လေ့လာရန် ဆောင်းပါး ၅
“ခရစ်တော်ရဲ့ ချစ်ခြင်းမေတ္တာက ကျွန်တော်တို့ကို တွန်းအားပေး”
‘ခရစ်တော်ရဲ့ ချစ်ခြင်းမေတ္တာက ကျွန်တော်တို့ကို တွန်းအားပေးတယ်။ ဒါကြောင့် အသက်ရှင်နေသူတွေဟာ ကိုယ့်အတွက် အသက်မရှင်သင့်တော့ဘူး။’—၂ ကော. ၅:၁၄၊ ၁၅။
သီချင်း ၁၃ စံနမူနာရှင် ခရစ်တော်
အကြိုသုံးသပ်ချက် a
၁-၂။ (က) ယေရှုရဲ့ ဘဝနဲ့ အမှုဆောင်လုပ်ငန်းအကြောင်း စဉ်းစားတဲ့အခါ ဘာခံစားရနိုင်သလဲ။ (ခ) ဒီဆောင်းပါးမှာ ဘာဆွေးနွေးကြမလဲ။
ချစ်ရသူတစ်ယောက် သေဆုံးသွားတဲ့အခါ ကျွန်တော်တို့ သတိရလွမ်းဆွတ်ကြတယ်။ ဝေဒနာ အကြီးအကျယ်ခံစားပြီးမှ သေဆုံးသွားတယ်ဆိုရင် အဲဒီအချိန်အကြောင်း ပြန်တွေးမိတိုင်း နာကျင်ခံစားရနိုင်တယ်။ ဒါပေမဲ့ အချိန်ကြာလာတာနဲ့အမျှ သူ သွန်သင်ပေးခဲ့တာ၊ ကိုယ့်ကို အားပေးဖို့၊ ကိုယ်ပျော်ဖို့ သူ လုပ်ခဲ့၊ ပြောခဲ့တာတွေကို စဉ်းစားမိတိုင်း ပြန်ပျော်ရွှင်လာနိုင်တယ်။
၂ အဲဒီလိုပဲ ယေရှု ဝေဒနာခံပြီး သေဆုံးတဲ့အကြောင်း ဖတ်တဲ့အခါ ဝမ်းနည်းရတယ်။ အထူးသဖြင့် အောက်မေ့ရာပွဲကာလမှာ ရွေးဖိုးပူဇော်သက္ကာရဲ့ တန်ဖိုးအကြောင်း အချိန်ယူ စဉ်းစားသုံးသပ်ကြတယ်။ (၁ ကော. ၁၁:၂၄၊ ၂၅) ဒါပေမဲ့ မြေကြီးပေါ် ယေရှု ပြောခဲ့၊ လုပ်ခဲ့တာ အားလုံးကို ပြန်စဉ်းစားလိုက်တဲ့အခါ ကျွန်တော်တို့ ဝမ်းသာရတယ်။ အခု ယေရှု ဘာလုပ်နေသလဲ၊ အနာဂတ်မှာ ကျွန်တော်တို့အတွက် ဘာလုပ်ပေးမလဲ ဆိုတာ တွေးတောတာကလည်း အားရှိစေတယ်။ အဲဒါတွေနဲ့ ယေရှုရဲ့ မေတ္တာကို တွေးတောတာက ကျေးဇူးတင်ကြောင်း လက်တွေ့ကျနည်းတွေနဲ့ ပြဖို့ လှုံ့ဆော်ပေးနိုင်တယ်။ အဲဒီအကြောင်း ဒီဆောင်းပါးမှာ ဆွေးနွေးကြပါမယ်။
ယေရှုနောက် ဆက်လိုက်ဖို့ ကျေးဇူးတင်စိတ်က လှုံ့ဆော်ပေး
၃။ ရွေးဖိုးအတွက် ဘာကြောင့် ကျေးဇူးတင်သင့်သလဲ။
၃ ယေရှုရဲ့ ဘဝနဲ့ သေခြင်းအကြောင်း စဉ်းစားတဲ့အခါ ကျွန်တော်တို့ ကျေးဇူးတင်ကြတယ်။ မြေကြီး အမှုဆောင်လုပ်ငန်းအတွင်း ဘုရားနိုင်ငံတော် ကောင်းချီးတွေ အကြောင်း ယေရှု သင်ပေးတယ်။ အဲဒီနိုင်ငံတော် အမှန်တရားတွေကို ကျွန်တော်တို့ သိပ်လေးမြတ်တယ်။ ရွေးဖိုးအတွက်လည်း ကျေးဇူးတင်တယ်။ ယေဟောဝါနဲ့ရော ယေရှုနဲ့ပါ ရင်းနှီးတဲ့ ဆက်ဆံရေး ရဖို့ လမ်းဖွင့်ပေးလို့ပဲ။ ယေရှုကို ယုံကြည်သက်ဝင်သူတွေဟာ ထာဝရအသက်အပြင် ချစ်ရတဲ့ သေဆုံးသူတွေနဲ့ ပြန်တွေ့ခွင့် မျှော်လင့်ချက် ရကြတယ်။ (ယော. ၅:၂၈၊ ၂၉။ ရော. ၆:၂၃) ဒီကောင်းချီးတွေနဲ့ ထိုက်တန်တာ ဘာတစ်ခုမှ ကျွန်တော်တို့ မလုပ်ခဲ့ဘူး။ ယေဟောဝါနဲ့ ခရစ်တော် လုပ်ပေးထားတာတွေအတွက်လည်း ဘယ်တော့မှ ကျေးဇူးဆပ်လို့ ကုန်မှာ မဟုတ်ဘူး။ (ရော. ၅:၈၊ ၂၀၊ ၂၁) ဒါပေမဲ့ ဘယ်လောက် ကျေးဇူးတင်တယ် ဆိုတာတော့ ပြနိုင်တယ်။ ဘယ်လိုနည်းနဲ့လဲ။
မာဂဒလ မာရိအကြောင်း စဉ်းစားတာက ကျေးဇူးတင်ကြောင်းပြဖို့ သင့်ကို ဘယ်လို လှုံ့ဆော်ပေးသလဲ (စာပိုဒ် ၄-၅ ကို ကြည့်ပါ)
၄။ ယေရှု လုပ်ပေးတာတွေအတွက် ကျေးဇူးတင်ကြောင်း မာဂဒလ မာရိ ဘယ်လို ပြသလဲ။ (ရုပ်ပုံကို ကြည့်ပါ။)
၄ ဂျူးအမျိုးသမီး မာဂဒလ မာရိအကြောင်း စဉ်းစားကြည့်ပါ။ နတ်ဆိုး ခုနစ်ကောင် ဝင်ပူးခံရလို့ တော်တော်ဝေဒနာ ခံစားနေရတယ်။ လွတ်လမ်း မရှိတော့ဘူးလို့ ခံစားခဲ့ရမှာပဲ။ ဒါကြောင့် နတ်ဆိုး နှောင့်ယှက်မှု ကင်းအောင် ယေရှု လုပ်ပေးတဲ့အခါ ဘယ်လောက် ကျေးဇူးတင်မလဲ စဉ်းစားကြည့်ပါ။ ကျေးဇူးတင်လွန်းလို့ ယေရှု နောက်လိုက် ဖြစ်လာတယ်။ အချိန်၊ ခွန်အား၊ ပစ္စည်းဥစ္စာတွေ သုံးပြီး အမှုဆောင်လုပ်ငန်းမှာ ယေရှုကို ထောက်မပေးတယ်။ (လု. ၈:၁-၃) နတ်ဆိုး နှင်ထုတ်ပေးလို့ မာရိ ကျေးဇူးတင်နေပေမဲ့ ဒီထက် ပိုကြီးမားတာကို ယေရှု လုပ်ပေးဦးမယ်ဆိုတာ မသိသေးဘူး။ လူအားလုံးအတွက် အသက်ပေးဦးမယ်။ “ယုံကြည်သက်ဝင်သူတိုင်း” ထာဝရအသက် ရနိုင်ဖို့ပါ။ (ယော. ၃:၁၆) ဒါတောင် ယေရှုကို သစ္စာစောင့်သိခြင်းအားဖြင့် ကျေးဇူးတင်ကြောင်း မာရိ ပြတယ်။ သစ်တိုင်မှာ ယေရှု ဝေဒနာခံစားနေတုန်း ယေရှုဘေးမှာ ရပ်ပေးတယ်။ ယေရှုနဲ့ တခြားသူတွေကို အားပေးနှစ်သိမ့်တယ်။ (ယော. ၁၉:၂၅) ယေရှု သေဆုံးပြီးနောက် သင်္ချိုင်းဂူကို မာရိနဲ့ တခြားအမျိုးသမီးနှစ်ယောက် အမွှေးနံ့သာတွေ ယူလာတယ်။ (မာ. ၁၆:၁၊ ၂) မာရိရဲ့ သစ္စာစောင့်သိမှု ဆုချခံရတယ်။ ရှင်ပြန်ထမြောက်လာတဲ့ ယေရှုနဲ့ တွေ့ခွင့်၊ စကားပြောခွင့် ရခဲ့တယ်။ တပည့်အများစုတောင် မရခဲ့တဲ့ အခွင့်ထူးပါပဲ။—ယော. ၂၀:၁၁-၁၈။
