လေ့လာရန် ဆောင်းပါး ၄၄
ဘုရားကို ဝတ်ပြုသူတွေအဖြစ် ကြီးပြင်းလာကြမလား
“ယေရှုဟာ ကာယဉာဏ နှစ်တန်စလုံး ကြီးထွား ဖွံ့ဖြိုးလာတယ်။ ဘုရားသခင်ရှေ့၊ လူရှေ့ မျက်နှာသာ ရတဲ့သူ ဖြစ်လာတယ်။”—လု. ၂:၅၂။
သီချင်း ၁၃၄ ဘုရားပေး သားသမီးများ
အကြိုသုံးသပ်ချက် *
၁။ ဘာက အကောင်းဆုံး ဆုံးဖြတ်ချက် ဖြစ်သလဲ။
မိဘတွေရဲ့ ရွေးချယ်မှုက သားသမီးတွေအပေါ် ရေရှည် သက်ရောက်မှု ရှိတတ်တယ်။ မိဘတွေ ရွေးချယ်မှု ညံ့ဖျင်းရင် သားသမီးတွေအပေါ် ဆိုးကျိုး သက်ရောက်နိုင်တယ်။ ပညာရှိရှိ ရွေးချယ်ရင်တော့ သားသမီးတွေ ပျော်ရွှင်ကျေနပ်စရာ ဘဝ ပိုင်ဆိုင်နိုင်မယ်။ သားသမီးတွေလည်း ပညာရှိ ဆုံးဖြတ်ချက်တွေ ချရမယ်။ အကောင်းဆုံး ဆုံးဖြတ်ချက်ကတော့ မေတ္တာရှင် ကောင်းကင်ဖခင် ယေဟောဝါကို ဝတ်ပြုဖို့ပါပဲ။—ဆာ. ၇၃:၂၈။
၂။ ယေရှုနဲ့ သူ့ရဲ့ မိဘတွေ ဘယ်ပညာရှိ ရွေးချယ်မှုတွေ လုပ်ခဲ့သလဲ။
၂ ယေဟောဝါကို ဝတ်ပြုသူတွေ ဖြစ်လာအောင် သားသမီးတွေကို ကူညီပေးဖို့ ယေရှုရဲ့ မိဘတွေ စိတ်ပိုင်းဖြတ်ထားတယ်။ ယေဟောဝါကို ဝတ်ပြုခြင်းဟာ ဘဝမှာ အဓိက ဖြစ်ကြောင်း သူတို့ရဲ့ ရွေးချယ်မှုတွေက ဖော်ပြတယ်။ (လု. ၂:၄၀၊ ၄၁၊ ၅၂) ယေရှုလည်း ယေဟောဝါရဲ့ အလိုဆောင်ဖို့ အကူအညီ ဖြစ်စေတဲ့ ပညာရှိ ရွေးချယ်မှုတွေ လုပ်ခဲ့တယ်။ (မ. ၄:၁-၁၀) ကြင်နာတတ်သူ၊ သစ္စာရှိသူ၊ သတ္တိရှိသူအဖြစ် ကြီးပြင်းလာတယ်။ ဘုရားကို ကြောက်ရွံ့တဲ့ ဘယ်မိဘမဆို ဒီလိုသားမျိုးအတွက် ဂုဏ်ယူဝမ်းသာမှာပဲ။
၃။ ဒီဆောင်းပါးမှာ ဘယ်မေးခွန်းတွေ ဆွေးနွေးမလဲ။
၃ ယေရှုအတွက် ဘယ်ပညာရှိ ရွေးချယ်မှုတွေ ယေဟောဝါ လုပ်ခဲ့သလဲ။ ယောသပ်နဲ့ မာရိတို့ရဲ့ ရွေးချယ်မှုကနေ ခရစ်ယာန် မိဘတွေ ဘာသင်ယူနိုင်သလဲ။ ယေရှုရဲ့ ရွေးချယ်မှုကနေ ခရစ်ယာန် လူငယ်တွေ ဘာသင်ယူနိုင်သလဲ။ အဲဒီမေးခွန်းတွေကို ဒီဆောင်းပါးမှာ ဆွေးနွေးပါမယ်။
ယေဟောဝါဆီကနေ သင်ယူပါ
၄။ သားတော်အတွက် ယေဟောဝါ ဘယ်အရေးကြီး ရွေးချယ်မှု လုပ်ခဲ့သလဲ။
