“ကျွန်တော့်နိုင်ငံဟာ ဒီလောကနဲ့ မပတ်သက်ဘူး”
“ကျွန်တော် မွေးဖွားပြီး ဒီလောကကို ရောက်လာတာ အမှန်တရားကို သက်သေခံဖို့ပဲ။”—ယော. ၁၈:၃၇။
၁၊ ၂။ (က) ဒီလောက ဘယ်လို ပိုကွဲပြားနေသလဲ။ (ခ) ဒီဆောင်းပါးမှာ ဘယ်မေးခွန်းတွေကို သုံးသပ်ကြမလဲ။
“ငယ်ငယ်ကတည်းက မတရားတာတွေကိုပဲ မြင်ခဲ့ရတယ်။ ဒါကြောင့် ပြုပြင်ပြောင်းလဲရေးဝါဒကို ထောက်ခံပြီး လက်ရှိနိုင်ငံရေးစနစ်ကို ဆန့်ကျင်ခဲ့တယ်။ အကြမ်းဖက်သမားတစ်ယောက်နဲ့ အကြာကြီး တွဲခဲ့တယ်” လို့ ဥရောပတောင်ပိုင်းက ညီအစ်မတစ်ယောက် အတိတ်အကြောင်း ပြောပြတယ်။ အကြမ်းဖက်မှုတွေမှာ ပါဝင်ဖူးတဲ့ အာဖရိကတောင်ပိုင်းက ညီအစ်ကိုတစ်ယောက်လည်း “ကျွန်တော့်မျိုးနွယ်စုဟာ တခြားမျိုးနွယ်စုထက် ပိုသာတယ်လို့ ယူဆပြီး နိုင်ငံရေးပါတီတစ်ခုမှာ ဝင်ခဲ့တယ်။ ရန်ဘက်တွေ၊ မျိုးနွယ်စုတူရင်တောင် တခြားပါတီ ထောက်ခံသူတွေကို လှံနဲ့ထိုးသတ်ဖို့ သင်ပေးခံခဲ့ရတယ်” လို့ ပြောတယ်။ ဥရောပအလယ်ပိုင်းမှာနေတဲ့ ညီအစ်မတစ်ယောက်လည်း “ကျွန်မမှာ ခွဲခြားစိတ် ရှိတယ်။ လူမျိုးမတူ၊ ဘာသာမတူသူတွေကို သိပ်မုန်းခဲ့တာ” လို့ ဝန်ခံတယ်။
၂ အဲဒီသုံးယောက်မှာ ရှိခဲ့တဲ့ သဘောထားမျိုး ဒီနေ့လောကမှာ ပျံ့နှံ့နေတယ်။ အကြမ်းဖက် လွတ်လပ်ရေး လှုပ်ရှားမှုတွေ တိုးများလာတယ်။ နိုင်ငံရေးအယူအဆ ကွဲပြားမှုတွေ ပိုများလာတယ်။ နိုင်ငံများစွာမှာ တိုင်းတစ်ပါးသားတွေကို ပိုမုန်းလာကြတယ်။ ကျမ်းစာကြိုဟောတဲ့အတိုင်း ဒီနောက်ဆုံးကာလမှာ လူတွေဟာ “ညှိနှိုင်းလို့ မရ” ကြတော့ဘူး။ (၂ တိ. ၃:၁၊ ၃) ဒီလောက ပိုကွဲပြားနေချိန်မှာ ခရစ်ယာန်တွေ စည်းလုံးမှုကို ဘယ်လို ထိန်းသိမ်းနိုင်မလဲ။ နိုင်ငံရေးရှုပ်ထွေးနေတဲ့ ပထမရာစုရဲ့ အခြေအနေတစ်ခုကို ယေရှု ကိုင်တွယ်ခဲ့ပုံကနေ များစွာ သင်ယူနိုင်ပါတယ်။ အဓိကအချက်သုံးချက်ကို သုံးသပ်သွားပါမယ်– ခွဲထွက်ရေး လှုပ်ရှားမှုတွေမှာ ယေရှု ဘာကြောင့် မပါဝင်ခဲ့သလဲ။ ဘုရားသခင့် ကျေးကျွန်တွေ နိုင်ငံရေးမှာ မပါသင့်ကြောင်း ယေရှု ဘယ်လို ပုံသက်သေပြခဲ့သလဲ။ အကြမ်းဖက်နည်းကို လုံးဝ မသုံးသင့်ကြောင်း ယေရှု ဘယ်လို သင်ပေးခဲ့သလဲ။
