၁။ ဒါဝိဒ် ဘယ်လို အခက်အခဲ​တွေ ကြုံ​ခဲ့​ရသလဲ။

ဒါဝိဒ်ဟာ အစ္စရေး​ဘုရင် ရှောလု လိုက်​သတ်​လို့ အသက်​လု​ပြေး​နေ​ရတယ်။ နောဗ​မြို့ကို ရောက်တော့ အစားအစာ လို​နေလို့ ပုရောဟိတ်​ဆီက မုန့်​ငါး​လုံး တောင်း​ခဲ့တယ်။ (၁ ရှ. ၂၁:၁၊ ၃) နောက်ပိုင်း၊ ဒါဝိဒ်​နဲ့ လူတွေ လိုဏ်ဂူ​တစ်ခု​မှာ ခိုလှုံ​ကြတယ်။ (၁ ရှ. ၂၂:၁) ဒါဝိဒ် ဘယ်လို​လုပ်ပြီး ဒီလို​ဘဝမျိုး ရောက်သွား​ရတာလဲ။

၂။ ကိုယ့်ကိုယ်ကိုယ် အန္တရာယ်​ရှိတဲ့ အခြေအနေ ရောက်​အောင် ရှောလု ဘာ​လုပ်သလဲ။ (၁ ရှမွေလ ၂၃:၁၆၊ ၁၇)

^၂ ဒါဝိဒ် နာမည်ကြီး​လာတာ၊ အောင်ပွဲ​တွေ ရလာ​တာ​ကို ရှောလု အကြီးအကျယ် မနာလို ဖြစ်တယ်။ ကိုယ်တိုင်​ရဲ့ မနာခံမှုကြောင့် အစ္စရေး​ ဘုရင်​အဖြစ်ကနေ ယေဟောဝါ ငြင်းပယ်​ပြီး ဒါဝိဒ်​ကို ထီးနန်း​ပေးဖို့ ရွေးချယ်​ထား​ကြောင်း​လည်း သိတယ်။ (၁ ရှမွေလ ၂၃:၁၆၊ ၁၇ ကို ဖတ်ပါ။) အစ္စရေး​ဘုရင် ဖြစ်လို့ ရှောလု​မှာ စစ်တပ်​နဲ့ ထောက်ခံသူ​များစွာ ရှိတယ်။ ဒါ​ကြောင့် ဒါဝိဒ် အသက်​လု ပြေး​ခဲ့​ရတာ။ ဒါဝိဒ်​ကို ထီးနန်း​အပ်​မယ်​ဆို​တဲ့ ဘုရား​ရည်ရွယ်ချက်ကို ဖျက်​နိုင်​မယ်လို့ ရှောလု တကယ် ထင်​နေ​သလား။ (ဟေရှာ. ၅၅:၁၁) ကျမ်းစာ​မှာ မပြော​ထား​ပေမဲ့ ကိုယ့်ကိုယ်ကိုယ် အန္တရာယ်​ရှိတဲ့ အခြေအနေ ရောက်​အောင် လုပ်​နေတာ​တော့ သေချာတယ်။ ဘုရား​ကို ဆန့်ကျင်​တိုက်ခိုက်သူ​တွေ အမြဲ ရှုံး​မှာပဲ။

၃။ ဒုက္ခ​ရောက်​နေပေမဲ့ ဒါဝိဒ် ဘယ်လို သဘောထား​ရှိသလဲ။

^၃ ဒါဝိဒ်ဟာ ရည်မှန်းချက် ကြီး​သူ မဟုတ်ဘူး။ အစ္စရေး​ဘုရင် ဖြစ်ဖို့ ကိုယ်တိုင် ရွေးချယ်​တာ မဟုတ်ဘဲ ယေဟောဝါ ရွေးချယ်​တာ။ (၁ ရှ. ၁၆:၁၊ ၁၂၊ ၁၃) ဒါဝိဒ်​ကို ရှောလု ရန်သူလို သဘောထား​လာတယ်။ ဒါပေမဲ့ ဒီလို အန္တရာယ် ​ကြုံ​ရလို့ ယေဟောဝါ​ ကို ဒါဝိဒ် အပြစ်မတင်​ဘူး။ မ​ဝ​ရေ​စာ စား​ပြီး လိုဏ်ဂူ​ထဲ ခိုအောင်း​ရလို့ မ​ညည်းညူ​ဘူး။ အဲဒီအစား လှပတဲ့ ချီးမွမ်း​သီချင်း​တောင် စပ်ဆို​ခဲ့​တာ ဒီ​လိုဏ်ဂူ​ထဲ ပုန်း​နေတုန်းမှာ ဖြစ်​နိုင်တယ်။ အဲဒီ​သီချင်း​ထဲမှာ ဒီ​ဆောင်းပါး​ရဲ့ အဓိက​ ကျမ်းချက်​ ဖြစ်​တဲ့ ‘ယေဟောဝါ​ကို ရှာ​တဲ့​သူတွေက ကောင်းမွန်​ရာ​တစ်ခု​မှ ချို့တဲ့​မှာ မဟုတ်ဘူး’ ဆို​တဲ့ စာသား​တွေ ပါဝင်တယ်။—ဆာ. ၃၄:၁၀။

