၁။ အရာခပ်သိမ်း​ကို ယေဟောဝါ ပိုင်တယ်​လို့ ဘာကြောင့်​ပြောနိုင်သလဲ။ (ဆောင်းပါး​အစမှာ​ပါတဲ့ ပုံကို ကြည့်ပါ။)

အရာခပ်သိမ်း​ကို ယေဟောဝါ ပိုင်တယ်။ “အမြင့်ဆုံး​ကောင်းကင်ကို ပိုင်တယ်။ မြေကြီးနဲ့ မြေကြီးပေါ်​ရှိသမျှ​ကိုလည်း ပိုင်တယ်။” (တရား. ၁၀:၁၄။ ဗျာ. ၄:၁၁) ဘုရားက လူတွေကို ဖန်ဆင်း​ထားတဲ့​အတွက် ကျွန်တော်တို့ကိုလည်း ပိုင်တယ်။ (ဆာ. ၁၀၀:၃) ဒါပေမဲ့ လူ့​သမိုင်း​တစ်လျှောက်​မှာ လူ​တစ်စုကို အထူး​ပိုင်ဆိုင်​သူတွေ​အဖြစ် ဘုရား ရွေးချယ်ခဲ့တယ်။

၂။ ကျမ်းစာမှာ ယေဟောဝါရဲ့ အထူးပိုင်ဆိုင်ရာ​အဖြစ် ဘယ်သူတွေကို ဖော်ပြ​ထားသလဲ။

^၂ ဥပမာ၊ ရှေး​သစ္စာရှိ အစ္စရေး​လူမျိုးကို ယေဟောဝါ “တန်ဖိုး​အထား​ရ​ဆုံး လူမျိုး​အဖြစ်” ဆာလံ ၁၃၅ မှာ ဖော်ပြတယ်။ (ဆာ. ၁၃၅:၄) အစ္စရေး​မဟုတ်​သူတွေ ယေဟောဝါရဲ့​လူမျိုး ဖြစ်​လာမယ်လို့ ဟောရှေကျမ်း​မှာ ကြိုဟော​ထားတယ်။ (ဟော. ၂:၂၃) ခရစ်တော်​နဲ့အတူ တွဲဖက်​အုပ်ချုပ်​မ​ယ့်​သူတွေ​အဖြစ် ဂျူး​မဟုတ်​သူတွေကို ယေဟောဝါ ရွေးချယ်​ချိန်မှာ ဟောရှေ​ရဲ့ ပရောဖက်ပြုချက် ပြည့်စုံခဲ့တယ်။ (တ. ၁၀:၄၅။ ရော. ၉:၂၃-၂၆) အဲဒီ “သန့်ရှင်းတဲ့​လူမျိုး” ဟာ စွမ်းအားတော်​နဲ့ ဘိသိက်ပေး​ခံရပြီး ကောင်းကင်​သွားဖို့ ရွေးချယ်ခံ​ရခြင်း​အားဖြင့် “ဘုရား​ပိုင်ဆိုင်တဲ့​လူမျိုး” ဖြစ်လာတယ်။ (၁ ပေ. ၂:၉၊ ၁၀) မြေကြီး​မျှော်လင့်ချက်​ ရှိတဲ့ ဒီနေ့ သစ္စာရှိ​ခရစ်ယာန် အများစု​ကော ဘယ်လို​လဲ။ သူတို့ကိုလည်း “ငါ့​လူတွေ၊” “ငါ​ရွေးချယ်ထားသူတွေ” လို့ ယေဟောဝါ ခေါ်တယ်။—ဟေရှာ. ၆၅:၂၂။

၃။ (က) ဒီနေ့ ဘယ်သူတွေ​က ယေဟောဝါနဲ့ အထူး​ဆက်ဆံရေး ရထားသလဲ။ (ခ) ဒီ​ဆောင်းပါး​မှာ ဘာအကြောင်း ဆွေးနွေးကြမလဲ။

