၁။ ဘုရား​လူမျိုးနဲ့​ပတ်သက်ပြီး ဗျာဒိတ်ကျမ်းမှာ ဘာဖော်ပြ​သလဲ။

 ဘုရားသခင့် ကောင်းကင်​နိုင်ငံတော် တည်ထောင်ပြီ၊ ကောင်းကင်ကနေ စာတန် ပစ်ချခံရပြီ​ဆိုတာ ဗျာဒိတ်ကျမ်းက ဖော်ပြတယ်။ (ဗျာ. ၁၂:၁-၉) ကောင်းကင်မှာ သက်သာရာ ရသွားပေမဲ့ ကျွန်တော်တို့​အတွက်တော့ ဒုက္ခတွေ ပိုတိုးလာတယ်။ ဘာကြောင့်လဲ​ဆိုတော့ ယေဟောဝါကို မြေကြီးပေါ်မှာ သစ္စာရှိရှိ ဝတ်ပြုနေသူတွေကို စာတန် ဒေါသတကြီး တိုက်ခိုက်နေလို့ပဲ။—ဗျာ. ၁၂:၁၂၊ ၁၅၊ ၁၇။

၂။ ယေဟောဝါ​အပေါ် ဆက်သစ္စာရှိဖို့ ဘာက ကူညီပေး​မလဲ။

^၂ ကျွန်တော်တို့ကို စာတန် တိုက်ခိုက်တဲ့​အခါ ယေဟောဝါ​အပေါ် ဘယ်လို ဆက်သစ္စာရှိနိုင်​သလဲ။ (ဗျာ. ၁၃:၁၀) တစ်နည်းကတော့ အနာဂတ်​အကြောင်း သိထားခြင်းပဲ။ ဥပမာ၊ မကြာခင် ကျွန်တော်တို့ ရမယ့် ကောင်းချီး​တချို့​အကြောင်း ဗျာဒိတ်ကျမ်းမှာ တမန်တော် ယောဟန် ဖော်ပြတယ်။ ကောင်းချီးတွေထဲမှာ တစ်ခုကတော့ ဘုရားသခင့် ရန်သူတွေ ဖျက်ဆီးခံရခြင်းပဲ။ အဲဒီ​ရန်သူတွေက ဘယ်သူတွေလဲ၊ သူတို့ ဘာဖြစ်သွားမလဲ​ဆိုတာနဲ့​ပတ်သက်ပြီး ဗျာဒိတ်ကျမ်းမှာ ဖော်ပြထားတာကို ဆွေးနွေးကြစို့။

၃။ ဗျာဒိတ်ကျမ်းမှာ သုံးထားတဲ့ အမှတ်​သင်္ကေတ​တချို့က ဘာတွေလဲ။

^၃ ဗျာဒိတ်ကျမ်းမှာ ကျွန်တော်တို့ ဖတ်ရမယ့် အရာတွေကို “အမှတ်​သင်္ကေတတွေ၊” တစ်နည်း​အားဖြင့် ပုံဆောင်​စကားတွေနဲ့ ဖော်ပြထားတယ်လို့ ဦးဆုံး​အခန်းငယ်မှာ ပြောတယ်။ (ဗျာ. ၁:၁) ဘုရား​ရန်သူတွေကို သားရဲ​အတော်များများနဲ့ ခိုင်းနှိုင်း​ဖော်ပြထားတယ်။ ဥပမာ၊ “သားရဲ​တစ်ကောင် ပင်လယ်ထဲကနေ  တက်လာ” တယ်။ “ချို​ဆယ်ချောင်းနဲ့ ခေါင်း​ခုနစ်လုံး” ရှိတယ်။ (ဗျာ. ၁၃:၁) “တခြား​သားရဲ​တစ်ကောင် မြေကြီးထဲက တက်လာ” တယ်။ နဂါးလို စကားပြောပြီး ‘ကောင်းကင်ကနေ မီးကျလာတဲ့​အထိ လုပ်ပြတယ်။’ (ဗျာ. ၁၃:၁၁-၁၃) နောက်သားရဲ​တစ်ကောင်ကတော့ “နီမြန်းတဲ့ သားရဲ” ဖြစ်ပြီး သူ့ပေါ်မှာ ပြည့်တန်ဆာ​တစ်ယောက် ထိုင်နေတယ်။ အဲဒီ​သားရဲ သုံးကောင်ဟာ ယေဟောဝါ​ဘုရားနဲ့ နိုင်ငံတော်ကို ကြာမြင့်စွာကတည်းက တိုက်ခိုက်နေတဲ့ ရန်သူတွေကို ပုံဆောင်တယ်။ ဒါကြောင့် သူတို့ ဘယ်သူတွေလဲ​ဆိုတာ သိဖို့ အရေးကြီးတယ်။—ဗျာ. ၁၇:၁၊ ၃။

