လေ့လာရန် ဆောင်းပါး ၃၂
မေတ္တာ တိုးသည်ထက် တိုးလာပါစေ
“ခင်ဗျားတို့ရဲ့မေတ္တာ တိုးသည်ထက် တိုးလာဖို့ ကျွန်တော် ဆုတောင်းနေတယ်။”—ဖိ. ၁:၉။
သီချင်း ၁၀၆ မေတ္တာတရားကို ပျိုးထောင်ခြင်း
အကြိုသုံးသပ်ချက် *
၁။ ဖိလိပ္ပိမြို့မှာ အသင်းတော်သစ်ကို ဘယ်သူတွေ တည်ထောင်ခဲ့ကြသလဲ။
ရောမလက်အောက်ခံ ဖိလိပ္ပိမြို့ကို တမန်တော် ပေါလု၊ သိလ၊ လုကာ၊ တိမောသေတို့ ရောက်လာချိန်မှာ သတင်းကောင်း စိတ်ဝင်စားသူများစွာကို တွေ့ခဲ့တယ်။ ထက်သန်တဲ့ ဒီညီအစ်ကို လေးယောက်ဟာ အသင်းတော်သစ်ကို တည်ထောင်ခဲ့တယ်။ ညီအစ်ကို/မသစ်တွေဟာ အစည်းအဝေးတွေ စလုပ်ကြတယ်။ ဧည့်ဝတ်ကျေပွန်တဲ့ ညီအစ်မ လုဒိရဲ့ အိမ်မှာ ဖြစ်နိုင်တယ်။—တ. ၁၆:၄၀။
၂။ အသင်းတော်ဟာ မကြာခင် ဘယ်အခက်အခဲတွေ ကြုံရသလဲ။
၂ အသင်းတော်သစ်ဟာ မကြာခင်မှာပဲ အခက်အခဲတွေ ကြုံရတယ်။ သစ္စာရှိ ခရစ်ယာန်တွေရဲ့ ဟောပြောခြင်းလုပ်ငန်းကို ဆန့်ကျင်ဖို့ ရန်သူတွေကို စာတန် သွေးထိုးပေးတယ်။ ပေါလုနဲ့ သိလဟာ အဖမ်းခံရ၊ ကြိမ်ဒဏ်ရိုက်ခံရပြီး ထောင်ချခံရတယ်။ ထောင်ကနေ လွတ်တဲ့အခါ တပည့်သစ်တွေဆီ ပြန်သွားပြီး အားပေးတယ်။ ပေါလု၊ သိလ၊ တိမောသေတို့ဟာ မြို့ကနေ ထွက်ခွာသွားပေမဲ့ လုကာကတော့ နေရစ်ခဲ့ပုံရတယ်။ အသင်းတော်သစ်ရဲ့ အခြေအနေ ဘယ်လို ဖြစ်သွားသလဲ။ တပည့်သစ်တွေဟာ ယေဟောဝါရဲ့ စွမ်းအားတော် အကူအညီနဲ့ ထက်သန်စွာ ဆက်အမှုဆောင်ကြတယ်။ (ဖိ. ၂:၁၂) သူတို့အတွက် ပေါလု ဂုဏ်ယူခဲ့မှာပဲ။
၃။ ဖိလိပ္ပိ ၁:၉-၁၁ အရ ပေါလု ဘာအတွက် ဆုတောင်းပေးသလဲ။
၃ ဆယ်နှစ်လောက် ကြာပြီးနောက် ဖိလိပ္ပိအသင်းတော်ဆီ ပေါလု စာရေးတယ်။ အဲဒီစာကို သင်ဖတ်တဲ့အခါ ညီအစ်ကိုတွေအပေါ်ထားတဲ့ ပေါလုရဲ့ မေတ္တာကို သိနိုင်တယ်။ ‘ခရစ်တော်ယေရှုလိုပဲ ကျွန်တော်လည်း ခင်ဗျားတို့ကို ချစ်ခင်တွယ်တာပြီး သိပ်လွမ်းဆွတ်တမ်းတနေတယ်’ လို့ ရေးတယ်။ (ဖိ. ၁:၈) သူတို့ မေတ္တာ တိုးလာအောင်၊ ပိုအရေးကြီးတဲ့အရာတွေကို ပိုင်းခြားသိနိုင်အောင်၊ အပြစ်တင်စရာ မရှိအောင်၊ သူတစ်ပါး တိုက်မိလဲစရာ မဖြစ်အောင်၊ ဖြောင့်မတ်တဲ့လုပ်ရပ်တွေ လုပ်ဆောင်နိုင်အောင် ကူညီပေးဖို့ ယေဟောဝါဆီ ဆုတောင်းပေးတဲ့အကြောင်း ရေးတယ်။ ပေါလုရဲ့ စာကနေ သင်ယူစရာ များစွာ ရှိတဲ့အတွက် လေ့လာကြည့်ကြစို့။ (ဖိလိပ္ပိ ၁:၉-၁၁ ကိုဖတ်ပါ။) ပေါလု ရေးခဲ့တဲ့ အချက်တွေနဲ့ အဲဒါတွေကို ဘယ်လို လက်တွေ့ ကျင့်သုံးနိုင်ကြောင်း ဆွေးနွေးကြပါမယ်။
မေတ္တာ တိုးများပါ
၄။ (က) ၁ ယောဟန် ၄:၉၊ ၁၀ အရ ကျွန်တော်တို့ကို ယေဟောဝါ ဘယ်လို မေတ္တာပြသလဲ။ (ခ) ဘုရားကို ဘယ်လောက် ချစ်ရမလဲ။
၄ ကျွန်တော်တို့ရဲ့ အပြစ်အတွက် အသေခံဖို့ သားတော်ကို မြေကြီးပေါ် စေလွှတ်ခြင်းအားဖြင့် ယေဟောဝါ ကြီးမားတဲ့မေတ္တာ ပြခဲ့တယ်။ (၁ ယောဟန် ၄:၉၊ ၁၀ ကိုဖတ်ပါ။) အဲဒီမေတ္တာက ဘုရားကို ပြန်ချစ်ဖို့ ကျွန်တော်တို့ကို လှုံ့ဆော်ပေးတယ်။ (ရော. ၅:၈) ဘုရားကို ဘယ်လောက် ချစ်ရမလဲ။ ဖာရိရှဲတစ်ယောက် အဲဒီလို မေးတဲ့အခါ “ယေဟောဝါဘုရားကို စိတ်စွမ်းရှိသမျှ၊ ကိုယ်စွမ်းရှိသမျှ၊ ဉာဏ်စွမ်းရှိသမျှနဲ့ ချစ်ပါ” ဆိုပြီး ယေရှု ဖြေတယ်။ (မ. ၂၂:၃၆၊ ၃၇) ဘုရားကို စိတ်မပါ့တပါ ချစ်တာမျိုး ကျွန်တော်တို့ မဖြစ်ချင်ကြဘူး။ နေ့တိုင်း ဘုရားကို ချစ်တဲ့ မေတ္တာ တိုးများနေရမယ်။ “မေတ္တာ တိုးသည်ထက် တိုး” သင့်တယ်လို့ ဖိလိပ္ပိအသင်းတော်ကို ပေါလု ပြောတယ်။ ဘုရားကို ချစ်တဲ့ မေတ္တာ တိုးများအောင် ဘယ်လို လုပ်နိုင်သလဲ။
၅။ ဘုရားကို ချစ်တဲ့ မေတ္တာ ဘယ်လို တိုးများလာနိုင်မလဲ။
၅ ဘုရားကို ချစ်ဖို့ ဘုရားအကြောင်း သိရမယ်။ “မေတ္တာမရှိတဲ့သူကတော့ ဘုရားသခင်ကို မသိဘူး။ ဘာလို့လဲဆိုတော့ ဘုရားသခင်ဟာ ချစ်ခြင်းမေတ္တာဖြစ်လို့ပဲ” ဆိုပြီး ကျမ်းစာပြောတယ်။ (၁ ယော. ၄:၈) ဘုရားအကြောင်း “တိကျမှန်ကန်စွာ သိကျွမ်းလာပြီး ကောင်းကောင်း ပိုင်းခြားသိမြင်” လာရင် ဘုရားကို ချစ်တဲ့မေတ္တာ တိုးများလာမယ်လို့ တမန်တော် ပေါလု ပြောတယ်။ (ဖိ. ၁:၉) ကျမ်းစာ စလေ့လာတဲ့အခါ ဘုရားအကြောင်း သိလာပြီး ဘုရားကို ချစ်လာတယ်။ ဘုရားအကြောင်း ပိုသိလေ ဘုရားကိုချစ်တဲ့မေတ္တာ တိုးများလေပဲ။ ဒါကြောင့် ကျမ်းစာ ပုံမှန် လေ့လာဖို့၊ တွေးတောဆင်ခြင်ဖို့ သိပ်အရေးကြီးတယ်။—ဖိ. ၂:၁၆။