^၃ ကောင်းကင်​မျှော်လင့်ချက်​ရှိတဲ့ “သိုးစုငယ်” နဲ့ မြေကြီး​မျှော်လင့်ချက်​ရှိတဲ့ “တခြား​သိုး” ဟာ “သိုး​တစ်အုပ်​တည်း” ဖြစ်ပြီး ယေဟောဝါ အလွန်​တန်ဖိုးထား​တဲ့​လူမျိုး ဖြစ်တယ်။ (လု. ၁၂:၃၂။ ယော. ၁၀:၁၆) အဲဒီလို အထူး​ဆက်ဆံရေး ရထားတဲ့​အတွက် ယေဟောဝါကို ကျွန်တော်တို့ ကျေးဇူးတင်​ကြတယ်။ ကျေးဇူးတင်ကြောင်း ပြ​နိုင်တဲ့ နည်းတွေကို ဒီ​ဆောင်းပါး​မှာ ဆွေးနွေးပါမယ်။

၄။ ယေဟောဝါကို ကျေးဇူးတင်ကြောင်း ပြ​နိုင်တဲ့ နည်းတစ်နည်း​က ဘာလဲ။ ယေရှု ဘယ်လို ပြခဲ့​သလဲ။

^၄ ယေဟောဝါ​ဆီ အကြွင်းမဲ့ ဆက်ကပ်​အပ်နှံခြင်း​အားဖြင့် ကျေးဇူးတင်ကြောင်း ကျွန်တော်တို့ ဖော်ပြ​ကြတယ်။ ကျွန်တော်တို့ကို ယေဟောဝါ ပိုင်​ကြောင်း၊ ဘုရားကို လိုလိုလားလား လက်အောက်ခံ​လို​ကြောင်း နှစ်ခြင်း​ခံ​ခြင်းအားဖြင့် လူအများ​ရှေ့ ဖော်ပြ​ကြတယ်။ (ဟီ. ၁၂:၉) ယေရှုလည်း နှစ်ခြင်း​ခံ​ချိန်မှာ အလားတူ ဖော်ပြခဲ့တယ်။ “ဘုရားသခင်၊ အလိုတော်​ဆောင်​တာ​ဟာ ကျွန်တော့်​အတွက် ကြည်နူးစရာ​ပါ” လို့ ယေဟောဝါကို ပြော​လိုက်တာပါပဲ။ (ဆာ. ၄၀:၇၊ ၈) ယေရှုဟာ ဘုရားဆီ အပ်နှံ​ထားတဲ့ လူမျိုးအဝင်​ဖြစ်ပေမဲ့ ယေဟောဝါ​အလိုတော် ဆောင်ဖို့ ကိုယ့်ကိုယ်ကိုယ် ဆက်ကပ်​ခဲ့​တ​ယ်။

၅၊ ၆။ (က) ယေရှု နှစ်ခြင်း​ခံ​ချိန်မှာ ယေဟောဝါ ဘယ်လို တုံ့ပြန်​သလဲ။ (ခ) အရာခပ်သိမ်း​ကို ယေဟောဝါ ပိုင်​ပေ​မဲ့ ကျွန်တော်တို့ရဲ့ ဆက်ကပ်​အပ်နှံမှု​ကို တန်ဖိုး​ထားကြောင်း ဥပမာ​ပေးပါ။

