၁-၂။ အခြေအနေ ပြောင်းသွားတဲ့အခါ ကျမ်းစာမူတချို့ ကိုယ့်​အတွက် အဓိပ္ပာယ် ပိုရှိလာပုံကို ရှင်းပြပါ။

 မင်္ဂလာဆောင်နေ့မှာ သတို့သားနဲ့ သတို့သမီးက ကျမ်းစာအခြေပြု မင်္ဂလာ ဟောပြောချက်ကို ဂရုတစိုက် နားထောင်နေကြတယ်။ ဟောပြောချက်မှာ ပါတဲ့ ကျမ်းစာမူတွေကို အရင်ကလည်း ကြားဖူးပြီးသား ဖြစ်ပေမဲ့ အခုတော့ သူတို့​အတွက် အဓိပ္ပာယ် ပိုရှိလာပြီ။ ကျမ်းစာမူတွေကို မောင်နှံစုံလိုက် လက်တွေ့ကျင့်ရတော့မှာမို့လို့ပဲ။

^၂ ခရစ်ယာန် မောင်နှံတွေ မိဘ ဖြစ်လာတဲ့အခါမှာလည်း အလားတူပါပဲ။ သားသမီး ပြုစုပျိုးထောင်ခြင်း​အကြောင်း နှစ်တွေတစ်လျှောက် ဟောပြောချက် အများကြီး ကြားဖူးတယ်။ ဒါပေမဲ့ အခုတော့ အဲဒီ​ကျမ်းစာမူတွေ သူတို့​အတွက် အဓိပ္ပာယ် ပိုရှိလာပြီ။ ကိုယ်တိုင် သားသမီး ပြုစုပျိုးထောင်ရတော့မှာမို့လို့ပဲ။ တကယ့် တာဝန်ကြီး​ပါပဲ။ အခြေအနေ ပြောင်းသွားတဲ့အခါ ကောင်းကောင်း သိထားပြီးသား ကျမ်းစာမူတွေ​အပေါ် အမြင် ပြောင်းလဲသွားနိုင်တယ်။ ဒါကြောင့် ယေဟောဝါကို ဝတ်ပြုသူတွေဟာ အစ္စရေး ဘုရင်တွေ မိန့်မှာခံခဲ့ရသလို ကျမ်းစာကို “တစ်သက်လုံး” ဖတ်ရှုဆင်ခြင်ကြတာ ဖြစ်တယ်။—တရား. ၁၇:၁၉။

၃။ ဒီဆောင်းပါးမှာ ဘာ​အကြောင်း ဆွေးနွေးကြ​မလဲ။

^၃ မိဘတွေဟာ သားသမီးတွေကို ယေဟောဝါ​အကြောင်း သင်ပေးခြင်း​ဆိုတဲ့ အခွင့်ထူးကြီး ရထားတယ်။ ဘုရားကို သူတို့ သိရုံသာ မဟုတ်ဘဲ ချစ်လာအောင် ကူညီပေးချင်ကြမှာပဲ။ ဘယ်လို ကူညီပေးနိုင်​သလဲ။ ဒီဆောင်းပါးမှာ မိဘတွေကို ကူညီပေးနိုင်တဲ့ ကျမ်းစာမူ လေးခုကို ဆွေးနွေးပါမယ်။ (၂ တိ. ၃:၁၆) ခရစ်ယာန် မိဘတချို့ ကျမ်းစာ​အကြံဉာဏ်တွေ လက်တွေ့ကျင့်လို့ အကျိုးရခဲ့ပုံကိုလည်း ဆွေးနွေးပါမယ်။

၄။ သားသမီးတွေ ယေဟောဝါကို ချစ်လာဖို့ သွန်သင်ပေးရာမှာ မိဘတွေကို ကူညီပေးနိုင်တဲ့ ကျမ်းစာမူ တစ်ခုက ဘာလဲ။ (ယာကုပ် ၁:၅)