၆။ ၁ ယောဟန် ၄:၁၁၊ ၂၀၊ ၂၁ အရ ဘယ်သူတွေကိုလည်း ချစ်ရမလဲ။
၆ ဘုရားသခင်ရဲ့ ကြီးမားတဲ့မေတ္တာက ညီအစ်ကို/မတွေကို ချစ်ဖို့ လှုံ့ဆော်ပေးတယ်။ (၁ ယောဟန် ၄:၁၁၊ ၂၀၊ ၂၁ ကိုဖတ်ပါ။) ညီအစ်ကို/မတွေကို အလိုလို ချစ်လာမယ်လို့ ထင်မိနိုင်တယ်။ ဘာကြောင့်လဲဆိုတော့ ကျွန်တော်တို့အားလုံး ယေဟောဝါကို ဝတ်ပြုပြီး ဘုရားရဲ့ အရည်အသွေးတွေကို တုပနေကြလို့ပဲ။ အသက်ပေးတဲ့အထိ ကျွန်တော်တို့ကို ချစ်တဲ့ ယေရှုရဲ့ ပုံသက်သေကို တုပနေကြလို့ပဲ။ ဒါပေမဲ့ အချင်းချင်း ချစ်ပါဆိုတဲ့ မိန့်မှာချက်ကို နာခံဖို့ တစ်ခါတလေ ခက်နိုင်တယ်။ ဖိလိပ္ပိအသင်းတော်က ဖြစ်ရပ်တစ်ခုကို သုံးသပ်ကြည့်ကြစို့။
၇။ ဧဝေါဒိနဲ့ သုန္တုတ်ကို ပြောတဲ့ ပေါလုရဲ့ ဆုံးမစကားကနေ ဘာသင်ယူရသလဲ။
၇ ဧဝေါဒိနဲ့ သုန္တုတ်ဟာ တမန်တော် ပေါလုနဲ့ “လက်တွဲ” အမှုဆောင်ခဲ့ကြတဲ့ ထက်သန်တဲ့ ညီအစ်မတွေဖြစ်တယ်။ ဒါပေမဲ့ သဘောထား မတိုက်ဆိုင်မှုတွေကြောင့် စိတ်ဝမ်းကွဲသွားကြတယ်။ သူတို့ရဲ့ အသင်းတော်ဆီ ပေါလု ရေးတဲ့စာမှာ ဧဝေါဒိနဲ့ သုန္တုတ်ရဲ့ နာမည်ကို သတ်သတ်မှတ်မှတ် ဖော်ပြပြီး “တစ်စိတ်တစ်သဘောတည်း ရှိကြဖို့” တိုက်တွန်းတယ်။ (ဖိ. ၄:၂၊ ၃) “ဘာပဲလုပ်လုပ် ပြစ်တင်ညည်းညူတာ၊ အငြင်းပွားတာတွေကို ရှောင်ကြပါ” လို့ အသင်းတော် တစ်ခုလုံးကိုလည်း ပေါလု ညွှန်ကြားတယ်။ (ဖိ. ၂:၁၄) တဲ့တိုးကျတဲ့ ပေါလုရဲ့ ဆုံးမစကားက သစ္စာရှိ ညီအစ်မနှစ်ယောက်ကိုသာမက အသင်းတော်တစ်ခုလုံးကိုပါ မေတ္တာ တိုးများအောင် လုပ်ဆောင်ဖို့ ကူညီပေးတယ်။
၈။ ညီအစ်ကို/မတွေကို ချစ်ဖို့ အဓိက အတားအဆီးက ဘာလဲ။ အဲဒါကို ဘယ်လို ကျော်လွှားနိုင်မလဲ။
