စာရှုသူများထံမှ မေးခွန်းလွှာ
ရှောလမုန်ဗိမာန်တော် မုခ်ဦး ဘယ်လောက် မြင့်သလဲ
မုခ်ဦးဟာ ဗိမာန်တော် သန့်ရှင်းရာအခန်း ဝင်ပေါက်မှာ ရှိတယ်။ ၂၀၂၃ ခုနှစ် မတိုင်ခင် ထုတ်ဝေခဲ့တဲ့ ကမ္ဘာသစ်ဘာသာပြန်ကျမ်း တွေမှာ “အိမ်တော် မျက်နှာစာမှာ ရှိတဲ့ မုခ်ဦးရဲ့ အလျားက အိမ်တော်ရဲ့ အနံနဲ့ အတူတူပဲ၊ အလျား အတောင် ၂၀ ရှိတယ်။ အမြင့် အတောင် ၁၂၀ ရှိတယ်” လို့ ဖော်ပြထားတယ်။ (၂ ရာ. ၃:၄) မုခ်ဦး “အတောင် ၁၂၀” မြင့်တယ်လို့ တခြားဘာသာပြန်ကျမ်းတွေမှာလည်း ဖော်ပြတယ်။ ၁၇၅ ပေ (၅၃ မီတာ) မြင့်တဲ့ သဘောပါ။
ဒါပေမဲ့ ၂၀၂၃ ခုနှစ်ထုတ် ကမ္ဘာသစ်ဘာသာပြန်ကျမ်း မှာ ရှောလမုန်ဗိမာန်တော် မုခ်ဦးဟာ “အမြင့် အတောင် ၂၀၊” တစ်နည်းအားဖြင့် ပေ ၃၀ (၉ မီတာ) လောက် ရှိတယ်လို့ ဖော်ပြတယ်။ a ဒီလိုပြောင်းလဲဖော်ပြရတဲ့ အကြောင်းရင်းတချို့ကို သုံးသပ်ကြည့်ပါ။
၁ ဘုရင်များ ၆:၃ မှာ မုခ်ဦးအမြင့်ကို ဖော်ပြမထားဘူး။ အဲဒီကျမ်းပိုဒ်မှာ မုခ်ဦးရဲ့ အလျား၊ အနံကို ကျမ်းရေးသူ ယေရမိ ဖော်ပြပေမဲ့ အမြင့်ကို ဖော်ပြမထားဘူး။ အခန်းကြီး ၇ မှာဆိုရင် ဗိမာန်တော်မှာ ရှိတဲ့ ကြေးနီရေကန်၊ တွန်းလှည်းဆယ်ခု၊ မုခ်ဦးအပြင်ဘက်က ကြေးနီတိုင်နှစ်တိုင်ကအစ ထူးခြားထင်ရှားတဲ့အရာတွေကို အသေးစိတ် ဖော်ပြထားတယ်။ (၁ ဘု. ၇:၁၅-၃၇) မုခ်ဦးသာ ပေ ၁၇၀ ကျော် ရှိတယ်၊ ဗိမာန်တော် ကျန်အပိုင်းတွေထက် အဆမတန် မြင့်တယ်ဆိုရင် မုခ်ဦးအမြင့်ကို ယေရမိ ဘာကြောင့် မဖော်ပြသလဲ။ ရာစုနှစ်များစွာ ကြာပြီးနောက်မှာတောင် ဂျူးသမိုင်းပညာရှင်တွေက ရှောလမုန်ဗိမာန်တော် မုခ်ဦးဟာ ကျန်အပိုင်းတွေထက် မမြင့်ဘူးလို့ ဆိုကြတယ်။
