၁၊ ၂။ (က) ပြောင်းရွှေ့​လာတဲ့ သားသမီးများ​စွာ ဘာပြဿနာ ကြုံရ​သလဲ။ (ခ) ဒီဆောင်းပါးမှာ ဘယ်မေးခွန်းတွေကို ဆွေးနွေးကြမလဲ။

“ငယ်ငယ်​တုန်းက အိမ်နဲ့ အသင်းတော်​မှာ ပြောင်းရွှေ့​လာတဲ့ မိဘတွေရဲ့ ဘာသာစကားကို ပြောတယ်။ ဒါပေမဲ့ ကျောင်း​စတက်​တော့ ဒေသခံ​ဘာသာစကား ပြော​ရတာ ပိုကြိုက်​လာတယ်။ နှစ်​အနည်းငယ်​အတွင်းမှာပဲ ပြောင်းပြန်​ဖြစ်သွား​တယ်။ အစည်းအဝေးတွေကို နားမလည်​တော့ဘူး။ မိဘတွေရဲ့ ယဉ်ကျေးမှု​ကိုလည်း မသိ​တော့ဘူး” လို့ ဂျော်ရှုဝါ​ ပြောတယ်။ ဂျော်​ရှု​ဝါ​ရဲ့ အဖြစ်မျိုး ဖြစ်​တတ်​ပါတယ်။

^၂ ဒီနေ့ လူပေါင်း သန်း​ ၂၄၀ ​ကျော်​ဟာ မွေးရပ်​တိုင်းပြည် ပြင်ပ​မှာ နေထိုင်​ကြရတယ်။ ပြောင်းရွှေ့​လာတဲ့ မိဘ ဖြစ်မယ်ဆိုရင် ယေဟောဝါကို ချစ်တတ်​လာအောင်၊ “အမှန်တရား လမ်းစဉ်​မှာ လျှောက်လှမ်း​နေ” အောင် သားသမီးတွေကို ဘယ်လို အကောင်းဆုံး ကူညီပေး​နိုင်သလဲ။ (၃ ယော. ၄) တခြားသူတွေက​ကော ဘယ်လို ကူညီပေး​နိုင်မလဲ။

၃၊ ၄။ (က) သားသမီး​တွေအတွက် မိဘတွေ ပုံသက်သေကောင်း ဘယ်လို ချမှတ်​နိုင်သလဲ။ (ခ) သားသမီး​တွေဆီကနေ မိဘတွေ ဘာကို မမျှော်လင့်​သင့်သလဲ။

^၃ မိဘ​တို့၊ သားသမီး​တွေ ထာဝရအသက်​လမ်းပေါ် စ​လျှောက်​ဖို့ မိဘတွေရဲ့ ပုံသက်သေ​က သိပ်​အရေးကြီးတယ်။ ‘ဘုရားသခင်ရဲ့ နိုင်ငံတော်ကို’ မိဘတွေ “အမြဲ ဦးစားထား”  တာ သားသမီး​တွေ မြင်တဲ့အခါ နေ့စဉ်​လိုအပ်ရာ​တွေအတွက် ယေဟောဝါကို အားကိုး​တတ်လာ​မယ်။ (မ. ၆:၃၃၊ ၃၄) ရိုးရိုး​ကုပ်​ကုပ် နေထိုင်ပါ။ ရုပ်​ဝတ္ထု​ပစ္စည်း​ထက် ဘုရား​ရေးရာ​ကို ဦးစားထား​ပါ။ အကြွေး​မ​တင်​အောင် ကြိုးစားပါ။ ယေဟောဝါရဲ့ မျက်နှာသာရ​ဖို့ “ကောင်းကင်​ဘဏ္ဍာ” ဆည်းပူး​ပါ။ စည်းစိမ်ချမ်းသာ၊ “လူတွေရဲ့ မျက်နှာသာ” ကို မ​ရှာ​ပါနဲ့။—မာကု ၁၀:၂၁၊ ၂၂ ကိုဖတ်ပါ။ ယော. ၁၂:၄၃။

