လေ့လာရန် ဆောင်းပါး ၆
“မိန်းမရဲ့ ဦးခေါင်းဟာ ယောက်ျား”
“မိန်းမရဲ့ ဦးခေါင်းဟာ ယောက်ျား။”—၁ ကော. ၁၁:၃။
သီချင်း ၁၃ စံနမူနာရှင် ခရစ်တော်
အကြိုသုံးသပ်ချက် *
၁။ အိမ်ထောင်ပြုဖို့ စဉ်းစားနေတဲ့ တစ်ကိုယ်ရေ ညီအစ်မတွေ ဘယ်မေးခွန်းတွေ သုံးသပ်သင့်သလဲ။
ခရစ်ယာန်အားလုံးဟာ ယေရှုခရစ်ရဲ့ ပြည့်ဝစုံလင်တဲ့ ဦးစီးမှုအောက်မှာ ရှိတယ်။ ဒါပေမဲ့ ခရစ်ယာန် အမျိုးသမီးတစ်ယောက် အိမ်ထောင်ကျတဲ့အခါ မစုံလင်တဲ့ အမျိုးသားရဲ့ ဦးစီးမှုအောက် ရောက်သွားလို့ အခက်အခဲတွေ ရှိနိုင်တယ်။ ဒါကြောင့် အိမ်ထောင်ပြုဖို့ စဉ်းစားတဲ့အခါ ဒီမေးခွန်းတွေကို သုံးသပ်သင့်တယ်– ‘ဒီညီအစ်ကို အိမ်ထောင်ဦးစီးကောင်း ဖြစ်မယ်လို့ ဘယ်အချက်တွေက ပြနေသလဲ။ ဘဝမှာ ယေဟောဝါကို အဓိကထားသလား။ မထားဘူးဆိုရင် အိမ်ထောင်ပြုပြီးနောက် ငါ့ကို ဘုရားရေးရာဘက် ကောင်းကောင်း ဦးဆောင်နိုင်မယ်လို့ ဘာကြောင့် ထင်နေတာလဲ။’ ကိုယ့်ကိုယ်ကိုယ်လည်း ဒီလို မေးသင့်တယ်– ‘အိမ်ထောင်ကို အကျိုးပြုမယ့် ဘယ်အရည်အသွေးတွေ ငါ့မှာ ရှိသလဲ။ ငါ စိတ်ရှည်သလား။ ရက်ရောသလား။ ယေဟောဝါနဲ့ ဆက်ဆံရေးကောင်း ရှိသလား။’ (ဒေ. ၄:၉၊ ၁၂) အိမ်ထောင်ကျပြီးနောက် ဇနီးတစ်ယောက် ဘယ်လောက် ပျော်ရွှင်မလဲဆိုတာ အိမ်ထောင်မပြုခင် ချတဲ့ ဆုံးဖြတ်ချက်တွေအပေါ် အတိုင်းအတာတစ်ခုအထိ မူတည်ပါလိမ့်မယ်။
၂။ ဒီဆောင်းပါးမှာ ဘာအကြောင်း ဆွေးနွေးကြမလဲ။
၂ ခရစ်ယာန် ညီအစ်မများစွာဟာ ခင်ပွန်းကို လက်အောက်ခံရာမှာ အကောင်းဆုံး ပုံသက်သေ ပြနေကြတယ်။ တကယ် ချီးမွမ်းထိုက်တယ်။ အဲဒီလို သစ္စာရှိ အမျိုးသမီးတွေနဲ့အတူ ယေဟောဝါကို ဝတ်ပြုရတာ ဝမ်းသာစရာပါပဲ။ ဒီဆောင်းပါးမှာ မေးခွန်း သုံးခု ဆွေးနွေးပါမယ်– (၁) ဇနီးတွေ ရင်ဆိုင်ရတဲ့ အခက်အခဲတချို့က ဘာတွေလဲ။ (၂) ခင်ပွန်းကို ဘာကြောင့် လက်အောက်ခံရသလဲ။ (၃) ယေရှု၊ အဘိဂဲလ၊ ယောသပ်ရဲ့ ဇနီး မာရိဆီကနေ လက်အောက်ခံခြင်းအကြောင်း ခရစ်ယာန် ခင်ပွန်းနဲ့ ဇနီးတွေ ဘာသင်ယူနိုင်သလဲ။
ခရစ်ယာန် ဇနီးတွေ ရင်ဆိုင်ရတဲ့ အခက်အခဲများ
၃။ ပြည့်ဝစုံလင်တဲ့ အိမ်ထောင်ရေးဆိုတာ ဘာကြောင့် မဖြစ်နိုင်သလဲ။