၄။ ဘယ်​မေးခွန်းတွေ ဆွေးနွေး​ကြ​မလဲ။ ဘာကြောင့် အရေးကြီး​သလဲ။

^၄ ဒီနေ့လည်း ယေဟောဝါရဲ့ ကျေးကျွန်​များစွာ​ဟာ အစားအစာ ရှားပါး​တာ၊ တခြား အခြေခံ လိုအပ်ရာတွေ မရှိတာ​မျိုး ကြုံ​ရနိုင်တယ်။ * အထူးသဖြင့် ကပ်ရောဂါ​ကာလ​အတွင်းမှာ ဖြစ်တယ်။ “ကြီးစွာ​သော​ဒုက္ခ” နီး​လေ ပို​ခက်ခဲ​လေ ဖြစ်​လိမ့်မယ်။ (မ. ၂၄:၂၁) ဒါ​ကြောင့် မေးခွန်း​ လေးခု​ကို သုံးသပ်ကြည့်​ရအောင်။ ဘယ်လို​သဘော​နဲ့ ဒါဝိဒ်​မှာ ‘ကောင်းမွန်​ရာ​တစ်ခု​မှ မချို့တဲ့’ သလဲ။ ရောင့်ရဲတတ်​ဖို့ ဘာကြောင့် သင်ယူ​ရမလဲ။ ယေဟောဝါ ဂရုစိုက်​စောင့်ရှောက်​မယ်​ဆိုတာ ဘာကြောင့် ယုံကြည်​စိတ်ချ​နိုင်​သလဲ။ အနာဂတ်​အတွက် အခု​ကတည်းက ဘယ်လို အသင့်ပြင်​နိုင်​သလဲ။

၅-၆။ ယေဟောဝါရဲ့ ကျေးကျွန်​တွေ “ကောင်းမွန်​ရာ​တစ်ခု​မှ ချို့တဲ့​မှာ မဟုတ်ဘူး” လို့ ဒါဝိဒ် ပြော​တာ​ကို နားလည်​ဖို့ ဆာလံ ၂၃:၁-၆ က ဘယ်လို ကူညီ​ပေး​သလဲ။

^၅ ယေဟောဝါရဲ့ ကျေးကျွန်​တွေ “ကောင်းမွန်​ရာ​တစ်ခု​မှ ချို့တဲ့​မှာ မဟုတ်ဘူး” လို့ ဒါဝိဒ် ပြော​တာ ဘာကို ဆိုလို​သလဲ။ နားလည်​ဖို့ ဆာလံ ၂၃ မှာ ပါ​တဲ့ အလားတူ​ အသုံးအနှုန်း​ကို လေ့လာ​ကြည့်​ရအောင်။ (ဆာလံ ၂၃:၁-၆ ကို ဖတ်ပါ။) “ယေဟောဝါ​ဟာ ငါ့​သိုးထိန်း​ပါ။ လို​လေ​သေး​မရှိ ငါ​ပြည့်စုံ​နေတာ” ဆို​တဲ့ စကား​တွေ​နဲ့ ဆာလံ ၂၃ ကို ဒါဝိဒ် အစပြု​ထား​တယ်။ နောက်​အခန်းငယ်​တွေ​မှာ ယေဟောဝါ​ကို သိုးထိန်း​အဖြစ် လက်ခံ​လို့ ရလာတဲ့ ကောင်းချီး​တွေ​အကြောင်း ပြော​တယ်။ “ဖြောင့်မတ်ခြင်း​လမ်း​ထဲ” ယေဟောဝါ ဦးဆောင်​ခေါ်​သွားတယ်။ အခြေအနေ ကောင်း​နေချိန်မှာ​ရော ဒုက္ခ​ရောက်ချိန်​တွေ​မှာ​ပါ ဒါဝိဒ်​ကို သစ္စာရှိ​ရှိ ထောက်မ​ပေးတယ်။ ယေဟောဝါရဲ့ “စိမ်းစို​တဲ့ စားကျက်​တွေ” ထဲ နား​နေချိန်မှာ ဘာ​ဒုက္ခ​မှ မရှိကြောင်း ဒါဝိဒ် အသိအမှတ်ပြု​ တယ်။ “မှောင်မိုက်တဲ့ ချိုင့်ဝှမ်း​ထဲ လျှောက်​ရ” သလို စိတ်ဓာတ်ကျ​ချိန်​တွေ၊ ရန်သူ ဝိုင်း​နေချိန်​တွေ ရှိပေမဲ့ သိုးထိန်း​အဖြစ် ယေဟောဝါ အတူ​ရှိနေလို့ ဒါဝိဒ် “ဘာ​အန္တရာယ်​မှ မကြောက်​ဘူး။”