^၄ သားသမီး​တွေအတွက် အချိန်​မပေး​နိုင်​လောက်တဲ့​အထိ အလုပ်​မများ​ပါနဲ့။ ကိုယ်တိုင်​အတွက်၊ မိဘ​အတွက် ထင်ပေါ်ကျော်ကြား​မှု၊ စည်းစိမ်ချမ်းသာ မ​ရှာ​ဘဲ ယေဟောဝါကို ဦးစားထား​ဖို့ ဆုံးဖြတ်​လို့ ဂုဏ်ယူ​ကြောင်း သားသမီးတွေကို သိ​စေ​ပါ။ မိဘတွေ အေးအေးဆေးဆေး နေနိုင်​ဖို့ သားသမီး​တွေ ထောက်ပံ့​ရမယ်​ဆိုတဲ့ ခရစ်ယာန်မဆန်​တဲ့​အမြင်​မျိုး ရှောင်​ပါ။ “သားသမီး​တွေ​က မိဘ​အတွက် ဥစ္စာ​စုဆောင်း​ပေး​ရတာ မဟုတ်ဘူး။ မိဘတွေက​သာ သားသမီး​တွေအတွက် စုဆောင်း​ပေး​ရ” ကြောင်း သတိရပါ။—၂ ကော. ၁၂:၁၄။

၅။ သားသမီးတွေကို ယေဟောဝါ​အကြောင်း မိဘတွေ ဘာကြောင့် ပြောပြ​ရ​မလဲ။

^၅ ကြိုဟော​ထားတဲ့​အတိုင်း “ဘာသာစကား အမျိုးမျိုး​ပြောတဲ့ လူမျိုး​တွေ” ယေဟောဝါရဲ့ အဖွဲ့အစည်း​ထဲ စုရုံးရောက်ရှိ​လာ​နေတယ်။ (ဇာ. ၈:၂၃) ဒါပေမဲ့ ဘာသာစကား အတားအဆီး​ကြောင့် သားသမီးတွေကို အမှန်တရား​အကြောင်း သင်ပေး​ဖို့ အခက်တွေ့​နိုင်တယ်။ သားသမီး​တွေဟာ မိဘတွေ​အတွက် အရေးကြီးဆုံး ကျမ်းစာသင်သား​တွေပါ။ ယေဟောဝါကို “သိကျွမ်း” မှ ထာဝရအသက် ရကြ​မှာ။ (ယော. ၁၇:၃) ယေဟောဝါရဲ့ သွန်သင်ချက်​တွေအကြောင်း သားသမီး​တွေ သိ​ဖို့ သင့်တော်​တဲ့အခါ​တိုင်း “ပြောပြ” နေရ​မယ်။—တရားဟောရာ ၆:၆၊ ၇ ကိုဖတ်ပါ။

၆။ မိဘတွေရဲ့ ဘာသာစကားကို သားသမီး​တွေ တတ်​မယ်ဆိုရင် ဘာ​အကျိုးရ​နိုင်သလဲ။ (ဆောင်းပါးအစမှာပါတဲ့ ရုပ်ပုံကို ကြည့်ပါ။)

^၆ သားသမီး​တွေဟာ ကျောင်း​နဲ့ ပတ်ဝန်းကျင်​က​နေ ဒေသခံ ဘာသာစကား သင်ယူနိုင်တယ်။ ဒါပေမဲ့ မိဘတွေ​နဲ့ မကြာခဏ ပြောဆိုဆက်သွယ်​မှ​ပဲ မိဘတွေရဲ့ ဘာသာ​စကားကို တတ်​မယ်။ မိဘ​ရဲ့ ဘာသာစကားကို သားသမီး​တွေ တတ်​ထား​ရင် သူတို့ရဲ့ ခံစားချက်ကို ပွင့်ပွင့်လင်းလင်း ပြောဆို​နားလည်​နိုင်မယ်။ တခြား​အကျိုးကျေးဇူး​တွေလည်း ရရှိမယ်။ ဘာသာစကား​နှစ်မျိုး တတ်​ထား​ရင် သားသမီး​တွေရဲ့ စဉ်းစား​တွေးခေါ်​နိုင်စွမ်း တိုးတက်​လာမယ်။ ပေါင်းသင်းဆက်ဆံရေး​လည်း ကောင်း​မယ်။ အမှုဆောင်လုပ်ငန်း​လည်း တိုးချဲ့​နိုင်မယ်။ “ဘာသာခြား​စကားပြော အသင်းတော်​နဲ့ ပေါင်း​ရတာ ပျော်စရာ​ပဲ။ ပိုလိုအပ်​တဲ့နေရာမှာ အမှုဆောင်​ရတာ သိပ်ကောင်း​တာပဲ” လို့ ပြောင်းရွှေ့​လာတဲ့ မိဘ​ရဲ့ သမီး ကာရို​လီ​နာ ပြောတယ်။