၃ အိမ်ထောင်ရေးဟာ ဘုရားဆီက ပြည့်ဝစုံလင်တဲ့ လက်ဆောင်ပါ။ ဒါပေမဲ့ လူတွေကတော့ မစုံလင်ဘူး။ (၁ ယော. ၁:၈) ဒါကြောင့် အိမ်ထောင်သည်တွေဟာ “ဘဝဒုက္ခတွေ” ကြုံရမယ်လို့ ကျမ်းစာမှာ သတိပေးတယ်။ (၁ ကော. ၇:၂၈) ဇနီးတစ်ယောက် ရင်ဆိုင်ရနိုင်တဲ့ အခက်အခဲတချို့ကိုပဲ စဉ်းစားကြည့်ပါ။
၄။ ခင်ပွန်းကို လက်အောက်ခံရတာ သိက္ခာကျတယ်လို့ ဇနီးတစ်ယောက် ဘာကြောင့် ခံစားရနိုင်သလဲ။
၄ ဇနီးတစ်ယောက်ဟာ ကြီးပြင်းလာတဲ့ နောက်ခံကြောင့် ခင်ပွန်းကို လက်အောက်ခံရတာ သိက္ခာကျတယ်လို့ ခံစားနေရနိုင်တယ်။ “ကျွန်မ ကြီးပြင်းလာတဲ့ ဒေသမှာ မိန်းမတွေဟာ ယောက်ျားတွေနဲ့ အရာရာမှာ တန်းတူ ဖြစ်နေရမယ်လို့ အမြဲ ပြောလေ့ရှိတယ်။ ခင်ပွန်းတွေကို ယေဟောဝါ အခွင့်အာဏာ ပေးထားမှန်း၊ ဇနီးတွေလည်း ခင်ပွန်းကို လက်အောက်ခံဖို့၊ ထိုက်သင့်တဲ့ လေးစားမှု ရဖို့ ယေဟောဝါ စီစဉ်ထားမှန်း ကျွန်မ သိတယ်။ ဒါပေမဲ့ ဦးစီးမှု အစီအစဉ်ကို မျှမျှတတ မြင်ဖို့ သိပ်ခက်တယ်” လို့ အမေရိကန်မှာ နေတဲ့ မာရီစို ပြောတယ်။
၅။ အမျိုးသားတချို့မှာ အမျိုးသမီးတွေနဲ့ပတ်သက်ပြီး ကျမ်းစာနဲ့ မညီတဲ့ ဘယ်သဘောထားတွေ ရှိနေသလဲ။
၅ အမျိုးသမီးတစ်ယောက်ဟာ မိန်းမတွေ အရေးမပါဘူးလို့ ယူဆတဲ့ အမျိုးသားနဲ့ အိမ်ထောင်ကျနေတာ ဖြစ်နိုင်တယ်။ “ကျွန်မတို့ ဒေသမှာ ယောက်ျားတွေ အရင် စားပြီးမှ မိန်းမတွေ စားရတယ်။ သမီးမိန်းကလေးတွေဆိုရင် ချက်ပြုတ်၊ သန့်ရှင်းရေး လုပ်ရတယ်။ သားယောက်ျားတွေကိုတော့ အမေနဲ့ အစ်မညီမတွေက ‘သခင်’ လို ပြုစုစောင့်ရှောက်ရတယ်” လို့ တောင်အမေရိကမှာ နေတဲ့ အီဗွန် ပြောတယ်။ အာရှမှာ နေတဲ့ ယင့်လင်းလည်း ဒီလိုပြောတယ်– “မိန်းမတွေ ပညာတတ်ဖို့၊ စွမ်းရည် ရှိဖို့ မလိုဘူးလို့ အဓိပ္ပာယ်ရတဲ့ စကားမျိုး ကျွန်မတို့ ဘာသာစကားမှာ ရှိတယ်။ မိန်းမတာဝန်ဟာ အိမ်မှုကိစ္စ လုပ်ဖို့ပဲ။ ကိုယ့်သဘောထားကို ဘာမှ ပြောပြခွင့် မရှိဘူး။” အဲဒီလို မေတ္တာမဲ့တဲ့၊ ကျမ်းစာနဲ့ မညီတဲ့ သဘောထားတွေ လွှမ်းမိုးခံနေရတဲ့ ခင်ပွန်းဟာ ဇနီးရဲ့ ဘဝကို ပိုခက်ခဲစေတယ်။ ယေရှုကို တုပရာ မရောက်ဘူး။ ယေဟောဝါရဲ့ မျက်နှာသာလည်း ရမှာ မဟုတ်ဘူး။—ဧ. ၅:၂၈၊ ၂၉။ ၁ ပေ. ၃:၇။
၆။ ယေဟောဝါနဲ့ ဆက်ဆံရေး ခိုင်မြဲနေဖို့ အိမ်ထောင်သည် ညီအစ်မတွေ ဘာလုပ်ရမလဲ။
