လေ့လာရန် ဆောင်းပါး ၁၉
ဗျာဒိတ်ကျမ်းက ဒီနေ့ခေတ်မှာ သင့်အတွက် ဘာအဓိပ္ပာယ် ရှိသလဲ
‘ဒီပရောဖက်ပြုချက်တွေကို ဖတ်ရွတ်တဲ့သူဟာ ပျော်ရွှင်ချမ်းမြေ့လိမ့်မယ်။’—ဗျာ. ၁:၃။
သီချင်း ၁၅ ယေဟောဝါရဲ့ သားဦးကို ကြိုဆိုဂုဏ်ပြု
အကြိုသုံးသပ်ချက် *
၁-၂။ ဗျာဒိတ်ကျမ်းကို စိတ်ဝင်စားသင့်တဲ့ အကြောင်းရင်းတစ်ခုက ဘာလဲ။
တစ်ယောက်ယောက်ရဲ့ ဓာတ်ပုံအယ်လဘမ်ကို ကြည့်နေတယ် ဆိုပါစို့။ ဓာတ်ပုံအများစုမှာ ကိုယ်မသိတဲ့သူတွေချည်းပဲ။ တစ်ပုံကိုတော့ အသေအချာ ကြည့်မိတယ်။ ပုံထဲမှာ ကိုယ်ပါနေလို့ပဲ။ ဘယ်နေရာမှာ ဘယ်တုန်းက ရိုက်ထားသလဲဆိုတာ စဉ်းစားကြည့်တယ်။ ပုံထဲက တစ်ယောက်စီကိုလည်း ကြည့်ဖြစ်တယ်။ ဒီဓာတ်ပုံဟာ သင့်အတွက် တကယ် အဓိပ္ပာယ် ရှိတယ်။
၂ ဗျာဒိတ်ကျမ်းဟာ အဲဒီဓာတ်ပုံနဲ့ တူတယ်။ ဘာကြောင့်လဲ။ အနည်းဆုံး အကြောင်းရင်း နှစ်ခုကြောင့်ပါ။ ပထမ၊ ဗျာဒိတ်ကျမ်းကို ကျွန်တော်တို့အတွက် ရေးထားတာ။ “ဘုရားသခင်က မိမိရဲ့ ကျွန်တွေကို မကြာမီ ဖြစ်ပျက်မယ့်အရာတွေ ဖော်ပြဖို့ ယေရှုခရစ်ကို ဗျာဒိတ်တော် ပေးတယ်” လို့ ဦးဆုံးအခန်းငယ်မှာ ရေးထားတယ်။ (ဗျာ. ၁:၁) ဒါကြောင့် ဗျာဒိတ်ကျမ်းမှာ ရေးထားသမျှဟာ လူအားလုံးအတွက် ခြုံငုံရေးထားတာ မဟုတ်ဘဲ ဆက်ကပ်အပ်နှံထားတဲ့ ဘုရားကျေးကျွန် ကျွန်တော်တို့အတွက် ရေးထားတာပါ။ ဒီကျမ်းထဲက ပရောဖက်ပြုချက်တွေ ပြည့်စုံမှုမှာ ကျွန်တော်တို့ ပါဝင်နေမှန်း သိရလို့ မအံ့ဩသင့်ဘူး။ တစ်နည်းအားဖြင့် “ဓာတ်ပုံထဲမှာ” ကိုယ်တိုင် ပါဝင်နေတယ်။
၃-၄။ ဗျာဒိတ်ကျမ်းအရ အဲဒီကျမ်းထဲက ပရောဖက်ပြုချက်တွေ ဘယ်အချိန်မှာ ပြည့်စုံမလဲ။ အဲဒါက ကျွန်တော်တို့ ယောက်တိုင်းအပေါ် ဘယ်လို သက်ရောက်မှု ရှိသင့်သလဲ။
၃ ဒုတိယ အကြောင်းရင်းကတော့ ပရောဖက်ပြုချက်တွေ ပြည့်စုံမယ့် အချိန်ကြောင့်ပါ။ အဲဒီအချိန်နဲ့ပတ်သက်ပြီး သက်ကြီး တမန်တော် ယောဟန်က “ကျွန်တော်ဟာ စွမ်းအားတော်နဲ့ ပြည့်ပြီး သခင့်နေ့တော်ကို ရောက်သွားတယ်” လို့ ပြောတယ်။ (ဗျာ. ၁:၁၀) ဒီကျမ်းကို ယောဟန် ရေးတဲ့ အေဒီ ၉၆ တုန်းက “သခင့်နေ့တော်” ရောက်ဖို့ အဝေးကြီး လိုသေးတယ်။ (မ. ၂၅:၁၄၊ ၁၉။ လု. ၁၉:၁၂) ကျမ်းစာပရောဖက်ပြုချက်တွေအရ အဲဒီနေ့တော်ဟာ ကောင်းကင်မှာ ဘုရင်အဖြစ် ယေရှု နန်းတင်ခံရတဲ့ ၁၉၁၄ မှာ အစပြုတယ်။ အဲဒီနှစ်ကစပြီး ဘုရားလူမျိုး ပါဝင်တဲ့ ဗျာဒိတ်ကျမ်း ပရောဖက်ပြုချက်တွေ စတင်ပြည့်စုံလာတယ်။ မှန်ပါတယ်၊ “သခင့်နေ့တော်” မှာ အခု ကျွန်တော်တို့ အသက်ရှင်နေကြတယ်။
၄ စိတ်လှုပ်ရှားစရာ အချိန်မှာ ကျွန်တော်တို့ အသက်ရှင်နေရတဲ့အတွက် ဗျာဒိတ် ၁:၃ မှာ ပါတဲ့ စကားတွေကို အထူး စိတ်ဝင်စားသင့်တယ်– “သတ်မှတ်ထားချိန် နီးနေပြီ ဖြစ်လို့ ဒီပရောဖက်ပြုချက်တွေကို ဖတ်ရွတ်တဲ့သူ၊ ကြားနာတဲ့သူ၊ ရေးထားသမျှကို လိုက်နာတဲ့သူဟာ ပျော်ရွှင်ချမ်းမြေ့လိမ့်မယ်။” “ဒီပရောဖက်ပြုချက်တွေကို ဖတ်ရွတ်၊” “ကြားနာ၊” “လိုက်နာ” ဖို့ လိုတယ်။ အဲဒီပရောဖက်ပြုချက်တချို့က ဘာတွေလဲ။
ယေဟောဝါ နှစ်သက်လက်ခံတဲ့ နည်းနဲ့ ဝတ်ပြုပါ
၅။ ယေဟောဝါ နှစ်သက်လက်ခံတဲ့ နည်းနဲ့ ဝတ်ပြုဖို့ လိုကြောင်း ဗျာဒိတ်ကျမ်းက ဘယ်လို အလေးပေးဖော်ပြသလဲ။
၅ အသင်းတော်တွေမှာ ဘာဖြစ်နေတယ်ဆိုတာ ယေရှု ကောင်းကောင်း သိကြောင်း ဗျာဒိတ်ကျမ်း အခန်းကြီး တစ်ကစပြီး သိရတယ်။ (ဗျာ. ၁:၁၂-၁၆၊ ၂၀။ ၂:၁) အာရှမိုင်းနား အသင်းတော် ခုနစ်ခုဆီ ပေးလိုက်တဲ့ သတင်းစကားမှာ အဲဒီအချက် ထင်ရှားတယ်။ ယေဟောဝါ နှစ်သက်လက်ခံတဲ့ နည်းနဲ့ ဝတ်ပြုနိုင်ဖို့ ပထမရာစု ခရစ်ယာန်တွေကို ယေရှု သတ်သတ်မှတ်မှတ် ညွှန်ကြားတယ်။ အဲဒီစကားတွေက ဒီနေ့ခေတ် ဘုရားကျေးကျွန်အားလုံးနဲ့လည်း သက်ဆိုင်တယ်။ ဘာသင်ခန်းစာ ရသလဲ။ ကျွန်တော်တို့ရဲ့ ဘုရားရေးရာ အခြေအနေကို ခေါင်းဆောင် ခရစ်တော် ယေရှု ကောင်းကောင်း သိတယ်။ ယေရှုရဲ့ ကြီးကြပ်မှုအောက်မှာ ကျွန်တော်တို့ ရှိနေတယ်။ ယေရှု မမြင်တာ ဘာမှ မရှိဘူး။ ယေဟောဝါရဲ့ မျက်နှာသာ ဆက်ရဖို့ ကျွန်တော်တို့ ဘာလုပ်ရမယ်ဆိုတာ သိတယ်။ ဒီနေ့ခေတ်မှာ ကျွန်တော်တို့ လိုက်နာဖို့ လိုတဲ့ ဘယ်ညွှန်ကြားချက် ယေရှု ပေးသလဲ။
