လေ့လာရန် ဆောင်းပါး ၃၄
အသင်းတော်မှာ ကိုယ့်နေရာကို တန်ဖိုးထားပါ
“ခန္ဓာကိုယ်ဟာ တစ်ခုတည်း ဖြစ်ပေမဲ့ အစိတ်အပိုင်းတွေ အများကြီး ရှိတယ်။ အစိတ်အပိုင်းတွေ အများကြီး ရှိပေမဲ့ ခန္ဓာကိုယ်ကတော့ တစ်ခုတည်းပဲ။ ခရစ်တော်ရဲ့ ခန္ဓာကိုယ်လည်း အဲဒီအတိုင်းပါပဲ။”—၁ ကော. ၁၂:၁၂။
သီချင်း ၁၀၁ စည်းလုံးစွာ လုပ်ဆောင်ခြင်း
အကြိုသုံးသပ်ချက် *
၁။ ကျွန်တော်တို့ ဘယ်အခွင့်ထူး ရထားသလဲ။
ယေဟောဝါရဲ့ အသင်းတော်ဝင် ဖြစ်ရတာ အခွင့်ထူးပါပဲ။ ငြိမ်းချမ်းပျော်ရွှင်ဖွယ် ပုံဆောင်ပရဒိသုထဲ ရောက်နေကြတယ်။ အသင်းတော်မှာ သင့်ရဲ့ နေရာက ဘာလဲ။
၂။ တမန်တော် ပေါလု ရေးတဲ့ စာများစွာမှာ ဘယ်ဥပမာကို သုံးခဲ့သလဲ။
၂ တမန်တော် ပေါလု ရေးတဲ့ စာများစွာမှာ သုံးထားတဲ့ ဥပမာတစ်ခုကနေ အဲဒီအကြောင်း အများကြီး သိနိုင်တယ်။ အဲဒီစာတွေမှာ ပေါလုက အသင်းတော်ကို လူ့ခန္ဓာကိုယ်နဲ့ နှိုင်းယှဉ်ခဲ့တယ်။ အသင်းတော်မှာရှိတဲ့ တစ်ယောက်ချင်းကိုလည်း ကိုယ်အင်္ဂါအစိတ်အပိုင်းတွေနဲ့ နှိုင်းယှဉ်ခဲ့တယ်။—ရော. ၁၂:၄-၈။ ၁ ကော. ၁၂:၁၂-၂၇။ ဧ. ၄:၁၆။
၃။ ဒီဆောင်းပါးမှာ ဘယ်သင်ခန်းစာ သုံးခုကို ဆွေးနွေးကြမလဲ။
၃ ပေါလုရဲ့ ဥပမာကနေ သင်ယူနိုင်တဲ့ အရေးကြီး သင်ခန်းစာ သုံးခုကို ဒီဆောင်းပါးမှာ ဆွေးနွေးကြမယ်။ ပထမ၊ ယေဟောဝါရဲ့ အသင်းတော်မှာ ကျွန်တော်တို့ တစ်ယောက်စီအတွက် နေရာ * ရှိကြောင်း၊ ဒုတိယ၊ အသင်းတော်မှာ ကိုယ့်အခန်းကဏ္ဍကို သိဖို့ ခက်နေရင် ဘာလုပ်နိုင်ကြောင်း၊ တတိယ၊ အသင်းတော်မှာ ကိုယ့်တာဝန်ကျေဖို့ ဘာကြောင့် အစွမ်းကုန် ကြိုးစားသင့်ကြောင်း ဆွေးနွေးပါမယ်။
အသင်းတော်မှာ ယောက်တိုင်း အခန်းကဏ္ဍကိုယ်စီ ရှိ
၄။ ရောမ ၁၂:၄၊ ၅ က ဘာသင်ပေးသလဲ။
၄ ပေါလုရဲ့ ဥပမာကနေ သင်ယူနိုင်တဲ့ ပထမ သင်ခန်းစာကတော့ ယေဟောဝါရဲ့ မိသားစုမှာ ယောက်တိုင်း အရေးကြီးတဲ့ နေရာ ရှိတယ် ဆိုတာပဲ။ “ကိုယ်ခန္ဓာတစ်ခုမှာ အင်္ဂါအစိတ်အပိုင်းတွေ အများကြီး ရှိပေမဲ့ အဲဒီအစိတ်အပိုင်းတွေရဲ့ အလုပ်တာဝန်ချင်း မတူကြဘူး။ အလားတူပဲ၊ ကျွန်တော်တို့ဟာ အရေအတွက် များပေမဲ့ ခရစ်တော်နဲ့ တစ်စိတ်တစ်ဝမ်းတည်း ဖြစ်နေတဲ့အတွက် ကိုယ်ခန္ဓာတစ်ခုတည်းပါပဲ။ ဒါပေမဲ့ တစ်ဦးစီကတော့ အပြန်အလှန် ဆက်စပ်နေတဲ့ အင်္ဂါအစိတ်အပိုင်းတွေ ဖြစ်တယ်” လို့ ပေါလု ပြောတယ်။ (ရော. ၁၂:၄၊ ၅) ပေါလု ဘာကို ဆိုလိုသလဲ။ အသင်းတော်မှာ အခန်းကဏ္ဍ မတူကြပေမဲ့ ယောက်တိုင်း အရေးပါတယ်။