^၆ ဒါဆိုရင် ဘယ်လို​သဘော​နဲ့ ဒါဝိဒ်​မှာ ‘ကောင်းမွန်​ရာ​တစ်ခု​မှ မချို့တဲ့’ သလဲ။ အဖြေကတော့ ယေဟောဝါနဲ့ ရင်းနှီး​နေဖို့ လိုအပ်​တာ မှန်သမျှ ရရှိ​ထား​တယ် ဆိုတာပဲ။ ဒါဝိဒ်ရဲ့ ပျော်ရွှင်မှု​ဟာ ရုပ်ပစ္စည်း​ပေါ် မ​မူတည်​ဘူး။ ယေဟောဝါ ပြင်ဆင်​ပေး​သမျှ​နဲ့ ကျေနပ်​ရောင့်ရဲ​တယ်။ ဘုရား​ကောင်းချီး​နဲ့ ကာကွယ်​မှု​က​သာ ဒါဝိဒ်​အတွက် အရေးကြီးဆုံး ဖြစ်တယ်။

၇။ လုကာ ၂၁:၂၀-၂၄ အရ ယုဒပြည်​က ပထမ​ရာစု ခရစ်ယာန်​တွေ ဘယ်​ခက်ခဲ​တဲ့ အခြေအနေ ကြုံ​ရသလဲ။

^၇ ရုပ်ပစ္စည်း​တွေ​နဲ့​ပတ်သက်ပြီး သဘောထား​မှန် ရှိဖို့ အလွန်​ အရေးကြီးကြောင်း ဒါဝိဒ်ရဲ့ စကား​တွေ​ကနေ သိနိုင်တယ်။ ကိုယ့်​မှာ ရှိ​ထား​တာတွေကို ပျော်မွေ့​ခံစား​နိုင်​ပေမဲ့ အဲဒါတွေကို အဓိက မထားသင့်​ဘူး။ အဲဒီ​အမှန်တရားကို ယုဒပြည်မှာ နေတဲ့ ပထမ​ရာစု ခရစ်ယာန်​တွေ နားလည်​လာတယ်။ (လုကာ ၂၁:၂၀-၂၄ ကို ဖတ်ပါ။) ဂျေရုဆလင်​မြို့ကို “စစ်တပ်​ဝိုင်းရံ” မယ့်​အချိန် ရောက်လာ​မယ်လို့ ယေရှု သတိ​ပေးတယ်။ အဲဒီအခါ “တောင်ပေါ်​ကို ပြေး” ရမယ်။ ပြေး​မှ ကယ်တင်​ခံရ​မယ်။ ဒါပေမဲ့ တော်​တော်​တော့ စွန့်စား​ရမယ်။ လွန်ခဲ့တဲ့ နှစ်​အနည်းငယ်​တုန်း​က ကင်းမျှော်စင် * မှာ ဒီလို​ရေးတယ်– “သူတို့သည် လယ်ယာ​အိုးအိမ်​များ​ကို စွန့်ခဲ့​ကြ​ပြီး သူတို့​အိမ်ထဲ​ရှိ ပစ္စည်း​များ​ကို​ပင် မ​စုသိမ်း​ခဲ့​ကြ​ချေ။ ယေဟောဝါ​၏ ကာကွယ်​မှု​နှင့် ထောက်မ​ကူညီ​မှု​ကို ရမည်ဟု စိတ်ချ​ကာ အရေးကြီး​ဟန်​ရှိသည့် အရာ​မှန်သမျှ​ထက် ကိုယ်တော့်​ဝတ်ပြုရေးကို အဓိက​ထားခဲ့​ကြသည်။”

