၁-၂။ စာရေး​ဆရာ​တစ်ယောက် ဘာ​ပြော​ခဲ့​သလဲ။ ဒီ​ဆောင်းပါး​မှာ ဘာ​အကြောင်း ဆွေးနွေး​ကြ​မလဲ။

ဒီနေ့​ခေတ် လူ​သန်းပေါင်း​များစွာ​ဟာ ယေရှုကို ယုံတယ်​လို့ ပြော​ပေမဲ့ ယေရှုရဲ့ သွန်သင်ချက်​တွေ​ကို လက်မခံကြဘူး။ (၂ တိ. ၄:၃၊ ၄) စာရေး​ဆရာ​တစ်ယောက်​က “လွန်ခဲ့တဲ့ နှစ်ပေါင်း နှစ်ထောင်​တုန်း​က ယေရှု ပြော​ခဲ့​တာတွေကို ပြော​မယ့် နောက် ‘ယေရှု’ တစ်ယောက်​သာ ဒီနေ့​ခေတ်​မှာ ပေါ်လာ​မယ်​ဆိုရင် အရင်က ငြင်းပယ်​ခဲ့​သလို ဒီနေ့​ခေတ်​မှာလည်း ငြင်းပယ်​ကြ​ဦး​မလား။ အဖြေကတော့ ငြင်းပယ်​ကြဦးမှာပဲ” လို့ တစ်ခါ​က ပြော​တယ်။

^၂ တစ်ခေတ်​တည်း​သားများ​စွာ​ဟာ ယေရှုရဲ့ သွန်သင်ချက်​တွေ​ကို ကြား​ပြီး အံ့ဖွယ်​အမှုတွေ​ကို မြင်ခဲ့​ပေမဲ့ မယုံကြဘူး။ ဘာကြောင့်လဲ။ အကြောင်းရင်း လေးခု​ကို ရှေ့​ဆောင်းပါး​မှာ ဆွေးနွေး​ခဲ့ပြီ။ နောက်ထပ် အကြောင်းရင်း လေးခု​ကို ဆွေးနွေး​ကြည့်​ကြ​စို့။ ဒီနေ့​ခေတ် ယေရှု​နောက်လိုက်​တွေ​ကိုလည်း လူတွေ ဘာကြောင့် ငြင်းပယ်​ကြောင်း၊ ယုံကြည်ခြင်း မပျောက်ဆုံး​သွား​အောင် ကျွန်တော်​တို့ ဘယ်လို ကာကွယ်​နိုင်​ကြောင်းကို​လည်း သိလာ​ရပါမယ်။

၃။ ယေရှုရဲ့ ဘယ်​လုပ်ရပ်​ကြောင့် လူတချို့ ငြင်းပယ်​ကြသလဲ။

^၃ ယေရှု မြေကြီးပေါ် ရှိတုန်းက လူတန်းစား​ပေါင်း​စုံ​နဲ့ ပေါင်းသင်း​တယ်။ သူဌေး​သူကြွယ်​တွေ၊ ဩဇာ​အာဏာ ရှိသူတွေနဲ့ အတူ​စားသောက်​ပေမဲ့ အများအားဖြင့်​တော့ ဆင်းရဲသား​တွေ၊ ဖိနှိပ်​ခံရ​သူတွေနဲ့ ပေါင်းသင်း​တယ်။ “အပြစ်သားတွေ” လို့ ယူမှတ်​ခံရ​သူတွေကို အထူးသဖြင့် ထောက်ထား​စာနာ​တယ်။ ယေရှုရဲ့ လုပ်ရပ်​ကြောင့် မာနကြီး​သူတွေ ယေရှုကို ငြင်းပယ်​ကြတယ်။ “မင်းတို့​က အခွန်ခံ​တွေ၊ အပြစ်သားတွေ​နဲ့​လည်း အတူ​စား​တာ​ပဲ​လား” ဆိုပြီး တပည့်​တွေ​ကို သူတို့ မေးတဲ့အခါ ယေရှု​က “ကျန်းမာ​သူတွေ​အတွက် သမားတော် မလိုဘူး။ ဖျားနာ​သူတွေ​အတွက်ပဲ လို​တာ။ ကျွန်တော်​ လာတာ ဖြောင့်မတ်​သူတွေ​အတွက် မဟုတ်ဘူး။  အပြစ်သားတွေ နောင်တ​ရစေဖို့ လာတာ” လို့ ပြော​တယ်။—လု. ၅:၂၉-၃၂။

၄။ ပရောဖက် ဟေရှာယရဲ့ ကြို​ဟောချက်​အရ မေရှိယ​နဲ့​ပတ်သက်ပြီး ဂျူး​တွေ ဘာ​မျှော်လင့်​ထား​သင့်သလဲ။

