၁-၃။ (က) ရှောလမုန်​ကို ယေဟောဝါ ဘာကြောင့် ချစ်​သလဲ။ ရှောလမုန် ဘယ်​ကောင်းချီးတွေ ရခဲ့​သလဲ။ (ခ) ဒီ​ဆောင်းပါး​မှာ ဘယ်​မေးခွန်းတွေ ဆွေးနွေးကြမလဲ။

ရှောလမုန်ဟာ လူငယ်​ဘဝမှာ အစ္စရေး​ဘုရင် ဖြစ်လာတယ်။ နန်းတက်စ​အချိန်မှာ အိပ်မက်​ထဲ ယေဟောဝါ ရောက်လာပြီး “မင်း လိုချင်တာ တောင်းပါ။ ငါ​ပေးမယ်” လို့ ပြောတယ်။ ရှောလမုန်က “ကျွန်တော်ဟာ အတွေ့အကြုံ​မရှိတဲ့ လူငယ်​တစ်ယောက်ပါ။ . . . လူမျိုးတော်ကို တရား​စီရင်​နိုင်ဖို့ . . . နာခံ​တတ်တဲ့​စိတ်နှလုံး ပေး​သနားပါ” ဆိုပြီး ပြန်​ဖြေတယ်။ (၁ ဘု. ၃:၅-၁၀) “နာခံ​တတ်တဲ့​စိတ်နှလုံး” တဲ့။ နှိမ့်ချတဲ့ တောင်းဆိုမှု​ပါပဲ။ ဒါကြောင့်လည်း ရှောလမုန်​ကို ယေဟောဝါ ချစ်တာ။ (၂ ရှ. ၁၂:၂၄) ရှောလမုန်ရဲ့ တောင်းဆိုမှုကို သဘောကျ​လို့ “ဉာဏ်ပညာ​ရှိပြီး သိ​နားလည်​နိုင်စွမ်း​ရှိတဲ့ စိတ်နှလုံး” ကို ပေးခဲ့တယ်။—၁ ဘု. ၃:၁၂။

^၂ ရှောလမုန်ဟာ သစ္စာရှိ​နေသရွေ့ ကောင်းချီး​များစွာ ခံစားခဲ့​ရတယ်။ “အစ္စရေး​တို့ရဲ့​ဘုရား ယေဟောဝါရဲ့ နာမည်​အတွက်” ဗိမာန်တော် ဆောက်ခွင့် ရခဲ့တယ်။ (၁ ဘု. ၈:၂၀) ဘုရားပေး ဉာဏ်ပညာ​ကြောင့် နာမည်ကြီး​လာတယ်။ စွမ်းအားတော်​လမ်းညွှန်မှုနဲ့ ပြောခဲ့တဲ့ သူ့​စကားတွေကို ကျမ်းသုံး​စောင်​မှာ မှတ်တမ်း​တင်ထားတယ်။ တစ်ကျမ်း​ကတော့ ပညာအလိမ္မာကျမ်း ဖြစ်တယ်။

^၃ ပညာ​အလိမ္မာ​ကျမ်းမှာ စိတ်နှလုံး​အကြောင်း အကြိမ် တစ်​ရာ​လောက် ဖော်ပြ​ထားတယ်။ ဥပမာ၊ ပညာအလိမ္မာ ၄:၂၃ မှာ “အရာအားလုံး​ထက် စိတ်နှလုံးကို ကာကွယ်​စောင့်ရှောက်ပါ” လို့ ပြော​ထားတယ်။ အဲဒီမှာ​ပါတဲ့ “စိတ်နှလုံး” ဆိုတာ ဘာကို ဆိုလိုသလဲ။ ဒီ​ဆောင်းပါး​မှာ အဖြေပေး​သွားပါမယ်။ စိတ်နှလုံး ယိုယွင်း​အောင် စာတန် ဘယ်လို ကြိုးစား​နေသလဲ။ စိတ်နှလုံးကို ဘယ်လို ကာကွယ်​ စောင့်ရှောက်​နိုင်သလဲ။ အဲဒီ​မေးခွန်း နှစ်ခု​ကိုလည်း ဆွေးနွေးပါမယ်။ ဒီ​မေးခွန်းတွေရဲ့ အဖြေကို နားလည်​မှ​သာ ဘုရားကို ဆက်သစ္စာ​ရှိနေ​နိုင်မယ်။