၄ ယေရှုအတွက် အကောင်းဆုံး မိဘကို ယေဟောဝါ ရွေးချယ်ပေးတယ်။ (မ. ၁:၁၈-၂၃။ လု. ၁:၂၆-၃၈) ကျမ်းစာမှာ မှတ်တမ်းတင်ထားတဲ့ မာရိရဲ့ ရင်ဖွင့်ဆုတောင်းစကားတွေက ယေဟောဝါနဲ့ ကျမ်းစာကို ဘယ်လောက် မြတ်နိုးကြောင်း ပြတယ်။ (လု. ၁:၄၆-၅၅) ယေဟောဝါရဲ့ ညွှန်ကြားချက်ကို ယောသပ် လိုက်နာပုံကလည်း ဘုရားကို ကြောက်ရွံ့ကြောင်း၊ ဘုရားနှစ်သက်မှု ရချင်ကြောင်း ပြတယ်။—မ. ၁:၂၄။
၅-၆။ ယေရှု ဘာတွေ ကြုံတွေ့ဖို့ ယေဟောဝါ ခွင့်ပြုခဲ့သလဲ။
၅ ယေရှုအတွက် ချမ်းသာတဲ့ မိဘကို ယေဟောဝါ မရွေးချယ်ခဲ့ဘူး။ ယေရှု မွေးပြီးနောက် ဆက်သတဲ့ ပူဇော်သက္ကာကို ကြည့်ရင် ယောသပ်နဲ့ မာရိ ဆင်းရဲမှန်း သိနိုင်တယ်။ (လု. ၂:၂၄) နာဇရက်မြို့က အိမ်ဘေးမှာ ယောသပ်ရဲ့ လက်သမား အလုပ်ရုံ ရှိနိုင်တယ်။ အနည်းဆုံး သားသမီး ခုနစ်ယောက် ရှိနိုင်လို့ မိသားစု ကြီးလာတာနဲ့အမျှ ခြိုးခြိုးခြံခြံ နေခဲ့ရမှာပဲ။—မ. ၁၃:၅၅၊ ၅၆။
၆ ယေဟောဝါက ယေရှုကို အန္တရာယ်တချို့ကနေ ကာကွယ်ပေမဲ့ အခက်အခဲတိုင်းကနေတော့ မကာကွယ်ပေးဘူး။ (မ. ၂:၁၃-၁၅) ဥပမာ၊ မယုံကြည်သူ ဆွေမျိုးတွေနဲ့ ယေရှု ရင်ဆိုင်ရတယ်။ အစပိုင်းမှာ မိမိကို မေရှိယအဖြစ် မိသားစုရင်းချာတွေ လက်မခံတဲ့အခါ စိတ်ပျက်ခဲ့မှာပဲ။ (မာ. ၃:၂၁။ ယော. ၇:၅) မွေးစားဖခင် ယောသပ် သေဆုံးသွားလို့ သားကြီးအနေနဲ့ မိသားစုလုပ်ငန်းကို လက်လွှဲယူခဲ့ရတယ်။ (မာ. ၆:၃) မိသားစုတာဝန် ပခုံးပေါ် ကျလာလို့ ကြိုးကြိုးစားစား အလုပ်လုပ်ခဲ့ရမှာပဲ။ ဒါကြောင့် တစ်နေကုန် အလုပ်လုပ်ပြီးနောက် ဘယ်လောက် ပင်ပန်းတယ်ဆိုတာ ယေရှု ကိုယ်တွေ့ သိတယ်။
မိဘတို့၊ အကြံဉာဏ် ရဖို့ ကျမ်းစာကို အားကိုးတတ်အောင် သင်ပေးခြင်းအားဖြင့် လက်တွေ့ဘဝကို သားသမီးတွေ ရင်ဆိုင်နိုင်ဖို့ ပြင်ဆင်ပေးပါ (စာပိုဒ် ၇ ကိုကြည့်ပါ) *
၇။ (က) သားသမီး ပြုစုပျိုးထောင်ခြင်းနဲ့ပတ်သက်ပြီး မောင်နှံစုံတွေ ကိုယ့်ကိုယ်ကိုယ် ဘယ်လို မေးသင့်သလဲ။ (ခ) ပညာအလိမ္မာ ၂:၁-၆ အရ ဘာလုပ်ဖို့ သားသမီးတွေကို သင်ပေးရမလဲ။
