၁။ ကျမ်းစာကို ဒီနေ့ခေတ် လူများစွာ ဘာကြောင့် မယုံကြတော့သလဲ။

 ဒီနေ့​ခေတ် လူများစွာ​ဟာ ဘယ်သူ့ကို ယုံရမှန်း မသိ ဖြစ်နေကြတယ်။ သူတို့ အထင်ကြီး​လေးစားတဲ့ နိုင်ငံရေးသမား၊ စီးပွားရေးသမား၊ သိပ္ပံပညာရှင်တွေ​မှာ စိတ်​ကောင်း​စေတနာ​ကော ရှိရဲ့လား​လို့ တွေးလာကြတယ်။ ခရစ်ယာန် ဘာသာရေး​ခေါင်းဆောင်တွေကိုလည်း အရိုအသေ​မဲ့လာကြတယ်။ ဒါကြောင့် သူတို့ လိုက်နာပါ​တယ်လို့ ပြောတဲ့ ကျမ်းစာကိုလည်း မယုံတော့တာ မဆန်းပါဘူး။

၂။ ဆာလံ ၁၁၉:၁၆၀ အရ ဘာကို စိတ်ချနိုင်သလဲ။

^၂ ယေဟောဝါ​ဘုရားရဲ့ လူမျိုး​အ​နေနဲ့ ကျွန်တော်တို့ကတော့ ဘုရားသခင်ဟာ “အမှန်တရားရဲ့​ဘုရား” ဖြစ်မှန်း၊ ကျွန်တော်တို့ရဲ့ အကောင်းဆုံး​အကျိုးကို အမြဲ လိုလား​မှန်း ယုံကြည်စိတ်ချတယ်။ (ဆာ. ၃၁:၅။ ဟေရှာ. ၄၈:၁၇) ကျမ်းစာမှာ ဖတ်​ရတဲ့​အရာတွေကို ယုံကြည်​စိတ်ချနိုင်ကြောင်း၊ “နှုတ်တော်ထွက်​စကား​ရဲ့ အနှစ်သာရဟာ အမှန်တရား” ဖြစ်ကြောင်း သိတယ်။ (ဆာလံ ၁၁၉:၁၆၀ ကို ဖတ်ပါ။) ကျမ်းပညာရှင်​တစ်ယောက် ပြောတာကို သဘောတူ​ကြတယ်– “ဘုရား​ပြောတာ တစ်ခုမှ မမှားဘူး။ အကုန် ကျိန်းသေ ပြည့်စုံ​မယ်။ ဘုရား​လူမျိုး​က ဘုရားကို ယုံလို့ ဘုရား​ပြောတာကိုလည်း ယုံကြတယ်။”

၃။ ဒီဆောင်းပါးမှာ ဘာဆွေးနွေးကြမလဲ။

^၃ ကျမ်းစာကို ကျွန်တော်တို့လို ယုံကြည်​စိတ်ချလာဖို့ တခြားသူတွေကို ဘယ်လို ကူညီပေးနိုင်သလဲ။ ကျမ်းစာကို ယုံကြည်​စိတ်ချနိုင်​တဲ့ အကြောင်းရင်း သုံးခုကို စဉ်းစား​ကြည့်ကြစို့။ ကျမ်းစာရဲ့ တိကျ​မှန်ကန်မှု၊ ကျမ်းစာ ပရောဖက်ပြုချက်တွေ​ရဲ့ ပြည့်စုံ​မှု၊ ကျမ်းစာရဲ့ ပြုပြင်​ပြောင်းလဲပေးနိုင်စွမ်း။

၄။ ကျမ်းစာရဲ့ တိကျ​မှန်ကန်မှုကို လူ​တချို့ ဘာကြောင့် သံသယ ဝင်ကြသလဲ။

^၄ ကျမ်း​စာစောင်တွေကို ရေးဖို့ သစ္စာရှိ အမျိုးသား ၄၀ လောက်ကို ယေဟောဝါ​ဘုရား အသုံးပြုတယ်။ ဒါပေမဲ့ သူတို့​ရေးခဲ့တဲ့ မူရင်း လက်ရေး​စာမူ တစ်ခုမှ ဒီနေ့ခေတ်မှာ မရှိတော့ဘူး။ ကျွန်တော်တို့​ဆီ​မှာ ရှိတာက အထပ်ထပ် ကူးရေး​ထားတဲ့ မိတ္တူ​တွေ​ပဲ။ ဒါကြောင့် ဒီနေ့ခေတ် ကျမ်းစာဟာ မူရင်း​ကျမ်း​လောက် တိကျ​ရဲ့​လား​လို့ လူ​တချို့ တွေးပူ​ကြတယ်။ တိကျတယ်ဆိုတာ သေသေချာချာ သိအောင် ဘယ်လို လုပ်မလဲ​လို့ တွေးဖူး​သ​လား။

