ဆုမရအောင် ဘာကမှ မတားဆီးပါစေနဲ့
‘ဆုမရအောင် ဘယ်သူကမှ မတားဆီးပါစေနဲ့။’—ကော. ၂:၁၈။
၁၊ ၂။ (က) ဘုရားသခင့်ကျေးကျွန်တွေ ဘယ်ဆုကို စောင့်မျှော်နေကြသလဲ။ (ခ) ဆုကို အာရုံစိုက်နေဖို့ ဘာက ကူညီပေးသလဲ။ (ဆောင်းပါးအစမှာပါတဲ့ ရုပ်ပုံကို ကြည့်ပါ။)
တမန်တော်ပေါလုလိုပဲ ဒီနေ့ ဘိသိက်ခံ ခရစ်ယာန်တွေလည်း “ကောင်းကင်အသက်တာ ခေါ်တော်မူခြင်းဆိုတဲ့ ဘုရားပေးဆုကျေးဇူး” ရရှိမယ့် အလားအလာ ရှိတယ်။ (ဖိ. ၃:၁၄) ကောင်းကင်နိုင်ငံတော်မှာ ယေရှုခရစ်နဲ့အတူ အမှုဆောင်ဖို့၊ လူသားတွေကို ပြည့်ဝစုံလင်ခြင်း ရရှိစေဖို့ သူတို့ စောင့်မျှော်နေကြတယ်။ (ဗျာ. ၂၀:၆) ဘုရားသခင့် ဖိတ်ခေါ်ခြင်း ခံရတဲ့သူတွေအတွက် တကယ်ကောင်းတဲ့ ပန်းတိုင်ပါပဲ။ တခြားသိုးတွေမှာတော့ မျှော်လင့်ချက် နောက်တစ်မျိုး ရှိတယ်။ မြေကြီးပေါ်မှာ ထာဝရအသက်ဆု ရရှိဖို့ စောင့်မျှော်နေကြတယ်။ တကယ်ပျော်စရာကောင်းတဲ့ အလားအလာပါပဲ။—၂ ပေ. ၃:၁၃။
၂ ဘိသိက်ခံ ခရစ်ယာန်ချင်းတွေ သစ္စာရှိနေဖို့၊ ဆုရရှိစေဖို့ “အထက်အရပ်နဲ့ဆိုင်တဲ့ အရာတွေကို စိတ်စွဲလမ်းနေကြပါ” လို့ ပေါလု တိုက်တွန်းခဲ့တယ်။ (ကော. ၃:၂) သူတို့အနေနဲ့ ကောင်းကင်အမွေ ရရှိမယ့် အဖိုးတန် မျှော်လင့်ချက်ကို စိတ်စွဲမှတ်ထားရမယ်။ (ကော. ၁:၄၊ ၅) ဘုရားသခင့်ကျေးကျွန်တွေကို ပေးဖို့ ယေဟောဝါ သတ်မှတ်ထားတဲ့ ကောင်းချီးတွေကို တွေးတောခြင်းက ကောင်းကင်ဆိုင်ရာ မျှော်လင့်ချက် ဖြစ်စေ၊ မြေကြီးဆိုင်ရာ မျှော်လင့်ချက်ဖြစ်စေ ဆုကို အာရုံစိုက်နေဖို့ ကူညီပေးတယ်။—၁ ကော. ၉:၂၄။
၃။ ဘယ်အန္တရာယ်တွေအကြောင်း ခရစ်ယာန်ချင်းတွေကို ပေါလု သတိပေးခဲ့သလဲ။
