၁-၂။ လူအားလုံးရဲ့ အဖြစ်ဟာ စာပိုဒ် ၁ မှာ ဖော်ပြထားတဲ့ လူငယ်လေးအဖြစ်နဲ့ ဘယ်လို ဆင်တူသလဲ။

 ချမ်းသာတဲ့ မိသားစုမှာ ကြီးပြင်းလာတဲ့ လူငယ်တစ်ယောက်ကို မြင်ယောင်ကြည့်ပါ။ တစ်ရက်မှာ မိဘတွေ အသတ်ခံလိုက်ရတယ်။ ဒီသတင်းဆိုးကြောင့် လူငယ်လေး ဝမ်းနည်းပက်လက်ဖြစ်သွားတယ်။ ဒါပေမဲ့ ဒီထက်ဆိုးတဲ့ သတင်း ရှိသေးတယ်။ မိဘတွေ သုံးဖြုန်းခဲ့လို့ အကြွေးတောင်ပုံရာပုံ ကျန်ခဲ့တယ်ဆိုတဲ့ သတင်းပါ။ လူငယ်လေးခမျာ မိဘရဲ့ ပိုင်ဆိုင်မှုတွေကို မဟုတ်ဘဲ အကြွေးတွေကို အမွေရလိုက်တယ်။ အကြွေးရှင်တွေကလည်း အကြွေးလိုက်တောင်းနေကြပြီ။ အကြွေးတွေ များလွန်းလို့ တစ်သက် ဆပ်လို့ ကုန်မှာ မဟုတ်ဘူး။

^၂ အဲဒီလူငယ်လေးအဖြစ်နဲ့ ကျွန်တော်တို့အဖြစ် တော်တော် ဆင်တူတယ်။ ကျွန်တော်တို့ရဲ့ ကနဦးမိဘ အာဒံနဲ့ ဧဝဟာ စုံလင်ခဲ့တယ်။ လှပတဲ့ ပရဒိသုမှာ နေခဲ့ရတယ်။ (က. ၁:၂၇။ ၂:၇-၉) အပူအပင်ကင်းကင်း ထာဝရ အသက်ရှင်ခွင့် ရှိခဲ့တယ်။ ဒါပေမဲ့ သူတို့ အပြစ်လုပ်လိုက်လို့ အရာရာ ပြောင်းလဲသွားတယ်။ ပရဒိသုစံအိမ်ကော ထာဝရ အသက်ရှင်ခွင့်ပါ ဆုံးရှုံးသွားတယ်။ ဒီတော့ သားစဉ်မြေးဆက်တွေကို ဘာပဲ အမွေပေးလိုက်နိုင်သလဲ။ “အပြစ်ဟာ လူတစ်ယောက် [အာဒံ] ကြောင့် လူ့လောကထဲ ရောက်လာတယ်။ အပြစ်ကြောင့် သေခြင်းလည်း ပေါ်ပေါက်လာတယ်။ ဒါကြောင့် လူအားလုံးဟာ အပြစ်ရှိသူတွေ ဖြစ်သွားတဲ့အတွက် သေဆုံးကြရတယ်” လို့ ကျမ်းစာ ဆိုတယ်။ (ရော. ၅:၁၂) သားစဉ်မြေးဆက် ကျွန်တော်တို့ကို အာဒံ ပေးလိုက်တဲ့ အမွေကတော့ သေခြင်းကို ပေါ်ပေါက်စေတဲ့ အပြစ်ပါပဲ။ အဲဒီအပြစ်ဟာ ဘယ်လူသားမှ မဆပ်နိုင်တဲ့ အကြွေးနဲ့ တူတယ်။—ဆာ. ၄၉:၈။