အတောင် ၁၂၀ မြင့်တဲ့ မုခ်ဦးကို ဗိမာန်တော် နံရံတွေ နိုင်ပါ့မလားလို့ ကျမ်းပညာရှင်တွေ မေးခွန်းထုတ်ကြတယ်။ မိုးထိုးမတတ် မြင့်တဲ့ ရှေးခေတ် အုတ်ကျောက် အဆောက်အအုံတွေဟာ အောက်ခြေကျယ်ပြီး ထိပ်မှာ ရှူးသွားတယ်။ ဥပမာ၊ အီဂျစ်ပြည်က ဗိမာန်တံခါးတွေကို ကြည့်နိုင်တယ်။ ရှောလမုန်ဗိမာန်တော်ကတော့ အဲဒီလိုမဟုတ်ဘူး။ ရှောလမုန်ဗိမာန်တော် နံရံတွေဟာ ၆ တောင်၊ တစ်နည်းအားဖြင့် ၉ ပေ (၂.၇ မီတာ) ထက် ပိုမထူဘူးလို့ ကျမ်းပညာရှင်တွေ ယူဆကြတယ်။ “[ဗိမာန်တော် ဝင်ပေါက်] နံရံအထူအရ မုခ်ဦး အတောင် ၁၂၀ [မြင့်တယ်] ဆိုတာ ဘယ်လိုမှ မဖြစ်နိုင်ဘူး” လို့ ဗိသုကာဆိုင်ရာ သမိုင်းပညာရှင် သီအိုဒေါ ဗျူဆင့် ကောက်ချက်ချတယ်။
၂ ရာဇဝင်ချုပ် ၃:၄ မှာ ပါတဲ့ စာသားကို ကျမ်းကူးသူတွေ မှားကူးမိတာ ဖြစ်နိုင်တယ်။ ဒီကျမ်းပိုဒ်မှာ “၁၂၀” လို့ ရှေးလက်ရေးစာမူတချို့ ဖော်ပြပေမဲ့ လွန်ခဲ့တဲ့ နှစ်ပေါင်း ၁,၅၀၀ ကျော်က အလက်ဇန္ဒြီးနပ်စ် လက်ရေးစာမူ၊ လွန်ခဲ့တဲ့ နှစ်ပေါင်း ၁,၄၀၀ ကျော်က အမ်ဘရိုဆီယားနပ်စ် လက်ရေးစာမူတွေလို စိတ်ချရတဲ့ ကျမ်းတွေမှာ “အတောင် ၂၀” လို့ ဖော်ပြထားတယ်။ “၁၂၀” လို့ ကျမ်းကူးသူတွေ ဘာကြောင့် မှားကူးမိနိုင်သလဲ။ ဟီဘရူးလို ရာဂဏန်းပြ စကားလုံးနဲ့ တောင်ဆိုတဲ့ အတိုင်းအတာပြ စကားလုံးဟာ ဆင်တယ်။ ဒါကြောင့် “အတောင်နှစ်ဆယ်” အစား “တစ်ရာ့နှစ်ဆယ်” ဆိုပြီး မှားကူးမိတာ ဖြစ်နိုင်တယ်။
ရှောလမုန်ဗိမာန်တော်ဟာ ကြီးမြတ်တဲ့ ပုံဆောင် ဗိမာန်တော်ရဲ့ ရှေ့ပြေးအရိပ် ဖြစ်တယ်။ ဒါကြောင့် ရှောလမုန်ဗိမာန်တော်နဲ့ပတ်သက်ပြီး အသေးစိတ် အချက်အလက်တွေကို နားလည်ဖို့၊ တိတိကျကျ ရုပ်လုံးဖော်ဖို့ ကျွန်တော်တို့ ကြိုးစားပေမဲ့ ကြီးမြတ်တဲ့ ပုံဆောင် ဗိမာန်တော်ကို အထူးတလည် အာရုံစိုက်ကြတယ်။ ကြီးမြတ်တဲ့ ပုံဆောင် ဗိမာန်တော်မှာ မိမိကို ကိုးကွယ်ဖို့ ကျေးကျွန်အားလုံးကို ယေဟောဝါ ဖိတ်ခေါ်ထားတာ ကျေးဇူးတင်စရာပါပဲ။—ဟီ. ၉:၁၁-၁၄။ ဗျာ. ၃:၁၂။ ၇:၉-၁၇။
a “ရှေးလက်ရေးစာမူတချို့မှာ ‘၁၂၀’ လို့ ဖော်ပြပေမဲ့ တခြားလက်ရေးစာမူနဲ့ ဘာသာပြန်ကျမ်းတချို့မှာ ‘အတောင် ၂၀’ လို့ ဖော်ပြထား” ဆိုပြီး အောက်ခြေမှတ်ချက်နဲ့ ရှင်းပြထားပါတယ်။