၅။ အသင်းတော်အတွက် ဘယ် “လက်ဆောင်” တွေကို ယေဟောဝါ ပေးထားသလဲ။
၅ အသင်းတော်မှာ နေရာ ရထားသူတွေလို့ ပြောရင် ဦးဆောင်နေသူတွေကို အရင်ဆုံး ပြေးမြင်မိနိုင်တယ်။ (၁ သက်. ၅:၁၂။ ဟီ. ၁၃:၁၇) မှန်ပါတယ်။ သူတို့ကို အသင်းတော်အတွက် “လက်ဆောင်အဖြစ်” ခရစ်တော်ကတစ်ဆင့် ယေဟောဝါ ပေးထားတာပါ။ (ဧ. ၄:၈) အဲဒီထဲမှာ အုပ်ချုပ်ရေးအဖွဲ့ဝင်၊ အုပ်ချုပ်ရေးအဖွဲ့ အကူ၊ ဌာနခွဲ ကော်မတီဝင်၊ တိုက်နယ်ကြီးကြပ်မှူး၊ ကျမ်းစာကျောင်း ပို့ချသူ၊ အသင်းတော် အကြီးအကဲနဲ့ အမှုထမ်းတွေ ပါဝင်တယ်။ အဲဒီညီအစ်ကို အားလုံးဟာ ယေဟောဝါရဲ့ အဖိုးတန်သိုးတွေကို စောင့်ရှောက်ဖို့၊ အသင်းတော်အကျိုး သယ်ပိုးဖို့ သန့်ရှင်းသော စွမ်းအားတော်နဲ့ ခန့်အပ်ခံထားရတယ်။—၁ ပေ. ၅:၂၊ ၃။
၆။ ၁ သက်သာလောနိတ် ၂:၆-၈ အရ သန့်ရှင်းသော စွမ်းအားတော်နဲ့ ခန့်အပ်ခံထားရတဲ့ ညီအစ်ကိုတွေ ဘာလုပ်ဖို့ ကြိုးစားနေကြသလဲ။
၆ သန့်ရှင်းသော စွမ်းအားတော်နဲ့ ခန့်အပ်ခံထားရတဲ့ ညီအစ်ကိုတွေမှာ တာဝန်အမျိုးမျိုး ရှိတယ်။ လက်၊ ခြေထောက် စတဲ့ အင်္ဂါအစိတ်အပိုင်းတွေဟာ တစ်ကိုယ်လုံးရဲ့ အကျိုးအတွက် လုပ်ဆောင်နေသလို အဲဒီညီအစ်ကိုတွေလည်း အသင်းတော်တစ်ခုလုံးရဲ့ အကျိုးအတွက် ကြိုးစားလုပ်ဆောင်နေကြတယ်။ ကိုယ်ချီးမွမ်းခံရဖို့ မဟုတ်ဘဲ ညီအစ်ကို/မတွေကို တည်ဆောက်အားပေးဖို့ ကြိုးစားကြတယ်။ (၁ သက်သာလောနိတ် ၂:၆-၈ ကိုဖတ်ပါ။) ကိုယ်ကျိုးမရှာတဲ့ အဲဒီအရည်အချင်းရှိ ညီအစ်ကိုတွေ ပေးထားလို့ ယေဟောဝါကို သိပ်ကျေးဇူးတင်စရာပါပဲ။
၇။ အချိန်ပြည့် အမှုဆောင်များစွာ ဘယ်ကောင်းချီးတွေ ခံစားနေရသလဲ။