၃ ဆုမရအောင် တားဆီးနိုင်တဲ့ အန္တရာယ်တွေအကြောင်းလည်း ခရစ်ယာန်ချင်းတွေကို ပေါလု သတိပေးခဲ့တယ်။ ဥပမာ၊ ခရစ်တော်ကို ယုံကြည်ခြင်းအစား ပညတ်တရားရဲ့ အကျင့်တွေအားဖြင့် ဘုရားသခင့် မျက်နှာသာ ရဖို့ ကြိုးစားနေတဲ့ ခရစ်ယာန် အတုအယောင်တွေအကြောင်း ကောလောသဲ အသင်းတော်ကို စာရေးခဲ့တယ်။ (ကော. ၂:၁၆-၁၈) ဒီနေ့ထိ ရှိနေသေးတဲ့၊ ဆုမရအောင် တားဆီးနိုင်တဲ့ အန္တရာယ်တွေအကြောင်းလည်း ပေါလု ဆွေးနွေးခဲ့တယ်။ ဥပမာ၊ ညစ်ညမ်းတဲ့ ဆန္ဒတွေကို တွန်းလှန်နိုင်ပုံ၊ ယုံကြည်သူချင်းတွေနဲ့ ပြဿနာ ဖြေရှင်းနိုင်ပုံ၊ မိသားစု အခက်အခဲတွေ ကိုင်တွယ်နိုင်ပုံတို့အကြောင်း ရှင်းပြခဲ့တယ်။ ပေါလုရဲ့ အကြံပြုချက်တွေဟာ ဒီနေ့အထိ တန်ဖိုးရှိနေတုန်းပါပဲ။ ဒါကြောင့် ကောလောသဲဩဝါဒစာမှာပါတဲ့ ပေါလုရဲ့ မေတ္တာပါ သတိပေးချက်တချို့ကို ဆန်းစစ်ကြည့်ကြစို့။
ညစ်ညမ်းတဲ့ဆန္ဒတွေကို သေစေကြပါ
၄။ ညစ်ညမ်းတဲ့ဆန္ဒတွေက ဆုမရအောင် ဘာကြောင့် တားဆီးနိုင်သလဲ။
၄ အံ့ဖွယ်မျှော်လင့်ချက်အကြောင်း ညီအစ်ကိုတွေကို သတိပေးပြီးတဲ့နောက် ပေါလု ဒီလိုရေးတယ်– “ဒါကြောင့် လိင်အကျင့်ယိုယွင်းခြင်း၊ ညစ်ညူးစွာကျင့်ခြင်း၊ ရမ္မက်ဆန္ဒကို မချုပ်တည်းခြင်း၊ မကောင်းတဲ့ လိုအင်ဆန္ဒရှိခြင်း၊ လောဘကြီးခြင်းကို ဖြစ်ပေါ်စေတဲ့ ကိုယ်ခန္ဓာအစိတ်အပိုင်းတွေကို သေစေကြပါ။” (ကော. ၃:၅) ညစ်ညမ်းတဲ့ဆန္ဒတွေဟာ အလွန်ပြင်းထန်နိုင်တယ်။ ဘုရားရေးရာဘဏ္ဍာတွေ မရအောင် တားဆီးနိုင်တယ်။ ညစ်ညမ်းတဲ့ဆန္ဒတွေကြောင့် လမ်းလွဲသွားတဲ့ ညီအစ်ကိုတစ်ယောက် အသင်းတော်ထဲ ပြန်ရောက်ပြီးနောက် “အလွန်ပြင်းထန်တဲ့ ဆွဲအားကြောင့် အဝေးရောက်သွားတာ အချိန်လွန်မှပဲ ပြန်လှည့်လာနိုင်တော့တယ်” လို့ပြောတယ်။
၅။ အန္တရာယ်ရှိတဲ့ အခြေအနေတွေကနေ ကိုယ့်ကိုယ်ကိုယ် ဘယ်လို ကာကွယ်နိုင်သလဲ။
