၁။ ကျွန်တော်တို့ ဘာကြောင့် အလွန်​ပျော်ရွှင်​ကြသလဲ။

ယေဟော​ဝါရဲ့​လူမျိုး တိုးတက်​နေတဲ့​သတင်း ကြား​ရတာ စိတ်လှုပ်ရှားစရာ​ပဲ။ လွန်ခဲ့တဲ့​နှစ်မှာ ကျမ်းစာသင်အံမှု ၁၀,၀​၀​၀,၀​၀​၀ ကျော် ပုံမှန် ကျင်းပ​ခဲ့​တယ်။ ဒါဟာ ဘုရားသခင့် ကျေး​ကျွန်တွေ အလင်းထွန်းလင်း​နေ​ကြောင်း ဖော်ပြတယ်။ အောက်မေ့​ရာပွဲ​ကို လာ​တက်​တဲ့ စိတ်ဝင်စားသူ သန်းပေါင်းများစွာ​ဟာ ရွေးဖိုး​ပြင်ဆင်​ပေးတဲ့ ဘုရားသခင်ရဲ့ မေတ္တာ​အကြောင်း သိလာကြတယ်။—၁ ယော. ၄:၉။

၂၊ ၃။ (က) “အလင်းဆောင်သူ​တွေ​အဖြစ်” ထွန်းလင်း​ရာ​မှာ ဘာက အတားအဆီး မဖြစ်စေ​သလဲ။ (ခ) ဒီ​ဆောင်းပါး​မှာ ဘာအကြောင်း ဆွေးနွေးကြမလဲ။

^၂ ကမ္ဘာ​တစ်ဝန်း​က ယေဟော​ဝါရဲ့ လူတွေဟာ ဘာသာစကား​အသီးသီး ပြောဆို​ကြတယ်။ ဒါပေမဲ့ အဲဒါက ဖခင်​ယေဟော​ဝါကို တစည်းတလုံး ချီးမွမ်းဖို့ အတားအဆီး မဖြစ်စေ​ပါဘူး။ (ဗျာ. ၇:၉) ကျွန်တော်တို့ ဘယ်​ဘာသာစကား​ပဲ ပြောပြော၊ ဘယ်မှာ​ပဲ နေ​နေ “လောကမှာ အလင်းဆောင်သူ​တွေ​အဖြစ်” ထွန်းလင်း​နိုင်ပါတယ်။—ဖိ. ၂:၁၅။

 ^၃ တိုးတက်မှု၊ စည်းလုံးမှု​အပြင် သတိရှိရှိ စောင့်နေ​ခြင်းက ယေဟော​ဝါကို ဘုန်း​ထင်ရှားစေတယ်။ ဒီ​ကဏ္ဍ​သုံးခု​မှာ ဘယ်လို အလင်းထွန်းလင်း​နိုင်​ကြောင်း ဒီ​ဆောင်းပါး​မှာ ဆွေးနွေး​သွားပါမယ်။—မဿဲ ၅:၁၄-၁၆ ကိုဖတ်ပါ။

၄၊ ၅။ (က) ဟောပြောခြင်း​အပြင် ဘယ်လို အလင်း ထွန်းလင်း​နိုင်သလဲ။ (ခ) ယဉ်ကျေး​ရ​ည်မွန်​ခြင်းက ဘာအကျိုး​တွေ ရစေ​နိုင်သလဲ။ (ဆောင်းပါး​အစမှာ​ပါတဲ့ ပုံကို ကြည့်ပါ။)