၇။ မိသားစု​မှာ ဘာသာစကား အတားအဆီး ရှိနေ​ရင် ဘာ​လုပ်​မလဲ။

^၇ ပြောင်းရွှေ့​လာတဲ့​သားသမီး​တွေဟာ ဒေသခံ​ယဉ်​ကျေး​မှု​နဲ့ ဘာသာစကား တတ်​သွား​တဲ့အခါ မိဘတွေရဲ့ ဘာသာ​စကားကို မပြော​ချင်​တော့ဘူး။ ပြော​လည်း မပြော​တတ်​တော့ဘူး။ သားသမီး​တွေ အဲဒီလို ဖြစ်နေ​ရင် ဒေသခံ​ဘာသာစကား နည်းနည်း သင်ယူနိုင်​မလား။ သူတို့​ပြောတဲ့​စကား၊ အပန်းဖြေမှု၊ ကျောင်းစာ​တွေကို နားလည်​ရင်၊ ဆရာ/မတွေ​နဲ့ တိုက်ရိုက် ဆက်သွယ်​နိုင်​ရင် သားသမီးတွေကို ခရစ်ယာန်တွေ​အဖြစ် ပို​ပြုစုပျိုးထောင်​နိုင်မယ်။ ဘာသာစကား​အသစ် သင်ယူ​ရာမှာ အချိန်၊ အားထုတ်မှု၊ နှိမ့်ချမှု​တော့ လိုတယ်။ သင့်​ကလေး နားမကြား​ဖြစ်နေ​ရင် ဆက်သွယ်​နိုင်​ဖို့ လက်သင်္ကေတပြစကား​ကို ကြိုးစား​သင်ယူ​မယ် မဟုတ်လား။ ဘာသာခြား​စကားပြော​တဲ့ သားသမီး​တွေအတွက်​လည်း အလားတူ ကြိုးစား​သင့်တယ် မဟုတ်လား။ *

၈။ ဒေသခံ​ဘာသာစကားကို မိဘတွေ သိပ်​နားမလည်​ရင်တောင် သားသမီးတွေကို ဘယ်လို ကူညီပေး​နိုင်သလဲ။

^၈ ပြောင်းရွှေ့​လာတဲ့ မိဘတွေ​အနေနဲ့ သားသမီး​တွေရဲ့ ဘာသာစကား​အသစ်​ကို ကျွမ်းကျွမ်းကျင်ကျင် ပြောတတ်​ဖို့ လက်တွေ့​မှာ မလွယ်​လှ​ဘူး။ ဒီ​အတားအဆီး​ကြောင့် “သမ္မာကျမ်းစာ” ပါ နက်နဲ​တဲ့ အကြောင်းအရာတွေ​ကို သင်ပေး​ ဖို့ အခက်တွေ့​နိုင်တယ်။ (၂ တိ. ၃:၁၅) အဲဒီလို​ဖြစ်နေ​ရင်တောင် သားသမီး​တွေ ယေဟောဝါကို သိလာ​ဖို့၊ ချစ်​လာဖို့ ကူညီပေး​နိုင်​ပါသေး​တယ်။ “ကျွန်တော်တို့ နား​အလည်​ဆုံး ဘာသာစကားကို အမေက​တော့ နည်းနည်း​ပဲ နားလည်​တယ်။ အမ​နဲ့ ကျွန်တော်က အမေ့​ဘာသာစကားကို ကောင်းကောင်း မတတ်​ဘူး။ ဒါပေမဲ့ အမေ လေ့လာ​တာ၊ ဆုတောင်း​တာ၊ အပတ်​တိုင်း မိသားစု ဝတ်ပြုမှု လုပ်တာ​ကို တွေ့​နေရ​တော့ ယေဟောဝါကို သိကျွမ်းဖို့ သိပ်​အရေးကြီး​မှန်း သဘောပေါက်လာတယ်” လို့ အကြီးအကဲ ရှန်​က ပြောတယ်။

၉။ ဘာသာစကား​နှစ်မျိုး သင်ယူ​ဖို့ လိုအပ်​နိုင်တဲ့ သားသမီးတွေကို မိဘတွေ ဘယ်လို ကူညီပေး​နိုင်သလဲ။

^၉ သားသမီး​တချို့ဟာ ကျောင်း​သုံး​ဘာသာစကား၊ အိမ်သုံး​ဘာသာစကား နှစ်မျိုး​စလုံး​နဲ့ ယေဟောဝါ​အကြောင်း သင်ယူ​ဖို့ လိုတယ်။ အဲဒါကြောင့် မိဘ​တချို့က ဘာသာစကား​နှစ်မျိုး​စလုံး​နဲ့ ပုံနှိပ်စာပေ၊ အသံသွင်း​ထားရာ​တွေ၊ ဗီဒီ​ယို​တွေကို အသုံးပြုကြတယ်။ သားသမီး​တွေ ယေဟောဝါနဲ့ ဆက်ဆံရေး ခိုင်မြဲ​အောင် ကူညီပေးဖို့ ပြောင်းရွှေ့​လာတဲ့​မိဘ​တွေ ပို​အချိန်ပေး​ရတယ်၊ ပို​ကြိုးစား​ရတယ်။