၇ အသင်းတော်မှာ တချို့က သာသနာပြု၊ အထူးရှေ့ဆောင်၊ မှန်မှန်ရှေ့ဆောင်တွေအဖြစ် ခန့်အပ်ခံရနိုင်တယ်။ ကမ္ဘာတစ်ဝန်းက ညီအစ်ကို/မများစွာဟာ ဟောပြောခြင်းနဲ့ တပည့်ဖြစ်စေခြင်းမှာ အချိန်ပြည့် ပါဝင်ဖို့ ဆုံးဖြတ်ထားကြတယ်။ ဒီနည်းအားဖြင့် လူများစွာကို ခရစ်တော် ယေရှုရဲ့ တပည့်ဖြစ်လာအောင် ကူညီပေးနေကြတယ်။ အဲဒီအချိန်ပြည့် အမှုဆောင်တွေဟာ ငွေကြေး သိပ်မချမ်းသာပေမဲ့ ယေဟောဝါရဲ့ ကောင်းချီးများစွာ ခံစားနေရတယ်။ (မာ. ၁၀:၂၉၊ ၃၀) အသင်းတော်ဝင် ဖြစ်တဲ့ အဲဒီညီအစ်ကို/မတွေကို ကျွန်တော်တို့ ချစ်မြတ်နိုးပြီး ကျေးဇူးတင်လေးမြတ်ကြတယ်။
၈။ ကြေညာသူယောက်တိုင်း ယေဟောဝါအတွက် ဘာကြောင့် တန်ဖိုးရှိသလဲ။
၈ ခန့်အပ်ခံ ညီအစ်ကိုတွေနဲ့ အချိန်ပြည့် အမှုဆောင်တွေအတွက်ပဲ အသင်းတော်မှာ နေရာ ရှိတာလား။ မဟုတ်ပါဘူး။ ကြေညာသူယောက်တိုင်း ဘုရားနဲ့ အသင်းတော်အတွက် အရေးပါတယ်။ (ရော. ၁၀:၁၅။ ၁ ကော. ၃:၆-၉) ဘာကြောင့်လဲဆိုတော့ အသင်းတော်ရဲ့ အရေးကြီးဆုံး ပန်းတိုင်တစ်ခုက လူတွေကို သခင် ယေရှုခရစ်ရဲ့ တပည့် ဖြစ်လာစေဖို့ပဲ။ (မ. ၂၈:၁၉၊ ၂၀။ ၁ တိ. ၂:၄) နှစ်ခြင်း ခံပြီးသူဖြစ်စေ၊ မခံရသေးတဲ့ ကြေညာသူဖြစ်စေ အသင်းတော်နဲ့ ပူးပေါင်းနေသူအားလုံးဟာ အဲဒီလုပ်ငန်းကို ဦးစားထားဖို့ ကြိုးစားနေကြတယ်။—မ. ၂၄:၁၄။
၉။ ခရစ်ယာန် ညီအစ်မတွေကို ကျွန်တော်တို့ ဘာကြောင့် တန်ဖိုးထားသလဲ။
လု. ၈:၂၊ ၃။ တ. ၁၆:၁၄၊ ၁၅။ ရော. ၁၆:၃၊ ၆။ ဖိ. ၄:၃။ ဟီ. ၁၁:၁၁၊ ၃၁၊ ၃၅) အဲဒီလို အရည်အသွေးကောင်းတွေ ရှိတဲ့ ခရစ်ယာန် ညီအစ်မတွေ ပေးထားလို့ ယေဟောဝါကို ကျေးဇူးတင်စရာပါပဲ။
၉ ယေဟောဝါက အသင်းတော်မှာ ညီအစ်မတွေကိုလည်း ဂုဏ်အသရေရှိ နေရာ ပေးထားတယ်။ သစ္စာရှိရှိ ဝတ်ပြုနေတဲ့ အဲဒီ ဇနီး၊ မိခင်၊ မုဆိုးမ၊ တစ်ကိုယ်ရေ ညီအစ်မတွေကို တန်ဖိုးထားတယ်။ ဘုရားနှစ်သက်မှု ရခဲ့တဲ့ အမျိုးသမီးတွေအကြောင်း ကျမ်းစာမှာ မကြာခဏ ဖော်ပြပြီး သူတို့ရဲ့ ဉာဏ်ပညာ၊ ယုံကြည်ခြင်း၊ ဇွဲ၊ သတ္တိ၊ ရက်ရောမှု၊ ကောင်းမှုတွေကို ချီးမွမ်းထားတယ်။ (၁၀။ အသက်ကြီးသူတွေကို ကျွန်တော်တို့ ဘာကြောင့် တန်ဖိုးထားသလဲ။
