၁။ လူငယ်​များစွာ ဘာတွေ ပြီးမြောက်ခဲ့ပြီလဲ။

 နှစ်တိုင်း လူငယ် ခရစ်ယာန် ထောင်ပေါင်း​များစွာ နှစ်ခြင်းခံနေကြတယ်။ သင်​ကော နှစ်ခြင်းခံ​ပြီးပြီ​လား။ ဒါဆိုရင် ညီအစ်ကို/မတွေ သိပ်ဝမ်းသာကြတယ်။ အထူးသဖြင့် ယေဟောဝါ ဝမ်းသာတယ်။ (ပညာ. ၂၇:၁၁) သင် ဘာတွေ ပြီးမြောက်ခဲ့ပြီလဲဆိုတာ စဉ်းစားကြည့်ပါ။ နှစ်​အတော်များများ ဝီရိယရှိရှိ ကျမ်းစာ လေ့လာခဲ့လို့ ကျမ်းစာဟာ ဘုရားသခင့် တရားစကား ဖြစ်ကြောင်း ယုံကြည်​စိတ်ချ​လာတယ်။ ကျမ်းစာရဲ့ အာဘော်ရှင်​ကို သိကျွမ်း​ချစ်ခင်လာတယ်။ အဲဒီလို​ချစ်လို့ ကိုယ့်ကိုယ်ကိုယ် ဘုရားဆီ ဆက်ကပ်​အပ်နှံ နှစ်ခြင်းခံ​ခဲ့တယ်။ သိပ်ကောင်းတဲ့ ဆုံးဖြတ်ချက်ပါပဲ။

၂။ ဒီဆောင်းပါးမှာ ဘာအကြောင်း ဆွေးနွေးကြမလဲ။

 ^၂ နှစ်ခြင်း​မခံခင် ယုံကြည်ခြင်း စမ်းသပ်မှု မျိုးစုံ ကြုံခဲ့ရ​မှာ​ပဲ။ အသက်ကြီးလာတာနဲ့အမျှ စမ်းသပ်မှု အသစ်တွေ ကြုံလာရမယ်။ ယေဟောဝါကို ချစ်တဲ့ မေတ္တာ လျော့သွားအောင်၊ ဘုရားကို ဆက်ဝတ်မပြုတော့အောင် စာတန် သွေးဆောင်​လိမ့်မယ်။ (ဧ. ၄:၁၄) ဒါပေမဲ့ အဲဒီလို ဖြစ်ခွင့်မပေးပါနဲ့။ ယေဟောဝါကို ဆက်သစ္စာ​ရှိဖို့၊ ဆက်ကပ်​အပ်နှံခြင်း ကတိ​သစ္စာ​ကို စောင့်ထိန်းနိုင်ဖို့ ဘာက ကူညီပေးမလဲ။ ဆက်တိုးတက်နေရမယ်၊ ခရစ်ယာန် ရင့်ကျက်တဲ့အဖြစ်ကို “တက်လှမ်း” နေ​ရမယ်။ (ဟီ. ၆:၁) ဘယ်လို တက်လှမ်းနိုင်​ကြောင်း ဒီဆောင်းပါးမှာ ဆွေးနွေးကြပါမယ်။

၃။ နှစ်ခြင်းခံပြီးနောက် ခရစ်ယာန်​အားလုံး ဘာဆက်လုပ်သင့်သလဲ။

^၃ နှစ်ခြင်းခံပြီးနောက် ကျွန်တော်တို့​အားလုံး ဧဖက်​မြို့က ခရစ်ယာန်တွေကို တမန်တော် ပေါလု ပေးတဲ့ အကြံဉာဏ်အတိုင်း လိုက်လျှောက်ဖို့ လိုတယ်။ “ရင့်ကျက်သူတွေ” ဖြစ်ဖို့ ပေါလု အားပေးတယ်။ (ဧ. ၄:၁၃) တစ်နည်းအားဖြင့်၊ ‘ဆက်တိုးတက်​နေ’ ရမယ်။ ခရစ်ယာန်တစ်ယောက်ရဲ့ တိုးတက်မှုကို ကလေး​တစ်ယောက်  ကြီးထွားတာနဲ့ ပေါလု နှိုင်းယှဉ်​နေတာ။ ကလေး​တစ်ယောက် မွေးလာတဲ့အခါ မိဘတွေ သိပ်ပျော်ကြတယ်။ ဒါပေမဲ့ တစ်သက်လုံး ကလေး​အဖြစ်​ပဲ နေသွား​လို့ မရဘူး။ အသက်ကြီးလာတာနဲ့အမျှ “ကလေး​ရဲ့ စရိုက်တွေကို” ဖျောက်ပစ်​ရတယ်။ (၁ ကော. ၁၃:၁၁) ခရစ်ယာန်တွေ​လည်း အဲဒီလိုပဲ။ နှစ်ခြင်းခံပြီးနောက် ဆက်တိုးတက်နေရမယ်။ အကြံပြုချက်​တချို့ကို သုံးသပ်​ကြည့်ရအောင်။