၈ အချင်းချင်း ချစ်ဖို့ အဓိက အတားအဆီးက ဧဝေါဒိနဲ့ သုန္တုတ်လိုပဲ တခြားသူတွေရဲ့ မစုံလင်မှုကို အာရုံစိုက်ခြင်း ဖြစ်တယ်။ ကျွန်တော်တို့အားလုံး နေ့တိုင်း မှားတတ်ကြတယ်။ တခြားသူတွေရဲ့ မစုံလင်မှုကို အာရုံစိုက်ရင် မေတ္တာလျော့လာနိုင်တယ်။ ဥပမာ၊ နိုင်ငံတော်ခန်းမ သန့်ရှင်းရေးလုပ်ဖို့ ညီအစ်ကိုတစ်ယောက် မေ့နေလို့ ကျွန်တော်တို့ စိတ်ဆိုးမိနိုင်တယ်။ သူ့ရဲ့အမှားတွေကို စဉ်းစားမိလေ ပိုစိတ်ဆိုးလေ၊ မေတ္တာလျော့လေ ဖြစ်လာမယ်။ သင် အဲဒီလိုဖြစ်နေရင် ဒီအချက်ကို စဉ်းစားကြည့်ပါ– ယေဟောဝါဟာ ကျွန်တော်တို့ရဲ့ မစုံလင်မှုကိုရော ညီအစ်ကို/မတွေရဲ့ မစုံလင်မှုတွေကိုပါ သိတယ်။ မစုံလင်မှုတွေ ရှိပေမဲ့ ကျွန်တော်တို့အားလုံးကို ချစ်နေဆဲပဲ။ ဒါကြောင့် ယေဟောဝါရဲ့ မေတ္တာကို တုပပြီး ညီအစ်ကို/မတွေကို အကောင်းမြင်ဖို့ လိုတယ်။ ညီအစ်ကို/မတွေကို ချစ်ဖို့ ကြိုးစားမယ်ဆိုရင် ပိုစည်းလုံးလာပါလိမ့်မယ်။—“ပိုအရေးကြီးတဲ့အရာတွေ”
၉။ ပေါလုပြောတဲ့ “ပိုအရေးကြီးတဲ့အရာတွေ” ထဲမှာ ဘာတွေ ပါဝင်သလဲ။
၉ ‘ပိုအရေးကြီးတဲ့အရာတွေကို ပိုင်းခြားသိပါ’ ဆိုပြီး ဖိလိပ္ပိအသင်းတော်နဲ့ ခရစ်ယာန်အားလုံးကို ညွှန်ကြားဖို့ သန့်ရှင်းသော စွမ်းအားတော်က ပေါလုကို လမ်းညွှန်တယ်။ (ဖိ. ၁:၁၀) အဲဒီအရေးကြီးတဲ့ အရာတွေထဲမှာ ယေဟောဝါရဲ့ နာမည် သန့်ရှင်းမြင့်မြတ်စေခြင်း၊ ရည်ရွယ်ချက်တွေ ပြည့်စုံလာခြင်း၊ အသင်းတော် ငြိမ်သက်စည်းလုံးခြင်းတို့ ပါဝင်တယ်။ (မ. ၆:၉၊ ၁၀။ ယော. ၁၃:၃၅) ဘဝမှာ အဲဒါတွေကို အဓိကထားတာက ယေဟောဝါကို ချစ်ကြောင်း ဖော်ပြနေတာ ဖြစ်တယ်။
၁၀။ အပြစ်တင်စရာ မရှိသူအဖြစ် ရှုမြင်ခံရဖို့ ဘာလုပ်ရမလဲ။
၁၀ ‘အပြစ်တင်စရာ မရှိ’ ဖို့လည်း ပေါလု ပြောတယ်။ အဲဒါက ပြည့်ဝစုံလင်ရမယ်လို့ မဆိုလိုပါဘူး။ ယေဟောဝါလိုတော့ ကျွန်တော်တို့ အပြစ်ကင်းနိုင်မှာ မဟုတ်ဘူး။ ဒါပေမဲ့ မေတ္တာတိုးများအောင်၊ ပိုအရေးကြီးတဲ့အရာတွေကို ပိုင်းခြားသိနိုင်အောင် ကျွန်တော်တို့ အတတ်နိုင်ဆုံး ကြိုးစားနေမယ်ဆိုရင် အပြစ်တင်စရာ မရှိသူအဖြစ် ယေဟောဝါ ရှုမြင်ပါလိမ့်မယ်။ မေတ္တာပြနိုင်တဲ့ နည်းတစ်နည်းကတော့ တခြားသူတွေအတွက် တိုက်မိလဲစရာ မဖြစ်အောင် အတတ်နိုင်ဆုံး ရှောင်ခြင်းပါပဲ။