၅။ ဟီဘရူး​ကျမ်း​စာစောင်တွေကို ဘယ်လို ကူးရေးခဲ့ကြသလဲ။ (မျက်နှာဖုံးပုံ​ကို ကြည့်ပါ။)

^၅ ကျမ်းစာ သတင်းစကားကို ကာကွယ်​ထိန်းသိမ်းဖို့ မိတ္တူ​တွေ ကူးရေး​ပါ​လို့ လူမျိုးတော်ကို ယေဟောဝါ ညွှန်ကြားတယ်။ အစ္စရေး ဘုရင်တွေ​ဟာ ပညတ်တရားကို ကိုယ်တိုင် ကူးရေး​ဖို့ ညွှန်ကြားခံရတယ်။ လူတွေကို ပညတ်တရား သွန်သင်ပေးဖို့ လေဝိ​အမျိုးသားတွေကို ဘုရား ခန့်အပ်တယ်။ (တရား. ၁၇:၁၈။ ၃၁:၂၄-၂၆။ နေ. ၈:၇) ဂျူး​သုံ့ပန်း​တွေ ဗာဗုလုန်​ကနေ ပြန်လာပြီးနောက် ကျွမ်းကျင်တဲ့ ကျမ်းကူးသူတစ်စုဟာ ဟီဘရူး​ကျမ်း​စာစောင်တွေကို မိတ္တူများစွာ ကူးရေး​ကြတယ်။ (ဧဇ. ၇:၆၊ အောက်ခြေမှတ်ချက်) အဲဒီ​အမျိုးသားတွေ စေ့စပ်​သေချာတယ်။ နောက်ပိုင်း၊ ကျမ်းကူးသူတွေဟာ တိတိကျကျ ကူးရေး​ကြောင်း သေချာစေဖို့ စကားစု​တွေ​ကို သာမက စာလုံး​တစ်လုံးချင်းကိုပါ ရေတွက်​လာကြတယ်။ မစုံလင်တဲ့ လူတွေမို့ အမှား နည်းနည်းပါးပါးတော့ ရှိတယ်။ ဒါပေမဲ့ မိတ္တူများစွာ ကူးရေး​ထားလို့ အဲဒီ​အမှားတွေကို နောက်ပိုင်း ပြန်​ရှာတွေ့နိုင်တယ်။ ဘယ်လိုနည်းနဲ့လဲ။

၆။ ကျမ်းစာ မိတ္တူ​တွေ​ရဲ့ အမှားကို ဘယ်လို ရှာတွေ့နိုင်သလဲ။

^၆ ခေတ်သစ် ကျမ်းပညာရှင်တွေမှာ စိတ်ချ​ရတဲ့ အမှား ရှာ​နည်း ရှိတယ်။ ဥပမာ၊ စာမျက်နှာ​တစ်ခုကို​ပဲ လူ ၁၀၀ ကို ကူးရေး​ခိုင်းတယ် ဆိုပါစို့။ လူ​တစ်ယောက် နည်းနည်း မှားသွား​တယ်။ သူ့​အမှားကို ရှာ​နိုင်​တဲ့ နည်းကတော့ တခြား​သူတွေ ကူးထားတာနဲ့ နှိုင်းယှဉ်​ခြင်းအားဖြင့်​ပါ။ အဲဒီလိုပဲ၊ ကျမ်းပညာရှင်တွေဟာ ကျမ်း​လက်ရေး​စာမူ များစွာ​ကို နှိုင်းယှဉ်​စစ်ဆေးခြင်းအားဖြင့် ကျမ်းကူးသူ​တစ်ယောက် မှားမိတာတွေ၊ ချန်ရစ်ခဲ့တာတွေကို ရှာတွေ့နိုင်တယ်။