၅ ယေဟောဝါရဲ့ စာရိတ္တစံနှုန်းတွေကို အလျှော့ပေးဖို့ သွေးဆောင်မှု ဖြစ်စေနိုင်တဲ့ အခြေအနေတွေ ကြုံရတဲ့အခါ သတိထားနေဖို့ အထူးအရေးကြီးတယ်။ ဥပမာ၊ သမီးရည်းစားတွေ စတင်ပိုးပန်းချိန်ကတည်းက အထိအတွေ့၊ အနမ်း၊ နှစ်ယောက်တည်းနေတာ စတဲ့ကိစ္စတွေမှာ စည်းခြားသတ်မှတ်ထားရမယ်။ (ပညာ. ၂၂:၃) ခရစ်ယာန်တစ်ယောက် အလုပ်ကိစ္စနဲ့ ခရီးသွားနေချိန်၊ လိင်ခြားသူနဲ့ အလုပ်တွဲလုပ်ရချိန်တွေမှာ အကျင့်ပျက်စေနိုင်တဲ့ အန္တရာယ်တွေ ပေါ်လာနိုင်တယ်။ (ပညာ. ၂:၁၀-၁၂၊ ၁၆) အဲဒီလို အခြေအနေမျိုး ကြုံနေရတယ်ဆိုရင် ကိုယ့်ကိုယ်ကိုယ် ယေဟောဝါသက်သေအဖြစ် ထုတ်ပြောပါ။ လေးစားစရာဖြစ်အောင် ပြုမူနေထိုင်ပါ။ ပရောပရည်လုပ်ခြင်းရဲ့ ဆိုးကျိုးတွေကို သတိရပါ။ စိတ်ဓာတ်ကျနေချိန်၊ အထီးကျန်ချိန်မှာ ပိုအန္တရာယ်ရှိနိုင်တယ်။ ဒီလိုအချိန်မျိုးမှာ ကိုယ့်ကို အရေးပေးတဲ့သူကို တမ်းတမိနိုင်တယ်။ ဘယ်သူ့ဆီက ဂရုစိုက်မှုမဆို ခံယူချင်စိတ် ပြင်းပြနိုင်တယ်။ အဲဒီလို ဖြစ်နေတယ်ဆိုရင် ဆုမရအောင် တားဆီးခံရတာမျိုး မဖြစ်ဖို့ ယေဟောဝါနဲ့ ညီအစ်ကို/မတွေဆီ အကူအညီ တောင်းပါ။—ဆာလံ ၃၄:၁၈ နဲ့ ပညာအလိမ္မာ ၁၃:၂၀ တို့ကိုဖတ်ပါ။
၆။ ဖျော်ဖြေမှု ရွေးချယ်တဲ့အခါ ဘာကို စိတ်စွဲမှတ်ထားသင့်သလဲ။
၆ ညစ်ညမ်းတဲ့ဆန္ဒတွေ သေစေဖို့ ညစ်ညမ်းတဲ့ ဖျော်ဖြေရေးကို ငြင်းပယ်ရမယ်။ ဒီနေ့ ဖျော်ဖြေရေးလုပ်ငန်း အများစုမှာ ရှေးခေတ် သောဒုံနဲ့ ဂေါမောရမြို့သားတွေရဲ့ စရိုက်လက္ခဏာတွေ ရှိနေတယ်။ (ယု. ၇) လိင်အကျင့်ပျက်မှုကို ဆိုးကျိုးမရှိတဲ့ သာမန်အပြုအမူအဖြစ် တင်ဆက်ခြင်းအားဖြင့် လုပ်ငန်းရှင်တွေက သူတို့ရဲ့ အယူအဆတွေကို အားပေးအားမြှောက် လုပ်နေကြတယ်။ ဘယ်ဖျော်ဖြေရေးကိုမဆို လက်ခံလိုက်ခြင်းအားဖြင့် သတိမဲ့သွားတာမျိုး မဖြစ်စေပါနဲ့။ ဆုမရအောင် အတားအဆီး မဖြစ်စေမယ့် ဖျော်ဖြေရေးကိုပဲ ရွေးချယ်ရမယ်။—ပညာ. ၄:၂၃။
မေတ္တာ၊ ကြင်နာခြင်းတို့ကို “ဝတ်ဆင်ကြပါ”
၇။ ခရစ်ယာန် အသင်းတော်ထဲမှာ ဘာပြဿနာတွေ ကြုံတွေ့ရနိုင်သလဲ။