၇ သင်ဟာ အိမ်ထောင်သည် ဖြစ်ပြီး သားသမီး ယူဖို့ စဉ်းစားနေတယ် ဆိုပါစို့။ ‘ငါဟာ သားသမီးတစ်ယောက်ကို ပြုစုပျိုးထောင်ဖို့ ယေဟောဝါ တာဝန်ပေးရလောက်အောင် နှိမ့်ချသူ၊ ဘုရားရေးရာ စိတ်ဓာတ် ရှိသူ ဟုတ်ရဲ့လား’ လို့ ကိုယ့်ကိုယ်ကိုယ် မေးပါ။ (ဆာ. ၁၂၇:၃၊ ၄) သားသမီး ရှိတဲ့ မိဘ ဖြစ်မယ်ဆိုရင် ကိုယ့်ကိုယ်ကိုယ် ဒီလိုမေးပါ– ‘သားသမီးတွေကို အလုပ်ကြိုးစားဖို့ ငါ သင်ပေးနေရဲ့လား။’ (ဒေ. ၃:၁၂၊ ၁၃) ‘စာတန့်လောကမှာ ကြုံရနိုင်တဲ့ ရုပ်ပိုင်း၊ စာရိတ္တပိုင်းဆိုင်ရာ အန္တရာယ်တွေကနေ သားသမီးတွေကို အတတ်နိုင်ဆုံး ကာကွယ်ပေးနေရဲ့လား။’ (ပညာ. ၂၂:၃) ကြုံရမယ့် ပြဿနာတိုင်းကနေတော့ သားသမီးတွေကို ကာကွယ်ပေးနိုင်မှာ မဟုတ်ဘူး။ ဒါပေမဲ့ အကြံဉာဏ် ရဖို့ ကျမ်းစာကို အားကိုးတတ်အောင် သင်ပေးခြင်းအားဖြင့် လက်တွေ့ဘဝကို ရင်ဆိုင်နိုင်ဖို့ တဖြည်းဖြည်း မေတ္တာပါစွာ ပြင်ဆင်ပေးနိုင်တယ်။ (ပညာအလိမ္မာ ၂:၁-၆ ကိုဖတ်ပါ။) ဥပမာ၊ မိသားစုဝင်တစ်ယောက် စစ်မှန်တဲ့ ဝတ်ပြုရေးကို ကျောခိုင်းသွားတဲ့အခါ ယေဟောဝါအပေါ် ဆက်သစ္စာရှိနေဖို့ ဘာကြောင့် အရေးကြီးကြောင်း သားသမီးတွေကို ပြောပြပါ။ (ဆာ. ၃၁:၂၃) ဒါမှမဟုတ် ချစ်ရသူတစ်ယောက် ဆုံးပါးသွားတဲ့အခါ ဝမ်းနည်းမှုကို ဖြေသိမ့်ဖို့၊ စိတ်ငြိမ်သက်ဖို့ ကူညီပေးနိုင်တဲ့ ကျမ်းချက်တွေ ပြပါ။—၂ ကော. ၁:၃၊ ၄။ ၂ တိ. ၃:၁၆။
ယောသပ်နဲ့ မာရိဆီကနေ သင်ယူပါ
၈။ တရားဟောရာ ၆:၆၊ ၇ မှာပါတဲ့အတိုင်း ယောသပ်နဲ့ မာရိ ဘာလုပ်သလဲ။
၈ ဘုရားသခင်ရှေ့ မျက်နှာသာ ရသူအဖြစ် ယေရှု ကြီးပြင်းလာအောင် ယောသပ်နဲ့ မာရိ ကူညီပေးတယ်။ မိဘတွေအတွက် ယေဟောဝါ ပေးထားတဲ့ ညွှန်ကြားချက်တွေကို လိုက်နာတယ်။ (တရားဟောရာ ၆:၆၊ ၇ ကိုဖတ်ပါ။) ယေဟောဝါကို မိမိတို့ နှစ်နှစ်ကာကာ ချစ်သလို သားသမီးတွေလည်း ချစ်တတ်လာအောင် ကူညီပေးဖို့က သူတို့ရဲ့ အဓိက ပန်းတိုင်ပဲ။