^၄ ကျမ်းစာ​မှာ ဘာ​ပြော​ထား​သလဲ။ လောကက လူအများစု မေရှိယကို လက်ခံ​မှာ မဟုတ်​ကြောင်း ကြာမြင့်စွာ​ကတည်းက ပရောဖက် ဟေရှာယ ကြို​ဟောထား​တယ်။ “သူ့ကို လူတွေ အထင်သေး​ကြတယ်၊ ကြဉ်​ထား​ကြတယ်။ . . . ငါတို့ မမြင်​အောင် သူ့​မျက်နှာကို ဖုံး​ထား​သလို ဖြစ်​နေတယ်။ သူဟာ အထင်သေး​ခံရ​တယ်။ သူ့ကို ငါ​တို့ အရေး​မ​လုပ်ခဲ့ကြ​ဘူး” လို့ ပြော​တယ်။ (ဟေရှာ. ၅၃:၃) မေရှိယကို လူတွေ “ကြဉ်​ထား” မယ်​လို့ ပရောဖက်ပြုချက်​မှာ ကြို​ဟောထား​လို့ ယေရှုကို လူတွေ ငြင်းပယ်​မယ်​ဆိုပြီး တစ်ခေတ်​တည်း​သား ဂျူး​တွေ မျှော်လင့်​ထား​သင့်တယ်။

၅။ ဒီနေ့​ခေတ် ယေရှုရဲ့ နောက်လိုက်​တွေ​ကို လူများစွာ ဘယ်လို ရှုမြင်ကြ​သလဲ။

^၅ ဒီနေ့​ခေတ်​မှာ​ကော အလားတူ ပြဿနာ ရှိသလား။ ရှိပါတယ်။ ဘာသာရေး​ ခေါင်းဆောင် များစွာ​ဟာ ထင်ပေါ်​တဲ့ သူဌေး​သူကြွယ်​တွေ၊ ပညာတတ်​လို့ လောကက ယူမှတ်​သူတွေကို အသင်းသားတွေ​အဖြစ် မျက်နှာသာ ပိုပေး​ကြတယ်။ ဘုရား​စံနှုန်း​နဲ့ မကိုက်ညီ​တဲ့ ကိုယ်ကျင့်တရား​နဲ့ ဘဝ​ပုံစံ ရှိနေရင်တောင် အဲဒီလို မျက်နှာသာ ပေး​ကြတယ်။ ဇွဲ​ထက်သန်​ပြီး ကိုယ်ကျင့်တရား စင်ကြယ်​တဲ့ ဘုရား​ကျေးကျွန်​တွေ​ကို​တော့ အထင်သေး​ကြတယ်။ လောကမှာ ထင်ပေါ်​သူတွေ မဟုတ်​ကြလို့ပဲ။ ပေါလု ပြော​သလို ဘုရားသခင်​က “အထင်သေး​ခံရ” သူတွေကို ရွေးချယ်​ထား​တယ်။ (၁ ကော. ၁:၂၆-၂၉) ဒါပေမဲ့ သစ္စာရှိ​ ကျေးကျွန်​အားလုံး ယေဟောဝါ​အတွက် တန်ဖိုး​ရှိတယ်။

၆။ မဿဲ ၁၁:၂၅၊ ၂၆ အရ ယေရှုရဲ့ သဘောထားကို ကျွန်တော်​တို့ ဘယ်လို တုပ​နိုင်​သလဲ။

^၆ ယုံကြည်ခြင်း မပျောက်ဆုံး​အောင် ကျွန်တော်​တို့ ဘယ်လို ကာကွယ်​မလဲ။ (မဿဲ ၁၁:၂၅၊ ၂၆ ကို​ဖတ်ပါ။) ဘုရား​လူမျိုး​ကို လောက မြင်​သလို မမြင်​ပါ​နဲ့။ အလိုတော် ဆောင်​ဖို့ နှိမ့်ချ​သူတွေကို​ပဲ ယေဟောဝါ သုံးတယ်​ဆိုတာ အသိအမှတ်ပြု​ပါ။ (ဆာ. ၁၃၈:၆) ပညာ​မတတ်​ဘူးလို့ လောက ယူမှတ်​ထား​သူတွေကို ဘုရား သုံးပြီး ဘယ်လောက်တောင် ပြီးမြောက်​နေသလဲ​ဆိုတာ စဉ်းစားပါ။

၇။ ဖာရိရှဲတွေ​ကို သူတော်ကောင်း ယောင်ဆောင်​သူတွေ​လို့ ယေရှု ဘာကြောင့် ခေါ်​သလဲ။ သူတို့ ဘယ်လို တုံ့ပြန်​ကြသလဲ။