၅။ ယေဟောဝါနဲ့ ယေရှု လုပ်ပေးတာတွေအတွက် ကျေးဇူးတင်ကြောင်း ဘယ်လို ပြနိုင်သလဲ။
၅ ကျွန်တော်တို့လည်း ကိုယ့်အချိန်၊ ခွန်အား၊ ပစ္စည်းဥစ္စာတွေကို နိုင်ငံတော် အကျိုးစီးပွားအတွက် အသုံးပြုခြင်းအားဖြင့် ယေဟောဝါနဲ့ ယေရှု လုပ်ပေးတာတွေအတွက် ကျေးဇူးတင်ကြောင်း ပြနိုင်တယ်။ ဥပမာ၊ ဝတ်ပြုရေးအတွက် သုံးတဲ့ အဆောက်အအုံတွေ ဆောက်လုပ်ရေး၊ ပြုပြင်ထိန်းသိမ်းရေးမှာ ကူညီပေးနိုင်တယ်။
ယေဟောဝါနဲ့ ယေရှုကို ချစ်တဲ့မေတ္တာက တခြားသူတွေကို ချစ်ဖို့ လှုံ့ဆော်ပေး
၆။ ရွေးဖိုးက ကျွန်တော်တို့ တစ်ယောက်စီအတွက် သတ်သတ်မှတ်မှတ်ပေးတဲ့ လက်ဆောင်ဖြစ်တယ်လို့ ဘာကြောင့် ပြောနိုင်သလဲ။
၆ ကျွန်တော်တို့ကို ယေဟောဝါနဲ့ ယေရှု ဘယ်လောက် ချစ်တယ်ဆိုတာ စဉ်းစားလိုက်တဲ့အခါ သူတို့ကို ပြန်ချစ်ဖို့ လှုံ့ဆော်ခံရတယ်။ (၁ ယော. ၄:၁၀၊ ၁၉) ကိုယ့်အတွက် ယေရှု အသေခံသွားတယ်ဆိုတာ သိရတဲ့အခါ ပိုတောင် ချစ်လာတယ်။ ဒါကို တမန်တော် ပေါလု အသိအမှတ်ပြုပြီး ကျေးဇူးတင်ကြောင်း ပြောတယ်။ “ကျွန်တော့်ကိုချစ်ပြီး ကျွန်တော့်အတွက် အသက်စွန့်ခဲ့တဲ့ ဘုရားသခင့်သားတော်” လို့ ဂလာတိမြို့က ခရစ်ယာန်တွေဆီ ရေးခဲ့တယ်။ (ဂလ. ၂:၂၀) မိမိနဲ့ မိတ်ဆွေ ဖြစ်ဖို့ သင့်ကို ယေဟောဝါ ဆွဲဆောင်နိုင်တာဟာ ရွေးဖိုးကြောင့်ပါ။ (ယော. ၆:၄၄) သင့်စိတ်ထဲက ကောင်းတာတစ်ခုခုကို ယေဟောဝါ တွေ့မှန်း၊ မိတ်ဆွေ ဖြစ်နိုင်ဖို့ အကြီးမားဆုံး တန်ဖိုး ပေးဆက်ခဲ့မှန်း သိရလို့ အားရှိတယ် မဟုတ်လား။ ယေဟောဝါနဲ့ ယေရှုကို ပိုချစ်လာတယ် မဟုတ်လား။ ‘အဲဒီမေတ္တာက ဘာလုပ်ဖို့ ငါ့ကို တွန်းအားပေးသလဲ’ ဆိုပြီး ကိုယ့်ကိုယ်ကိုယ် မေးကြည့်ပါ။
ဘုရားနဲ့ ခရစ်တော်ကို ချစ်တဲ့မေတ္တာက လူအမျိုးမျိုးကို နိုင်ငံတော်သတင်း ဝေမျှဖို့ လှုံ့ဆော်ပေး (စာပိုဒ် ၇ ကို ကြည့်ပါ)
၇။ ရုပ်ပုံမှာ တွေ့ရတဲ့အတိုင်း ယေဟောဝါနဲ့ ယေရှုကို ချစ်ကြောင်း ကျွန်တော်တို့ ယောက်တိုင်း ဘယ်လို ပြနိုင်သလဲ။ (၂ ကောရိန္သု ၅:၁၄၊ ၁၅။ ၆:၁၊ ၂)