၉။ ယောသပ်နဲ့ မာရိ ဘယ်အရေးကြီး ရွေးချယ်မှုတွေ လုပ်ခဲ့သလဲ။
၉ မိသားစုလိုက် ယေဟောဝါကို ဝတ်ပြုဖို့ ယောသပ်နဲ့ မာရိ ကြိုးစားတယ်။ နာဇရက်မြို့ တရားဇရပ်ကို ပတ်စဉ် သွားတယ်။ ဂျေရုဆလင်မြို့မှာ ကျင်းပတဲ့ ပသခါပွဲကို နှစ်တိုင်း တက်တယ်။ (လု. ၂:၄၁။ ၄:၁၆) ဂျေရုဆလင်မြို့ကို သွားတဲ့ ခရီးစဉ်တစ်လျှောက် သားသမီးတွေကို ယေဟောဝါလူမျိုးရဲ့ သမိုင်းကြောင်း ပြောပြရင်း ကျမ်းစာမှာ ပါတဲ့ နေရာတွေကို ဝင်လည်ခဲ့မှာပဲ။ သားသမီး များလာတာနဲ့အမျှ ဘုရားရေးရာ လုပ်ဆောင်မှုတွေမှာ ပုံမှန် ပါဝင်ရတာ ယောသပ်နဲ့ မာရိအတွက် လွယ်မှာ မဟုတ်ဘူး။ ဒါပေမဲ့ ကြိုးစားရကျိုး နပ်ပါတယ်။ ဝတ်ပြုရေးကို ဦးစားထားတဲ့အတွက် မိသားစုလိုက် ယေဟောဝါနဲ့ ရင်းနှီးနေခဲ့တယ်။
၁၀။ ယောသပ်နဲ့ မာရိဆီကနေ ခရစ်ယာန် မိဘတွေ ဘာသင်ယူနိုင်သလဲ။
၁၀ ယောသပ်နဲ့ မာရိဆီကနေ ခရစ်ယာန် မိဘတွေ ဘာသင်ယူနိုင်သလဲ။ အရေးကြီးဆုံး အချက်ကတော့ ယေဟောဝါကို သင် နှစ်နှစ်ကာကာ ချစ်ကြောင်း သားသမီးတွေကို အပြော၊ အလုပ်နဲ့ သင်ပေးပါ။ ယေဟောဝါကို ချစ်တတ်လာအောင် ကူညီပေးခြင်းဟာ သားသမီးတွေကို ပေးနိုင်သမျှမှာ အကောင်းဆုံး လက်ဆောင်ပဲ။ ဒါ့အပြင် ကျမ်းစာလေ့လာခြင်း၊ ၁ တိ. ၆:၆) စားဝတ်နေရေးကိုလည်း ထောက်မပေးရမယ်။ (၁ တိ. ၅:၈) ဒါပေမဲ့ ဒီစနစ်ဟောင်း အဆုံးတိုင်တဲ့အခါ လွတ်မြောက်ဖို့၊ ကမ္ဘာသစ်ထဲ ဝင်နိုင်ဖို့ သားသမီးတွေကို ကူညီပေးမှာ ပစ္စည်းဥစ္စာ မဟုတ်ဘဲ ယေဟောဝါနဲ့ ရင်းနှီးတဲ့ ဆက်ဆံရေး ဖြစ်ကြောင်း သတိရပါ။ *—ယေဇ. ၇:၁၉။ ၁ တိ. ၄:၈။
ဆုတောင်းခြင်း၊ အစည်းအဝေး တက်ခြင်း၊ အမှုဆောင်မှာ ပါဝင်ခြင်းစတဲ့ အလေ့အထကောင်းတွေ ရှိဖို့ သင်ပေးနိုင်တယ်။ (ယေဟောဝါနဲ့ ရင်းနှီးဖို့ သားသမီးတွေကို ကူညီပေးနိုင်အောင် ပညာရှိ ရွေးချယ်မှုတွေ လုပ်နေတဲ့ ခရစ်ယာန် မိဘများစွာကို မြင်ရတာ အားရှိစရာပါပဲ (စာပိုဒ် ၁၁ ကိုကြည့်ပါ) *