^၇ မိမိ​ခေတ်​မှာ ရှိတဲ့ အယောင်ဆောင် ဘာသာရေး ထုံးစံတွေ​ကို ယေရှု သတ္တိရှိရှိ ပြစ်တင်​ရှုတ်ချ​တယ်။ ဥပမာ၊ မိဘကို ပြုစု​စောင့်ရှောက်​တဲ့ ကိစ္စ​ထက် လက်ဆေးတဲ့​ ကိစ္စ​ကို ပို​ရေး​ကြီး​ခွင့်​ကျယ် လုပ်တဲ့ ဖာရိရှဲတွေ​ရဲ့ အယောင်ဆောင်​မှု​ကို ဖော်​ထုတ်တယ်။ (မ. ၁၅:၁-၁၁) ယေရှု​စကား​ကြောင့် တပည့်​တွေ အံ့ဩ​သွားပြီး “သခင် ပြော​တဲ့ စကား​ကြောင့် ဖာရိရှဲတွေ စိတ်ခု​သွားတာကို သိပါသလား” လို့ မေးတဲ့အခါ ယေရှု​က “ကောင်းကင်​အဖ မစိုက်ပျိုး​တဲ့ အပင်​အားလုံး​ဟာ အ​နုတ်​ခံရ​မှာပဲ။ သူတို့ကို ရှိပါစေ။ သူတို့ဟာ မျက်ကန်း​လမ်းပြ​တွေ​ပဲ။ မျက်​ကန်း​ချင်း လမ်းပြ​ရင် နှစ်ယောက်စလုံး တွင်းထဲ ကျ​သွားမယ်” လို့ ဖြေ​တယ်။ (မ. ၁၅:၁၂-၁၄) ဘာသာရေး ခေါင်းဆောင်​တွေ ဒေါသ​ထွက်​မှာ ကြောက်​ပြီး ယေရှု အမှန်အတိုင်း မပြော​ဘဲ မနေဘူး။

၈။ ဘာသာရေး ယုံကြည်ချက်​အားလုံး​ကို ဘုရား နှစ်သက်​လက်ခံ​တာ မဟုတ်​ကြောင်း ယေရှု ဘယ်လို ပြော​သလဲ။

^၈ မှားယွင်းတဲ့ ဘာသာရေး သွန်သင်ချက်​တွေ​ကိုလည်း ယေရှု ဖော်​ထုတ်တယ်။ ဘာသာရေး ယုံကြည်ချက်​အားလုံး​ကို ဘုရား နှစ်သက်​လက်ခံတယ်​လို့ မပြောဘူး။ အဲဒီအစား လူများစွာဟာ ပျက်စီးခြင်း​ကို ပို့ဆောင်​တဲ့ လမ်း​ကျယ်​ပေါ် ရှိနေပြီး လူ​အနည်းငယ်​ပဲ အသက်ရှင်ခြင်းကို ပို့ဆောင်​တဲ့ လမ်းကျဉ်း​ပေါ် ရှိမယ်လို့ ပြော​တယ်။ (မ. ၇:၁၃၊ ၁၄) လူ​တချို့က ဘုရား​ကို ဝတ်ပြု​နေတယ်လို့ ထင်​ရပေမဲ့ တကယ်​ ဝတ်ပြု​နေတာ မဟုတ်ဘူးလို့​လည်း ယေရှု ရှင်းရှင်းလင်းလင်း ပြော​တယ်။ “သိုး​ရေ​ခြုံ​ပြီး ဝင်လာတဲ့ ပရောဖက် အတုအယောင်​တွေ​ကို သတိထား​ကြ။ တကယ်တော့ သူတို့ဟာ ငမ်းငမ်းတက်​ ဖြစ်​နေတဲ့ ဝံပုလွေ​တွေ​ပဲ။ သူတို့ရဲ့ အသီးကို  ကြည့်​ပြီး သူတို့ကို ခွဲခြား​သိ​လိမ့်မယ်” လို့ သတိ​ပေးတယ်။—မ. ၇:၁၅-၂၀။

၉။ ယေရှု ဖော်ထုတ်​ခဲ့​တဲ့ မှားယွင်းတဲ့ ဘာသာရေး သွန်သင်ချက်​တချို့က ဘာတွေလဲ။

^၉ ကျမ်းစာ​မှာ ဘာ​ပြော​ထား​သလဲ။ မေရှိယဟာ ယေဟောဝါ​ရဲ့ အိမ်တော်​အတွက် တောက်လောင်​တဲ့ စိတ်​ထက်သန်မှု ရှိမယ်လို့ ပရောဖက်ပြုချက်​မှာ ကြို​ဟောထား​တယ်။ (ဆာ. ၆၉:၉။ ယော. ၂:၁၄-၁၇) အဲဒီ​စိတ်​ထက်သန်မှု​ကြောင့် မှားယွင်းတဲ့ ဘာသာရေး သွန်သင်ချက်​တွေ၊ ဓလေ့​ထုံးစံတွေ​ကို ယေရှု ဖော်ထုတ်​ခဲ့​တာ ဖြစ်တယ်။ ဥပမာ၊ ဝိညာဉ် မသေ​ဘူးလို့ ဖာရိရှဲတွေ ယုံကြည်ပေမဲ့ ယေရှု​က​တော့ လူသေ​တွေ အိပ်ပျော်နေတယ်​လို့ သွန်သင်​တယ်။ (ယော. ၁၁:၁၁) ရှင်ပြန်ထမြောက်ခြင်း​ကို ဇဒ္ဒုကဲ​တွေ မယုံ​ပေမဲ့ မိတ်ဆွေ လာဇရု​ကို ယေရှု ရှင်ပြန်ထမြောက်​ပေးတယ်။ (ယော. ၁၁:၄၃၊ ၄၄။ တ. ၂၃:၈) အရာအားလုံးကို ကံကြမ္မာ ဒါမှ​မဟုတ် ဘုရား ကြိုတင်​သတ်မှတ်ပြီး​သားလို့ ဖာရိရှဲတွေ သွန်သင်​ပေမဲ့ ယေရှု​က​တော့ ဘုရား​ကို ဝတ်ပြု၊ မပြု​ဆိုတာ လူတွေ ရွေးချယ်​နိုင်​တဲ့​အရာ ဖြစ်တယ်လို့ သွန်သင်​တယ်။—မ. ၁၁:၂၈။