၄။ ဘုရားရေးရာဘက် တိုးတက်ဖို့ ဘယ်အရည်အသွေးက ကူညီပေးမလဲ။ ရှင်းပြပါ။ (ဖိလိပ္ပိ ၁:၉)

^၄ ယေဟောဝါကို ချစ်တဲ့ မေတ္တာ တိုးများအောင် လုပ်ပါ။ ယေဟောဝါကို သင် သိပ်ချစ်တယ်။ ဒါပေမဲ့ အဲဒီ​မေတ္တာ ဆက်တိုးများနိုင်တယ်။ ဘယ်လိုနည်းနဲ့လဲ။ တစ်နည်းကို ဖိလိပ္ပိ ၁:၉ မှာ တမန်တော် ပေါလု ဖော်ပြတယ်။ (ဖတ်ပါ။) ဖိလိပ္ပိ ခရစ်ယာန်တွေ​ရဲ့ မေတ္တာ “တိုးသည်ထက် တိုးလာ​ဖို့” ပေါလု ဆုတောင်းပေးတယ်။ ဒါကြောင့် မေတ္တာ တိုးများအောင် လုပ်​လို့​ရတယ်။ အဲဒီလို တိုးနိုင်ဖို့ ဘုရား​အလိုတော်ကို “တိကျမှန်ကန်စွာ သိကျွမ်း​လာပြီး ကောင်းကောင်း ပိုင်းခြား​သိမြင်” ရမယ်။ ယေဟောဝါအကြောင်း ပိုသိလေ ဘုရားကို ပိုချစ်လေ၊ ဘုရားရဲ့ အရည်အသွေးတွေ​နဲ့ လုပ်ဆောင်ပုံ​နည်းလမ်းတွေကို ပိုတန်ဖိုးထားလေ ဖြစ်လာမယ်။ ဘုရား စိတ်တော် ရွှင်လန်းအောင် ထားချင်​စိတ်၊ ဘုရား စိတ်ပျက်မယ့် ဘယ်အရာကိုမှ မ​လုပ်ချင်တဲ့​စိတ် တိုးများ​လာမယ်။ ဘုရား​အလိုတော်​က ဘာလဲ၊ အဲဒီအတိုင်း ဘယ်လို လုပ်ဆောင်​နိုင်မလဲ​ဆိုတာ သိဖို့ အတတ်နိုင်ဆုံး ကြိုးစားလာမယ်။

၅-၆။ ယေဟောဝါကို ချစ်တဲ့ မေတ္တာ ဘယ်လို တိုးများနိုင်သလဲ။ ရှင်းပြပါ။

^၅ ဖခင် ယေဟောဝါရဲ့ အရည်အသွေးတွေကို အပြည့်အဝ တင်ပြ​တဲ့ သားတော်အကြောင်း ပိုသိကျွမ်းအောင် လုပ်ခြင်းအားဖြင့်လည်း ဘုရားကို ချစ်တဲ့ မေတ္တာ တိုးများ​လာနိုင်တယ်။ (ဟီ. ၁:၃) ယေရှုအကြောင်း သိကျွမ်းနိုင်တဲ့ အကောင်းဆုံး​နည်းကတော့ ခရစ်ဝင်ကျမ်း လေးစောင်ကို လေ့လာခြင်း​ပါပဲ။ သင့်​မှာ ကျမ်းစာ နေ့တိုင်း ဖတ်​တဲ့ အကျင့် မရှိသေးဘူးဆိုရင် အခုပဲ စ​ဖတ်​ကြည့်ပါ။ ယေရှုရဲ့ ဘဝ​မှတ်တမ်းကို ဖတ်တဲ့အခါ ယေရှုရဲ့ အရည်အသွေးတွေကို အထူး​မှတ်သားပါ။ ယေရှုဟာ ချဉ်းကပ်ရ လွယ်တယ်။ ကလေးတွေ​ကို ပွေ့ဖက်​တယ်။ (မာ. ၁၀:၁၃-၁၆) တပည့်တွေ ရှိန်အောင် မနေဘူး။ ဘာမဆို ပြောရဲဆိုရဲ ရှိအောင် ခင်ခင်မင်မင် နေ​တယ်။ (မ. ၁၆:၂၂) တကယ်တော့ ကောင်းကင်ဖခင်ကို ယေရှု တုပတာ။ ယေဟောဝါ​ဘုရားဟာ ချဉ်းကပ်ရလွယ်သူ ဖြစ်တယ်။ ဘုရားဆီ ရင်ဖွင့်ဆုတောင်းနိုင်တယ်။ ကျွန်တော်တို့ကို ချစ်ကြောင်း၊ ဂရုစိုက်ကြောင်း၊ ဘယ်တော့မှ ပြစ်တင်​ဝေဖန်​မှာ မဟုတ်ကြောင်း စိတ်ချနိုင်တယ်။—၁ ပေ. ၅:၇။