၄-၅။ (က) “စိတ်နှလုံး” ဆိုတဲ့ စကားလုံးကို နားလည်ဖို့ ဆာလံ ၅၁:၆ က ဘယ်လို ကူညီပေး​သလဲ။ (ခ) ကိုယ်ခန္ဓာ ကျန်းမာ​အောင် ဂရုစိုက်ခြင်းက စိတ်နှလုံး​ကိုလည်း ဂရုစိုက်​ဖို့ လို​ကြောင်း ဘယ်လို ဖော်ပြသလဲ။

^၄ ပညာအလိမ္မာ ၄:၂၃ မှာ သုံးထားတဲ့ “စိတ်နှလုံး” ဆိုတာ “စိတ်ရင်း” ကို ရည်ညွှန်းတယ်။ (ဆာလံ ၅၁:၆ ကိုဖတ်ပါ။) တစ်နည်းအားဖြင့် အတွေး၊ ခံစားချက်၊ ရည်ရွယ်ချက်၊ ဆန္ဒတွေကို ဆိုလိုတယ်။ အပြင်ပန်း​လောက်​သာ မဟုတ်ဘဲ အတွင်းစိတ် ဖြစ်တယ်။

^၅ ကိုယ်ခန္ဓာ ကျန်းမာ​အောင် ဂရုစိုက်ခြင်းက စိတ်နှလုံး​ကိုလည်း ဂရုစိုက်​ဖို့ လို​ကြောင်း ဘယ်လို ဖော်ပြသလဲ​ဆိုတာ သုံးသပ်​ကြည့်ပါ။ ပထမ၊ ကိုယ်ခန္ဓာ ကျန်းမာ​နေဖို့ အာဟာရ​ရှိတဲ့​အစာ စား​ပြီး လေ့ကျင့်ခန်း ပုံမှန်​လုပ်ရမယ်။ အဲဒီလိုပဲ ဘုရားရေးရာ​ဘက် ကျန်းမာ​နေဖို့ အာဟာရ​ရှိတဲ့ အချိန်တန်​အစာ စား​ရမယ်။ ဘုရားကို ယုံကြည်​ကြောင်း ဖော်ပြ​ရမယ်။ အဲဒီ​ထဲမှာ သိလာတာကို လက်တွေ့​ကျင့်သုံးခြင်း၊ တခြား​သူတွေကို ပြန်​ပြောပြ​ခြင်း ပါဝင်​တ​ယ်။ (ရော. ၁၀:၈-၁၀။ ယာ. ၂:၂၆) ဒုတိယ၊ အပြင်ပန်း​ကို ကြည့်ပြီး ကျန်းမာတယ်လို့ ထင်ရပေမဲ့ အတွင်းမှာ ရောဂါ​ဖြစ်​နေတာလည်း ရှိ​နိုင်တယ်။ အဲဒီလိုပဲ ဘုရားရေးရာ လုပ်ရိုးလုပ်စဉ်​တွေကို ကြည့်ပြီး ယုံကြည်ခြင်း ခိုင်မာ​နေတယ်လို့ ထင်ရပေမဲ့ အတွင်းစိတ်​မှာ မှားယွင်းတဲ့​ဆန္ဒတွေ ကြီးထွား​နေ​နိုင်တယ်။ (၁ ကော. ၁၀:၁၂။ ယာ. ၁:၁၄၊ ၁၅) စာတန်​က သူ့​အတွေးအခေါ်​အားဖြင့် ကျွန်တော်တို့ရဲ့ စိတ်​ကို ယိုယွင်း​စေချင်တယ်။ ဘယ်လို ယိုယွင်း​စေ​သလဲ။ ကိုယ့်ကိုယ်ကိုယ် ဘယ်လို ကာကွယ်​နိုင်မလဲ။

