ရွှင်လန်းစွာ သီချင်းဆိုပါ
“ဘုရားသခင်ကို ချီးမွမ်းသီချင်းဆိုတာ သိပ်ကောင်းတယ်။”—ဆာ. ၁၄၇:၁။
၁။ သီချင်းဆိုခြင်းက ဘာလုပ်ဆောင်စေနိုင်သလဲ။
နာမည်ကျော် တေးရေးဆရာတစ်ဦးက ပြောတယ်– “စကားလုံးတွေက စဉ်းစားတွေးတောစေတယ်။ ဂီတက ခံစားစေတယ်။ သီချင်းကတော့ တွေးတောခံစားစေတယ်။” ကောင်းကင်ဘုံစံ ဖခင် ယေဟောဝါကို ချီးမွမ်းကြောင်း၊ ချစ်ကြောင်း ဖော်ပြတဲ့သီချင်းတွေထက် ပိုတွေးတောခံစားစေတာ ဘာရှိဦးမလဲ။ တစ်ယောက်တည်းဖြစ်စေ၊ အသင်းတော်လိုက်ဖြစ်စေ သီချင်းဆိုခြင်းဟာ စင်ကြယ်တဲ့ ဝတ်ပြုရေးရဲ့ အရေးကြီးတဲ့ကဏ္ဍမှာ ပါဝင်တယ်။
၂၊ ၃။ (က) အသင်းတော်မှာ သီချင်းဆိုတာကို တချို့ ဘယ်လို ခံစားရနိုင်သလဲ။ (ခ) ဘယ်မေးခွန်းတွေကို သုံးသပ်ကြမလဲ။
၂ အသင်းတော်နဲ့အတူ သီချင်းဆိုတာကို ဘယ်လို ခံစားရသလဲ။ ရှက်သလား။ ယဉ်ကျေးမှုတချို့မှာ အမျိုးသားတွေဟာ လူအများရှေ့ သီချင်းဆိုတာကို ကသိကအောက်ဖြစ်ကြတယ်။ အဲဒီသဘောထားက အသင်းတော်တစ်ခုလုံးကို ထိခိုက်နိုင်တယ်။ အထူးသဖြင့် အသင်းတော်လိုက် သီချင်းဆိုနေချိန်မှာ ဦးဆောင်နေသူတွေက မဆိုဘဲနေရင်၊ တခြားကိစ္စတွေ လုပ်နေရင်ပေါ့။—ဆာ. ၃၀:၁၂။
၃ သီချင်းဆိုခြင်းကို ဝတ်ပြုရေးရဲ့ အစိတ်အပိုင်းအဖြစ် မှန်ကန်စွာ ရှုမြင်မယ်ဆိုရင် အစည်းအဝေးမှာ သီချင်းဆိုတဲ့အခါ ထွက်သွားတာမျိုး၊ မပါဝင်တာမျိုး လုပ်မှာ မဟုတ်ဘူး။ ဒါကြောင့် ယောက်တိုင်း ကိုယ့်ကိုယ်ကိုယ် မေးသင့်တယ်–
‘ဝတ်ပြုစည်းဝေးချိန်မှာ သီချင်းဆိုတာကို ဘယ်လို သဘောထားသလဲ။ ရွှင်လန်းစွာ သီချင်းဆိုဖို့ အတားအဆီး ဖြစ်စေတဲ့ စိုးရိမ်မှုကို ဘယ်လို ကျော်လွှားနိုင်သလဲ။ ခံစားချက်အပြည့်နဲ့ ဘယ်လို သီဆိုနိုင်သလဲ။’စစ်မှန်တဲ့ဝတ်ပြုရေးမှာ အရေးပါတဲ့ သီချင်းဆိုခြင်း
၄၊ ၅။ ရှေးအစ္စရေးတွေရဲ့ ဝတ်ပြုရေးမှာ သီချင်းဆိုခြင်းကို ဘယ်လောက် ကျယ်ကျယ်ပြန့်ပြန့် စီစဉ်ဖွဲ့စည်းခဲ့သလဲ။