^၄ ကျမ်းစာမူ ၁။ ယေဟောဝါရဲ့ လမ်းညွှန်မှုကို ရှာပါ။ သားသမီးတွေ ဘုရားကို ချစ်လာအောင် ကူညီပေးနိုင်ဖို့ လိုအပ်တဲ့ ဉာဏ်ပညာကို ယေဟောဝါဆီကနေ တောင်းခံပါ။ (ယာကုပ် ၁:၅ ကို ဖတ်ပါ။) အကောင်းဆုံး အကြံဉာဏ်ကို ဘုရား ပေးနိုင်တယ်။ ​အကြောင်းရင်း အများကြီးထဲက နှစ်ခုကို သုံးသပ်ကြည့်ပါ။ ပထမ၊ ယေဟောဝါဟာ အတွေ့အကြုံ အရှိဆုံး မိဘ ဖြစ်တယ်။ (ဆာ. ၃၆:၉) ဒုတိယ၊ ဘုရားပေး ပညာရှိ အကြံဉာဏ်ဟာ အမြဲ ကောင်းကျိုး ဖြစ်ထွန်းစေတယ်။—ဟေရှာ. ၄၈:၁၇။

၅။ (က) မိဘတွေကို ကူညီပေးဖို့ ယေဟောဝါရဲ့ အဖွဲ့အစည်း ဘာတွေ ပြင်ဆင်ပေးထား​သလဲ။ (ခ) ဗီဒီယိုမှာ ပါတဲ့ ညီအစ်ကိုနဲ့ ညီအစ်မ အာမိုရင်တို့ရဲ့ သားသမီး ပြုစုပျိုးထောင်ပုံကနေ ဘာသင်ယူရ​သလဲ။

^၅ သားသမီးတွေ ယေဟောဝါကို ချစ်လာအောင် ပြုစုပျိုးထောင်ရာမှာ မိဘတွေကို ကူညီပေးနိုင်တဲ့​အကြောင်းအရာတွေကို ကျမ်းစာ၊ အဖွဲ့အစည်းက​တစ်ဆင့် ယေဟောဝါ ပြင်ဆင်ပေးထားတယ်။ (မ. ၂၄:၄၅) ဥပမာ၊ နှစ်တွေတစ်လျှောက် နိုးလော့! မဂ္ဂဇင်းမှာ ထုတ်ဝေခဲ့တဲ့၊ အခု ဝက်ဘ်ဆိုက်မှာ ရနိုင်ပြီ ဖြစ်တဲ့ “မိသားစု​အတွက် အကူအညီ” ဆောင်းပါးတွဲမှာ လက်တွေ့ကျ အကြံဉာဏ်တွေ ရှာတွေ့နိုင်တယ်။ jw.org ဗီဒီယိုတွေက သားသမီး ပြုစု​ပျိုးထောင်တဲ့အခါ ယေဟောဝါရဲ့ အကြံဉာဏ်ကို လက်တွေ့ကျင့်ဖို့ မိဘတွေကို ကူညီပေးနိုင်တယ်။ *—ပညာ. ၂:၄-၆။

၆။ ယေဟောဝါရဲ့ အဖွဲ့အစည်းကနေ ရတဲ့ လမ်းညွှန်မှုနဲ့​ပတ်သက်ပြီး ဖခင်တစ်ဦး ဘယ်လို ခံစားရ​သလဲ။

^၆ အဖွဲ့အစည်းက​တစ်ဆင့် ယေဟောဝါ ပြင်ဆင်ပေးတဲ့ အကူအညီ​အတွက် မိဘများစွာ ကျေးဇူးတင်ကြောင်း ပြောကြတယ်။ ဖခင်တစ်ဦး ဖြစ်သူ ဂျိုးက “သားသမီး သုံးယောက်ကို အမှန်တရားထဲမှာ ပြုစု​ပျိုးထောင်ရတာ မလွယ်ဘူး။ ကူညီပေးဖို့ ယေဟောဝါဆီ ကျွန်တော်တို့ ဇနီးမောင်နှံ အမြဲ ဆုတောင်းတယ်။ ကြုံတွေ့နေရတဲ့ အခြေအနေကို ရင်ဆိုင်​ဖြေရှင်းဖို့ ဆောင်းပါး တစ်ပုဒ်၊ ဗီဒီယို တစ်ခု အချိန်ကိုက် ထွက်လာတယ်လို့ မကြာခဏ ခံစားရတယ်။ ယေဟောဝါရဲ့ လမ်းညွှန်မှုကို ကျွန်တော်တို့ အမြဲ ရှာတယ်” လို့ ပြောတယ်။ အဲဒီ​ဆောင်းပါးတွေ၊ ဗီဒီယိုတွေက သားသမီးတွေကို ယေဟောဝါနဲ့ ရင်းနှီးလာစေတယ်လို့ ဂျိုးတို့ ဇနီးမောင်နှံ ခံစားကြရတယ်။