၇။ ကျမ်းကူးသူ​များစွာ ဘယ်လောက် တိကျ​မှန်ကန်​သလဲ။

^၇ ကျမ်း​လက်ရေးစာမူတွေကို ကူးရေး​သူ​တွေ​ဟာ တိကျ​မှန်ကန်မှု ရှိဖို့ အစွမ်းကုန် ကြိုးစားခဲ့ကြတယ်။ ဒါကို ထောက်ခံတဲ့ အချက်​တစ်ချက် သုံးသပ်ကြည့်ပါ။ ရှေးအကျဆုံး ဟီဘရူး​ကျမ်းစာစောင် လက်ရေး​စာမူ အပြည့်အစုံ​ဟာ အေဒီ ၁၀၀၈၊ ၁၀၀၉ လောက်​က ဖြစ်တယ်။ လီနင်ဂရက် ကိုဒက်စ် လို့ ခေါ်တယ်။ ဒါပေမဲ့ မကြာသေးခင်​တုန်းက လီနင်ဂရက် ကိုဒက်စ်​ထက် နှစ်ပေါင်း ၁၀၀၀ လောက် ပို​ရှေးကျတဲ့ လက်ရေးစာမူတွေ၊ စာမူ အပိုင်းအစ​တွေ အတော်များများ ရှာဖွေ​တွေ့ရှိ​ခဲ့တယ်။ လီနင်ဂရက် ကိုဒက်စ်​ကို နှစ် ၁၀၀၀ လောက်​အတွင်း အထပ်ထပ် ကူးရေးခဲ့လို့ ပို​ရှေးကျတဲ့ အဲဒီ​လက်ရေးစာမူတွေ​နဲ့ တော်တော် ကွာမှာပဲလို့ တချို့ ထင်ကြ​မယ်။ ဒါပေမဲ့ မကွာဘူး။ စကား​အသုံးအနှုန်း မဆိုစလောက် ကွာခြားမှု ရှိပေမဲ့ အဓိပ္ပာယ် မပြောင်းလဲ​ကြောင်း အဲဒီ​နှစ်မျိုးကို နှိုင်းယှဉ်​တဲ့ ကျမ်းပညာရှင်တွေ တွေ့ရှိ​ကြတယ်။

၈။ ခရစ်ယာန် ဂရိ​ကျမ်းစာစောင် မိတ္တူ​တွေ​ကို ရှေးခေတ် တခြား​စာအုပ်​တွေ​နဲ့ နှိုင်းယှဉ်​ကြည့်တဲ့အခါ ဘာ​တွေ့ရ​သလဲ။

^၈ အစောပိုင်း ခရစ်ယာန်တွေ​လည်း ကျမ်းစာကို ကူးရေး​ကြတယ်။ ဂရိ​ကျမ်းစာစောင် ၂၇ စောင်​ကို တိတိကျကျ ကူးရေး​ကြတယ်။ အစည်းအဝေး၊ ဟောပြောခြင်း​လုပ်ငန်းတွေ​မှာ သုံးကြတယ်။ လက်ရှိ ဂရိ​ကျမ်းစာစောင် လက်ရေးစာမူတွေကို တခြား ခေတ်ပြိုင်​စာအုပ်​တွေ​နဲ့ နှိုင်းယှဉ်​ပြီးနောက် ကျမ်းပညာရှင်​တစ်ယောက်က “ဒီနေ့ ရှိတဲ့ စာအုပ်​တွေ​ထဲ​မှာ တခြား​စာအုပ်​တွေ​ထက် ဂရိ​ကျမ်း လက်ရေးစာမူတွေက ပိုများတယ်” လို့ ပြောတယ်။ စာအုပ်​တစ်အုပ်  (Anatomy of the New Testament) ကလည်း “စိတ်ချ​ရတဲ့ ခေတ်သစ် [ဂရိ​ကျမ်းစာစောင်] ဘာသာပြန်​ကျမ်းမှာ ပါတဲ့ သတင်းစကားဟာ မူလ ကျမ်းရေးသူတွေ ရေးတဲ့​အတိုင်းပဲ​ဆိုတာ စိတ်ချနိုင်တယ်” လို့ ဆိုတယ်။