၃။ အပြစ်ဟာ အကြွေးနဲ့ ဘယ်လို တူသလဲ။

 ^၃ အပြစ်ကို အကြွေးနဲ့ ယေရှု ခိုင်းနှိုင်းခဲ့တယ်။ (မ. ၆:၁၂။ လု. ၁၁:၄) ကျွန်တော်တို့ အပြစ်လုပ်တဲ့အခါ ယေဟောဝါဘုရားဆီ အကြွေးတင်သွားတာနဲ့ တူတယ်။ အပြစ်ကြွေး ပြန်ဆပ်ဖို့ လိုတယ်။ ဒါပေမဲ့ ကိုယ့်ဘာသာကိုယ်ဆိုရင် ဘယ်လိုမှ ဆပ်မကုန်တဲ့အတွက် အပြစ်ကြွေး ကျေမယ့်လမ်းဆိုလို့ သေလမ်းပဲ ရှိတယ်။—ရော. ၆:၇၊ ၂၃။

၄။ (က) တစ်ယောက်ယောက်သာ မကူညီရင် အပြစ်သားအားလုံး ဘာဖြစ်သွားမလဲ။ (ဆာလံ ၄၉:၇-၉) (ခ) ကျမ်းစာမှာ ပါတဲ့ “အပြစ်” ဆိုတဲ့ စကားလုံးက ဘာကို ရည်ညွှန်းသလဲ။ (“ အပြစ်” လေးထောင့်ကွက်ကို ကြည့်ပါ။)

^၄ အာဒံနဲ့ ဧဝ ဆုံးရှုံးသွားသမျှကို ကျွန်တော်တို့ ပြန်ရနိုင်သလား။ ကိုယ့်အစွမ်းအစနဲ့တော့ မရနိုင်ဘူး။ (ဆာလံ ၄၉:၇-၉ ကို ဖတ်ပါ။) တစ်ယောက်ယောက်သာ မကူညီရင် ကျွန်တော်တို့မှာ ထာဝရ အသက်ရှင်ဖို့ မျှော်လင့်ချက်၊ ရှင်ပြန်ထမြောက်ဖို့ မျှော်လင့်ချက် မရှိနိုင်ဘူး။ သေပြီး ဘယ်တော့မှ ပြန်မရှင်ဘူးဆိုရင် ကျွန်တော်တို့ရဲ့ သေခြင်းဟာ တိရစ္ဆာန်တွေရဲ့ သေခြင်းနဲ့ မခြားတော့ဘူး။—ဒေ. ၃:၁၉။ ၂ ပေ. ၂:၁၂။

၅။ ကျွန်တော်တို့ အမွေရထားတဲ့ အပြစ်ကြွေး ကျေနိုင်ဖို့ မေတ္တာရှင်အဖ ဘာပြင်ဆင်ပေးသလဲ။ (ရုပ်ပုံကို ကြည့်ပါ။)

^၅ ဆောင်းပါးအစမှာ ဖော်ပြထားတဲ့ လူငယ်အကြောင်း ပြန်စဉ်းစားကြည့်ပါ။ အကြွေးအားလုံး ဆပ်ပေးမယ်လို့ သူဌေးတစ်ယောက် ပြောလာရင် သူ ဘယ်လို ခံစားရမလဲ။ ရက်ရောတဲ့ ဒီကမ်းလှမ်းမှုကို ကျေးဇူးတင်စွာ လက်ခံမှာ ဖြစ်တယ်။ အဲဒီလိုပဲ အာဒံဆီက ကျွန်တော်တို့ အမွေရထားတဲ့ အပြစ်ကြွေး ကျေနိုင်ဖို့ လက်ဆောင်တစ်ခုကို မေတ္တာရှင်အဖ ယေဟောဝါ ပြင်ဆင်ပေးတယ်။ “ဘုရားသခင်က လူ့လောကကို အလွန်ချစ်တယ်။ ဒါကြောင့် မိမိရဲ့ သားကို ယုံကြည်သက်ဝင်သူတိုင်း ဖျက်ဆီးမခံရဘဲ ထာဝရအသက် ရနိုင်ဖို့ အဲဒီတစ်ဦးတည်းသော သားကိုတောင် ပေးအပ်ခဲ့တယ်” လို့ ယေရှု ပြောတယ်။ (ယော. ၃:၁၆) အဲဒီလက်ဆောင်က အပြစ်ကြွေး ကျေစေတဲ့အပြင် ယေဟောဝါနဲ့ ဆက်ဆံရေးကောင်း ရှိစေတယ်။