၇။ မိဘတွေ စံနမူနာကောင်း ပြဖို့ ဘာကြောင့် အရေးကြီး​သလဲ။ (ရောမ ၂:၂၁)

 ^၇ ကျမ်းစာမူ ၂။ စံနမူနာကောင်း ပြပါ။ သားသမီးတွေက မိဘတွေကို ဂရုတစိုက် ကြည့်ပြီး အတုယူတတ်ကြတယ်။ ပြည့်ဝ​စုံလင်တဲ့ မိဘရယ်လို့ မရှိပါဘူး။ (ရော. ၃:၂၃) ဒါပေမဲ့ ပညာရှိ မိဘတွေဟာ သားသမီးတွေ​အတွက် စံနမူနာကောင်း ပြဖို့ အတတ်နိုင်ဆုံး ကြိုးစားကြတယ်။ (ရောမ ၂:၂၁ ကို ဖတ်ပါ။) သားသမီးတွေနဲ့​ပတ်သက်ပြီး ဖခင်တစ်ဦး ဒီလို ပြောတယ်– “သားသမီးတွေဟာ ဘာမဆို စုပ်ယူတတ်တဲ့ ရေမြှုပ်နဲ့ တူတယ်။ ကျွန်တော်တို့ အပြောနဲ့ အလုပ် မညီရင် သူတို့ ထောက်လိမ့်မယ်။” ဒါကြောင့် သားသမီးတွေ ယေဟောဝါကို ချစ်လာဖို့​ဆိုရင် ကျွန်တော်တို့ ကိုယ်တိုင်ရဲ့ ဘုရား​အပေါ် ထားတဲ့ မေတ္တာ ခိုင်မာ၊ ထင်ရှားနေရမယ်။

၈-၉။ အန်ဒရူးနဲ့ အမ်မာတို့ရဲ့ စကားကနေ ဘာသင်ယူရ​သလဲ။

^၈ သားသမီးတွေ ယေဟောဝါကို ချစ်လာဖို့ မိဘတွေ သင်ပေးနိုင်တဲ့ နည်းများစွာ ရှိတယ်။ အသက် ၁၇ နှစ်အရွယ် အန်ဒရူး ဒီလို ပြောတယ်– “ဆုတောင်းဖို့ အရေးကြီးတယ်​ဆိုတာ မိဘတွေ အမြဲ သင်ပေးတယ်။ ညတိုင်း ကျွန်တော့်ဘာသာ ဆုတောင်းပြီးရင်တောင် အဖေ အတူ လာဆုတောင်းပေးတယ်။ ‘ယေဟောဝါဆီ ဘယ်နှကြိမ် ဖြစ်ဖြစ် ဆုတောင်းလို့ ရတယ်’ လို့ မိဘတွေ သင်ပေးတယ်။ ဒါကြောင့် ဆုတောင်းတာ ကျွန်တော့်​အတွက် အရေးပါလာတယ်။ ဆုတောင်းဖို့ ဝန်မလေးဘူး။ ယေဟောဝါကို မေတ္တာရှိတဲ့ ဖခင်​အဖြစ် မြင်တတ်လာတယ်။” မိဘတို့၊ ယေဟောဝါ​အပေါ် ထားတဲ့ သင်တို့ရဲ့ မေတ္တာက သားသမီးတွေ​အပေါ် ဩဇာ​သက်ရောက်ကြောင်း သတိရပါ။