၆။ (က) ဗျာဒိတ် ၂:၃၊ ၄ မှာ ပါတဲ့ ယေရှုရဲ့ စကားအရ ဧဖက် အသင်းတော်မှာ ဘာပြဿနာ ရှိနေသလဲ။ (ခ) ကျွန်တော်တို့ ဘာသင်ခန်းစာ ရသလဲ။
၆ ဗျာဒိတ် ၂:၃၊ ၄ ကို ဖတ်ပါ။ ယေဟောဝါအပေါ် ထားတဲ့ ကျွန်တော်တို့ရဲ့ ကနဦးမေတ္တာ မပျက်ပြယ်ရဘူး။ အခက်အခဲ အမျိုးမျိုးကြား ယေဟောဝါကို ခံနိုင်ရည်ရှိရှိ ဆက်ဝတ်ပြုနေတယ်လို့ ဧဖက် အသင်းတော်ကို ယေရှု ပြောတယ်။ ဒါပေမဲ့ ကနဦးမေတ္တာ ပျက်ပြယ်နေပြီ။ ဘုရား နှစ်သက်တဲ့ ဝတ်ပြုမှု ဖြစ်ဖို့ဆိုရင် အဲဒီမေတ္တာကို ပြန်ရှင်သန်စေရမယ်။ ဒီနေ့ခေတ်မှာလည်း အခက်အခဲတွေကို ခံရပ်နေရုံနဲ့ မလုံလောက်ဘူး။ ခံရပ်နေတဲ့ အကြောင်းရင်း မှန်ရမယ်။ ကျွန်တော်တို့ ဘာလုပ်တယ် ဆိုတာသာမက ဘာကြောင့် လုပ်တယ်ဆိုတဲ့ စိတ်ရင်းကို ဘုရား စိတ်ဝင်စားတယ်။ အဲဒါ ဘုရားအတွက် အရေးပါတယ်။ မိမိကို ချစ်တဲ့စိတ်၊ ကျေးဇူးတင်လေးမြတ်စိတ်နဲ့ ဝတ်ပြုဖို့ မျှော်လင့်လို့ပဲ။—ပညာ. ၁၆:၂။ မာ. ၁၂:၂၉၊ ၃၀။
၇။ (က) ဗျာဒိတ် ၃:၁-၃ အရ သာဒိ အသင်းတော်မှာ ဘယ်ပြဿနာကို ယေရှု တွေ့သလဲ။ (ခ) ကျွန်တော်တို့ ဘာလုပ်ဖို့ လိုသလဲ။
၇ ဗျာဒိတ် ၃:၁-၃ ကို ဖတ်ပါ။ ကျွန်တော်တို့ နိုးကြားတက်ကြွနေရမယ်။ သာဒိ အသင်းတော်မှာတော့ ပြဿနာ နောက်တစ်ခု ရှိတယ်။ အရင်တုန်းက ဘုရားအမှုတော်မှာ တက်တက်ကြွကြွ ပါဝင်ခဲ့ကြပေမဲ့ တဖြည်းဖြည်း ဇွဲလျော့လာတယ်။ ဒါကြောင့် ‘နိုးထပါ’ လို့ ယေရှု ပြောတယ်။ ဘာသင်ခန်းစာ ရသလဲ။ ကျွန်တော်တို့ လုပ်ခဲ့တာကို ယေဟောဝါ မမေ့ဘူး။ (ဟီ. ၆:၁၀) ဒါပေမဲ့ အမှုတော်မှာ အရင်က လုပ်ခဲ့တာကိုပဲ အားထားနေလို့ မရဘူး။ အရင်ကလောက် မလုပ်နိုင်တော့ရင်တောင် “သခင့်အလုပ်မှာ” ဆက်အလုပ်များနေဖို့၊ အဆုံးထိ နိုးကြားတက်ကြွနေဖို့ လိုတယ်။—၁ ကော. ၁၅:၅၈။ မ. ၂၄:၁၃။ မာ. ၁၃:၃၃။
၈။ ဗျာဒိတ် ၃:၁၅-၁၇ မှာ လောဒိကိ အသင်းတော်ကို ပြောတဲ့ ယေရှုရဲ့ စကားကနေ ဘာသင်ယူရသလဲ။