၁၀။ ဘယ်​သွန်သင်ချက်​တွေ​ကြောင့် ကျွန်တော်​တို့ကို လူများစွာ ငြင်းပယ်​ကြသလဲ။

^၁၀ ဒီနေ့​ခေတ်​မှာ​ကော အလားတူ ပြဿနာ ရှိသလား။ ရှိပါတယ်။ ကျွန်တော်​တို့​ရဲ့ ကျမ်းစာ အခြေပြု သွန်သင်ချက်​တွေ​ဟာ မှားယွင်းတဲ့ ဘာသာရေး သွန်သင်ချက်​တွေ​ကို ဖော်ထုတ်​တဲ့​အတွက် လူများစွာ ကျွန်တော်​တို့ကို ငြင်းပယ်​ကြတယ်။ လူဆိုးတွေကို မီးငရဲ​မှာ ဘုရား ပြစ်ဒဏ်ပေး​တယ်လို့ ဘာသာရေး ခေါင်းဆောင်​တွေ သွန်သင်​တယ်။ တကယ်တော့ လူတွေကို ထိန်းချုပ်​ချင်​လို့ အဲဒီလို သွန်သင်​ကြ​တာ။ မေတ္တာရှင်​ဘုရား ​ယေဟောဝါ​ကို ဝတ်ပြုတဲ့ ကျေးကျွန်​တွေ​က​တော့ အဲဒီ​မှားယွင်းတဲ့ သွန်သင်ချက်​ကို ဖော်ထုတ်​ကြတယ်။ ဝိညာဉ် မသေ​ဘူးလို့​လည်း ဘာသာရေး ခေါင်းဆောင်​တွေ သွန်သင်​တယ်။ ကျမ်းစာ​မှာ အဲဒီ​သွန်သင်ချက် မပါ​ကြောင်း ကျွန်တော်​တို့ ဖော်​ထုတ်တယ်။ အဲဒီ​သွန်သင်ချက်​သာ မှန်​မယ်​ဆိုရင် ရှင်ပြန်ထမြောက်ခြင်း လို​တော့​မှာ မဟုတ်ဘူး။ အရာရာကို ဘုရား ကြိုတင်​သတ်မှတ်​ထား​တယ်လို့​လည်း ဘာသာ​တရား​များစွာ​က သွန်သင်​ပေမဲ့ ကျွန်တော်​တို့​က​တော့ လူတွေမှာ လွတ်လပ်​စွာ ရွေးချယ်ခွင့် ရှိပြီး ဘုရား​ကို ဝတ်ပြုဖို့ ရွေးချယ်​နိုင်တယ်​လို့ သွန်သင်​တယ်။ အဲဒီလို သွန်သင်ချက်​တွေ​ကြောင့် ကျွန်တော်​တို့ကို ဘာသာရေး ခေါင်းဆောင်​တွေ ဒေါသ​ထွက်ကြ​တယ်။

၁၁။ ယောဟန် ၈:၄၅-၄၇ မှာပါတဲ့ ယေရှုရဲ့ စကား​တွေ​အရ မိမိ​လူမျိုး​ဆီကနေ ဘုရား ဘာ​တောင်းဆို​ထား​သလဲ။

 ^၁၁ ယုံကြည်ခြင်း မပျောက်ဆုံး​အောင် ကျွန်တော်တို့ ဘယ်လို ကာကွယ်​မလဲ။ အမှန်တရားကို ချစ်မြတ်နိုးတယ်​ဆိုရင် ဘုရားသခင့် တရား​စကား​ကို လက်ခံ​ရမယ်။ (ယောဟန် ၈:၄၅-၄၇ ကို​ဖတ်ပါ။) စာတန်​မာရ်နတ်​လို မဟုတ်ဘဲ အမှန်တရားကို မြဲ​မြဲ​ ဆုပ်ကိုင်​ထား​ရမယ်။ ကိုယ့်​ယုံကြည်ချက်တွေကို ဘယ်တော့မှ အလျှော့မပေး​ရ​ဘူး။ (ယော. ၈:၄၄) ယေရှု​လို​ပဲ ‘ဆိုးညစ်​တဲ့​အရာ​ကို ရွံမုန်းပြီး ကောင်း​တဲ့​အရာ​ကို တွယ်တာ’ ဖို့ ဘုရား တောင်းဆို​ထား​တယ်။—ရော. ၁၂:၉။ ဟီ. ၁:၉။