၆ ရှေ့ဆောင်းပါးမှာ ဖော်ပြခဲ့တဲ့အတိုင်း မိသားစုရဲ့ ဘုရားရေးရာပိုင်း၊ စိတ်ပိုင်း၊ ရုပ်ပိုင်း လိုအပ်ချက်တွေကို ခင်ပွန်း ဖြည့်ဆည်းပေးဖို့ ယေဟောဝါ မျှော်လင့်တယ်။ (၁ တိ. ၅:၈) ဒါပေမဲ့ အိမ်ထောင်သည် ညီအစ်မတွေဟာ အလုပ်များတဲ့ကြား နေ့တိုင်း ကျမ်းစာ ဖတ်ဖို့၊ တွေးတောဆင်ခြင်ဖို့၊ ယေဟောဝါဆီ စိတ်ထက်သန်စွာ ဆုတောင်းဖို့ အချိန် ဖယ်ထားရမယ်။ အဲဒီလို လုပ်ဖို့ ခက်နိုင်တယ်။ အလုပ်များလို့ အချိန်၊ ခွန်အား မရှိတော့ဘူးလို့ ခံစားရနိုင်တယ်။ ဒါပေမဲ့ အချိန်ယူဖို့ အရေးကြီးတယ်။ ဘာကြောင့်လဲဆိုတော့ ယေဟောဝါက ကျွန်တော်တို့ တစ်ယောက်စီကို မိမိနဲ့ နှစ်ကိုယ်ကြား ဆက်ဆံရေး ရှိစေချင်လို့ပဲ။—တ. ၁၇:၂၇။
၇။ ဘုရားပေး တာဝန်ကို ကျေပွန်ဖို့ ဘာက ဇနီးကို ပိုလွယ်ကူစေမလဲ။
၇ မစုံလင်တဲ့ ခင်ပွန်းကို လက်အောက်ခံဖို့ ကြိုးစားအားထုတ်ရနိုင်တယ်။ ဒါပေမဲ့ လက်အောက်ခံသင့်တဲ့ ကျမ်းစာ အကြောင်းရင်းကို နားလည်၊ လက်ခံမယ်ဆိုရင် ယေဟောဝါ ပေးထားတဲ့ တာဝန်ကို ကျေပွန်ဖို့ ပိုလွယ်ကူပါလိမ့်မယ်။
ဘာကြောင့် လက်အောက်ခံသင့်
၈။ ဧဖက် ၅:၂၂-၂၄ မှာ ဖော်ပြတဲ့အတိုင်း ခင်ပွန်းကို ဇနီး ဘာကြောင့် လက်အောက်ခံသင့်သလဲ။
၈ ခရစ်ယာန် ဇနီးဟာ ယေဟောဝါ တောင်းဆိုထားတဲ့အတွက် ခင်ပွန်းကို လက်အောက်ခံတယ်။ (ဧဖက် ၅:၂၂-၂၄ ကိုဖတ်ပါ။) ယေဟောဝါဟာ အမြဲ မေတ္တာရှိကြောင်း၊ ဘုရား တောင်းဆိုသမျှဟာ ကိုယ့်အကောင်းဆုံး အကျိုးအတွက် ဖြစ်ကြောင်း သိလို့ ကောင်းကင်ဖခင်ကို ယုံကြည်စိတ်ချတယ်။—တရား. ၆:၂၄။ ၁ ယော. ၅:၃။
၉။ ခင်ပွန်းရဲ့ အခွင့်အာဏာကို ခရစ်ယာန် ဇနီး လေးစားရင် ဘာအကျိုး ရမလဲ။
၉ လောကက ယေဟောဝါရဲ့ စံနှုန်းတွေကို ဂရုမစိုက်ဖို့၊ လက်အောက်ခံရတာ သိက္ခာကျတယ်လို့ သဘောထားဖို့ အမျိုးသမီးတွေကို အားပေးတယ်။ အဲဒီလို သဘောထား ရှိဖို့ အားပေးသူတွေဟာ မေတ္တာရှင် ဘုရားသခင်ကို မသိကြဘူး။ ယေဟောဝါက သိက္ခာကျစေမယ့် အရာတစ်ခုခုကို ချစ်သမီးတွေ လုပ်ဖို့ ဘယ်တော့မှ တောင်းဆိုမှာ မဟုတ်ဘူး။ ယေဟောဝါ ပေးထားတဲ့ တာဝန်ကို ကျေပွန်ဖို့ ကြိုးစားအားထုတ်တဲ့ ညီအစ်မဟာ အိမ်ထောင်ကို ငြိမ်သက်အေးချမ်းစေတယ်။ (ဆာ. ၁၁၉:၁၆၅) ကိုယ်ရော၊ ခင်ပွန်းရော၊ သားသမီးတွေပါ အကျိုးရတယ်။
၁၀။ ကယ်ရိုရဲ့ စကားကနေ ဘာသင်ယူနိုင်သလဲ။