၉။ ဟေရှာယ ၄၀:၈ အရ ကျမ်းစာ သတင်းစကား​နဲ့​ပတ်သက်​ပြီး ဘာ​မှန်ကန်​သလဲ။

^၉ ရာစုနှစ်တွေ​တစ်လျှောက် ကျမ်းကူးသူ များစွာ​ရဲ့ စေ့စေ့စပ်စပ် ကြိုးစား​အားထုတ်မှု​ကြောင့် ဒီနေ့ခေတ် ကျွန်တော်တို့ လေ့လာ​ဖတ်ရှု​ဖို့ တိကျမှန်ကန်တဲ့ ကျမ်းစာ ရှိနေတာ။ b မိမိရဲ့ နှုတ်ထွက်​စကားကို ကျွန်တော်တို့ တိကျမှန်ကန်စွာ ဖတ်​နိုင်ဖို့ ယေဟောဝါ ထိန်းသိမ်း​ပေးထားတာ သေချာတယ်။ (ဟေရှာယ ၄၀:၈ ကို ဖတ်ပါ။) ဒါပေမဲ့ ကျမ်းစာ သတင်းစကား မ​ပြောင်း​မလဲ ရှိနေတာနဲ့ပဲ စွမ်းအားတော် လမ်းညွှန်မှုနဲ့ ရေးထားတယ်လို့ မပြောနိုင်ဘူး​ဆိုပြီး တချို့ ပြော​ကြ​မယ်။ ကျမ်းစာကို ဘုရား စွမ်းအားတော် လမ်းညွှန်မှုနဲ့ ရေးထားတယ်ဆိုတဲ့ အထောက်အထား တချို့ သုံးသပ်​ကြည့်ကြစို့။

၁၀။ ၂ ပေတရု ၁:၂၁ မှန်ကန်ကြောင်း ထောက်ခံတဲ့ ပြည့်စုံပြီးသား ကျမ်းစာ ပရောဖက်ပြုချက်​တစ်ခုကို ဖော်ပြပါ။ (ရုပ်ပုံတွေကို ကြည့်ပါ။)

^၁၀ ကျမ်းစာမှာ ပြည့်စုံပြီးသား ပရောဖက်ပြုချက် များစွာ ပါတယ်။ တချို့က ရေးသားပြီး နှစ်ပေါင်း ရာနဲ့ချီ ကြာမှ ပြည့်စုံခဲ့တယ်။ အဲဒီလို ပြည့်စုံခဲ့​တာကို သမိုင်းက ထောက်ခံတယ်။ ဒါကို ကျွန်တော်တို့ မ​အံ့ဩ​ကြ​ဘူး။ ကျမ်းစာ ပရောဖက်ပြုချက်တွေ​ရဲ့ အာဘော်ရှင်​ဟာ ယေဟောဝါ​ဘုရား ဖြစ်မှန်း သိထားကြလို့ပဲ။ (၂ ပေတရု ၁:၂၁ ကို ဖတ်ပါ။) ရှေးဗာဗုလုန်​မြို့ ကျဆုံး​ခြင်း​နဲ့​ပတ်သက်တဲ့ ပရောဖက်ပြုချက်ကို သုံးသပ်ကြည့်ပါ။ တန်ခိုး​ဩဇာ ကြီးမားတဲ့ ဗာဗုလုန်​မြို့ ကျဆုံး​မယ်၊ ဖျက်ဆီး​ခံရပြီး လုံးဝ လူ​သူ​ကင်းမဲ့​သွားမယ်လို့ ဘီစီ ရှစ်ရာစု​မှာ ပရောဖက် ဟေရှာယ ကြိုဟောတယ်။ (ဟေရှာ. ၁၃:၁၉၊ ၂၀) မြို့ကို အောင်နိုင်​မယ့်​သူဟာ ဆိုင်းရပ် ဖြစ်တယ်​ဆိုပြီး နာမည်ကို​တောင် ကြိုဟောတယ်။ မြို့ ဘယ်လိုနည်းနဲ့ သိမ်းပိုက်​ခံရမယ်ဆိုတာ​လည်း အသေးစိတ် ပြောတယ်။ (ဟေရှာ. ၄၄:၂၇–၄၅:၂) အဲဒီအတိုင်း အတိအကျ ဖြစ်ခဲ့တယ်။ ဘီစီ ၅၃၉ မှာ မီးဒီးယား-ပါးရှား​တွေ​လက်ထဲ ဗာဗုလုန် ကျရောက်​သွားတယ်။ ကြီးကျယ်​ခမ်းနားတဲ့ မြို့ ရှိခဲ့တဲ့​နေရာမှာ အခုတော့  အပျက်အယွင်းပုံကြီးပဲ ရှိနေတယ်။—အီလက်ထရောနစ် ပုံစံနဲ့ ပျော်စရာဘဝ ထာဝရ စံစားကြ စာအုပ် သင်ခန်းစာ ၃၊ အချက် ၅၊ ဗာဗုလုန်​ကျဆုံး​ခြင်း​အကြောင်း ကျမ်းစာ​ကြိုဟော ဗီဒီယိုကို ကြည့်ပါ။