၁၂။ ယေရှု သေဆုံး​တဲ့ ပုံစံ​ကို ဂျူး​များစွာ ဘာကြောင့် လက်မခံနိုင်​ကြသလဲ။

^၁၂ ယေရှုကို တစ်ခေတ်​တည်း​သား ဂျူး​တချို့ ငြင်းပယ်​ရတဲ့ နောက်​အကြောင်းရင်း​က ဘာလဲ။ ‘ကျွန်တော်​တို့​က​တော့ သစ်တိုင်ပေါ် ကွပ်မျက်​ခံ​ခဲ့​ရတဲ့ ခရစ်တော်​အကြောင်း ဟောပြောတယ်။ ဒီ​အကြောင်းအရာဟာ ဂျူး​တွေ​အတွက် တိုက်မိ​လဲစရာ ဖြစ်​နေတယ်’ လို့ ပေါလု ပြော​တယ်။ (၁ ကော. ၁:၂၃) ယေရှု သေဆုံး​တဲ့ ပုံစံ​ကို ဂျူး​များစွာ ဘာကြောင့် လက်မခံနိုင်​ကြ​တာလဲ။ ယေရှု သစ်တိုင်ပေါ် သေဆုံး​တာ​ဟာ သူတို့​အတွက် ရာဇဝတ်သား၊ အပြစ်သား​ပုံ ပေါက်​နေတဲ့​အတွက် မေရှိယ​အဖြစ် လက်မခံနိုင်​ကြ​တာ ဖြစ်တယ်။—တရား. ၂၁:၂၂၊ ၂၃။

၁၃။ ယေရှုကို ငြင်းပယ်​သူတွေ ဘယ်​အချက်​ကို အသိအမှတ် မပြု​ကြသလဲ။

^၁၃ ယေရှုကို ငြင်းပယ်​တဲ့ ဂျူး​တွေ​ဟာ ယေရှု အပြစ်ကင်း​တယ်၊ မတရား စွပ်စွဲ​ခံရ​တယ်၊ မမျှမတ ဆက်ဆံခံရ​တယ်​ဆိုတာ အသိအမှတ် မပြု​ကြဘူး။ ယေရှုကို ရုံးတင်​စစ်ဆေး​သူတွေဟာ တရား​မျှတမှု စံနှုန်း​ကို အရေး​မလုပ်ကြဘူး။ ဂျူး​တရားရုံး​ချုပ်​က ယေရှုကို ဥပဒေ လုပ်ထုံး​လုပ်​နည်း​အရ မဟုတ်ဘဲ အလောတကြီး အမှု​စစ်​ကြတယ်။ (လု. ၂၂:၅၄။ ယော. ၁၈:၂၄) စွဲချက်​တွေ၊ သက်သေ​အထောက်အထား​တွေ ကြားနာ​ရာ​မှာ တရား​မျှတမှု မရှိဘူး။ တရားသူကြီး​တွေ ကိုယ်တိုင် “ယေရှုကို သေဒဏ်​စီရင်​နိုင်​ဖို့ မဟုတ်မမှန် သက်သေ​ထွက်ဆို​မယ့် သူတွေကို ရှာကြတယ်။” အဲဒါလည်း မအောင်မြင်​တော့ ပုရောဟိတ်​မင်း​က ယေရှုရဲ့ စကား​ထဲမှာ အပြစ်ရှာ​ဖို့ ကြိုးစား​တယ်။ ဒါဟာ ဥပဒေ​နဲ့ လုံးဝ ဆန့်ကျင်​တယ်။ (မ. ၂၆:၅၉။ မာ. ၁၄:၅၅-၆၄) ယေရှု ထမြောက်​ပြီး​နောက်​မှာ​တောင် အဲဒီ​မဖြောင့်မတ်တဲ့ တရားသူကြီး​တွေ​ဟာ သင်္ချိုင်းဂူ စောင့်​တဲ့ အစောင့်​စစ်သည်​တွေ​ကို ‘ငွေ ပုံ​ပေး’ ပြီး  သင်္ချိုင်းဂူ ဘာကြောင့် ဟင်း​လင်း ဖြစ်​နေကြောင်း ကော​လာ​ဟ​လတွေ ဖြန့်​ခိုင်း​ကြတယ်။—မ. ၂၈:၁၁-၁၅။