၁၀။ (က) ဘယ်​ဘာသာစကား​ပြော အသင်းတော်​မှာ တက်ရောက်​မယ်ဆို​တာ ဘယ်သူ​က ဆုံးဖြတ်​ရ​မလဲ။ (ခ) ဆုံးဖြတ်ချက် မချခင် ဘာ​လုပ်သင့်​သလဲ။

^၁၀ “တိုင်းတစ်ပါး​သားတွေ” မိမိဘာသာ​စကားပြော သက်သေခံ​တွေနဲ့ ဝေး​နေ​တဲ့အခါ ဒေသခံ​ဘာသာစကား​ပြော အသင်းတော်​နဲ့ ပူးပေါင်း​ဖို့ လိုတယ်။ (ဆာ. ၁၄၆:၉) ဒါပေမဲ့ အနီးအနား​မှာ မိခင်ဘာသာစကား​ပြော အသင်းတော် ရှိနေ​ရင် ဘယ်​ဘာသာစကား​ပြော အသင်းတော်​က မိသားစု​အတွက်​ အကောင်းဆုံး ဖြစ်​မလဲ​ဆိုတဲ့ မေးခွန်း ပေါ်လာတယ်။ အသေအချာ စဉ်းစား​ဆုတောင်း​ပါ။ ဇနီး၊ သားသမီး​တွေနဲ့ တိုင်ပင်​ပါ။ ပြီးမှ အိမ်ထောင်ဦးစီး​က ဆုံးဖြတ်​ပါ။ (၁ ကော. ၁၁:၃) အိမ်ထောင်ဦးစီး​က ဘယ်အချက်တွေ​ကို ထည့်​စဉ်းစား​သင့်သလဲ။ ဘယ်​မူတွေ​ကို ကျင့်သုံး​မလဲ။ တချို့ကို သုံးသပ်ကြည့်​ရ​အောင်။

၁၁၊ ၁၂။ (က) အစည်းအဝေးတွေမှာ အကျိုးခံစား​နိုင်​ဖို့ ဘာသာစကား​က သားသမီး​အပေါ် ဘယ်လို သက်ရောက်သလဲ။ (ခ) မိဘတွေရဲ့ ဘာသာစကားကို သားသမီး​တချို့ ဘာကြောင့် မသင်ယူ​ချင်​ကြတာ​လဲ။

^၁၁ သားသမီး​တွေ အမှန်တကယ် လိုအပ်​တာ​ကို မိဘ​တွေ ထည့်​စဉ်းစား​ပေး​ရမယ်။ ဘယ်​ဘာသာစကားနဲ့​ပဲ​ဖြစ်ဖြစ် အမှန်တရားကို ကောင်းကောင်း နားလည်ဖို့ ပတ်စဉ်​ အစည်းအဝေးတွေမှာ ကျမ်းစာ​သွန်သင်ချက်​ကို နာရီ​အနည်းငယ် နားထောင်​ရုံ​ထက်မက လိုအပ်တယ်။ စဉ်းစားကြည့်ပါ– နား​အလည်​ဆုံး ဘာသာစကားနဲ့ ကျင်းပတဲ့ အစည်းအဝေး​တွေ တက်ရောက်​ရုံ​နဲ့​ပဲ အကျိုးခံစား​နိုင်တယ်။ မိဘတွေ ထင်ထား​တာ​ထက် ပို​သင်ယူနိုင်တယ်။ ဘာသာစကားကို အပြည့်အဝ နားမလည်​ရင်​တော့ အကျိုးခံစား​ရမှာ မဟုတ်ဘူး။ (၁ ကောရိန္သု ၁၄:၉၊ ၁၁ ကိုဖတ်ပါ။) သားသမီး​ရဲ့ မိခင်ဘာသာစကား​ဟာ သူတွေး​ခေါ်​ခံစား​တဲ့​ဘာသာစကား အမြဲ​ဖြစ်ချင်​မှ​ဖြစ်မယ်။ သားသမီး​တချို့ဟာ ရင်​ထဲက မပါဘဲ မိဘတွေရဲ့ ဘာသာစကားနဲ့ မှတ်ချက်ပေး​နိုင်ကြ​တယ်၊ သရုပ်ပြ​နိုင်ကြ​တယ်၊ ဟောပြော​နိုင်ကြ​တယ်။