၁၁။ (က) ၁ တိမောသေ ၆:၁၇-၁၉ မှာပါတဲ့ အကြံဉာဏ်က သားသမီး ပြုစုပျိုးထောင်ရာမှာ ပညာရှိ ရွေးချယ်မှုတွေ လုပ်ဖို့ မိဘတွေကို ဘယ်လို ကူညီပေးမလဲ။ (ခ) မိသားစုလိုက် ဘာတွေ လုပ်ဖို့ ပန်းတိုင်ထားနိုင်သလဲ။ ဘာကောင်းချီးတွေ ရနိုင်သလဲ။ (“ ထားသင့်တဲ့ ပန်းတိုင်များ” လေးထောင့်ကွက်ကို ကြည့်ပါ။)
၁၁ ယေဟောဝါနဲ့ ရင်းနှီးဖို့ သားသမီးတွေကို ကူညီပေးနိုင်အောင် ပညာရှိ ရွေးချယ်မှုတွေ လုပ်နေတဲ့ ခရစ်ယာန် မိဘများစွာကို မြင်ရတာ အားရှိစရာပါပဲ။ သူတို့က အတူတကွ ပုံမှန် ဝတ်ပြုတယ်။ အသင်းတော် အစည်းအဝေးတွေ၊ အစည်းအဝေးကြီးတွေ တက်တယ်။ အမှုဆောင်မှာ ပါဝင်တယ်။ မိသားစုတချို့ဆိုရင် သီးခြားရပ်ကွက်တွေမှာ ဟောပြောဖို့ စီစဉ်ကြတယ်။ ဗေသလကို သွားလည်တယ်။ ဆောက်လုပ်ရေး စီမံကိန်းတွေမှာ ကူညီကြတယ်။ အဲဒါတွေ လုပ်ဖို့ ငွေကုန်ကြေးကျ ရှိမှာ ဖြစ်လို့ လွယ်တော့ မလွယ်ဘူး။ ဒါပေမဲ့ ယေဟောဝါရဲ့ ကောင်းချီး အလျှံပယ် ခံစားနေကြရတယ်။ (၁ တိမောသေ ၆:၁၇-၁၉ ကိုဖတ်ပါ။) အဲဒီလိုမိသားစုမှာ ကြီးပြင်းလာတဲ့ သားသမီးတွေဟာ ဘဝတစ်လျှောက်လုံး အလေ့အထကောင်းတွေ ဆက်ရှိသွားတတ်တယ်။ အဲဒီအတွက် မိဘတွေကို ကျေးဇူးတင်နေတတ်ကြတယ်။ *—ပညာ. ၁၀:၂၂။
ယေရှုဆီကနေ သင်ယူပါ
၁၂။ ယေရှု ကြီးပြင်းလာတာနဲ့အမျှ ဘာတွေ လုပ်ခဲ့ရသလဲ။
၁၂ ယေရှုရဲ့ ကောင်းကင်ဖခင်ကော လူသားမိဘတွေပါ ယေရှုအတွက် ပညာရှိ ရွေးချယ်မှုတွေ လုပ်ခဲ့တယ်။ ဒါပေမဲ့ ကြီးပြင်းလာတာနဲ့အမျှ ယေရှုကိုယ်တိုင်လည်း ရွေးချယ်မှုတွေ လုပ်ရတယ်။ (ဂလ. ၆:၅) ကျွန်တော်တို့အားလုံးလိုပဲ ယေရှုမှာ လွတ်လပ်စွာ ရွေးချယ်ပိုင်ခွင့် ရှိတယ်။ ယေရှုဟာ ကိုယ်ကျိုး ရှာချင်ရင် ရှာလို့ ရတယ်။ ဒါပေမဲ့ ယေဟောဝါနဲ့ ဆက်ဆံရေးကောင်း ရှိဖို့ ကြိုးစားခဲ့တယ်။ (ယော. ၈:၂၉) ယေရှုရဲ့ ပုံသက်သေက ဒီနေ့ခေတ် လူငယ်တွေကို ဘယ်လို ကူညီပေးနိုင်သလဲ။
လူငယ်တို့၊ မိဘတွေရဲ့ လမ်းညွှန်မှုကို ဘယ်တော့မှ အာမခံပါနဲ့ (စာပိုဒ် ၁၃ ကိုကြည့်ပါ) *