၁၀ မစုံလင်တဲ့ ခင်ပွန်းကို လက်အောက်ခံတဲ့ ဇနီးဟာ ဦးစီးမှု အစီအစဉ်ကို အစပြုခဲ့တဲ့ ယေဟောဝါကို ချစ်ကြောင်း၊ လေးစားကြောင်း ဖော်ပြရာရောက်တယ်။ တောင်အမေရိကမှာ နေတဲ့ ကယ်ရိုက “ကိုယ့်ယောက်ျား အမှားတွေ လုပ်မိမယ်ဆိုတာ ကျွန်မ သိတယ်။ ဒါပေမဲ့ ကိုယ့်တုံ့ပြန်ပုံက ယေဟောဝါနဲ့ ကိုယ့်ဆက်ဆံရေးကို ဘယ်လောက် တန်ဖိုးထားကြောင်း ဖော်ပြရာရောက်တဲ့အတွက် ဘုရားမျက်နှာသာ ရချင်စိတ်နဲ့ ဆက်လက်အောက်ခံနေပါမယ်” လို့ ပြောတယ်။
၁၁။ ခွင့်လွှတ်ဖို့ အန်နီးစ်ကို ဘာက ကူညီပေးသလဲ။ သူ့စကားကနေ ဘာသိရသလဲ။
၁၁ ကိုယ့်ခံစားချက်နဲ့ စိုးရိမ်မှုတွေကို ခင်ပွန်း အရေးမလုပ်ဘူးလို့ ထင်နေရင် လေးစားဖို့၊ လက်အောက်ခံဖို့ ခက်နိုင်တယ်။ ဒါပေမဲ့ အိမ်ထောင်သည် ညီအစ်မ အန်နီးစ် ဘယ်လို တုံ့ပြန်တယ်ဆိုတာ သတိပြုကြည့်ပါ။ “စိတ်မနာဖို့ ကျွန်မ ကြိုးစားတယ်။ အားလုံး မှားတတ်တယ်ဆိုတာ သတိရပေးတယ်။ ယေဟောဝါလိုပဲ ကြည်ကြည်ဖြူဖြူ ခွင့်လွှတ်ဖို့ ပန်းတိုင်ထားတယ်။ အဲဒီလိုခွင့်လွှတ်တဲ့အခါ စိတ်ငြိမ်သက်မှု ပြန်ရလာတယ်” လို့ အန်နီးစ် ပြောတယ်။ (ဆာ. ၈၆:၅) ခွင့်လွှတ်တတ်တဲ့ ဇနီးဟာ လက်အောက်ခံဖို့ ပိုလွယ်ကူနိုင်တယ်။
ကျမ်းစာပုံနမူနာတွေကနေ ဘာသင်ယူနိုင်သလဲ
၁၂။ ကျမ်းစာမှာ ဘယ်ပုံနမူနာတွေ ပါသလဲ။
၁၂ လက်အောက်ခံတာ ပျော့ညံ့တာပဲလို့ တချို့ တွေးမိနိုင်တယ်။ အဲဒါ သိပ်မှားတယ်။ ရဲရင့်သူတွေ ဖြစ်ပေမဲ့
လက်အောက်ခံခဲ့တဲ့ ကျမ်းစာ ပုံနမူနာတွေ ရှိတယ်။ ယေရှု၊ အဘိဂဲလ၊ မာရိဆီကနေ ဘာသင်ယူနိုင်ကြောင်း သုံးသပ်ကြည့်ကြစို့။၁၃။ ယေဟောဝါကို ယေရှု ဘာကြောင့် လက်အောက်ခံသလဲ။ ရှင်းပြပါ။
၁၃ ယေရှုဟာ ယေဟောဝါကို လက်အောက်ခံတာ ဘာမှ မသိလို့၊ အစွမ်းအစ မရှိလို့ မဟုတ်ဘူး။ ယေရှုရဲ့ ရိုးရှင်းတဲ့ သွန်သင်ချက်တွေကို ကြည့်ရင် အလွန် ပညာရှိသူ ဖြစ်ကြောင်း သိနိုင်တယ်။ (ယော. ၇:၄၅၊ ၄၆) ယေရှုရဲ့ စွမ်းရည်ကို ယေဟောဝါ သိလို့ စကြဝဠာကို ဖန်ဆင်းရာမှာ မိမိနဲ့အတူ တွဲလုပ်ခွင့် ပေးခဲ့တယ်။ (ပညာ. ၈:၃၀။ ဟီ. ၁:၂-၄) ယေရှု ရှင်ပြန်ထမြောက်ချိန်ကစပြီး “ကောင်းကင်မှာရော မြေကြီးမှာပါ အခွင့်အာဏာရှိသမျှ” ကို ယေဟောဝါ ပေးအပ်ထားတယ်။ (မ. ၂၈:၁၈) ယေရှုဟာ အစွမ်းအစတွေ ရှိပေမဲ့ ဖခင်ယေဟောဝါကို ချစ်လို့ လမ်းညွှန်မှု ရဖို့ ဖခင်ကို အမြဲ အားကိုးတယ်။—ယော. ၁၄:၃၁။