^၅ ယေရှု နှစ်ခြင်းခံ​တာ​ကို ယေဟောဝါ ဘယ်လို တုံ့ပြန်​သလဲ။ “ယေရှု နှစ်ခြင်းခံ​ပြီး ရေ​ထဲ​က​နေ ပေါ်လာတာနဲ့ ကောင်းကင်​ပွင့်​လာပြီး ဘုရားသခင့် စွမ်းအားတော်​က ချိုးငှက်​သဏ္ဌာန်​နဲ့ ယေရှု​အပေါ် ဆင်းသက်​တာ​ကို သူမြင်ရတယ်။ ဒါ့ပြင် ‘သူဟာ ငါ​မြတ်နိုးတဲ့ ငါ့ရဲ့​ချစ်သားပဲ’ ဆိုတဲ့​အသံ ကောင်းကင်က​နေ ထွက်​လာတာ​ကိုလည်း ကြားရတယ်” လို့ ကျမ်းစာ​ပြောတယ်။ (မ. ၃:၁၆၊ ၁၇) ယေရှုကို ကောင်းကင်ဖခင် ပိုင်ဆိုင်​ပြီးသား​ဖြစ်ပေမဲ့ ဖခင်ရဲ့​အလိုတော်ကို အကြွင်းမဲ့ ထမ်းဆောင်​လို​စိတ် ရှိကြောင်း တွေ့ရတဲ့​အခါ ယေဟောဝါ ဝမ်းမြောက်​တ​ယ်။ ကျွန်တော်တို့ရဲ့ ဆက်ကပ်​အပ်နှံမှု​ကိုလည်း ယေဟောဝါ လက်ခံ​ပြီး ကောင်းချီး​ပေးပါလိမ့်မယ်။—ဆာ. ၁၄၉:၄။

^၆ လူတစ်ယောက် ခြံ​ထဲမှာ ပန်းပင်​တွေ စိုက်​ထားတယ်လို့ မြင်ယောင်​ကြည့်ပါ။ တစ်နေ့ သမီး​ဖြစ်​သူက ပန်း​တစ်ပွင့် ခူး​ပြီး လက်ဆောင် လာ​ပေးတယ်။ ပန်းတွေ​ကို ဖခင် ပိုင်​ပြီးသား​ပဲ။ သူ​ပိုင်​ပြီးသား​ကို သမီး​က ဘယ်လို ပေးနိုင်​မှာ​လဲ။ မေတ္တာပြည့်​ဝ​တဲ့ ဖခင်​ဟာ အဲဒီလို မစဉ်းစား​ဘူး။ အဲဒီအစား သမီးလေး​ရဲ့ မေတ္တာ​လက်ဆောင်​အဖြစ် လက်ခံ​ပြီး ပန်းခြံ​ထဲ​က တခြား​ပန်း​တွေ​ထက် သမီး​ပေးတဲ့​ပန်း​ကို ပို​တန်ဖိုးထား​မှာ သေချာ​တ​ယ်။ ယေဟောဝါလည်း ကျွန်တော်တို့ရဲ့ အကြွင်းမဲ့ ဆည်းကပ်​ဝတ်ပြုမှု​ကို အလားတူ​တန်ဖိုး​ထားတယ်။—ထွ. ၃၄:၁၄။

၇။ လိုလိုလားလား အမှုဆောင်​နေ​သူတွေ​အပေါ် ယေဟောဝါရဲ့ သဘောထားကို မာလခိ ဘယ်လို ဖော်ပြသလဲ။

^၇ မာလခိ ၃:၁၆ ကိုဖတ်ပါ။ သင်ဟာ မအပ်နှံ​ရ​သေး​ဘူး၊ နှစ်ခြင်း​မခံရ​သေး​ဘူးဆိုရင် အဲဒါတွေ​ရဲ့ အရေးကြီးမှုကို စဉ်းစားပါ။ သင်​မွေး​ကတည်းက သင့်ကို ယေဟောဝါ ပိုင်​ပြီးသား​ပဲ။ ဒါပေမဲ့ ယေဟောဝါရဲ့ အချုပ်အခြာအာဏာကို အသိအမှတ်ပြု​တဲ့​အနေနဲ့ ဆက်ကပ်​အပ်နှံ​ပြီး အလိုတော်​ဆောင်​မယ်​ဆိုရင် ဘုရား အလွန်​ပျော်​ပါလိမ့်မယ်။ (ပညာ. ၂၃:၁၅) လိုလိုလားလား အမှုဆောင်​နေ​သူတွေကို ယေဟောဝါ သိ​ပြီး သူတို့ရဲ့​နာမည်ကို “အောက်မေ့​ရာ​စာစောင်” မှာ ရေးမှတ်​ထားတယ်။