၁၁။ တခြားသူကို တိုက်မိလဲစရာ မဖြစ်အောင် ဘာကြောင့် ဂရုစိုက်သင့်သလဲ။
၁၁ တခြားသူတွေကို တိုက်မိမလဲစေပါနဲ့ဆိုတဲ့ ညွှန်ကြားချက်ဟာ တကယ်တော့ သတိပေးချက်ပါ။ တခြားသူကို ဘယ်လို တိုက်မိလဲစေနိုင်သလဲ။ ကိုယ်ရွေးချယ်လိုက်တဲ့ ဖျော်ဖြေမှု၊ အဝတ်အစား၊ အလုပ်အကိုင်တွေအားဖြင့် ဖြစ်နိုင်တယ်။ ကိုယ့်ရွေးချယ်မှုက မမှားရင်တောင် တခြားသူရဲ့ သိစိတ် အနှောင့်အယှက်ဖြစ်ပြီး တိုက်မိလဲသွားရင် အဲဒါဟာ ကြီးလေးတဲ့ကိစ္စ ဖြစ်တယ်။ ညီအစ်ကို/မ တစ်ယောက်ယောက်ကို တိုက်မိလဲအောင် လုပ်ရင် ကြိတ်ဆုံကျောက်ကြီးကို လည်မှာ ဆွဲပြီး ပင်လယ်ထဲ ပစ်ချခံရတာ ပိုကောင်းမယ်လို့ ယေရှု ပြောတယ်။—မ. ၁၈:၆။
၁၂။ ရှေ့ဆောင်မောင်နှံရဲ့ ပုံသက်သေကနေ ကျွန်တော်တို့ ဘာသင်ယူနိုင်သလဲ။
၁၂ ယေရှုရဲ့ သတိပေးချက်ကို ရှေ့ဆောင်မောင်နှံတစ်စုံ ဘယ်လို လိုက်နာခဲ့ကြောင်း သုံးသပ်ကြည့်ပါ။ သူတို့ရဲ့ အသင်းတော်မှာရှိတဲ့ နှစ်ခြင်းခံခါစ လူသစ် မောင်နှံဟာ ရှေးဆန်တဲ့ မိသားစုက ဖြစ်တယ်။ ခရစ်ယာန်တွေဟာ ရုပ်ရှင် လုံးဝ မကြည့်သင့်ဘူးလို့ သူတို့ ယူဆတယ်။ ရှေ့ဆောင်မောင်နှံ ရုပ်ရှင်သွားကြည့်မှန်း သိလိုက်တဲ့အခါ သူတို့ စိတ်အနှောင့်အယှက် ဖြစ်သွားတယ်။ အဲဒီနောက်ပိုင်း ရှေ့ဆောင်မောင်နှံဟာ လူသစ်တွေ ရင့်ကျက်လာတဲ့အထိ ရုပ်ရှင် သွားမကြည့်တော့ဘူး။ (ဟီ. ၅:၁၄) ဒီလို ကိုယ်ကျိုးစွန့်ခြင်းက ညီအစ်ကို/မသစ်တွေကို ချစ်ကြောင်း အပြောလောက်သာ မဟုတ်ဘဲ လုပ်ရပ်နဲ့ ဖော်ပြနေတာပဲ။—ရော. ၁၄:၁၉-၂၁။ ၁ ယော. ၃:၁၈။
၁၃။ တစ်ယောက်ယောက် အပြစ်လုပ်မိအောင် ကျွန်တော်တို့ ဘယ်လို တိုက်တွန်းမိနိုင်သလဲ။