^၁၂ ဒီ့​အပြင် ကလေး​တစ်ယောက်​ရဲ့ စိတ်နှလုံး​ကို ဘာသာ​စကား​က​ပဲ လွှမ်းမိုး​ထားတာ မဟုတ်ဘူး။ အစပိုင်းမှာ ဖော်ပြခဲ့တဲ့ ဂျော်​ရှု​ဝါ​လည်း အဲဒီလို​ပါပဲ။ သူ့​အစ်မ အက်စတာ​က “မိဘတွေရဲ့ ဘာသာစကား၊ ယဉ်ကျေးမှု၊ ဘာသာတရား​တို့​က သားသမီးတွေကို စုပေါင်း​လွှမ်းမိုး​ထားတယ်” လို့ပြောတယ်။ မိဘတွေရဲ့ ယဉ်ကျေးမှု​ကို သားသမီး​တွေ မသိ​ဘူးဆို​ရင် မိဘတွေရဲ့ ဘာသာစကားနဲ့ ယုံကြည်ခြင်း​ကို မသင်ယူ​ချင်​တော့ဘူး။ ပြောင်းရွှေ့​လာတဲ့​မိဘတွေ ဘာ​လုပ်နိုင်​သလဲ။

၁၃၊ ၁၄။ (က) ပြောင်းရွှေ့​လာတဲ့ မောင်နှံတစ်စုံ​ဟာ မိသားစု​လိုက် ဒေသခံ ဘာသာစကား​ပြော အသင်းတော်ကို ဘာကြောင့် ပြောင်းရွှေ့​ခဲ့ကြ​တာလဲ။ (ခ) ယုံကြည်ခြင်း ခိုင်မာ​နေ​အောင် မိဘ​တွေ ဘယ်လို လုပ်ခဲ့ကြ​သလဲ။

^၁၃ ခရစ်ယာန်​မိဘတွေဟာ ကိုယ့်​အကြိုက်​ထက် သားသမီး​တွေရဲ့ အကျိုးကို ဦးစားပေး​ကြ​တယ်။ (၁ ကော. ၁၀:၂၄) ဂျော်​ရှု​ဝါ​နဲ့ အက်စတာ​တို့ရဲ့ ဖခင် ဆယ်​မြူ​ယယ် ဒီလိုပြောတယ်– “ဘယ်​ဘာသာစကား​က သားသမီး​တွေအတွက် ဘုရားရေးရာ​မှာ ပို​အကျိုးရှိ​သလဲ​ဆိုတာ သိအောင်  ကျွန်တော့်​ဇနီး​နဲ့ ကျွန်တော် လေ့လာ​တယ်။ ဉာဏ်ပညာရ​ဖို့ ဆုတောင်း​ကြ​တယ်။ အဖြေ​က​တော့ ကျွန်တော်တို့​အတွက် အဆင်ပြေ​လှ​တာ မဟုတ်ဘူး။ ဒါပေမဲ့ ကျွန်တော်တို့ရဲ့ ဘာသာ​စကားနဲ့ ကျင်းပတဲ့ အစည်းအဝေးတွေကနေ သားသမီး​တွေ အကျိုး​နည်းနည်း​ပဲ ရတာ​ကို သိလာတဲ့​အ​ခါ ဒေသခံ​ ဘာသာစကား​ပြော အသင်းတော်ကို ပြောင်းရွှေ့​ဖို ဆုံးဖြတ်​လိုက်တယ်။ ကျွန်တော်တို့ အတူတူ အစည်းအဝေး တက်​ကြ​တယ်၊ အမှုဆောင်ထွက်​ကြ​တယ်။ အတူတူ စားသောက်​ဖို့၊ ခရီးထွက်​ဖို့ ဒေသခံ မိတ်ဆွေတွေ​ကိုလည်း ဖိတ်ခေါ်​ကြ​တယ်။ ဒါတွေ​က ညီအစ်ကိုတွေ​ကို ပို​သိကျွမ်းဖို့၊ ယေဟောဝါကို ဘုရား​အဖြစ်​လောက်​သာ မဟုတ်ဘဲ ဖခင်၊ မိတ်ဆွေ​အဖြစ်​လည်း သိကျွမ်း​လာဖို့ သားသမီးတွေကို ကူညီ​ပေးတယ်။ ဒါတွေ​က ကျွန်တော်တို့ရဲ့ ဘာသာစကားကို သားသမီး​တွေ ကျွမ်းကျင်​ဖို့​ထက် ပို​အရေးကြီးတယ်​လို့ ယူဆ​ကြတယ်။”