၁၃။ ကလေးဘဝတုန်းက ယေရှု ဘယ်အရေးကြီး ရွေးချယ်မှုတွေ လုပ်ခဲ့ရသလဲ။
၁၃ ယေရှုဟာ မိဘတွေကို လက်အောက်ခံတယ်။ မိဘတွေရဲ့ လမ်းညွှန်မှုကို တစ်ခါမှ အာမခံဘူး။ သူတို့ထက် ပိုသိတယ်လို့ မယူဆဘူး။ အဲဒီအစား “မိဘစကားကို အမြဲ နာခံတယ်။” (လု. ၂:၅၁) မိဘ ခိုင်းတဲ့ အလုပ်တွေကို သားကြီး တစ်ယောက်အနေနဲ့ အတတ်နိုင်ဆုံး လုပ်ခဲ့မှာပဲ။ မိသားစုကို ထောက်ပံ့နိုင်ဖို့လည်း အဖေ့အလုပ်ကို ကြိုးစားသင်ယူခဲ့မှာ သေချာတယ်။
၁၄။ ကျမ်းစောင်တွေကို ယေရှု ထက်ထက်သန်သန် လေ့လာကြောင်း ဘယ်လို သိရသလဲ။
၁၄ အံ့ဖွယ်နည်းနဲ့ မွေးဖွားလာတဲ့အကြောင်း၊ သူနဲ့ပတ်သက်ပြီး ဘုရားရဲ့ စေတမန်တွေ ဘာပြောခဲ့ကြောင်း ယေရှုကို မိဘတွေ ပြန်ပြောပြခဲ့မှာပဲ။ (လု. ၂:၈-၁၉၊ ၂၅-၃၈) ဒါပေမဲ့ ယေရှုဟာ မိဘတွေ ပြောပြတာလောက်နဲ့ပဲ ကျေနပ်မနေဘူး။ ကျမ်းစောင်တွေကို ကိုယ်တိုင် လေ့လာတယ်။ ဘယ်လို သိရသလဲ။ ဂျေရုဆလင်မြို့က ဆရာတွေဟာ လူငယ်ယေရှုရဲ့ “အဖြေပေးပုံ၊ ဉာဏ်ထက်မြက်ပုံကို တအံ့တဩ” ဖြစ်ခဲ့ကြတယ်။ (လု. ၂:၄၆၊ ၄၇) အသက် ၁၂ နှစ်ပဲ ရှိသေးပေမဲ့ ယေဟောဝါဟာ မိမိဖခင် ဖြစ်ကြောင်း သိနေပြီ။—လု. ၂:၄၂၊ ၄၃၊ ၄၉။
၁၅။ ယေဟောဝါရဲ့ အလိုတော် ဆောင်ဖို့ ရွေးချယ်ကြောင်း ယေရှု ဘယ်လို ပြသလဲ။
၁၅ ယေဟောဝါရဲ့ ရည်ရွယ်ချက်မှာ မိမိရဲ့ အခန်းကဏ္ဍကို သိလာတဲ့အခါ တာဝန်ကို ယေရှု လက်ခံခဲ့တယ်။ (ယော. ၆:၃၈) လူများစွာရဲ့ မုန်းတီးမှု ခံရမှာ သိတယ်။ ဒါဟာ မနှစ်မြို့စရာ ဖြစ်ပေမဲ့ ယေဟောဝါကို လက်အောက်ခံဖို့ ရွေးချယ်ခဲ့တယ်။ အေဒီ ၂၉ မှာ နှစ်ခြင်းခံချိန်ကစပြီး ယေဟောဝါရဲ့ အလိုတော် ဆောင်ခြင်းဟာ ဘဝမှာ အဓိက ဖြစ်လာတယ်။ (ဟီ. ၁၀:၅-၇) ဒုက္ခသစ်တိုင်ပေါ် သေဆုံးချိန်အထိ ဖခင်ရဲ့ အလိုတော်အတိုင်း လုပ်ဆောင်ခဲ့တယ်။—ယော. ၁၉:၃၀။
၁၆။ ယေရှုဆီကနေ သားသမီးတွေ သင်ယူနိုင်တဲ့ သင်ခန်းစာတစ်ခုက ဘာလဲ။