၇ ခရစ်ယာန်အသင်းတော်အဝင် ဖြစ်ရတာ ကောင်းချီးတစ်ခုပါပဲ။ အစည်းအဝေးတွေမှာ ဘုရားသခင့် စကားတော် လေ့လာတာ၊ အပြန်အလှန် မေတ္တာ၊ ကြင်နာမှု ပြတာတွေက ဆုကို အာရုံစိုက်နေဖို့ ကူညီပေးတယ်။ တစ်ခါတလေ နားလည်မှုလွဲတာတွေက အသင်းတော်ထဲမှာ တင်းမာမှုတွေ ဖြစ်စေနိုင်ပါတယ်။ ပြဿနာ မဖြေရှင်းရင် နာကြည်းစိတ်တွေ အလွယ်တကူ ဝင်လာနိုင်တယ်။—၁ ပေတရု ၃:၈၊ ၉ ကိုဖတ်ပါ။
၈၊ ၉။ (က) ဆုရဖို့ ဘယ်အရည်အသွေးတွေက ကူညီပေးမလဲ။ (ခ) ခရစ်ယာန်ချင်းတစ်ယောက်ကြောင့် စိတ်ထိခိုက်ရတဲ့အခါ သင့်မြတ်ငြိမ်သက်မှုကို ထိန်းသိမ်းဖို့ ဘာက ကူညီပေးနိုင်သလဲ။
၈ နာကြည်းစိတ်ကြောင့် ဆုမရတာမျိုး မဖြစ်အောင် ဘယ်လို ကာကွယ်နိုင်သလဲ။ “ဘုရားသခင် ရွေးချယ်သူတွေ၊ သန့်ရှင်းသူတွေ၊ ချစ်မြတ်နိုးခံရသူတွေအနေနဲ့ ချစ်ခင်စာနာခြင်း၊ ကြင်နာခြင်း၊ စိတ်နှိမ့်ချခြင်း၊ နူးညံ့သိမ်မွေ့ခြင်း၊ စိတ်ရှည်ခြင်းတို့ကို ဝတ်ဆင်ကြပါ။ အချင်းချင်း မကျေနပ်စရာ ရှိနေရင်တောင် ဆက်ပြီးသည်းခံကြပါ၊ ကြည်ကြည်ဖြူဖြူ ခွင့်လွှတ်ကြပါ။ ယေဟောဝါက ခင်ဗျားတို့ကို ကြည်ကြည်ဖြူဖြူ ခွင့်လွှတ်သလို ခင်ဗျားတို့လည်း အဲဒီလိုပဲ ခွင့်လွှတ်ကြပါ။ အဲဒါတွေအပြင် မေတ္တာကိုလည်း ဝတ်ဆင်ကြပါ။ ဘာလို့လဲဆိုတော့ မေတ္တာဟာ စည်းလုံးခြင်းအတွက် ခိုင်မြဲတဲ့ နှောင်ကြိုးပဲ” လို့ ကောလောသဲမြို့က ခရစ်ယာန်တွေကို ပေါလု တိုက်တွန်းခဲ့တယ်။—ကော. ၃:၁၂-၁၄။
၉ မေတ္တာ၊ ကြင်နာခြင်းက အချင်းချင်း ခွင့်လွှတ်ဖို့ ကူညီပေးနိုင်တယ်။ ဥပမာ၊ ခရစ်ယာန်ချင်းတစ်ယောက်ရဲ့ အပြောအဆို၊ အပြုအမူကြောင့် စိတ်ထိခိုက်တယ်ဆိုရင် ကိုယ်တိုင် မကြင်မနာ ပြောဆိုပြုမူခဲ့တဲ့ အချိန်အခါတွေကို ပြန်စဉ်းစားကြည့်ပါ။ ကျွန်တော်တို့ရဲ့ အမှားတွေကို ဗွေမယူတဲ့ ညီအစ်ကို/မတွေရဲ့ မေတ္တာ၊ ကြင်နာမှုကို ကျေးဇူးတင်ကြတယ် မဟုတ်လား။ (ဒေသနာ ၇:၂၁၊ ၂၂ ကိုဖတ်ပါ။) အထူးသဖြင့် စစ်မှန်တဲ့ ဝတ်ပြုသူတွေကို စည်းလုံးစေတဲ့ ခရစ်တော်ရဲ့ ကြင်နာမှုကိုလည်း ကျေးဇူးတင်ကြတယ်။ (ကော. ၃:၁၅) ကျွန်တော်တို့ဟာ ဘုရားတစ်ပါးတည်းကို ကိုးကွယ်နေကြတယ်။ သတင်းတစ်မျိုးတည်းကို ဟောပြောနေကြတယ်။ တူညီတဲ့အခက်အခဲတွေကို ရင်ဆိုင်နေကြတယ်။ အချင်းချင်းကို ကြင်နာစွာ၊ မေတ္တာပါစွာ ခွင့်လွှတ်ခြင်းအားဖြင့် ခရစ်ယာန် စည်းလုံးမှု တိုးများအောင် လုပ်ဆောင်နေပြီး အသက်ဆုကို အာရုံစိုက်နေကြတယ်။
၁၀၊ ၁၁။ (က) မနာလိုခြင်းဟာ ဘာကြောင့် အန္တရာယ် ရှိသလဲ။ (ခ) မနာလိုခြင်းကြောင့် ဆုမရတာမျိုး မဖြစ်အောင် ဘယ်လို ကာကွယ်နိုင်သလဲ။
၁၀ မနာလိုခြင်းက ဆုမရအောင် တားဆီးနိုင်ကြောင်း ကျမ်းစာမှာပါတဲ့ သတိပေး ပုံနမူနာတွေက ဖော်ပြတယ်။ ဥပမာ၊ ကာအိနဟာ ညီအာဗေလကို မနာလိုဖြစ်ပြီး သတ်ခဲ့တယ်။ ကောရ၊ ဒါသန်၊ အဘိရံတို့ဟာ မောရှေကို မနာလိုဖြစ်ပြီး ဆန့်ကျင်ကြတယ်။ ဘုရင်ရှောလုက ဒါဝိဒ်ရဲ့ အောင်မြင်မှုကို မနာလိုဖြစ်ပြီး သတ်ဖို့ ကြိုးစားခဲ့တယ်။ “မနာလိုစိတ်၊ ငြင်းခုံရန်တွေ့ချင်စိတ် ရှိတဲ့နေရာမှာ စည်းစနစ် မရှိတာတွေ၊ ယုတ်ညံ့တာတွေ ရှိတတ်တယ်” လို့ ကျမ်းစာမှာ ဖော်ပြထားတာ မဆန်းပါဘူး။—ယာ. ၃:၁၆။
၁၁ မေတ္တာ၊ ကြင်နာခြင်းကို မွေးမြူမယ်ဆိုရင် အလွယ်တကူ မနာလိုဖြစ်မှာ မဟုတ်ဘူး။ “မေတ္တာဟာ စိတ်ရှည်တတ်တယ်။ ကြင်နာတတ်တယ်” လို့ ကျမ်းစာက ပြောတယ်။ (၁ ကော. ၁၃:၄) မနာလိုခြင်းကို စိတ်နှလုံးထဲကနေ အမြစ်ပါမကျန် ဖယ်ရှားနိုင်ဖို့ ကိစ္စရပ်တွေကို ဘုရားသခင် ရှုမြင်သလို ရှုမြင်ရမယ်။ ညီအစ်ကို/မတွေကို ခရစ်ယာန် ကိုယ်ခန္ဓာတစ်ခုတည်းက အင်္ဂါချင်းတွေအဖြစ် ရှုမြင်ရမယ်။ ဒါမှ “အစိတ်အပိုင်းတစ်ခု ချီးမွမ်းခံရရင် ကျန်တဲ့အစိတ်အပိုင်းအားလုံး ထပ်တူဝမ်းမြောက်ကြတယ်” ဆိုတဲ့ ကျမ်းစကားနဲ့အညီ ကိုယ်ချင်းစာတတ်အောင် ကူညီပေးပါလိမ့်မယ်။ (၁ ကော. ၁၂:၁၆-၁၈၊ ၂၆) တခြားသူတွေ ကောင်းချီးရတဲ့အခါ မနာလို မဖြစ်ဘဲ ဝမ်းမြောက်လိမ့်မယ်။ ဘုရင်ရှောလုရဲ့သား ယောနသန်အကြောင်း စဉ်းစားကြည့်ပါ။ ထီးနန်းကို ဒါဝိဒ်ဆက်ခံရတဲ့အခါ မနာလို မဖြစ်ဘဲ ဒါဝိဒ်ကို အားပေးခဲ့တယ်။ (၁ ရှ. ၂၃:၁၆-၁၈) ယောနသန်လို မေတ္တာ၊ ကြင်နာမှု ပြနိုင်မလား။