^၉ အမ်မာရဲ့ အတွေ့အကြုံကိုလည်း စဉ်းစားကြည့်ပါ။ မိသားစုကို ဖခင် ထားခဲ့တော့ မိခင်​ဖြစ်သူ အကြွေးတွေနဲ့ ကျန်ခဲ့တယ်။ “အမေ ငွေကြေး ပြဿနာ ခဏခဏ ကြုံရတယ်။ ဒါပေမဲ့ ကျေးကျွန်တွေကို ယေဟောဝါ ဘယ်လောက် ဂရုစိုက်၊ ထောက်မပေးတယ်​ဆိုတာ အမေ အမြဲ ပြောတယ်။ အဲဒီ​အချက်ကို တကယ် ယုံမှန်း အမေ့ရဲ့ အသက်တာကနေ သိရတယ်။ အမေက သွန်သင်တဲ့အတိုင်း တကယ် ကျင့်တယ်” လို့ အမ်မာ ပြောတယ်။ ဘာသင်ခန်းစာ ရ​သလဲ။ ခက်ခဲတဲ့ အခြေအနေမှာတောင် မိဘတွေ စံနမူနာကောင်း ပြပြီး သားသမီးတွေကို သွန်သင်ပေးနိုင်တယ်။—ဂလ. ၆:၉။

၁၀။ သားသမီးတွေနဲ့ စကားပြောဖို့ အစ္စရေး မိဘတွေမှာ ဘာအခွင့်အရေးတွေ ရှိ​သလဲ။ (တရားဟောရာ ၆:၆၊ ၇)

^၁၀ ကျမ်းစာမူ ၃။ သားသမီးတွေနဲ့ မှန်မှန် စကားပြောပါ။ သားသမီးတွေကို ဘုရား​အကြောင်း မှန်မှန် သွန်သင်ပေးဖို့ ရှေးအစ္စရေးတွေကို ယေဟောဝါ မိန့်မှာတယ်။ (တရားဟောရာ ၆:၆၊ ၇ ကို ဖတ်ပါ။) အစ္စရေး မိဘတွေဟာ သားသမီးတွေနဲ့ စကားပြောဖို့၊ ယေဟောဝါကို ချစ်လာအောင် ကူညီပေးဖို့ တစ်နေ့တာအတွင်း အခွင့်အရေး အများကြီး ရတယ်။ ဥပမာ၊ အစ္စရေး သားယောက်ျားလေးက ကောက်စိုက်ဖို့၊ ကောက်ရိတ်ဖို့ ဖခင်ကို ကူရတယ်။ သမီးက မိခင်နဲ့အတူ အချုပ်အလုပ်၊ အိမ်မှုကိစ္စတွေ လုပ်ရတယ်။ အဲဒီ​လို အတူတူ အလုပ်လုပ်တဲ့အချိန်တွေမှာ သားသမီးတွေကို အရေးကြီးတဲ့ ​အကြောင်းအရာတွေ ပြောပြနိုင်တယ်။ ဥပမာ၊ ယေဟောဝါရဲ့ ကောင်းမြတ်မှု အရည်အသွေး​အကြောင်း၊ မိသားစုကို ဘုရား ဘယ်လို ထောက်မပေးကြောင်း ပြောဆိုနိုင်ကြတယ်။

၁၁။ သားသမီးတွေနဲ့ ခရစ်ယာန် မိဘတွေ စကားပြောနိုင်တဲ့ အခွင့်အရေး တစ်ခုက ဘာလဲ။

^၁၁ ခေတ်တွေ ပြောင်းသွားပြီ။ နိုင်ငံများစွာမှာ မိဘတွေ အလုပ် သွားပြီး သားသမီးတွေ ကျောင်းသွားရလို့ မိဘနဲ့ သားသမီး အချိန်မပေးနိုင်ကြတော့ဘူး။ ဒါကြောင့် သားသမီးတွေနဲ့ စကားပြောနိုင်ဖို့ မိဘတွေ အခွင့်အရေး ရှာရမယ်။ (ဧ. ၅:၁၅၊ ၁၆။ ဖိ. ၁:၁၀) အခွင့်အရေး တစ်ခုကတော့ မိသားစု ဝတ်ပြုမှုအချိန်​ပါပဲ။ လူငယ် ညီအစ်ကို  အလက်ဇန်းဒါး ဒီလို ပြောတယ်– “အဖေက မိသားစု ဝတ်ပြုမှု​အတွက် အမြဲ အစီအစဉ် ဆွဲတယ်။ ဘာ​အကြောင်းကြောင့်မှ အပျက်မခံဘူး။ ဝတ်ပြုမှု ပြီးသွားရင်လည်း ကျွန်တော်တို့ စကားတွေ ထိုင်ပြောကြတယ်။”