^၆ လူတွေကို ယေရှု ထောက်ထားစာနာတယ်။ “လူတွေဟာ အရေခွံ ဆုတ်ပြီး ပစ်ထား​ခံရတဲ့ သိုးတွေ၊ ထိန်းသူ မရှိတဲ့ သိုးတွေလို ဖြစ်နေလို့ သူတို့ကို မြင်တဲ့အခါ ယေရှု သနားတယ်” လို့ တမန်တော် မဿဲ ပြောတယ်။ (မ. ၉:၃၆) ယေဟောဝါ​မှာ​ကော ဘယ်လို ခံစားချက် ရှိသလဲ။ “ကောင်းကင်မှာ စံမြန်း​တဲ့ အဖ​ဘုရားက ကလေးငယ်နဲ့ တူတဲ့ ဟောဒီလူတွေကို တစ်ယောက်မှ မပျက်စီးစေချင်ဘူး” လို့ ယေရှု ပြောတယ်။ (မ. ၁၈:၁၄) တကယ့်ကို အားရှိစရာပါပဲ။ ယေရှုအကြောင်း ကောင်းကောင်း သိလာတာနဲ့အမျှ ယေဟောဝါကို ချစ်တဲ့ မေတ္တာ တိုးများလာတယ်။

၇။ ရင့်ကျက်တဲ့ ခရစ်ယာန်တွေနဲ့ ပေါင်းသင်းခြင်းက သင့်ကို ဘယ်လို ကူညီပေးနိုင်သလဲ။

^၇ အသင်းတော်ထဲက ရင့်ကျက်တဲ့ ညီအစ်ကို/မတွေနဲ့ သိကျွမ်းအောင် လုပ်ခြင်းအားဖြင့်လည်း ယေဟောဝါကို ပိုချစ်လာမယ်။ ကျွန်တော်တို့ ပိုရင့်ကျက်လာမယ်။ သူတို့ ဘယ်လောက် ပျော်နေကြောင်း သတိပြု​ကြည့်ပါ။ ယေဟောဝါကို ဝတ်ပြုဖို့ ဆုံးဖြတ်ခဲ့တာကို လုံးဝ နောင်တ မရကြဘူး။ ယေဟောဝါရဲ့ အမှုတော်မှာ ရခဲ့တဲ့ အတွေ့အကြုံတွေ မေးကြည့်ပါ။ အရေးကြီး ဆုံးဖြတ်ချက် ချဖို့ လိုလာတဲ့အခါ သူတို့ဆီ အကြံတောင်းပါ။ ‘အကြံပေးသူ များရင် အောင်မြင်​တတ်တယ်။’—ပညာ. ၁၁:၁၄။