၆။ ဒီဆောင်းပါးမှာ ဘယ်ကျမ်းစာအသုံးအနှုန်းတွေကို လေ့လာသွားမလဲ။ ဘာကြောင့်လဲ။

^၆ အဲဒီလက်ဆောင်မွန်ကြောင့် ကျွန်တော်တို့ ဘယ်လိုနည်းနဲ့ အပြစ်ကြွေး ကျေနိုင်သလဲ။ အဖြေ သိရဖို့ ပြန်လည်သင့်မြတ်ခြင်း၊ အပြစ်ဖြေခြင်း၊ ရွေးဖိုး၊ လွတ်မြောက်ခြင်း၊ ဖြောင့်မတ်သူအဖြစ် သတ်မှတ်ခံရခြင်း ဆိုတဲ့ ကျမ်းစာအသုံးအနှုန်းတစ်ခုစီရဲ့ အဓိပ္ပာယ်ကို ဒီဆောင်းပါးမှာ လေ့လာသွားပါမယ်။ ကျွန်တော်တို့ကို ခွင့်လွှတ်နိုင်ဖို့ ယေဟောဝါ ဘာတွေ လုပ်ခဲ့တယ်ဆိုတာ သိလာတဲ့အခါ ယေဟောဝါရဲ့ ခွင့်လွှတ်မှုကို ပိုတန်ဖိုးထားလေးမြတ်တတ်လာမယ်။

ပြန်လည်သင့်မြတ်ဖို့ဆိုတဲ့ ရည်ရွယ်ချက်

၇။ (က) အာဒံနဲ့ ဧဝ ဘာဆုံးရှုံးသွားသေးသလဲ။ (ခ) အာဒံနဲ့ ဧဝရဲ့ သားစဉ်မြေးဆက်တွေ ဘာသိပ်လိုအပ်နေသလဲ။ (ရောမ ၅:၁၀၊ ၁၁)

^၇ အာဒံနဲ့ ဧဝဟာ ထာဝရ အသက်ရှင်ခွင့်သာမက အဖယေဟောဝါနဲ့  အဖိုးတန် ဆက်ဆံရေးပါ ဆုံးရှုံးသွားတယ်။ အပြစ်မလုပ်ခင်ကဆိုရင် ဘုရားမိသားစုဝင် ဖြစ်ခဲ့တာ။ (လု. ၃:၃၈) အပြစ်လုပ်လိုက်ချိန်မှာတော့ ဘုရားမိသားစုကနေ ထုတ်ပယ်ခံလိုက်ရတယ်။ အဲဒီနောက်မှ သားသမီးတွေ မွေးလာတယ်။ (က. ၃:၂၃၊ ၂၄။ ၄:၁) မွေးလာတဲ့ သားသမီးတစ်ယောက်မှ ဘုရားမိသားစုဝင် မဖြစ်တော့ဘူး။ ဒါကြောင့် သူတို့ရဲ့ သားစဉ်မြေးဆက် ကျွန်တော်တို့ဟာ ယေဟောဝါနဲ့ ပြန်လည်သင့်မြတ်ဖို့ သိပ်လိုအပ်နေတယ်။ (ရောမ ၅:၁၀၊ ၁၁ ကို ဖတ်ပါ။) တစ်နည်းအားဖြင့် ယေဟောဝါနဲ့ ဆက်ဆံရေးကောင်း ရှိဖို့ လိုအပ်နေတယ်။ အကိုးအကားတစ်ခုအရ “ပြန်လည်သင့်မြတ်ခြင်း” ဆိုတဲ့ ဂရိစကားလုံးဟာ “ရန်သူအဖြစ်ကနေ မိတ်ဆွေ ဖြစ်ခြင်း” ကို ဆိုလိုနိုင်တယ်။ အံ့ဩစရာကတော့ ပြန်လည်သင့်မြတ်ဖို့ အစပြု လုပ်ဆောင်သူဟာ ယေဟောဝါ ဖြစ်နေတာပါပဲ။ ပြန်လည်သင့်မြတ်ဖို့ ယေဟောဝါ ဘယ်လို လုပ်သလဲ။