၆။ စာတန်ရဲ့ ပန်းတိုင်​က ဘာလဲ။ ဘယ်လို ကြိုးစား​နေသလဲ။

^၆ စာတန်​က ကျွန်တော်တို့ကို သူ့လို ဖြစ်စေချင်တယ်။ ယေဟောဝါရဲ့ စံနှုန်းတွေကို လျစ်လျူရှု​ပြီး တစ်ကိုယ်ကောင်းဆန်တဲ့​သူ ဖြစ်စေချင်တယ်။ ဒါပေမဲ့ အတင်း ဖိအားပေး​လို့​တော့ မရဘူး။ ဒါကြောင့် တခြား​နည်းတွေနဲ့ ကြိုးစားတယ်။ ဥပမာ၊ စာတန်​က မိမိ​ကြောင့် ပျက်စီး​နေတဲ့​သူတွေကို ကျွန်တော်တို့ ပတ်လည်မှာ ရှိနေ​စေတယ်။  (၁ ယော. ၅:၁၉) မကောင်းတဲ့ အပေါင်းအသင်း​က အတွေးအခေါ်နဲ့ လုပ်ရပ်​ကို “ပျက်စီး​စေ” မှန်း သိလျက်နဲ့ ကျွန်တော်တို့ ပေါင်းသင်း​မှာ​ပဲ​လို့ စာတန် မျှော်လင့်တယ်။ (၁ ကော. ၁၅:၃၃) ဘုရင် ရှောလမုန်​ကို အဲဒီနည်းနဲ့ စာတန် အောင်မြင်ခဲ့တယ်။ ရှောလမုန်ရဲ့ အယူမှား မိန်းမ​တွေ​က ယေဟောဝါ​ဆီကနေ “စိတ်​ယို​င်​သွား​အောင် လုပ်” ခဲ့ကြ​တယ်။—၁ ဘု. ၁၁:၃။

၇။ မိမိ​အတွေးအခေါ်​ကို ဘယ်နည်းတွေနဲ့ စာတန် ပျံ့နှံ့​စေ​သလဲ။ ကျွန်တော်တို့ ဘာကြောင့် သတိရှိ​ရမလဲ။

^၇ စာတန်ဟာ ရုပ်ရှင်၊ တီဗီ​အစီအစဉ်တွေ​က​တစ်ဆင့် မိမိ​အတွေးအခေါ်​ကို ပျံ့နှံ့​စေတယ်။ ပုံပြင်​ဇာတ်လမ်း​တွေ​က အပန်း​ပြေ​စေ​ရုံ​သာမက အတွေးအခေါ်၊ ခံစားချက်၊ လုပ်ရပ်​တို့ကို ပုံသွင်းပေး​ကြောင်း စာတန် သိတယ်။ အဲဒီ​သွန်သင်နည်း​ကို ယေရှု ကောင်းစွာ အသုံးပြုခဲ့တယ်။ ဥပမာ၊ ရှမာရိလူ၊ ဖြုန်းတီး​တဲ့​သား ပုံဥပမာ​တွေ ဖြစ်တယ်။ (မ. ၁၃:၃၄။ လု. ၁၀:၂၉-၃၇။ ၁၅:၁၁-၃၂) စာတန့်​အတွေးအခေါ် လွှမ်းမိုး​ခံရသူတွေ​က ပုံပြင်​ဇာတ်လမ်း​တွေ​က​တစ်ဆင့် ကျွန်တော်တို့ကို ပျက်စီး​စေတယ်။ ကျွန်တော်တို့ မျှတမှု​ရှိဖို့ လိုတယ်။ ရုပ်ရှင်၊ တီဗီ​အစီအစဉ်တွေ​က အတွေးအခေါ်​ကို မပျက်စီး​စေ​ဘဲ အ​ပန်း​ပြေ​စေနိုင်၊ ပညာပေး​နိုင်တယ်။ ဒါပေမဲ့ သတိရှိ​ရမယ်။ ဖျော်ဖြေမှု ရွေးချယ်​တဲ့အခါ ‘ဒီ​ရုပ်ရှင်၊ တီဗီ​အစီအစဉ်​က သွေးသား​ဆန္ဒ​ကို လိုက်လျော​တာ မှန်တယ်လို့ သင်ပေး​နေ​သလား’ ဆိုပြီး ကိုယ့်ကိုယ်ကိုယ် မေးပါ။ (ဂ​လ. ၅:၁၉-၂၁။ ဧ. ၂:၁-၃) စာတန့်​အတွေးအခေါ်​ကို အားပေးတဲ့ အစီအစဉ်​ဖြစ်မှန်း သိလိုက်ရ​င် ဘာလုပ်မလဲ။ ကူးစက်ရောဂါ​လို ဝေးဝေး​ရှောင်ပါ။