လွတ်လပ်ရေး လှုပ်ရှားမှုအပေါ် ယေရှုရဲ့ သဘောထား
၃၊ ၄။ (က) ယေရှုခေတ်က ဂျူးတွေ နိုင်ငံရေးနဲ့ပတ်သက်ပြီး ဘာမျှော်လင့်ခဲ့ကြသလဲ။ (ခ) အဲဒါက ယေရှုရဲ့ တပည့်တွေအပေါ် ဘယ်လို အကျိုးသက်ရောက်ခဲ့သလဲ။
၃ ယေရှုဟောပြောတဲ့ ဂျူးများစွာဟာ ရောမလက်အောက်ကနေ လွတ်မြောက်ချင်နေကြတယ်။ ဂျူးအစွန်းရောက်သမားတွေက အဲဒီစိတ်ဓာတ်ကို သွေးထိုးပေးတယ်။ အစွန်းရောက်သမားအများစုက ဂါလိလဲနယ်သား ဂျုဒပ်စ်နောက်ကို လိုက်ကြတယ်။ သူဟာ လူများစွာကို လှည့်စားခဲ့တဲ့ ပထမရာစု မေရှိယအတုအယောင်ပဲ။ “ရောမတွေကို ပုန်ကန်ဖို့ လှုံ့ဆော်ပြီး အခွန်ဆက်တဲ့သူတွေကို သူရဲဘောကြောင်သူလို့ သတ်မှတ်တယ်” ဆိုပြီး ဂျူးသမိုင်းပညာရှင် ဂျိုစီဖတ်စ် ပြောတယ်။ ဂျုဒပ်စ်ကို ရောမတွေ သတ်ပစ်လိုက်တယ်။ (တ. ၅:၃၇) အစွန်းရောက်သမားတချို့က ရည်မှန်းချက်ပြည့်ဖို့ အကြမ်းဖက်နည်းကို သုံးလာကြတယ်။
၄ ဂျူးအများစုကတော့ မေရှိယကို မျှော်လင့်နေကြတယ်။ မေရှိယ ရောက်လာရင် အစ္စရေးတွေကို ရောမလက်အောက်ကနေ လွတ်မြောက်စေပြီး ဂုဏ်တက်စေမယ်လို့ ထင်နေကြတာ။ (လု. ၂:၃၈။ ၃:၁၅) မြေကြီးပေါ်မှာ အစ္စရေးတွေအတွက် နိုင်ငံကို ပြန်တည်ထောင်ပေးမယ်လို့ ယူဆနေကြတာ။ အဲဒီအခါ တကွဲတပြားဖြစ်နေတဲ့ ဂျူးသန်းပေါင်းများစွာ အမိမြေကို ပြန်လာနိုင်ကြမယ်။ နှစ်ခြင်းဆရာ ယောဟန်ကတောင် ယေရှုကို “ခင်ဗျားဟာ ကျွန်တော်တို့ စောင့်မျှော်နေတဲ့သူလား၊ နောက်တစ်ယောက်ကို စောင့်မျှော်ရမှာလား” လို့မေးခဲ့တယ်။ (မ. ၁၁:၂၊ ၃) ဂျူးတွေရဲ့ မျှော်လင့်ချက်ကို ဖြည့်ဆည်းပေးမှာ နောက်တစ်ယောက်လားဆိုတာ သိချင်လို့ ဖြစ်နိုင်တယ်။ ယေရှု ရှင်ပြန်ထမြောက်ပြီးနောက် ဧမောက်ရွာသွားတဲ့လမ်းမှာ ဆုံတဲ့ တပည့်နှစ်ယောက်လည်း အစ္စရေးတွေကို မေရှိယ လွတ်မြောက်စေမယ်လို့ ထင်ခဲ့ကြတယ်။ (လုကာ ၂၄:၂၁ ကိုဖတ်ပါ။) မကြာခင်မှာ တမန်တော်တွေလည်း “သခင်၊ အစ္စရေးလူမျိုးအတွက် နိုင်ငံကို အခု ပြန်တည်ထောင်ပေးမှာလား” လို့ ယေရှုကို မေးခဲ့ကြတယ်။—တ. ၁:၆။