အပြစ်ဖြေခြင်းဆိုတဲ့ အစီအစဉ်

၈။ အပြစ်ဖြေခြင်းဆိုတာ ဘာလဲ။

^၈ အပြစ်ဖြေခြင်းဆိုတာ မိမိနဲ့ အပြစ်သားတွေ ပြန်လည်သင့်မြတ်ဖို့ ယေဟောဝါ ပြင်ဆင်ပေးတဲ့ အစီအစဉ် ဖြစ်တယ်။ ဆုံးရှုံးသွားတဲ့၊ ပျက်စီးသွားတဲ့ အရာတစ်ခုခုကို ပြန်ရဖို့၊ အစားထိုးဖို့ တန်ဖိုးတူတာ တစ်ခုခုနဲ့ လဲလှယ်တဲ့ အစီအစဉ်ပါ။ “အပြစ်ဖြေခြင်း” နဲ့ အဓိပ္ပာယ် ဆင်တူတဲ့ စကားလုံးကို ခရစ်ယာန် ဂရိကျမ်းစောင်မှာ သုံးထားတယ်။ ပြန်လည်သင့်မြတ်ခြင်းဆိုတဲ့ စကားလုံးပါ။ (ရော. ၃:၂၅) လူတွေကို ဘုရားနဲ့ ပြန်လည်သင့်မြတ်လာစေတဲ့၊ ဆက်ဆံရေးကောင်း ရှိလာစေတဲ့ နည်းလမ်းကို ရည်ညွှန်းပါတယ်။

၉။ အစ္စရေးတွေ အပြစ်ခွင့်လွှတ်ခံရဖို့ ယာယီအစီအစဉ်အဖြစ် ယေဟောဝါ ဘာပြင်ဆင်ပေးသလဲ။

^၉ အစ္စရေးတွေ အပြစ်ခွင့်လွှတ်ခံရဖို့၊ မိမိနဲ့ ဆက်ဆံရေးကောင်း ရှိဖို့ ယာယီအစီအစဉ်ကို ယေဟောဝါ ပြင်ဆင်ပေးတယ်။ အဲဒါကတော့ နှစ်စဉ် အပြစ်ဖြေရာနေ့ ကျင်းပဖို့ပါ။ အပြစ်ဖြေရာနေ့မှာ ပုရောဟိတ်မင်းက အစ္စရေးတွေအတွက် တိရစ္ဆာန်ပူဇော်သက္ကာတွေ ဆက်သပေးရတယ်။ တိရစ္ဆာန်ဟာ လူထက် နိမ့်ကျလို့ တိရစ္ဆာန်ပူဇော်သက္ကာတွေက လူတွေရဲ့ အပြစ်ကို အကုန်အစင် မဖြေပေးနိုင်ဘူး။ ဒါပေမဲ့ တောင်းဆိုထားတဲ့ ပူဇော်သက္ကာတွေ ဆက်သနေသရွေ့ နောင်တရတဲ့ အစ္စရေးတွေကို ယေဟောဝါ လိုလိုလားလား ခွင့်လွှတ်ပေးတယ်။ (ဟီ. ၁၀:၁-၄) ဒါ့အပြင် အပြစ်ဖြေရာနေ့နဲ့ တခြားအခါသမယတွေမှာ အပြစ်ဖြေရာ ပူဇော်သက္ကာတွေ အထပ်ထပ် ပူဇော်ရတာက မိမိတို့ အပြစ်ကြီးကြောင်း၊ တစ်ကြိမ်တည်းအပြီး အပြစ်ဖြေပေးမယ့် ပူဇော်သက္ကာ လိုအပ်ကြောင်း အစ္စရေးတွေကို သတိရစေတယ်။

၁၀။ လူတွေကို တစ်ကြိမ်တည်းအပြီး အပြစ်ဖြေပေးနိုင်ဖို့ ယေဟောဝါ ဘာစီစဉ်ပေးသလဲ။

^၁၀ လူတွေကို တစ်ကြိမ်တည်းအပြီး အပြစ်ဖြေပေးနိုင်မယ့် အစီအစဉ် ယေဟောဝါ ပြင်ဆင်ပေးတယ်။ “လူအများရဲ့ အပြစ်ကို ခံပြီး မိမိကိုယ်ကို [ချစ်သား] တစ်ကြိမ်တည်းအပြီး ဆက်သ” စေဖို့ အစီအစဉ်ပါ။ (ဟီ. ၉:၂၈) ယေဟောဝါ စီစဉ်ထားတဲ့အတိုင်း ယေရှုဟာ “လူအများအတွက် ရွေးဖိုးအဖြစ် အသက်ကို ပေး” တယ်။ (မ. ၂၀:၂၈) ရွေးဖိုးဆိုတာ ဘာလဲ။