၈။ ကျမ်းစာအဆိုကို သံသယဝင်နေရင် ဘာလုပ်နိုင်သလဲ။

 ^၈ သံသယတွေကို ကျော်လွှား​ပါ။  စာပိုဒ် ၂ မှာ ဖော်ပြတဲ့​အတိုင်း ဘုရားရေးရာဘက် ဆက်မတိုးတက်အောင် စာတန် တားဆီး​လိမ့်မယ်။ တားဆီးတဲ့ တစ်နည်းကတော့ ကျမ်းစာ​သွန်သင်ချက်​တချို့ကို သံသယဝင်စေခြင်းအားဖြင့်ပါပဲ။ ဥပမာ၊ ဘုရားကို ရှုတ်ချ​တဲ့ ဆင့်ကဲအယူအကြောင်း သွန်သင်ခံလာရနိုင်တယ်။ ငယ်ငယ်​တုန်းက အဲဒီအကြောင်း မတွေးဖူးသလောက်ပဲ။ အသက်ကြီးလာတော့ ကျောင်းမှာ ထိပ်တိုက်​ကြုံလာရနိုင်တယ်။ ဆင့်ကဲအယူနဲ့ပတ်သက်ပြီး ဆရာတွေ ပြောတာ ယုတ္တိ ရှိသလိုလို၊ လက်တွေ့ကျသလိုလိုပဲ။ ဒါပေမဲ့ ဖန်ဆင်း​ရှင် ရှိတယ်ဆိုတဲ့ အထောက်အထားတွေကို သူတို့ တစ်ခါမှ သေသေချာချာ စဉ်းစားဖူးမှာ မဟုတ်ဘူး။ “အမှုကို ဦးဆုံး​ထွက်ဆို​သူက မှန်တယ်လို့ ထင်ရပေမဲ့ တစ်ဖက်​လူ ရောက်လာပြီး ပြန်လှန်စစ်မေးချိန်မှာတော့ အဖြစ်မှန် ပေါ်လာ​တတ်တယ်” လို့ ပညာအလိမ္မာ ၁၈:၁၇ မှာ ပြောတယ်။ ကျောင်းမှာ သင်ပေးတာကို မျက်စိမှိတ် လက်ခံလိုက်မယ့်အစား ကျမ်းစာ အမှန်တရားတွေကို အသေအချာ လေ့လာ​ပါ။ အဖွဲ့အစည်း​စာပေတွေ​မှာ ရှာဖွေ​လေ့လာ​ပါ။ ဆင့်ကဲအယူကို အရင်က ယုံခဲ့တဲ့ ညီအစ်ကို/မတွေနဲ့ စကားပြော​ကြည့်ပါ။ ကျွန်တော်တို့ကို ချစ်မြတ်နိုးတဲ့ ဖန်ဆင်း​ရှင် ရှိတယ်ဆိုတာ သူတို့ ဘာကြောင့် ယုံလာကြောင်း မေးကြည့်ပါ။ အဲဒီလို တည်ဆောက်မှု ဖြစ်စေတဲ့ ဆွေးနွေးခန်းတွေက သက်သေ​အထောက်အထားတွေကို အာရုံစိုက်​ဖို့ ကူညီပေးနိုင်တယ်။

၉။ မာလစ်ဆာ​ရဲ့ အဖြစ်ကနေ ဘာသိရသလဲ။

^၉ ဖန်ဆင်းခြင်း​အကြောင်း ရှာဖွေ​လေ့လာခြင်း​ကနေ ညီအစ်မ မာလစ်ဆာ အကျိုးရတယ်။ * “ကျောင်းမှာ ဆရာတွေ​က ဆင့်ကဲအယူကို ယုံလောက်အောင် သင်ပေးကြတယ်။ ဆင့်ကဲအယူ မှန်တယ်လို့များ ရှာတွေ့သွားမှာ စိုးလို့ အစပိုင်းမှာ ရှာဖွေ​လေ့လာဖို့ တွန့်ဆုတ်မိတယ်။ ဒါပေမဲ့ မျက်စိမှိတ် ယုံတာမျိုး ယေဟောဝါ မဖြစ်စေချင်မှန်း သိတဲ့​အတွက် စပြီး ရှာဖွေ​လေ့လာ​တယ်။ သင့်အား ဂရုစိုက်စောင့်ရှောက်သည့် ဖန်ဆင်း​ရှင်​တစ်ပါး ရှိ၏လော စာအုပ်၊ သက်ရှိ​များသည် ဖန်ဆင်းခံရခြင်းလော၊ သက်ရှိများရဲ့ မူလအစ—မေးသင့်မေးထိုက်တဲ့ မေးခွန်း ငါးခု စာစောင်တွေကို လေ့လာ​တယ်။ ကျွန်မ လိုနေတာ အဲဒါ​ပဲ။ စောစောကတည်းကသာ လေ့လာခဲ့ရင် ကောင်းသား” လို့ မာလစ်ဆာ ပြောတယ်။

၁၀-၁၁။ ကိုယ်ကျင့်တရား သန့်ရှင်းနေဖို့ ဘာက ကူညီပေးနိုင်သလဲ။ (၁ သက်သာလောနိတ် ၄:၃၊ ၄)