၁၄။ မေရှိယ သေဆုံး​တာ​နဲ့​ပတ်သက်ပြီး ကျမ်းစာ​မှာ ဘယ်လို ကြို​ဟောထား​သလဲ။

^၁၄ ကျမ်းစာ​မှာ ဘာ​ပြော​ထား​သလဲ။ မေရှိယ သေဆုံးမယ်​လို့ ယေရှု​ခေတ်​က ဂျူး​တွေ မမျှော်လင့်​ထား​ကြ​ပေမဲ့ ပရောဖက်ပြုချက်​မှာ​တော့ “သူဟာ အသက်​စွန့်ပြီး ပေးဆက်​ခဲ့တယ်။ အပြစ်ကျူးလွန်​သူတွေနဲ့​အတူ ရေတွက်​ခံ​ခဲ့တယ်။ လူများစွာ​ရဲ့ အပြစ်ကို သယ်ဆောင်​ပေး​ခဲ့တယ်။ အပြစ်ကျူးလွန်​သူတွေ​အတွက် ကြားဝင် အသနားခံ​ပေး​ခဲ့တယ်” လို့ ပြောထား​တယ်။ (ဟေရှာ. ၅၃:၁၂) ဒါ​ကြောင့် အပြစ်သား​အနေ​နဲ့ ယေရှု ကွပ်မျက်​ခံရ​တာ​ကို ဂျူး​တွေ လက်မခံနိုင်စရာ ဘာ​အကြောင်း​မှ မရှိသင့်​ဘူး။

၁၅။ ယေဟောဝါ​သက်သေတွေကို လူတချို့ ဘာကြောင့် ငြင်းပယ်​ကြသလဲ။

^၁၅ ဒီနေ့​ခေတ်​မှာ​ကော အလားတူ ပြဿနာ ရှိသ​လား။ ရှိပါတယ်။ မတရား စွပ်စွဲ​ခံရ​ပြီး ပြစ်ဒဏ် စီရင်ခံ​ရတဲ့ ယေရှု​လို​ပဲ ယေဟောဝါသက်သေ​တွေ​လည်း မမျှမတ ဆက်ဆံခံရ​တယ်။ ဥပမာ၊ အမေရိကန်မှာ ၁၉၃၀ နဲ့ ၁၉၄၀ ပြည့်လွန်​နှစ်တွေ​အတွင်း လွတ်လပ်​စွာ ဝတ်ပြုခွင့်​ကို တရားရုံး​တွေ​က ပိတ်ပင်​ခဲ့တယ်။ တရားသူကြီး​တချို့​မှာ တစ်ဖက်သတ်​အစွဲတွေ ရှိတာ သိပ်​ထင်ရှား​တယ်။ ကနေဒါ​နိုင်ငံ၊ ကွီဘက်​ပြည်နယ်​မှာ ချာ့ခ်ျ​နဲ့ အစိုးရ ပေါင်း​ပြီး ကျွန်တော်​တို့​လုပ်ငန်း​ကို ပိတ်ပင်​ဖို့ ကြိုးစား​တယ်။ ကြေညာသူ​များစွာ​ဟာ ဘုရား​နိုင်ငံတော်​အကြောင်း ဟော​ရုံ​လေး​နဲ့ ထောင်ချ​ခံရ​တယ်။ နာဇီ​ဂျာမနီ​မှာလည်း သစ္စာရှိ လူငယ်​ညီအစ်ကို​များစွာ အသတ်​ခံရ​တယ်။ မကြာသေး​ခင်​နှစ်တွေ​တုန်း​က ရုရှား​မှာ ညီအစ်ကို​များစွာ​ဟာ ကျမ်းစာ​အကြောင်း ဆွေးနွေးလို့ ထောင်ချ​ခံရ​တယ်။ အဲဒါကို “အစွန်းရောက် လုပ်ရပ်” အဖြစ် သတ်မှတ်​ကြလို့ပဲ။ ရုရှား​စကားနဲ့ ထုတ်ဝေ​ထား​တဲ့ ကမ္ဘာသစ်​ဘာသာပြန်​ကျမ်း​ကိုလည်း ယေဟောဝါ နာမည် သုံး​ထား​လို့ “အစွန်းရောက် စာပေ” အဖြစ် သတ်မှတ်ပြီး ပိတ်ပင်​တယ်။

၁၆။ ၁ ယောဟန် ၄:၁ အရ ယေဟောဝါ​လူမျိုး​နဲ့​ပတ်သက်​တဲ့ သတင်း​မှားတွေကို ဘာကြောင့် မယုံ​သင့်သလဲ။

