စာနာစိတ်ရှိတဲ့ အနန္တတန်ခိုးရှင်
“[ယေဟောဝါ]က ငါတို့ရဲ့ ဖွဲ့စည်းတည်ဆောက်ပုံကို ကောင်းကောင်း သိတယ်။ ငါတို့ဟာ မြေမှုန့်ပဲဆိုတာကို မမေ့ဘူး။”—ဆာ. ၁၀၃:၁၄။
၁၊ ၂။ (က) လူတွေနဲ့ ဆက်ဆံရာမှာ ယေဟောဝါဟာ အာဏာရှိသူတွေနဲ့ ဘယ်လို ကွာခြားသလဲ။ (ခ) ဒီဆောင်းပါးမှာ ဘာအကြောင်း သုံးသပ်ကြမလဲ။
သြဇာအာဏာကြီးသူတွေဟာ သူတစ်ပါးကို “နိုင်ထက်စီးနင်း လုပ်တတ်” ကြတယ်။ (မ. ၂၀:၂၅။ ဒေ. ၈:၉) ယေဟောဝါနဲ့ ကွာလိုက်တာ။ ယေဟောဝါကတော့ အနန္တတန်ခိုးရှင်ဖြစ်ပေမဲ့ မစုံလင်သူ လူသားတွေကို ထောက်ထားစာနာပြီး ကြင်နာတယ်။ ကျွန်တော်တို့ရဲ့ ခံစားချက်၊ လိုအပ်ချက်တွေကို ထည့်စဉ်းစားပေးပြီး ကျွန်တော်တို့ဟာ “မြေမှုန့်ပဲဆိုတာကို မမေ့ဘူး။” တတ်နိုင်တာထက် ပိုမတောင်းဆိုဘူး။—ဆာ. ၁၀၃:၁၃၊ ၁၄။
၂ ယေဟောဝါ စာနာမှုပြခဲ့တဲ့ ကျမ်းစာ ပုံနမူနာများစွာ ရှိတယ်။ သုံးခုကို ကြည့်ကြစို့။ ပထမ၊ ပုရောဟိတ်မင်း ဧလိကို တရားစီရင်ချက်သတင်း ပြောဖို့ လူငယ် ရှမွေလကို ယေဟောဝါ ကူညီပေးပုံ။ ဒုတိယ၊ အစ္စရေးခေါင်းဆောင်လုပ်ဖို့ ငြင်းပယ်တဲ့ မောရှေကို စိတ်ရှည်စွာ ကူညီပေးပုံ။ တတိယ၊ အီဂျစ်ကနေ ထွက်လာတဲ့ အစ္စရေးတွေကို စာနာမှုပြပုံ။ ဒီပုံနမူနာတွေကို သုံးသပ်ရင်း ယေဟောဝါအကြောင်း၊ သင်ယူနိုင်တဲ့ သင်ခန်းစာတွေအကြောင်း သတိပြုကြစို့။
လူငယ်လေးကို စာနာမှုပြ
၃။ တစ်ညမှာ ဘယ်ထူးဆန်းတဲ့ ဖြစ်ရပ်ကို ရှမွေလ ကြုံရသလဲ။ ဘယ်မေးခွန်း ပေါ်လာသလဲ။ (ဆောင်းပါးအစမှာပါတဲ့ ပုံကို ကြည့်ပါ။)