ရွေးဖိုးဆိုတဲ့ အဖိုးအခ

၁၁။ (က) ကျမ်းစာအရ ရွေးဖိုးဆိုတာ ဘာလဲ။ (ခ) ဘယ်လိုလူပဲ ရွေးဖိုး ပေးနိုင်သလဲ။

^၁၁ ကျမ်းစာအရ ရွေးဖိုးဆိုတာ လူတွေ အပြစ်ဖြေခံရဖို့၊ ဘုရားနဲ့ ပြန်လည်သင့်မြတ်ဖို့ ပေးရတဲ့ အဖိုးအခ ဖြစ်တယ်။ a အာဒံ ဆုံးရှုံးသွားတာတွေကို ပြန်ရဖို့ အဖိုးအခအဖြစ် ဘာပေးလိုက်ရသလဲ။ စုံလင်တဲ့ အသက်အပြင် ထာဝရ အသက်ရှင်ခွင့်ကိုပါ အာဒံနဲ့ ဧဝ ဆုံးရှုံးသွားတယ်ဆိုတာ သတိရပါ။ ဒါကြောင့် ဆုံးရှုံးသွားတာတွေနဲ့ တန်ဖိုးတူတဲ့ ရွေးဖိုး လိုအပ်တယ်။ (၁ တိ. ၂:၆) အဲဒီလိုရွေးဖိုးကို (၁) စုံလင်တဲ့၊ (၂) မြေကြီးပေါ် ထာဝစဉ် အသက်ရှင်နိုင်တဲ့၊ (၃) အဲဒီလိုအသက်ရှင်ခွင့်ကို ကျွန်တော်တို့အတွက် လိုလိုလားလား စွန့်လွှတ်ချင်တဲ့ အရွယ်ရောက်  အမျိုးသားတစ်ယောက်ကပဲ ပေးနိုင်မယ်။ အဲဒီလိုလူရဲ့ အသက်ကပဲ ဆုံးရှုံးခဲ့တဲ့ အသက်ကို အစားထိုးနိုင်မယ်။

၁၂။ ယေရှု ဘာကြောင့် ရွေးဖိုး ပေးနိုင်ခဲ့သလဲ။

^၁၂ ယေရှု ရွေးဖိုး ပေးနိုင်ခဲ့တဲ့ အကြောင်းရင်း သုံးခုကို သုံးသပ်ကြည့်ပါ။ (၁) ယေရှုဟာ စုံလင်တယ်၊ “အပြစ်မကျူးလွန်ခဲ့ဘူး။” (၁ ပေ. ၂:၂၂) (၂) စုံလင်သူ၊ အပြစ်ကင်းသူ ဖြစ်လို့ မြေကြီးပေါ် ထာဝစဉ် အသက်ရှင်နိုင်တယ်။ (၃) အဲဒီလိုအသက်ရှင်ခွင့်ကို ကျွန်တော်တို့အတွက် လိုလိုလားလား စွန့်လွှတ်ချင်တယ်။ (ဟီ. ၁၀:၉၊ ၁၀) စုံလင်သူ ယေရှုဟာ ပထမလူ အာဒံ အပြစ်မလုပ်ခင်က အခြေအနေနဲ့ တူတယ်။ (၁ ကော. ၁၅:၄၅) ဒါကြောင့် ယေရှု အသေခံလိုက်တဲ့အခါ အာဒံ ဆုံးရှုံးသွားတာတွေကို အစားထိုးဖို့ တန်ဖိုးတူတဲ့ အဖိုးအခ ပေးနိုင်သွားတယ်။ (ရော. ၅:၁၉) ဒီလိုနဲ့ ယေရှုဟာ “နောက်ဆုံးအာဒံ” ဖြစ်လာတယ်။ အာဒံ ဆုံးရှုံးသွားတာတွေအတွက် စုံလင်သူ နောက်တစ်ယောက် လာပေးဆပ်ဖို့ မလိုတော့ဘူး။ “တစ်ကြိမ်တည်းနဲ့ အပြီး” ယေရှု အသေခံခဲ့ပြီ ဖြစ်လို့ပဲ။—ဟီ. ၇:၂၇။ ၁၀:၁၂။