၁၁။ ဒံယေလ ၂:၄၁-၄၃ မှာ ပါတဲ့ ပရောဖက်ပြုချက် ဒီနေ့ခေတ် ဘယ်လို ပြည့်စုံနေသလဲ။

^၁၁ ကျမ်းစာ ပရောဖက်ပြုချက်တွေ​ဟာ အရင်က​ပဲ ပြည့်စုံခဲ့​တာ မဟုတ်ဘူး။ ဒီနေ့ခေတ်မှာလည်း ပြည့်စုံ​နေ​တယ်။ ဥပမာ၊ အင်္ဂလိပ်-အမေရိကန် ကမ္ဘာ့​အာဏာစက်​နဲ့​ပတ်သက်တဲ့ ဒံယေလ ပရောဖက်ပြုချက် ထူးထူးခြားခြား ပြည့်စုံ​နေတာ စဉ်းစားကြည့်ပါ။ (ဒံယေလ ၂:၄၁-၄၃ ကို ဖတ်ပါ။) ဒီ​ပူးတွဲ​ကမ္ဘာ့အာဏာစက်ဟာ သံ​လို “ခိုင်မာ​ခြင်း​တစ်ဝက်၊” ရွှံ့စေး​လို “ကျိုးပဲ့လွယ်ခြင်း​တစ်ဝက်” ရောနှော​နေမယ်လို့ ပရောဖက်ပြုချက်မှာ တိတိကျကျ ကြိုဟောတယ်။ အဲဒီအတိုင်း ဖြစ်နေတယ်။ ဗြိတိန်နဲ့ အမေရိကန်​ဟာ သံ​လို ခိုင်မာ​တယ်။ ကမ္ဘာစစ်ကြီး နှစ်ခုစလုံးမှာ အဓိက​နေရာကနေ ပါဝင်ပြီး အနိုင်ရခဲ့ကြတယ်။ စစ်​အင်အား​လည်း ခိုင်မာ​တောင့်တင်းနေဆဲပဲ။ ဒါပေမဲ့ အလုပ်သမား သမဂ္ဂ​တွေ၊ စီးပွားရေး​နဲ့ အစိုးရ ဆန့်ကျင်ရေး လှုပ်ရှားမှု​တွေ​ကတစ်ဆင့် အခွင့်အရေး တောင်းဆိုတဲ့ ပြည်သူ​လူထု​တွေ​ကြောင့် သူတို့ရဲ့ တန်ခိုး​အာဏာ အားနည်းတယ်။ ကမ္ဘာ့​နိုင်ငံရေး ပညာရှင်​တစ်ယောက်က “လက်ရှိ ဒီမိုကရေစီ နိုင်ငံ​တွေ​ထဲ​မှာ အမေရိကန်​လောက် နိုင်ငံရေး​အရ ကွဲပြားတဲ့ နိုင်ငံ မရှိတော့ဘူး” လို့ ပြောတယ်။ ဒီ​ကမ္ဘာ့​အာဏာစက်​ရဲ့ နောက်​တစ်ပိုင်း ဖြစ်တဲ့ ဗြိတိန်​လည်း မကြာသေးခင်​နှစ်တွေ​က​စပြီး ဥရောပ​သမဂ္ဂ နိုင်ငံ​တွေ​နဲ့ ဆက်​ပူးပေါင်း​မ​လား ဆိုတာနဲ့ပတ်သက်လို့ သဘောထား ကွဲလွဲ​နေ​တယ်။ အဲဒီလို ကွဲပြားမှု​တွေ​ကြောင့် အင်္ဂလိပ်-အမေရိကန် ကမ္ဘာ့အာဏာစက်ဟာ ပြတ်ပြတ်သားသား လုပ်ချင်သလောက် မလုပ်နိုင်ဘူး ဖြစ်နေတယ်။

၁၂။ ကျမ်းစာ ပရောဖက်ပြုချက်တွေ​က ဘာကို ယုံကြည်​စိတ်ချစေသလဲ။

^၁၂ ပြည့်စုံပြီးသား ပရောဖက်ပြုချက် များစွာ​က အနာဂတ်​နဲ့​ပတ်သက်တဲ့ ဘုရား​ကတိတွေကို ပိုယုံကြည်​စိတ်ချစေတယ်။ “ကယ်တင်ခြင်း ကျေးဇူးကို တောင့်တနေပါတယ်။ နှုတ်တော်ထွက်စကားဟာ ကျွန်တော့်​မျှော်လင့်ချက် ဖြစ်နေလို့ပါ” လို့ ပြောတဲ့ ဆာလံဆရာ​လို ကျွန်တော်တို့ ခံစားရတယ်။ (ဆာ. ၁၁၉:၈၁) ကျမ်းစာမှာ ကျွန်တော်တို့ကို ယေဟောဝါ ‘မျှော်လင့်ချက်​နဲ့ အနာဂတ်’ ပေးထားတယ်။ (ယေ. ၂၉:၁၁) ကျွန်တော်တို့ရဲ့ အနာဂတ် မျှော်လင့်ချက်​ဟာ လူ့​ကြိုးစား​အားထုတ်မှု​တွေ​ပေါ် မဟုတ်ဘဲ ယေဟောဝါရဲ့ ကတိတွေ​ပေါ် အခြေခံ​တယ်။ ဒါကြောင့် ကျမ်းစာ ပရောဖက်ပြုချက်တွေကို ထက်ထက်သန်သန် လေ့လာခြင်းအားဖြင့် ကျမ်းစာအပေါ် ယုံကြည်စိတ်ချမှု ဆက်တည်ဆောက်​သွား​ကြပါစို့။