^၁၆ ယုံကြည်ခြင်း မပျောက်ဆုံး​အောင် ကျွန်တော်​တို့ ဘယ်လို ကာကွယ်​မလဲ။ အချက်အလက်​အားလုံး သိအောင် လုပ်ပါ။ နောက်လိုက်​တွေ ‘မဟုတ်မမှန် စွပ်စွဲ​ခံရ​မယ်’ လို့ တောင်ပေါ်​တရားတော်​မှာ ယေရှု သတိ​ပေးတယ်။ (မ. ၅:၁၁) အဲဒီ​မဟုတ်မမှန် စွပ်စွဲချက်​တွေ​ရဲ့ ဇာစ်​မြစ်​က စာတန်​ပဲ။ အမှန်တရား မြတ်နိုး​သူတွေ​အကြောင်း မဟုတ်မမှန် သတင်းဖြန့်​ဖို့ ဆန့်ကျင်သူ​တွေ​ကို စာတန် သွေးထိုး​လှုံ့ဆော်​ပေးတယ်။ (ဗျာ. ၁၂:၉၊ ၁၀) ရန်သူတွေ ပြော​တဲ့ မုသား​စကား​တွေ​ကို ကျွန်တော်​တို့ ငြင်းပယ်​ရမယ်။ အဲဒီ​စကား​တွေ​ကြောင့် ကြောက်ရွံ့​တုန်လှုပ်​သွားတာ၊ ယုံကြည်ခြင်း ပျောက်ဆုံး​သွားတာမျိုး ဘယ်တော့မှ အဖြစ်​မခံ​သင့်​ဘူး။—၁ ယောဟန် ၄:၁ ကို​ဖတ်ပါ။

၁၇။ ယေရှု မသေဆုံးခင်​က ဘယ်​ဖြစ်ရပ်​တွေ​ကြောင့် တချို့ တပည့် ဖြစ်​မလာ​တာ ဖြစ်​နိုင်​သလဲ။

^၁၇ ယေရှု မသေဆုံးခင်​လေးမှာ တမန်​တော် ၁၂ ယောက်​ထဲ​က တစ်ယောက် သစ္စာဖောက်​သွားတယ်။ တမန်​တော် နောက်​တစ်ယောက်​လည်း ယေရှုကို သုံးကြိမ် ငြင်းပယ်​တယ်။ ယေရှု မသေဆုံးခင် ည​မှာ တမန်​တော်​အားလုံး စွန့်ခွာ​ထွက်ပြေး​သွား​ကြတယ်။ (မ. ၂၆:၁၄-၁၆၊ ၄၇၊ ၅၆၊ ၇၅) ဒါကို ယေရှု မ​အံ့ဩ​ဘူး။ အဲဒီလို ဖြစ်​မယ်​လို့​တောင် ကြိုပြော​ခဲ့တယ်။ (ယော. ၆:၆၄။ ၁၃:၂၁၊ ၂၆၊ ၃၈။ ၁၆:၃၂) အဲဒီလို ဖြစ်ရပ်​တွေ​ကို မြင်တဲ့အခါ ‘တမန်​တော်​တွေ ဖြစ်​ပြီး အဲဒီလို လုပ်​မှ​တော့ သူတို့နဲ့ မပူးပေါင်း​ချင်ဘူး’ လို့ တချို့ တွေး​ပြီး တပည့် ဖြစ်​မလာ​တာ ဖြစ်​နိုင်တယ်။

၁၈။ ယေရှု မသေဆုံးခင်​လေးမှာ ဖြစ်​တဲ့ ဖြစ်ရပ်​တွေ​ကြောင့် ဘယ်​ပရောဖက်ပြုချက်​တွေ ပြည့်စုံ​လာသလဲ။

^၁၈ ကျမ်းစာ​မှာ ဘာ​ပြော​ထား​သလဲ။ မေရှိယဟာ ငွေ​စ ၃၀ နဲ့ သစ္စာဖောက်​ခံရ​မယ်​ဆိုပြီး ရာစုနှစ်များစွာ​ကတည်းက ကျမ်းစာ​မှာ ယေဟောဝါ ကြို​ဟောထား​တယ်။ (ဇာ. ၁၁:၁၂၊ ၁၃) ယေရှုရဲ့ မိတ်ဆွေရင်း​တစ်ယောက်​က အဲဒီလို သစ္စာဖောက်​မှာ။ (ဆာ. ၄၁:၉) “သိုးထိန်း​ကို ရိုက်​သတ်​လိုက်။  သိုးတွေ ကွဲလွင့်​သွားပါစေ” လို့​လည်း ပရောဖက် ဇာခရိ ကြိုဟောတယ်။ (ဇာ. ၁၃:၇) စိတ်​ရိုး​ဖြောင့်​သူတွေဟာ အဲဒီ​ဖြစ်ရပ်​တွေ​ကြောင့် ယေရှုကို ငြင်းပယ်​မယ့်​အစား အဲဒီ​ပရောဖက်ပြုချက်​တွေ ပြည့်စုံ​တာ​ကို မြင်ပြီး ယုံကြည်ခြင်း​တောင် ပို​ခိုင်မာ​လာ​သင့်တယ်။