၄-၅။ ဒံယေလ ၇:၁၅-၁၇ မှာ ပါတဲ့ အချက်က အဲဒီ​အမှတ်​သင်္ကေတတွေရဲ့ အဓိပ္ပာယ်ကို နားလည်ဖို့ ဘယ်လို ကူညီပေး​သလဲ။

^၄ အဲဒီ​ရန်သူတွေ ဘယ်သူ ဖြစ်ကြောင်း မလေ့လာခင် သားရဲတွေနဲ့ ပြည့်တန်ဆာ ဘာကို ဆိုလိုကြောင်း နားလည်ဖို့ လိုတယ်။ နားလည်ဖို့ ကျမ်းစာကပဲ ကူညီပေးတယ်။ ဗျာဒိတ်ကျမ်းမှာ ပါတဲ့ အမှတ်​သင်္ကေတ​များစွာကို တခြားကျမ်းစောင်တွေမှာ ရှင်းပြထားတယ်။ ဥပမာ၊ ပရောဖက် ဒံယေလရဲ့ အိပ်မက်မှာ “သားရဲကြီး ၄ ကောင် ပင်လယ်ထဲက တက်လာ” တာကို မြင်တယ်။ (ဒံ. ၇:၁-၃) အဲဒါတွေ ဘာကို ဆိုလိုကြောင်း ဒံယေလ ပြောတယ်။ အဲဒီ​သားရဲကြီးတွေဟာ “ဘုရင်” ဒါမှမဟုတ် အစိုးရ လေးပါးကို ပုံဆောင်တယ်။ (ဒံယေလ ၇:၁၅-၁၇ ကို ဖတ်ပါ။) အဲဒီ​ရှင်းလင်းတဲ့ ဖော်ပြချက်က ဗျာဒိတ်ကျမ်းမှာ ပါတဲ့ သားရဲတွေဟာ အစိုးရတွေကို ဆိုလိုကြောင်း နားလည်ဖို့ ကူညီပေးတယ်။

^၅ ဗျာဒိတ်ကျမ်းမှာ ပါတဲ့ အမှတ်​သင်္ကေတ​တချို့ကို သုံးသပ်ကြည့်ကြစို့။ အဲဒီ​အမှတ်​သင်္ကေတတွေ ဘာကို ဆိုလိုကြောင်း နားလည်ဖို့ တခြား​ကျမ်းချက်တွေက ကူညီပေးကြောင်း သိလာရပါမယ်။ သားရဲတွေ​အကြောင်းကနေ စကြစို့။ သားရဲတွေ ဘယ်သူ့ကို ကိုယ်စားပြုကြောင်း၊ ဘာဖြစ်သွားကြောင်း၊ အဲဒီ​ဖြစ်ရပ်တွေက ကျွန်တော်တို့​အတွက် ဘာအဓိပ္ပာယ် ရှိကြောင်း ကြည့်ကြစို့။