၁၆ မိဘတွေကို နာခံပါ။ ယောသပ်နဲ့ မာရိလိုပဲ သင့်မိဘတွေဟာ မစုံလင်သူတွေ ဖြစ်တယ်။ ဒါပေမဲ့ သင့်ကို ကာကွယ်၊ လေ့ကျင့်၊ လမ်းညွှန်ပေးဖို့ ယေဟောဝါဆီကနေ တာဝန်ရထားကြတယ်။ သူတို့ရဲ့ အကြံဉာဏ်ကို တန်ဖိုးထားမယ်၊ အခွင့်အာဏာကို လေးစားမယ်ဆိုရင် သင် “ကောင်းစားလိမ့်မယ်။”—ဧ. ၆:၁-၄။
၁၇။ ယောရှု ၂၄:၁၅ အရ လူငယ်တွေ ဘာဆုံးဖြတ်ရမလဲ။
၁၇ ဘယ်သူ့ကို ဝတ်ပြုမယ်ဆိုတာ ဆုံးဖြတ်ပါ။ ယေဟောဝါဟာ ဘယ်လို ဘုရားမျိုး ဖြစ်ကြောင်း၊ ဘုရားရည်ရွယ်ချက်မှာ ဘာတွေ ပါဝင်ကြောင်း၊ ဘုရားအလိုတော်ဟာ သင့်အသက်တာနဲ့ ဘယ်လို ဆက်စပ်နေကြောင်း သိအောင် လုပ်ပါ။ (ရော. ၁၂:၂) ဒါဆိုရင် ယေဟောဝါကို ဝတ်ပြုဖို့ဆိုတဲ့ အရေးကြီးဆုံး ဆုံးဖြတ်ချက်ကို ချနိုင်ပါလိမ့်မယ်။ (ယောရှု ၂၄:၁၅ ကိုဖတ်ပါ။ ဒေ. ၁၂:၁) ကျမ်းစာ ပုံမှန် ဖတ်ရှုလေ့လာမယ်ဆိုရင် ယေဟောဝါကို ချစ်တဲ့ မေတ္တာနဲ့ ယုံကြည်ခြင်း တိုးများလာပါလိမ့်မယ်။
၁၈။ လူငယ်တွေ ဘာလုပ်ဖို့ ရွေးချယ်ရမလဲ။ ဘာရလဒ် ရမလဲ။
၁၈ ယေဟောဝါရဲ့ အလိုတော် ဆောင်ခြင်းကို ဦးစားထားပါ။ ကိုယ့်အစွမ်းအစတွေကို ကိုယ်ကျိုးအတွက် သုံးရင် ပျော်ရွှင်မယ်လို့ စာတန့်လောက,က ပြောတယ်။ တကယ်တော့ စည်းစိမ်ကြွယ်ဝဖို့ ဦးစားထားသူတွေဟာ “ဝေဒနာများစွာနဲ့ ကိုယ့်ကိုယ်ကိုယ် ထိုးနှက်ကြတယ်။” (၁ တိ. ၆:၉၊ ၁၀) ယေဟောဝါကို နာခံမယ်၊ ဘုရားအလို ဆောင်ခြင်းကို ဦးစားထားမယ်ဆိုရင်တော့ “ဘဝလမ်းခရီး အောင်မြင်ပြီး ဉာဏ်ပညာရှိရှိ လုပ်ဆောင်နိုင်မယ်။”—ယောရှု ၁:၈။
သင် ဘာလုပ်ဖို့ ရွေးချယ်မလဲ
၁၉။ မိဘတွေ ဘာကို သတိရရမလဲ။
၁၉ မိဘတို့၊ ယေဟောဝါကို ဝတ်ပြုဖို့ သားသမီးတွေကို အတတ်နိုင်ဆုံး ကူညီပါ။ ဘုရားကို အားကိုးပါ။ ဒါဆိုရင် ပညာရှိ ရွေးချယ်မှုတွေ လုပ်နိုင်အောင် ဘုရား ကူညီပေးလိမ့်မယ်။ (ပညာ. ၃:၅၊ ၆) သင့်အပြောထက် အလုပ်က သားသမီးတွေအပေါ် ပိုဩဇာသက်ရောက်မှန်း သတိရပါ။ ယေဟောဝါရှေ့ သားသမီးတွေ မျက်နှာသာ ရစေမယ့် ဆုံးဖြတ်ချက်တွေ ချပါ။