^၁၄ ဆယ်​မြူ​ယယ် ဆက်ပြော​တယ်– “ကျွန်တော့်​ဇနီး​နဲ့ ကျွန်တော် ယုံကြည်ခြင်း ခိုင်မာ​နေဖို့ ကျွန်တော်တို့ ဘာသာစကားနဲ့ ကျင်းပတဲ့ အစည်းအဝေးတွေကို​လည်း တက်တယ်။ တကယ် အလုပ်များ​ပြီး ပင်ပန်း​တယ်။ ဒါပေမဲ့ ကျွန်တော်တို့ရဲ့ ကြိုးစားမှု​နဲ့ စွန့်လွှတ်​အနစ်နာခံ​မှုကို ကောင်းချီးပေး​လို့ ယေဟောဝါကို ကျေးဇူးတင်ပါတယ်။ အခု သားသမီး သုံးယောက်​စလုံး အချိန်ပြည့်လုပ်ငန်း​မှာ ပါဝင်​နေကြတယ်။”

၁၅။ ဒေသခံ ဘာသာစကား​ပြော အသင်းတော်​မှာ ပို​လုပ်ဆောင်​နိုင်တယ်​လို့ ညီအစ်မ ခရစ္စတီးနား ဘာကြောင့် ခံစားရ​သလဲ။

^၁၅ နား​အလည်​ဆုံး ဘာသာစကား​ပြော အသင်းတော်​မှာ ယေဟောဝါကို ပို​ကောင်းကောင်း အမှုဆောင်​နိုင်​ကြောင်း အရွယ်ရောက်​တဲ့ သားသမီး​တွေ သိလာ​နိုင်တယ်။ အဲဒီလို​ဖြစ်လို့ သားသမီး​တွေ​က ကိုယ့်ကို ငြင်းပယ်​တယ်လို့ မိဘတွေ မခံစား​သင့်​ဘူး။ “မိဘတွေရဲ့ ဘာသာစကားကို အခြေခံ​လောက် သိထား​ပေ​မဲ့ အစည်းအဝေးတွေမှာ​တော့ နားမလည်​နိုင်​တော့ဘူး။ အသက် ၁၂ နှစ်မှာ ကျွန်မ​ရဲ့ ကျောင်း​သုံး​ဘာသာစကားနဲ့ ကျင်းပတဲ့ အစည်းအဝေး​ကြီး​ကို တက်​ခဲ့တယ်။ ပထမဆုံး​အနေနဲ့ ကျွန်မ ကြားနေ​တာ​တွေဟာ အမှန်တရား​ပါ​လား​လို့ နားလည်​ခဲ့ရတယ်။” ကျောင်း​သုံး​ဘာသာစကားနဲ့ စ​ဆုတောင်း​တဲ့အခါ အလှည့်အပြောင်း​တစ်ခု ထပ်​ဖြစ်တယ်။ ယေဟောဝါကို ရင်​ထဲကနေ စကားပြော​နိုင်ပြီ” လို့ ခရစ္စတီးနား ပြောတယ်။ (တ. ၂:၁၁၊ ၄၁) အရွယ်ရောက်​လာတဲ့အခါ ခရစ္စတီနား​ဟာ မိဘ​တွေ​နဲ့ တိုင်ပင်​ပြီး ဒေသခံ​သာသာစကား​ပြော အသင်းတော်ကို ပြောင်းရွှေ့​ဖို့ ဆုံးဖြတ်​ခဲ့တယ်။ “ကျွန်မ​ရဲ့ ကျောင်း​သုံး​ဘာသာ​စကားနဲ့ ယေဟောဝါ​အကြောင်း သင်ယူခြင်း​က လက်တွေ့​လုပ်ဆောင်​ဖို့ လှုံ့ဆော်ပေး​တယ်” လို့ပြောတယ်။ မကြာခင်​မှာပဲ ခရစ္စတီးနား​ဟာ ပျော်ရွှင်​တဲ့ မှန်မှန်ရှေ့ဆောင်​တစ်ယောက် ဖြစ်လာတယ်။

၁၆။ ဘာသာခြား စကားပြော အသင်းတော်​မှာ ဆက်နေ​လို့ ညီအစ်မ​ နာ​ဒီ​ယာ ဘာကြောင့် ပျော်ရွှင်​ခဲ့​သလဲ။