၄ သစ္စာရှိတဲ့ ကိုးကွယ်သူတွေဟာ ယေဟောဝါကို ချီးမွမ်းဖို့ တေးဂီတကို ရှေးအချိန်ကတည်းက အသုံးပြုခဲ့ကြတယ်။ ယေဟောဝါကို ရှေးအစ္စရေးတွေ သစ္စာရှိရှိ အမှုဆောင်ချိန်မှာ သီချင်းဆိုခြင်းဟာ ဝတ်ပြုရေးရဲ့ အရေးကြီးတဲ့ကဏ္ဍ ဖြစ်ခဲ့တာ မှတ်သားစရာပဲ။ ဥပမာ၊ ဗိမာန်တော်လုပ်ငန်းအတွက် ပြင်ဆင်ချိန်မှာ ဘုရင်ဒါဝိဒ်က ချီးမွမ်းသီချင်း ဆိုဖို့ လေဝိအနွယ် သီချင်းသည် ၄,၀၀၀ စီစဉ်ဖွဲ့စည်းခဲ့တယ်။ သူတို့ထဲက ၂၈၈ ယောက်ဟာ “ယေဟောဝါကို ချီးမွမ်းသီဆိုဖို့ လေ့ကျင့်ထားသူတွေ၊ တီးမှုတ်သီဆိုရာမှာ ကျွမ်းကျင်သူတွေ ဖြစ်တယ်။”—၁ ရာ. ၂၃:၅။ ၂၅:၇။
၅ ဗိမာန်တော် အပ်နှံပွဲမှာ တေးဂီတနဲ့ သီချင်းဆိုခြင်းဟာ အရေးပါတဲ့ အခန်းကဏ္ဍမှာ ပါဝင်ခဲ့တယ်။ “ခရာမှုတ်သူတွေ၊ သီချင်းဆိုသူတွေက ယေဟောဝါကို ချီးမွမ်းကြတယ်။ ခရာ၊ လင်းကွင်းနဲ့ တခြားတူရိယာ တီးမှုတ်သံတွေ၊ . . . ယေဟောဝါကို ကျေးဇူးတင်ချီးမွမ်းသံတွေ သံပြိုင်ထွက်လာတဲ့အခါ . . . ယေဟောဝါရဲ့ အိမ်တော်မှာ ဘုရားသခင်ရဲ့ ဘုန်းအသရေ ပြည့်နေတယ်” လို့ ဖော်ပြထားတယ်။ ယုံကြည်ခြင်း ခိုင်မာစေတဲ့ အချိန်အခါပါပဲ။—၂ ရာ. ၅:၁၃၊ ၁၄။ ၇:၆။
၆။ ဂျေရုဆလင်မြို့မှာ ဘုရင်ခံအဖြစ် နေဟမိ အုပ်ချုပ်ချိန်အတွင်း အထူးတေးဂီတ တင်ဆက်မှုအကြောင်း ဖော်ပြပါ။
၆ ဂျေရုဆလင်မြို့ရိုး ပြန်တည်ဆောက်ဖို့ သစ္စာရှိအစ္စရေးတွေကို နေဟမိ ဦးဆောင်ချိန်မှာလည်း တူရိယာအပြည့်အစုံနဲ့ လေဝိအမျိုး သီချင်းသည်တွေကို စီစဉ်ဖွဲ့စည်းခဲ့တယ်။ ပြန်တည်ဆောက်ထားတဲ့မြို့ရိုးကို အပ်နှံချိန်မှာ အထူးတေးဂီတ တင်ဆက်မှုက အဲဒီအခါသမယကို အကြီးအကျယ် ရွှင်လန်းစေခဲ့တယ်။ ဒီအချိန်မှာ “ကျေးဇူးတင်ချီးမွမ်းတဲ့ တေးသံစုံအဖွဲ့” နှစ်ဖွဲ့ ရှိတယ်။ အဖွဲ့နှစ်ဖွဲ့ဟာ မြို့ရိုးပေါ်မှာ ဆန့်ကျင်ဘက် ပတ်သွားပြီး ဗိမာန်တော်နား မြို့ရိုးပေါ်မှာ ဆုံကြတယ်။ ဒါကြောင့် သူတို့ရဲ့ အသံကို အဝေးကြီးကနေတောင် ကြားနိုင်တယ်။ (နေ. ၁၂:၂၇၊ ၂၈၊ ၃၁၊ ၃၈၊ ၄၀၊ ၄၃) ကိုးကွယ်သူတွေ အားရပါးရ သီဆိုချီးမွမ်းတာကို ကြားရတဲ့အခါ ယေဟောဝါ နှစ်သက်မှာ သေချာပါတယ်။