 ^၁၀ မကောင်းတဲ့ အကျင့်တွေကို ငြင်းပယ်ပါ။ ဆယ်ကျော်သက်​အရွယ် ရောက်လာတဲ့အခါ လိင်ဆန္ဒ ပြင်းပြ​လာနိုင်တယ်။ လိင်​အကျင့်​ယိုယွင်း​ဖို့ သွေးဆောင်​ခံရနိုင်တယ်။ စာတန်က သင့်ကို စိတ်​အလိုလိုက်​စေချင်တယ်။ ကိုယ်ကျင့်တရား သန့်ရှင်းနေဖို့ ဘာက ကူညီပေးနိုင်သလဲ။ (၁ သက်သာလောနိတ် ၄:၃၊ ၄ ကို ဖတ်ပါ။) ဘုရားဆီ သီးသန့်​ဆုတောင်းတဲ့အခါ ခံစားချက်တွေ ရင်ဖွင့်ပြောပြပြီး ခွန်အား တောင်းပါ။ (မ. ၆:၁၃) သင့်ကို ယေဟောဝါ ပြစ်တင်​ဝေဖန်​မှာ မဟုတ်ဘူး၊ ကူညီပေးချင်တယ်ဆိုတာ သတိရပါ။ (ဆာ. ၁၀၃:၁၃၊ ၁၄) ကျမ်းစာကနေလည်း အကူအညီ ရနိုင်တယ်။ အစောပိုင်းမှာ ဖော်ပြတဲ့ မာလစ်ဆာက မသန့်ရှင်းတဲ့ အတွေးတွေကို ကြိုးစား​တွန်းလှန်ခဲ့ရတယ်။ “ကျမ်းစာ နေ့တိုင်း ဖတ်တာက မကောင်းတဲ့ ဆန္ဒတွေကို ဆက်တိုက်လှန်ဖို့ ကူညီပေးတယ်။ ကျွန်မကို ယေဟောဝါ ပိုင်မှန်း၊ ဘဝမှာ ဘုရားကို လိုအပ်မှန်း အသိဝင်စေတယ်” လို့ ပြောတယ်။—ဆာ. ၁၁၉:၉။

^၁၁ ပြဿနာတွေကို တစ်ယောက်တည်း ဖြေရှင်းဖို့ မကြိုးစားပါနဲ့။ မိဘတွေကို ပြောပြပါ။ အဲဒီလို ကိုယ်ရေးကိုယ်တာ ကိစ္စတွေကို ဖွင့်ပြောဖို့ မလွယ်ပေမဲ့ ဖွင့်ပြောဖို့ အရေးကြီးတယ်။ “သတ္တိ​ပေးဖို့ ဆုတောင်းပြီး အဖေ့ကို ပြဿနာတွေ ပြောပြတယ်။ တော်တော် စိတ်သက်သာသွားတယ်။ ကျွန်မ​အတွက် ယေဟောဝါ ဂုဏ်ယူ​နေမယ်​ဆိုတာ သိတယ်” လို့ မာလစ်ဆာ ပြောတယ်။

၁၂။ ဆုံးဖြတ်ချက်ကောင်းတွေ ဘယ်လို ချနိုင်သလဲ။

^၁၂ ကျမ်းစာ​မူတွေရဲ့ လမ်းပြမှု ခံယူ​ပါ။ ကိုယ်ပိုင်​ဆုံးဖြတ်ချက်တွေ ချဖို့ သင့်ကို မိဘတွေ တဖြည်းဖြည်း ခွင့်ပြုလာမယ်။ ဒါပေမဲ့ ဘဝ​အတွေ့အကြုံ သိပ်မရှိသေးလို့ ယေဟောဝါနဲ့ ဆက်ဆံရေး ပျက်စေနိုင်တဲ့ အမှားမျိုး လုပ်မိ​နိုင်တယ်။ မလုပ်မိအောင် ဘယ်လို ရှောင်နိုင်သလဲ။ (ပညာ. ၂၂:၃) ဆုံးဖြတ်ချက်ကောင်းတွေ ချနိုင်အောင် ဘာက ကူညီပေးကြောင်း ညီအစ်မ ကာရီ ပြောပြတယ်။ ရင့်ကျက်တဲ့ ခရစ်ယာန်တွေဟာ အခြေအနေတိုင်းအတွက် စည်းမျဉ်း မလိုအပ်ဘူးဆိုတာ ကာရီ နားလည်တယ်။ “စည်းမျဉ်းတွေထက် ကျမ်းစာ​မူတွေကို နားလည်ဖို့ ကြိုးစားတယ်” လို့ ပြောတယ်။ သင်လည်း ကျမ်းစာ​ဖတ်တဲ့အခါ ကိုယ့်ကိုယ်ကိုယ် ဒီလိုမေးပါ– “ဒီ​ကျမ်းချက်က ယေဟောဝါရဲ့ စဉ်းစားပုံအကြောင်း ဘာသင်ပေးသလဲ။ မှန်ရာ လုပ်ဖို့ ကူညီပေးနိုင်တဲ့ မူတွေ ပါသလား။ အဲဒါကို လက်တွေ့ကျင့်သုံးရင် ဘယ်လို အကျိုးရမလဲ။” (ဆာ. ၁၉:၇။ ဟေရှာ. ၄၈:၁၇၊ ၁၈) ကျမ်းစာ လေ့လာခြင်း၊ ကျမ်းစာ​မူတွေကို တွေးတော​ဆင်ခြင်ခြင်း​က ယေဟောဝါ နှစ်သက်မယ့် ဆုံးဖြတ်ချက်တွေ ချဖို့ ပိုလွယ်ကူစေပါလိမ့်မယ်။ ပိုရင့်ကျက်လာတာနဲ့အမျှ ကိစ္စရပ်တွေအပေါ် ယေဟောဝါရဲ့​စဉ်းစားပုံကို နားလည်လာလို့ အခြေအနေတိုင်းအတွက် စည်းမျဉ်းတွေ မလိုဘူး​ဆိုတာ သိလာပါလိမ့်မယ်။