၈၊ ၉။ “အောက်မေ့​ရာ​စာစောင်” မှာ နာမည် ရေးမှတ်​ခံရသူတွေ​ဆီကနေ ယေဟောဝါ ဘာ​တောင်းဆို​သလဲ။

 ^၈ လူမျိုးတော်​အဖြစ် “အောက်မေ့​ရာ​စာစောင်” မှာ နာမည်​ရေးမှတ်​ခံရပြီ​ဆိုရင် လုပ်​ရမယ့်​တာဝန် လိုက်ပါ​လာတယ်။ ‘ယေဟောဝါကို ကြောက်ရွံ့​ရိုသေပြီး နာမတော်​အကြောင်း တွေးတောဆင်ခြင်’ ရမယ်လို့ မာလခိ ပြောတယ်။ တခြားသူ ဒါမှမဟုတ် တခြားအရာကို ဆည်းကပ်​မယ်​ဆိုရင် အသက်စာစောင်​ကနေ နာမည် ပယ်ဖျက်​ခံရမယ်။—ထွ. ၃၂:၃၃။ ဆာ. ၆၉:၂၈။

^၉ ယေဟောဝါ​ဆီ ဆက်ကပ်​အပ်နှံခြင်း​ဆိုတာ အလိုတော်​ဆောင်ဖို့ ကတိပြု​ပြီး နှစ်ခြင်းခံ​ရုံ​လောက်​ပဲ မဟုတ်ဘူး။ အဲဒါတွေ​က ခဏတစ်ဖြုတ်​နဲ့ ပြီး​သွားပေ​မဲ့ ယေဟောဝါ​လူမျိုး​အဖြစ် ရပ်တည်​တာ​က​တော့ အခုရော၊ အနာဂတ်​မှာပါ အသက်ရှင်​နေသရွေ့ ဆက်လုပ်​ဆောင်သွား​ရမယ့်​အရာ ဖြစ်တယ်။—၁ ပေ. ၄:၁၊ ၂။

၁၀။ ယေဟောဝါ အမှုဆောင်သူ​နဲ့ မ​ဆောင်​သူရဲ့ ကွာခြားချက်​က ဘာလဲ။

^၁၀ ရှေ့​ဆောင်းပါး​မှာ ကာ​အိ​န၊ ရှောလမုန်၊ အစ္စရေးတွေ​အကြောင်း ဆွေးနွေး​ခဲ့ကြတယ်။ သူတို့​အားလုံး ယေဟောဝါကို ကိုးကွယ်​တ​ယ်လို့​ပြော​ပေ​မဲ့ အကြွင်းမဲ့​တော့ မဟုတ်ဘူး။ ယေဟောဝါ ပိုင်ဆိုင်​သူတွေဟာ ဖြောင့်မတ်ခြင်း​ဘက် အခိုင်အမာ ရပ်တည်​ပြီး ဆိုးညစ်​မှု​ကို ငြင်းပယ်​ရမှာ​ဖြစ်ကြောင်း သူတို့ရဲ့ ဖြစ်ရပ်တွေ​က ဖော်ပြတယ်။ (ရော. ၁၂:၉) ဒါကြောင့် “ဖြောင့်မတ်သူ​နဲ့ ဆိုးညစ်သူ၊ ဘုရား​အမှုဆောင်သူ​နဲ့ ဘုရား​အမှု မဆောင်​သူရဲ့ ကွာခြားချက်ကို မင်းတို့ မြင်ရ​ဦး​မယ်” လို့ ယေဟောဝါ ပြောတယ်။—မာ​လ. ၃:၁၈။