၅။ (က) ဂါလိလဲနယ်သားတွေ ယေရှုကို ဘာကြောင့် ဘုရင်မြှောက်ချင်ကြတာလဲ။ (ခ) ယေရှု ဘယ်လို တည့်မတ်ပေးခဲ့သလဲ။
၅ အဲဒီမျှော်လင့်ချက်တွေကြောင့် ယေရှုကို ဂါလိလဲနယ်သားတွေ ဘုရင်မြှောက်ချင်ကြတာ ဖြစ်နိုင်တယ်။ ယေရှုဟာ အဟောအပြောကောင်းသူ၊ လူနာတွေကို ကုသပေးနိုင်သူ၊ ဆာလောင်သူတွေကို ကျွေးမွေးနိုင်သူဆိုတော့ အကောင်းဆုံးခေါင်းဆောင် ဖြစ်မယ်လို့ လူတွေ ထင်ခဲ့ကြတယ်။ ယောက်ျား ၅,၀၀၀ ကို ကျွေးမွေးပြီးနောက် “သူတို့ရောက်လာပြီး အတင်းအကျပ် ဘုရင်လုပ်ခိုင်းတော့မယ်ဆိုတာ သိနေတဲ့အတွက် ယေရှုက တောင်ပေါ်ကို တစ်ကိုယ်တည်း ရှောင်ထွက်သွားပြန်တယ်။” (ယော. ၆:၁၀-၁၅) လူတွေ စိတ်ပြန်ငြိမ်သွားတဲ့ နောက်တစ်နေ့၊ ဂါလိလဲအိုင်တစ်ဖက်ကမ်းမှာ ယေရှုက မိမိရဲ့လုပ်ငန်းဟာ ရုပ်ပစ္စည်းထောက်ပံ့ဖို့ မဟုတ်ဘဲ နိုင်ငံတော်သတင်း ဟောပြောဖို့ဖြစ်ကြောင်း ရှင်းပြတယ်။ “ပျက်စီးတတ်တဲ့အစာကို မဟုတ်ဘဲ ထာဝရအသက်ရစေတဲ့ အစာကို ရဖို့ ကြိုးစားကြပါ” လို့ ပြောခဲ့တယ်။—ယော. ၆:၂၅-၂၇။
၆။ နိုင်ငံရေးအာဏာရဖို့ မကြိုးစားခဲ့ကြောင်း ယေရှု ဘယ်လို ရှင်းရှင်းလင်းလင်း ဖော်ပြသလဲ။ (ဆောင်းပါးအစမှာပါတဲ့ ပုံကို ကြည့်ပါ။)
၆ ဂျေရုဆလင်မှာ နိုင်ငံပြန်တည်ထောင်မယ်လို့ နောက်လိုက်တချို့ မျှော်လင့်နေကြောင်း ယေရှု မသေဆုံးခင်မှာ သိလိုက်တယ်။ ဒါကြောင့် မိုင်နာပုံဥပမာ ပြောပြီး တည့်မတ်ပေးတယ်။ အဲဒီပုံဥပမာအရ “မင်းညီမင်းသား” ယေရှုဟာ အဝေးကို အချိန်အတန်ကြာ ထွက်သွားရမယ်။ (လု. ၁၉:၁၁-၁၃၊ ၁၅) နိုင်ငံရေးမှာ ကြားနေကြောင်း ရောမအာဏာပိုင်တွေကိုလည်း ယေရှု ပြောခဲ့တယ်။ နိုင်ငံရေး မငြိမ်မသက်ဖြစ်အောင် ယေရှု လှုံ့ဆော်မှာကို ပိလတ်မင်း စိုးရိမ်လို့ “မင်းဟာ ဂျူးတွေရဲ့ဘုရင် ဟုတ်သလား” လို့မေးတယ်။ (ယော. ၁၈:၃၃) “ကျွန်တော့်နိုင်ငံဟာ ဒီလောကနဲ့ မပတ်သက်ဘူး” လို့ ယေရှု ဖြေတယ်။ (ယော. ၁၈:၃၆) ယေရှုရဲ့နိုင်ငံဟာ ကောင်းကင်မှာ ရှိမှာဖြစ်လို့ လောကနိုင်ငံရေးမှာ ယေရှု မပါဝင်ဘူး။ မြေကြီးပေါ် လာတာ “အမှန်တရားကို သက်သေခံဖို့ပဲ” လို့ ပိလတ်ကို ပြောတယ်။—ယောဟန် ၁၈:၃၇ ကိုဖတ်ပါ။
လောကပြဿနာတွေကို အာရုံစိုက်နေသလား၊ ဘုရားနိုင်ငံတော်ကို အာရုံစိုက်နေသလား (အပိုဒ် ၇ ကိုကြည့်ပါ)
၇။ လွတ်လပ်ရေး လှုပ်ရှားမှုတွေကို စိတ်ထဲကနေတောင် မထောက်ခံဖို့ ဘာကြောင့် ခက်နိုင်သလဲ။
၇ ယေရှုလိုပဲ ကျွန်တော်တို့လည်း ကိုယ့်တာဝန်ကို ရှင်းရှင်းလင်းလင်း နားလည်ထားမယ်ဆိုရင် နိုင်ငံရေးလှုပ်ရှားမှုတွေကို ဘယ်နည်းနဲ့မှ၊ စိတ်ထဲကနေတောင် ထောက်ခံမှာ မဟုတ်ဘူး။ လွယ်တော့ မလွယ်ဘူး။ တိုက်နယ်ကြီးကြပ်မှူးတစ်ယောက် ပြောတယ်– “ကျွန်တော်တို့ဒေသမှာ လူတွေ ပိုပြီး အစွန်းရောက်လာကြတယ်။ လူမျိုးရေးစိတ် ပြင်းထန်လာတယ်။ နိုင်ငံရေးလှုပ်ရှားမှုတွေမှာ ပါဝင်လာကြတယ်။ နိုင်ငံရေးလွတ်လပ်မှုရှိမှ ဘဝတိုးတက်မယ်လို့ ထင်ကြတယ်။ ညီအစ်ကိုတွေကတော့ နိုင်ငံတော်သတင်း ဟောပြောခြင်းကို အာရုံစိုက်တဲ့အတွက် စည်းလုံးနေကြတယ်။ မတရားမှုနဲ့ တခြားပြဿနာတွေကို ဖြေရှင်းပေးဖို့ ဘုရားကိုပဲ မျှော်လင့်နေကြတယ်။”
ကွဲပြားစေတဲ့ နိုင်ငံရေးပြဿနာတွေကို ယေရှု ကိုင်တွယ်ခဲ့ပုံ
၈။ ပထမရာစုဂျူးတွေ ရင်ဆိုင်ရတဲ့ အခက်အခဲတစ်ခုကို ဖော်ပြပါ။
၈ မတရားမှုတွေကြောင့် နိုင်ငံရေးစိတ် ထကြွလာလေ့ရှိတယ်။ ယေရှုခေတ်မှာ အခွန်ကိစ္စဟာ နိုင်ငံရေးပြဿနာကြီး ဖြစ်တယ်။ အခွန်ပေး မပေး သေချာစေဖို့ ရောမတွေ သန်းခေါင်စာရင်း ကောက်တဲ့အတွက် အစောပိုင်းမှာ ဖော်ပြခဲ့တဲ့ ဂါလိလဲနယ်သား ဂျုဒပ်စ် ပုန်ကန်တာ ဖြစ်တယ်။ ယေရှုရဲ့စကားကို နားထောင်နေသူတွေ အပါအဝင် ရောမလက်အောက်ခံတွေဟာ ကုန်ပစ္စည်း၊ မြေ၊ အိမ်စတာတွေအတွက် အခွန်ပေးနေရတယ်။ အခွန်ခံတွေရဲ့ အကျင့်ပျက်ခြစားမှုက ဘဝကို ပိုခက်ခဲစေတယ်။ အခွန်ခံရာထူးအတွက် ငွေပေးဝယ်ပြီး ရာထူးရတဲ့အခါ အခွန်ငွေကနေ ချမ်းသာလာကြတယ်။ ယေရိခေါမြို့က အခွန်ခံမှူး ဇက်ခဲဟာ လူတွေဆီက ငွေညှစ်ပြီး ချမ်းသာလာသူ ဖြစ်တယ်။ (လု. ၁၉:၂၊ ၈) အခွန်ခံအများစုလည်း သူ့လိုပဲ ဖြစ်နိုင်တယ်။