၈။ ယုဒပြည်​က ပထမ​ရာစု ခရစ်ယာန်​တွေ​ဆီကနေ ဘယ်​အရေးကြီး သင်ခန်းစာ သင်ယူ​နိုင်​သလဲ။

^၈ ယုဒပြည်​က ပထမ​ရာစု ခရစ်ယာန်​တွေ​ဆီကနေ ဘယ်​အရေးကြီး သင်ခန်းစာ သင်ယူ​နိုင်​သလဲ။ အထက်​စာပိုဒ်​မှာ ဖော်ပြ​တဲ့ ကင်းမျှော်စင် မှာ ဒီလို​ဆက်​ပြော​တယ်– “အနာဂတ်​တွင် ရုပ်ပစ္စည်း​များ​ကို ကျွန်ုပ်​တို့ ရှုမြင်ပုံ​နှင့်​ပတ်သက်​၍ စမ်းသပ်မှု ရှိ​နိုင်​ပေ​သည်။ ၎င်းတို့သည် သင့်အတွက် အရေးအပါဆုံး​အရာ ဖြစ်​သလော။ သို့​မဟုတ် ဘုရားသခင့်​ဘက် ရပ်တည်​ကြ​သူအား​လုံး ကယ်တင်ခြင်း​ ရဖို့ ပို​အရေးကြီး​သလော။ မှန်ပါသည်၊ ကျွန်ုပ်​တို့ ထွက်ပြေး​နေကြ​စဉ် အခက်အခဲ​များနှင့် ဆင်းရဲမှု​များ ကြုံတွေ့​ကြ​ရ​ပေမည်။ ယုဒပြည်​နယ်​မှ ယော်ဒန်​မြစ်ကို ဖြတ်၍ ပေရိယ​နယ်​သို့ ထွက်ပြေး​ခဲ့​ကြ​ရသည့် ပထမ​ရာစု​ရှိ ကျွန်ုပ်​တို့​နှင့် အခြေအနေ​တူ​သူများ​ကဲ့သို့ လိုအပ်သမျှ​ကို လုပ်ဆောင်ကြ​ရန် အသင့်ရှိနေ​ရ​ပါ​လိမ့်​မည်။”

၉။ ဟီဘရူး​ ခရစ်ယာန်​တွေ​ကို ပေး​တဲ့ တမန်တော် ပေါလု​ရဲ့ အကြံဉာဏ်​ကနေ ဘယ်​အားပေးမှု ရသလဲ။

^၉ ရှိသမျှ အကုန် ထားခဲ့​ပြီး နေရာ​သစ်​မှာ ဘဝကို ပြန်​စ​ဖို့ ဘယ်လောက် ခက်​မယ်​ဆိုတာ မြင်ယောင်​ကြည့်​ပါ။ အခြေခံ လိုအပ်ရာတွေ​အတွက် ယေဟောဝါ​ကို အားကိုး​ဖို့ ယုံကြည်ခြင်း လိုတယ်။ ဒါပေမဲ့ ကူ​ကယ်​ရာ​မဲ့​တော့ မဟုတ်ပါဘူး။ ဂျေရုဆလင်​ကို ရောမတွေ မ​ဝိုင်း​ခင် ငါး​နှစ်​အလိုမှာ ဟီဘရူး​ ခရစ်ယာန်​တွေ​ကို တမန်တော် ပေါလု ဒီလို​အကြံ​ပေးတယ်– “ခင်ဗျား​တို့​ရဲ့​ ဘဝမှာ ငွေ​တပ်မက်​တာ​ကို ရှောင်ပါ။ ရှိတာ​လေး​နဲ့ ရောင့်ရဲ​တင်းတိမ်​ပါ။ ‘မင်းတို့ကို ငါ ဘယ်တော့မှ ပစ်ထား​မှာ မဟုတ်ဘူး။ ဘယ်တော့မှ စွန့်ခွာ​မှာ မဟုတ်ဘူး’ လို့ ဘုရားသခင် ပြော​ထား​တာ​ပဲ။ ဒါ​ကြောင့် ‘ယေဟောဝါ​ဟာ ကူညီ​မစ​ရှင်​ ဖြစ်​တဲ့​အတွက် ငါ ဘာကိုမှ မကြောက်​ဘူး။ လူက ငါ့ကို ဘာလုပ်​နိုင်​မှာ​လဲ’ ဆိုပြီး ကျွန်တော်​တို့ ရဲရဲဝံ့ဝံ့ ပြော​နိုင်တယ်။” (ဟီ. ၁၃:၅၊ ၆) ပေါလု​ရဲ့ အဲဒီ​အကြံဉာဏ်​ကို နှလုံး​သွင်းထား​သူတွေဟာ နေရာ​သစ်​မှာ ရှိတာ​လေး​နဲ့ ရောင့်ရဲ​တင်းတိမ်​ဖို့၊ နေသားကျ​ဖို့ ပို​လွယ်တယ်။ အခြေခံ လိုအပ်ရာတွေကို ယေဟောဝါ ဖြည့်ဆည်း​ပေး​မယ်​ဆိုတာ စိတ်ချ​ကြတယ်။ အလားတူ စိတ်ချမှု​မျိုး ရှိနိုင်ဖို့ ပေါလု​ရဲ့ စကား​တွေ​က ကျွန်တော်တို့ကိုလည်း ကူညီ​ပေးတယ်။