၃ ရှမွေလဟာ တဲတော်မှာ ငယ်ငယ်လေးကတည်းက “ယေဟောဝါအတွက် အမှုဆောင်နေတယ်။” (၁ ရှ. ၃:၁) တစ်ည၊ ရှမွေလအိပ်နေတုန်း ထူးဆန်းတာတစ်ခု ဖြစ်ခဲ့တယ်။ * (၁ ရှမွေလ ၃:၂-၁၀ ကိုဖတ်ပါ။) သူ့နာမည် ခေါ်သံ ကြားလိုက်ရတယ်။ အသက်ကြီး ပုရောဟိတ်မင်း ဧလိ ခေါ်တယ်ထင်လို့ ပြေးသွားပြီး “ကျွန်တော့်နာမည် ခေါ်သံကြားလို့ လာတာပါ” လို့ပြောတယ်။ ဧလိက မခေါ်ဘူးလို့ ငြင်းတယ်။ အဲဒီလို နှစ်ကြိမ်ထပ်ဖြစ်တော့ ရှမွေလကို ယေဟောဝါ ခေါ်နေမှန်း ဧလိ ရိပ်မိပြီး ဘယ်လိုပြန်ထူးရမယ်ဆိုတာ သင်ပေးတယ်။ ရှမွေလလည်း နာခံတယ်။ ဒါပေမဲ့ အစကတည်းက ရှမွေလကို ခေါ်တာ မိမိဖြစ်ကြောင်း ယေဟောဝါ ဘာကြောင့် မပြောတာလဲ။ ကျမ်းစာမှာ မဖော်ပြထားပေမဲ့ ရှမွေလကို စာနာမှုပြလို့ ဖြစ်တယ်။ ဘယ်နည်းနဲ့လဲ။
၄၊ ၅။ (က) တရားစီရင်ချက် သတင်း ပြောဖို့ ယေဟောဝါ စေခိုင်းတဲ့အခါ ရှမွေလ ဘယ်လို တုံ့ပြန်သလဲ။ (ခ) ဒီမှတ်တမ်းက ယေဟောဝါအကြောင်း ဘာသင်ပေးသလဲ။
၄ ၁ ရှမွေလ ၃:၁၁-၁၈ ကိုဖတ်ပါ။ အသက်ကြီးသူတွေ၊ အထူးသဖြင့် ခေါင်းဆောင်တွေကို လေးစားပါလို့ ယေဟောဝါ မိန့်မှာတယ်။ (ထွ. ၂၂:၂၈။ ဝတ်. ၁၉:၃၂) ဒါကြောင့် မနက်ရောက်တဲ့အခါ ဘုရားရဲ့ ပြင်းထန်တဲ့ စီရင်ချက်အကြောင်း ဧလိကို ရှမွေလ သွားပြောရဲပါ့မလား။ “မြင်ရတဲ့ စိတ်အာရုံအကြောင်း ဧလိကို မပြောပြရဲဘူး” လို့ ကျမ်းစာပြောတယ်။ ဒါပေမဲ့ ရှမွေလကို ခေါ်သူဟာ ယေဟောဝါဖြစ်ကြောင်း ဧလိကို အသိပေးပြီးသားဖြစ်လို့ “ဘုရားသခင် ဘာတွေ ပြောခဲ့သလဲ။ တစ်ခွန်းမကျန် ပြန်ပြောပြပါ” ဆိုပြီး ဧလိ အတင်းပြောခိုင်းမှ ရှမွေလ အကုန်ပြောပြလိုက်တယ်။
၅ အစောပိုင်းက “ဘုရားသခင် စေလွှတ်လိုက်သူ” ပြောတဲ့ သတင်းအတိုင်း ဖြစ်နေလို့ ဧလိ မအံ့သြဘူး။ (၁ ရှ. ၂:၂၇-၃၆) ယေဟောဝါဟာ စာနာပြီး ဉာဏ်ပညာရှိမှန်း ဒီမှတ်တမ်းက ဖော်ပြတယ်။
၆။ လူငယ် ရှမွေလကို ဘုရား ကူညီခဲ့ပုံကနေ ဘာသင်ယူနိုင်သလဲ။