၆။ ဗျာဒိတ် ၁၃:၁-၄ မှာ ပါတဲ့ ခေါင်း​ခုနစ်လုံး ရှိတဲ့ သားရဲက ဘာလဲ။

^၆ ခေါင်း​ခုနစ်လုံး ရှိတဲ့ သားရဲက ဘာလဲ။ (ဗျာဒိတ် ၁၃:၁-၄ ကို ဖတ်ပါ။) ဒီသားရဲဟာ ကျားသစ်နဲ့ တူတယ်။ ဝက်ဝံ​ခြေထောက်၊ ခြင်္သေ့​ပါးစပ်နဲ့ ချို​ဆယ်ချောင်း ရှိတယ်။ ဒံယေလ အခန်းကြီး ၇ မှာ ပါတဲ့ သားရဲ လေးကောင်မှာ အဲဒီလို အမှတ်​သင်္ကေတတွေ ရှိတယ်။ ဗျာဒိတ်ကျမ်းမှာတော့ အဲဒီ​အမှတ်​သင်္ကေတ​အားလုံးဟာ သားရဲ​လေးကောင်မှာ မဟုတ်ဘဲ တစ်ကောင်တည်းမှာ ရှိတယ်။ ဒီသားရဲဟာ အစိုးရ ဒါမှမဟုတ် ကမ္ဘာ့အင်ပါယာ တစ်ခုတည်းကို ဆိုလိုတာ မဟုတ်ဘူး။ “လူမျိုးနွယ်၊ လူစု၊ ဘာသာစကား အမျိုးမျိုး ပြောတဲ့သူတွေ အားလုံး​အပေါ် အုပ်စိုးခွင့်​အာဏာကို” ရတယ်လို့ ယောဟန် ပြောတယ်။ ဒါကြောင့် အစိုးရ​တစ်ခုထက် ပိုကြီးမားတာကို ဆိုလိုတာ ဖြစ်ရမယ်။ (ဗျာ. ၁၃:၇) အခုအချိန်ထိ လူတွေကို အုပ်ချုပ်လာတဲ့ အစိုးရ​အားလုံးကို ပုံဆောင်တာ ဖြစ်ရမယ်။ *—ဒေ. ၈:၉။

၇။ သားရဲရဲ့ ခေါင်း​ခုနစ်လုံးထဲက ခေါင်းတစ်လုံးစီဟာ ဘာကို ဆိုလို​သလဲ။

^၇ ခေါင်း​ခုနစ်လုံးထဲက ခေါင်းတစ်လုံးစီဟာ ဘာကို ဆိုလို​သလဲ။ ဗျာဒိတ် အခန်းကြီး ၁၇ မှာ သဲလွန်စ ပါတယ်။ ဗျာဒိတ် အခန်းကြီး ၁၃ မှာ ပါတဲ့ သားရဲရဲ့ ရုပ်တု​အကြောင်း အဲဒီမှာ ဖော်ပြထားလို့ပဲ။ “ဘုရင် ခုနစ်ပါး ရှိတယ်။ ငါးပါး ကျဆုံးသွားပြီ။ တစ်ပါး ရှိနေတယ်။ နောက်တစ်ပါးက မပေါ်လာသေးဘူး။ ပေါ်လာတဲ့​အခါ တစ်ခဏပဲ တည်တံ့လိမ့်မယ်” လို့ ဗျာဒိတ် ၁၇:၁၀ မှာ ပြောတယ်။ စာတန် အသုံးပြုတဲ့ အစိုးရ​အားလုံးထဲမှာ အစိုးရ ခုနစ်ခုဟာ “ခေါင်း” တွေလို ထင်ပေါ်တယ်။ အဲဒီ​အစိုးရတွေဟာ ဘုရား​လူမျိုး​အပေါ် အတော်အတန် သက်ရောက်မှု  ရှိတဲ့ ကမ္ဘာ့​အာဏာစက်တွေ ဖြစ်တယ်။ တမန်တော် ယောဟန်ခေတ်မှာ အင်ပါယာ ငါးခု ပေါ်ပြီးသွားပြီ။ အီဂျစ်၊ အဆီးရီးယား၊ ဗာဗုလုန်၊ မီဒို-ပါးရှား၊ ဂရိ။ ခြောက်ခုမြောက် အင်ပါယာ ဖြစ်တဲ့ ရောမကတော့ ယောဟန် စိတ်အာရုံ မြင်ရချိန်မှာ အုပ်ချုပ်နေဆဲ ဖြစ်တယ်။ ခုနစ်ခုမြောက် နောက်ဆုံး ကမ္ဘာ့​အာဏာစက်က ဘာဖြစ်မလဲ။