၁၄။ (က) အမျိုးသမီးတွေကို ယေဟောဝါ သဘောထားပုံကနေ ခင်ပွန်းတွေ ဘာသင်ယူနိုင်သလဲ။ (ခ) ပညာအလိမ္မာ ၃၁ ပါစကားတွေကနေ ခင်ပွန်းတွေ ဘာသင်ယူနိုင်သလဲ။
၁၄ ခင်ပွန်းတွေ ဘာသင်ယူနိုင်သလဲ။ မိန်းမတွေဟာ ယောက်ျားတွေထက် နိမ့်ကျတယ်ဆိုပြီး ယေဟောဝါ ယူဆလို့ လက်အောက်ခံခိုင်းတာ မဟုတ်ပါဘူး။ ယေရှုနဲ့အတူ တွဲဖက်အုပ်ချုပ်ဖို့ အမျိုးသားတွေကိုရော အမျိုးသမီးတွေကိုပါ ရွေးချယ်ထားတာကို ကြည့်ရင် အဲဒီအချက် ထင်ရှားတယ်။ (ဂလ. ၃:၂၆-၂၉) ယေဟောဝါဟာ သားတော်ကို အခွင့်အာဏာ လွှဲအပ်ခြင်းအားဖြင့် ယုံကြည်စိတ်ချကြောင်း ဖော်ပြတယ်။ ပညာရှိတဲ့ ခင်ပွန်းလည်း ဇနီးကို အခွင့်အာဏာ အတော်အတန် ပေးအပ်ပါမယ်။ လုပ်ရည်ကိုင်ရည် ရှိတဲ့ ဇနီးဟာ တစ်အိမ်လုံးကို စီမံခန့်ခွဲတယ်၊ မြေတွေ ရောင်းဝယ်တယ်၊ စီးပွားရေး လုပ်ငန်းတွေ လုပ်တယ်လို့ ကျမ်းစာ ဖော်ပြတယ်။ (ပညာအလိမ္မာ ၃၁:၁၅၊ ၁၆၊ ၁၈ ကိုဖတ်ပါ။) ဘာမှ ပြောပိုင်ခွင့် မရှိတဲ့ ကျွန်တစ်ယောက် မဟုတ်ဘူး။ ခင်ပွန်းက သူ့ကို ယုံကြည်စိတ်ချပြီး သူ့သဘောထားတွေကို နားထောင်ပေးတယ်။ (ပညာအလိမ္မာ ၃၁:၁၁၊ ၂၆၊ ၂၇ ကိုဖတ်ပါ။) ယောက်ျားက ဇနီးကို အဲဒီလို လေးလေးစားစား ဆက်ဆံမယ်ဆိုရင် ဇနီးအနေနဲ့ ပျော်ရွှင်စွာ လက်အောက်ခံပါလိမ့်မယ်။
ယေဟောဝါကို လက်အောက်ခံတဲ့ ယေရှုဆီကနေ လုပ်ရည်ကိုင်ရည်ရှိ ဇနီးတွေ ဘာသင်ယူနိုင်သလဲ (စာပိုဒ် ၁၅ ကိုကြည့်ပါ)
၁၅။ ယေရှုရဲ့ ပုံနမူနာကနေ ဇနီးတွေ ဘာသင်ယူနိုင်သလဲ။
၁၅ ဇနီးတွေ ဘာသင်ယူနိုင်သလဲ။ ယေရှုမှာ ပြီးမြောက်အောင်မြင်မှုများစွာ ရှိပေမဲ့ ယေဟောဝါကို လက်အောက်ခံရတာ သိက္ခာကျတယ်လို့ သဘောမထားဘူး။ (၁ ကော. ၁၅:၂၈။ ဖိ. ၂:၅၊ ၆) အဲဒီလိုပဲ ယေရှုရဲ့ ပုံနမူနာကို လိုက်တဲ့ လုပ်ရည်ကိုင်ရည်ရှိ ဇနီးလည်း ခင်ပွန်းကို လက်အောက်ခံရတာ သိက္ခာကျတယ်လို့ သဘောမထားဘူး။ ခင်ပွန်းကို ချစ်လို့၊ အဓိကအားဖြင့် ယေဟောဝါကို ချစ်လို့၊ လေးစားလို့ ခင်ပွန်းကို ထောက်မပေးပါလိမ့်မယ်။
အဘိဂဲလဟာ ဒါဝိဒ်နဲ့ သူ့လူတွေဆီ အစားအစာ ပို့ပေးပြီးနောက် ဒါဝိဒ်ကို သွားတွေ့။ ကိုယ်တိုင် လက်စား မချေဖို့၊ လူသတ်တဲ့ အပြစ် မကျူးလွန်ဖို့ မြေပေါ် ပျပ်ဝပ်ပြီး တောင်းပန် (စာပိုဒ် ၁၆ ကိုကြည့်ပါ)