၇။ ခရစ်ယာန် ဝတ်ပြုရေးမှာ သီချင်းဆိုဖို့ လိုအပ်ကြောင်း ယေရှု ဘယ်လို အလေးပေးခဲ့သလဲ။
၇ ခရစ်ယာန် အသင်းတော် တည်ထောင်တဲ့အခါမှာလည်း တေးဂီတဟာ စစ်မှန်တဲ့ ဝတ်ပြုရေးမှာ အရေးပါဆဲပါပဲ။ လူ့သမိုင်းရဲ့ အရေးကြီးဆုံးညမှာ ယေရှုဟာ သခင့်ညစာစားပွဲ ကျင်းပပြီးနောက် သီချင်းတွေ သီဆိုခဲ့တယ်။—မဿဲ ၂၆:၃၀ ကိုဖတ်ပါ။
၈။ ပထမရာစု ခရစ်ယာန်တွေဟာ ဝတ်ပြုရေးမှာ သီချင်းဆိုတာနဲ့ပတ်သက်ပြီး ဘယ်ပုံသက်သေ ချမှတ်ခဲ့ကြသလဲ။
၈ ဘုရားသခင်ကို အတူတကွ ချီးမွမ်းသီချင်းဆိုရာမှာ ပထမရာစု ခရစ်ယာန်တွေ ပုံသက်သေ ချမှတ်ခဲ့ကြတယ်။ ကိုယ်ပိုင်အိမ်တွေမှာ စုဆုံလေ့ရှိကြပေမဲ့ ရိုးရှင်းတဲ့ ဝန်းကျင်အနေအထားကြောင့် ယေဟောဝါကို အားတက်သရော သီချင်းဆိုချင်တဲ့စိတ် လျော့နည်းမသွားဘူး။ စွမ်းအားတော် တိုက်တွန်းမှုကြောင့် ခရစ်ယာန် ညီအစ်ကိုတွေကို တမန်တော် ပေါလု ဒီလိုညွှန်ကြားတယ်– “ဆာလံသီချင်းတွေ၊ ဘုရားသခင်ကို ချီးမွမ်းတဲ့ သီချင်းတွေ သီဆိုပြီး၊ ဓမ္မသီချင်းတွေကို ကျေးဇူးတင်စိတ်နဲ့ သီဆိုပြီး အချင်းချင်း သွန်သင်အားပေးကြပါ။ ယေဟောဝါကို လှိုက်လှိုက်လှဲလှဲ သီဆိုချီးမွမ်းကြပါ။” (ကော. ၃:၁၆) ကျွန်တော်တို့ရဲ့ သီချင်းစာအုပ်မှာပါတဲ့ သီချင်းတွေဟာ “ကျေးဇူးတင်စိတ်နဲ့ သီဆို” ရမယ့် “ဓမ္မသီချင်းတွေ” ပါပဲ။ “သစ္စာနဲ့ သတိပညာရှိတဲ့ ကျွန်” ပြင်ဆင်ပေးတဲ့ ကျမ်းစာအကြောင်းအရာတွေထဲမှာ သီချင်းတွေလည်း ပါတယ်။—မ. ၂၄:၄၅။
သီချင်းဆိုခြင်းနဲ့ပတ်သက်တဲ့ စိုးရိမ်မှုကို ကျော်လွှားခြင်း
၉။ (က) အစည်းအဝေးတွေ၊ အစည်းအဝေးကြီးတွေမှာ ရွှင်လန်းစွာ သီချင်းဆိုဖို့ တချို့ကို ဘာက တားဆီးနိုင်သလဲ။ (ခ) ယေဟောဝါကို ဘယ်လို ချီးမွမ်းသီချင်းဆိုသင့်သလဲ။ ဘယ်သူတွေ ဦးဆောင်သင့်သလဲ။ (ဆောင်းပါးအစမှာပါတဲ့ ရုပ်ပုံကို ကြည့်ပါ။)