၁၀ အသက်ကြီးသူများစွာ ရှိနေတာလည်း ကောင်းချီးတစ်ခုပါပဲ။ အသင်းတော်တချို့မှာ အသက်ကြီး ညီအစ်ကို/မတွေဟာ ဘဝတစ်လျှောက်လုံး ယေဟောဝါကို သစ္စာရှိရှိ ဝတ်ပြုလာကြတာ။ တချို့ အသက်ကြီးသူတွေကတော့ မကြာသေးခင်ကမှ အမှန်တရား သိလာတာ။ ဘာပဲဖြစ်ဖြစ် အိုမင်းမှုကြောင့် ကျန်းမာရေး ပြဿနာ အမျိုးမျိုးကို သူတို့ ရင်ဆိုင်နေရတယ်။ အသင်းတော်နဲ့ ဟောပြောခြင်းလုပ်ငန်းမှာ သိပ်မပါဝင်နိုင်ကြပေမဲ့ အတတ်နိုင်ဆုံး ကြိုးစားနေပြီး တခြားသူတွေကို အစွမ်းရှိသလောက် အားပေး၊ လေ့ကျင့်ပေးနေကြတယ်။ သူတို့ရဲ့ အတွေ့အကြုံကနေ ကျွန်တော်တို့ အကျိုးရနေတယ်။ သူတို့ဟာ ယေဟောဝါနဲ့ ကျွန်တော်တို့အတွက် သိပ်လှပသူတွေပါပဲ။—ပညာ. ၁၆:၃၁။
၁၁-၁၂။ အသင်းတော်မှာ လူငယ်တွေကြောင့် သင် ဘယ်လို အားရှိသလဲ။
၁၁ လူငယ်တွေအကြောင်းလည်း စဉ်းစားကြည့်ပါ။ စာတန်မာရ်နတ် အုပ်ချုပ်နေတဲ့၊ စာတန်ရဲ့ အတွေးအခေါ်ဆိုးတွေ ပြည့်နေတဲ့ လောကမှာ အခက်အခဲများစွာ ကြုံနေရတယ်။ (၁ ယော. ၅:၁၉) ဒါပေမဲ့ သူတို့ အစည်းအဝေးမှာ မှတ်ချက်ပေးတာ၊ အမှုဆောင်မှာ ပါဝင်တာ၊ ယုံကြည်ချက်ကို သတ္တိရှိရှိ ခုခံကာကွယ်တာ မြင်ရတိုင်း ကျွန်တော်တို့ သိပ်အားရှိကြတယ်။ မှန်ပါတယ်။ လူငယ်တွေလည်း ယေဟောဝါရဲ့ အသင်းတော်မှာ အရေးပါတဲ့ နေရာ ရထားကြတယ်။—ဆာ. ၈:၂။
၁၂ ဒါပေမဲ့ ညီအစ်ကို/မတချို့ဟာ အသင်းတော်မှာ အရေးပါတဲ့ ကိုယ့်နေရာကို မြင်ဖို့ ခက်နေကြတယ်။
ယောက်တိုင်းမှာ နေရာတစ်ခု ရှိတယ်လို့ ခံစားလာရအောင် ဘာက ကူညီပေးနိုင်ကြောင်း လေ့လာကြည့်ကြစို့။အသင်းတော်မှာ ကိုယ့်အခန်းကဏ္ဍကို မြင်တတ်အောင် ကြိုးစားပါ
၁၃-၁၄။ အသင်းတော်မှာ တန်ဖိုးမရှိဘူးလို့ တချို့ ဘာကြောင့် ခံစားမိနိုင်သလဲ။
၁၃ ပေါလုရဲ့ ဥပမာကနေ သင်ခန်းစာ နောက်တစ်ခု သင်ယူနိုင်တယ်။ လူများစွာ ကြုံနေရတဲ့ အခက်အခဲတစ်ခုကို ပေါလု ထောက်ပြတယ်။ အဲဒါကတော့ အသင်းတော်မှာ ကိုယ့်အခန်းကဏ္ဍကို မြင်ဖို့ ခက်နေခြင်းပဲ။ “ခြေထောက်က ‘ငါက လက်မှ မဟုတ်တာ။ ခန္ဓာကိုယ်နဲ့ မဆိုင်ဘူး’ လို့ ပြောရင် အဲဒီလိုပြောတဲ့အတွက် ခန္ဓာကိုယ်နဲ့ မဆိုင်တော့တာ မဟုတ်ဘူး။ နားကလည်း ‘ငါက မျက်စိမှ မဟုတ်တာ။ ခန္ဓာကိုယ်နဲ့ မဆိုင်ဘူး’ လို့ ပြောရင် အဲဒီလိုပြောတဲ့အတွက် ခန္ဓာကိုယ်နဲ့ မဆိုင်တော့တာ မဟုတ်ဘူး” ဆိုပြီး ပေါလု ပြောတယ်။ (၁ ကော. ၁၂:၁၅၊ ၁၆) ပေါလု ဘာပြောချင်တာလဲ။