၈ ဗျာဒိတ် ၃:၁၅-၁၇ ကို ဖတ်ပါ။ စိတ်ထက်သန်စွာ စိတ်နှလုံး အကြွင်းမဲ့ ဝတ်ပြုရမယ်။ လောဒိကိ အသင်းတော်ရဲ့ ပြဿနာကိုလည်း ယေရှု ပြောတယ်။ သူတို့ဟာ ဝတ်ပြုရေးမှာ “နွေးရုံသာ” ရှိနေတယ်။ ‘စိတ်မချမ်းမြေ့စရာ၊ သနားစရာ’ အခြေအနေပဲလို့ ယေရှု ပြောတယ်။ ယေဟောဝါအတွက်၊ ဝတ်ပြုရေးအတွက် ပြန်စိတ်ထက်သန်လာဖို့ လိုနေတယ်။ (ဗျာ. ၃:၁၉) ဘာသင်ခန်းစာ ရသလဲ။ ကျွန်တော်တို့ စိတ်ထက်သန်မှု ပျောက်ဆုံးနေတယ်ဆိုရင် ယေဟောဝါနဲ့ အဖွဲ့အစည်းအပေါ် ထားတဲ့ ကျေးဇူးတင်လေးမြတ်မှု တိုးများလာအောင် လုပ်ရမယ်။ (ဗျာ. ၃:၁၈) ဇိမ်ကျကျ နေနိုင်ဖို့ ကြိုးစားရင်း ဘုရားရေးရာ လုပ်ဆောင်မှုတွေကို ဒုတိယနေရာ ထားလိုက်တာမျိုး လုံးဝ အဖြစ်မခံပါနဲ့။
၉။ ပေရဂံနဲ့ သွာတိရ အသင်းတော်ကို ပြောတဲ့ ယေရှုရဲ့ စကားတွေအရ ဘယ်အန္တရာယ်ကို ကျွန်တော်တို့ သတိထားဖို့ လိုသလဲ။
၉ အယူဖောက်ပြန်သူတွေရဲ့ သွန်သင်ချက်ကို ငြင်းပယ်ရမယ်။ ပေရဂံ အသင်းတော်သားတချို့ ဂိုဏ်းခွဲနေလို့ ယေရှု အပြစ်ဆိုတယ်။ (ဗျာ. ၂:၁၄-၁၆) သွာတိရ အသင်းတော်သားတွေကတော့ “စာတန်ရဲ့ နက်နဲရာတွေ” နောက် ပါမသွားလို့ ချီးမွမ်းခံရတယ်။ အမှန်တရားလမ်းမှာ “ဆက်ပြီး လျှောက်နေ” ဖို့ အားပေးခံရတယ်။ (ဗျာ. ၂:၂၄-၂၆) မှားယွင်းတဲ့ သွန်သင်ချက်တွေနောက် ပါသွားတဲ့ ခရစ်ယာန်တွေ နောင်တရဖို့ လိုတယ်။ ဒီနေ့ခေတ်မှာကော ဘယ်လိုလဲ။ ယေဟောဝါရဲ့ အတွေးအခေါ်နဲ့ ဆန့်ကျင်တဲ့ သွန်သင်ချက် မှန်သမျှကို ငြင်းပယ်ရမယ်။ အယူဖောက်ပြန်သူတွေဟာ “ဘုရားတရား ကြည်ညိုဟန် ရှိပေမဲ့ တရားကို လက်တွေ့မကျင့်သူတွေ” ဖြစ်တယ်။ (၂ တိ. ၃:၅) ကျမ်းစာကို ထက်ထက်သန်သန် လေ့လာမယ်ဆိုရင် မှားယွင်းတဲ့ သွန်သင်ချက်တွေကို ခွဲခြားသိဖို့၊ ငြင်းပယ်ဖို့ ပိုလွယ်ကူပါလိမ့်မယ်။—၂ တိ. ၃:၁၄-၁၇။ ယု. ၃၊ ၄။
၁၀။ ပေရဂံနဲ့ သွာတိရ အသင်းတော်ကို ယေရှု ပြောတဲ့ စကားကနေ နောက်ထပ် ဘာသင်ယူရသလဲ။
၁၀ လိင်အကျင့်ယိုယွင်းမှု ပုံစံအားလုံးကို ရှောင်ရမယ်။ သည်းမခံ၊ ခွင့်မပြုရဘူး။ ပေရဂံနဲ့ သွာတိရ အသင်းတော်မှာ ပြဿနာတစ်ခု ရှိသေးတယ်။ အသင်းတော်သားတချို့ လိင်အကျင့်ယိုယွင်းမှုကို မငြင်းပယ်တဲ့အတွက် ယေရှု ပြစ်တင်ဆုံးမတယ်။ (ဗျာ. ၂:၁၄၊ ၂၀) ဘာသင်ခန်းစာ ရသလဲ။ နှစ်ပေါင်းများစွာ အမှုဆောင်ခဲ့သူ၊ လောလောဆယ် အခွင့်ထူးတွေ ရထားသူ ဖြစ်ရင်တောင် လိင်အကျင့်ယိုယွင်းရင် ယေဟောဝါ သည်းခံခွင့်ပြုမှာပါလို့ မယူဆသင့်ဘူး။ (၁ ရှ. ၁၅:၂၂။ ၁ ပေ. ၂:၁၆) လောကစံနှုန်း ဘယ်လောက်ပဲ ယိုယွင်းကျဆင်းနေပါစေ ဘုရားရဲ့ မြင့်မားတဲ့ စာရိတ္တစံနှုန်းတွေအတိုင်း ကျွန်တော်တို့ အသက်ရှင်ဖို့ ဘုရား မျှော်လင့်တယ်။—ဧ. ၆:၁၁-၁၃။
၁၁။ အခုထိ ဘာတွေ သိခဲ့ရပြီလဲ။ (“ ဒီနေ့ခေတ် ကျွန်တော်တို့အတွက် သင်ခန်းစာများ” လေးထောင့်ကွက်ကိုလည်း ကြည့်ပါ။)
၁၁ အခုထိ ဘာတွေ သိခဲ့ရပြီလဲ။ ယေဟောဝါ နှစ်သက်လက်ခံတဲ့ နည်းနဲ့ ဝတ်ပြုဖို့ လိုကြောင်း သိခဲ့ရပြီ။ ဘုရား မနှစ်သက်တာ တစ်ခုခု လုပ်နေတယ်ဆိုရင် ချက်ချင်း ပြုပြင်ပြောင်းလဲဖို့ လိုတယ်။ (ဗျာ. ၂:၅၊ ၁၆။ ၃:၃၊ ၁၆) အသင်းတော်တွေကို ယေရှု အလေးပေးပြောတာ တစ်ခု ရှိသေးတယ်။ ဘာများလဲ။
ညှဉ်းပန်းနှိပ်စက်မှုကို လိုလိုလားလား ခံရပ်ပါ
၁၂။ စမုရနနဲ့ ဖိလဒေလဖိ အသင်းတော်ကို ယေရှု ပြောတဲ့ စကားတွေကနေ ဘာသင်ယူနိုင်သလဲ။ (ဗျာဒိတ် ၂:၁၀)
၁၂ စမုရနနဲ့ ဖိလဒေလဖိ အသင်းတော်ကို ယေရှု ပြောတဲ့ စကားတွေအကြောင်း ဆက်ဆွေးနွေးကြစို့။ အဆုံးထိ သစ္စာရှိနေရင် ဆုချခံရမှာ ဖြစ်လို့ ညှဉ်းပန်းနှိပ်စက်မှုကို မကြောက်နဲ့လို့ အဲဒီခရစ်ယာန်တွေကို ယေရှု ပြောတယ်။ (ဗျာဒိတ် ၂:၁၀ ကို ဖတ်ပါ။ ၃:၁၀) ဘာသင်ခန်းစာ ရသလဲ။ ညှဉ်းပန်းနှိပ်စက်မှုကို မျှော်လင့်ထားရမယ်။ လိုလိုလားလား ခံရပ်ရမယ်။ (မ. ၂၄:၉၊ ၁၃။ ၂ ကော. ၁၂:၁၀) အဲဒီလိုလုပ်ဖို့ ဘာကြောင့် အရေးကြီးသလဲ။
၁၃-၁၄။ ဗျာဒိတ် အခန်းကြီး ၁၂ မှာ ဖော်ပြထားတဲ့ ဖြစ်ရပ်တွေက ဘုရားလူမျိုးအပေါ် ဘယ်လို သက်ရောက်မှု ရှိသလဲ။
၁၃ “သခင့်နေ့တော်” ဖြစ်တဲ့ ဒီနေ့ခေတ်မှာ အသက်ရှင်နေတဲ့ ဘုရားလူမျိုး ညှဉ်းပန်းနှိပ်စက်ခံရမယ်ဆိုတာ ဗျာဒိတ်ကျမ်းက ဖော်ပြတယ်။ ဗျာဒိတ် အခန်းကြီး ၁၂ အရ ဘုရားနိုင်ငံတော်မှာ ယေရှု ဘုရင် ဖြစ်ပြီးတာနဲ့ ချက်ချင်း ကောင်းကင်မှာ စစ်ဖြစ်တယ်။ မိက္ခေလ ဖြစ်တဲ့ ယေရှုခရစ်နဲ့ ကောင်းကင်တမန်တွေက စာတန်နဲ့ နတ်ဆိုးတွေကို စစ်တိုက်တယ်။ (ဗျာ. ၁၂:၇၊ ၈) ဘုရားရန်သူတွေ စစ်ရှုံးပြီး မြေကြီးပေါ် ပစ်ချခံရတယ်။ ကမ္ဘာနဲ့ လူတွေအတွက်တော့ အဖြစ်ဆိုးပါပဲ။ (ဗျာ. ၁၂:၉၊ ၁၂) အဲဒါ ဘုရားလူမျိုးအပေါ် ဘယ်လို သက်ရောက်မှု ရှိသလဲ။