၁၃။ ဆာလံ ၁၁၉:၆၆၊ ၁၃၈ အရ ကျမ်းစာကို ယုံကြည်​စိတ်ချနိုင်​တဲ့ နောက်အကြောင်းရင်းက ဘာလဲ။

^၁၃ ကျမ်းစာကို ယုံကြည်​စိတ်ချနိုင်​တဲ့ နောက်​အကြောင်းရင်းကတော့ ကျမ်းစာ အကြံဉာဏ်ဟာ လိုက်နာ​သူတွေကို အကျိုးပြု​နေလို့ပဲ။ (ဆာလံ ၁၁၉:၆၆၊ ၁၃၈ ကို ဖတ်ပါ။) ဥပမာ၊ ကွာရှင်းခါနီး အိမ်ထောင်သည်တွေ​ဟာ ကျမ်းစာ အကြံဉာဏ်တွေ​ကို လိုက်နာ​လို့ အိမ်ထောင် သာယာ​ပျော်ရွှင်​နေကြပြီ။ လုံခြုံတဲ့ မေတ္တာ​ရိပ်မြုံ​လေး​မှာ သားသမီးတွေ ကြီးပြင်း​ခွင့် ရကြပြီ။—ဧ. ၅:၂၂-၂၉။

၁၄။ ကျမ်းစာ အကြံဉာဏ်တွေ​ကို ကျင့်သုံးတာက ဘဝကို တိုးတက်​ကောင်းမွန်​စေ​ကြောင်း ဖော်ပြတဲ့ ဥပမာ​တစ်ခု ပြောပြပါ။

^၁၄ ကျမ်းစာရဲ့ ပညာရှိ အကြံဉာဏ်တွေ​ကို လိုက်လျှောက်​လို့ အန္တရာယ် ရှိတဲ့ ရာဇဝတ်သားတွေ​တောင် ပိုကောင်းတဲ့ လူတွေ ဖြစ်လာကြတယ်။ ဂျက်​လို့ ခေါ်တဲ့ ထောင်သား​တစ်ယောက်ကို ကျမ်းစာ အကြံဉာဏ်တွေ ဘယ်လို ကူညီပေးကြောင်း စဉ်းစားကြည့်ပါ။ c ဂျက်​ဟာ သိပ်ကြမ်းတဲ့ ရာဇဝတ်သား ဖြစ်တယ်။ သေဒဏ် ချခံရတဲ့ ရာဇဝတ်သားတွေ​ထဲ​မှာ အန္တရာယ် အရှိဆုံး​လို့ သတ်မှတ်​ခံထားရ​သူ  ဖြစ်တယ်။ တစ်နေ့၊ ကျမ်းစာ လေ့လာမှု​မှာ ဝင်ထိုင်​တယ်။ ညီအစ်ကိုတွေရဲ့ ကြင်နာမှုကို စိတ်ထိမိ​သွားပြီး ကျမ်းစာ စ​လေ့လာ​တယ်။ ကျမ်းစာ အမှန်တရားကို ဘဝမှာ လက်တွေ့​ကျင့်သုံးလာတာနဲ့အမျှ သူ့ရဲ့ အကျင့်​စရိုက် တိုးတက်​ပြောင်းလဲ​လာတယ်။ တဖြည်းဖြည်း နှစ်ခြင်းမခံသေးတဲ့ ကြေညာသူအဖြစ် အရည်အချင်း ပြည့်မီ​လာပြီး နှစ်ခြင်းခံလိုက်တယ်။ ဘုရားနိုင်ငံတော်​အကြောင်း တခြား​ထောင်သားတွေကို ထက်ထက်သန်သန် ဟောပြောတယ်။ သူတို့ထဲက လေးယောက်ကို ကျမ်းစာ သင်ပေးနိုင်ခဲ့တယ်။ သူ့ကို သေဒဏ် ပေးတဲ့​နေ့မှာ ဂျက်​ဟာ နောက်​လူ​တစ်ယောက်လို လုံးဝ ပြောင်းလဲ​နေပြီ။ သူ့ရဲ့ ရှေ့နေ​တစ်ယောက်က “လွန်ခဲ့တဲ့ နှစ် ၂၀ လောက်​က ကျွန်မ သိခဲ့​တဲ့ ဂျက် မဟုတ်တော့ဘူး။ ယေဟောဝါသက်သေတွေရဲ့ သွန်သင်ချက်တွေ​က သူ့​ဘဝကို ပြောင်းလဲပေး​လိုက်ပြီ” လို့ ပြောတယ်။ ဂျက် သေဒဏ် စီရင်ခံရပေမဲ့ သူ့​ပုံသက်သေ​က ကျမ်းစာကို ယုံကြည်​စိတ်ချနိုင်ကြောင်း၊ ကျမ်းစာဟာ လူတွေရဲ့ ဘဝကို ပိုကောင်းအောင် ပြုပြင်​ပြောင်းလဲပေးနိုင်စွမ်း ရှိကြောင်း ဖော်ပြတယ်။—ဟေရှာ. ၁၁:၆-၉။