၁၆။ ၁ ရှမွေလ ၂၅:၃၊ ၂၃-၂၈ အရ အဘိဂဲလ ဘယ်အခက်အခဲတွေ ရင်ဆိုင်ရသလဲ။ (မျက်နှာဖုံးပုံကို ကြည့်ပါ။)
၁၆ အဘိဂဲလမှာ နာဗလလို့ခေါ်တဲ့ ခင်ပွန်း ရှိတယ်။ နာဗလဟာ မာနကြီးပြီး ကျေးဇူးကန်းတဲ့ တစ်ကိုယ်ကောင်းသမား ဖြစ်တယ်။ ဒါတောင် အိမ်ထောင်ကို လွယ်လွယ်နဲ့ အဆုံးသတ်ဖို့ အဘိဂဲလ မကြိုးစားဘူး။ ဒါဝိဒ်နဲ့ သူ့လူတွေ နာဗလကို သတ်ဖို့ လာတဲ့အခါ တိတ်တိတ်လေး နေလိုက်လို့ ရတယ်။ ဒါပေမဲ့ နာဗလနဲ့ အိမ်သားယောက်ျားတွေကို ကာကွယ်ဖို့ လက်တွေ့ကျကျ လုပ်ဆောင်ခဲ့တယ်။ လက်နက်ကိုင် လူ ၄၀၀ ရှေ့ သွားပြီး ဒါဝိဒ်ကို လေးလေးစားစား အကျိုးအကြောင်း ရှင်းပြဖို့ အဘိဂဲလအတွက် တော်တော် သတ္တိ လိုမှာပဲ။ ခင်ပွန်းရဲ့ လုပ်ရပ်အတွက် မိမိကိုပဲ အပြစ်ပုံချဖို့တောင် ပြောလိုက်သေးတယ်။ (၁ ရှမွေလ ၂၅:၃၊ ၂၃-၂၈ ကိုဖတ်ပါ။) ကြီးလေးတဲ့ အမှား မလုပ်မိအောင် အကြံပေးဖို့ သတ္တိရှိတဲ့ ဒီအမျိုးသမီးကို ယေဟောဝါ အသုံးပြုနေမှန်း ဒါဝိဒ် သိသွားတယ်။
၁၇။ ဒါဝိဒ်နဲ့ အဘိဂဲလ မှတ်တမ်းကနေ ခင်ပွန်းတွေ ဘာသင်ယူနိုင်သလဲ။
၁၇ ခင်ပွန်းတွေ ဘာသင်ယူနိုင်သလဲ။ အဘိဂဲလဟာ ဉာဏ်ပညာရှိသူ ဖြစ်တယ်။ သူ့အကြံကို ဒါဝိဒ် နားထောင်တာလည်း ပညာရှိတယ်။ ဒါကြောင့် အပြစ်မဲ့သူတွေကို
သတ်လိုက်တဲ့ အမှားမျိုး မလုပ်မိအောင် ရှောင်နိုင်ခဲ့တယ်။ အဲဒီလိုပဲ ပညာရှိတဲ့ ခင်ပွန်းဟာ အရေးကြီးတဲ့ ဆုံးဖြတ်ချက်တွေ ချတဲ့အခါ ဇနီးရဲ့ သဘောထားကို သေသေချာချာ ထည့်စဉ်းစားပေးပါလိမ့်မယ်။ ဇနီးရဲ့ အကြံဉာဏ်က ပညာမဲ့ ဆုံးဖြတ်ချက်တွေ မချမိအောင်တောင် ကူညီပေးနိုင်တယ်။၁၈။ အဘိဂဲလရဲ့ ပုံနမူနာကနေ ဇနီးတွေ ဘာသင်ယူနိုင်သလဲ။
၁၈ ဇနီးတွေ ဘာသင်ယူနိုင်သလဲ။ ယေဟောဝါကို ချစ်ပြီး လေးစားတဲ့ ဇနီးဟာ ယေဟောဝါကို ဝတ်မပြုတဲ့၊ ဘုရားစံနှုန်းတွေအတိုင်း မနေထိုင်တဲ့ ခင်ပွန်း ရှိနေရင်တောင် မိသားစုကို ကောင်းကျိုးပြုနိုင်တယ်။ အိမ်ထောင်ကို လွယ်လွယ်နဲ့ အဆုံးသတ်ဖို့ ကြိုးစားမှာ မဟုတ်ဘူး။ ဇနီးရဲ့ လေးစားမှု၊ လက်အောက်ခံမှုကြောင့် ယေဟောဝါအကြောင်း သင်ယူဖို့တောင် ခင်ပွန်း လှုံ့ဆော်ခံရနိုင်တယ်။ (၁ ပေ. ၃:၁၊ ၂) အဲဒီလို ဖြစ်မလာရင်တောင် လက်အောက်ခံတတ်တဲ့ ဇနီး မိမိအပေါ် သစ္စာရှိနေတာကို ယေဟောဝါ တန်ဖိုးထားတယ်။