၉၊ ၁၀။ (က) နိုင်ငံရေးကိစ္စမှာ ယေရှု ပါဝင်စေဖို့ ရန်သူတွေ ဘယ်လို အကွက်ဆင်ကြသလဲ။ (ခ) ယေရှုရဲ့ တုံ့ပြန်ပုံကနေ ဘာသင်ယူရသလဲ။ (ဆောင်းပါးအစမှာပါတဲ့ ပုံကို ကြည့်ပါ။)
၉ ယေရှုရဲ့ ရန်သူ၊ “ဟေရုဒ်ရဲ့ နောက်လိုက်တွေ” က အခွန်ကိစ္စမှာ ယေရှု ဘက်လိုက်မိအောင် အကွက်ဆင်ကြတယ်။ ရောမလက်အောက်ခံတွေ ပေးရတဲ့ “အခွန်” ဒေနာရိတစ်ပြားအကြောင်း မေးကြတယ်။ (မဿဲ ၂၂:၁၆-၁၈ ကိုဖတ်ပါ။) ဒီအခွန်က ရောမလက်အောက်ခံဖြစ်ကြောင်း အမှတ်ရစေတဲ့အတွက် ဂျူးတွေ မပေးချင်ကြဘူး။ အခွန်မပေးဖို့ ယေရှု ပြောခဲ့ရင် နိုင်ငံပုန်ကန်မှုနဲ့ စွဲချက်တင်နိုင်မယ်လို့ ရန်သူတွေ မျှော်လင့်နေကြတာ။ အခွန်ပေးဖို့ ပြောပြန်ရင်လည်း လူတွေရဲ့ ထောက်ခံမှု ဆုံးၡုံးသွားမယ်။
၁၀ အခွန်ကိစ္စမှာ ယေရှု ဘက်မလိုက်ခဲ့ဘူး။ “ဆီဇာနဲ့ဆိုင်တာ ဆီဇာကို ပေးပါ။ ဘုရားသခင်နဲ့ဆိုင်တာ ဘုရားသခင်ကို ပေးပါ” လို့ပြောတယ်။ (မ. ၂၂:၂၁) အခွန်ခံတွေ အကျင့်ပျက်ခြစားမှန်း ယေရှု သိပေမဲ့ အရေးကြီးကိစ္စကနေ အာရုံမလွဲစေချင်ဘူး။ လူ့ပြဿနာတွေရဲ့ ဖြေရှင်းနည်းဖြစ်တဲ့ ဘုရားနိုင်ငံတော်ကိုပဲ အာရုံစိုက်ခဲ့တယ်။ ဒီနည်းနဲ့ နောက်လိုက်အားလုံးအတွက် ပုံသက်သေ ချမှတ်ခဲ့တယ်။ ဘယ်လောက် မှန်မှန်၊ မှားမှား နိုင်ငံရေးမှာ မပါဝင်သင့်ဘူး။ ခရစ်ယာန်တွေဟာ မတရားမှုနဲ့ပတ်သက်ပြီး ပြင်းထန်တဲ့ အယူအဆတွေ မရှိဘူး။ မကောင်းကြောင်းတွေ မပြောဘူး။ ဘုရားနိုင်ငံတော်နဲ့ ဖြောင့်မတ်ခြင်းကိုပဲ ဦးစားထားကြတယ်။—မ. ၆:၃၃။
၁၁။ မတရားမှုကို တိုက်လှန်နိုင်တဲ့ အကောင်းဆုံးနည်းက ဘာလဲ။