၁၅။ ကျမ်းစာ အမှန်တရားအတိုင်း လက်တွေ့​ကျင့်သုံးလို့ ဒီနေ့ခေတ် ယေဟောဝါရဲ့ လူမျိုး ဘယ်လို ထူးခြားသလဲ။ (ရုပ်ပုံကို ကြည့်ပါ။)

^၁၅ ယေဟောဝါရဲ့ လူမျိုးဟာ ကျမ်းစာ အမှန်တရားကို လက်တွေ့​ကျင့်သုံးလို့ စည်းလုံး​နေ​ကြတယ်။ (ယော. ၁၃:၃၅။ ၁ ကော. ၁:၁၀) လောကရဲ့ နိုင်ငံရေး၊ လူမျိုးရေး၊ လူမှုရေး ကွဲပြားမှု​တွေ​နဲ့ ယှဉ်ရင် ကျွန်တော်တို့ရဲ့ ငြိမ်သက်​စည်းလုံးမှု​ဟာ သိပ်ထူးခြားတယ်။ ဒီ​စည်းလုံးမှု​က ဂျင်း​ဆိုတဲ့ လူငယ်​အပေါ် အကြီးအကျယ် အကျိုးသက်ရောက်ခဲ့​တယ်။ အာဖရိက​နိုင်ငံ​တစ်ခုမှာ သူ ကြီးပြင်းလာတာ။ ပြည်တွင်းစစ် ဖြစ်တော့ စစ်​ထဲ ဝင်လိုက်တယ်။ နောက်ပိုင်း၊ အိမ်နီးချင်း​နိုင်ငံ​တစ်ခု​ဆီ ထွက်ပြေး​သွားတယ်။ အဲဒီမှာ ယေဟောဝါ​သက်သေတွေ​နဲ့ ဆုံတယ်။ “စစ်မှန်တဲ့ ဘာသာရဲ့ အသင်း​သား​တွေ​ဟာ နိုင်ငံရေး​မှာ မ​ပါ​မှန်း၊ တကွဲတပြား ဖြစ်မနေမှန်း၊ အဲဒီအစား အချင်းချင်း ချစ်​ကြ​မှန်း ကျွန်တော် သိလာတယ်။ နိုင်ငံ​တစ်ခုကို ကာကွယ်ဖို့ ကိုယ့်​ဘဝကို ဆက်ကပ်​ထားတာ။ ကျမ်းစာ အမှန်တရား သိလာချိန်မှာတော့ ကိုယ့်​ဘဝကို ယေဟောဝါဆီ ဆက်ကပ်အပ်နှံ​ဖို့ လှုံ့ဆော်​ခံရတယ်” လို့ ဂျင်း ပြောတယ်။ သူ လုံးဝ ပြောင်းလဲ​သွားတယ်။ အခုဆိုရင်  နောက်ခံ၊ လူမျိုး မတူသူတွေကို မတိုက်ခိုက်တော့ဘူး။ အဲဒီအစား ငြိမ်သက်​စည်းလုံးစေ​တဲ့ ကျမ်းစာ အမှန်တရား​အကြောင်း ဆုံတွေ့​ရသူ​တိုင်း​ကို ဝေမျှ​ပေးနေတယ်။ ဘယ်​လူမျိုး​ပဲ ဖြစ်ဖြစ် ကျမ်းစာ အကြံဉာဏ်အတိုင်း လိုက်လို့ အကျိုးရနေ​တာကို ကြည့်ရင် ကျမ်းစာကို ယုံကြည်​စိတ်ချနိုင်တယ်​ဆိုတဲ့ သက်သေပါပဲ။