၆ သင်ဟာ လူငယ်လား။ ဒါဆို သင့်ရဲ့ အခက်အခဲနဲ့ ခံစားချက်ကို ယေဟောဝါ နားလည်ကြောင်း လူငယ်ရှမွေလရဲ့ မှတ်တမ်းက ဖော်ပြတယ်။ လူကြီးတွေကို သတင်းကောင်းဟောဖို့ ရှက်နေတာ၊ ရွယ်တူတွေနဲ့ မတူမှာ စိုးရိမ်နေတာ ဖြစ်နိုင်တယ်။ သင့်ကို ယေဟောဝါ ကူညီလိုကြောင်း စိတ်ချပါ။ ဘုရားဆီ ရင်ဖွင့်ဆုတောင်းပါ။ (ဆာ. ၆၂:၈) ကျမ်းစာမှာပါတဲ့ ရှမွေလလို ပုံနမူနာတွေကို တွေးတောဆင်ခြင်ပါ။ သင်ကြုံနေရတဲ့ အခက်အခဲတွေကို အောင်မြင်ခဲ့တဲ့ ခရစ်ယာန် လူကြီးလူငယ်တွေနဲ့ စကားပြောပါ။ မမျှော်လင့်ထားတဲ့နည်းတွေနဲ့ သူတို့ကို ဘုရား ကူညီပေးခဲ့ကြောင်း ပြောပြကြပါလိမ့်မယ်။
မောရှေကို စာနာမှုပြ
၇၊ ၈။ မောရှေကို ယေဟောဝါ ဘယ်လို အထူးစာနာမှု ပြခဲ့သလဲ။
၇ မောရှေ အသက် ၈၀ မှာ ခက်ခဲတဲ့တာဝန်တစ်ခု ယေဟောဝါ ပေးခဲ့တယ်။ အစ္စရေးတွေကို ကျွန်ခံရာ အီဂျစ်ပြည်ကနေ ခေါ်ထုတ်ဖို့ပဲ။ (ထွ. ၃:၁၀) မိဒျန်ပြည်မှာ အနှစ် ၄၀ ကြာ သိုးထိန်းခဲ့ရလို့ ဒီတာဝန် ရတဲ့အခါ မောရှေ အတော်လန့်သွားမှာပဲ။ “ဖာရောမင်းဆီ သွားပြီး အစ္စရေးတွေကို အီဂျစ်ပြည်ကနေ ခေါ်ထုတ်လာဖို့ ကျွန်တော့်မှာ အစွမ်းအစ မရှိပါဘူး” လို့ မောရှေ ပြောတဲ့အခါ ယေဟောဝါက “မင်းနဲ့အတူ ငါရှိတယ်” လို့ ကတိပေးတယ်။ (ထွ. ၃:၁၁၊ ၁၂) ‘မင်းပြောတာကို အစ္စရေးအကြီးအကဲတွေ နားထောင်မှာပါ’ လို့လည်း ပြောတယ်။ ‘သူတို့ ကျွန်တော့်စကားကို နားမထောင်ရင်ကော’ ဆိုပြီး မောရှေ ထပ်မေးတယ်။ (ထွ. ၃:၁၈။ ၄:၁) ဘုရား မှားနေပြီလို့ ပြောနေပုံပေါက်တာတောင် ယေဟောဝါ စိတ်ရှည်တယ်။ အံ့ဖွယ်အမှု လုပ်နိုင်တဲ့ တန်ခိုးကိုတောင် ပေးလိုက်သေးတယ်။ မောရှေဟာ အဲဒီလို တန်ခိုးရခဲ့တဲ့ ဦးဆုံးလူသားပါပဲ။—ထွ. ၄:၂-၉၊ ၂၁။