^၄ “ဒီ​နောက်ဆုံး​ကာလမှာ အလင်းထွန်းလင်း​နိုင်တဲ့ အခွင့်အရေး​ကို မ​ရယူ​ရင် . . . သခင့်​အပေါ် သစ္စာရှိ​သူ မဖြစ်နိုင်ဘူး” ဆိုပြီး ၁၉၂၅၊ ဇွန် ၁ ရက်ထုတ် ကင်းမျှော်​စင်​ရဲ့ “အမှောင်​ထဲ​က အလင်း” ဆောင်းပါး​မှာ ဖော်ပြတယ်။ “လူတွေကို သတင်းကောင်း ဟောပြောခြင်း၊ အလင်း​ရဲ့ လမ်းစဉ်​အတိုင်း လျှောက်လှမ်းခြင်း​အားဖြင့် ထွန်းလင်း​ရမယ်” လို့ ဆ​က်​ဖော်ပြတယ်။ ကျွန်တော်တို့ အလင်းထွန်းလင်း​တဲ့ နည်းတစ်နည်း​က သတင်းကောင်း ဟောပြောခြင်း၊ တပည့်​ဖြစ်စေခြင်း​အားဖြင့်​ပါ​ပဲ။ (မ. ၂၈:၁၉၊ ၂၀) ခရစ်ယာန် အမူအကျင့်​အားဖြင့်​လ​ည်း ယေဟော​ဝါကို ဘုန်းထင်ရှား​စေနိုင်တယ်။ အိမ်ရှင်​တွေ၊ လမ်းသွားလမ်းလာ​တွေ​က ကျွန်တော်တို့ရဲ့ အမူအကျင့်​ကို အကဲခတ်​ကြည့်​နေကြတယ်။ ဖော်ရွေ​တဲ့ အပြုံး၊ လှိုက်လှဲ​တဲ့ နှုတ်ဆက်​စကားက ကျွန်တော်တို့ ဘယ်သူဘယ်ဝါ​ဖြစ်မှန်း၊ ဘယ်လို ဘုရားကို ကိုးကွယ်​နေမှန်း လူတွေကို သိ​စေတယ်။

^၅ “အိမ်ထဲ​ဝင်​တဲ့အခါ အိမ်သားတွေကို . . . နှုတ်ဆက်​ပါ” လို့ တပည့်တွေ​ကို ယေရှု ပြောတယ်။ (မ. ၁၀:၁၂) ယေရှုနဲ့ တမန်တော်​တွေ ဟောပြောတဲ့​ဒေသမှာ သူစိမ်း​တွေ​ကို အိမ်ထဲ ဖိတ်ခေါ်လေ့​ရှိတယ်။ ဒီနေ့ခေတ် ဒေသ​များစွာမှာ​တော့ အဲဒီလို မဟုတ်ဘူး။ ဒါပေမဲ့ လာ​ရတဲ့​အကြောင်းရင်းကို ဖော်ရွေ​စွာ ရှင်းပြမယ်​ဆိုရင် အိမ်ရှင်​ရဲ့ စိုးရိမ်စိတ်၊ ဒေါသစိတ်ကို လျော့ပါး​စေနိုင်တယ်။ နှစ်လို​ဖွယ် အပြုံး​က အကောင်းဆုံး မိတ်ဆက်​နည်း​ပါ​ပဲ။​ လူထုရှေ့သက်သေခံ​တဲ့အခါ​လ​ည်း အလားတူပဲ။ သင့်ရဲ့ အပြုံး၊ နှုတ်ဆက်​စကားက တုံ့ပြန်မှု​ကောင်း​တွေ ရရှိစေ​နိုင်တယ်။ စာပေ​တွေ လာ​ယူဖို့ လှုံ့ဆော်​ပေးနိုင်တယ်။ ယဉ်ကျေး​​ရည်မွန်​ခြင်းက​လ​ည်း စကား​စပြော​ဖို့ လွယ်ကူ​စေနိုင်တယ်။

၆။ အမှုဆောင်​လုပ်ငန်းကို သက်ကြီး​မောင်နှံ​တစ်စုံ ဘယ်လို တိုးချဲ့​ခဲ့သလဲ။

^၆ အင်္ဂလန်​နိုင်ငံ​က သက်ကြီး​မောင်နှံ​ဟာ ကျန်းမာရေး မကောင်း​လို့ တစ်အိမ်တက်ဆင်း​သွားဖို့ ခက်တယ်။ ဒါနဲ့​ အိမ်ရှေ့မှာ စာပေ​တွေ တင်​ဖို့ စားပွဲ​တစ်လုံး ချ​လိုက်တယ်။ အိမ်နား​မှာ ကျောင်း​ရှိ​တော့ ကျောင်း​လာကြို​တဲ့ မိဘတွေ စိတ်ဝင်စား​မ​ယ့် စာပေ​တွေ တင်ထားတယ်။ မိဘများစွာ​က လူငယ်များ​အမေး—တာသွား​သည့်​အဖြေ​ အတွဲ ၁၊ ၂ အပြင် တခြား​ဘရိုရှာ​တွေ​ကို လာ​ယူ​ကြတယ်။ အသင်းတော်​က ရှေ့ဆောင်​ညီအစ်မ​တစ်ယောက် လာ​ကူညီပေးတယ်။ သူ့ရဲ့ ဖော်ရွေမှု၊ မောင်နှံစုံ​ရဲ့ ကြိုးစားမှု​ကြောင့် ဖခင်​တစ်ဦး ကျမ်းစာသင်အံမှု လက်ခံခဲ့တယ်။