၇ ယေဟောဝါနဲ့ ယေရှုကို ချစ်တဲ့မေတ္တာက တခြားသူတွေကို ချစ်ဖို့ လှုံ့ဆော်ပေးတယ်။ (၂ ကောရိန္သု ၅:၁၄၊ ၁၅။ ၆:၁၊ ၂ ကို ဖတ်ပါ။) ချစ်ကြောင်း ပြနိုင်တဲ့ တစ်နည်းကတော့ ဟောပြောခြင်းလုပ်ငန်းမှာ ထက်ထက်သန်သန် ပါဝင်ခြင်းပါပဲ။ ဆုံတွေ့ရသူတိုင်းကို ကျွန်တော်တို့ သတင်းကောင်း ဟောကြတယ်။ လူမျိုး၊ နောက်ခံ၊ ငွေကြေး အခြေအနေ ဘယ်လိုပဲရှိရှိ ခွဲခြားမဆက်ဆံဘူး။ ဒီနည်းအားဖြင့် “လူအမျိုးမျိုးကို ကယ်တင်ခြင်း ရစေဖို့၊ အမှန်တရားအကြောင်း တိကျမှန်ကန်စွာ သိရှိစေဖို့” ဆိုတဲ့ ယေဟောဝါရဲ့ ရည်ရွယ်ချက်နဲ့အညီ လုပ်ဆောင်နေကြတယ်။—၁ တိ. ၂:၄။
၈။ ညီအစ်ကို/မတွေကို ဘယ်လို မေတ္တာပြနိုင်သလဲ။
၈ ညီအစ်ကို/မတွေကို ချစ်ကြောင်း ပြခြင်းအားဖြင့်လည်း ယေဟောဝါနဲ့ ယေရှုကို ချစ်တယ်ဆိုတာ ပြကြတယ်။ (၁ ယော. ၄:၂၁) ညီအစ်ကို/မတွေကို ကျွန်တော်တို့ စိတ်ဝင်စားတယ်။ ဒုက္ခရောက်ချိန်မှာ ကူညီပေးတယ်။ ချစ်ရသူ သေဆုံးတဲ့အခါ နှစ်သိမ့်ပေးတယ်။ နေမကောင်းဖြစ်တဲ့အခါ သွားလည်ကြတယ်။ စိတ်ဓာတ်ကျတဲ့အခါ အတတ်နိုင်ဆုံး အားပေးကြတယ်။ (၂ ကော. ၁:၃-၇။ ၁ သက်. ၅:၁၁၊ ၁၄) “ဖြောင့်မတ်သူရဲ့ တိုးလျှိုးအသနားခံချက်ဟာ အစွမ်းထက်ပြီး အကျိုးသက်ရောက်မှု ရှိ” မှန်း သိလို့ သူတို့အတွက် ဆုတောင်းပေးကြတယ်။—ယာ. ၅:၁၆။
၉။ ညီအစ်ကို/မတွေကို ချစ်ကြောင်း ပြနိုင်တဲ့ နောက်တစ်နည်းက ဘာလဲ။
၉ ညီအစ်ကို/မတွေနဲ့ သင့်သင့်မြတ်မြတ်ရှိအောင် ကြိုးစားခြင်းအားဖြင့်လည်း မေတ္တာပြကြတယ်။ ယေဟောဝါရဲ့ ခွင့်လွှတ်မှု ပုံသက်သေကို ကျွန်တော်တို့ ကြိုးစားတုပကြတယ်။ ကျွန်တော်တို့ရဲ့ အပြစ်တွေအတွက် အသေခံဖို့ သားတော်ကို ယေဟောဝါ လိုလိုလားလား စေလွှတ်တယ်ဆိုရင် ကိုယ့်ကို ပြစ်မှားမိတဲ့ ညီအစ်ကို/မတွေကို ပိုလို့တောင် ခွင့်လွှတ်သင့်တယ် မဟုတ်လား။ ယေရှုရဲ့ ပုံဥပမာထဲက ကျွန်ဆိုးလို ကျွန်တော်တို့ မဖြစ်ချင်ကြဘူး။ သူ့အကြွေး အများကြီးကို ဘုရင် လျှော်ပေးလိုက်တာတောင် အချင်းချင်းရဲ့ မဖြစ်စလောက် အကြွေးကိုတော့ မလျှော်ပေးဘူး။ (မ. ၁၈:၂၃-၃၅) အသင်းတော်ထဲက တစ်ယောက်ယောက်နဲ့ နားလည်မှု လွဲနေတယ်ဆိုရင် သတိရအောက်မေ့ပွဲ မတိုင်ခင် သူနဲ့ သင့်မြတ်အောင် ကိုယ့်ဘက်က အစပြု ကြိုးစားနိုင်မလား။ (မ. ၅:၂၃၊ ၂၄) ဒါက ယေဟောဝါနဲ့ ယေရှုကို နှစ်နှစ်ကာကာ ချစ်ကြောင်း ပြရာ ရောက်တယ်။