၈ ဒါတောင် စကားပြောသွက်လက်သူ မဟုတ်ဘူးလို့ မောရှေ ထပ်ဆင်ခြေပေးတယ်။ “မင်းစကားပြောတဲ့အခါ မင်းနဲ့အတူ ငါရှိနေမယ်။ ဘာပြောရမယ်ဆိုတာ သင်ပေးမယ်” လို့ ဘုရားပြောတယ်။ မောရှေ လက်ခံလိုက်ပြီလား။ လက်မခံသေးဘူး။ သူနဲ့အတူ တစ်ယောက်ယောက်ကို ထည့်ပေးဖို့ တောင်းဆိုပြန်တယ်။ ဒီအခါမှာတော့ ယေဟောဝါ စိတ်ဆိုးသွားတယ်။ ဒါပေမဲ့ မောရှေရဲ့ ခံစားချက်ကို ထည့်တွက်ပြီး အာရုန်ကို ပြောရေးဆိုခွင့်ရှိသူအဖြစ် ခန့်အပ်ပေးခဲ့တယ်။—ထွ. ၄:၁၀-၁၆။
၉။ ယေဟောဝါရဲ့ စိတ်ရှည်မှုနဲ့ စာနာမှုက မောရှေကို ဘယ်လို ကူညီပေးသလဲ။
၉ ဒီမှတ်တမ်းက ယေဟောဝါအကြောင်း ဘာသင်ပေးသလဲ။ အနန္တတန်ခိုးရှင်ဖြစ်တဲ့အတွက် မောရှေ ကြောက်လန့်ပြီး ချက်ချင်း နာခံအောင် လုပ်နိုင်တယ်။ ဒါပေမဲ့ ယေဟောဝါဟာ စိတ်ရှည်ပြီး ကြင်နာတယ်။ နှိမ့်ချကျိုးနွံတဲ့ မောရှေကို ကူညီမယ်လို့ ကတိပေးတယ်။ ဒီလိုစာနာမှုပြတာ အကျိုးရှိရဲ့လား။ ရှိပါတယ်။ မောရှေဟာ တခြားသူတွေနဲ့ ဆက်ဆံတဲ့အခါ ယေဟောဝါလိုပဲ နူးညံ့သိမ်မွေ့ပြီး စာနာတတ်လာတယ်။—တော. ၁၂:၃။
၁၀။ ယေဟောဝါရဲ့ စာနာမှုကို တုပရင် ဘာအကျိုးကျေးဇူး ရမလဲ။
၁၀ ဘာသင်ခန်းစာတွေ ရနိုင်သလဲ။ သင်ဟာ လင်ယောက်ျားလား။ မိဘလား။ အသင်းတော် အကြီးအကဲလား။ ဒါဆို အခွင့်အာဏာ အတော်အတန်ရှိတယ်။ ကိုယ့်လက်အောက်က လူတွေနဲ့ ဆက်ဆံရာမှာ စာနာမှု၊ ကြင်နာမှု၊ စိတ်ရှည်မှု တင်ပြခြင်းအားဖြင့် ယေဟောဝါကို တုပဖို့ သိပ်အရေးကြီးတယ်။ (ကော. ၃:၁၉-၂၁။ ၁ ပေ. ၅:၁-၃) ယေဟောဝါ၊ မောရှေထက် ပိုကြီးမြတ်တဲ့ ယေရှုခရစ်ကို တုပမယ်ဆိုရင် ချဉ်းကပ်ရလွယ်သူ၊ တခြားသူတွေကို လန်းဆန်းစေသူ ဖြစ်လာမယ်။ (မ. ၁၁:၂၈၊ ၂၉) ပုံသက်သေကောင်းသူလည်း ဖြစ်လာမယ်။—ဟီ. ၁၃:၇။
တန်ခိုးကြီးပေမဲ့ စာနာမှုရှိတဲ့ ကယ်တင်ရှင်
၁၁၊ ၁၂။ အီဂျစ်ပြည်ကနေ အစ္စရေးတွေကို ယေဟောဝါ ခေါ်ထုတ်ချိန်မှာ ဘယ်လို ဘေးကင်းလုံခြုံစေခဲ့သလဲ။