၁၉။ စိတ်​ရိုး​ဖြောင့်​သူတွေ ဘာကို သိ​ကြသလဲ။

^၁၉ ဒီနေ့​ခေတ်​မှာ​ကော အလားတူ ပြဿနာ ရှိသလား။ ရှိပါတယ်။ ဒီနေ့​ခေတ်​မှာ ထင်ပေါ်​တဲ့ သက်သေခံ​တချို့ အမှန်တရားကို ကျောခိုင်း​ပြီး အယူဖောက်ပြန်သူတွေ ဖြစ်သွား​တယ်။ တခြား​သူတွေကိုလည်း လမ်းလွဲ​အောင် ဖြားယောင်း​နေတယ်။ သတင်း မီဒီယာ​နဲ့ အင်တာနက်​က​တစ်ဆင့် ယေဟောဝါသက်သေ​တွေ​အကြောင်း မကောင်း​သတင်းတွေ၊ အမှန်​တစ်ဝက် အမှား​တစ်ဝက် ပါ​တဲ့ သတင်းတွေ၊ အလိမ်အညာ သတင်းတွေ ဖြန့်​နေတယ်။ ဒါပေမဲ့ စိတ်​ရိုး​ဖြောင့်​သူတွေကို​တော့ လှည့်စားလို့ မရဘူး။ အဲဒီလို ဖြစ်​မယ်​လို့ ကျမ်းစာ​မှာ ကြို​ဟောထား​ကြောင်း သူတို့ သိကြတယ်။—မ. ၂၄:၂၄။ ၂ ပေ. ၂:၁၈-၂၂။

၂၀။ အမှန်တရားကို ကျောခိုင်း​သွား​သူတွေ​ကြောင့် ယုံကြည်ခြင်း မပျောက်ဆုံး​သွား​အောင် ဘယ်လို ကာကွယ်​မလဲ။ (၂ တိမောသေ ၄:၄၊ ၅)

^၂၀ ယုံကြည်ခြင်း မပျောက်ဆုံး​အောင် ကျွန်တော်​တို့ ဘယ်လို ကာကွယ်​မလဲ။ ပုံမှန် ကျမ်းစာ ဖတ်ရှု​လေ့လာခြင်း၊ မပြတ် ဆုတောင်းခြင်း၊ ယေဟောဝါ ပေးအပ်​ထား​တဲ့ လုပ်ငန်းမှာ အလုပ်​များနေ​ခြင်း​အားဖြင့် ယုံကြည်ခြင်း ခိုင်မာ​အောင် တည်ဆောက်​ဖို့ လိုတယ်။ (၂ တိမောသေ ၄:၄၊ ၅ ကို​ဖတ်ပါ။) ယုံကြည်ခြင်း ရှိမယ်ဆိုရင် မကောင်း​သတင်းတွေ​ကြောင့် ထိတ်ထိတ်ပျာပျာ ဖြစ်​မှာ မဟုတ်ဘူး။ (ဟေရှာ. ၂၈:၁၆) ယေဟောဝါ၊ ကျမ်းစာ၊ ညီအစ်ကို/မ​တွေ​ကို ချစ်တဲ့ မေတ္တာက အမှန်တရားကို ကျောခိုင်း​သွား​သူတွေ​ကြောင့် ယုံကြည်ခြင်း မပျောက်ဆုံး​သွား​အောင် ကာကွယ်​ပေး​ပါ​လိမ့်မယ်။

၂၁။ ဒီနေ့​ခေတ် လူအများစု သတင်းကောင်းကို ငြင်းပယ်​တာ​တောင် ဘာကို စိတ်ချ​နိုင်​သလဲ။

^၂၁ ပထမ​ရာစု​မှာ ယေရှုကို ငြင်းပယ်​သူ များစွာ ရှိ​သလို လက်ခံသူ များစွာ​လည်း ရှိပါတယ်။ အဲဒီ​ထဲမှာ ဂျူး​တရားရုံးချုပ် အဖွဲ့ဝင် အနည်းဆုံး တစ်ယောက်​နဲ့ “ပုရောဟိတ် အတော်များများ” ပါဝင်​တယ်။ (တ. ၆:၇။ မ. ၂၇:၅၇-၆၀။ မာ. ၁၅:၄၃) ဒီနေ့လည်း လူ​သန်းပေါင်း​များစွာ​ဟာ ယေရှု​နောက် လိုက်​ဖို့ ဆုံးဖြတ်ထား​ကြတယ်။ ကျမ်းစာ အမှန်တရားတွေကို သိ​ပြီး မြတ်နိုး​ကြလို့ပဲ။ “ပညတ်တော်​ကို အလွန်​နှစ်သက်သူ​တွေ​ဟာ သိပ်​ကို ငြိမ်သက်​အေးချမ်း​ပါ​တယ်။ ဘာကမှ သူတို့ကို တိုက်မိ​လဲ​အောင် မလုပ်နိုင်ဘူး” လို့ ကျမ်းစာ​မှာ ပြော​ထား​တယ်။—ဆာ. ၁၁၉:၁၆၅။