၈။ သားရဲရဲ့ ခုနစ်လုံးမြောက် ခေါင်းက ဘာကို ပုံဆောင်​သလဲ။

^၈ ဒံယေလကျမ်းမှာ ပါတဲ့ ပရောဖက်ပြုချက်တွေက သားရဲရဲ့ ခုနစ်လုံးမြောက် နောက်ဆုံးခေါင်း ဘာလဲ​ဆိုတာ နားလည်ဖို့ ကူညီပေးတယ်။ ဒီဆုံးခန်းကာလ “သခင့်​နေ့တော်” အတွင်း ဘယ်ကမ္ဘာ့​အာဏာစက် အုပ်ချုပ်နေ​သလဲ။ (ဗျာ. ၁:၁၀) အင်္ဂလန်နဲ့ အမေရိကန် ပေါင်းထားတဲ့ အင်္ဂလိပ်-အမေရိကန် ကမ္ဘာ့​အာဏာစက်ပဲ။ ဒါကြောင့် ဗျာဒိတ် ၁၃:၁-၄ မှာ ဖော်ပြထားတဲ့ သားရဲရဲ့ ခုနစ်လုံးမြောက် ခေါင်းဟာ အင်္ဂလိပ်-အမေရိကန် ဖြစ်တယ်လို့ ကောက်ချက်​ချနိုင်တယ်။

၉။ “သိုးသငယ်လို ချို​နှစ်ချောင်း” ရှိတဲ့ သားရဲဟာ ဘာကို ပုံဆောင်​သလဲ။

^၉ ဗျာဒိတ် အခန်းကြီး ၁၃ က ခုနစ်လုံးမြောက် ခေါင်း ဖြစ်တဲ့ အင်္ဂလိပ်-အမေရိကန် ကမ္ဘာ့​အာဏာစက်ကို နောက်ထပ်​သားရဲ​တစ်ကောင်​အဖြစ် ဆက်ဖော်ပြတယ်။ အဲဒီ​သားရဲက “သိုးသငယ်လို ချို​နှစ်ချောင်း ရှိပြီး နဂါးလို စပြီး စကားပြောတယ်။” “အံ့ဖွယ်​အမှုကြီးတွေ လုပ်ပြတယ်။ လူသားတွေရှေ့မှာ ကောင်းကင်ကနေ မြေကြီးပေါ် မီးကျလာတဲ့​အထိတောင် လုပ်ပြတယ်။” (ဗျာ. ၁၃:၁၁-၁၅) ဒီသားရဲကို “ပရောဖက် အတုအယောင်” အဖြစ် ဗျာဒိတ် အခန်းကြီး ၁၆ နဲ့ ၁၉ မှာ ဖော်ပြထားတယ်။ (ဗျာ. ၁၆:၁၃။ ၁၉:၂၀) ဒံယေလလည်း အလားတူ​အချက်ကို ဖော်ပြတယ်။ အင်္ဂလိပ်-အမေရိကန် ကမ္ဘာ့​အာဏာစက်ဟာ “သိမ်းရုံး​ဖျက်ဆီးမယ်။” (ဒံ. ၈:၁၉၊ ၂၃၊ ၂၄) ဒုတိယ ကမ္ဘာစစ်အတွင်း အဲဒီ​အတိုင်း ဖြစ်ခဲ့တယ်။ ကမ္ဘာစစ်ကို အဆုံးတိုင်စေတဲ့ အဏုမြူဗုံး​နှစ်လုံးကို အင်္ဂလန်နဲ့ အမေရိကန် သိပ္ပံပညာရှင်တွေ တီထွင်ခဲ့ကြတာ ဖြစ်တယ်။ အင်္ဂလိပ်-အမေရိကန် ကမ္ဘာ့​အာဏာစက်ဟာ ‘ကောင်းကင်ကနေ မြေကြီးပေါ် မီးကျလာတဲ့​အထိ လုပ်ပြ’ လိုက်တာပဲ။

၁၀။ “သားရဲရဲ့ ရုပ်တု” ဟာ ဘာကို ပုံဆောင်​သလဲ။ (ဗျာဒိတ် ၁၃:၁၄၊ ၁၅။ ၁၇:၃၊ ၈၊ ၁၁)