၈။ သားသမီးတွေရဲ့ စိတ်နှလုံးကို မိဘတွေ ဘယ်လို ကာကွယ်​ပေးနိုင်​သလဲ။

^၈ မိဘတို့၊ သားသမီးတွေရဲ့ စိတ်​ကို စာတန် မ​ယိုယွင်း​စေ​အောင် ကာကွယ်ဖို့ အထူး​တာဝန်​ရှိတယ်။ သားသမီးတွေကို ရောဂါ မကူးစက်အောင် အတတ်နိုင်ဆုံး ကာကွယ်ပေး​မှာ​ပဲ။ အိမ်ကို သန့်သန့်ရှင်းရှင်း​ထားပြီး ရောဂါ​ဖြစ်​စေမယ့် အရာတွေကို လွှင့်ပစ်​မှာ​ပဲ။ အဲဒီလိုပဲ စာတန့်​အတွေးအခေါ် ကူးစက်​စေနိုင်တဲ့ ရုပ်ရှင်၊ တီဗီ​အစီအစဉ်၊ အီလက်ထရောနစ်ဂိမ်း၊ ဝက်ဘ်ဆိုက်တွေကို မကြည့်မိအောင် သားသမီးတွေကို  ကာကွယ်ပေး​ရမယ်။ သားသမီးတွေ ဘုရားရေးရာ​ဘက် ကျန်းမာ​အောင် စောင့်ရှောက်​ပေးဖို့ သင်တို့ကို ယေဟောဝါ အခွင့်အာဏာ​ပေးထားတယ်။ (ပညာ. ၁:၈။ ဧ. ၆:၁၊ ၄) ဒါကြောင့် ကျမ်းစာ​စံနှုန်းတွေကို အခြေခံ​တဲ့ စည်းမျဉ်းတွေ ထုတ်​ဖို့ မစိုးရိမ်ပါနဲ့။ ဘာကို ကြည့်​လို့ ရတယ်၊ ဘာကို ကြည့်​လို့ မရဘူး​ဆိုတာ ပြောပြပြီး အကြောင်းရင်းကို နားလည်အောင် ရှင်းပြပါ။ (မ. ၅:၃၇) သားသမီးတွေ ကြီးလာ​တာ​နဲ့​အမျှ ယေဟောဝါရဲ့ စံနှုန်း​အတိုင်း အမှားအမှန် ခွဲခြားသိနိုင်​အောင် လေ့ကျင့်​ပေးပါ။ (ဟီ. ၅:၁၄) သင့်​အပြော​ထက် ပုံသက်သေကို ကြည့်ပြီး သူတို့ အများကြီး သင်ယူပါ​လိမ့်မယ်။—တရား. ၆:၆၊ ၇။ ရော. ၂:၂၁။