၁၃။ အပြစ်ဖြေခြင်းနဲ့ ရွေးဖိုး ဘာကွာသလဲ။

^၁၃ အပြစ်ဖြေခြင်းနဲ့ ရွေးဖိုး ဘာကွာသလဲ။ အပြစ်ဖြေခြင်းဆိုတာ မိမိနဲ့ လူတွေ ပြန်လည်သင့်မြတ်ဖို့ ဘုရား ပြင်ဆင်ပေးတဲ့ အစီအစဉ် ဖြစ်တယ်။ ရွေးဖိုးဆိုတာ အပြစ်ဖြေခြင်း အစီအစဉ် ဖြစ်မြောက်ဖို့ ပေးရတဲ့ အဖိုးအခ ဖြစ်တယ်။ အဲဒီအဖိုးအခကတော့ ကျွန်တော်တို့အတွက် သွန်းလောင်းခဲ့တဲ့ ယေရှုရဲ့ အဖိုးတန် သွေးပါပဲ။—ဧ. ၁:၇။ ဟီ. ၉:၁၄။

လွတ်မြောက်ခြင်း၊ ဖြောင့်မတ်သူအဖြစ် သတ်မှတ်ခံရခြင်းဆိုတဲ့ အကျိုးရလဒ်များ

၁၄။ အခု ဘာသုံးသပ်ကြမလဲ။ ဘာကြောင့်လဲ။

^၁၄ အပြစ်ဖြေခြင်း အစီအစဉ်ကြောင့် ဘာအကျိုးရလဒ်တွေ ရသလဲ။ အကျိုးရလဒ်တွေကို အသုံးအနှုန်းအမျိုးမျိုးနဲ့ ကျမ်းစာမှာ ဖော်ပြထားတယ်။ အသုံးအနှုန်းနှစ်ခုကို သုံးသပ်ကြမယ်။ အဲဒီအသုံးအနှုန်းတွေကို သုံးသပ်တဲ့အခါ ယေဟောဝါ ခွင့်လွှတ်လို့ ဘာအကျိုးရလဒ်တွေ ရသလဲဆိုတာ သဘောပေါက်လာမယ်။

၁၅-၁၆။ (က) ကျမ်းစာမှာ ပါတဲ့ “လွတ်မြောက်ခြင်း” ဆိုတဲ့ စကားလုံးက ဘာကို ရည်ညွှန်းသလဲ။ (ခ) အပြစ်နဲ့ သေခြင်းလက်အောက်ကနေ လွတ်မြောက်လို့ ဘယ်လို ခံစားရသလဲ။

^၁၅ ကျမ်းစာမှာ ပါတဲ့ လွတ်မြောက်ခြင်းဆိုတာ ရွေးဖိုးကြောင့် အပြစ်ကြွေး ကင်းလွတ်ခြင်း၊ ပြစ်ဒဏ်ကနေ ကင်းလွတ်ခြင်းကို ရည်ညွှန်းတယ်။ “ဘိုးဘေးတွေဆီက ဆက်ခံရရှိတဲ့ အချည်းနှီးဘဝကနေ ခင်ဗျားတို့ကို လွတ်မြောက်စေခဲ့တာဟာ ရွှေငွေစတဲ့ ပျက်စီးတတ်တဲ့အရာတွေ မဟုတ်မှန်း ခင်ဗျားတို့ သိပါတယ်။ အနာအဆာ၊ အစွန်းအထင်း ကင်းတဲ့ သိုးသငယ်ရဲ့ သွေးနဲ့တူတဲ့ ခရစ်တော်ရဲ့ တန်ဖိုးကြီးတဲ့ သွေးနဲ့ လွတ်မြောက်စေခဲ့တာပါ” လို့ တမန်တော် ပေတရု ပြောတယ်။—၁ ပေ. ၁:၁၈၊ ၁၉။