၁၄ အသင်းတော်မှာ ကိုယ့်ကိုယ်ကိုယ် တခြားသူတွေနဲ့ နှိုင်းယှဉ်ရင် ကိုယ့်နေရာကို မြင်တော့မှာ မဟုတ်ဘူး။ တချို့က သွန်သင်တဲ့ အပိုင်းမှာ သိပ်တော်တယ်။ တချို့က ကောင်းကောင်း စီစဉ်ဖွဲ့စည်းတတ်တယ်။ တချို့က ကျွမ်းကျင်တဲ့ သိုးထိန်းတွေ ဖြစ်တယ်။ ကိုယ့်မှာတော့ အဲဒီလောက် အရည်အချင်း မရှိဘူးလို့ ခံစားရနိုင်တယ်။ ဒါက သင့်မှာ နှိမ့်ချမှု၊ ကျိုးနွံမှု ရှိကြောင်း ဖော်ပြနေတာပဲ။ (ဖိ. ၂:၃) ဒါပေမဲ့ သတိထားပါ။ တစ်ချိန်လုံး ကိုယ့်ကိုယ်ကိုယ် တခြားသူနဲ့ နှိုင်းယှဉ်နေမယ်ဆိုရင် စိတ်ပျက်လာနိုင်တယ်။ အသင်းတော်မှာ ကိုယ့်အတွက် လုံးဝ နေရာ မရှိတော့ဘူးလို့ ခံစားရနိုင်တယ်။ အဲဒီခံစားချက်တွေကို အနိုင်ယူဖို့ ဘာက ကူညီပေးနိုင်သလဲ။
၁၅။ ၁ ကောရိန္သု ၁၂:၄-၁၁ အရ ကိုယ့်မှာ ရှိထားတဲ့ ဆုကျေးဇူးနဲ့ပတ်သက်ပြီး ဘာကို အသိအမှတ်ပြုရမလဲ။
၁၅ ဒီအချက်ကို စဉ်းစားကြည့်ပါ– ယေဟောဝါက ပထမရာစု ခရစ်ယာန်တချို့ကို သန့်ရှင်းသော စွမ်းအားတော်အားဖြင့် အံ့ဖွယ် ဆုကျေးဇူးတွေ ပေးတယ်။ တစ်ပုံစံတည်းတော့ မဟုတ်ဘူး။ (၁ ကောရိန္သု ၁၂:၄-၁၁ ကိုဖတ်ပါ။) ယေဟောဝါ ပေးထားတဲ့ ဆုကျေးဇူး၊ စွမ်းရည်တွေ မတူပေမဲ့ ယောက်တိုင်း တန်ဖိုးရှိတယ်။ ဒီနေ့ခေတ်မှာ သန့်ရှင်းသော စွမ်းအားတော်အားဖြင့် အဲဒီလို အံ့ဖွယ် ဆုကျေးဇူးတွေ မရတော့ဘူး။ ဒါပေမဲ့ ပင်ကိုစွမ်းရည် တစ်မျိုးစီရှိတဲ့ ကျွန်တော်တို့အားလုံး ယေဟောဝါအတွက် တန်ဖိုးရှိတယ်။
၁၆။ တမန်တော် ပေါလုရဲ့ ဘယ်အကြံဉာဏ်ကို လိုက်နာဖို့ လိုသလဲ။
၁၆ တခြားသူတွေနဲ့ ကိုယ့်ကိုယ်ကိုယ် နှိုင်းယှဉ်မယ့်အစား “လူတိုင်း ကိုယ့်လုပ်ရပ်တွေကိုပဲ ဆန်းစစ်ပါ။ သူတစ်ပါးနဲ့ မနှိုင်းယှဉ်ပါနဲ့။ ဒါဆိုရင် ကိုယ့်လုပ်ရပ်နဲ့ပတ်သက်ပြီး ပျော်ရွှင်ကျေနပ်ရလိမ့်မယ်” ဆိုတဲ့ တမန်တော် ပေါလုရဲ့ အကြံဉာဏ်ကို လိုက်နာဖို့ လိုတယ်။—ဂလ. ၆:၄။
၁၇။ ပေါလုရဲ့ အကြံဉာဏ်ကို လိုက်နာရင် ဘာအကျိုးတွေ ရမလဲ။