၁၀။ ဘယ် “လျှို့ဝှက်ချက်” အကြောင်း ပေါလု ပြော​သလဲ။

^၁၀ တိမောသေ​ကိုလည်း ပေါလု အဲဒီလိုပဲ အကြံ​ပေးတယ်– “ဒါ​ကြောင့် စားစရာ၊ ဝတ်စရာ ရှိနေတယ်​ဆိုရင် ရှိတာ​လေး​နဲ့ ရောင့်ရဲ​နေ​ရမယ်။” အဲဒါ ကျွန်တော်​တို့​နဲ့​လည်း သက်ဆိုင်တယ်။ (၁ တိ. ၆:၈) စားကောင်း​သောက်​ဖွယ်​တွေ စား​တာ၊ အိမ်ကြီးအိမ်ကောင်း​နဲ့ နေတာ၊ အဝတ်အစား​သစ်​တွေ မကြာခဏ ဝယ်​တာ မှားတယ်လို့ ဆိုလို​သလား။ မဆိုလို​ပါ​ဘူး။ ကိုယ့်​မှာ ရှိ​ထား​တာ​နဲ့ ရောင့်ရဲ​သင့်တယ်လို့ ပေါလု ပြော​နေတာပါ။ (ဖိ. ၄:၁၂) အဲဒါ ပေါလု​ရဲ့ “လျှို့ဝှက်ချက်” ပဲ။ တန်ဖိုး​အရှိဆုံး ပိုင်ဆိုင်ရာ​ဟာ ကိုယ့်​မှာ ရှိ​ထား​တဲ့ ရုပ်ပစ္စည်း​တွေ မဟုတ်ဘူး။ ဘုရား​နဲ့ ဆက်ဆံ​ရေး​ကောင်း ရှိ​ခြင်း​ပဲ။—ဟဗ. ၃:၁၇၊ ၁၈။

၁၁။ အစ္စရေး​တွေ​ကို ပြော​တဲ့ မောရှေရဲ့ စကား​ကနေ ဘာ​သင်ယူ​နိုင်​သလဲ။

^၁၁ ကိုယ့်​မှာ လိုအပ်​နေတယ်လို့ ကိုယ်​ထင်တာ​နဲ့ ယေဟောဝါ ထင်တာ ကွာခြားမှု ရှိ​နိုင်တယ်။ တောကန္တာရ​မှာ နှစ်ပေါင်း ၄၀ လှည့်လည်​ပြီး​နောက် အစ္စရေး​တွေ​ကို မောရှေ ဘာ​ပြော​ကြောင်း စဉ်းစား​ကြည့်​ပါ– “မင်းတို့ရဲ့​ ဘုရား ယေဟောဝါ​က မင်းတို့​ လုပ်သမျှကို ကောင်းချီး​ပေး​ခဲ့ပြီ​ပဲ။ ဒီ​တောကန္တာရ​ကြီး​ထဲမှာ မင်းတို့ သွားလာ​နေတာကိုလည်း ဂရုတစိုက် ကြည့်​နေတယ်။ မင်းတို့ရဲ့​ ဘုရား ယေဟောဝါ​က ဒီ​အနှစ် ၄၀ လုံး အတူ​ရှိနေတဲ့​အတွက် မင်းတို့မှာ လို​လေ​သေး​မရှိ ပြည့်စုံ​ခဲ့ပြီ။” (တရား. ၂:၇) အဲဒီ​နှစ် ၄၀ အတွင်း အစ္စရေး​တွေ စားဖို့ ယေဟောဝါ မန္နမုန့် ချပေး​တယ်။ အီဂျစ်​ပြည်​ကနေ ထွက်​လာ​တုန်း​က ဝတ်​ခဲ့​တဲ့ အဝတ်အစား​တွေ​လည်း မ​ဟောင်းနွမ်း​ဘူး။ (တရား. ၈:၃၊ ၄) ဒီလောက်​လေး​ ပဲ​လားလို့ တချို့ တွေးမိ​နိုင်​ပေမဲ့ လို​တာ​မှန်သမျှ အစ္စရေး​တွေ ရ​ခဲ့တယ်​လို့ မောရှေ ပြန်​သတိ​ပေးတယ်။ ကျွန်တော်​တို့ ရောင့်ရဲတတ်​ဖို့ သင်ယူမယ်၊ ဘုရား​ ပြင်ဆင်​ပေး​တဲ့ အသေးအမွှား​လေး​တွေ​ကို​တောင် ကျေးဇူး​တင်​မယ်၊ ကောင်းချီး​အဖြစ် သဘော​ထားပြီး ကျေးဇူး​တင်​ချီးမွမ်း​မယ်​ဆိုရင် ယေဟောဝါ နှစ်သက်ပါ​လိမ့်မယ်။