^၁၆ အပြစ်နဲ့ သေခြင်းကြောင့် လူတွေ အကြီးအကျယ် ဒုက္ခရောက်ကြရတယ်။ ရွေးဖိုး ပူဇော်သက္ကာကြောင့်သာ အပြစ်နဲ့ သေခြင်းရဲ့ စိုးမိုးမှုအောက်ကနေ ကျွန်တော်တို့ လွတ်မြောက်နိုင်ကြတာ။ (ရော. ၅:၂၁) ယေရှုရဲ့ အဖိုးတန် သွေးကြောင့် ရလာတဲ့ ဒီလွတ်မြောက်မှုအတွက် ယေဟောဝါနဲ့ ယေရှုအပေါ် ကျေးဇူးကြွေး တင်နေတယ်လို့ ခံစားကြရတယ်။—၁ ကော. ၁၅:၂၂။

၁၇-၁၈။ (က) ဖြောင့်မတ်သူအဖြစ် သတ်မှတ်ခံရခြင်းဆိုတာ ဘာကို ဆိုလိုသလဲ။ (ခ) ဖြောင့်မတ်သူအဖြစ် သတ်မှတ်ခံရလို့ ဘာအကျိုးရသလဲ။

^၁၇ ဖြောင့်မတ်သူအဖြစ် သတ်မှတ်ခံရခြင်းဆိုတာ စွဲချက် ရုပ်သိမ်းခံရခြင်း၊ ပြစ်မှုမှတ်တမ်း ပယ်ဖျက်ခံရခြင်းကို ဆိုလိုတယ်။ ဒီလိုပယ်ဖျက်ပေးလိုက်ပေမဲ့ မိမိရဲ့ တရားမျှတမှုစံနှုန်းကို ယေဟောဝါ မချိုးဖောက်ပါဘူး။ ဖြောင့်မတ်သူအဖြစ် ယေဟောဝါ သတ်မှတ်တာဟာ ကျွန်တော်တို့ သတ်မှတ်ခံထိုက်လို့ မဟုတ်ဘူး။ ကျွန်တော်တို့ရဲ့ အပြစ်တွေကို လက်သင့်ခံလို့ မဟုတ်ဘူး။ ရွေးဖိုး ပေးထားလို့၊ အပြစ်ဖြေခြင်း အစီအစဉ် ကို ကျွန်တော်တို့ ယုံကြည်သက်ဝင်လို့ အပြစ်တွေ ပယ်ဖျက်ပေးလိုက်တာ ဖြစ်တယ်။—ရော. ၃:၂၄။ ဂလ. ၂:၁၆။