^၁၀ နောက်သားရဲ​တစ်ကောင်ကို ကျွန်တော်တို့ ဆက်မြင်ရတယ်။ နီမြန်းတဲ့ အရောင် ရှိတာက​လွဲလို့ ခေါင်း​ခုနစ်လုံး ရှိတဲ့ သားရဲနဲ့ တော်တော် တူတယ်။ သူ့ကို “သားရဲရဲ့ ရုပ်တု၊” “အဋ္ဌမဘုရင်” လို့ ခေါ်ထားတယ်။ * (ဗျာဒိတ် ၁၃:၁၄၊ ၁၅။ ၁၇:၃၊ ၈၊ ၁၁ ကို ဖတ်ပါ။) အဲဒီ​ “ဘုရင်” ဟာ တစ်ချိန်က ရှိခဲ့ပေမဲ့ ပျောက်သွားတယ်။ ပြီးနောက် ပြန်ပေါ်လာတယ်။ အဲဒီ​ဖော်ပြချက်ဟာ ကမ္ဘာ့​နိုင်ငံရေး​လောကကို အကျိုးဆောင်ပေးတဲ့ ကမ္ဘာ့​ကုလသမဂ္ဂနဲ့ ကိုက်ညီတယ်။ အစတုန်းက နိုင်ငံပေါင်းချုပ်​အသင်းအနေနဲ့ ပေါ်လာတယ်။ ဒုတိယ ကမ္ဘာစစ်​အတွင်း ပျောက်သွားတယ်။ နောက်ပိုင်း၊ အခု​ရှိနေတဲ့ ကုလသမဂ္ဂ​အဖြစ် ပြန်ပေါ်လာတယ်။

၁၁။ အစိုးရတွေ ဘာလုပ်ကြ​သလဲ။ သူတို့ကို ကျွန်တော်တို့ ဘာကြောင့် ကြောက်ဖို့ မလို​သလဲ။

^၁၁ အစိုးရတွေဟာ ယေဟောဝါနဲ့ ဘုရားလူမျိုးကို ဆန့်ကျင်ဖို့ ဝါဒဖြန့်ကြတယ်။ တစ်နည်း​အားဖြင့် “လူနေထိုင်ရာ မြေတစ်ပြင်လုံးမှာ ရှိတဲ့ ဘုရင်တွေ” ကို “အနန္တ​တန်ခိုးရှင် ဘုရားသခင်ရဲ့ နေ့ကြီး” အာမဂေဒုန်မှာ စစ်တိုက်ဖို့ စုရုံးစေကြတယ်။ (ဗျာ. ၁၆:၁၃၊ ၁၄၊ ၁၆) ဒါပေမဲ့ ကျွန်တော်တို့ ကြောက်ဖို့ မလိုပါဘူး။ ကြီးမြတ်တဲ့ ဘုရား ယေဟောဝါဟာ မိမိအုပ်ချုပ်မှုကို ထောက်ခံသူ​အားလုံးကို ကယ်တင်ဖို့ ချက်ချင်း လုပ်ဆောင်ပါလိမ့်မယ်။—ယေဇ. ၃၈:၂၁-၂၃။

၁၂။ သားရဲ​အားလုံး ဘာဖြစ်သွားမလဲ။

 ^၁၂ သားရဲ​အားလုံး ဘာဖြစ်သွားမလဲ။ “သားရဲက အဖမ်းခံရတယ်။ သူနဲ့အတူ ပရောဖက် အတုအယောင်လည်း အဖမ်းခံရတယ်။ အဲဒီ​ပရောဖက်ဟာ သားရဲ​အမှတ်တံဆိပ်ကို ခတ်နှိပ်ပြီး သားရဲရဲ့ ရုပ်တုရှေ့မှာ ကိုးကွယ်တဲ့သူတွေကို လှည့်ဖြားပြီး သားရဲရှေ့မှာတင် အံ့ဖွယ်အမှုတွေ လုပ်ပြတဲ့သူပဲ။ ကန့်တွေ လောင်နေတဲ့ မီးအိုင်ထဲ သားရဲရော အဲဒီ​ပရောဖက်ပါ အရှင်လတ်လတ် ပစ်ချခံရတယ်” လို့ ဗျာဒိတ် ၁၉:၂၀ မှာ ပြောတယ်။ ဒါကြောင့် ဘုရား​ရန်သူတွေ ဖြစ်တဲ့ အဲဒီ​အစိုးရတွေ အုပ်ချုပ်နေတုန်းမှာပဲ ထာဝစဉ် ဖျက်ဆီးခံကြရပါလိမ့်မယ်။