၁၀-၁၁။ ယေဟောဝါနဲ့ ယေရှုကို ချစ်ကြောင်း အကြီးအကဲတွေ ဘယ်လို ပြနိုင်သလဲ။ (၁ ပေတရု ၅:၁၊ ၂)
၁၀ ယေဟောဝါနဲ့ ယေရှုကို ချစ်ကြောင်း အကြီးအကဲတွေ ဘယ်လို ပြနိုင်သလဲ။ အရေးကြီးတဲ့ တစ်နည်းကတော့ ယေရှုသိုးတွေရဲ့ လိုအပ်ရာတွေကို ဖြည့်ဆည်းပေးခြင်းပါပဲ။ (၁ ပေတရု ၅:၁၊ ၂ ကို ဖတ်ပါ။) အဲဒီအကြောင်း တမန်တော် ပေတရုကို ယေရှု ရှင်းရှင်းလင်းလင်း ပြောတယ်။ ယေရှုကို ပေတရု သုံးကြိမ် ငြင်းပြီးနောက် ချစ်ကြောင်း ပြချင်စိတ် ပြင်းပြနေမှာပဲ။ ယေရှု ထမြောက်ပြီးနောက် “ယောဟန်ရဲ့သား ရှိမုန်၊ ကျွန်တော့်ကို ချစ်သလား” လို့ ပေတရုကို မေးတယ်။ သခင့်ကို ချစ်ကြောင်း ပြဖို့ ပေတရု ဘာမဆို လုပ်ပေးချင်နေမှာပဲ။ “ကျွန်တော့် သိုးကလေးတွေကို ထိန်းပါ” လို့ ယေရှု ပြောတယ်။ (ယော. ၂၁:၁၅-၁၇) ကျန်ဘဝတစ်လျှောက်လုံး ယေရှုရဲ့ သိုးတွေကို ပေတရု ဂရုစိုက်စောင့်ရှောက်ပေးတယ်။ ဒီနည်းအားဖြင့် ယေရှုကို ချစ်ကြောင်း ပြခဲ့တယ်။
၁၁ အကြီးအကဲတို့၊ ပေတရုကို ပြောတဲ့ ယေရှုရဲ့ စကားတွေ သင့်အတွက်လည်း အရေးပါကြောင်း အောက်မေ့ရာပွဲကာလမှာ ဘယ်လို ပြနိုင်သလဲ။ သိုးထိန်းလည်ပတ်မှု ပုံမှန် လုပ်ခြင်း၊ မလှုပ်မရှား ဖြစ်နေသူတွေ ယေဟောဝါဆီ ပြန်လာနိုင်အောင် အထူး ကြိုးစားကူညီပေးခြင်းအားဖြင့် ယေဟောဝါနဲ့ ယေရှုကို ဘယ်လောက် ချစ်ကြောင်း ပြနိုင်တယ်။ (ယေဇ. ၃၄:၁၁၊ ၁၂) အောက်မေ့ရာပွဲ လာတက်တဲ့ ကျမ်းစာသင်သားတွေ၊ လူသစ်တွေကိုလည်း စိတ်ဝင်စားမှု ပြနိုင်တယ်။ တပည့်ဖြစ်လာမယ့် အဲဒီလူတွေ ကြိုဆိုခံရတယ်လို့ ခံစားရအောင် အတတ်နိုင်ဆုံး ကူညီပေးပါ။
ခရစ်တော်ကို ချစ်တဲ့ မေတ္တာက သတ္တိရှိဖို့ လှုံ့ဆော်ပေး
၁၂။ မသေဆုံးခင်ညမှာ ယေရှုပြောတဲ့ စကားတွေကို စဉ်းစားတာက ဘာကြောင့် သတ္တိရှိစေသလဲ။ (ယောဟန် ၁၆:၃၂၊ ၃၃)