၁၁။ ယေဟောဝါကို အကြွင်းမဲ့ ဆည်းကပ်​ကြောင်း ဘာကြောင့် သိသာ​ထင်ရှား​သင့်သလဲ။

^၁၁ ယေဟောဝါကို ကျေးဇူးတင်ကြောင်း ပြ​နိုင်တဲ့ နည်းတစ်နည်း ရှိသေးတယ်။ ‘လူအားလုံး​ရှေ့ တိုးတက်မှု​ကို ထင်ရှား​မြင်သာ​စေ’ ရမယ်။ (၁ တိ. ၄:၁၅။ မ. ၅:၁၆) ‘ယေဟောဝါကို ငါ အကြွင်းမဲ့ ကိုးစား​ကြောင်း သိသာ​ထင်ရှား​ရဲ့​လား။ ယေဟောဝါ​သက်သေ​အဖြစ် ထုတ်ပြော​ဖို့ အခွင့်အရေး ရှာယူ​သလား’ လို့ ကိုယ့်ကိုယ်ကိုယ် မေးပါ။ ကျွန်တော်တို့ဟာ ယေဟောဝါ ပိုင်ဆိုင်ရာ​ဖြစ်ကြောင်း တခြား​သူတွေကို ထုတ်​မပြော​ရင် ယေဟောဝါ အလွန်​ဝမ်းနည်း​ပါလိမ့်မယ်။—ဆာ. ၁၁၉:၄၆။ မာကု ၈:၃၈ ကိုဖတ်ပါ။

၁၂၊ ၁၃။ ယေဟောဝါ​သက်သေ​အဖြစ် ခွဲခြား​ရ​ခက်​အောင် တချို့ ဘာတွေ​လုပ်ကြ​သလဲ။

 ^၁၂ ဝမ်းနည်းစရာကတော့ သက်သေခံ​တချို့ဟာ “လောက​စိတ်ဓာတ်” ဝင်ခွင့်​ပြု​ပြီး “ဘုရား​အမှုဆောင်သူ​နဲ့ ဘုရား​အမှု မ​ဆောင်​သူရဲ့ ကွာခြားချက်ကို” ဝေဝါး​သွား​စေ​ကြတယ်။ (၁ ကော. ၂:၁၂) “အပြစ်​ရှိတဲ့ အလိုဆန္ဒ​အတိုင်း” လိုက်သွား​ကြတယ်။ (ဧ. ၂:၃) ဥပမာ၊ အထပ်ထပ် သတိပေး​နေတဲ့​ကြား ဣန္ဒြေမရှိ​တဲ့ ဝတ်စား​ဖြီးလိမ်းပုံ​ကို နှစ်သက်​နေတုန်းပဲ။ ခရစ်ယာန်​စုဆုံမှု​တွေ​မှာ​တောင် ကျပ်​လွန်း၊ ဖော်​လွန်း​တာတွေ ဝတ်​လာကြတယ်။ ထူးခြား​ဆန်းပြား​တဲ့ ဆံပင်ပုံစံတွေ ထား​လာကြတယ်။ (၁ တိ. ၂:၉၊ ၁၀) လူအုပ်​ထဲ ရောက်သွားတဲ့​အခါ ယေဟောဝါ ပိုင်ဆိုင်သူ​လား၊ “လောက​နဲ့ မိတ်ဖွဲ့​သူ” လား ဆိုတာ ခွဲ​ဖို့ ခက်​သွားတယ်။—ယာ. ၄:၄။