၁၂။ ကိုယ့်ကိုယ်ကိုယ် မဟုတ်ဘဲ ယေဟောဝါ​ကို ဒါဝိဒ် ယုံကြည်​ကိုးစား​ကြောင်း ဘာက ပြသ​လဲ။

^၁၂ ယေဟောဝါ သစ္စာ​ရှိကြောင်း၊ မိမိကို ချစ်​မြတ်နိုးသူတွေ​ကို အလွန် ဂရုစိုက်​စောင့်ရှောက်​ကြောင်း ဒါဝိဒ် သိတယ်။ ဆာလံ ၃၄ ကို စပ်ဆို​ချိန်မှာ အသက်​အန္တရာယ် ကြုံနေ​ရပေမဲ့ “ပတ်လည်​မှာ ကောင်းကင်တမန် ခြံရံ​နေ” မှန်း ယုံကြည်ခြင်း မျက်စိ​နဲ့ မြင်တယ်။ (ဆာ. ၃၄:၇) ရန်သူကို အမြဲ စောင့်ကြည့်ဖို့ တပ်​ချထား​တဲ့ စစ်သားနဲ့ ယေဟောဝါရဲ့ ကောင်းကင်တမန်​ကို ဒါဝိဒ် ခိုင်းနှိုင်း​နေတာ ဖြစ်​နိုင်တယ်။ ကိုယ်တိုင် ခွန်အား​ကြီး​တဲ့ စစ်သား ဖြစ်​ပြီး ယေဟောဝါ​က​လည်း ဘုရင်​အဖြစ် ဘိသိက်ပေး​ထား​တယ်။ ဒါတောင် ကိုယ့်ရဲ့ လောက်​လွှဲ​ပစ်​နိုင်စွမ်း​ကို​ဖြစ်စေ၊ ဓား​ရေး ကျွမ်းကျင်​မှု​ကို​ဖြစ်စေ ဒါဝိဒ် အားမကိုးဘူး။ (၁ ရှ. ၁၆:၁၃။ ၂၄:၁၂) ဘုရား​ကို ယုံကြည်​ကိုးစား​တယ်။ ဘုရား​ကို ကြောက်ရွံ့​သူတွေကို ကောင်းကင်တမန် “ကယ်တင်” မယ်​ဆိုတာ စိတ်ချ​တယ်။ ဒီနေ့​ခေတ်​မှာ အံ့ဖွယ်​နည်းနဲ့ ကာကွယ်​မှု ရဖို့ ကျွန်တော်​တို့ မမျှော်လင့်​ဘူး။ ဒါပေမဲ့ ယေဟောဝါ​ကို ယုံကြည်​ကိုးစား​သူတွေရဲ့ ထာဝရ အနာဂတ်​ကို ဘာကမှ မဖျက်ဆီး​နိုင်​ကြောင်း ကျွန်တော်​တို့ စိတ်ချ​တယ်။

၁၃။ မာဂေါဂ​ပြည်​က ဂေါဂ​မင်း တိုက်ခိုက်​တဲ့​အခါ ကျွန်တော်​တို့ ဘာကြောင့် အကာအကွယ်မဲ့​ပုံ ပေါက်​နေ​မလဲ။ ကျွန်တော်​တို့ ဘာကြောင့် မကြောက်​သင့်သလဲ။ (မျက်နှာဖုံး​ပုံ​ကို ကြည့်​ပါ။)

^၁၃ မကြာခင် အနာဂတ်​မှာ ယေဟောဝါရဲ့ ကာကွယ်​နိုင်စွမ်း​အပေါ် ကျွန်တော်​တို့​ရဲ့ ယုံကြည်​ကိုးစားမှု စမ်းသပ်ခံ​ရပါလိမ့်မယ်။ နိုင်ငံ​ပေါင်း​စုံ စုပေါင်း​ထား​တဲ့ မာဂေါဂ​ပြည်​က ဂေါဂ​မင်း တိုက်ခိုက်​တဲ့​အခါ အသက်​အန္တရာယ် ကြုံ​ရနိုင်တယ်။ ဒါပေမဲ့ ယေဟောဝါ ကယ်တင်​နိုင်​ကြောင်း၊ ကယ်တင်​မှာ​ ဖြစ်​ကြောင်း ယုံကြည်​စိတ်ချ​ဖို့ လိုတယ်။ တိုင်းနိုင်ငံ​တွေ​အတွက်​တော့ ကျွန်တော်​တို့​ဟာ အကာအကွယ်မဲ့​ပုံ ပေါက်​နေ​နိုင်တယ်။ (ယေဇ. ၃၈:၁၀-၁၂) လက်နက် မရှိ၊ တိုက်ခိုက်​ရေး အတွေ့အကြုံ မရှိလို့ လွယ်လွယ်လေး​နဲ့ ဖျက်ဆီး​နိုင်​မယ်လို့ ထင်ကြ​လိမ့်မယ်။ ကျွန်တော်​တို့ ယုံကြည်ခြင်း မျက်စိ​နဲ့ မြင်​တာ​ကို သူတို့ မမြင်​ဘူး။ ကာကွယ်​ဖို့ အသင့်​အနေအထား​နဲ့ ဘုရား​လူမျိုး​ပတ်လည်​မှာ ခြံရံ​နေတဲ့ ကောင်းကင်တမန်​အုပ်စုကြီး​ပဲ။ ဒါကို တိုင်းနိုင်ငံ​တွေ ဘယ်လို မြင်နိုင်​မှာ​လဲ။ ဘုရား​ကို​မှ မယုံကြည်​ကြ​တာ။ ကျွန်တော်​တို့ကို ကောင်းကင်​စစ်တပ် လာ​ကူ​တဲ့​အခါ သူတို့ အကြီးအကျယ် အံ့ဩ​သွား​ကြ​ပါ​လိမ့်မယ်။—ဗျာ. ၁၉:၁၁၊ ၁၄၊ ၁၅။