၁၂။ မိသားစု ဝတ်ပြုမှုနဲ့​ပတ်သက်ပြီး အိမ်ထောင်ဦးစီး ဘာသတိရသင့်​သလဲ။

^၁၂ မိသားစု ဝတ်ပြုမှုကို သားသမီးတွေ​အတွက် ပျော်စရာ ဖြစ်အောင် အိမ်ထောင်ဦးစီး ဘာလုပ်ပေးနိုင်​သလဲ။ ပျော်စရာဘဝ ထာဝရ စံစားကြ စာအုပ်သစ်ကို လေ့လာနိုင်တယ်။ ဒီစာအုပ်က သားသမီးတွေနဲ့ စကား​ဖောင်ဖွဲ့ဖို့ အခွင့်အရေးကောင်း ရစေတယ်။ သားသမီးတွေကို ခံစားချက်၊ စိုးရိမ်ပူပန်စရာတွေ ထုတ်ပြောစေချင်တယ်​ဆိုရင် မိသားစု ဝတ်ပြုမှုအချိန်အတွင်း ဆူပူ​ဆုံးမတာမျိုး မလုပ်ပါနဲ့။ ကျမ်းစာမူနဲ့ မညီတဲ့ သဘောထား​တစ်ခုခု သားသမီးတွေ ထုတ်ပြောလာရင် လွန်လွန်ကဲကဲ မတုံ့ပြန်ပါနဲ့။ ရိုးရိုးသားသား ပြောပြတာကိုပဲ ကျေးဇူးတင်ပါ။ နောက်လည်း လွတ်လွတ်လပ်လပ် ပြောဖို့ အားပေးပါ။ သားသမီးတွေရဲ့ ခံစားချက်​အမှန်ကို သိမှ အကောင်းဆုံး ကူညီပေးနိုင်မယ်။

၁၃။ သားသမီးတွေ ယေဟောဝါနဲ့ ရင်းနှီးလာအောင် မိဘတွေ ကူညီပေးနိုင်တဲ့ နောက်အခွင့်အရေးက ဘာလဲ။

^၁၃ မိဘတို့၊ ယေဟောဝါနဲ့ ရင်းနှီးလာအောင် သားသမီးတွေကို ကူညီပေးဖို့ အခွင့်အရေး ရှာပါ။ ကျမ်းစာသင်မယ့်အချိန်ထိ စောင့်နေစရာ မလိုပါဘူး။ မိခင်တစ်ဦး ဖြစ်တဲ့ လီဆာက “ဖန်ဆင်းရာတွေ သုံးပြီး သားသမီးတွေကို ယေဟောဝါ​အကြောင်း သင်ပေးတယ်။ ဥပမာ၊ အိမ်က ခွေးလေးရဲ့ အမူအရာ တစ်ခုခုကြောင့် ကလေးတွေ ရယ်မော​ပျော်ရွှင်ရတယ်​ဆိုရင် ဖန်ဆင်းရှင်ဟာ ပျော်ရွှင်တဲ့ ဘုရား ဖြစ်တယ်၊ လူတွေ ပျော်ရွှင်မှု ခံစားတတ်အောင် ဖန်ဆင်းထားတယ်​ဆိုတဲ့​အကြောင်း အမိအရ သင်ပေးတယ်” လို့ ပြောတယ်။

၁၄။ သားသမီးတွေ အပေါင်းအသင်းကို ပညာရှိရှိ ရွေးချယ်ဖို့ မိဘတွေ ဘာကြောင့် ကူညီပေးရ​မလဲ။ (ပညာအလိမ္မာ ၁၃:၂၀)

^၁၄ ကျမ်းစာမူ ၄။ အပေါင်းအသင်းကောင်း ရွေးချယ်ဖို့ သားသမီးတွေကို ကူညီပေးပါ။ အပေါင်းအသင်းက ကိုယ့်​အပေါ် ကောင်းကျိုး၊ ဆိုးကျိုး သက်ရောက်နိုင်တယ်လို့ ကျမ်းစာမှာ ရှင်းရှင်းလင်းလင်း ဖော်ပြထားတယ်။ (ပညာအလိမ္မာ ၁၃:၂၀ ကို ဖတ်ပါ။) မိဘတို့၊ ကိုယ့်သားသမီးရဲ့  အပေါင်းအသင်းတွေကို သိသလား။ တွေ့ဖူးသလား။ ပေါင်းကြည့်ဖူးသလား။ ယေဟောဝါကို ချစ်တဲ့သူတွေနဲ့ သားသမီးတွေ မိတ်ဆွေ ဖြစ်လာဖို့ ဘယ်လို ကူညီပေးနိုင်​သလဲ။ (၁ ကော. ၁၅:၃၃) ယေဟောဝါနဲ့ ဆက်ဆံရေးကောင်း ရှိသူတွေနဲ့ သားသမီးတွေ ပေါင်းဖြစ်အောင် စီစဉ်ပေးခြင်း​အားဖြင့် ကူညီပေးနိုင်တယ်။—ဆာ. ၁၁၉:၆၃။