၁၇ ပေါလုရဲ့ အကြံဉာဏ်ကို လိုက်နာပြီး ကိုယ့်လုပ်ရပ်ကို ဆန်းစစ်မယ်ဆိုရင် ကိုယ့်မှာလည်း တစ်မူထူးခြားတဲ့ ဆုကျေးဇူးတွေ၊ စွမ်းရည်တွေ ရှိကြောင်း တွေ့လာနိုင်တယ်။ ဥပမာ၊ အကြီးအကဲတစ်ယောက်ဟာ စင်မြင့်ပေါ်မှာ ဟောပြောတာ သိပ်မတော်ပေမဲ့ တပည့်ဖြစ်စေခြင်းလုပ်ငန်းမှာ အလွန်ထိရောက်သူ ဖြစ်နိုင်တယ်။ တခြားအကြီးအကဲတွေလောက် စီစဉ်ဖွဲ့စည်းမှု မကျွမ်းကျင်ပေမဲ့ ကျမ်းစာအကြံဉာဏ် ရဖို့ ကြေညာသူတွေ ချဉ်းကပ်ရဲတဲ့ မေတ္တာရှိ သိုးထိန်း ဖြစ်နေနိုင်တယ်။ ဒါမှမဟုတ် ဧည့်ဝတ်ကျေပွန်တယ်ဆိုတဲ့ နာမည်ကောင်း ရထားတာ ဖြစ်နိုင်တယ်။ (ဟီ. ၁၃:၂၊ ၁၆) ကိုယ့်အားသာချက်တွေ၊ ဆုကျေးဇူးတွေကို ရှင်းရှင်းလင်းလင်း မြင်လာရင် အသင်းတော်မှာ ကိုယ်ပါဝင်ပေးဆက်နိုင်တာတွေအတွက် ကျေနပ်လာမယ်။ ကိုယ့်မှာ မရှိတဲ့ ဆုကျေးဇူး ရထားသူတွေကို မနာလို ဖြစ်တော့မှာ မဟုတ်ဘူး။
၁၈။ အမှုဆောင်လုပ်ငန်းမှာ ဘယ်လိုနည်းနဲ့ စွမ်းရည် တိုးတက်လာနိုင်သလဲ။
၁၈ အသင်းတော်မှာ ဘယ်နေရာပဲ ရထားပါစေ ယောက်တိုင်း အမှုဆောင်လုပ်ငန်းမှာ စွမ်းရည် တိုးတက်လာဖို့ ကြိုးစားသင့်တယ်။ အဲဒီလို ဖြစ်နိုင်ဖို့ အဖွဲ့အစည်းကတစ်ဆင့် ယေဟောဝါ လေ့ကျင့်ပေးနေတယ်။ ဥပမာ၊ အမှုဆောင်လုပ်ငန်းမှာ ပိုထိရောက်နိုင်ပုံနဲ့ပတ်သက်တဲ့ လမ်းညွှန်ချက်တွေကို ကြားရက် အစည်းအဝေးမှာ ရတယ်။ အဲဒီလေ့ကျင့်မှု အစီအစဉ်ကနေ သင် အကျိုးအပြည့်အဝ ရယူနေသလား။
၁၉။ သတင်းကောင်း ဟောပြောသူများအတွက် သင်တန်း တက်ဖို့ ပန်းတိုင်ကို ဘယ်လို ပြည့်မီနိုင်သလဲ။
၁၉ သိပ်ကောင်းတဲ့ လေ့ကျင့်မှု အစီအစဉ် နောက်တစ်ခုကတော့ သတင်းကောင်း ဟောပြောသူများအတွက် သင်တန်းပါပဲ။ အချိန်ပြည့်လုပ်ငန်းမှာ ပါဝင်နေပြီး အသက် ၂၃ နှစ်ကနေ ၆၅ နှစ်အတွင်းရှိတဲ့ ညီအစ်ကို/မတွေ တက်နိုင်တယ်။ သင့်အတွက်တော့ လက်လှမ်းမမီနိုင်တဲ့ ပန်းတိုင်လို့ ထင်ရနိုင်တယ်။ ဒါပေမဲ့ မတက်နိုင်ရတဲ့ အကြောင်းရင်းတွေ မဟုတ်ဘဲ သင်တန်းတက်ချင်တဲ့ အကြောင်းရင်းတွေကို ချရေးကြည့်ပါ။ ပြီးနောက် သင်တန်းအတွက် အရည်အချင်း ပြည့်မီအောင် ကူညီပေးမယ့် အစီအစဉ်တစ်ခု ရေးဆွဲပါ။ ယေဟောဝါရဲ့ အကူအညီ၊ ကိုယ်တိုင်ရဲ့ ကြိုးစားအားထုတ်မှုကြောင့် အိပ်မက် အကောင်အထည် ပေါ်လာနိုင်ပါတယ်။
သင့်ဆုကျေးဇူးတွေကို သုံးပြီး အသင်းတော်ကို တည်ဆောက်ပေးပါ
၂၀။ ရောမ ၁၂:၆-၈ ကနေ ဘာသင်ယူနိုင်သလဲ။