၁၄။ အနာဂတ်​အတွက် အခု​ကတည်းက ဘယ်လို အသင့်ပြင်​နိုင်​သလဲ။

^၁၄ အနာဂတ်​အတွက် အခု​ကတည်းက ဘယ်လို အသင့်ပြင်​နိုင်​သလဲ။ ရုပ်ပစ္စည်း​တွေ​နဲ့​ပတ်သက်ပြီး သဘောထား​မှန် ရှိဖို့၊ ကိုယ့်​မှာ ရှိ​ထား​တာ​တွေ တစ်နေ့ ထားရစ်​ခဲ့​ရမယ်ဆိုတာ နားလည်​ထား​ဖို့၊ ရှိတာနဲ့ ရောင့်ရဲ​ဖို့ လိုတယ်။ ကိုယ်​ပျော်ရွှင်​ရတဲ့ အဓိက အကြောင်းရင်း​က ယေဟောဝါ​နဲ့ ဆက်ဆံ​ရေး​ကောင်း ရှိ​ထား​လို့​ပဲ ဖြစ်​သင့်တယ်။ ဘုရား​အကြောင်း ပို​သိ​လေ မာဂေါဂ​ပြည်​က ဂေါဂ​မင်း တိုက်ခိုက်​ချိန်မှာ ဘုရား ကာကွယ်​ပေး​နိုင်တယ်​ဆိုတာ ပို​ယုံကြည်​စိတ်ချ​လေ ဖြစ်ပါ​လိမ့်မယ်။

၁၅။ ယေဟောဝါ အမြဲ ကူညီ​ပေး​မယ်​ဆိုတာ ဘယ်​အတွေ့အကြုံ​တွေ​ကြောင့် ဒါဝိဒ် သိလာ​သလဲ။

^၁၅ ဒါဝိဒ်​ကို ကူညီ​ပေး​တဲ့​အရာ ရှိသေးတယ်။ အဲဒါက ကျွန်တော်တို့ကိုလည်း စမ်းသပ်မှု​တွေ​အတွက် အသင့်ပြင်​နိုင်အောင် ကူညီ​ပေး​လိမ့်မယ်။ “ယေဟောဝါ ဘယ်လောက် ကောင်းမြတ်​သလဲ​ဆိုတာ မြည်းစမ်း​ပြီး ကိုယ်တိုင်​ ခံစား​ကြည့်​ ပါ” လို့ ဒါဝိဒ် ပြော​တယ်။ (ဆာ. ၃၄:၈) ယေဟောဝါ​ကို အားကိုး​နိုင်တယ်​ဆိုတာ ဒါဝိဒ် သိကြောင်း အဲဒီ​စကား​တွေ​က ဖော်ပြ​တယ်။ ယေဟောဝါ​ကို ဒါဝိဒ် အကြိမ်ကြိမ် အားကိုး​တယ်။ ဘုရား​လည်း အမြဲ ကူညီ​ပေးတယ်။ လူငယ်​ဘဝ​တုန်း​က ဖိလိတိ လူထွားကြီး ဂေါလျတ်​ကို ထွက်​တိုက်​ချိန်မှာ “ဒီနေ့​ပဲ ယေဟောဝါ​ဘုရား​က ခင်ဗျား​ကို ကျွန်တော့်​လက်ထဲ အပ်​မယ်” လို့ ပြော​တယ်။ (၁ ရှ. ၁၇:၄၆) နောက်ပိုင်း၊ ဘုရင် ရှောလု​ဆီ အမှုထမ်း​ချိန် ဒါဝိဒ်​ကို သတ်​ဖို့ ရှောလု အကြိမ်ကြိမ် ကြိုးစား​တယ်။ ဒါပေမဲ့ ‘ဒါဝိဒ်​နဲ့​အတူ ယေဟောဝါ ရှိတယ်။’ (၁ ရှ. ၁၈:၁၂) အဲဒီလို ယေဟောဝါရဲ့ အကူအညီကို အရင်က ရရှိ​ဖူး​လို့ အခုလည်း ကူညီ​ပေး​မယ်​ဆိုတာ ဒါဝိဒ် စိတ်ချ​တယ်။