၁၁ ယေဟောဝါသက်သေများစွာဟာ တစ်ချိန်ကရှိခဲ့တဲ့ ပြင်းထန်တဲ့ နိုင်ငံရေးအယူအဆတွေကို ဖယ်ရှားနိုင်ခဲ့ကြတယ်။ ဗြိတိန်နိုင်ငံက ညီအစ်မတစ်ယောက် ဒီလိုပြောတယ်– “တက္ကသိုလ်မှာ လူမှုရေးဘာသာရပ်တွေ သင်ပြီးနောက် နိုင်ငံရေးစိတ် ဝင်လာတယ်။ မတရားခံရပါများတော့ လူမည်းအခွင့်အရေးကို ကာကွယ်ပေးချင်တယ်။ အငြင်းအခုံဖြစ်တိုင်း အနိုင်ရပေမဲ့ စိတ်ပျက်လက်ပျက် ဖြစ်နေတုန်းပဲ။ လူမျိုးရေးစိတ်ကို လူတွေရဲ့ နှလုံးထဲကနေ နုတ်ပစ်ဖို့လိုကြောင်း နားမလည်ခဲ့ဘူး။ ကျမ်းစာ စလေ့လာတော့မှ ကိုယ်ကစပြီး နုတ်ပစ်ရမယ်ဆိုတာ သိလာတယ်။ ပြောင်းလဲနိုင်ဖို့ လူဖြူညီအစ်မတစ်ယောက် စိတ်ရှည်ရှည် ကူညီပေးခဲ့တယ်။ အခု ကျွန်မ လက်သင်္ကေတပြ အသင်းတော်မှာ မှန်မှန်ရှေ့ဆောင်အဖြစ် အမှုဆောင်နေပြီ။ လူအမျိုးမျိုးကို ဟောပြောဖို့ ကြိုးစားနေပြီ။”
“ဓားကို ဓားအိမ်ထဲ ပြန်ထည့်လိုက်ပါ”
၁၂။ တပည့်တွေကို ယေရှု ရှောင်ခိုင်းတာ ဘယ် “တဆေး” လဲ။
၁၂ ယေရှုခေတ်မှာ ဘာသာရေးက နိုင်ငံရေးနဲ့ ရောယှက်လေ့ရှိတယ်။ “နိုင်ငံရေးပါတီတွေလိုပဲ ဂျူးဘာသာရေးလည်း ဂိုဏ်းကွဲနေတယ်” လို့ စာအုပ်တစ်အုပ် (Daily Life in Palestine at the Time of Christ) မှာ ဖော်ပြတယ်။ ဒါကြောင့် ယေရှုက တပည့်တွေကို “မျက်စိရှင်ရှင်ထားပြီး ဖာရိရှဲနဲ့ ဟေရုဒ်တို့ရဲ့ တဆေးကို သတိထားကြ” လို့ ပြောတယ်။ (မာ. ၈:၁၅) အဲဒီကျမ်းချက်မှာပါတဲ့ ဟေရုဒ်ဆိုတာ ဟေရုဒ်ရဲ့နောက်လိုက်တွေကို ဆိုလိုတယ်။ ဖာရိရှဲတွေက ဂျူးလွတ်မြောက်ရေးကို ထောက်ခံကြတယ်။ မဿဲကျမ်းအရ ဇဒ္ဒုကဲတွေကိုပါ ယေရှု ထည့်ပြောခဲ့တယ်။ ဇဒ္ဒုကဲတွေက ရောမလက်အောက်မှာ အာဏာရထားတဲ့အတွက် မပြောင်းလဲချင်ကြဘူး။ ဒါကြောင့် အဲဒီအုပ်စုသုံးစုရဲ့ သွန်သင်ချက်၊ တဆေးကို ရှောင်ဖို့ တပည့်တွေကို ယေရှု သတိပေးခဲ့တယ်။ (မ. ၁၆:၆၊ ၁၂) ယေရှုကို ဘုရင်မြှောက်ဖို့ ကြိုးစားပြီးတဲ့နောက် ဒါကိုပြောခဲ့တာ စိတ်ဝင်စားစရာပါပဲ။
၁၃၊ ၁၄။ (က) နိုင်ငံရေးနဲ့ ဘာသာရေးက အကြမ်းဖက်မှု၊ မတရားမှုတွေကို ဘယ်လို ဖြစ်ပေါ်စေသလဲ။ (ခ) မတရားခံရချိန်မှာတောင် ဘာကြောင့် အကြမ်းမဖက်သင့်သလဲ။ (ဆောင်းပါးအစမှာပါတဲ့ ပုံကို ကြည့်ပါ။)