၉။ စာတန့်​အတွေးအခေါ် တစ်ခုက ဘာလဲ။ ဘာကြောင့် အန္တရာယ် ရှိသလဲ။

^၉ ယေဟောဝါရဲ့ အတွေးအခေါ်​ထက် လူ့ဉာဏ်ပညာ​ကို အားထား​စေခြင်း​အားဖြင့် ကျွန်တော်တို့ရဲ့ စိတ်နှလုံး ယိုယွင်း​အောင် စာတန် ကြိုးစား​နေတယ်။ (ကော. ၂:၈) ဘဝမှာ ချမ်းသာဖို့ အဓိက​ပဲ​ဆိုတဲ့ စာတန့်​အတွေးအခေါ်​ကို သုံးသပ်​ကြည့်ပါ။ အဲဒီလို အတွေးအခေါ်​မျိုး ရှိသူတွေဟာ ချမ်းသာ​လာနိုင်​သလို မ​ချမ်းသာ​တာ​လ​ည်း ဖြစ်နိုင်တယ်။ ဘာပဲ​ဖြစ်ဖြစ် အန္တရာယ် ရှိတယ်။ ဘာကြောင့်လဲ​ဆိုတော့ ငွေ​ရဖို့​ပဲ အဓိက​ထားပြီး ကျန်းမာရေး၊ မိသားစု၊ ဘုရားနဲ့ ရင်းနှီးတဲ့​ဆက်ဆံရေးကို​တောင် စတေး​လိုက်တဲ့​အထိ ဖြစ်လာ​နိုင်လို့ပဲ။ (၁ တိ. ၆:၁၀) ကောင်းကင်ဖခင်​က ငွေနဲ့​ပတ်သက်ပြီး မျှတတဲ့​အမြင် ရှိအောင် ကူညီပေး​လို့ ကျေးဇူးတင်စရာ​ပါပဲ။—ဒေ. ၇:၁၂။ လု. ၁၂:၁၅။

၁၀-၁၁။ (က) ကိုယ့်ကိုယ်ကိုယ် ကာကွယ်ဖို့ ဘာလုပ်ရမလဲ။ (ခ) ရှေးခေတ် ကင်းစောင့်​တွေ ဘာ​လုပ်သလဲ။ ကျွန်တော်တို့ရဲ့ အမှားအမှန်​သိစိတ်​က ကင်းစောင့်​လို ဘယ်လို လုပ်ဆောင်​သလဲ။

^၁၀ စိတ်နှလုံးကို ကာကွယ်​စောင့်ရှောက်​ရာ​မှာ အောင်မြင်​ဖို့​ဆိုရင် အန္တရာယ်ကို သိ​ပြီး ချက်ချင်း ကာကွယ်​တတ်​ရမယ်။ ပညာအလိမ္မာ ၄:၂၃ မှာ “ကာကွယ်​စောင့်ရှောက်” လို့ ပြန်ဆို​ထားတဲ့ မူရင်း​စကားလုံးက ကင်းစောင့်​ရဲ့ တာဝန်ကို သတိ​ရစေတယ်။ ဘုရင် ရှောလမုန်​ခေတ်မှာ ကင်းစောင့်တွေက မြို့ရိုး​ပေါ် ရပ်​ပြီး အန္တရာယ်​တွေ့​ရင် သတိပေး​ကြတယ်။ ဒါက စာတန်​ကြောင့် ကိုယ့်​အတွေးအခေါ် မပျက်စီး​အောင် ဘာလုပ်ဖို့ လို​ကြောင်း နားလည်​စေတယ်။

^၁၁ ရှေးခေတ် ကင်းစောင့်​တွေဟာ မြို့တံခါး​စောင့်​တွေ​နဲ့ ပူးပေါင်း​လုပ်ဆောင်​ကြတယ်။ (၂ ရှ. ၁၈:၂၄-၂၆) ရန်သူတွေ ချဉ်းကပ်​လာတဲ့အခါ မြို့တံခါး ပိတ်​ခြင်းအားဖြင့် မြို့ကို ကာကွယ်ပေး​ကြတယ်။ (နေ. ၇:၁-၃) စိတ်နှလုံး​ထဲ စာတန် ဝင်​ဖို့၊ တစ်နည်းအားဖြင့် အတွေးအခေါ်၊ ခံစားချက်၊ ရည်ရွယ်ချက်၊ ဆန္ဒတွေကို ဩဇာ​လွှမ်းမိုး​ဖို့ ကြိုးစားတဲ့​အခါ ကျမ်းစာနဲ့ လေ့ကျင့်​ထားတဲ့ အမှားအမှန်​သိစိတ်​က * ကင်းစောင့်​လို​ပဲ သတိ​ပေးတယ်။ အမှားအမှန်​သိစိတ် သတိပေး​တဲ့အခါ နားထောင်ပြီး စိတ်​တံခါး​ကို ပိတ်​လိုက်ရမယ်။