၇။ သင့်​ဒေသက လူသစ်​တွေ​ကို ဘယ်လို ကူညီ​ပေးနိုင်သလဲ။

^၇ မကြာသေး​ခင်​နှစ်တွေ​တုန်း​က နိုင်ငံများစွာ​မှာ ဒုက္ခသည်​တွေ တိုးများ​လာတယ်။ ယေဟော​ဝါနဲ့ ကိုယ်တော့် ရည်ရွယ်ချက်​အကြောင်း သိလာအောင် သူတို့ကို ဘယ်လို ကူညီ​ပေးနိုင်သလဲ။ အရင်ဆုံး သူတို့ရဲ့ ဘာသာစကားနဲ့ နှုတ်ဆက်​တတ်အောင် သင်ယူနိုင်တယ်။ JW Language app က ကူညီ​ပေးနိုင်တယ်။ သူတို့​စိတ်ဝင်စား​လာ​စေမယ့် စကားစု​လေး​တွေ​ကို သင်ယူနိုင်တယ်။ jw.org ဝက်ဘ်ဆိုက်ကို ဖွင့်ပြီး သူတို့ရဲ့ ဘာသာစကားနဲ့ ဗီဒီယို​တွေ၊ စာပေတွေကို ပြ​ပေးနိုင်တယ်။—တရား. ၁၀:၁၉။

၈၊ ၉။ (က) ကြားရက် အစည်းအဝေးတွေမှာ ဘယ်​လက်တွေ့​ကျ အကူအညီ​တွေ ရသလဲ။ (ခ) အစည်းအဝေး​မှာ ပါဝင်ဖို့ သားသမီးတွေကို မိဘတွေ ဘယ်လို ကူညီ​ပေးနိုင်သလဲ။

^၈ အမှုဆောင်လုပ်ငန်းမှာ ပို​ထိရောက်​နိုင်ဖို့ အသက်တာနဲ့  အမှုဆောင်လုပ်ငန်း အစည်းအဝေး​ကို ယေဟော​ဝါ မေတ္တာပါ​စွာ ပြင်ဆင်​ပေးထားတယ်။ အစည်းအဝေး​မှာ ရတဲ့ လက်တွေ့​ကျ ညွှန်ကြားချက်​တွေ​က ပြန်လည်ပတ်မှု၊ ကျမ်းစာသင်အံမှု လုပ်တဲ့အခါ ပို​ယုံကြည်​စိတ်ချမှု ရှိလာ​စေတယ်။

^၉ လူသစ်များ​စွာ​ဟာ အစည်းအဝေး​မှာ ကလေးတွေ ပါဝင်​တာ​​ကို သတိထား​မိ​ကြတယ်။ မိဘတို့၊ ကိုယ်ပိုင်​စကားနဲ့ အဖြေပေး​တတ်အောင် ကလေးတွေကို သင်ပေးပါ။ သူတို့ရဲ့ လှိုက်လှဲ​ရိုးရှင်းတဲ့ အဖြေ​တွေ​က စိတ်ဝင်စားသူ လူသစ်​တွေ​ကို အမှန်တရား​ထဲ ဆွဲဆောင်​နိုင်တယ်။—၁ ကော. ၁၄:၂၅။