၁၁ ဘီစီ ၁၅၁၃၊ အီဂျစ်ပြည်ကနေ အစ္စရေးတွေ ထွက်လာချိန်မှာ လူသုံးသန်းကျော် ရှိနိုင်တယ်။ ကလေး၊ သက်ကြီးရွယ်အို၊ ဖျားနာသူ၊ မသန်စွမ်းသူတွေ ပါနိုင်တယ်။ ဒီလူစုကြီးကို ဦးဆောင်ဖို့ စာနာနားလည်တတ်တဲ့ ခေါင်းဆောင် လိုတယ်။ ယေဟောဝါက မောရှေကို ခေါင်းဆောင်အဖြစ် ခန့်လိုက်တဲ့အတွက် အစ္စရေးတွေဟာ မိမိတို့ရဲ့ တစ်ခုတည်းသော နေရပ်ကနေ ဘေးကင်းလုံခြုံစွာ ထွက်လာနိုင်ခဲ့တယ်။—ဆာ. ၇၈:၅၂၊ ၅၃။
၁၂ မိမိလူမျိုးကို ယေဟောဝါ ဘယ်လို ဘေးကင်းလုံခြုံစေသလဲ။ တစ်ချက်အနေနဲ့ သူတို့ဟာ အီဂျစ်ပြည်ကနေ “တပ်ဖွဲ့ပုံစံနဲ့ စနစ်တကျ ထွက်လာကြတယ်။” (ထွ. ၁၃:၁၈) ဒါက ဘုရား ထိန်းချုပ်ထားကြောင်း စိတ်ချစေတယ်။ “နေ့အချိန်မှာ မိုးတိမ်နဲ့၊ ညအချိန်မှာ မီးရောင်နဲ့ လမ်းပြ” ခြင်းအားဖြင့်လည်း မိမိရှိနေကြောင်း သိသာစေတယ်။ (ဆာ. ၇၈:၁၄) တကယ်တော့ “မကြောက်ပါနဲ့။ ငါ လမ်းပြကာကွယ်ပေးမယ်” လို့ ယေဟောဝါ ပြောနေတာ။ အဲဒီလိုကတိဟာ အချိန်ကိုက်ပါပဲ။
၁၃၊ ၁၄။ (က) ပင်လယ်နီမှာ အစ္စရေးတွေကို ယေဟောဝါ ဘယ်လို စာနာမှုပြသလဲ။ (ခ) အီဂျစ်တွေကို ယေဟောဝါ ဘယ်လို တန်ခိုးပြခဲ့သလဲ။
၁၃ ထွက်မြောက်ရာ ၁၄:၁၉-၂၂ ကိုဖတ်ပါ။ ဖာရောစစ်တပ်နဲ့ ပင်လယ်နီကြား ပိတ်မိနေတယ်လို့ ကိုယ့်ကိုယ်ကိုယ် မြင်ယောင်ကြည့်ပါ။ အဲဒီအချိန်မှာ ဘုရား ဝင်ကူတယ်။ မိုးတိမ်ဟာ အနောက်ဘက်ကို ရွေ့သွားပြီး အီဂျစ်စစ်တပ်နဲ့ အစ္စရေးတွေကြား ရောက်သွားတယ်။ အီဂျစ်ဘက်ခြမ်းကို မှောင်မည်းစေပြီး အစ္စရေးဘက်ခြမ်းကိုတော့ လင်းထိန်စေတယ်။ အဲဒီနောက် ပင်လယ်နီပေါ် မောရှေ လက်ဆန့်လိုက်တဲ့အခါ အရှေ့လေပြင်း တိုက်ပြီး ပင်လယ်ရေ နှစ်ခြမ်းကွဲသွားတယ်။ သင်နဲ့ သင့်မိသားစုရော၊ တိရစ္ဆာန်တွေပါ တခြားသူတွေနဲ့အတူ စနစ်တကျ ဖြတ်လျှောက်သွားကြတယ်။ ပင်လယ်ကြမ်းပြင်ဟာ စိုစွတ်တာ၊ ချောနေတာမျိုးမရှိဘဲ ခြောက်သွေ့နေလို့ လျှောက်ရလွယ်တာကို သင် ချက်ချင်း သတိထားလိုက်မိတယ်။ လမ်းလျှောက်နှေးသူတွေတောင် တစ်ဖက်ကမ်းကို ချောချောမောမော ရောက်လာကြတယ်။