၁၂-၁၃။ ဘာလုပ်ဖို့ သွေးဆောင်​ခံရနိုင်​သလဲ။ ဘယ်လို တုံ့ပြန်​သင့်သလဲ။

^၁၂ စာတန့်​အတွေးအခေါ် လွှမ်းမိုး​မခံရအောင် ကာကွယ်​နိုင်ပုံ​အကြောင်း ဥပမာတစ်ခု သုံးသပ်​ကြည့်ပါ။ ‘လိင်​အကျင့်​ယိုယွင်းခြင်း၊ အမျိုးမျိုးသော ညစ်ညူးခြင်း​အကြောင်း​တွေကို စကားနဲ့​တောင် မပြော’ ဖို့ ယေဟောဝါ သင်ပေးတယ်။ (ဧ. ၅:၃) ဒါပေမဲ့ အလုပ်မှာ၊ ကျောင်းမှာ ရွယ်တူချင်းတွေက လိင်​အကျင့်​ယိုယွင်းခြင်း​အကြောင်း ပြောလာရင် ဘယ်လို လုပ်မလဲ။ “ဘုရားတရားမဲ့​တာ​တွေ၊ လောကရဲ့ မကောင်းတဲ့ အလိုဆန္ဒတွေကို ငြင်းပယ်” ရမယ် ဆိုတာ သိတယ်။ (တိ. ၂:၁၂) ကင်းစောင့်​လို​ပဲ သိစိတ်က သတိပေး​လာနိုင်တယ်။ (ရော. ၂:၁၅)  ကျွန်တော်တို့ နားထောင်ကြ​မလား။ ရွယ်တူချင်း​တွေ ပြော​နေတာကို နားထောင်ဖို့၊ သူတို့​ဖြန့်​တဲ့​ပုံ​တွေ ကြည့်ဖို့ သွေးဆောင်​ခံရ​နိုင်တယ်။ ဒါပေမဲ့ ဒီ​အချိန်ဟာ စကား​လမ်းကြောင်း ပြောင်းခြင်း၊ ရှောင်ထွက်​သွားခြင်း​အားဖြင့် စိတ်​တံခါး ပိတ်​ရမယ့်​အချိန် ဖြစ်တယ်။

^၁၃ ရွယ်တူချင်း​ဖိအား​ကို တွန်းလှန်ဖို့ သတ္တိ​လိုတယ်။ ကျွန်တော်တို့ရဲ့ ကြိုးစားမှု​ကို ယေဟောဝါ မြင်ပြီး စာတန့်​အတွေးအခေါ်​ကို တွန်းလှန်ဖို့ ခွန်အား​နဲ့ ဉာဏ်ပညာ ပေးမယ်​ဆိုတာ စိတ်ချ​နိုင်တယ်။ (၂ ရာ. ၁၆:၉။ ဟေရှာ. ၄၀:၂၉။ ယာ. ၁:၅) ဒါပေမဲ့ စိတ်နှလုံးကို ကာကွယ်ဖို့ ကိုယ့်​ဘက်က ဘာလုပ်ရမလဲ။

၁၄-၁၅။ (က) ဘာ​အတွက် စိတ်နှလုံးကို ဖွင့်​ရမလဲ။ ဘယ်လို ဖွင့်​နိုင်သလဲ။ (ခ) ကျမ်းစာ​ဖတ်ရှုခြင်းကနေ အကျိုး​အများဆုံး ရဖို့ ပညာအလိမ္မာ ၄:၂၀-၂၂ က ဘယ်လို ကူညီ​ပေးနိုင်​သလဲ။ (“ တွေးတော​ဆင်ခြင်​နိုင်ပုံ” လေးထောင့်ကွက်​ကို ကြည့်ပါ။)