၁၀။ စည်းလုံးမှု တိုးများ​စေဖို့ မိသားစု ဝတ်ပြုမှု​က ဘယ်လို ကူညီပေး​သလဲ။

^၁၀ အလင်း ထွန်းလင်း​နိုင်တဲ့ နောက်​တစ်နည်း​က မိသားစု၊ အသင်းတော်မှာ စည်းလုံးမှု တိုးများ​အောင် လုပ်ဆောင်ခြင်း​ပါ​ပဲ။ ပုံမှန် မိသားစု​ဝတ်ပြုမှု လုပ်ဖို့ စီစဉ်​ပါ။ အများစုက JW ရုပ်သံ ကြည့်ပြီး လက်တွေ့​ကျင့်သုံး​နိုင်မယ့် အချက်တွေကို ဆွေးနွေး​ကြတယ်။ ကလေးငယ်​နဲ့ ဆယ်ကျော်သက်တွေ လိုအပ်တဲ့ လမ်းညွှန်မှု ကွဲပြား​နိုင်တယ်ဆိုတာ မိဘတွေ အမှတ်ရ​သင့်တယ်။ မိသားစုဝင်​တိုင်း အကျိုး​ရစေဖို့ သက်ဆိုင်တဲ့ အကြောင်းအရာ​တွေ​ကို ဆွေးနွေးပါ။—ဆာ. ၁၄၈:၁၂၊ ၁၃။

၁၁-၁၃။ အသင်းတော်မှာ စည်းလုံးမှု တိုးများ​အောင် ယောက်​တိုင်း ဘယ်လို လုပ်​နိုင်သလဲ။

^၁၁ လူငယ်တွေဟာ အသင်းတော်မှာ ဘယ်လိုနည်းနဲ့ စည်းလုံးမှု တိုးများ​စေနိုင်သလဲ။ အသက်ကြီးသူ​တွေ​ကို စိတ်ဝင်စားမှု​ပြဖို့ ပန်းတိုင်​ထားပါ။ အမှုဆောင်​သက်တမ်း​တစ်လျှောက် အတွေ့အကြုံ​တွေ​ကို မေးမြန်း​ကြည့်ပါ။ နှစ်ဦး​နှစ်ဖက် တည်ဆောက်မှု ဖြစ်စေပြီး အလင်း ပို​ထွန်းလင်း​ဖို့ လှုံ့ဆော်​ခံရ​ပါလိမ့်မယ်။ နိုင်ငံတော်​ခန်းမ​မှာ အစည်းအဝေး လာ​တက်​သူတွေကို ကြိုဆို​ဖို့ ကျွန်တော်​တို့​အားလုံး ပန်းတိုင်​ထား​နိုင်တယ်။ ဒါက စည်းလုံးမှု တိုးများ​စေပြီး အလင်း ထွန်းလင်း​ဖို့ ဧည့်သည်​တွေ​ကို လှုံ့ဆော်​ပေးနိုင်တယ်။ ပြုံးပြ​နှုတ်ဆက်​ပါ။ လူသစ်​တွေ​ကို နေရာ​ရှာ​ပေးပါ။ တခြား​သူတွေနဲ့ မိတ်ဆက်​ပေးခြင်း​အားဖြင့် သက်သောင့်သက်သာ ဖြစ်စေ​ပါ။

^၁၂ သင်ဟာ လယ်ကွင်း​စုဆုံမှု ကိုင်​ဖို့ တာဝန်​ရတယ်​ဆိုရင် အသက်ကြီးသူ​တွေ​ကို အမှုဆောင်​မှာ ပါဝင်ဖို့ ကူညီပေး​နိုင်ပါတယ်။ သင့်တော်​တဲ့ ရပ်ကွက်​တွေ ရှာ​ပေးနိုင်တယ်။ ကူညီပေးမယ့် လူငယ်တွေ​နဲ့ တွဲ​အမှုဆောင်ဖို့ စီစဉ်​ပေးနိုင်တယ်။ ကျန်းမာရေး​ကြောင့်၊ အခြေအနေ​ကြောင့်  နိုင်​သလောက်​ပဲ ပါဝင်​နေ​သူတွေကိုလည်း စာနာ​နားလည်​ပေးနိုင်တယ်။ ထောက်ထား​စာနာမှု​နဲ့ ပိုင်းခြားသိမြင်​မှု​က သတင်းကောင်းကို ဇွဲရှိရှိ​ဟော​ဖို့ လူကြီးလူငယ်၊ အတွေ့အကြုံ ရှိသူ၊ မရှိသူ​တွေ​ကို ကူညီ​ပေးနိုင်တယ်။—ဝတ်. ၁၉:၃၂။