^၁၆ လူငယ်တို့၊ ဒေသခံ​ဘာသာစကား​ပြော အသင်းတော်​မှာ ပါဝင်​ရတာ ပိုကောင်းတယ်​လို့ ထင်သလား။ ထင်တယ်​ဆိုရင် ဘာကြောင့်လဲ​လို့ ကိုယ့်ကိုယ်ကိုယ် မေးပါ။​ အဲဒီ​အသင်းတော်ကို ပြောင်းရွှေ့​တာ​က ယေဟောဝါနဲ့ ပိုရင်း​နှီး​လာ​စေသလား။ (ယာ. ၄:၈) စောင့်ကြည့်​မခံ​ချင်​လို့​လား၊ သိပ်​မကြိုးစား​ချင်​လို့​လား။ “မောင်နှမ​သုံးယောက် ဆယ်ကျော်​သက်​အရွယ် ရောက်​တဲ့အခါ ဒေသခံ စကားပြော အသင်းတော်ကို ပြောင်းရွှေ့​ချင်​ကြ​တယ်” လို့ ဗေသလ​မှာ အမှုဆောင်​နေတဲ့ နာ​ဒီ​ယာ ပြောတယ်။ ဒါပေမဲ့ ပြောင်းရွှေ့​တာ​က သားသမီး​တွေရဲ့ ဘုရားရေးရာ​အတွက် အကျိုးမရှိ​မှန်း နာ​ဒီ​ယာ​ရဲ့ မိဘတွေ သိတယ်။ “မိဘတွေက သူတို့ရဲ့ ဘာသာစကားကို ကြိုးစားသင်ပေး​ပြီး ဘာသာခြား​စကားပြော အသင်းတော်​မှာ ဆက်​ပူးပေါင်း​စေခဲ့​တာ​ကို အခု ကျေးဇူးတင်​တယ်။ အဲဒါက ကျွန်မတို့​ရဲ့ ဘဝကို ကြွယ်ဝ​စေတယ်။ တခြားသူတွေ ယေဟောဝါကို သိလာ​အောင် ကူညီပေးဖို့ အခွင့်အရေး ပို​ရစေတယ်။”

၁၇။ (က) သားသမီးတွေကို ပြုစုပျိုးထောင်​ဖို့ ဘယ်သူ​တွေကို ယေဟော​ဝါ တာဝန်ပေး​ထား​သလဲ။ (ခ) သားသမီးတွေကို အမှန်တရား သင်ပေး​တဲ့အခါ မိဘတွေ အကူအညီ ဘယ်လို ရနိုင်​သလဲ။

^၁၇ သားသမီးတွေကို အမှန်တရား သင်ပေး​ဖို့ အဘိုးအဘွား၊ တခြားတစ်​ယောက်​ယောက်ကို မဟုတ်ဘဲ မိဘတွေ​ကို ယေဟောဝါ တာဝန်ပေး​ခဲ့တယ်။ (ပညာအလိမ္မာ ၁:၈  နဲ့ ၃၁:၁၀၊ ၂၇၊ ၂၈ တို့ကိုဖတ်ပါ။) ဒါပေမဲ့ ဒေသခံ ဘာသာ​စကားကို မတတ်​တဲ့ မိဘတွေဟာ သားသမီး​တွေရဲ့ စိတ်နှလုံး​ကို ထိမိ​အောင် သွန်သင်ပေး​ဖို့ အကူအညီ လိုအပ်​နိုင်တယ်။ မိဘတွေ အကူအညီ တောင်း​ခြင်းက သူတို့ရဲ့ ဘုရား​ပေးတာဝန်​ကို လျစ်လျူရှု​တာ မဟုတ်ဘူး။ “ယေဟော​ဝါ​မိန့်မှာ​တဲ့အတိုင်း သူတို့ကို ဆုံးမသွန်သင်” ခြင်း​ရဲ့ တစ်စိတ်​တစ်ပိုင်း ဖြစ်နိုင်တယ်။ (ဧ. ၆:၄) ဥပမာ၊ မိဘတွေက မိသား​စု ဝတ်ပြုမှု​အတွက် အသင်းတော် အကြီးအကဲတွေ​ဆီ အကြံ​ဉာဏ် တောင်း​နိုင်တယ်။ သားသမီး​တွေအတွက် အပေါင်းအသင်း​ကောင်းရဖို့ အကူအညီ တောင်း​နိုင်တယ်။

၁၈၊ ၁၉။ (က) ဘုရားရေးရာ စိတ်ထား​ပြည့်ဝ​တဲ့ ညီအစ်ကို/မတွေ​က လူငယ်တွေ​အပေါ် ဘယ်လို အကျိုးသက်ရောက်​နိုင်သလဲ။ (ခ) မိဘတွေ ဘာ​ဆက်လုပ်​ရ​မလဲ။