မိသားစုလိုက် ဆုရယူပါ
၁၂။ မိသားစုလိုက် ဆုရဖို့ ဘယ်ကျမ်းစာအကြံဉာဏ်က ကူညီပေးမလဲ။
၁၂ ကျမ်းစာအခြေခံမူတွေကို ကျင့်သုံးခြင်းအားဖြင့် မိသားစု ငြိမ်သက်ပျော်ရွှင်ပြီး ဆုရရှိနိုင်မယ်။ ကောလောသဲမြို့က ခရစ်ယာန်တွေကို မိသားစုနဲ့ပတ်သက်ပြီး ပေါလု ဘယ်လို အကြံပေးခဲ့သလဲ။ “ဇနီးတို့၊ ကိုယ့်ခင်ပွန်းကို လက်အောက်ခံကြပါ။ ခရစ်ယာန်တွေဟာ အဲဒီလိုပဲ လက်အောက်ခံသင့်တယ်။ ခင်ပွန်းတို့၊ ဇနီးကို ချစ်မြဲချစ်ကြပါ။ သူတို့ကို တရားလွန် ဒေါသမထွက်ပါနဲ့။ သားသမီးတို့၊ မိဘစကားကို အရာရာမှာ နာခံကြပါ။ အဲဒီလိုနာခံတာကို သခင် နှစ်သက်တယ်။ ဖခင်တို့၊ သားသမီးတွေကို စိတ်ဆိုးအောင် မလုပ်ပါနဲ့။ အဲဒီလိုလုပ်ရင် သူတို့ စိတ်ပျက်သွားလိမ့်မယ်” လို့ ပေါလု ပြောတယ်။ (ကော. ၃:၁၈-၂၁) ပေါလုရဲ့ အကြံပြုချက်ကို လိုက်နာခြင်းက ခင်ပွန်း၊ ဇနီး၊ သားသမီးတို့ကို အကျိုးပြုမယ်ဆိုတာ သင်သဘောတူပါလိမ့်မယ်။
၁၃။ ခရစ်ယာန် ညီအစ်မက မယုံကြည်သူ ခင်ပွန်းကို ဘယ်လိုနည်းနဲ့ အမှန်တရား လက်ခံလာစေနိုင်မလဲ။
၁၃ ဇနီးသည်အနေနဲ့ မယုံကြည်သူ ခင်ပွန်း ကောင်းကောင်း မဆက်ဆံဘူးလို့ ခံစားနေရရင် ဘယ်လို လုပ်မလဲ။ သူနဲ့ အငြင်းပွားနေလို့ အခြေအနေ ကောင်းလာမလား။ ကောင်းလာရင်တောင် အမှန်တရားကို လက်ခံလာမလား။ လက်ခံနိုင်ချေ မရှိဘူး။ ဒါပေမဲ့ ခင်ပွန်းရဲ့ ၁ ပေတရု ၃:၁၊ ၂ ကိုဖတ်ပါ။
ဦးစီးမှုကို လေးစားမယ်ဆိုရင်တော့ မိသားစုမှာ သင့်မြတ်ငြိမ်းချမ်းမှု ရှိစေနိုင်မယ်။ ယေဟောဝါကို ချီးမွမ်းနိုင်မယ်။ ခင်ပွန်းကိုလည်း စစ်မှန်တဲ့ဝတ်ပြုရေးကို လက်ခံလာစေနိုင်မယ်။ ဒါဆိုရင် နှစ်ယောက်စလုံး ဆုရရှိနိုင်ပါလိမ့်မယ်။—၁၄။ မယုံကြည်သူ ဇနီးရဲ့ လေးစားမှု မခံရရင် ခရစ်ယာန် ခင်ပွန်း ဘာလုပ်သင့်သလဲ။