^၁၃ “ညီအစ်ကို​တွေ စည်းစည်းလုံးလုံး အတူ​နေထိုင်​ကြ​တာ​ ကောင်း​လိုက်တာ။ ကြည်နူးစရာ ကောင်း​လိုက်တာ” လို့ ဆာလံဆရာ ရေးခဲ့တယ်။ (ဆာလံ ၁၃၃:၁၊ ၂ ကိုဖတ်ပါ။) ယေဟော​ဝါကို ဝတ်ပြုသူတွေ​နဲ့အတူ ရှိနေ​ခြင်းက အစ္စရေးတွေကို အကျိုး​များစွာ ရစေတယ်။ လန်းဆန်း​စေတဲ့ ဆီမွှေး​လို​ပါ​ပဲ။ ညီအစ်ကို/မ​တွေ​ကြား စည်းလုံးမှု တိုးများ​အောင် လုပ်ဆောင်ဖို့ စိတ်ပိုင်းဖြတ်​ထားပါ။ သင် အဲဒီလို လုပ်ဆောင်​နေတယ်​ဆိုရင် ချီးမွမ်းစရာပါပဲ။ ဒါပေမဲ့ ဒီထက် ပိုတိုးချဲ့​လုပ်ဆောင်​နိုင်​ဦး​မလား။—၂ ကော. ၆:၁၁-၁၃၊ အောက်ခြေမှတ်ချက်။

၁၄။ ပတ်ဝန်းကျင်​မှာ ဘယ်လို အလင်း ထွန်းလင်း​နိုင်သလဲ။

^၁၄ ပတ်ဝန်းကျင်​မှာလည်း အမှန်တရား​အလင်း ပို​ထွန်းလင်း​ဖို့ ကြိုးစား​နိုင်တယ်။ ကြင်နာတဲ့ စကားနဲ့ အပြုအမူတွေက အိမ်နီးချင်းတွေ​ကို အမှန်တရား​ဆီ ဆွဲဆောင်​နိုင်တယ်။ ‘အိမ်နီးချင်းတွေ ငါ့ကို ဘယ်လို မြင်ကြ​သလဲ။ ငါ့​အိမ်နဲ့ ခြံဝင်း​ကို သန့်သန့်ရှင်းရှင်း ထား​သလား။ တခြား​သူတွေကို အစပြု​ကူညီပေး​သလား’ လို့ ကိုယ့်ကိုယ်ကိုယ် မေးပါ။ တခြား​သက်သေခံ​တွေ​နဲ့ စကား​ပြောတဲ့အခါ သူတို့ရဲ့ ကြင်နာမှု​နဲ့ အမူအကျင့်ကောင်း​က ဆွေမျိုး၊ အိမ်နီးချင်း၊ အလုပ်ဖော်၊ ကျောင်းနေဖက်​တွေ​အပေါ် ဘယ်လို အကျိုး​သက်ရောက်​ခဲ့​ကြောင်း မေးမြန်း​ကြည့်ပါ။ အားရှိစရာ တွေ့ကြုံမှု​တွေ ကြားရ​ပါလိမ့်မယ်။—ဧ. ၅:၉။

၁၅။ သတိနဲ့ စောင့်နေဖို့ ဘာကြောင့် အရေးကြီး​သလဲ။

^၁၅ အလင်း ပို​ထွန်းလင်းခြင်း​မှာ ကျွန်တော်တို့ရဲ့ သဘောထား ပါဝင်​ပတ်သက်တယ်။ “သတိနဲ့ စောင့်နေကြပါ” လို့ တပည့်တွေ​ကို ယေရှု အကြိမ်ကြိမ် တိုက်တွန်း​တယ်။ (မ. ၂၄:၄၂။ ၂၅:၁၃။ ၂၆:၄၁) “ကြီးစွာသောဒုက္ခ” အဝေးကြီး လို​ပါသေး​တယ်၊ ကိုယ်​အသက်ရှင်​နေတုန်းမှာ လာ​ဦး​မှာ မဟုတ်ပါဘူးလို့ ထင်နေရင် ဟောပြောခြင်း​နဲ့ပတ်သက်တဲ့ အရေးကြီး​သဘောထား ပျောက်ဆုံး​သွား​လိမ့်​မယ်။ (မ. ၂၄:၂၁) တောက်ပ​စွာ အလင်းထွန်းလင်း​မ​ယ့်​အစား မှိတ်​တုတ်​မှိတ်​တုတ် ဖြစ်ပြီး လုံးဝ​တောင် ငြိမ်း​သွားနိုင်တယ်။