၁၅။ သားသမီးတွေ အပေါင်းအသင်းကောင်း ရှိလာဖို့ မိဘတွေ ဘယ်လို ကူညီပေးနိုင်​သလဲ။

^၁၅ တိုနီလို့ ခေါ်တဲ့ ဖခင်​အကြောင်း သုံးသပ်ကြည့်ပါ။ မိတ်ဆွေကောင်း ဖွဲ့ဖို့ သားသမီးတွေကို သူတို့​ဇနီးမောင်နှံ ကူညီပေးတဲ့​အကြောင်း ဒီလိုပြောတယ်– “အသက်အရွယ်၊ နောက်ခံ အမျိုးမျိုး ရှိတဲ့ ညီအစ်ကို/မတွေကို အိမ်ခေါ်လည်တယ်။ အတူတူ စားသောက်ကြတယ်။ မိသားစု ဝတ်ပြုမှု လုပ်ကြတယ်။ ဒါက ယေဟောဝါကို ချစ်တဲ့သူ၊ ပျော်ရွှင်စွာ အမှုဆောင်နေသူတွေနဲ့ ရင်းနှီးစေမယ့် နည်းလမ်းကောင်း​ပါပဲ။ တိုက်နယ်​ကြီးကြပ်မှူးတွေ၊ သာသနာပြုတွေ၊ ညီအစ်ကို/မတွေကို အိမ်မှာ တည်းခွင့်ပေးတယ်။ သူတို့ရဲ့ အတွေ့အကြုံ၊ ထက်သန်မှု၊ ကိုယ်ကျိုးစွန့် စိတ်ဓာတ်က သားသမီးတွေ​အပေါ် အကြီးအကျယ် ဩဇာ​သက်ရောက်တယ်။ ယေဟောဝါနဲ့ ရင်းနှီးလာစေတယ်။” မိဘတို့၊ သားသမီးတွေ အပေါင်းအသင်းကောင်း ရှိလာအောင် ကူညီပေးဖို့ စိတ်ပိုင်းဖြတ်ထားပါ။

၁၆။ ယေဟောဝါကို မကိုးကွယ်ချင်ဘူးလို့ သားသမီး ပြောလာရင် ဘာလုပ်နိုင်​သလဲ။

^၁၆ အတတ်နိုင်ဆုံး ကြိုးစား​သွန်သင်ပေးပေမဲ့ ယေဟောဝါကို မကိုးကွယ်ချင်ဘူးလို့ သားသမီး ပြောလာရင်ကော။ မိဘတာဝန် မကျေဘူးလို့ ကောက်ချက် မချပါနဲ့။ ဘုရားကို ကိုးကွယ်မလား၊ မကိုးကွယ်ဘူးလား​ဆိုတာ သားသမီးတွေ အပါအဝင် ကျွန်တော်တို့​အားလုံးကို ယေဟောဝါ လွတ်လပ်စွာ ရွေးချယ်ခွင့် ပြုထားတယ်။ ကိုယ့်သားသမီး ယေဟောဝါကို စွန့်ခွာသွားတယ်​ဆိုရင်တောင် တစ်နေ့ ပြန်လာမှာပါ​ဆိုတဲ့ မျှော်လင့်ချက်ကို မစွန့်လွှတ်လိုက်ပါနဲ့။ ပျောက်တဲ့ သား ပုံဥပမာကို သတိရပါ။ (လု. ၁၅:၁၁-၁၉၊ ၂၂-၂၄) လူငယ်ဟာ လမ်းမှား ရောက်သွားပေမဲ့ နောက်ဆုံးမှာ ပြန်လှည့်လာတယ်။ “ဒါမျိုး ဇာတ်လမ်းထဲမှာပဲ ရှိတယ်။ လက်တွေ့မှာ ဖြစ်နိုင်လို့လား” လို့ တချို့ တွေးမိပါလိမ့်မယ်။  လက်တွေ့မှာလည်း ဖြစ်နိုင်ကြောင်း လူငယ် အီလီရဲ့ တွေ့ကြုံမှုကို သုံးသပ်ကြည့်ပါ။