 ^၁၈ ဖြောင့်မတ်သူအဖြစ် သတ်မှတ်ခံရလို့ ဘာအကျိုးရသလဲ။ ဖြောင့်မတ်သူအဖြစ် သတ်မှတ်ခံရသူတချို့ဟာ ကောင်းကင်မှာ ယေရှုနဲ့အတူ အုပ်ချုပ်ဖို့ ရွေးချယ်ခံရတယ်။ ဘုရားရဲ့ သားသမီးတွေ ဖြစ်လာတယ်။ (တိ. ၃:၇။ ၁ ယော. ၃:၁) အပြစ်ခွင့်လွှတ်ခံရတယ်။ တစ်ခါမှ အပြစ်မလုပ်ဖူးသလို ဖြစ်သွားလို့ နိုင်ငံတော်ဝင်ဖို့ အရည်အချင်း ပြည့်မီသွားတယ်။ (ရော. ၈:၁၊ ၂၊ ၃၀) တချို့ကျတော့ မြေကြီးပေါ် ထာဝစဉ် အသက်ရှင်ဖို့ မျှော်လင့်ချက် ရှိလာတယ်။ အပြစ်ခွင့်လွှတ်ခံရပြီး ဘုရားရဲ့ မိတ်ဆွေတွေ ဖြစ်လာတယ်။ (ယာ. ၂:၂၁-၂၃) အာမဂေဒုန်မှာ အသက်ရှင်လွတ်မြောက်မယ့် လူအုပ်ကြီးဟာ သေခြင်းတရားနဲ့ တစ်ခါမှ ရင်ဆိုင်စရာ မလိုတဲ့ အလားအလာ ရှိမယ်။ (ယော. ၁၁:၂၆) သေဆုံးသွားတဲ့ “ဖြောင့်မတ်သူရော မဖြောင့်မတ်သူတွေပါ” ပြန်ရှင်လာမယ်။ (တ. ၂၄:၁၅။ ယော. ၅:၂၈၊ ၂၉) နာခံမှုရှိတဲ့ မြေကြီးပေါ်က ဘုရားကျေးကျွန်အားလုံးဟာ နောက်ဆုံးမှာ “ဘုရားသခင့် သားသမီးတွေရဲ့ ဘုန်းအသရေနဲ့ ပြည့်စုံတဲ့ လွတ်လပ်မှုကို ခံစားရမယ်။” (ရော. ၈:၂၁) အဖယေဟောဝါနဲ့ အပြည့်အဝ ပြန်လည်သင့်မြတ်လာမယ့်အချိန်ကို ကျွန်တော်တို့ မျှော်လင့်တကြီး စောင့်နေကြပါတယ်။ ဒါဟာ အပြစ်ဖြေခြင်း အစီအစဉ်ကြောင့် ရလာတဲ့ အံ့ဖွယ်ကောင်းချီးပါပဲ။

၁၉။ ကျွန်တော်တို့အခြေအနေ ဘယ်လို ပြောင်းသွားသလဲ။ (“ ယေဟောဝါရဲ့ ခွင့်လွှတ်မှု” လေးထောင့်ကွက်ကိုလည်း ကြည့်ပါ။)

^၁၉ အရာရာ ဆုံးရှုံးသွားပြီး တစ်သက် ဆပ်မကုန်တဲ့ အကြွေးတွေ အမွေရလိုက်တဲ့ လူငယ်အဖြစ်နဲ့ ကျွန်တော်တို့အဖြစ် ဆင်တူခဲ့တာ မှန်ပါတယ်။ ဒါပေမဲ့ ယေဟောဝါ ပြင်ဆင်ပေးတဲ့ အပြစ်ဖြေခြင်း အစီအစဉ်နဲ့ ရွေးဖိုးကြောင့် ကျွန်တော်တို့အခြေအနေ ပြောင်းသွားတယ်။ ယေရှုခရစ်ကို ယုံကြည်သက်ဝင်တဲ့အတွက် အပြစ်နဲ့ သေခြင်းလက်အောက်ကနေ လွတ်မြောက်နိုင်ကြတယ်။ အပြစ်ခွင့်လွှတ်ခံရကြတယ်။ တစ်ခါမှ အပြစ်မလုပ်ဖူးသလို ဖြစ်သွားကြတယ်။ အကြီးမားဆုံး အကျိုးရလဒ်ကတော့ အခုအချိန်မှာတောင် မေတ္တာရှင်အဖ ယေဟောဝါနဲ့ ဆက်ဆံရေးကောင်း ရှိနိုင်တာပါပဲ။

၂၀။ နောက်ဆောင်းပါးမှာ ဘာအကြောင်း ဆွေးနွေးကြမလဲ။

^၂၀ ယေဟောဝါနဲ့ ယေရှု လုပ်ပေးခဲ့တာတွေကို စဉ်းစားတဲ့အခါ ကျွန်တော်တို့ ကျေးဇူးတင်စိတ် တဖွားဖွား ပေါ်လာကြတယ်။ (၂ ကော. ၅:၁၅) သူတို့သာ မကူညီရင် ကျွန်တော်တို့ မျှော်လင့်ချက် မဲ့နေကြမှာ။ ယေဟောဝါရဲ့ ခွင့်လွှတ်မှုကြောင့် တစ်ယောက်ချင်းစီအနေနဲ့ကော ဘာအကျိုးရသလဲ။ ဒီအကြောင်း နောက်ဆောင်းပါးမှာ ဆွေးနွေးပါမယ်။