၁၆၊ ၁၇။ သတိနဲ့ စောင့်နေဖို့ ဘာ​လုပ်​နိုင်သလဲ။

^၁၆ ဒီ​ကာလ ပို​ခက်ခဲကျပ်တည်း​လာတာ​နဲ့အမျှ ကျွန်တော်တို့​အားလုံး သတိနဲ့​စောင့်နေဖို့​လိုတယ်။ ယေဟော​ဝါ​က အချိန်​အတိအကျ​မှာ အရေးယူ​လုပ်ဆောင်ပါ​လိမ့်မယ်။ ဒါကို သံသယ​ဖြစ်စရာ မလိုဘူး။ (မ. ၂၄:၄၂-၄၄) ဒီ​အတောအတွင်း စိတ်ရှည်​ပါ။ သတိနဲ့ ဆက်​စောင့်​နေပါ။ နေ့တိုင်း ကျမ်းစာ​ဖတ်ပါ။ ဆုတောင်း​ဖို့ အမြဲ အသင့်ရှိ​နေပါ။ (၁ ပေ. ၄:၇) နှစ်ပေါင်း​များစွာ အလင်းထွန်းလင်း​ပြီး သတိနဲ့ စောင့်​ခဲ့​တဲ့ ညီအစ်​ကို/မ​တွေဆီ​က​နေ သင်ယူပါ။ ၂၀၁၂၊ ဧပြီ ၁၅ ရက်ထုတ် ကင်းမျှော်စင်​ စာမျက်နှာ ၁၈-၂၁ မှာပါတဲ့ “ဂျူးလူမျိုး​တစ်ယောက်ရဲ့ အဝတ်​ကို အနှစ်​ခုနစ်ဆယ်​ကျော် ဆွဲကိုင်ခဲ့” ဆိုတဲ့ တွေ့ကြုံမှု​ကောင်း​ကို ဖတ်ကြည့်ပါ။

^၁၇ တည်ဆောက်မှု ဖြစ်စေတဲ့ လုပ်ဆောင်မှု၊ ပေါင်းသင်းမှု​တွေ​နဲ့ အလုပ်များ​နေပါ။ သင် အကြီးအကျယ် ပျော်ရွှင်​ရပါလိမ့်မယ်။ အချိန် ကုန်​မှန်း​မသိ ကုန်သွား​ပါလိမ့်မယ်။ (ဧ. ၅:၁၆) လွန်ခဲ့တဲ့ နှစ်​တစ်​ရာ​တုန်း​က ညီအစ်ကို/မ​တွေ သိပ်​အလုပ်များ​ပြီး များစွာ ပြီးမြောက်​အောင်မြင်​ခဲ့ကြတယ်။ ဒီနေ့​အချိန်မှာ ယေဟော​ဝါရဲ့ လမ်းညွှန်မှုနဲ့ ပိုပြီး​မြောက်​အောင်မြင်နေ​ပါတယ်။ ဒီလောက်အထိ အလင်းထွန်းလင်း​နိုင်မယ်​လို့ တစ်ခါ​မှ မစဉ်းစားဖူး​ဘူး။

၁၈၊ ၁၉။ သတိနဲ့ ဆ​က်​စောင့်နေဖို့ အကြီးအကဲတွေ ဘယ်လို ကူညီ​ပေးနိုင်သလဲ။ ဥပမာ​ပေးပါ။