၉ ကိုယ့်မိသားစု၊ ယဉ်ကျေးမှု၊ ပတ်ဝန်းကျင်မှာ သီချင်းဆိုတဲ့ ဓလေ့ မရှိရင်ကော။ ခေတ်ပေါ် နည်းပညာကြောင့် အဆိုတော်တွေရဲ့ သီချင်းတွေ နားထောင်ရတာ နှစ်ခြိုက်မှာပဲ။ ဒါပေမဲ့ ကိုယ့်အသံကို ဖျော်ဖြေရေးလောက,က အဆိုတော်တွေရဲ့အသံနဲ့ နှိုင်းယှဉ်တဲ့အခါ ရှက်မိ၊ စိတ်ပျက်မိနိုင်တယ်။ အဲဒါက ယေဟောဝါကို ချီးမွမ်းသီချင်းဆိုရမယ့်တာဝန်ကို အတားအဆီး မဖြစ်စေသင့်ဘူး။ သီချင်းစာအုပ်ကို မြင့်မြင့်ကိုင်၊ ခေါင်းမော့ပြီး လှိုက်လှိုက်လှဲလှဲ ဆိုလိုက်ပါ။ (ဧဇ. ၃:၁၁။ ဆာလံ ၁၄၇:၁ ကိုဖတ်ပါ။) ဒီနေ့ နိုင်ငံတော်ခန်းမ များစွာမှာ သီချင်းစာသားတွေကို တီဗီဖန်သားပြင်မှာ ပြပေးတယ်။ အဲဒါက သီချင်းဆိုဖို့ လွယ်ကူစေတယ်။ အကြီးအကဲတွေအတွက် နိုင်ငံတော်ဓမ္မအမှုသင်တန်း သင်ရိုးမှာ နိုင်ငံတော်သီချင်း ဆိုခြင်းကို ထည့်သွင်းထားတာ စိတ်ဝင်စားစရာပဲ။ အဲဒါက အကြီးအကဲတွေအနေနဲ့ သီချင်းဆိုရာမှာ အသင်းတော်ကို ဦးဆောင်ဖို့ လိုအပ်ကြောင်း ပေါ်လွင်စေတယ်။
၁၀။ သီချင်းဆိုရမှာ ကြောက်ရွံ့နေရင် ဘာကို သတိရသင့်သလဲ။
၁၀ သံကုန်ထုတ်ပြီး သီချင်းမဆိုရတဲ့ အကြောင်းရင်းတစ်ခုက ကြောက်ရွံ့ခြင်းပါပဲ။ ထူးခြားပေါ်လွင်နေမှာ၊ တခြားသူတွေ မကြိုက်မှာကို ကြောက်ရွံ့တာ ဖြစ်နိုင်တယ်။ စကားပြောတဲ့အခါ “ကျွန်တော်တို့အားလုံး ခဏခဏ မှားတတ်ကြ” ကြောင်း သတိရသင့်တယ်။ (ယာ. ၃:၂) ဒါပေမဲ့ မှားလို့ စကားမပြောဘဲ မနေကြဘူး။ ဒါဆိုရင် အသံမကောင်းလို့ဆိုပြီး ယေဟောဝါကို ချီးမွမ်းသီချင်း မဆိုဘဲမနေသင့်ဘူး။
၁၁၊ ၁၂။ သီချင်းဆိုရာမှာ တိုးတက်ဖို့ အကြံပြုချက်တချို့က ဘာတွေလဲ။
၁၁ သီချင်းကို ဘယ်လို ဆိုရမှန်း မသိလို့ စိုးရိမ်နေတာ ဖြစ်နိုင်တယ်။ အခြေခံ အကြံပြုချက်တချို့ကို လိုက်နာခြင်းအားဖြင့် သီချင်းဆိုရာမှာ တိုးတက်နိုင်ပါတယ်။ *