၁၉။ ခင်ပွန်းကို ဇနီး မနာခံမယ့် အခြေအနေတချို့က ဘာတွေလဲ။
၁၉ လက်အောက်ခံတတ်တဲ့ ဇနီးဟာ ကျမ်းစာ ပညတ်မူတွေ ချိုးဖောက်ဖို့ ခင်ပွန်း တောင်းဆိုလာရင်တော့ နားထောင်မှာ မဟုတ်ဘူး။ ဥပမာ၊ မယုံကြည်သူ ခင်ပွန်းက လိမ်ဖို့၊ ခိုးဖို့၊ ကျမ်းစာနဲ့ မညီတာ တစ်ခုခု လုပ်ဖို့ ပြောလာတယ် ဆိုပါစို့။ အိမ်ထောင်သည် ညီအစ်မတွေ အပါအဝင် ခရစ်ယာန်အားလုံး ယေဟောဝါဘုရားနဲ့ ဆက်ဆံရေးကို အဓိကထားရမယ်။ ကျမ်းစာမူတွေ ချိုးဖောက်ဖို့ တောင်းဆိုခံရရင် မလုပ်နိုင်ရတဲ့ အကြောင်းရင်းကို ခိုင်မာပြတ်သားစွာ၊ ကြင်နာစွာ ရှင်းပြပြီး ငြင်းပယ်သင့်တယ်။—တ. ၅:၂၉။
စာပိုဒ် ၂၀ ကိုကြည့်ပါ *
၂၀။ မာရိဟာ ယေဟောဝါနဲ့ ဆက်ဆံရေးကောင်း ရှိကြောင်း ကျွန်တော်တို့ ဘယ်လို သိရသလဲ။
၂၀ မာရိဟာ ယေဟောဝါနဲ့ ရင်းနှီးတဲ့ နှစ်ကိုယ်ကြား ဆက်ဆံရေး ရှိတယ်။ ကျမ်းစာကို ကောင်းကောင်း ကျွမ်းကျင်တယ်။ နှစ်ခြင်းဆရာ ယောဟန်ရဲ့ မိခင် ဧလိရှဗက်နဲ့ စကားပြောချိန်မှာ ဟီဘရူးကျမ်းစောင်ထဲက ကျမ်းစကား ၂၀ ကျော် ကိုးကားခဲ့တယ်။ (လု. ၁:၄၆-၅၅) ဒီအချက်ကို စဉ်းစားကြည့်ပါ– မာရိဟာ ယောသပ်နဲ့ စေ့စပ်ထားပြီး ဖြစ်ပေမဲ့ ကောင်းကင်တမန်က ယောသပ်ဆီ အရင် မသွားဘဲ မာရိကို တိုက်ရိုက် စကားပြောပြီး ဘုရားသခင့် သားတော်ကို မွေးဖွားမယ့်အကြောင်း အသိပေးတယ်။ (လု. ၁:၂၆-၃၃) မာရိကို ယေဟောဝါ ကောင်းကောင်း သိတယ်။ သားတော်ကို ချစ်ပြီး ဂရုစိုက်မယ်ဆိုတာ ယုံကြည်စိတ်ချတယ်။ ယေရှု သေဆုံးပြီး ကောင်းကင်ကို ထမြောက်ပြီးနောက်မှာတောင် မာရိဟာ ယေဟောဝါနဲ့ ဆက်ဆံရေးကောင်း ဆက်ရှိခဲ့မှာ သေချာတယ်။—တ. ၁:၁၄။
၂၁။ မာရိအကြောင်း ကျမ်းစာမှတ်တမ်းကနေ ခင်ပွန်းတွေ ဘာသင်ယူနိုင်သလဲ။
၂၁ ခင်ပွန်းတွေ ဘာသင်ယူနိုင်သလဲ။ ပညာရှိတဲ့ ခင်ပွန်းဟာ ကိုယ့်ဇနီး ကျမ်းစာ ကောင်းကောင်း နားလည်တာကို ဝမ်းသာပေးတယ်။ စိတ်အနှောင့်အယှက် မဖြစ်ဘူး။ ကိုယ့်နေရာ ယူတော့မှာပဲလို့ မခံစားရဘူး။ ကျမ်းစာနဲ့ ကျမ်းစာမူတွေကို ကောင်းကောင်း နားလည်တဲ့ ဇနီးဟာ မိသားစုကို အကျိုးပြုနိုင်မှန်း သဘောပေါက်တယ်။ ဒါပေမဲ့ ခင်ပွန်းထက် ဇနီး ပိုပညာတတ်ရင်တောင် မိသားစု ဝတ်ပြုမှုနဲ့ တခြား ဘုရားရေးရာ လုပ်ဆောင်မှုတွေကို ဦးဆောင်ရမှာတော့ ခင်ပွန်းရဲ့ တာဝန်ပဲ။—ဧ. ၆:၄။