၂၀ ပေါလုရဲ့ ဥပမာကနေ သင်ယူနိုင်တဲ့ တတိယ သင်ခန်းစာကို ရောမ ၁၂:၆-၈ မှာ တွေ့နိုင်တယ်။ (ဖတ်ပါ။) အသင်းတော်မှာ ယောက်တိုင်း ဆုကျေးဇူး တစ်မျိုးစီ ရထားကြောင်း ပေါလု ထပ်ပြောတယ်။ ဒီတစ်ကြိမ်မှာ ပေါလု အလေးပေးပြောတာကတော့ ဘယ်ဆုကျေးဇူးပဲ ရထားပါစေ အသင်းတော်ကို တည်ဆောက်၊ ခိုင်ခံ့စေရာမှာ သုံးဖို့ပဲ။
၂၁-၂၂။ ရောဘတ်နဲ့ ဖီးလစ်ဆီကနေ ဘာသင်ယူနိုင်သလဲ။
၂၁ ရောဘတ်ဆိုတဲ့ ညီအစ်ကိုအကြောင်း စဉ်းစားကြည့်ပါ။ တိုင်းတစ်ပါးမှာ အမှုဆောင်ပြီးနောက် နေရင်းပြည်က ဗေသလမှာ အမှုဆောင်ဖို့ ဖိတ်ခေါ်ခံရတယ်။ အမှားလုပ်မိလို့ တာဝန် အပြောင်းအလဲ ဖြစ်တာ မဟုတ်မှန်း
ညီအစ်ကိုတွေ အထပ်ထပ် ပြောပေမဲ့ “ကိုယ့်ကိုယ်ကိုယ် မကျေမနပ် ဖြစ်ပြီး တာဝန်မကျေဘူးလို့ လပေါင်းများစွာ ခံစားခဲ့ရတယ်။ ဗေသလကနေ ထွက်ဖို့တောင် စဉ်းစားမိတယ်” လို့ ပြောတယ်။ ဘယ်လိုနည်းနဲ့ ပြန်ပျော်ရွှင်လာသလဲ။ အရင်က ရခဲ့တဲ့ တာဝန်တစ်ခုစီမှာ ယေဟောဝါ လေ့ကျင့်ပေးတာက လက်ရှိ တာဝန်မှာ ပိုအသုံးဝင်နိုင်အောင်ပဲလို့ လုပ်ဖော်ဆောင်ဖက် အကြီးအကဲတစ်ယောက် ပြောတယ်။ အတိတ်ကို မကြည့်တော့ဘဲ လက်ရှိကို အာရုံစိုက်ဖို့ လိုမှန်း ရောဘတ် သဘောပေါက်သွားတယ်။၂၂ ညီအစ်ကို ဖီးလစ် အပစ္စကိုပိုလည်း အဲဒီလို အခက်အခဲ ကြုံခဲ့ရတယ်။ သူနဲ့ ဇနီးဟာ ၁၉၅၆ မှာ ဂိလဒ်သင်တန်း ဆင်းပြီးနောက် ဘိုလီးဗီးယားနိုင်ငံ၊ တိုက်နယ်လုပ်ငန်းမှာ ပါဝင်ခဲ့တယ်။ ၁၉၆၄ မှာ ကလေး ရလာတယ်။ “သိပ်မြတ်နိုးတဲ့ တာဝန်ကို စွန့်ဖို့ ခက်တယ်။ ကိုယ့်ကိုယ်ကိုယ် သနားတဲ့စိတ်နဲ့ပဲ တစ်နှစ်လောက် အချိန်ဖြုန်းမိတယ်ဆိုတာ ဝန်ခံရမယ်။ ဒါပေမဲ့ ယေဟောဝါရဲ့ အကူအညီကြောင့် ကိုယ့်သဘောထားကို ပြောင်းပြီး မိဘဆိုတဲ့ တာဝန်သစ်ကို အာရုံစိုက်နိုင်ခဲ့တယ်” လို့ ဖီးလစ် ပြောတယ်။ သင်ကော ရောဘတ် ဒါမှမဟုတ် ဖီးလစ်လို ခံစားနေရသလား။ အရင်က ရခဲ့တဲ့ လုပ်ငန်းတော် အခွင့်ထူးတွေ မရတော့လို့ စိတ်ဓာတ်ကျနေသလား။ ကိုယ့်အာရုံကို ပြောင်းပြီး ယေဟောဝါနဲ့ ညီအစ်ကိုတွေအတွက် အမှုဆောင်ဖို့ လက်ရှိ ဘာလုပ်နိုင်သလဲဆိုတာ အာရုံစိုက်ပါ။ တခြားသူတွေကို ကူညီရာမှာ ကိုယ့်ဆုကျေးဇူးနဲ့ စွမ်းရည်တွေကို သုံးပြီး အလုပ်များနေပါ။ ဒါဆိုရင် အသင်းတော်ကို တည်ဆောက်ပေးရင်း ပိုပျော်ရွှင်လာပါလိမ့်မယ်။