၁၃ သူတစ်ပါးကို တိုက်မိလဲစေနိုင်တဲ့ နောက်တစ်နည်းကတော့ အပြစ်လုပ်မိအောင် တိုက်တွန်းခြင်း ဖြစ်တယ်။ ဒီဖြစ်ရပ်ကို စဉ်းစားကြည့်ပါ။ ကျမ်းစာသင်သားတစ်ယောက်ဟာ အရက်ဖြတ်ဖို့ အချိန်အကြာကြီး ခက်ခက်ခဲခဲ ကြိုးစားခဲ့ရတယ်။ လုံးဝ ရှောင်မှ ဖြစ်မယ်ဆိုတာ သူသိတယ်။ တဖြည်းဖြည်း တိုးတက်လာပြီး နှစ်ခြင်းခံလိုက်တယ်။ နောက်ပိုင်း ခရစ်ယာန် ပေါင်းသင်းမှုတစ်ခုမှာ သဘောကောင်းတဲ့ အိမ်ရှင်က အရက်နဲ့ ဧည့်ခံရင်း “ခရစ်ယာန် ဖြစ်နေပြီပဲ။ ယေဟောဝါရဲ့ စွမ်းအားတော်လည်း ရှိနေတာပဲ။ စွမ်းအားတော်ရဲ့ အရည်အသွေးတစ်ခုက ချုပ်တည်းခြင်း။ ချုပ်တည်းခြင်းရှိရင် အရက်ကို တော်သင့်ရုံ သောက်နိုင်ရမှာပေါ့” လို့ ပြောတယ်။ အဲဒီတလွဲအကြံပေးချက်ကိုသာ ညီအစ်ကိုသစ် လက်ခံလိုက်ရင် ဘာဆက်ဖြစ်မယ်ဆိုတာ စဉ်းစားကြည့်နိုင်တယ်။
၁၄။ အစည်းအဝေးတွေက ဖိလိပ္ပိ ၁:၁၀ ကို လိုက်နာနိုင်ဖို့ ဘယ်လို ကူညီပေးသလဲ။
၁၄ အစည်းအဝေးတွေက ဖိလိပ္ပိ ၁:၁၀ မှာပါတဲ့ ညွှန်ကြားချက်ကို နည်းအမျိုးမျိုးနဲ့ လိုက်နာနိုင်ဖို့ ကူညီပေးတယ်။ ပထမ၊ ဘယ်အရာက ယေဟောဝါအတွက် ပိုအရေးကြီးကြောင်း သိမြင်စေတယ်။ ဒုတိယ၊ အပြစ်တင်စရာ မရှိသူဖြစ်ဖို့ သိလာတာကို ဘယ်လို လက်တွေ့ ကျင့်ရမယ်ဆိုတာ သိမြင်စေတယ်။ တတိယ၊ “မေတ္တာစိတ် ရှိစေဖို့၊ အကျင့်ကောင်းတွေ ကျင့်စေဖို့” တိုက်တွန်းတယ်။ (ဟီ. ၁၀:၂၄၊ ၂၅) ညီအစ်ကို/မတွေဆီက အားပေးမှု ရရှိလေ ဘုရားနဲ့ သူတို့ကို ချစ်တဲ့မေတ္တာ တိုးများလေပဲ။ အဲဒီလို ချစ်မယ်ဆိုရင် ညီအစ်ကို/မတွေကို တိုက်မိလဲအောင် မလုပ်မိဖို့ အတတ်နိုင်ဆုံး ရှောင်ပါလိမ့်မယ်။
“ဖြောင့်မတ်တဲ့လုပ်ရပ်တွေ” ဆက်လုပ်ဆောင်ပါ
၁၅။ “ဖြောင့်မတ်တဲ့လုပ်ရပ်တွေ” လုပ်ဆောင်ပါဆိုတာ ဘာကို ဆိုလိုသလဲ။
၁၅ “ဖြောင့်မတ်တဲ့လုပ်ရပ်တွေ လုပ်ဆောင်နိုင်” ဖို့ ဖိလိပ္ပိအသင်းတော်အတွက် ပေါလု ဆုတောင်းပေးတယ်။ (ဖိ. ၁:၁၁) အဲဒီ “ဖြောင့်မတ်တဲ့လုပ်ရပ်တွေ” ထဲမှာ ယေဟောဝါနဲ့ ဘုရားလူမျိုးကို ချစ်တဲ့ မေတ္တာ ပါဝင်တယ်။ ယေရှုကို ယုံကြည်တဲ့အကြောင်း၊ သိပ်ကောင်းတဲ့ မျှော်လင့်ချက်အကြောင်း တခြားသူတွေကို