^၁၄ စိတ်နှလုံးကို ကာကွယ်ဖို့ မကောင်းတဲ့​အရာတွေ မဝင်​အောင် ပိတ်​ထားပေမဲ့ ကောင်းတဲ့အရာ​တွေ​အတွက်တော့ ဖွင့်​ထားရမယ်။ မြို့ရိုး ဥပမာ​ကို ပြန်​စဉ်းစား​ကြည့်ပါ။ တံခါး​စောင့်​တွေ​က ရန်သူတွေ မဝင်နိုင်​အောင် မြို့တံခါး​ကို ပိတ်​ထားပေမဲ့ တခြား​အချိန်တွေမှာ​တော့ စားနပ်ရိက္ခာ​တွေ သွင်း​ဖို့ ဖွင့်ပေး​ရတယ်။ လုံးဝ မ​ဖွင့်​ရင် မြို့သား​တွေ အစာရေစာ ပြတ်​သွားနိုင်တယ်။ ကျွန်တော်တို့လည်း ဘုရား​အတွေးအခေါ်​ကို ခံယူဖို့ စိတ်နှလုံးကို ပုံမှန် ဖွင့်ပေး​ရမယ်။

^၁၅ ကျမ်းစာမှာ ယေဟောဝါရဲ့ အတွေးအခေါ်​တွေ ပါဝင်တဲ့​အတွက် ကျမ်းစာဖတ်​တိုင်း ကိုယ့်​အတွေးအခေါ်၊ ခံစားချက်​နဲ့ လုပ်ရပ်တွေ​အပေါ် ယေဟောဝါရဲ့ အတွေးအခေါ် လွှမ်းမိုးခွင့်​ပြု​တာ​ဖြစ်တယ်။ ကျမ်းစာ​ဖတ်ရှုခြင်းကနေ ဘယ်လို အကျိုး​အများဆုံး ရနိုင်သလဲ။ ဆုတောင်းခြင်း မရှိမဖြစ် လိုအပ်တယ်။ “ကျမ်းစာမှာ​ပါတဲ့ ‘အံ့ဖွယ်ရာတွေကို ရှင်းရှင်းလင်းလင်း မြင်နိုင်​အောင်’ ကူညီ​ပေးပါလို့ ကျမ်းစာ မဖတ်​ခင် ယေဟောဝါ​ဆီ ဆုတောင်းတယ်” ဆိုပြီး ညီအစ်မ​တစ်ယောက် ပြောတယ်။ (ဆာ. ၁၁၉:၁၈) ဖတ်​တဲ့​အရာကို တွေးတော​ဆင်ခြင်​ဖို့​လ​ည်း လိုတယ်။ ဆုတောင်း၊ ဖတ်ရှု၊ တွေးတော​ဆင်ခြင်တဲ့​အခါ ဘုရားသခင့် စကားတွေ “ရင်ထဲမှာ နက်နက်ရှိုင်းရှိုင်း စွဲမြဲ” ပြီး ယေဟောဝါရဲ့ အတွေးအခေါ်​ကို ချစ်မြတ်နိုး​လာတယ်။—ပညာအလိမ္မာ ၄:၂၀-၂၂ ကိုဖတ်ပါ။ ဆာ. ၁၁၉:၉၇။

၁၆။ JW ရုပ်သံ ကြည့်ရှုခြင်း​ကနေ ဘယ်လို အကျိုး​ခံစား နေရ​သလဲ။

^၁၆ ဘုရား​အတွေးအခေါ်​ကို ခံယူ​နိုင်တဲ့ နည်း​တစ်နည်း​ကတော့ JW ရုပ်သံ^® ကြည့်ရှုခြင်း​ပါပဲ။ “လစဉ် ရုပ်သံ​အစီအစဉ်တွေ​က ကျွန်တော်တို့ ဆုတောင်းချက်​တွေရဲ့ အဖြေ​ပဲ။ စိတ်ဓာတ်ကျ​တဲ့အခါ၊ အထီးကျန်တဲ့​အခါ အားရှိစေတယ်။ မူရင်း​သီချင်းတွေကို အိမ်မှာ အမြဲ​နားထောင်တယ်။ ချက်ပြုတ်​ချိန်၊ သန့်ရှင်းရေး လုပ်​ချိန်၊ လက်ဖက်ရည် သောက်​ချိန်​တွေ​မှာ ဖွင့်​ထားတယ်” လို့ မောင်နှံ​တစ်စုံ ပြောတယ်။ ဒီ​အစီအစဉ်တွေ​က ကျွန်တော်တို့ စိတ်နှလုံးကို ကာကွယ်ဖို့ ကူညီ​ပေးတယ်။ ယေဟောဝါ စဉ်းစား​သလို စဉ်းစား​တတ်ဖို့၊ စာတန့် အတွေးအခေါ်​ကို တွန်းလှန်ဖို့ သင်ပေးတယ်။