၁၃ ဘာသာရေးနဲ့ နိုင်ငံရေး ရောယှက်တဲ့အခါ အကြမ်းဖက်မှုတွေ ပေါ်လာနိုင်တယ်။ အဲဒီလို အခြေအနေတွေမှာ ကြားနေဖို့ တပည့်တွေကို ယေရှု သင်ပေးတယ်။ ဒါဟာ ပုရောဟိတ်ကြီးတွေနဲ့ ဖာရိရှဲတွေ ယေရှုကို သတ်ချင်ရတဲ့ အကြောင်းရင်းတစ်ခု ဖြစ်တယ်။ ယေရှုကို နိုင်ငံရေးနဲ့ ဘာသာရေး ပြိုင်ဘက်အဖြစ် သူတို့ သဘောထားကြတယ်။ “ဒီအတိုင်းသာ လွှတ်ထားရင် လူအားလုံး သူ့ကို ယုံကြည်ကြလိမ့်မယ်။ အဲဒီအခါ ရောမတွေ ရောက်လာပြီး ဗိမာန်တော်ကိုရော ကျုပ်တို့လူမျိုးကိုပါ သိမ်းပိုက်သွားလိမ့်မယ်” လို့ ပြောကြတယ်။ (ယော. ၁၁:၄၈) ဒါကြောင့် ပုရောဟိတ်မင်း ကယာဖ ဦးဆောင်ပြီး ယေရှုကို လုပ်ကြံသတ်ဖြတ်ခဲ့တယ်။—ယော. ၁၁:၄၉-၅၃။ ၁၈:၁၄။
၁၄ ကယာဖက ညအချိန် စစ်သားတွေ လွှတ်ပြီး ယေရှုကို ဖမ်းခိုင်းတယ်။ ဒီအကြံအစည်ကို ယေရှု သိလို့ တမန်တော်တွေကို ဓားဆောင်ထားဖို့ နောက်ဆုံးညစာ စားချိန်မှာ ပြောခဲ့တယ်။ အရေးကြီးသင်ခန်းစာ သင်ပေးဖို့ ဓားနှစ်လက်ဆို လုံလောက်ပါပြီ။ (လု. ၂၂:၃၆-၃၈) အဲဒီညမှာ လူအုပ်ထဲက တစ်ယောက်ကို ပေတရု ဓားနဲ့ ခုတ်လိုက်တယ်။ ညမှာ မတရား ဖမ်းရကောင်းလားဆိုပြီး စိတ်ဆိုးလို့ပဲ။ (ယော. ၁၈:၁၀) ဒါပေမဲ့ ယေရှုက “ဓားကို ဓားအိမ်ထဲ ပြန်ထည့်လိုက်ပါ။ ဓားကိုကိုင်တဲ့သူက ဓားနဲ့ပဲ သေဆုံးရလိမ့်မယ်” လို့ ပေတရုကို ပြောတယ်။ (မ. ၂၆:၅၂၊ ၅၃) လောကနဲ့ မပတ်သက်ရဘူးဆိုတဲ့ အရေးကြီး သင်ခန်းစာပါပဲ။ ဒါဟာ အဲဒီညအစောပိုင်းက ယေရှုရဲ့ ဆုတောင်းချက်နဲ့ ကိုက်ညီတယ်။ (ယောဟန် ၁၇:၁၆ ကိုဖတ်ပါ။) မတရားမှုတွေကို ဖြေရှင်းပေးဖို့ ဘုရားကိုပဲ အားကိုးသင့်တယ်။
၁၅၊ ၁၆။ (က) ပဋိပက္ခတွေကို ရှောင်ဖို့ ခရစ်ယာန်တွေကို ကျမ်းစာ ဘယ်လို ကူညီပေးသလဲ။ (ခ) ဒီနေ့လောကမှာ ဘယ်ကွာခြားမှုကို ယေဟောဝါ မြင်တွေ့သလဲ။