၁၂ တော်မှန်စွာ အသက်ရှူခြင်းအားဖြင့် အားမာန်ပါပါ သီဆိုနိုင်တယ်။ လျှပ်စစ်စွမ်းအားက မီးသီးကို လင်းစေသလို အသက်ရှူခြင်းက စကားပြောတဲ့အခါဖြစ်စေ၊ သီချင်းဆိုတဲ့အခါဖြစ်စေ အသံအား ကောင်းစေနိုင်တယ်။ စကားပြောတဲ့အသံ၊ အဲဒီထက် ပိုကျယ်တဲ့အသံနဲ့ သီချင်းဆိုသင့်တယ်။ (သီအိုကရက်တစ် ဓမ္မအမှုကျောင်း ပညာရေးမှ အကျိုးရယူ စာအုပ် စာမျက်နှာ ၁၈၁ မှ ၁၈၄၊ “ထွက်သက်ဝင်သက်ကို လျောက်ပတ်စွာ ထိန်းပေးပါ” ခေါင်းစဉ်ငယ်အောက်မှာပါတဲ့ အကြံပြုချက်တွေကို ကြည့်ပါ။) ချီးမွမ်းသီချင်းဆိုချိန်မှာ “ရွှင်လန်းစွာ သီချင်းဆိုကြ” ဖို့ ဝတ်ပြုသူတွေကို ကျမ်းစာမှာ ရံဖန်ရံခါ ညွှန်ကြားတယ်။—ဆာ. ၃၃:၁-၃။
၁၃။ သီချင်းဆိုရာမှာ ယုံကြည်စိတ်ချမှု တိုးများလာအောင် ဘယ်လို လုပ်ဆောင်နိုင်သလဲ။
၁၃ မိသားစု ဝတ်ပြုမှုမှာဖြစ်စေ၊ တစ်ယောက်တည်းဖြစ်စေ ဒီလိုလုပ်ကြည့်ပါ– သီချင်းစာအုပ်ထဲက အကြိုက်ဆုံး သီချင်းတစ်ပုဒ်ကို ရွေးပါ။ စာသားကို ပီပီသသ၊ ယုံကြည်စိတ်ချတဲ့ လေသံနဲ့ ကျယ်ကျယ်ဖတ်ပါ။ အသက်ဝဝရှူပြီး တစ်ကြောင်းတည်းက တေးသားတွေကို ကျယ်ကျယ်ပြောပါ။ ပြီးနောက် အဲဒီအသံနဲ့ပဲ သီဆိုပါ။ (ဟေရှာ. ၂၄:၁၄) သီချင်းဆိုသံ ပိုအားပြည့်လာမယ်။ အဲဒါ ကောင်းတယ်။ မကြောက်ပါနဲ့။ မရှက်ပါနဲ့။
၁၄။ (က) ပါးစပ်ကို ကျယ်ကျယ်ဖွင့်ခြင်းက သီချင်းဆိုတာကို ဘယ်လို ကူညီပေးနိုင်သလဲ။ (“ သီချင်းဆိုတဲ့အခါ တိုးတက်နိုင်ပုံ” လေးထောင့်ကွက်ကို ကြည့်ပါ။) (ခ) အသံပြဿနာတွေကို ကျော်လွှားခြင်းနဲ့ပတ်သက်တဲ့ ဘယ်အကြံပြုချက်တွေက သင့်အတွက် လက်တွေ့ကျသလဲ။
၁၄ ပါးစပ် ကျယ်ကျယ်မဖွင့်ရင် အသံကျယ်ကျယ် မထွက်နိုင်ဘူး။ ဒါကြောင့် ပုံမှန် စကားပြောချိန်ထက် ပါးစပ် ကျယ်ကျယ်ဖွင့်ပါ။ ကိုယ့်အသံဟာ ကြောင်နေတယ်၊ စူးလွန်းနေတယ်လို့ ခံစားရရင် ဘာလုပ်သင့်သလဲ။ သီအိုကရက်တစ် ဓမ္မအမှုကျောင်း ပညာရေးမှ အကျိုးရယူ စာအုပ် စာမျက်နှာ ၁၈၄၊ “သတ်သတ်မှတ်မှတ် ပြဿနာများကို အောင်မြင်ကျော်လွှားခြင်း” လေးထောင့်ကွက်မှာ လက်တွေ့ကျ အကြံပြုချက်တွေ တွေ့နိုင်တယ်။
လှိုက်လှိုက်လှဲလှဲ သီဆိုပါ
၁၅။ (က) ၂၀၁၆ နှစ်ပတ်လည် အစည်းအဝေးမှာ ဘာကြေညာခဲ့သလဲ။ (ခ) သီချင်းစာအုပ်သစ် ထုတ်ဝေရတဲ့ အကြောင်းရင်းတချို့က ဘာတွေလဲ။