၂၀။ ယေဟောဝါကို ဝတ်ပြုဖို့ ရွေးချယ်ရင် ဘယ်ကောင်းချီးတွေ ရမလဲ။
၂၀ လူငယ်တို့၊ ဘဝမှာ ပညာရှိ ရွေးချယ်မှုတွေ လုပ်နိုင်အောင် မိဘတွေ ကူညီပေးနိုင်တယ်။ ဒါပေမဲ့ ဘုရားမျက်နှာသာ ရဖို့ကတော့ သင့်အပေါ် မူတည်တယ်။ ဒါကြောင့် ယေရှုကို တုပပြီး မေတ္တာရှင် ကောင်းကင်ဖခင်ကို ဝတ်ပြုဖို့ ရွေးချယ်ပါ။ ဒါဆိုရင် လောလောဆယ် အဓိပ္ပာယ် ရှိပြီး စိတ်လှုပ်ရှား ပျော်ရွှင်စရာ ဘဝကို ရမယ်။ (၁ တိ. ၄:၁၆) အနာဂတ်မှာလည်း ကျေနပ်စရာ အကောင်းဆုံး ဘဝကို ရရှိပါလိမ့်မယ်။
သီချင်း ၁၃၃ လူငယ်ဘဝမှာ ယေဟောဝါကို ကိုးကွယ်ကြ
^ အပိုဒ်၊ 5 ခရစ်ယာန် မိဘတွေဟာ သားသမီးတွေကို ယေဟောဝါကို ပျော်ရွှင်စွာ ဝတ်ပြုသူတွေအဖြစ် ကြီးပြင်းလာစေချင်တယ်။ အဲဒီလိုဖြစ်နိုင်ဖို့ မိဘတွေ ဘာလုပ်နိုင်သလဲ။ ခရစ်ယာန် လူငယ်တွေလည်း ဘဝမှာ စစ်မှန်တဲ့ အောင်မြင်မှု ရဖို့ ဘာလုပ်နိုင်သလဲ။ အဲဒီမေးခွန်းတွေကို ဒီဆောင်းပါးမှာ လေ့လာပါမယ်။
^ အပိုဒ်၊ 10 ယေဟောဝါရဲ့ စင်ကြယ်တဲ့ ဝတ်ပြုကိုးကွယ်မှု ပြန်လည်တည်ထောင်ပြီ၊ စာမျက်နှာ ၆၉-၇၀၊ ပိုဒ်. ၁၇-၁၈ ကိုကြည့်ပါ။
^ အပိုဒ်၊ 11 ၂၀၁၁၊ အောက်တိုဘာ နိုးလော့! စာမျက်နှာ ၂၀၊ “ဒီထက်ကောင်းတဲ့ မိဘမျိုး ကျွန်မ စိတ်ကူးလို့တောင် မရဘူး” လေးထောင့်ကွက်၊ ၂၀၀၁၊ ဩဂုတ် ၈ နိုးလော့! စာမျက်နှာ ၁၇ “မိဘများထံ အထူးစာတစ်စောင်” ဆောင်းပါးတွေကို ကြည့်ပါ။
^ အပိုဒ်၊ 66 ပုံအညွှန်း– ယေဟောဝါကို နက်နက်ရှိုင်းရှိုင်း ချစ်တတ်လာအောင် လူငယ်ယေရှုကို မာရိ ကူညီပေး။ ဒီနေ့ခေတ် မိခင်တွေလည်း သားသမီးတွေ ယေဟောဝါကို ချစ်တတ်လာအောင် ကူညီပေးနိုင်။
^ အပိုဒ်၊ 68 ပုံအညွှန်း– မိသားစုနဲ့အတူ တရားဇရပ် သွားရတာကို ယောသပ် တန်ဖိုးထား။ ဒီနေ့ခေတ် ဖခင်တွေလည်း မိသားစုနဲ့အတူ အသင်းတော် အစည်းအဝေးတွေ တက်ရတာကို တန်ဖိုးထားနိုင်။
^ အပိုဒ်၊ 70 ပုံအညွှန်း– ဖခင်ဆီကနေ လက်မှုပညာ ယေရှု သင်ယူ။ ဒီနေ့ခေတ် လူငယ်တွေလည်း ဖခင်ဆီကနေ သင်ယူနိုင်။