နေ​နိုင်ပါတယ်။ မကြာခင် ဆိုးသွမ်းမှု​အားလုံးကို ယေဟောဝါ ဖယ်ရှားတော့မယ်၊ နိုင်ငံတော် အုပ်ချုပ်မှု​အောက် တစ်​ကမ္ဘာလုံး ပရဒိသု ဖြစ်လာတော့မယ်​ဆိုတာ ကျွန်တော်တို့ သိတယ်။ သေဆုံး​သွား​သူတွေ ပြန်ရှင်​လာပြီး ချစ်ရ​သူတွေနဲ့ ပြန်ဆုံ​ဆည်း​မယ်​ဆိုတဲ့ အံ့ဖွယ် မျှော်လင့်ချက်ကိုလည်း ကျွန်တော်တို့ ရရှိ​ထားတယ်။ (ယော. ၅:၂၈၊ ၂၉) တကယ့်ကို ဝမ်းသာစရာ​ပါပဲ။ အရေးကြီးဆုံးကတော့ မကြာခင် ကောင်းကင်နဲ့ မြေကြီး​ပေါ်မှာ ရှိတဲ့​သူ​အားလုံး မေတ္တာရှင် ဖခင်​တစ်ပါးတည်းကိုပဲ ဂုဏ်တင်​ချီးမွမ်း​ပြီး ဝတ်ပြု​ကြပါလိမ့်မယ်။