ပြောပြခြင်းလည်း ပါဝင်တယ်။ ဖိလိပ္ပိ ၂:၁၅ မှာ “လောကမှာ အလင်းဆောင်သူတွေအဖြစ် ထွန်းလင်း” ပါဆိုပြီး ပြောထားတယ်။ ဒါက “လောကရဲ့ အလင်း” လို့ တပည့်တွေကို ခေါ်ထားတဲ့ ယေရှုရဲ့ စကားကို အမှတ်ရစေတယ်။ (မ. ၅:၁၄-၁၆) “တပည့်ဖြစ်လာအောင် သွန်သင်ပေး” ဖို့ နောက်လိုက်တွေကို မိန့်မှာပြီး ‘ကမ္ဘာမြေအစွန်အဖျားအထိ သက်သေခံကြလိမ့်မယ်’ လို့ ယေရှု ပြောတယ်။ (မ. ၂၈:၁၈-၂၀။ တ. ၁:၈) အဲဒီအရေးကြီးဆုံးလုပ်ငန်းမှာ တက်ကြွစွာ ပါဝင်နေတာက “ဖြောင့်မတ်တဲ့လုပ်ရပ်တွေ” လုပ်ဆောင်နေတာပဲ။
၁၆။ ခက်ခဲချိန်တွေမှာတောင် အလင်းဆောင်သူတွေအဖြစ် ထွန်းလင်းနိုင်ကြောင်း ဖိလိပ္ပိ ၁:၁၂-၁၄ က ဘယ်လို ဖော်ပြသလဲ။ (မျက်နှာဖုံးပုံကို ကြည့်ပါ။)
၁၆ ဘယ်အခြေအနေမှာပဲဖြစ်ဖြစ် “အလင်းဆောင်သူတွေအဖြစ် ထွန်းလင်း” နိုင်ပါတယ်။ တစ်ခါတလေ၊ သတင်းကောင်း ဟောဖို့ တားဆီးပုံရတဲ့အရာတွေက ဟောပြောဖို့ အခွင့်အရေး ဖြစ်သွားနိုင်တယ်။ ဥပမာ၊ ဖိလိပ္ပိအသင်းတော်ဆီ စာရေးတုန်းက တမန်တော် ပေါလုဟာ ရောမမြို့မှာ အကျယ်ချုပ် ကျနေတယ်။ ဒါတောင် အစောင့်တွေ၊ ဧည့်သည်တွေကို ဖိလိပ္ပိ ၁:၁၂-၁၄ ကိုဖတ်ပါ။ ၄:၂၂။
မဟောဘဲ မနေဘူး။ ဘယ်အခြေအနေမှာပဲဖြစ်ဖြစ် ထက်သန်စွာ ဟောပြောတယ်။ ဒါကြောင့် ညီအစ်ကိုတွေလည်း ‘ဘုရားသခင်ရဲ့ တရားစကားကို မကြောက်မရွံ့ ဟောပြော’ ဖို့ ယုံကြည်စိတ်ချမှုနဲ့ သတ္တိ ရှိလာတယ်။—၁၇။ ခက်ခဲချိန်မှာတောင် ဆက်ဟောပြောခဲ့တဲ့ ခေတ်သစ် ဥပမာတစ်ခုကို ပြောပြပါ။
၁၇ ညီအစ်ကို/မများစွာဟာ ပေါလုရဲ့ သတ္တိရှိတဲ့ ပုံသက်သေကို အတုယူကြတယ်။ လွတ်လပ်စွာ ဟောပြောခွင့်၊ တစ်အိမ်တက်ဆင်း သွားခွင့် မရှိတဲ့ နိုင်ငံမှာ နေရပေမဲ့ သတင်းကောင်း ဟောဖို့ နည်းလမ်းတွေ ရှာကြတယ်။ (မ. ၁၀:၁၆-၂၀) အဲဒီလို နိုင်ငံတစ်ခုမှာ တိုက်နယ်ကြီးကြပ်မှူးတစ်ယောက်က ကြေညာသူတွေကို ဆွေမျိုး၊ အိမ်နီးချင်း၊ ကျောင်းနေဖက်၊ အလုပ်ဖော်၊ အသိအကျွမ်းတွေကို ကိုယ်ပိုင် “ရပ်ကွက်” အဖြစ် သဘောထားပြီး