၁၃။ အစိုးရတွေကြောင့် ခရစ်ယာန်တွေ ဘယ်အခက်အခဲ ကြုံရ​သလဲ။

^၁၃ ဒါက ကျွန်တော်တို့​အတွက် ဘာအဓိပ္ပာယ် ရှိ​သလဲ။ ခရစ်ယာန်တွေအနေနဲ့ ဘုရားနဲ့ ဘုရားနိုင်ငံတော်ကို ကျွန်တော်တို့ သစ္စာစောင့်သိရမယ်။ (ယော. ၁၈:၃၆) နိုင်ငံရေးကိစ္စတွေမှာ ကြားနေရမယ်။ အပြောနဲ့ရော လုပ်ရပ်နဲ့ပါ မိမိတို့ကို အပြည့်အဝ ထောက်ခံဖို့ လောကအစိုးရတွေ ဖိအားပေးမှာ ဖြစ်လို့ ကြားနေဖို့ သိပ်ခက်နိုင်တယ်။ သူတို့ရဲ့ ဖိအားပေးမှုကို လက်ခံသူတွေဟာ သားရဲရဲ့ အမှတ်တံဆိပ် ရိုက်နှိပ်ခံရကြလိမ့်မယ်။ (ဗျာ. ၁၃:၁၆၊ ၁၇) ဒါပေမဲ့ အဲဒီ​အမှတ်တံဆိပ် ရိုက်နှိပ်ထားသူ အားလုံး ယေဟောဝါရဲ့ မျက်နှာသာနဲ့ ထာဝရအသက် ဆုံးရှုံးမယ်။ (ဗျာ. ၁၄:၉၊ ၁၀။ ၂၀:၄) ဒါကြောင့် ဘယ်လောက်ပဲ ဖိအားပေးခံရပါစေ လုံးဝ ကြားနေဖို့ သိပ်အရေးကြီးတယ်။

၁၄။ ဗျာဒိတ် ၁၇:၃-၅ မှာ ဘယ်အံ့ဩစရာ မြင်ကွင်းကို တမန်တော် ယောဟန် မြင်ရ​သလဲ။

^၁၄ တမန်တော် ယောဟန်ဟာ ဆက်မြင်ရတဲ့အရာကြောင့် “အကြီးအကျယ် အံ့သြသွားတယ်။” ဘာများလဲ။ မိန်းမတစ်ယောက်ဟာ အဲဒီ​ကြောက်မက်ဖွယ် သားရဲတွေထဲက တစ်ကောင်ပေါ် ထိုင်နေတယ်။ (ဗျာ. ၁၇:၁၊ ၂၊ ၆) သူ့ကို “ပြည့်တန်ဆာကြီး၊” “မဟာဗာဗုလုန်” လို့ ခေါ်ထားတယ်။ “ကမ္ဘာ့​အုပ်စိုးရှင်တွေ” နဲ့ “လိင်အကျင့် ယိုယွင်း” တယ်။—ဗျာဒိတ် ၁၇:၃-၅ ကို ဖတ်ပါ။

၁၅-၁၆။ “မဟာ​ဗာဗုလုန်” ​ဆိုတာ ဘယ်သူလဲ။ ကျွန်တော်တို့ ဘယ်လို သိရ​သလဲ။

^၁၅ “မဟာဗာဗုလုန်” ​ဆိုတာ ဘယ်သူလဲ။ ဒီအမျိုးသမီးဟာ ကမ္ဘာ့​အုပ်စိုးရှင်တွေနဲ့ လိင်အကျင့် ယိုယွင်းတယ်လို့ ပြောတဲ့​အတွက် နိုင်ငံရေး အဖွဲ့အစည်း မဖြစ်နိုင်ဘူး။ (ဗျာ. ၁၈:၉) သူတို့ပေါ် ထိုင်နေတယ်​ဆိုကတည်းက သူတို့ကို ထိန်းချုပ်ဖို့ ကြိုးစားနေတာ ထင်ရှားတယ်။ စာတန့်​လောကရဲ့ လောဘကြီးတဲ့ စီးပွားရေး စနစ်လည်း မဖြစ်နိုင်ဘူး။ “ကမ္ဘာ့​ကုန်သည်တွေ” ဆိုပြီး သူတို့​အကြောင်း သပ်သပ်​ဖော်ပြထားလို့ပဲ။—ဗျာ. ၁၈:၁၁၊ ၁၅၊ ၁၆။