၁၂ ယေရှု မသေဆုံးခင်ညမှာ တပည့်တွေကို “ဒီလောကမှာ ခင်ဗျားတို့ ဆင်းရဲဒုက္ခခံရလိမ့်မယ်။ ဒါပေမဲ့ သတ္တိရှိကြပါ။ ဒီလောကကို ကျွန်တော် အောင်နိုင်ပြီ” လို့ ပြောတယ်။ (ယောဟန် ၁၆:၃၂၊ ၃၃ ကို ဖတ်ပါ။) ရန်သူတွေကို သတ္တိရှိရှိ ရင်ဆိုင်ဖို့၊ သေတဲ့အထိ သစ္စာရှိဖို့ ယေရှုကို ဘာက ကူညီပေးသလဲ။ ယေဟောဝါကို ယေရှု အားကိုးတယ်။ နောက်လိုက်တွေလည်း ဒီလိုအခက်အခဲတွေ ကြုံရမယ်ဆိုတာ သိလို့ ကာကွယ်စောင့်ရှောက်ပေးဖို့ ယေဟောဝါဆီ ဆုတောင်းပေးတယ်။ (ယော. ၁၇:၁၁) ဒီအချက်က ကျွန်တော်တို့ကို ဘာကြောင့် သတ္တိရှိစေသလဲ။ ရန်သူတွေအားလုံးထက် ယေဟောဝါ ပိုတန်ခိုးရှိလို့ပါ။ (၁ ယော. ၄:၄) ယေဟောဝါ မမြင်တာ ဘာမှမရှိဘူး။ ဒါကြောင့် ယေဟောဝါကို အားကိုးမယ်ဆိုရင် ကြောက်ရွံ့မှုတွေကို သတ္တိရှိရှိ ကျော်ဖြတ်နိုင်အောင် ကူညီပေးမယ်ဆိုတာ စိတ်ချနိုင်တယ်။
၁၃။ အရိမသဲမြို့သား ယောသပ် သတ္တိရှိကြောင်း ဘယ်လို ပြခဲ့သလဲ။
၁၃ အရိမသဲမြို့သား ယောသပ်အကြောင်း စဉ်းစားကြည့်ပါ။ ဂျူးအသိုင်းအဝိုင်းမှာ အထင်ကရ ပုဂ္ဂိုလ် ဖြစ်တယ်။ ဂျူးတရားရုံးချုပ် အဖွဲ့ဝင် ဖြစ်တယ်။ ဒါပေမဲ့ ယေရှုရဲ့ မြေကြီး အမှုဆောင်လုပ်ငန်းအတွင်း သတ္တိ မရှိဘူး။ “ဂျူးတွေကိုကြောက်လို့ ယေရှုရဲ့တပည့်ဖြစ်မှန်း လူသိမခံရဲတဲ့သူ” ဖြစ်တယ်လို့ ယောဟန် ပြောတယ်။ (ယော. ၁၉:၃၈) နိုင်ငံတော်သတင်းကို စိတ်ဝင်စားပေမဲ့ ယေရှုကို ယုံကြည်တယ်ဆိုတာ လူသိမခံရဲဘူး။ ကိုယ့်အသိုင်းအဝိုင်းမှာ ဂုဏ်အသရေရှိ အနေအထား ဆုံးရှုံးသွားမှာ ကြောက်နေပုံရတယ်။ ဘာပဲဖြစ်ပါစေ ယေရှု သေဆုံးပြီးနောက်မှာတော့ “ပိလတ်မင်းကို အရဲစွန့် ဝင်တွေ့ပြီး ယေရှုအလောင်းကို တောင်းတယ်။” (မာ. ၁၅:၄၂၊ ၄၃) ယေရှုရဲ့ တိတ်တိတ်ပုန်းတပည့် မဟုတ်တော့ဘူး။
၁၄။ လူကြောက်စိတ်ကို တိုက်လှန်နေရတယ်ဆိုရင် ဘာလုပ်သင့်သလဲ။
၁၄ ယောသပ်လိုပဲ သင်လည်း လူကြောက်တတ်သူလား။ ကျောင်းမှာ၊ အလုပ်မှာ ကိုယ့်ကိုယ်ကိုယ် ယေဟောဝါသက်သေလို့ ပြောဖို့ ကြောက်နေသလား။ တခြားသူတွေ ဘယ်လို ထင်မလဲဆိုတာ စိုးရိမ်ပြီး ကြေညာသူ လုပ်ဖို့၊ နှစ်ခြင်းခံဖို့ ရွှေ့ဆိုင်းနေသလား။ အဲဒီလို ခံစားချက်တွေကြောင့် မှန်ရာ မလုပ်ဘဲ မနေပါနဲ့။ ယေဟောဝါဆီ ထက်ထက်သန်သန် ဆုတောင်းပါ။ ဘုရားအလိုတော်အတိုင်း လုပ်ဆောင်နိုင်တဲ့ သတ္တိ ပေးဖို့ ဆုတောင်းပါ။ သင့်ဆုတောင်းချက်တွေကို ယေဟောဝါ ဘယ်လို အဖြေပေးတယ်ဆိုတာ မြင်လာတဲ့အခါ ပိုခိုင်ခံ့ပြီး သတ္တိရှိလာပါလိမ့်မယ်။—ဟေရှာ. ၄၁:၁၀၊ ၁၃။