၁၄ ခင်ပွန်းသည်အနေနဲ့ မယုံကြည်သူ ဇနီးရဲ့ လေးစားမှု မရရှိဘူးလို့ ခံစားနေရရင်ကော။ အိမ်ထောင်ဦးစီး ဖြစ်မှန်း ပြဖို့ အော်ငေါက်နေလို့ ပိုလေးစားလာမလား။ လုံးဝ လေးစားမှာ မဟုတ်ဘူး။ ယေရှုကို တုပပြီး မေတ္တာနဲ့ ဦးစီးဖို့ ဘုရားသခင် မျှော်လင့်တယ်။ (ဧ. ၅:၂၃) ယေရှုဟာ အသင်းတော်ကို မေတ္တာပါစွာ၊ စိတ်ရှည်စွာ ဦးစီးခဲ့တယ်။ (လု. ၉:၄၆-၄၈) ယေရှုရဲ့ ပုံသက်သေကို တုပမယ်ဆိုရင် စစ်မှန်တဲ့ဝတ်ပြုရေးကို ဇနီးသည် လက်ခံလာနိုင်တယ်။
၁၅။ ခရစ်ယာန်အမျိုးသားဟာ ဇနီးကို ချစ်ကြောင်း ဘယ်လို ဖော်ပြသလဲ။
၁၅ “ဇနီးကို ချစ်မြဲချစ်ကြပါ။ သူတို့ကို တရားလွန် ဒေါသမထွက်ပါနဲ့” လို့ ခင်ပွန်းသည်တွေကို ညွှန်ကြားထားတယ်။ (ကော. ၃:၁၉) မေတ္တာရှိတဲ့ ခင်ပွန်းဟာ ဇနီးရဲ့ သဘောထားကို နားထောင်ခြင်း၊ ဇနီးရဲ့ စကားကို တန်ဖိုးထားကြောင်း စိတ်ချစေခြင်းအားဖြင့် ဂုဏ်တင်တယ်။ (၁ ပေ. ၃:၇) ဇနီးပြောတဲ့အတိုင်း အမြဲမလုပ်နိုင်ပေမဲ့ သူနဲ့ တိုင်ပင်ဆွေးနွေးခြင်းအားဖြင့် မျှမျှတတ ဆုံးဖြတ်လေ့ရှိတယ်။ (ပညာ. ၁၅:၂၂) မေတ္တာရှိတဲ့ ခင်ပွန်းဟာ ဇနီးရဲ့ လေးစားမှုကို မတောင်းဆိုဘဲ ရရှိအောင် ကြိုးစားတယ်။ ဇနီးနဲ့ သားသမီးတွေကို ချစ်တဲ့ခင်ပွန်းဟာ ယေဟောဝါကို ပျော်ရွှင်စွာ ဝတ်ပြုတဲ့ မိသားစု ရရှိဖို့၊ အသက်ဆု ရရှိဖို့ အလားအလာ ပိုများတယ်။
လူငယ်တို့၊ ဆုမရအောင် ဘာကမှ မတားဆီးပါစေနဲ့
၁၆၊ ၁၇။ လူငယ်တစ်ယောက်အနေနဲ့ မိဘတွေကို တရားလွန် စိတ်မဆိုးမိအောင် ဘယ်လို ရှောင်နိုင်သလဲ။
၁၆ ဆယ်ကျော်သက်တစ်ဦးအနေနဲ့ ခရစ်ယာန်မိဘတွေရဲ့ အထင်လွဲမှု၊ ကန့်သတ်ချုပ်ချယ်မှု ခံနေရတယ်လို့ ထင်ရင်ကော။ အဲဒီလို ခံစားနေရရင် ယေဟောဝါကို ဝတ်ပြုတာ အကောင်းဆုံးဘဝလမ်းစဉ်မှ ဟုတ်ရဲ့လားလို့ သံသယဝင်လာနိုင်တယ်။ ယေဟောဝါကို ဝတ်မပြုတော့ရင် ဘုရားကို ကြောက်ရွံ့ရိုသေတဲ့ မိဘတွေနဲ့ အသင်းတော်ထက် သင့်ကို ပိုဂရုစိုက်တဲ့သူ မရှိမှန်း မကြာခင် သိလာပါလိမ့်မယ်။
၁၇ မိဘတွေ တစ်ခါမှ မဆုံးမရင် ကိုယ့်ကို တကယ်မှ ချစ်ရဲ့လားလို့ တွေးမိမယ် မဟုတ်လား။ (ဟီ. ၁၂:၈) မိဘတွေရဲ့ ဆုံးမနည်းကြောင့် စိတ်ထိခိုက်မိနိုင်တယ်။ ဒါပေမဲ့ ဆုံးမနည်းကြောင့် စိတ်မဆိုးပါနဲ့။ ဆုံးမရတဲ့အကြောင်းရင်းကို နားလည်ဖို့ ကြိုးစားပါ။ ဒါကြောင့် တည်တည်ငြိမ်ငြိမ်ရှိပါ။ တရားလွန် ဝေဖန်တုံ့ပြန်တာမျိုး မလုပ်ပါနဲ့။ “ဉာဏ်ပညာရှိသူဟာ စကားများများ မပြောဘူး။ ပိုင်းခြားသိမြင်မှုရှိသူဟာ အေးဆေးတည်ငြိမ်တယ်” လို့ ကျမ်းစာမှာ ဖော်ပြထားတယ်။ (ပညာ. ၁၇:၂၇) ဆုံးမတာကို တည်တည်ငြိမ်ငြိမ် လက်ခံနိုင်တဲ့ ရင့်ကျက်သူဖြစ်ဖို့၊ ဘယ်လိုနည်းနဲ့ပဲ ဆုံးမပါစေ အကျိုးရယူဖို့ ပန်းတိုင်ထားပါ။ (ပညာ. ၁:၈) ယေဟောဝါကို ချစ်တဲ့ ယုံကြည်သူမိဘတွေ ရထားတာ ကောင်းချီးပါပဲ။ အသက်ဆု ရအောင် သူတို့ တကယ်ကူညီပေးချင်ကြတယ်။
၁၈။ ဆုကို အာရုံစိုက်နေဖို့ ဘာကြောင့် စိတ်ပိုင်းဖြတ်ထားသလဲ။
၁၈ ကောင်းကင်မှာ မပျက်စီးနိုင်တဲ့အသက်ဖြစ်စေ၊ မြေကြီးပရဒိသုမှာ ထာဝရအသက်ဖြစ်စေ ကျွန်တော်တို့ ရမယ့်ဆုဟာ အလွန်ကောင်းလှပါတယ်။ ဖန်ဆင်းရှင်ကိုယ်တိုင် ပေးထားတဲ့ကတိမို့ သေချာတဲ့ မျှော်လင့်ချက်ပါပဲ။ မြေကြီးပရဒိသုနဲ့ပတ်သက်ပြီး “ကမ္ဘာမြေဟာ ယေဟောဝါကို သိကျွမ်းခြင်းနဲ့ ပြည့်နေ” မယ်လို့ ဘုရားသခင် မိန့်ဆိုတယ်။ (ဟေရှာ. ၁၁:၉) မြေကြီးပေါ် အသက်ရှင်သူတိုင်းကို ဘုရားသခင် သွန်သင်ပေးပါလိမ့်မယ်။ ရယူဖို့ ကြိုးစားထိုက်တဲ့ ဆုပါပဲ။ ဒါကြောင့် ယေဟောဝါရဲ့ ကတိကို စိတ်စွဲမှတ်ထားပါ။ ဆုမရအောင် ဘာကမှ မတားဆီးပါစေနဲ့။