^၁၃ တချို့က လောက​အကျင့်​တွေ​ကို ပြတ်ပြတ်သားသား မငြင်းပယ်​ကြဘူး။ ပါတီပွဲ​တွေ​မှာ ခရစ်ယာန်တွေ လက်​သင့်​မခံနိုင်​တဲ့ အ​က​တွေ၊ အမူအကျင့်​တွေ​ကို လုပ်​လာတယ်။ လူမှု​မီဒီယာ​တွေ​မှာ ခရစ်ယာန်မဆန်​တဲ့ ဓာတ်ပုံတွေ၊ မှတ်ချက်​တွေ တင်​လာကြတယ်။ ကြီးလေး​တဲ့​အပြစ်​အဖြစ် အသင်းတော်ရဲ့ ဆုံးမမှု ခံရမှာ မဟုတ်ပေ​မဲ့ ယေဟောဝါရဲ့​လူမျိုးအလယ် အမူအကျင့်ကောင်း ထိန်းသိမ်း​နေတဲ့ ရွယ်တူတွေ​အပေါ် မကောင်းတဲ့​သြဇာ သက်ရောက်​စေနိုင်တယ်။—၁ ပေတရု ၂:၁၁၊ ၁၂ ကိုဖတ်ပါ။

၁၄။ ယေဟောဝါနဲ့ ရင်းနှီးတဲ့​ဆက်ဆံရေးကို ကာကွယ်ဖို့ ဘာလုပ်ရမလဲ။

^၁၄ “သွေးသား​အလိုဆန္ဒ၊ မျက်စိ​ရဲ့​အလိုဆန္ဒ၊ မိမိ​စည်းစိမ်​အကြောင်း ဝါကြွားခြင်း” ကို လောက,က အလွန်​အားပေးအားမြှောက် လုပ်နေတယ်။ (၁ ယော. ၂:၁၆) ဒါပေမဲ့ ကျွန်တော်တို့ကို ယေဟောဝါ ပိုင်တဲ့​အတွက် ‘ဘုရားတရားမဲ့​တာတွေ၊ လောကရဲ့ မကောင်းတဲ့ အလိုဆန္ဒတွေကို ငြင်းပယ်ဖို့၊ လက်ရှိ လောက​စနစ်​မှာ ချင့်ချိန်​တတ်ဖို့၊ ဖြောင့်မတ်တဲ့ လမ်းစဉ်​အတိုင်း နေထိုင်ဖို့၊ ဘုရားတရား ကိုင်းရှိုင်း​ဖို့’ ကျမ်းစာမှာ အားပေး​ထားတယ်။ (တိ. ၂:၁၂) ကျွန်တော်တို့ရဲ့ အပြောအဆို၊ စားသောက်​ပုံ၊ ဝတ်စား​ဖြီးလိမ်းပုံ၊ အလုပ်အကိုင်​နဲ့ အရာအားလုံး​မှာ ယေဟောဝါကို အကြွင်းမဲ့ ဆည်းကပ်​သူတွေ​ဖြစ်ကြောင်း သိသာ​ထင်ရှား​နေ​သင့်တယ်။—၁ ကောရိန္သု ၁၀:၃၁၊ ၃၂ ကိုဖတ်ပါ။

၁၅။ ညီအစ်ကို/မတွေကို ဘာကြောင့် မေတ္တာနဲ့ ကြင်နာစွာ ဆက်ဆံ​သင့်သလဲ။

^၁၅ ညီအစ်ကို/မတွေကို ဆက်ဆံပုံ​အားဖြင့်​လ​ည်း ယေဟောဝါကို ကျေးဇူးတင်ကြောင်း ဖော်ပြ​နိုင်တယ်။ သူတို့ကို​လည်း ယေဟောဝါ ပိုင်တယ်။ အဲဒီ​အချက်ကို အမှတ်ရနေ​မယ်​ဆိုရင် ညီအစ်ကို/မတွေကို အမြဲ မေတ္တာနဲ့ ကြင်နာစွာ ဆက်ဆံပါ​လိမ့်မယ်။ (၁ သက်. ၅:၁၅) ယေရှု​က “အချင်းချင်း ချစ်​မယ်​ဆိုရင် ခင်ဗျားတို့ဟာ ကျွန်တော့်​တပည့်တွေ​ပဲ​ဆိုတာ လူတွေ​သိ​လိမ့်မယ်” လို့ နောက်လိုက်တွေ​ကို ပြောတယ်။—ယော. ၁၃:၃၅။

၁၆။ လူမျိုးတော်​နဲ့ပတ်သက်တဲ့ ယေဟောဝါရဲ့ ခံစားချက်ကို မောရှေ​ပညတ်​က ဘယ်လို ဖော်ပြသလဲ။

^၁၆ အသင်းတော်မှာ အချင်းချင်း ဘယ်လို ဆက်ဆံ​သင့်​ကြောင်း နားလည်ဖို့ ဒီအချက်ကို စဉ်းစား​ကြည့်ပါ။ ယေဟောဝါရဲ့ ဗိမာန်တော်​ထဲ​က အသုံးအဆောင်တွေကို စင်ကြယ်​တဲ့​ဝတ်ပြုရေး​အတွက် သီးသန့်​ထားတယ်၊ ဆက်ကပ်​ထားတယ်။ အဲဒါတွေကို ဘယ်လို ကိုင်တွယ်​ရမယ်ဆိုတာ မောရှေ​ပညတ်​မှာ အသေးစိတ် ညွှန်ကြား​ထားတယ်။ ချိုးဖောက်​သူဟာ သေဒဏ်​ခံရမယ်။ (တော. ၁:၅၀၊ ၅၁) ဝတ်ပြုရေး​မှာ​သုံးတဲ့ သက်​မဲ့ အသုံးအဆောင်တွေကို​တောင် ယေဟောဝါ ဂရုစိုက်​တ​ယ်​ဆိုရင် မိမိ​လူမျိုး​အဖြစ် ရွေးချယ်​ထားတဲ့ ဆက်ကပ်​အပ်နှံထားသူ​တွေ​ကို ပိုပြီး ဂရုစိုက်​ပါလိမ့်မယ်။ ယေဟောဝါ​က “မင်းတို့ကို ထိတဲ့သူ​ဟာ ငါ့​မျက်ဆန်​ကို ထိ​တဲ့​သူ​ပဲ” လို့​ပြောတယ်။—ဇာ. ၂:၈။

၁၇။ ယေဟောဝါ ဘာကို “အာရုံစိုက်​နားထောင်​နေ” သလဲ။

^၁၇ ယေဟောဝါ​က ကျွန်တော်တို့ အချင်းချင်း စကား​ပြောတာကို “အာရုံစိုက်​နားထောင်​နေတယ်။” (မာ​လ. ၃:၁၆) “မိမိရဲ့​လူ ဘယ်သူ​လဲ​ဆိုတာ သိတယ်။” (၂ တိ. ၂:၁၉) ကျွန်တော်တို့ လုပ်​သ​မျှ၊ ပြော​သ​မျှ​ကို သိတယ်။ (ဟီ. ၄:၁၃) ညီအစ်ကို/မတွေကို မကြင်မနာ ပြောဆို​ဆက်ဆံတာကို​လ​ည်း “အာရုံစိုက် နားထောင်​နေတယ်။” အချင်းချင်း ဧည့်ဝတ်​ကျေပွန်၊ ရက်ရော၊ ခွင့်လွှတ်၊ ကြင်နာ​တာ​ကို ယေဟောဝါ​သိကြောင်း စိတ်ချ​နိုင်တယ်။—ဟီ. ၁၃:၁၆။ ၁ ပေ. ၄:၈၊ ၉။

