‘ရက်ရောတဲ့သူဟာ ကောင်းချီးခံစားရမယ်’
ပူဇော်သက္ကာဟာ စစ်မှန်တဲ့ဝတ်ပြုရေးရဲ့ အရေးပါတဲ့အပိုင်း ဖြစ်ခဲ့တာ ကြာလှပါပြီ။ အစ္စရေးတွေက တိရစ္ဆာန်ပူဇော်သက္ကာတွေ ဆက်သကြတယ်။ ခရစ်ယာန်တွေက ‘ချီးမွမ်းခြင်းအားဖြင့် ဘုရားသခင်ဆီ ပူဇော်သက္ကာ ဆက်သ’ ကြတယ်။ (ဟီ. ၁၃:၁၅၊ ၁၆) ဒီပူဇော်သက္ကာတွေဟာ ရွှင်လန်းမှုနဲ့ ကောင်းချီး ရရှိစေကြောင်း အောက်ပါနမူနာတွေက ဖော်ပြတယ်။
ရှေးခေတ် သစ္စာရှိကျေးကျွန် ဟန္နဟာ သားလိုချင်လှပေမဲ့ မြုံနေရှာတယ်။ သားတစ်ယောက်သာ ရမယ်ဆိုရင် “တစ်သက်လုံး ယေဟောဝါဘုရားအတွက် ပေးပါ့မယ်” လို့ ယေဟောဝါဆီ ဆုတောင်းပြီး သစ္စာကတိ ပြုခဲ့တယ်။ (၁ ရှ. ၁:၁၀၊ ၁၁) အချိန်တန်တော့ ဟန္န ကိုယ်ဝန် ရှိလာပြီး ရှမွေလဆိုတဲ့ သားတစ်ယောက် မွေးဖွားခဲ့တယ်။ ရှမွေလ နို့ဖြတ်ပြီးတဲ့နောက် ဟန္နဟာ သစ္စာကတိ ပြုထားတဲ့အတိုင်း တဲတော်ကို ခေါ်သွားတယ်။ ဟန္နရဲ့ ကိုယ်ကျိုးစွန့်စိတ်ဓာတ်ကို ယေဟောဝါ ကောင်းချီးပေးခဲ့တယ်။ နောက်ထပ် ကလေးငါးယောက် ထွန်းကားခဲ့တယ်။ ရှမွေလကတော့ ပရောဖက်နဲ့ ကျမ်းရေးသူ ဖြစ်လာတယ်။—၁ ရှ. ၂:၂၁။
ဟန္နနဲ့ ရှမွေလလိုပဲ ဒီနေ့ ခရစ်ယာန်တွေလည်း မိမိအသက်တာကို ဖန်ဆင်းရှင်ရဲ့ အမှုတော်အတွက် ဆက်ကပ်ဖို့ အခွင့်အရေး ရရှိကြတယ်။ ယေဟောဝါကို ကိုးကွယ်ဖို့ စွန့်လွှတ်အနစ်နာခံမှု မှန်သမျှ ကြွယ်ဝစွာ ဆုချခံရမယ်လို့ ယေရှု ကတိပေးခဲ့တယ်။—မာ. ၁၀:၂၈-၃၀။
ပထမရာစုမှာ ဒေါ်ကာလို့ခေါ်တဲ့ ခရစ်ယာန်အမျိုးသမီးဟာ တခြားသူတွေကို ကူညီပေးဖို့ စွန့်လွှတ်အနစ်နာခံမှု၊ “ကောင်းတဲ့အကျင့်၊ ပေးကမ်းစွန့်ကြဲတတ်တဲ့အကျင့်” ကြောင့် လူသိများတယ်။ ဝမ်းနည်းစရာကတော့ “ဒေါ်ကာ ဖျားပြီး သေဆုံးသွားတယ်။” ဒါကြောင့် အသင်းတော်တစ်ခုလုံး ဝမ်းနည်းကြတယ်။ အနီးအနားဒေသမှာ ပေတရု ရှိနေကြောင်း တပည့်တော်တွေ ကြားတဲ့အခါ ချက်ချင်း လာဖို့ တောင်းဆိုကြတယ်။ ပေတရု ရောက်လာပြီး ဒေါ်ကာကို ပြန်ရှင်အောင် လုပ်ပေးတဲ့အခါ ဘယ်လောက် ဝမ်းသာကြမယ်ဆိုတာ မြင်ယောင်ကြည့်ပါ။ အဲဒါ တမန်တော်တစ်ယောက် အသက်ပြန်ရှင်စေတဲ့ ပထမဆုံး မှတ်တမ်းပါပဲ။ (တ. ၉:၃၆-၄၁) ဒေါ်ကာရဲ့ စွန့်လွှတ်အနစ်နာခံမှုတွေကို ဘုရားသခင် မမေ့ပါဘူး။ (ဟီ. ၆:၁၀) သူ့ရဲ့ ရက်ရောမှုမှတ်တမ်းကို ကျွန်တော်တို့ တုပဖို့ ကျမ်းစာမှာ ဖော်ပြထားတယ်။
တမန်တော်ပေါလုလည်း အချိန်နဲ့ ဂရုစိုက်မှုကို ရက်ရက်ရောရော ပေးဆက်ရာမှာ အလွန်ကောင်းတဲ့ပုံသက်သေ ချမှတ်ခဲ့တယ်။ “ကျွန်တော်ကတော့ ခင်ဗျားတို့အတွက်ဆိုရင် ကိုယ့်မှာရှိသမျှကိုသာမက ကိုယ့်ကိုယ်ကိုယ်တောင် ပေးအပ်ဖို့ အသင့်ပါပဲ” လို့ ကောရိန္သုမြို့က ခရစ်ယာန်ညီအစ်ကိုတွေဆီ စာရေးခဲ့တယ်။ (၂ ကော. ၁၂:၁၅) တခြားသူတွေအတွက် စွန့်လွှတ်အနစ်နာခံခြင်းက ကိုယ့်ကို ကျေနပ်ပျော်ရွှင်စေရုံသာမက ယေဟောဝါရဲ့ ကောင်းချီးနဲ့ မျက်နှာသာ ရရှိစေကြောင်း ပေါလု ကိုယ်တွေ့ သိရှိခဲ့တယ်။—တ. ၂၀:၂၄၊ ၃၅။
ဘုရားနိုင်ငံတော်အကျိုးစီးပွား တိုးတက်ဖို့၊ ယုံကြည်သူချင်းတွေကို ကူညီထောက်မဖို့ အချိန်နဲ့ ခွန်အား အသုံးပြုတာကို ယေဟောဝါ နှစ်သက်တာ ရှင်းပါတယ်။ ဒါပေမဲ့ ဘုရားနိုင်ငံတော် ဟောပြောခြင်းလုပ်ငန်းကို ထောက်ပံ့နိုင်တဲ့ တခြားနည်းတွေ ရှိသေးသလား။ ရှိပါတယ်။ မေတ္တာပါတဲ့ လုပ်ဆောင်မှုတွေအပြင် စေတနာအလျောက် အလှူငွေ ထည့်ဝင်ခြင်းအားဖြင့် ဘုရားသခင်ကို ဂုဏ်တင်နိုင်ပါတယ်။ သာသနာပြုတွေ၊ အထူးအချိန်ပြည့်အမှုထမ်းတွေကို ထောက်ပံ့ခြင်း အပါအဝင် ကမ္ဘာချီလုပ်ငန်း တိုးတက်ဖို့ အလှူငွေတွေကို အသုံးပြုပါတယ်။ အဲဒီအပြင် စာပေတွေ၊ ဗီဒီယိုတွေ ပြင်ဆင်ခြင်း၊ ဘာသာပြန်ခြင်း၊ သဘာဝဘေး ကယ်ဆယ်ရေးလုပ်ငန်း၊ နိုင်ငံတော်ခန်းမသစ် ဆောက်လုပ်ရေးလုပ်ငန်းတို့ကို စေတနာအလျာက် ထည့်ဝင်တဲ့ အလှူငွေတွေနဲ့ လုပ်ဆောင်တယ်။ ‘ရက်ရောတဲ့သူဟာ ကောင်းချီးခံစားရမယ်’ ဆိုတာ စိတ်ချနိုင်ပါတယ်။ ဒီ့အပြင် ကိုယ့်ရဲ့အဖိုးတန်ဥစ္စာတွေကို ပေးဆက်ခြင်းအားဖြင့် ယေဟောဝါကို ဂုဏ်တင်ကြတယ်။—ပညာ. ၃:၉။ ၂၂:၉