၁၃။ မိတ်ဆွေကောင်းတွေ​က သင့်​အပေါ် ဘယ်လို သက်ရောက်မှု ရှိနိုင်သလဲ။ (ပညာအလိမ္မာ ၁၃:၂၀)

^၁၃ ယေဟောဝါကို ချစ်တဲ့ မိတ်ဆွေတွေ ရွေးချယ်ပါ။ စာပိုဒ် ၇ မှာ ဖော်ပြခဲ့တဲ့​အတိုင်း ကိုယ်​ရွေးချယ်​တဲ့ မိတ်ဆွေတွေက ရင့်ကျက်တဲ့ ခရစ်ယာန် ဖြစ်အောင် ကူညီပေးနိုင်တယ်။ (ပညာအလိမ္မာ ၁၃:၂၀ ကို ဖတ်ပါ။) ညီအစ်မ စာရာ မပျော်မရွှင် ဖြစ်နေတဲ့အခါ ပြန်ပျော်ရွှင်လာအောင် ဘာက ကူညီပေးသလဲ။ “လိုအပ်ချိန် အတိအကျ​မှာ မိတ်ဆွေတွေ ရလာတယ်။ အပတ်တိုင်း ညီအစ်မငယ်​တစ်ယောက်နဲ့ ချိန်းပြီး ကင်းမျှော်စင် အတူ​လေ့လာ​တယ်။ အစည်းအဝေးမှာ မှတ်ချက် စ​ပေးဖို့ မိတ်ဆွေ​နောက်တစ်ယောက် ကူညီပေးတယ်။ မိတ်ဆွေတွေ​ရဲ့ အကူအညီကြောင့် ကိုယ်ပိုင်​လေ့လာမှု လုပ်တတ်​လာတယ်။ ပိုအဓိပ္ပာယ်ရှိရှိ ဆုတောင်း​တတ်လာ​တယ်။ ယေဟောဝါနဲ့ ဆက်ဆံရေး ပိုကောင်းလာတယ်။ ပြန်ပျော်ရွှင်လာတယ်” လို့ စာရာ ပြောတယ်။

၁၄။ ဂျူလီယန် မိတ်ဆွေကောင်းတွေ ဘယ်လို ရလာသလဲ။

 ^၁၄ မိတ်ဆွေကောင်းတွေ ဘယ်လို ဖွဲ့နိုင်သလဲ။ အခု အကြီးအကဲအဖြစ် အမှုဆောင်​နေတဲ့ ဂျူလီယန် ဒီလိုပြောတယ်– “ငယ်ငယ်​တုန်းက အမှုဆောင်မှာ ပါဝင်ရင်း မိတ်ဆွေကောင်းတွေ ရလာတယ်။ စိတ်​ထက်သန်​တဲ့ အဲဒီ​မိတ်ဆွေတွေကြောင့် အမှုဆောင် သွားရတာ ပျော်စရာ​ကောင်းတယ်​လို့ မြင်တတ် လာတယ်။ အချိန်ပြည့် အမှုဆောင်ဖို့ ပန်းတိုင်ထားလာတယ်။ မိတ်ဆွေကောင်း များများစားစား မရှိတာ သက်တူရွယ်တူ​တွေ​နဲ့​ပဲ ပေါင်းနေလို့ဆိုတာ သိလာတယ်။ နောက်ပိုင်း၊ ဗေသလမှာ မိတ်ဆွေကောင်းတွေ ထပ်ရလာတယ်။ သူတို့ရဲ့ ပုံသက်သေ​က ကောင်းတဲ့ ဖျော်ဖြေမှု ရွေးချယ်နိုင်ဖို့ ကူညီပေးတယ်။ ယေဟောဝါနဲ့ ပိုရင်းနှီးလာစေတယ်။”