၁၈။ ယေဟောဝါရဲ့​လူမျိုး ဖြစ်ခွင့်​ရလို့ ကျေးဇူးတင်ကြောင်း ဘယ်လို ဖော်ပြ​နိုင်သလဲ။

^၁၈ ယေဟောဝါရဲ့​လူမျိုး ဖြစ်ခွင့်​ရလို့ ကျေးဇူးတင်ကြောင်း ကျွန်တော်တို့ ပြ​ချင်ကြတယ်။ ကိုယ့်ကိုယ်ကိုယ် ဆက်ကပ်​အပ်နှံခြင်း​အားဖြင့် ကျွန်တော်တို့ကို ယေဟောဝါ​ပိုင်​ကြောင်း အသိအမှတ်ပြုကြတယ်။ ကျွန်တော်တို့ဟာ “ကောက်ကျစ်စဉ်းလဲ​တဲ့ လူမျိုးဆက် အလယ်မှာ” နေထိုင်​ရပေမဲ့ “အပြစ်တင်​စ​ရာ မရှိသူတွေ၊ ရိုးသား​ဖြူစင်​သူတွေ၊ . . . လောကမှာ အလင်းဆောင်သူ​တွေ​အဖြစ် ထွန်းလင်း” နေ​ကြောင်း လူတွေကို သိစေချင်​တ​ယ်။ (ဖိ. ၂:၁၅) မကောင်းမှု​ကို ပြတ်ပြတ်သားသား တွန်းလှန်​ကြတယ်။ (ယာ. ၄:၇) ညီအစ်ကို/မတွေကို ယေဟောဝါ ပိုင်ဆိုင်​ကြောင်း အသိအမှတ်ပြု​ပြီး လေးစား​ချစ်ခင်​ကြတယ်။—ရော. ၁၂:၁၀။

၁၉။ ယေဟောဝါ​က မိမိ​ပိုင်ဆိုင်​သူတွေကို ဘယ်လို ကောင်းချီးပေး​သလဲ။

^၁၉ “ယေဟောဝါ​က မိမိရဲ့​လူတွေကို ပစ်ထား​မှာ မဟုတ်ဘူး” လို့ ကျမ်းစာ ကတိ​ပေးတယ်။ (ဆာ. ၉၄:၁၄) ဘယ်လို အဖြစ်ဆိုးတွေပဲ ကြုံရ​ပါ​စေ အဲဒီ​ကတိကို ယုံကြည်​နိုင်တယ်။ သေခြင်းက​တောင် ယေဟောဝါရဲ့ မေတ္တာ မခံစားရ​အောင် မတားဆီး​နိုင်​ဘူး။ (ရော. ၈:၃၈၊ ၃၉) “အသက်ရှင်​မယ်​ဆိုရင် ယေဟောဝါ​အတွက်ပဲ ရှင်​မယ်။ သေရ​မယ်​ဆိုရင်​လ​ည်း ယေဟောဝါ​အတွက်ပဲ သေ​မယ်။ ရှင်​သ​ည်​ဖြစ်စေ၊ သေ​သ​ည်​ဖြစ်စေ ကျွန်တော်တို့ကို ယေဟောဝါ ပိုင်တယ်။” (ရော. ၁၄:၈) သေဆုံးသွားတဲ့ သစ္စာရှိ​မိတ်ဆွေတွေ ထမြောက်​လာမယ့်​နေ့​ကို ကျွန်တော်တို့ ထက်သန်​စွာ စောင့်မျှော်​နေတယ်။ (မ. ၂၂:၃၂) လောလောဆယ်​လ​ည်း ကောင်းချီး​များစွာ ခံစား​နေရတယ်။ “ယေဟောဝါကို ဘုရားသခင်​အဖြစ် ကိုးကွယ်တဲ့​လူမျိုး၊ ပိုင်ဆိုင်ရာ​အဖြစ် ဘုရား​ရွေးချယ်​ထားတဲ့ လူတွေဟာ ပျော်ရွှင်​ချမ်းမြေ့​တ​ယ်” လို့ ကျမ်းစာမှာ ပြော​ထားတဲ့​အတိုင်း​ပါ​ပဲ။—ဆာ. ၃၃:၁၂။