၁၄ စာတန် ဘယ်လို တုံ့ပြန်တယ်ဆိုတာ ဗျာဒိတ်ကျမ်းမှာ ဆက်ပြောတယ်။ ကောင်းကင်ကို စာတန် ပြန်သွားလို့ မရတော့တဲ့အတွက် ဘုရားနိုင်ငံတော်ရဲ့ မြေကြီးကိုယ်စားလှယ်တွေ၊ “ယေရှုအကြောင်း သက်သေခံတဲ့သူတွေ” ဖြစ်တဲ့ ဘိသိက်ခံ အကြွင်းအကျန်တွေကို ဒေါသတကြီး တိုက်ခိုက်တယ်။ (ဗျာ. ၁၂:၁၇။ ၂ ကော. ၅:၂၀။ ဧ. ၆:၁၉၊ ၂၀) အဲဒီပရောဖက်ပြုချက် ဘယ်လို ပြည့်စုံနေသလဲ။
၁၅။ ဗျာဒိတ် အခန်းကြီး ၁၁ မှာ ပါတဲ့ “သက်သေနှစ်ယောက်” ဟာ ဘယ်သူတွေကို ဆိုလိုသလဲ။ သူတို့ ဘာဖြစ်သွားသလဲ။
၁၅ နိုင်ငံတော်သတင်း ဟောပြောခြင်းလုပ်ငန်းကို ဦးဆောင်နေတဲ့ ဘိသိက်ခံ ညီအစ်ကိုတွေကို တိုက်ခိုက်ဖို့ ဘုရားရန်သူတွေကို စာတန် သွေးထိုးပေးတယ်။ ဗျာဒိတ်ကျမ်းမှာ ပါတဲ့ အသတ်ခံရတဲ့ “သက်သေနှစ်ယောက်” ဟာ အဲဒီဘိသိက်ခံတွေကို ဆိုလိုတယ်။ * (ဗျာ. ၁၁:၃၊ ၇-၁၁) ၁၉၁၈ မှာ တာဝန်ရှိ ညီအစ်ကို ရှစ်ယောက်ဟာ မှားယွင်းတဲ့ စွဲချက်တွေနဲ့ နှစ်ရှည် ထောင်ဒဏ် ချမှတ်ခံရတယ်။ လူ့ရှုထောင့်ကနေ ကြည့်ရင်တော့ အဲဒီဘိသိက်ခံတွေ “သတ်ပစ်” ခံလိုက်ရတာပဲ။
၁၆။ ၁၉၁၉ မှာ ဘယ်ထူးခြားတဲ့ ဖြစ်ရပ် ဖြစ်လာသလဲ။ အဲဒီအချိန်ကစပြီး စာတန် ဘာဆက်လုပ်နေသလဲ။
၁၆ “သက်သေနှစ်ယောက်” ဟာ ခဏကြာပြီးနောက် အသက်ပြန်ရှင်လာတယ်လို့ ဗျာဒိတ် အခန်းကြီး ၁၁ မှာ ဆက်ပြောတယ်။ အဲဒီပရောဖက်ပြုချက် ပြည့်စုံတဲ့အနေနဲ့ ဘိသိက်ခံ ညီအစ်ကိုတွေ ထောင်ချခံရပြီး နောက်နှစ်မှာ ထူးခြားတာတစ်ခု ဖြစ်လာတယ်။ ၁၉၁၉၊ မတ်လမှာ ဘိသိက်ခံ ညီအစ်ကိုတွေ ထောင်ကနေ လွတ်လာတယ်။ နောက်ပိုင်း၊ စွဲချက်တွေလည်း ရုပ်သိမ်းခံရတယ်။ ဟောပြောခြင်းလုပ်ငန်းကို ညီအစ်ကိုတွေ ချက်ချင်း ပြန်စကြတယ်။ ဒါပေမဲ့ ဘုရားလူမျိုးကို စာတန် တိုက်ခိုက်တာတော့ ရပ်မသွားပါဘူး။ အဲဒီအချိန်ကစပြီး ဘုရားလူမျိုးအားလုံးအပေါ် ညှဉ်းပန်းနှိပ်စက်မှု “မြစ်ရေ” ကို စာတန် မှုတ်ထုတ်တယ်။ (ဗျာ. ၁၂:၁၅) ကျွန်တော်တို့ယောက်တိုင်း “ခံနိုင်ရည်နဲ့ ယုံကြည်ခြင်း ရှိဖို့ လိုတယ်။”—ဗျာ. ၁၃:၁၀။