ဟောဖို့ အကြံပေးတယ်။ နှစ်နှစ်အတွင်း အဲဒီတိုက်နယ်မှာ အသင်းတော် အရေအတွက် သိသိသာသာ တိုးလာတယ်။ သင့်နိုင်ငံမှာတော့ လွတ်လပ်စွာဟောခွင့် ရှိနေတာ ဖြစ်နိုင်တယ်။ ဒါပေမဲ့ အဲဒီညီအစ်ကို/မတွေရဲ့ ပုံသက်သေကနေ သင်ယူနိုင်ပါတယ်။ အမှုဆောင်လုပ်ငန်းမှာ အပြည့်အဝ ပါဝင်နိုင်မယ့် နည်းလမ်းတွေကို အမြဲရှာပါ။ အတားအဆီးတွေကို ကျော်လွှားနိုင်ဖို့ ယေဟောဝါ ခွန်အားပေးမယ်ဆိုတာ ယုံကြည်စိတ်ချပါ။—ဖိ. ၂:၁၃။
၁၈။ ကျွန်တော်တို့ ဘာလုပ်ဖို့ စိတ်ပိုင်းဖြတ်ထားရမလဲ။
၁၈ ဖိလိပ္ပိအသင်းတော်ဆီ ပေါလု ပေးတဲ့ အကြံပြုချက်ကို လိုက်နာဖို့ အရင်ကထက် စိတ်ပိုင်းဖြတ်ထားကြပါစို့။ ပိုအရေးကြီးတဲ့အရာတွေကို ပိုင်းခြားသိပါ။ အပြစ်တင်စရာ မရှိအောင် နေပါ။ တခြားသူတွေအတွက် တိုက်မိလဲစရာ မဖြစ်ပါစေနဲ့။ ဖြောင့်မတ်တဲ့ လုပ်ရပ်တွေ လုပ်ဆောင်ပါ။ ဒါဆိုရင် မေတ္တာ တိုးများလာပြီး မေတ္တာရှင်ဖခင် ယေဟောဝါကို ဂုဏ်တင်နိုင်ပါလိမ့်မယ်။
သီချင်း ၁၇ “ငါဆန္ဒရှိ”
^ အပိုဒ်၊ 5 ညီအစ်ကို/မတွေကို ချစ်တဲ့ မေတ္တာ တိုးများအောင် လုပ်ဖို့ အရင်ကထက် အခုအချိန်မှာ ပိုလိုအပ်တယ်။ ဖိလိပ္ပိအသင်းတော်ကို ရေးတဲ့စာက ခက်ခဲချိန်မှာတောင် မေတ္တာတိုးများအောင် ဘယ်လို လုပ်ဆောင်နိုင်ကြောင်း နားလည်စေတယ်။
^ အပိုဒ်၊ 54 ပုံအညွှန်း– နိုင်ငံတော်ခန်းမ သန့်ရှင်းရေး လုပ်ချိန်မှာ ညီအစ်ကို ဂျိုးက သားအဖနှစ်ယောက်နဲ့ စကားပြောနေတယ်။ ဖုန်စုပ်နေတဲ့ ညီအစ်ကို မိုက်က ‘ညီအစ်ကို ဂျိုး အလုပ်မလုပ်ဘဲ စကားပြောနေတယ်’ ဆိုပြီး စိတ်ဆိုးတယ်။ နောက်ပိုင်း အသက်ကြီး ညီအစ်မတစ်ယောက်ကို ညီအစ်ကိုဂျိုး ဂရုတစိုက် ကူညီနေတာ တွေ့ပြီး သူ့ရဲ့ အရည်အသွေးကောင်းတွေကို အာရုံစိုက်မိတယ်။
^ အပိုဒ်၊ 58 ပုံအညွှန်း– လွတ်လပ်စွာ မဟောနိုင်တဲ့ နိုင်ငံမှာ ညီအစ်ကိုတစ်ယောက်က အသိတစ်ယောက်ကို လိမ္မာပါးနပ်စွာ သက်သေခံနေတယ်။ နောက်ပိုင်း အလုပ်နားချိန်မှာ အလုပ်ဖော်ကို သက်သေခံတယ်။