၁၅ အစောပိုင်းမှာ ဖော်ပြခဲ့တဲ့ ဥရောပတောင်ပိုင်းက ညီအစ်မလည်း အလားတူသင်ခန်းစာ ရခဲ့တယ်။ “အကြမ်းဖက်မှုတွေက တရားမျှတအောင် မလုပ်ပေးနိုင်ဘူး။ အကြမ်းဖက်သူအများစု သေကုန်ကြတယ်။ တချို့ကတော့ စိတ်ပျက်နာကြည်းကြရတယ်။ ဘုရားသခင်ပဲ စစ်မှန်တဲ့ တရားမျှတမှုရှိအောင် လုပ်ပေးနိုင်ကြောင်း ကျမ်းစာကနေ သိလာလို့ သိပ်ဝမ်းသာတယ်။ ဒီသတင်း ဟောပြောနေတာ ၂၅ နှစ် ရှိပြီ” လို့ သူပြောတယ်။ အာဖရိကတောင်ပိုင်းက ညီအစ်ကိုလည်း လှံအစား “စွမ်းအားတော်ဓား” ဖြစ်တဲ့ ကျမ်းစာသုံးပြီး လူမျိုးအားလုံးကို ငြိမ်သက်ခြင်းသတင်း ကြေညာနေတယ်။ (ဧ. ၆:၁၇) ဥရောပအလယ်ပိုင်းက ညီအစ်မလည်း ယေဟောဝါသက်သေဖြစ်ပြီးနောက် အရင်က မုန်းခဲ့တဲ့ လူမျိုးစုထဲက ညီအစ်ကိုတစ်ယောက်နဲ့ လက်ထပ်လိုက်တယ်။ ခရစ်တော်ကို တုပချင်လို့ သူတို့သုံးယောက်စလုံး ပြောင်းလဲခဲ့ကြတယ်။
၁၆ ဒီလိုပြောင်းလဲဖို့ သိပ်အရေးကြီးတယ်။ ကျမ်းစာမှာ လူသားတွေကို မငြိမ်သက်နိုင်ဘဲ ဟုန်းဟုန်းထနေတဲ့ ပင်လယ်နဲ့ ခိုင်းနှိုင်းထားတယ်။ (ဟေရှာ. ၁၇:၁၂။ ၅၇:၂၀၊ ၂၁။ ဗျာ. ၁၃:၁) နိုင်ငံရေးက လူတွေကို စိတ်ဝမ်းကွဲစေပြီး အကြမ်းဖက်အောင် လှုံ့ဆော်ပေမဲ့ ကျွန်တော်တို့ကတော့ စည်းလုံးငြိမ်သက်မှုကို ထိန်းသိမ်းထားကြတယ်။ ကွဲပြားနေတဲ့ လောကမှာ မိမိလူမျိုးရဲ့ စည်းလုံးမှုကို ယေဟောဝါ တွေ့တဲ့အခါ သိပ်ဝမ်းသာမှာပဲ။—ဇေဖနိ ၃:၁၇ ကိုဖတ်ပါ။
၁၇။ (က) စည်းလုံးမှု တိုးများစေနိုင်တဲ့ နည်းသုံးနည်းက ဘာလဲ။ (ခ) နောက်ဆောင်းပါးမှာ ဘာအကြောင်း လေ့လာကြမလဲ။
၁၇ ခရစ်ယာန်စည်းလုံးမှုကို နည်းသုံးနည်းနဲ့ တိုးများစေနိုင်ကြောင်း လေ့လာခဲ့ကြတယ်– (၁) မတရားမှုကို တည့်မတ်ပေးဖို့ ဘုရားသခင့် ကောင်းကင်နိုင်ငံတော်ကို ယုံကြည်ကိုးစားကြတယ်။ (၂) နိုင်ငံရေးမှာ ဘက်မလိုက်ဘူး။ (၃) အကြမ်းဖက်မှုကို ရှောင်ကြတယ်။ ဒါပေမဲ့ ခွဲခြားစိတ်က ခရစ်ယာန်စည်းလုံးမှုကို ပျက်စီးစေနိုင်တယ်။ ဒီစိန်ခေါ်ချက်ကို ပထမရာစု ခရစ်ယာန်တွေလို အောင်မြင်စွာ ရင်ဆိုင်နိုင်ကြောင်း နောက်ဆောင်းပါးမှာ လေ့လာကြပါမယ်။