၂၃။ ဘာလုပ်ဖို့ အချိန်ယူသင့်သလဲ။ နောက်ဆောင်းပါးမှာ ဘာအကြောင်း ဆွေးနွေးကြမလဲ။
၂၃ ကျွန်တော်တို့ ယောက်တိုင်းကို ယေဟောဝါ တန်ဖိုးထားတယ်။ မိသားစုဝင် ဖြစ်စေချင်တယ်။ ညီအစ်ကို/မတွေကို တည်ဆောက်ပေးဖို့ ဘာလုပ်နိုင်သလဲဆိုတာ အချိန်ယူ တွေးတောပြီး အတတ်နိုင်ဆုံး ကြိုးစားမယ်ဆိုရင် အသင်းတော်မှာ ဘာမှ အသုံးမဝင်ဘူးလို့ ကျွန်တော်တို့ ခံစားရတော့မှာ မဟုတ်ဘူး။ အသင်းတော်မှာ တခြားသူတွေကိုကော ကျွန်တော်တို့ ဘယ်လို ရှုမြင်သလဲ။ သူတို့ကို လေးစားကြောင်း ဘယ်လို ပြနိုင်သလဲ။ အဲဒီအကြောင်းကို နောက်ဆောင်းပါးမှာ ဆွေးနွေးပါမယ်။
သီချင်း ၂၄ ယေဟောဝါရဲ့ တောင်တော်ဆီ လာကြ
^ အပိုဒ်၊ 5 ကျွန်တော်တို့အားလုံး ယေဟောဝါရဲ့ ချစ်ခင်နှစ်သက်မှု ရချင်ကြတယ်။ ဒါပေမဲ့ တစ်ခါတလေ ဘုရားအတွက် အသုံးဝင်တဲ့နေရာ ရှိပါ့မလားလို့ တွေးမိနိုင်တယ်။ အသင်းတော်မှာ ကျွန်တော်တို့ ယောက်တိုင်း တန်ဖိုးရှိကြောင်း နားလည်ဖို့ ဒီဆောင်းပါးက ကူညီပေးပါမယ်။
^ အပိုဒ်၊ 3 စကားလုံး ရှင်းလင်းချက်– ယေဟောဝါရဲ့ အဖွဲ့အစည်းမှာ ကိုယ့်နေရာဆိုတာ အသင်းတော်ကို တည်ဆောက်၊ ခိုင်ခံ့စေရာမှာ ကိုယ့်အခန်းကဏ္ဍကို ဆိုလိုတယ်။ အဲဒါက လူမျိုး၊ စီးပွားရေး၊ လူမှုရေး၊ ယဉ်ကျေးမှု၊ ပညာရေး နောက်ခံတွေပေါ် မမူတည်ဘူး။
^ အပိုဒ်၊ 62 ပုံအညွှန်း– အစည်းအဝေး မစခင်၊ အတောအတွင်း၊ ပြီးနောက် ဖြစ်ရပ်တွေကို ဖော်ပြထားတဲ့ ရုပ်ပုံသုံးပုံ။ ပုံ ၁– ဧည့်သည်ကို အကြီးအကဲတစ်ယောက် လှိုက်လှိုက်လှဲလှဲ နှုတ်ဆက်နေ၊ ညီအစ်ကိုငယ်တစ်ယောက် အသံပိုင်း ကိရိယာတွေ ပြင်ဆင်နေ၊ သက်ကြီး ညီအစ်မကို ညီအစ်မတစ်ယောက် စကားပြောနေ။ ပုံ ၂– လူကြီးလူငယ်တွေ ကင်းမျှော်စင် သင်တန်းမှာ မှတ်ချက်ပေးဖို့ လက်ထောင်နေ။ ပုံ ၃– နိုင်ငံတော်ခန်းမ သန့်ရှင်းရေးမှာ မောင်နှံတစ်စုံ ဝိုင်းကူနေ။ မိခင်က အလှူငွေပုံးထဲ အလှူငွေ ထည့်ဖို့ ကလေးကို ကူညီပေးနေ။ ညီအစ်ကိုငယ်တစ်ယောက် စာအုပ်စာတမ်း ကောင်တာကို သန့်ရှင်းရေး လုပ်နေ။ သက်ကြီး ညီအစ်မကို ညီအစ်ကိုတစ်ယောက် အားပေးစကား ပြောနေ။