ရှေးအစ္စရေး ယဉ်ကျေးမှုမှာ တေးဂီတဟာ သိပ်အရေးပါတယ်။ တူရိယာ တီးမှုတ်တဲ့အကြောင်း၊ သီချင်းသီဆိုတဲ့အကြောင်း ကျမ်းစာမှာ များစွာ ဖော်ပြထားတယ်။ ကျမ်းစာရဲ့ ဆယ်ပုံတစ်ပုံလောက်ဟာ သီချင်း ဖြစ်တယ်။ ဥပမာ၊ ဆာလံ၊ ရှောလမုန်သီချင်း၊ မြည်တမ်းစကားတို့ ဖြစ်တယ်။ “တေးဂီတနဲ့ မဆက်စပ်တဲ့ လုပ်ဆောင်မှုတွေမှာတောင် တေးဂီတ ရောယှက်နေတဲ့ လူ့အသိုင်းအဝိုင်းတစ်ခုကို [ကျမ်းစာက] ကွက်ကွက်ကွင်းကွင်း ပုံဖော်ပေးတယ်” လို့ စာအုပ်တစ်အုပ် (Music in Biblical Life) က ဆိုတယ်။

နေ့စဉ် အသက်တာမှာ သုံးတဲ့ တေးဂီတ။ ခံစားချက်ကို ဖော်ကျူးဖို့ အစ္စရေးတွေဟာ တူရိယာ တီးမှုတ်ပြီး သီချင်းသီဆိုကြတယ်။ (ဟေရှာ. ၃၀:၂၉) နန်းတက်ပွဲ၊ ဝတ်ပြုရေးပွဲ၊ စစ်အောင်ပွဲတွေမှာ အမျိုးသမီးတွေက ချူတပ်ဗုံတီးပြီး ပျော်ပျော်ရွှင်ရွှင် သီဆိုကခုန်ကြတယ်။ (သူကြီး. ၁၁:၃၄။ ၁ ရှ. ၁၈:၆၊ ၇။ ၁ ဘု. ၁:၃၉၊ ၄၀) ဈာပနအစီအစဉ်တွေမှာလည်း အစ္စရေးတွေ ငိုချင်း သီဆိုကြတယ်။ (၂ ရာ. ၃၅:၂၅) “ဟီဘရူးတွေဟာ တေးဂီတကို ပြောစမှတ်ပြုရလောက်အောင် မြတ်နိုးသူတွေ” လို့ စွယ်စုံကျမ်းတစ်ကျမ်း (McClintock and Strong’s Cyclopedia) မှာ ဖော်ပြထားတာ မဆန်းပါဘူး။

နန်းတော်မှာ သုံးတဲ့ တေးဂီတ။ အစ္စရေးမင်းတွေဟာ တေးဂီတကို သိပ်နှစ်သက်တယ်။ ဒါဝိဒ်ဆိုရင် ဘုရင်ရှောလုအတွက် နန်းတော်မှာ စောင်းတီးပေးရတယ်။ (၁ ရှ. ၁၆:၁၈၊ ၂၃) ကိုယ်တိုင် ဘုရင် ဖြစ်လာတဲ့အခါ တူရိယာတွေ တီထွင်တယ်။ သာယာနာပျော်ဖွယ် တေးသီချင်းတွေ စပ်ဆိုတယ်။ တေးဂီတအဖွဲ့ကို စီစဉ်တယ်။ နောက်ပိုင်းမှာ အဲဒီတေးဂီတအဖွဲ့ဟာ ယေဟောဝါရဲ့ ဗိမာန်တော်မှာ တီးမှုတ်ရတယ်။ (၂ ရာ. ၇:၆။ အာ. ၆:၅) ရှောလမုန်မင်းရဲ့ နန်းတော်မှာလည်း သီချင်းသည် အမျိုးသား အမျိုးသမီးတွေ ရှိတယ်။—ဒေ. ၂:၈။

ဝတ်ပြုရေးမှာ သုံးတဲ့ တေးဂီတ။ ယေဟောဝါရဲ့ ဝတ်ပြုရေးအတွက် တေးဂီတကို အစ္စရေးတွေ အဓိက သုံးကြတယ်။ ဂျေရုဆလင် ဗိမာန်တော်မှာ တူရိယာတွေ တီးမှုတ်ပြီး ချီးမွမ်းသီဆိုသူ ၄,၀၀၀ ရှိတယ်။ (၁ ရာ. ၂၃:၅) လင်းကွင်း၊ ကြိုးတပ်တူရိယာ၊ စောင်း တီးကြတယ်၊ ခရာမှုတ်ကြတယ်။ (၂ ရာ. ၅:၁၂) ကျွမ်းကျင်ပညာရှင်တွေပဲ တေးဂီတ သုံးပြီး ယေဟောဝါကို ဝတ်ပြုတာ မဟုတ်ပါဘူး။ ဂျေရုဆလင်မြို့မှာ နှစ်စဉ် ပွဲတော်တွေ သွားတက်တဲ့အခါ အစ္စရေးများစွာဟာ လမ်းမှာ ချီတက်သီချင်းတွေ သီဆိုကြတယ်။ (ဆာ. ၁၂၀–၁၃၄) ပသခါညစာစားပွဲမှာလည်း ဟာလဲဆာလံသီချင်းတချို့ a ဆိုကြတယ်လို့ ဂျူးစာပေတွေက ဖော်ပြတယ်။

တေးဂီတဟာ ဘုရားလူမျိုးအတွက် အရေးပါနေဆဲပါပဲ။ (ယာ. ၅:၁၃) ချီးမွမ်းသီချင်းတွေ သီဆိုတာဟာ ဝတ်ပြုရေးကဏ္ဍတစ်ခု ဖြစ်တယ်။ (ဧ. ၅:၁၉) ယုံကြည်သူချင်းတွေနဲ့အတူ ချီးမွမ်းသီချင်းတွေ သီဆိုတဲ့အခါ ပိုစည်းလုံးလာတယ်။ (ကော. ၃:၁၆) အခက်အခဲတွေ ကြုံရတဲ့အခါ ချီးမွမ်းသီချင်းတွေ သီဆို၊ တီးမှုတ်၊ နားထောင်လိုက်ရင် အားရှိလာတယ်။ (တ. ၁၆:၂၅) တေးဂီတဟာ ယေဟောဝါဘုရားကို ယုံကြည်ကြောင်း၊ ချစ်ကြောင်း ပြနိုင်တဲ့ နည်းလမ်းကောင်းပါပဲ။