၁၆။ ကျမ်းစာအပေါ် ယုံကြည်စိတ်ချမှု တိုးများလာအောင် လုပ်ဖို့ ဘာကြောင့် အရေးကြီးသလဲ။

^၁၆ ဒီ​လောက အခြေအနေတွေ ပိုဆိုးလာတဲ့​အတွက် ကျမ်းစာကို ယုံကြည်​စိတ်ချဖို့ ပိုအခက်တွေ့လာနိုင်တယ်။ လူတွေက ကျွန်တော်တို့ စိတ်ထဲ သံသယ​မျိုးစေ့တွေ ကြဲ​ပေးနိုင်တယ်။ ကျမ်းစာ မှန်ရဲ့လား၊ ဒီနေ့ခေတ် လူမျိုးတော်ကို လမ်းညွှန်​ဖို့ သစ္စာရှိ​ကျွန်ကို ယေဟောဝါ ခန့်​ထားတာ ဟုတ်ရဲ့လား​ဆိုတာ​မျိုး​ပေါ့။ ဒါပေမဲ့ ယေဟောဝါရဲ့ စကား အမြဲ မှန်ကန်တယ်ဆိုတာ ယုံကြည်​စိတ်ချမယ်ဆိုရင် အဲဒီလို ယုံကြည်ခြင်း တိုက်ခိုက်မှု​တွေ​ကို တွန်းလှန်​နိုင်​ပါလိမ့်မယ်။ “[ယေဟောဝါ]ရဲ့ စည်းမျဉ်းတွေ​ကို သက်ဆုံးတိုင် အမြဲ လိုက်နာမယ်​လို့ သန္နိဋ္ဌာန် ချထား” နိုင်​ပါလိမ့်မယ်။ (ဆာ. ၁၁၉:၁၁၂) အမှန်တရား​အကြောင်း တခြားသူတွေကို ပြောဖို့၊ အဲဒီအတိုင်း နေထိုင်​နိုင်အောင် အားပေးဖို့ ကျွန်တော်တို့ “ရှက်” နေ​မှာ မဟုတ်ဘူး။ (ဆာ. ၁၁၉:၄၆) နှိပ်စက်​ညှဉ်းပန်းမှု အပါအဝင် အခက်ခဲဆုံး အခြေအနေတွေကို “ဝမ်းမြောက်စွာ၊ စိတ်ရှည်စွာ” ခံရပ်နိုင်​ကြပါလိမ့်မယ်။—ကော. ၁:၁၁။ ဆာ. ၁၁၉:၁၄၃၊ ၁၅၇။

၁၇။ ၂၀၂၃ အတွက် နှစ်ချုပ်​ကျမ်းချက်က ဘာကို အမှတ်ရစေမလဲ။

^၁၇ ကျွန်တော်တို့ကို ယေဟောဝါ အမှန်တရား သိခွင့်​ပေးထားလို့ ကျေးဇူးတင်စရာပါပဲ။ အဲဒီ​အမှန်တရားက ကျွန်တော်တို့ကို တည်ငြိမ်​စေတယ်။ သေချာ​ရေ​ရာ​တဲ့ ရည်ရွယ်ချက် ရှိစေတယ်။ ကွဲပြား​ရှုပ်ထွေး​နေတဲ့ လောက​မှာ ရှင်းရှင်းလင်းလင်း လမ်းညွှန်​ပေးတယ်။ ဘုရားသခင့် နိုင်ငံတော် အုပ်ချုပ်မှုအောက် ပိုကောင်းတဲ့ အနာဂတ် မျှော်လင့်ချက်ကိုလည်း ပေးတယ်။ ဒါကြောင့် နှုတ်တော်ထွက်​စကား​ရဲ့ အနှစ်သာရဟာ အမှန်တရား ဖြစ်တယ်​ဆိုတဲ့ ယုံကြည်စိတ်ချမှု အပြည့်​နဲ့ အခိုင်အမာ ရပ်တည်​ဖို့ ၂၀၂၃ အတွက် နှစ်ချုပ်​ကျမ်းချက်က ကူညီပေးနိုင်​ပါ​စေ။—ဆာ. ၁၁၉:၁၆၀။