၁၄ ထွက်မြောက်ရာ ၁၄:၂၃၊ ၂၆-၃၀ ကိုဖတ်ပါ။ ဒီအချိန်မှာ မာနကြီးပြီး မိုက်မဲတဲ့ ဖာရောဟာ ပင်လယ်ထဲအထိ ဒုန်းစိုင်းလိုက်လာတယ်။ ပင်လယ်ပေါ် မောရှေ လက်ပြန်ဆန့်လိုက်တဲ့အခါ ရေနံရံကြီးနှစ်ဖက် ပြိုကျပြီး ဖာရောနဲ့ သူ့စစ်တပ်ကို ဝါးမျိုလိုက်တယ်။—ထွ. ၁၅:၈-၁၀။
၁၅။ ဒီမှတ်တမ်းက ယေဟောဝါအကြောင်း ဘာသင်ပေးသလဲ။
၁၅ ယေဟောဝါဟာ စည်းစနစ်ရှိတဲ့ဘုရားဖြစ်ကြောင်း ဒီမှတ်တမ်းက ဖော်ပြတယ်။ စည်းစနစ်ရှိခြင်းဟာ ဘေးကင်းလုံခြုံတယ်လို့ ခံစားရစေတယ်။ (၁ ကော. ၁၄:၃၃) ယေဟောဝါဟာ မေတ္တာရှိတဲ့ သိုးထိန်းလို မိမိလူမျိုးကို လက်တွေ့ကျကျ ဂရုစိုက်ကြောင်း၊ ညင်ညင်သာသာ ပွေ့ပိုက်ပြီး ရန်သူ့လက်ကနေ ကာကွယ်ပေးကြောင်းလည်း ဖော်ပြတယ်။ ဒီစနစ်ဆုံးခန်းမှာ အသက်ရှင်နေရတဲ့ ကျွန်တော်တို့အတွက် အလွန်အားရှိစရာပါပဲ။—ပညာ. ၁:၃၃။
၁၆။ အစ္စရေးတွေကို ယေဟောဝါ ကယ်လွှတ်ပုံကို ပြန်သုံးသပ်ခြင်းကနေ ဘာအကျိုး ရနိုင်သလဲ။
၁၆ ဒီနေ့ခေတ်မှာလည်း ယေဟောဝါဟာ မိမိလူမျိုးတစ်မျိုးလုံးကို ဘုရားရေးရာပိုင်းရော ကာယပိုင်းပါ ဂရုစိုက်ဗျာ. ၇:၉၊ ၁၀) ဒါကြောင့် ကြီးစွာသောဒုက္ခအတွင်း လူကြီးဖြစ်စေ၊ လူငယ်ဖြစ်စေ၊ ကျန်းမာသန်စွမ်းသူဖြစ်စေ၊ မသန်စွမ်းသူဖြစ်စေ ဘုရားရဲ့လူမျိုးအားလုံး ထိတ်ထိတ်ပျာပျာဖြစ်မှာ မဟုတ်ဘူး။ * အဲဒီအစား “ခင်ဗျားတို့ကို ကယ်တင်မယ့်အချိန် ရောက်ခါနီးပြီဖြစ်လို့ မတ်မတ်ရပ်ပြီး ခေါင်းမော့ထားကြပါ” ဆိုတဲ့ ယေရှုခရစ်ရဲ့စကားကို အမှတ်ရနေကြပါလိမ့်မယ်။ (လု. ၂၁:၂၈) ရှေးခေတ် ဖာရောထက် ပိုတန်ခိုးကြီးပြီး နိုင်ငံပေါင်းစုံ ဖွဲ့စည်းထားတဲ့ ဂေါဂမင်းနဲ့ ရင်ဆိုင်ရချိန်မှာတောင် ယုံကြည်စိတ်ချမှု ရှိနေကြပါလိမ့်မယ်။ (ယေဇ. ၃၈:၂၊ ၁၄-၁၆) ယေဟောဝါ မပြောင်းလဲဘူးဆိုတာ သိထားကြလို့ပဲ။ ဘုရားသခင်ဟာ ဂရုစိုက်ပြီး စာနာတတ်တဲ့ ကယ်တင်ရှင်ဖြစ်ကြောင်း သက်သေထူပါဦးမယ်။—ဟေရှာ. ၂၆:၃၊ ၂၀။
စောင့်ရှောက်နေတယ်။ လာမယ့် ကြီးစွာသောဒုက္ခအတွင်းမှာလည်း ဆက်စောင့်ရှောက်ပေးပါလိမ့်မယ်။ (၁၇။ (က) မိမိလူမျိုးကို ယေဟောဝါ ဂရုစိုက်တဲ့ ကျမ်းစာမှတ်တမ်းတွေကနေ ဘာအကျိုး ရနိုင်သလဲ။ (ခ) နောက်ဆောင်းပါးမှာ ဘာအကြောင်း ဆွေးနွေးကြမလဲ။
၁၇ ဒီဆောင်းပါးမှာပါတဲ့ ပုံနမူနာတွေဟာ မိမိလူမျိုးကို ယေဟောဝါ စာနာစွာ ဂရုစိုက်၊ လမ်းညွှန်၊ ကယ်လွှတ်ကြောင်း ဖော်ပြတဲ့ နမူနာတချို့သာ ဖြစ်တယ်။ ဒီလိုမှတ်တမ်းတွေကို ဖတ်ရှုဆင်ခြင်တဲ့အခါ ယေဟောဝါရဲ့ အရည်အသွေးတွေနဲ့ပတ်သက်တဲ့ အသေးစိတ်အချက်တွေကို ဂရုပြုပါ။ ယေဟောဝါရဲ့ အရည်အသွေးကောင်းတွေကို ပိုသိလာတဲ့အခါ ဘုရားကို ပိုချစ်လာပြီး ယုံကြည်ခြင်း ပိုခိုင်မာလာပါလိမ့်မယ်။ မိသားစု၊ အသင်းတော်၊ အမှုဆောင်လုပ်ငန်းမှာ ယေဟောဝါရဲ့ စာနာမှုကို တုပနိုင်တဲ့နည်းတွေအကြောင်း နောက်ဆောင်းပါးမှာ ဆွေးနွေးပါမယ်။
^ အပိုဒ်၊ 3 အဲဒီအချိန်မှာ ရှမွေလ အသက် ၁၂ နှစ် ရှိပြီလို့ ဂျူးသမိုင်းပညာရှင် ဂျိုစီဖတ် ပြောတယ်။
^ အပိုဒ်၊ 16 အာမဂေဒုန်ကနေ လွတ်မြောက်သူတွေထဲမှာ မကျန်းမာသူ၊ မသန်စွမ်းသူတွေ ပါမယ်လို့ ကောက်ချက်ချနိုင်ပါတယ်။ ယေရှု မြေကြီးပေါ် ရှိတုန်း “ရောဂါဝေဒနာ အမျိုးမျိုးကို ကုသပေး” တာဟာ ထမြောက်လာသူတွေအတွက် မဟုတ်ဘဲ အာမဂေဒုန်ကနေ လွတ်မြောက်လာသူတွေအတွက် လုပ်ပေးမယ့်အရာကို ဖော်ပြတယ်။ (မ. ၉:၃၅) ထမြောက်လာသူတွေဟာ ကျန်းမာသန်စွမ်းတဲ့ ကိုယ်ခန္ဓာနဲ့ ထမြောက်လာကြပါလိမ့်မယ်။