ယေဟောဝါကို မပြတ် ဝတ်ပြုဖို့ ဝမ်းမြောက်မှုက လှုံ့ဆော်ပေး
၁၅။ တပည့်တွေရှေ့ ယေရှု ကိုယ်ထင်ပြပြီးနောက် သူတို့ရဲ့ ဝမ်းသာမှုက ဘာလုပ်ဖို့ လှုံ့ဆော်ပေးသလဲ။ (လုကာ ၂၄:၅၂၊ ၅၃)
၁၅ ယေရှု သေဆုံးတော့ တပည့်တွေ သိပ်ဝမ်းနည်းကြတယ်။ သူတို့နေရာမှာ ဝင်ခံစားကြည့်ပါ။ သိပ်ချစ်ရတဲ့ မိတ်ဆွေ ဆုံးရှုံးရရုံသာမက မျှော်လင့်ချက်မဲ့ပြီလို့လည်း သူတို့ ခံစားနေရတယ်။ (လု. ၂၄:၁၇-၂၁) ဒါပေမဲ့ သူတို့ကို ယေရှု ကိုယ်ထင်ပြပြီး ကျမ်းစာပရောဖက်ပြုချက် ပြည့်စုံရေးမှာ မိမိရဲ့ အခန်းကဏ္ဍကို နားလည်အောင် အချိန်ယူ ကူညီပေးတယ်။ အရေးကြီးတဲ့ အလုပ်လည်း ပေးတယ်။ (လု. ၂၄:၂၆၊ ၂၇၊ ၄၅-၄၈) ရက် ၄၀ ကြာပြီးနောက် ယေရှု ကောင်းကင်တက်တဲ့အခါ တပည့်တွေရဲ့ ဝမ်းနည်းမှုက ဝမ်းသာမှုအဖြစ် ပြောင်းသွားတယ်။ သူတို့သခင် အသက်ရှင်နေပြီ၊ တာဝန်သစ်ကို အောင်မြင်အောင် ကူညီပေးတော့မယ်ဆိုတဲ့ အသိကြောင့် ဝမ်းသာနေကြတယ်။ သူတို့ရဲ့ ဝမ်းသာမှုက ယေဟောဝါကို မပြတ် ချီးမွမ်းဖို့ လှုံ့ဆော်ပေးတယ်။—လုကာ ၂၄:၅၂၊ ၅၃ ကို ဖတ်ပါ။ တ. ၅:၄၂။
၁၆။ ယေရှုရဲ့ တပည့်တွေကို ဘယ်လို တုပနိုင်သလဲ။
၁၆ ယေရှုရဲ့ တပည့်တွေကို ဘယ်လို တုပနိုင်သလဲ။ အောက်မေ့ရာပွဲကာလမှာသာမက တစ်နှစ်ပတ်လုံး ယေဟောဝါကို ဝတ်ပြုရင်း ပျော်ရွှင်နိုင်တယ်။ အဲဒီလို ဖြစ်နိုင်ဖို့ ဘဝမှာ နိုင်ငံတော်ကို ဦးစားထားရမယ်။ ဥပမာ၊ အမှုဆောင်မှာ ပါဝင်နိုင်ဖို့၊ အစည်းအဝေး တက်နိုင်ဖို့၊ မိသားစုဝတ်ပြုမှု ပုံမှန် လုပ်နိုင်ဖို့ လူများစွာ အလုပ်ချိန်ဇယား ပြောင်းလဲခဲ့ကြတယ်။ တချို့က အသင်းတော်မှာ ပိုအသုံးတော်ခံနိုင်အောင်၊ သတင်းကောင်း ကြေညာသူ ပိုလိုအပ်တဲ့ ဒေသမှာ အမှုဆောင်နိုင်အောင် ပစ္စည်းဥစ္စာတွေနောက် မလိုက်ဖို့ ဆုံးဖြတ်ခဲ့ကြတယ်။ တချို့အတွက်တော့ အဲဒီပစ္စည်းဥစ္စာတွေ မရှိမဖြစ်ပဲ။ ယေဟောဝါကို မပြတ် ဝတ်ပြုဖို့ ခံနိုင်ရည် လိုအပ်ပေမဲ့ ဘဝမှာ နိုင်ငံတော်ကို ဦးစားထားရင် ကြွယ်ဝစွာ ကောင်းချီးပေးမယ်လို့ ယေဟောဝါ ကတိပေးထားတယ်။—ပညာ. ၁၀:၂၂။ မ. ၆:၃၂၊ ၃၃။