၁၅ ပင်စီဗေးနီးယားပြည်နယ်၊ ကင်းမျှော်စင် သမ္မာကျမ်းစာနဲ့ ဝေစာအသင်းရဲ့ ၂၀၁၆ နှစ်ပတ်လည် အစည်းအဝေး‘ရွှင်လန်းစွာ တေးသီကျူးကြ’ ဆိုတဲ့ သီချင်းစာအုပ်သစ်ကို အစည်းအဝေးတွေမှာ အသုံးပြုဖို့ မကြာခင် ရရှိတော့မှာဖြစ်ကြောင်း ကြေညာခဲ့တယ်။ သီချင်းစာအုပ်ကို ပြန်တည်းဖြတ်ရတဲ့ အကြောင်းရင်းက ကမ္ဘာသစ်ဘာသာပြန် တည်းဖြတ်ကျမ်းနဲ့ ကိုက်ညီစေဖို့ ဖြစ်ကြောင်း ညီအစ်ကိုလတ် ရှင်းပြခဲ့တယ်။ ၂၀၁၃ ကမ္ဘာသစ်ဘာသာပြန် တည်းဖြတ်ကျမ်းမှာ မပါတော့တဲ့ အသုံးအနှုန်းတွေကို သီချင်းစာသားထဲကနေ ထုတ်ဖို့၊ တည်းဖြတ်ဖို့ လိုအပ်လာတယ်။ ဟောပြောခြင်းလုပ်ငန်းအကြောင်း သီချင်းသစ်တွေ၊ ရွေးဖိုးအတွက် လေးမြတ်ကြောင်း ဖော်ပြတဲ့သီချင်းတွေလည်း ထည့်သွင်းထားပါတယ်။ သီချင်းဆိုခြင်းဟာ ဝတ်ပြုရေးရဲ့ အရေးကြီးတဲ့ကဏ္ဍမှာ ပါဝင်တဲ့အတွက် အုပ်ချုပ်ရေးအဖွဲ့က ကမ္ဘာသစ်ဘာသာပြန် တည်းဖြတ်ကျမ်းနဲ့ ပုံစံတူ အရည်အသွေးမြင့်စာအုပ် ထုတ်ဝေချင်တယ်။
မှာ အုပ်ချုပ်ရေး အဖွဲ့ဝင် ညီအစ်ကို စတီဗင်လတ်က ယေဟောဝါကို၁၆၊ ၁၇။ သီချင်းစာအုပ်သစ်မှာ ဘယ်အပြောင်းအလဲတွေ လုပ်ထားသလဲ။
၁၆ ယေဟောဝါကို ‘ရွှင်လန်းစွာ တေးသီကျူးကြ’ စာအုပ်ကို အသုံးပြုရလွယ်အောင် သီချင်းတွေကို အကြောင်းအရာအလိုက် စီစဉ်ထားတယ်။ ဥပမာ၊ ပထမ ၁၂ ပုဒ်က ယေဟောဝါအကြောင်း၊ နောက် ၈ ပုဒ်က ယေရှုနဲ့ ရွေးဖိုးအကြောင်းစသဖြင့် စီစဉ်ထားတယ်။ လူထုဟောပြောချက်အတွက် သီချင်းရွေးချယ်ရာမှာ အထောက်အကူပြုမယ့် အကြောင်းအရာ မာတိကာတစ်ခု ရှိတယ်။
၁၇ လှိုက်လှိုက်လှဲလှဲ သီဆိုနိုင်စေဖို့ သီချင်းစာသားတချို့ကို ပြန်တည်းဖြတ်ထားတယ်။ အဲဒါက ပိုရှင်းလင်းစေတယ်။ မသုံးတော့တဲ့ အသုံးအနှုန်းတွေကိုလည်း ထုတ်လိုက်တယ်။ ဥပမာ၊ သီချင်းတွေကို အရေးပုံစံကနေ အပြောပုံစံ ပြောင်းထားလို့ သီဆိုရပိုလွယ်တယ်။ “သင့်နှလုံးကို စောင့်ကြပ်ပါ” ဆိုတဲ့ ခေါင်းစဉ်ကိုလည်း “နှလုံးကို