၁၇။ အီလီရဲ့ တွေ့ကြုံမှုက ဘာကြောင့် အားရှိစေ​သလဲ။

^၁၇ မိဘတွေနဲ့​ပတ်သက်ပြီး အီလီ ဒီလိုပြောတယ်– “မိဘတွေက ယေဟောဝါနဲ့ ကျမ်းစာကို ကျွန်တော် ချစ်မြတ်နိုးလာအောင် အစွမ်းကုန် သင်ပေးခဲ့ကြပါတယ်။ ဒါပေမဲ့ ကျွန်တော် ဆယ်ကျော်သက်​အရွယ်​ရောက်တော့ ဆိုးသွမ်း​မိုက်မဲလာတယ်။” အီလီက မိဘတွေရှေ့​တစ်မျိုး ကွယ်ရာ​တစ်မျိုး ပြုမူ​နေထိုင်တယ်။ မိဘတွေရဲ့ အကူအညီကို လက်မခံဘူး။ အိမ်က ထွက်လာပြီးနောက် မကောင်းတာတွေ လုပ်တယ်။ ဒါပေမဲ့ တစ်ခါတလေ သူငယ်ချင်း တစ်ယောက်နဲ့ ကျမ်းစာ​အကြောင်း ဆွေးနွေးဖြစ်တယ်။ “ယေဟောဝါ​အကြောင်း သူငယ်ချင်းကို ပြောပြလေလေ ကျွန်တော်လည်း ယေဟောဝါ​အကြောင်း စဉ်းစားလာလေလေ​ပါပဲ။ ကျွန်တော့်​ရင်ထဲမှာ ငုပ်လျှိုးနေတဲ့၊ မိဘတွေ ကြိုးစား​သင်ပေးခဲ့တဲ့ ကျမ်းစာ​အမှန်တရားတွေက တဖြည်းဖြည်း ပြန်လည်​နိုးထလာတယ်” လို့ အီလီ ပြောတယ်။ နောက်ဆုံးမှာ အမှန်တရားထဲ ပြန်ရောက်လာတယ်။ * ယေဟောဝါကို ချစ်ဖို့ ငယ်ငယ်ကတည်းက ကြိုးစား​သင်ပေးခဲ့လို့ မိဘတွေ ဘယ်လောက် ဝမ်းသာ​မလဲ​ဆိုတာ မြင်ယောင်ကြည့်ပါ။—၂ တိ. ၃:၁၄၊ ၁၅။

၁၈။ သားသမီးတွေ ယေဟောဝါကို ချစ်လာဖို့ ကြိုးစားသွန်သင်ပေးတဲ့ မိဘတွေနဲ့​ပတ်သက်ပြီး သင် ဘယ်လို ခံစားရ​သလဲ။

^၁၈ ယေဟောဝါကို ဝတ်ပြု​ကိုးကွယ်လာမယ့် မျိုးဆက်သစ် တစ်ယောက်ကို ပြုစု​ပျိုးထောင်ဖို့​ဆိုတဲ့ အခွင့်ထူး မိဘတွေ ရထားတယ်။ (ဆာ. ၇၈:၄-၆) လွယ်ကူတဲ့ တာဝန် မဟုတ်လို့ သင်တို့ရဲ့ ကြိုးစား​အားထုတ်မှုကို တကယ် ချီးမွမ်းပါတယ်။ ယေဟောဝါကို ချစ်လာဖို့၊ ဘုရားရဲ့ သွန်သင်ချက်၊ လမ်းညွှန်ချက်တွေကို နာခံဖို့ သားသမီးတွေကို အတတ်နိုင်ဆုံး ဆက်ကူညီပေးရင် ကောင်းကင်ဘုံစံ မေတ္တာရှင် အဖ ကျေနပ်​ဝမ်းသာမယ်​ဆိုတာ စိတ်ချနိုင်ပါတယ်။—ဧ. ၆:၄။