၁၅။ အပေါင်းအသင်းနဲ့ပတ်သက်ပြီး တိမောသေ​ကို ပေါလု ဘာသတိပေးသလဲ။ (၂ တိမောသေ ၂:၂၀-၂၂)

^၁၅ အသင်းတော်မှာ ကိုယ်ပေါင်းသင်းနေသူ တစ်ယောက်ယောက်ဟာ မိတ်ဆွေကောင်း မဟုတ်မှန်း သိလာရင် ဘာလုပ်သင့်သလဲ။ ပထမ​ရာစု ခရစ်ယာန်​တချို့​မှာ ခရစ်ယာန် မဆန်တဲ့ အတွေးအခေါ်၊ အပြုအမူတွေ ရှိနေမှန်း ပေါလု သိလို့ သူတို့ကို ဝေးဝေးရှောင်​ဖို့ တိမောသေ​ကို သတိပေးတယ်။ (၂ တိမောသေ ၂:၂၀-၂၂ ကို ဖတ်ပါ။) ကောင်းကင်ဖခင် ယေဟောဝါနဲ့ ဆက်ဆံရေးကောင်း​ဟာ သိပ်တန်ဖိုးရှိတယ်။ မနည်း​ကြိုးစားပြီးမှ ရထားတဲ့ အဲဒီ​ဆက်ဆံရေး​ကို ဘယ်သူ့ကြောင့်မှ အပျက်စီး မခံသင့်ဘူး။—ဆာ. ၂၆:၄။

၁၆။ ဘယ်လို ပန်းတိုင်တွေ ချမှတ်သင့်သလဲ။

^၁၆ အကျိုးရှိတဲ့ ပန်းတိုင်တွေ ချမှတ်​ပါ။ ယုံကြည်ခြင်း ခိုင်မာစေမယ့်၊ ပိုရင့်ကျက်တဲ့ ခရစ်ယာန် ဖြစ်အောင် ကူညီပေးမယ့် ပန်းတိုင်တွေ ချမှတ်​ပါ။ (ဧ. ၃:၁၆) ဥပမာ၊ ကိုယ်ပိုင်​လေ့လာမှု၊ ကျမ်းစာ ဖတ်​တဲ့ အလေ့အထ တိုးတက်အောင် လုပ်ဖို့ ဆုံးဖြတ်နိုင်တယ်။ (ဆာ. ၁:၂၊ ၃) ခဏခဏ ဆုတောင်းဖို့၊ ပိုအဓိပ္ပာယ်ရှိရှိ ဆုတောင်းတတ်ဖို့၊ ဖျော်ဖြေမှု ရွေးချယ်ရာ​မှာ၊ အချိန် အသုံးပြု​ရာ​မှာ ပိုချုပ်တည်းဖို့ ကြိုးစား​နိုင်တယ်။ (ဧ. ၅:၁၅၊ ၁၆) တိုးတက်ဖို့ ကြိုးစားနေတာကို ယေဟောဝါ မြင်ပြီး ကျေနပ်​နှစ်သက်မှာ သေချာပါတယ်။