 ^၁၈ မစုံလင်​ပေ​မဲ့ ယေဟော​ဝါ နှစ်သက်တဲ့​နည်းနဲ့ ဝတ်ပြု​နိုင်​လို့ အားရှိစရာ​ပါ​ပဲ။ ယေဟော​ဝါ​ပေးတဲ့ “လက်ဆောင်၊” အသင်းတော် အကြီးအကဲတွေ​ကို ကျေးဇူးတင်​လေးမြတ်​ပါ။ (ဧဖက် ၄:၈၊ ၁၁၊ ၁၂ ကိုဖတ်ပါ။) နောက်​တစ်ကြိမ် အကြီးအကဲ​တစ်ယောက် လာလည်​ပတ်​တဲ့အခါ သူ့ရဲ့ ဉာဏ်​ပညာနဲ့ အကြံဉာဏ်​က​နေ အကျိုး​ရယူပါ။

^၁၉ အင်္ဂလန်​နိုင်ငံ​က အိမ်ထောင်ရေး​ပြဿနာ ကြုံနေတဲ့​ မောင်နှံစုံ​ဟာ အကြီးအကဲ နှစ်ယောက်​ဆီမှာ အကူအညီ​ တောင်းတယ်။ ဘုရားရေးရာ​မှာ ယောက်ျား​ဖြစ်​သူ​ ဦးမဆောင်​ဘူးလို့ ဇနီး ခံစား​နေရတယ်။ ယောက်ျား​က​လည်း​ သွန်သင်ခြင်း စွမ်းရည် မရှိမှန်း၊ မိသားစု​ဝတ်ပြုမှု မှန်မှန် မ​လုပ်​မှန်း ဝန်ခံ​တယ်။ အကြီးအကဲ​တွေက​ ယေရှုရဲ့ ပုံသက်သေ​အကြောင်း စဉ်းစားခိုင်း​တယ်။ တပည့်တွေ​ရဲ့ လိုအပ်ရာကို ဂရုစိုက်​ပေးတဲ့ ယေရှုကို တုပ​ဖို့ ယောက်ျား​ကို တိုက်တွန်း​တယ်။ စိတ်ရှည်​ဖို့ ဇနီးကို အားပေး​တယ်။ သားသမီး​နှစ်ယောက်​နဲ့အတူ မိသားစု​ဝတ်ပြု​မှု ဘယ်လို လုပ်နိုင်​ကြောင်း လက်တွေ့​ကျ အကြံဉာဏ်​တွေ ပေးတယ်။ (ဧ. ၅:၂၁-၂၉) ဒါနဲ့ ယောက်ျား​လည်း​ ဦးစီး​ကောင်း​ဖြစ်ဖို့ ကြိုးစားတယ်။ အကြီးအကဲတွေ​က လက်မလျှော့​ဖို့၊ သန့်ရှင်းသော စွမ်းအားတော်ကို ဆ​က်​အားကိုး​နေဖို့ အားပေးကြတယ်။ သူတို့ရဲ့ မေတ္တာပါ စိတ်ဝင်စားမှု​နဲ့ ကူညီ​ထောက်မမှု​က အလင်း ထွန်းလင်း​နိုင်ဖို့ မိသားစုကို ကူညီ​ပေးခဲ့တယ်။

၂၀။ အလင်း ထွန်းလင်း​တဲ့အခါ ဘာအကျိုး​ရမလဲ။

^၂၀ “ယေဟော​ဝါကို ကြောက်ရွံ့ရိုသေ​ပြီး ကိုယ်တော်​ရဲ့ လမ်းစဉ်​တွေ​အတိုင်း လျှောက်လှမ်း​သူဟာ ပျော်ရွှင်​ချမ်းမြေ့​တယ်” လို့ ဆာလံဆရာ ရေး​တယ်။ (ဆာ. ၁၂၈:၁) ဘုရားကို ကိုးကွယ်​ဖို့ တခြား​သူတွေကို ဖိတ်ခေါ်ခြင်း၊ စည်းလုံးမှု တိုးများ​အောင် လုပ်ဆောင်ခြင်း၊ သတိနဲ့ စောင့်နေခြင်း​အားဖြင့် အလင်း ထွန်းလင်း​နေမယ်ဆိုရင် ကျွန်တော်တို့ ပို​ပျော်ရွှင်​ပါလိမ့်မယ်။​ သင့်ရဲ့ အကျင့်ကောင်း​ကို တခြား​သူတွေ မြင်ပြီး အဖ​ဘုရားရဲ့ ဘုန်းတော်ကို ချီးမွမ်းကြ​ပါလိမ့်မယ်။—မ. ၅:၁၆။