ယေဟောဝါ ပေးအပ်ထားတဲ့ လုပ်ငန်းမှာ အပြည့်အဝ ပါဝင်ပါ
၁၇။ ဘုရားလူမျိုးဟာ စာတန့်တိုက်ခိုက်မှု ခံရပေမဲ့ မျှော်လင့်မထားတဲ့ ဘယ်အကူအညီ ရသလဲ။
၁၇ ဘုရားလူမျိုးဟာ မျှော်လင့်မထားတဲ့ နေရာကနေ အကူအညီ ရတယ်လို့ ဗျာဒိတ် အခန်းကြီး ၁၂ မှာ ဆက်ဖော်ပြတယ်။ “မြေကြီး” ဟာ ညှဉ်းပန်းနှိပ်စက်မှု “မြစ်ရေ” ကို မျိုချလိုက်တယ်။ (ဗျာ. ၁၂:၁၆) အဲဒီအတိုင်း ဖြစ်ခဲ့တယ်။ တစ်ခါတလေမှာ တရားရေး စနစ်လိုမျိုး စာတန့်လောကရဲ့ အစိတ်အပိုင်းတွေက ဘုရားလူမျိုးကို ကယ်တင်ပေးတယ်။ တရားရုံးအမှုတွေမှာ ဘုရားလူမျိုး မကြာမကြာ အောင်ပွဲရလို့ အတော်အတန် လွတ်လပ်မှု ရကြတယ်။ အဲဒီလွတ်လပ်မှုကို သူတို့ ဘယ်လို သုံးကြသလဲ။ အခွင့်အရေး မှန်သမျှကို အပြည့်အဝ သုံးပြီး ယေဟောဝါ ပေးအပ်ထားတဲ့ လုပ်ငန်းကို ဆက်လုပ်ကြတယ်။ (၁ ကော. ၁၆:၉) အဲဒီလုပ်ငန်းမှာ ဘာပါဝင်သလဲ။
၁၈။ ဒီနောက်ဆုံးကာလမှာ ကျွန်တော်တို့အတွက် အရေးကြီးဆုံးလုပ်ငန်းက ဘာလဲ။
၁၈ ဘုရားလူမျိုးဟာ အဆုံး မရောက်ခင် မြေတစ်ခွင်လုံးမှာ “နိုင်ငံတော် သတင်းကောင်း” ဟောမယ်လို့ ယေရှု ကြိုပြောတယ်။ (မ. ၂၄:၁၄) “ကမ္ဘာပေါ် နေထိုင်သူတွေ၊ လူမျိုး၊ လူမျိုးနွယ်၊ ဘာသာစကား အမျိုးမျိုး ပြောတဲ့လူတွေ၊ လူစုတွေကို ထာဝရ သတင်းကောင်း ကြေညာနေ” တဲ့ ကောင်းကင်တမန် တစ်ပါး ဒါမှမဟုတ် ကောင်းကင်တမန်အုပ်စုရဲ့ ထောက်မမှုကို ဘုရားလူမျိုး ရရှိကြတယ်။—ဗျာ. ၁၄:၆။
၁၉။ ယေဟောဝါကို ချစ်မြတ်နိုးသူတွေ ဘယ်သတင်းကိုလည်း ကြေညာရမလဲ။
၁၉ ဘုရားလူမျိုးဟာ နိုင်ငံတော် သတင်းကောင်းကိုပဲ ကြေညာတာ မဟုတ်ဘူး။ ဗျာဒိတ် အခန်းကြီး ၈ ကနေ ၁၀ မှာ ဖော်ပြထားတဲ့ ကောင်းကင်တမန်တွေရဲ့ လုပ်ငန်းကိုလည်း ထောက်မနေကြတယ်။ အဲဒီကောင်းကင်တမန်တွေဟာ ဘုရားနိုင်ငံတော်ကို ငြင်းပယ်သူတွေအတွက် အဖြစ်ဆိုးတွေ ကြေညာနေတယ်။ ဒါကြောင့် ယေဟောဝါသက်သေတွေဟာ ဆိုးညစ်တဲ့ စာတန့်လောက အစိတ်အပိုင်း အသီးသီးအပေါ် ဘုရားရဲ့ တရားစီရင်ချက်ကို