ကိုယ်ပိုင်လေ့လာမှု လုပ်တာ၊ တွေးတောဆင်ခြင်တာနဲ့ပတ်သက်ပြီး ယေရှုရဲ့ မိခင် မာရိဆီကနေ ဇနီးတွေ ဘာသင်ယူနိုင်သလဲ (စာပိုဒ် ၂၂ ကိုကြည့်ပါ) *
၂၂။ မာရိဆီကနေ ဇနီးတွေ ဘာသင်ယူနိုင်သလဲ။
၂၂ ဇနီးတွေ ဘာသင်ယူနိုင်သလဲ။ ဇနီးဟာ ဝတ်ပြုရေးမှာ ခင်ပွန်း ဦးဆောင်တာကို လက်အောက်ခံရမှာ မှန်ပေမဲ့ ကိုယ်နဲ့ ဘုရား ဆက်ဆံရေး ကောင်းဖို့ ကိုယ့်မှာပဲ တာဝန်ရှိတယ်။ (ဂလ. ၆:၅) ဒါကြောင့် ကိုယ်ပိုင် လေ့လာမှု လုပ်ဖို့၊ တွေးတောဆင်ခြင်ဖို့ အချိန် ဖယ်ထားရမယ်။ ဒီနည်းအားဖြင့် ယေဟောဝါကို ဆက်ချစ်ပြီး လေးစားနေမှာ ဖြစ်သလို ခင်ပွန်းကိုလည်း ပျော်ရွှင်စွာ လက်အောက်ခံနိုင်မှာ ဖြစ်တယ်။
၂၃။ လက်အောက်ခံတတ်တဲ့ ဇနီးဟာ ကိုယ်တိုင်၊ မိသားစုနဲ့ အသင်းတော်ကို ဘယ်လို အကျိုးပြုသလဲ။
၂၃ ယေဟောဝါကို ချစ်လို့ ခင်ပွန်းကို လက်အောက်ခံနေတဲ့ ဇနီးဟာ ယေဟောဝါရဲ့ ဦးစီးမှု အစီအစဉ်ကို လက်မခံသူတွေထက် ပိုပျော်ရွှင်ကျေနပ်ပါလိမ့်မယ်။ လူငယ် ညီအစ်ကို/မတွေအတွက်လည်း ပုံသက်သေကောင်း ဖြစ်တယ်။ မိသားစုမှာသာမက အသင်းတော်မှာပါ မေတ္တာရှိပြီး ငြိမ်သက်တဲ့ ဝန်းကျင်ကို ဖြစ်စေတယ်။ (တိ. ၂:၃-၅) ဒီနေ့ခေတ်မှာ ယေဟောဝါကို သစ္စာရှိရှိ အမှုဆောင်နေသူ အများစုဟာ အမျိုးသမီးတွေ ဖြစ်တယ်။ (ဆာ. ၆၈:၁၁) ယောက်ျားဖြစ်စေ၊ မိန်းမဖြစ်စေ ကျွန်တော်တို့ ယောက်တိုင်း အသင်းတော်မှာ အရေးကြီးတဲ့ အခန်းကဏ္ဍ ရှိထားတယ်။ ကိုယ်ရထားတဲ့ အခန်းကဏ္ဍကို ဘယ်လို ကျေပွန်နိုင်ကြောင်း နောက်ဆောင်းပါးမှာ ဆွေးနွေးပါမယ်။
သီချင်း ၁၃၁ “ဘုရားသခင် တွဲဖက်ထား”
^ အပိုဒ်၊ 5 အိမ်ထောင်သည် အမျိုးသမီးတွေ ခင်ပွန်းကို လက်အောက်ခံဖို့ ယေဟောဝါ စီစဉ်ပေးထားတယ်။ အဲဒီထဲမှာ ဘာတွေ ပါဝင်သလဲ။ ယေရှုနဲ့ ကျမ်းစာပါ အမျိုးသမီးတွေရဲ့ ပုံနမူနာကနေ လက်အောက်ခံခြင်းအကြောင်း ခရစ်ယာန် ခင်ပွန်းနဲ့ ဇနီးတွေ များစွာ သင်ယူနိုင်ပါတယ်။
^ အပိုဒ်၊ 68 ပုံအညွှန်း– နှစ်ခြင်းဆရာ ယောဟန်ရဲ့ မိခင် ဧလိရှဗက်နဲ့ စကားပြောချိန်မှာ ဟီဘရူးကျမ်းစောင်ထဲက ကျမ်းစကားတွေကို မာရိ အလွတ်ကိုးကားနေ။
^ အပိုဒ်၊ 70 ပုံအညွှန်း– ခရစ်ယာန် ဇနီးတစ်ယောက် ဘုရားနဲ့ ဆက်ဆံရေးကောင်း ရှိအောင် အချိန်ယူပြီး ကျမ်းစာ လေ့လာနေ။