အပြုံးလေး တစ်ချက်
ဖိလစ်ပိုင်နိုင်ငံ၊ ဘာဂီယိုမြို့၊ လမ်းတစ်လမ်းမှာ အမျိုးသမီး နှစ်ယောက် လျှောက်လာတယ်။ အများရှေ့ သက်သေခံခြင်း စင်ကို သတိထားမိပေမဲ့ အနားကိုတော့ မသွားဘူး။ စင်နားမှာ ရပ်နေတဲ့ ညီအစ်မ ဟယ်လန်က သူတို့ကို လှိုက်လှိုက်လှဲလှဲ ပြုံးပြတယ်။ အမျိုးသမီးတွေ ကိုယ့်လမ်းကိုယ် ဆက်သွားပေမဲ့ ညီအစ်မရဲ့ နွေးထွေးတဲ့ အပြုံးကိုတော့ စွဲမှတ်သွားကြတယ်။
နောက်ပိုင်း၊ အဲဒီအမျိုးသမီးတွေ ဘတ်စ်ကား စီးပြီး အိမ်ပြန်သွားနေတုန်း jw.org ဆိုင်းဘုတ် အကြီးကြီး တပ်ထားတဲ့ နိုင်ငံတော် ခန်းမကို လှမ်းတွေ့တယ်။ အစောပိုင်းတုန်းက သက်သေခံခြင်း စင်မှာ တွေ့ခဲ့တဲ့ စာလုံးတွေပဲဆိုတာ သတိရသွားပြီး နှစ်ယောက်သား ဘတ်စ်ကားပေါ်က ဆင်းလိုက်တယ်။ နိုင်ငံတော်ခန်းမ ဂိတ်တံခါးမှာ ကပ်ထားတဲ့ အသင်းတော် အစည်းအဝေး အချိန်ဇယားကို သွားကြည့်တယ်။
အဲဒီအပတ်မှာ ကျင်းပတဲ့ အစည်းအဝေးတစ်ခုကို တက်ကြတယ်။ နိုင်ငံတော်ခန်းမထဲ ဝင်သွားတဲ့အခါ ဟယ်လန်ကို တွေ့လိုက်ရလို့ သိပ်အံ့ဩသွားတယ်။ သူတို့ကို လှိုက်လှိုက်လှဲလှဲ ပြုံးပြခဲ့တဲ့ အမျိုးသမီး ဖြစ်မှန်း ချက်ချင်း မှတ်မိကြတယ်။ ဟယ်လန်က “ကျွန်မဆီ သူတို့ လျှောက်လာတော့ ကျွန်မ အမှားတစ်ခုခုများ လုပ်ထားမိလို့လားဆိုပြီး အရမ်း စိတ်ပူသွားတယ်” လို့ ပြောတယ်။ အမျိုးသမီး နှစ်ယောက်က ဟယ်လန်ကို သက်သေခံခြင်း စင်မှာ တွေ့ဖူးတဲ့အကြောင်း ရှင်းပြကြတယ်။
အမျိုးသမီး နှစ်ယောက်ဟာ အစည်းအဝေး အစီအစဉ်နဲ့ ပေါင်းသင်းမှုကို သိပ်သဘောကျသွားတယ်။ အစည်းအဝေး အပြီး တခြားသူတွေ သန့်ရှင်းရေးလုပ်နေတာ မြင်တော့ ဝိုင်းကူလို့ ရမလားလို့ မေးကြတယ်။ တစ်ယောက်ကတော့ အခု ဖိလစ်ပိုင်မှာ မနေတော့ဘူး။ နောက်တစ်ယောက်ကတော့ အစည်းအဝေးတွေ တက်နေပြီး ကျမ်းစာ စလေ့လာနေတယ်။ ဒါတွေအားလုံးဟာ အပြုံးလေးတစ်ချက်ကနေ အစပြုခဲ့တာ။