ဖော်ပြတဲ့ သတင်း ကြေညာနေကြတယ်။ အဲဒီတရားစီရင်ချက် သတင်းကို “မီးတွေ၊ မိုးသီးတွေ” နဲ့ ခိုင်းနှိုင်းထားတယ်။ (ဗျာ. ၈:၇၊ ၁၃) အဆုံး သိပ်နီးနေပြီဆိုတာ လူတွေ သိဖို့ လိုတယ်။ ဒါမှ ဘဝမှာ အပြောင်းအလဲကြီးတွေ လုပ်နိုင်မှာ ဖြစ်ပြီး ယေဟောဝါရဲ့ အမျက်တော်နေ့ကနေ လွတ်မြောက်နိုင်မှာ ဖြစ်တယ်။ (ဇေ. ၂:၂၊ ၃) ဒါပေမဲ့ အဲဒီသတင်းကို လူတွေ မကြိုက်ကြဘူး။ ဒါကြောင့် အဲဒီသတင်း ကြေညာနိုင်ဖို့ ရဲစွမ်းသတ္တိ လိုတယ်။ ကြီးစွာသောဒုက္ခအတွင်း နောက်ဆုံး တရားစီရင်ချက်သတင်းဟာ ဒီ့ထက်တောင် ပိုပြင်းထန်ဦးမယ်။—ဗျာ. ၁၆:၂၁။
ပရောဖက်ပြုချက် စကားတွေကို လိုက်နာပါ
၂၀။ နောက်ဆောင်းပါး နှစ်ခုမှာ ဘာအကြောင်း ဆွေးနွေးကြမလဲ။
၂၀ ဗျာဒိတ်ကျမ်းထဲက ပရောဖက်ပြုချက်တွေ ပြည့်စုံမှုမှာ ကျွန်တော်တို့ကိုယ်တိုင် ပါဝင်နေတဲ့အတွက် “ပရောဖက်ပြုချက်” စကားတွေကို လိုက်နာဖို့ လိုတယ်။ (ဗျာ. ၁:၃) ဒါပေမဲ့ ညှဉ်းပန်းနှိပ်စက်ခံရချိန်မှာ ဘယ်လိုနည်းနဲ့ သစ္စာရှိရှိ ခံရပ်နိုင်မလဲ။ ဒီသတင်းတွေကို ဘယ်လိုနည်းနဲ့ သတ္တိရှိရှိ ဆက်ကြေညာနိုင်မလဲ။ အချက်နှစ်ချက်ကြောင့်ပါ။ ပထမ၊ ဘုရားရန်သူတွေနဲ့ပတ်သက်ပြီး ဗျာဒိတ်ကျမ်းမှာ ဖော်ပြထားတဲ့အချက်ကြောင့်၊ ဒုတိယ၊ ဆက်သစ္စာရှိနေရင် ရမယ့် အနာဂတ် ကောင်းချီးတွေကြောင့် ကျွန်တော်တို့ အားရှိကြတယ်။ အဲဒီအကြောင်း နောက်ဆောင်းပါး နှစ်ခုမှာ ဆွေးနွေးပါမယ်။
သီချင်း ၃၂ ယေဟောဝါဘက် ရပ်တည်ကြ
^ စိတ်လှုပ်ရှားစရာ ကာလမှာ ကျွန်တော်တို့ အသက်ရှင်နေကြတယ်။ ဗျာဒိတ်ကျမ်းထဲက ပရောဖက်ပြုချက်တွေ ဒီနေ့ခေတ်မှာ ပြည့်စုံနေတယ်။ အဲဒီပရောဖက်ပြုချက်တွေက ကျွန်တော်တို့အပေါ် ဘယ်လို သက်ရောက်မှု ရှိသလဲ။ ဒီဆောင်းပါးနဲ့ နောက်ဆောင်းပါး နှစ်ခုမှာ ဗျာဒိတ်ကျမ်းကို အတိုချုပ် သုံးသပ်ကြပါမယ်။ ဒီကျမ်းမှာ ရေးထားသမျှကို လိုက်နာခြင်းအားဖြင့် ယေဟောဝါဘုရား နှစ်သက်တဲ့ နည်းနဲ့ ဘယ်လို ဝတ်ပြုနိုင်မလဲဆိုတာ သိလာပါမယ်။
^ mwb19 ဒီဇင်ဘာ စာ. ၃ “‘သက်သေနှစ်ယောက်’ အသတ်ခံရပြီး အသက်ပြန်ရှင်လာ” ကို ကြည့်ပါ။