အောက်မေ့ရာပွဲကာလအတွင်း သင့်အတွက် ယေဟောဝါနဲ့ ယေရှု သတ်သတ်မှတ်မှတ် လုပ်ပေးတာတွေအကြောင်း တွေးတောဆင်ခြင်ဖို့ အချိန်ယူပါ (စာပိုဒ် ၁၇ ကို ကြည့်ပါ)
၁၇။ အောက်မေ့ရာပွဲကာလမှာ ဘာလုပ်ဖို့ စိတ်ပိုင်းဖြတ်ထားသလဲ။ (ရုပ်ပုံကို ကြည့်ပါ။)
၁၇ ဧပြီ ၄၊ အင်္ဂါနေ့မှာ သတိရအောက်မေ့ပွဲ ကျင်းပဖို့ ကျွန်တော်တို့ စောင့်မျှော်နေကြတယ်။ ဒါပေမဲ့ ယေရှုရဲ့ဘဝနဲ့ သေခြင်းအကြောင်း၊ ယေဟောဝါနဲ့ ယေရှု ပြခဲ့တဲ့ မေတ္တာအကြောင်း စဉ်းစားဖို့ အဲဒီအချိန်အထိ မစောင့်ပါနဲ့။ အောက်မေ့ရာပွဲကာလမှာ ရသမျှ အခွင့်အရေးကို သုံးပြီး အဲဒီအကြောင်း စဉ်းစားသုံးသပ်ပါ။ ဥပမာ၊ ကမ္ဘာသစ် ဘာသာပြန်ကျမ်း နောက်ဆက်တွဲ ခ၊ “ယေရှုရဲ့ မြေကြီးအသက်တာ နောက်ဆုံး သီတင်းပတ်” ဇယားမှာ ဖော်ပြထားတဲ့ အဖြစ်အပျက်တွေကို ဖတ်ရှုပြီး တွေးတောဆင်ခြင်ဖို့ အချိန်ဖယ်ထားပါ။ ကျေးဇူးတင်စိတ်၊ မေတ္တာ၊ သတ္တိ၊ ဝမ်းမြောက်မှု တိုးများစေမယ့် ကျမ်းချက်တွေ ရှာဖတ်ပါ။ ပြီးနောက် ကျေးဇူးတင်လေးမြတ်ကြောင်း ဖော်ပြနိုင်မယ့် သတ်သတ်မှတ်မှတ် နည်းတွေကို စဉ်းစားပါ။ အောက်မေ့ရာပွဲကာလအတွင်း မိမိကို သတိရအောက်မေ့ဖို့ သင် လုပ်သမျှကို ယေရှု တန်ဖိုးထားမယ်ဆိုတာ စိတ်ချနိုင်ပါတယ်။—ဗျာ. ၂:၁၉။
သီချင်း ၁၇ “ငါဆန္ဒရှိ”
a အောက်မေ့ရာပွဲကာလအတွင်း ယေရှုရဲ့ ဘဝနဲ့ သေခြင်းအကြောင်း၊ ယေရှုနဲ့ ယေဟောဝါဘုရားရဲ့ မေတ္တာအကြောင်း တွေးတောဆင်ခြင်ဖို့ အားပေးခံရတယ်။ ဒီလို တွေးတောတာက တစ်ခုခုလုပ်ဖို့ ကျွန်တော်တို့ကို လှုံ့ဆော်ပေးနိုင်တယ်။ ရွေးဖိုးအတွက်၊ ယေဟောဝါနဲ့ ယေရှုပြခဲ့တဲ့ မေတ္တာအတွက် ကျေးဇူးတင်ကြောင်း ဘယ်လို ပြနိုင်သလဲဆိုတဲ့ လက်တွေ့ကျနည်းတွေကို ဒီဆောင်းပါးမှာ ဆွေးနွေးကြပါမယ်။ ညီအစ်ကို/မတွေကို ချစ်ဖို့၊ သတ္တိရှိဖို့၊ အမှုတော်မှာ ဝမ်းမြောက်ဖို့ ဘယ်လို လှုံ့ဆော်ခံရမယ်ဆိုတာလည်း သိလာပါမယ်။