၁၇။ တခြားသူတွေကို ကူညီပေးရင် ဘာအကျိုးရမလဲ။

^၁၇ တခြားသူတွေကို ကူညီပေးခြင်း​ကလည်း ပိုရင့်ကျက်လာ​စေနိုင်​တယ်။ “ရယူခြင်းထက် ပေးကမ်းခြင်းက ပိုပျော်ရွှင်စေတယ်” လို့ ယေရှု ပြောတယ်။ (တ. ၂၀:၃၅) လူငယ့်ခွန်အားနဲ့  အချိန် သုံးပြီး တခြားသူတွေကို ကူညီပေးနေတယ်​ဆိုရင် အကျိုးကျေးဇူး များစွာ ရမယ်။ ဥပမာ၊ အသင်းတော်မှာ ရှိတဲ့ အသက်ကြီးသူ၊ မသန်စွမ်း​သူ​တွေ​ကို ကူညီဖို့ ပန်းတိုင်ထားနိုင်တယ်။ သူတို့အတွက် ဝေယျာဝိစ္စတွေ လုပ်ပေးနိုင်တယ်။ အီလက်ထရောနစ် ကိရိယာတွေ သုံးတတ်ဖို့ ကူညီပေးနိုင်တယ်။ သင်ဟာ ညီအစ်ကို ဖြစ်မယ်ဆိုရင် အသင်းတော် အမှုထမ်းအဖြစ် ညီအစ်ကို/မတွေကို ပိုကူညီပေးဖို့ ပန်းတိုင် ထားနိုင်တယ်။ (ဖိ. ၂:၄) နိုင်ငံတော် သတင်းကောင်း ဟောပြောခြင်းအားဖြင့် အသင်းတော် ပြင်ပက လူတွေကိုလည်း မေတ္တာ ပြနိုင်တယ်။ (မ. ၉:၃၆၊ ၃၇) ဖြစ်နိုင်မယ်ဆိုရင် အချိန်ပြည့် အမှုဆောင်​လုပ်ငန်း အသွင်​တချို့​မှာ ပါဝင်ဖို့ ပန်းတိုင်​ထားပါ။

၁၈။ အချိန်ပြည့် အမှုဆောင်လုပ်ငန်းမှာ ပါဝင်တာက ပိုတိုးတက်ဖို့ ဘယ်လို ကူညီပေးနိုင်သလဲ။

^၁၈ အချိန်ပြည့် အမှုဆောင်​လုပ်ငန်း​က ဘုရားရေးရာဘက် တိုးတက်ဖို့ အခွင့်အရေး​များစွာ ရရှိ​စေနိုင်​တယ်။ ရှေ့ဆောင်​လုပ်ရင် သတင်းကောင်း ဟောပြောသူများ​အတွက် သင်တန်းတက်ဖို့ လမ်းပွင့်လာမယ်။ ဗေသလ၊ ဆောက်လုပ်ရေး စီမံကိန်းတွေမှာ ပါဝင်နိုင်မယ်။ ရှေ့ဆောင် ညီအစ်မငယ် ကိတ်လင်း ဒီလိုပြောတယ်– “အတွေ့အကြုံရှိ ညီအစ်ကို/မတွေနဲ့​အတူ အမှုဆောင်လုပ်ငန်းမှာ ပါဝင်တာက နှစ်ခြင်းခံပြီးနောက် ဆက်တိုးတက်​ဖို့ အများကြီး ထောက်ကူပေးတယ်။ ကျမ်းစာ အသိပညာ တိုးများအောင်၊ သွန်သင်ခြင်း​စွမ်းရည် တိုးတက်အောင် လုပ်ဖို့ သူတို့ရဲ့ ပုံသက်သေ​က ကူညီပေးတယ်။”

၁၉။ ဘုရားရေးရာဘက် တိုးတက်အောင် ဆက်ကြိုးစားနေရင် ဘာကောင်းချီးတွေ ရမလဲ။

^၁၉ ဘုရားရေးရာဘက် တိုးတက်အောင် ဆက်ကြိုးစားနေမယ်ဆိုရင် ကောင်းချီး​များစွာ ခံစားရမယ်။ လူငယ့်ခွန်အား အလဟဿ ဖြစ်သွားမှာ မဟုတ်ဘူး။ (၁ ယော. ၂:၁၇) ဆုံးဖြတ်ချက် အမှားတွေကြောင့် စိတ်ထိခိုက်စရာ မကြုံရအောင် ကာကွယ်ခံရမယ်။ စစ်မှန်တဲ့ အောင်မြင်မှု၊ ပျော်ရွှင်မှု ရမယ်။ (ပညာ. ၁၆:၃) သင့်​ပုံသက်သေကောင်း​က ညီအစ်ကို/မ ကြီးငယ်မရွေး​ကို အားပေးမှု ဖြစ်စေလိမ့်မယ်။ (၁ တိ. ၄:၁၂) အရေးကြီးဆုံးကတော့ ယေဟောဝါရဲ့ စိတ်တော် ရွှင်လန်းစေလို့၊ ဘုရားနဲ့ ရင်းနှီးတဲ့ ဆက်ဆံရေး ရှိလို့ စိတ်ငြိမ်သက်မှု၊ ကျေနပ်မှု ခံစားရပါလိမ့်မယ်။—ပညာ. ၂၃:၁၅၊ ၁၆။