^၁၆ ကျမ်းစာမှာ “ပြည့်တန်ဆာ” ​ဆိုတဲ့ အသုံးအနှုန်းဟာ ဘုရားကို ဝတ်ပြုတယ်လို့ ပြောပြီး ရုပ်တု​ကိုးကွယ်ခြင်း ပုံစံ​တချို့မှာ ပါဝင်နေသူ ဒါမှမဟုတ် တစ်နည်းနည်းနဲ့ လောက​မိတ်ဆွေ ဖြစ်နေသူတွေကို ဆိုလိုတယ်။ (၁ ရာ. ၅:၂၅၊ အောက်ခြေမှတ်ချက်။ ယာ. ၄:၄) ဘုရားကို သစ္စာရှိရှိ ဝတ်ပြုနေသူတွေကိုတော့ “အပျိုစင်တွေ” အဖြစ် ဖော်ပြထားတယ်။ (၂ ကော. ၁၁:၂။ ဗျာ. ၁၄:၄) ရှေးဗာဗုလုန်မြို့ဟာ မှားယွင်းတဲ့ ဝတ်ပြုရေးဗဟို ဖြစ်ခဲ့တယ်။ ဒါကြောင့် မဟာဗာဗုလုန်ဟာ မှားယွင်းတဲ့ ဝတ်ပြုရေး ပုံစံ​အားလုံးကို ဆိုလိုတာ ဖြစ်ရမယ်။ မှားယွင်းတဲ့ ကမ္ဘာ့​ဘာသာရေး အင်ပါယာ ဖြစ်တယ်။—ဗျာ. ၁၇:၅၊ ၁၈။ jw.org မှာ တင်ထားတဲ့ “မဟာ​ဗာဗုလုန်​ဆိုတာ ဘာလဲ” ဝက်ဘ်ဆိုက် ဆောင်းပါးကို ကြည့်ပါ။

၁၇။ မဟာဗာဗုလုန် ဘာဖြစ်သွားမလဲ။

^၁၇ မဟာဗာဗုလုန် ဘာဖြစ်သွား​မလဲ။ “ခင်ဗျား မြင်ရတဲ့ ချို​ဆယ်ချောင်း ရှိတဲ့ သားရဲက ပြည့်တန်ဆာကို မုန်းလိမ့်မယ်။ သူ့ကို သိမ်းရုံး​ဖျက်ဆီးပြီး အဝတ်ဗလာ ဖြစ်စေမယ်။ သူ့အသားကို စားပြီး သူ့ကို အစအန မကျန်အောင် မီးရှို့ပစ်လိမ့်မယ်။ ဘုရားသခင်က မိမိရဲ့ အကြံကို သူတို့ရဲ့ စိတ်ထဲ ထည့်ပေးပြီး အကောင်အထည် ဖော်လိမ့်မယ်”  လို့ ဗျာဒိတ် ၁၇:၁၆၊ ၁၇ မှာ အဖြေပေးတယ်။ နီမြန်းတဲ့ သားရဲ ဖြစ်တဲ့ ကမ္ဘာ့​ကုလသမဂ္ဂကို သုံးပြီး မှားယွင်းတဲ့ ကမ္ဘာ့​ဘာသာရေး အင်ပါယာကို အပြီးအပိုင် တိုက်ခိုက်​ဖျက်ဆီးဖို့ တိုင်းနိုင်ငံတွေကို ယေဟောဝါ လှုံ့ဆော်ပေးပါလိမ့်မယ်။—ဗျာ. ၁၈:၂၁-၂၄။

၁၈။ မဟာဗာဗုလုန်နဲ့ လုံးဝ မပတ်သက်ဖို့ ဘယ်လို အသေအချာ လုပ်ဆောင်ရမလဲ။

^၁၈ ဒါက ကျွန်တော်တို့​အတွက် ဘာအဓိပ္ပာယ် ရှိ​သလဲ။ “အဖဘုရားသခင်ရဲ့ အမြင်မှာ စင်ကြယ်ပြီး အညစ်အကြေး ကင်းစင်တဲ့ ဝတ်ပြုမှု” ဖြစ်နေဖို့ ကျွန်တော်တို့ ကြိုးစားရမယ်။ (ယာ. ၁:၂၇) မှားယွင်းတဲ့ သွန်သင်ချက်တွေ၊ အယူမှား ပွဲနေ့တွေ၊ နိမ့်ကျတဲ့ စာရိတ္တ​စံနှုန်းတွေ၊ မဟာဗာဗုလုန် နတ်ဆိုး​ဓလေ့​ထုံးစံတွေရဲ့ ဩဇာ​လွှမ်းမိုးမှုကို ဘယ်တော့မှ မခံပါနဲ့။ “သူ့ဆီကနေ ထွက်သွားကြ” ဖို့ လူတွေကို ဆက်သတိပေးရမယ်။ ဒါမှ မဟာဗာဗုလုန် အပြစ်ပေးခံရတဲ့​အခါ သူတို့ ရောပြီး မပါမှာ ဖြစ်တယ်။—ဗျာ. ၁၈:၄။