၁၇-၁၈။ (က) ၁ ဘုရင်များ ၈:၆၁ မှာ ပါတဲ့​အတိုင်း ယေဟောဝါရဲ့ ပညတ်​တွေကို လိုက်နာ​ရင် ဘာ​အကျိုး​ရမလဲ။ (ခ) ဘုရင် ဟေဇကိရဲ့ နမူနာ​ကနေ ဘာသင်ယူနိုင်သလဲ။ (ဂ) ဆာလံ ၁၃၉:၂၃၊ ၂၄ အရ ဒါဝိဒ်လို ကျွန်တော်တို့ ဘာတွေ ဆုတောင်း​နိုင်သလဲ။

^၁၇ မှန်ရာ​လုပ်ခြင်း​ရဲ့ အကျိုးကျေးဇူး​ကို မြင်ရ​လေ ယုံကြည်ခြင်း ပို​ခိုင်မာ​လာ​လေ​ပဲ။ (ယာ. ၁:၂၊ ၃) ဘုရားရဲ့ သားသမီးတွေ​အဖြစ် ယေဟောဝါ ဂုဏ်ယူ​နိုင်ပြီ​မို့ ကျွန်တော်တို့ ပျော်ရွှင်​ကြတယ်။ ဘုရား​နှစ်သက်မှု ရ​ချင်တဲ့​ဆန္ဒ ပို​ပြင်းပြ​လာတယ်။ (ပညာ. ၂၇:၁၁) စမ်းသပ်မှု​တိုင်း​က မေတ္တာရှင်​ဖခင်​ကို အကြွင်းမဲ့ ဆက်ကပ်​ထားကြောင်း ဖော်ပြခွင့် ရစေတယ်။ (ဆာ. ၁၁၉:၁၁၃) ယေဟောဝါကို စိတ်နှလုံး အကြွင်းမဲ့ ချစ်ကြောင်း၊ ပညတ်​တွေကို နာခံပြီး  အလိုတော်​ဆောင်ဖို့ ဆုံးဖြတ်​ထားကြောင်း သက်သေပြ​ကြတယ်။—၁ ဘုရင်များ ၈:၆၁ ကိုဖတ်ပါ။

^၁၈ ကျွန်တော်တို့ အမှား​တွေ လုပ်မိ​ကြ​ဦး​မလား။ မစုံလင်တဲ့​အတွက် လုပ်မိ​ကြ​ဦး​မှာပါ။ အမှား​လုပ်မိတဲ့​အခါ ဘုရင် ဟေဇကိရဲ့ ပုံနမူနာကို သတိရပါ။ သူ အမှား​တွေ လုပ်ခဲ့ပေမဲ့ နောင်တ​ယူပြီး ယေဟောဝါကို “စိတ်နှလုံး​အကြွင်းမဲ့” ပြန်​ဝတ်​ပြုခဲ့တယ်။ (ဟေရှာ. ၃၈:၃-၆။ ၂ ရာ. ၂၉:၁၊ ၂။ ၃၂:၂၅၊ ၂၆) ဒါကြောင့် ကျွန်တော်တို့လည်း စာတန့်​အတွေးအခေါ်​ကို တွန်းလှန်​ကြပါစို့။ “နာခံ​တတ်တဲ့ စိတ်နှလုံး” ရဖို့ ဆုတောင်းကြပါ​စို့။ (၁ ဘု. ၃:၉။ ဆာလံ ၁၃၉:၂၃၊ ၂၄ ကိုဖတ်ပါ။) ကျွန်တော်တို့ရဲ့ စိတ်နှလုံးကို ကာကွယ်​စောင့်ရှောက်​မ​ယ်​ဆိုရင် ယေဟောဝါကို ဆက်သစ္စာ​ရှိ​နိုင်​ပါလိမ့်မယ်။