^၁၈ ဥပမာ၊ မိသားစုဝတ်ပြုမှု​မှာ ပါဝင်ဖို့ တခြား​မိသားစု​တွေကို တစ်ခါတလေ မိဘတွေ ဖိတ်ခေါ်​နိုင်တယ်။ လူငယ်တွေဟာ တခြား​ခရစ်ယာန်တွေ​နဲ့အတူ အမှုဆောင်​တဲ့အခါ၊ အတူ​အပန်းဖြေ​တဲ့အခါ အကျိုးခံစား​ကြရတယ်။ (ပညာ. ၂၇:၁၇) “ကျွန်တော့်ကို ကူညီ​စောင့်ရှောက်​ခဲ့တဲ့ ညီအစ်ကိုတွေ​ကို ကောင်းကောင်း မှတ်မိ​သေးတယ်။ အစည်းအဝေး​တွေအတွက် ကျောင်းသားတာဝန်​တွေကို ကူညီပေး​တဲ့အခါ အမြဲ​ပို​သိရှိ​လာတယ်။ အုပ်စု​လိုက် သူတို့နဲ့အတူ အပန်းဖြေ​ရတာ​ကို ပျော်​တယ်” လို့ ရှန် ပြောပြတယ်။

^၁၉ အကူအညီ တောင်းဆို​ခံရသူ​တွေ​က မိဘတွေ​ကို လေးစားဖို့ သားသမီးတွေကို အားပေး​ရမယ်။ မိဘတွေ​အကြောင်း အကောင်း​ပြောပေး​ရမယ်။ မိဘတွေရဲ့ တာဝန်ကို ဝင်​ယူဖို့ မဟုတ်ဘူး။ ဒါ့အပြင် အသင်းတော် အတွင်းအပြင်​မှာရှိတဲ့​သူတွေ နားလည်မှု လွဲ​စေနိုင်​တဲ့ အပြုအမူတွေ​ကို ရှောင်​သင့်တယ်။ (၁ ပေ. ၂:၁၂) သားသမီးတွေကို ဘုရားရေးရာ​ဘက်မှာ လေ့ကျင့်ပေး​ရမယ့် တာဝန်ကို တခြားသူတွေ​အပေါ် မိဘတွေ မလွှဲ​ပေး​ရဘူး။ တခြားသူတွေ ပေးတဲ့​အကူအညီ​ကို စောင့်ကြည့်​ပေး​ရမယ်။ သားသမီးတွေကို မိဘတွေ​ကိုယ်တိုင် ဆက်သင်​ပေး​ရမယ်။

၂၀။ သားသမီး​တွေ ယေဟောဝါရဲ့ ကျေးကျွန်ကောင်း​တွေ ဖြစ်လာ​ဖို့ မိဘတွေ ဘယ်လို ကူညီပေး​နိုင်သလဲ။

^၂၀ မိဘ​တို့၊ အကူအညီ​ရဖို့ ယေဟောဝါ​ဆီ ဆုတောင်း​ပါ။ အစွမ်းကုန် ကြိုးစားပါ။ (၂ ရာဇဝင်ချုပ် ၁၅:၇ ကိုဖတ်ပါ။) ကိုယ့်​အကျိုး​ထက် သားသမီး​နဲ့ ယေဟောဝါရဲ့ ဆက်ဆံရေးကို ဦးစားပေး​ပါ။ သားသမီး​တွေရဲ့ စိတ်နှလုံး​ထဲ ဘုရား​စကားတော် ရောက်ရှိ​ဖို့ လုပ်နိုင်​တာ​မှန်သမျှ လုပ်ပါ။ ကိုယ့်​သားသမီး​ဟာ ယေဟောဝါရဲ့ ကျေးကျွန်ကောင်း ဖြစ်လာ​နိုင်တယ်​ဆိုတာ အမြဲ ယုံကြည်​နေ​ပါ။ သားသမီး​တွေ ဘုရား​စကားတော်​အတိုင်း လိုက်လျှောက်ပြီး သင့်​ပုံသက်​သေ​ကို တုပ​တဲ့အခါ “သားသမီး​တွေ အမှန်တရား​လမ်းစဉ်​မှာ လျှောက်လှမ်း​နေတဲ့အကြောင်း ကြားသိ​ရတာ​ထက် ပို​ဝမ်းသာစရာ​ကောင်းတဲ့​သတင်း မရှိတော့​ပါဘူး” လို့ပြော​ခဲ့တဲ့ တမန်တော် ယောဟန်​လို ခံစားရ​ပါလိမ့်မယ်။—၃ ယော. ၄။