၁၉။ “မီးနီရောင် နဂါးကြီး” က ဘယ်သူလဲ။

^၁၉ ဗျာဒိတ်ကျမ်းမှာ “မီးနီရောင် နဂါးကြီး” ​အကြောင်းလည်း ဖော်ပြတယ်။ (ဗျာ. ၁၂:၃) အဲဒီ​နဂါးဟာ ယေရှုနဲ့ ကောင်းကင်တမန်တွေကို တိုက်ခိုက်တယ်။ (ဗျာ. ၁၂:၇-၉) ဘုရားလူမျိုးကိုလည်း တိုက်ခိုက်တယ်။ လောက​အစိုးရတွေကို အခွင့်အာဏာ ပေးအပ်တယ်။ (ဗျာ. ၁၂:၁၇။ ၁၃:၄) အဲဒီ​နဂါး ဘယ်သူလဲ။ “မာရ်နတ် စာတန်လို့ ခေါ်တဲ့ ရှေးမြွေဟောင်း” ပါပဲ။ (ဗျာ. ၁၂:၉။ ၂၀:၂) ယေဟောဝါရဲ့ ရန်သူ​အားလုံးကို ထိန်းချုပ်နေသူပဲ။

၂၀။ နဂါး ဘာဖြစ်သွားမလဲ။

^၂၀ နဂါး ဘာဖြစ်သွားမလဲ။ စာတန်ကို အကျဉ်းထောင်နဲ့ တူတဲ့ တွင်းနက်ထဲ ကောင်းကင်တမန် ပစ်ချလိမ့်မယ်လို့ ဗျာဒိတ် ၂၀:၁-၃ မှာ ဖော်ပြတယ်။ တွင်းနက်ကြီးထဲ ချခံရတဲ့ “အနှစ် ၁,၀၀၀ မကုန်မချင်း လူမျိုးတွေကို နောက်တစ်ကြိမ် လှည့်ဖြားလို့ မရတော့ဘူး။” နောက်ဆုံး၊ စာတန်နဲ့ နတ်ဆိုးတွေ “ကန့်မီးအိုင်” ထဲ ပစ်ချခံရမယ်။ အပြီးအပိုင် ထာဝရ ဖျက်ဆီးခံရမှာကို ဆိုလိုတယ်။ (ဗျာ. ၂၀:၁၀) စာတန်နဲ့ နတ်ဆိုးတွေ မရှိတော့မယ့် ကမ္ဘာကို မြင်ယောင်ကြည့်ပါ။ သိပ်ကောင်းတဲ့အချိန် ဖြစ်မှာပဲ။

၂၁။ ဗျာဒိတ်ကျမ်းမှာ ဖတ်ရတာတွေက ဘာကြောင့် ပျော်ရွှင်​ချမ်းမြေ့စေနိုင်​သလဲ။

^၂၁ ဗျာဒိတ်ကျမ်းမှာ ဖော်ပြထားတဲ့ အမှတ်​လက္ခဏာတွေရဲ့ အဓိပ္ပာယ်ကို နားလည်ရတာ အားရှိစရာပါပဲ။ ယေဟောဝါရဲ့ ရန်သူတွေ ဘယ်သူလဲ၊ သူတို့ ဘာဖြစ်သွားမလဲ​ဆိုတာ သိခဲ့ရပြီ။ ‘ဒီပရောဖက်ပြုချက်တွေကို ဖတ်ရွတ်တဲ့သူ၊ ကြားနာတဲ့သူဟာ ပျော်ရွှင်​ချမ်းမြေ့လိမ့်မယ်။’ (ဗျာ. ၁:၃) ဘုရားရန်သူတွေ ဖျက်ဆီးခံရပြီးနောက် သစ္စာရှိ လူသားတွေ ဘာကောင်းချီးတွေ ရမလဲ။ နောက်ဆောင်းပါးမှာ ဆွေးနွေးကြပါမယ်။