၁၆။ ယေဟောဝါ ကောင်းမြတ်​ကြောင်း ဘယ်လို လက်တွေ့ကျ​နည်းတွေနဲ့ “မြည်းစမ်း” နိုင်​သလဲ။

^၁၆ အခု​ကတည်းက ယေဟောဝါ​ကို ကျွန်တော်​တို့ အားကိုး​လေ အနာဂတ်​မှာ ကူညီ​ပေး​မယ်​ဆိုတာ ပို​စိတ်ချ​လေ ဖြစ်ပါ​လိမ့်မယ်။ အစည်းအဝေးကြီး​အတွက် အလုပ်ရှင်​ဆီ ခွင့်​တောင်း​ဖို့၊ အစည်းအဝေး အားလုံး တက်​နိုင်အောင်၊ အမှုဆောင်မှာ ပို​ပါဝင်​နိုင်အောင် အလုပ် အချိန်ဇယား ပြောင်း​ပေး​ပါ​လို့ တောင်းဆို​ဖို့ ယေဟောဝါ​ကို အားကိုး​စိတ်​နဲ့ ယုံကြည်ခြင်း ရှိဖို့ လိုတယ်။ ကိုယ်​တောင်းဆို​တာ​ကို အလုပ်ရှင် ငြင်း​လိုက်လို့ အလုပ်ပြုတ်​သွားတယ် ဆိုရင်ကော။ ကျွန်တော်​တို့ကို ယေဟောဝါ ဘယ်တော့မှ ပစ်ထား​မှာ၊ စွန့်ခွာ​မှာ မဟုတ်​ကြောင်း၊ အခြေခံ လိုအပ်ရာတွေကို အမြဲ ထောက်မ​ပေး​မှာ ဖြစ်​ကြောင်း ယုံကြည်​သလား။ (ဟီ. ၁၃:၅) အလိုအပ်ဆုံး အချိန်မှာ ယေဟောဝါ ကူညီ​ပေး​ကြောင်း အချိန်ပြည့်​လုပ်ငန်းမှာ ပါဝင်​နေ​သူများစွာ ကိုယ်တွေ့ ကြုံ​ခဲ့​ကြပြီ။ ယေဟောဝါ​ဘုရား သစ္စာ​ရှိတယ်။

၁၇။ ၂၀၂၂ အတွက် နှစ်ချုပ်​ကျမ်းချက်​က ဘာလဲ။ အဲဒီ​ကျမ်းချက်​ကို ရွေး​တာ ဘာကြောင့် သင့်တော်​သလဲ။

^၁၇ ကျွန်တော်​တို့​ဘက်မှာ ယေဟောဝါ​သာ ရှိနေရင် ရှေ့​မှာ ဘာတွေ​ပဲ ကြုံ​ရ​ပါစေ ကြောက်စရာ​အကြောင်း မရှိဘူး။ ဘဝမှာ နိုင်ငံတော်​ကို ဦးစားထား​နေသရွေ့ ဘုရား ဘယ်တော့မှ စွန့်ပစ်​မှာ မဟုတ်ဘူး။ ဒါ​ကြောင့် ရှေ့​မှာ ကြုံ​ရမယ့် အခက်အခဲ​တွေ​အတွက် အခု​ကတည်းက အသင့်ပြင်​ဆင်​ဖို့၊ ကျွန်တော်​တို့ကို ယေဟောဝါ ဘယ်တော့မှ ပစ်ထား​မှာ မဟုတ်​ကြောင်း ယုံကြည်​ကိုးစား​ဖို့ လိုတယ်။ အဲဒီ​အချက်​ကို သတိ​ပေးဖို့ ‘ယေဟောဝါ​ကို ရှာ​တဲ့​သူတွေက ကောင်းမွန်​ရာ​တစ်ခု​မှ ချို့တဲ့​မှာ မဟုတ်ဘူး’ ဆို​တဲ့ ဆာလံ ၃၄:၁၀ ကို ၂၀၂၂ အတွက် နှစ်ချုပ်​ကျမ်းချက်​အဖြစ် အုပ်ချုပ်ရေး​အဖွဲ့ ရွေးချယ်​ထား​တယ်။