စောင့်ကြပ်စို့” လို့ပြောင်းထားတယ်။ ဘာကြောင့်လဲ။ အစည်းအဝေး၊ အစည်းအဝေးပွဲ၊ အစည်းအဝေးကြီး ပရိသတ်ထဲမှာရှိတဲ့ လူသစ်တွေ၊ စိတ်ဝင်စားသူတွေ၊ လူငယ်မောင်မယ်၊ ညီအစ်မတွေက တခြားသူတွေကို အမိန့်ပေးတဲ့သဘော မသက်ရောက်စေဖို့ ဖြစ်တယ်။ ဒါကြောင့် ခေါင်းစဉ်နဲ့ စာသားတွေကို ပြင်ထားတယ်။
၁၈။ သီချင်းစာအုပ်သစ်နဲ့ ဘာကြောင့် အကျွမ်းတဝင် ရှိသင့်သလဲ။ (အောက်ခြေမှတ်ချက်ကို ကြည့်ပါ။)
၁၈ ယေဟောဝါကို ‘ရွှင်လန်းစွာ တေးသီကျူးကြ’ စာအုပ်ထဲက သီချင်းများစွာဟာ ဆုတောင်းချက်ပုံစံ ဖြစ်တယ်။ ဒီသီချင်းတွေအားဖြင့် ယေဟောဝါဆီ ကိုယ့်ခံစားချက်တွေကို ဖော်ပြနိုင်တယ်။ တချို့သီချင်းတွေက “မေတ္တာစိတ် ရှိစေဖို့၊ အကျင့်ကောင်းတွေ ကျင့်စေဖို့၊ [ကျွန်တော်တို့ကို] တိုက်တွန်းအားပေး” ဖို့ ကူညီပေးပါလိမ့်မယ်။ (ဟီ. ၁၀:၂၄) သီချင်းတေးသံ၊ စာသား၊ စည်းချက်တွေနဲ့ အကျွမ်းတဝင်ရှိအောင် လုပ်ထားပါ။ jw.org မှာတင်ထားတဲ့ သီချင်းတွေကို နားထောင်ပြီး အကျွမ်းတဝင်ရှိအောင် လုပ်ထားနိုင်တယ်။ အိမ်မှာ လေ့ကျင့်ခြင်းအားဖြင့် ယုံကြည်စိတ်ချမှုအပြည့်နဲ့ လှိုက်လှိုက်လှဲလှဲ သီဆိုနိုင်ပါတယ်။ *
၁၉။ အသင်းတော်မှာရှိသူအားလုံး ယေဟောဝါကို ချီးမွမ်းကိုးကွယ်ရာမှာ ဘယ်လိုပါဝင်နိုင်သလဲ။
၁၉ သီချင်းဆိုခြင်းဟာ ဝတ်ပြုရေးရဲ့ အရေးကြီးတဲ့ကဏ္ဍဖြစ်ကြောင်း သတိရပါ။ ယေဟောဝါကို ချစ်ကြောင်း၊ ကျေးဇူးတင်လေးမြတ်ကြောင်း ထိရောက်စွာ ဖော်ပြနိုင်တဲ့နည်းပါပဲ။ (ဟေရှာယ ၁၂:၅ ကိုဖတ်ပါ။) ရွှင်လန်းစွာ သီချင်းဆိုခြင်းအားဖြင့် တခြားသူတွေကိုလည်း ယုံကြည်စိတ်ချစွာ သီချင်းဆိုနိုင်အောင် အားပေးနိုင်တယ်။ အသင်းတော်မှာရှိတဲ့ လူကြီးလူငယ်၊ စိတ်ဝင်စားသူ လူသစ်အားလုံး ယေဟောဝါကို ချီးမွမ်းကိုးကွယ်တဲ့ ဒီကဏ္ဍမှာ ပါဝင်နိုင်ပါတယ်။ သီချင်းမဆိုဘဲ မနေပါနဲ့။ “ယေဟောဝါကို ချီးမွမ်းသီချင်း ဆိုကြ” ဆိုတဲ့ ဆာလံဆရာရဲ့ ရှင်းလင်းတဲ့ ညွှန်ကြားချက်ကို နာခံပါ။ မှန်ပါတယ်၊ ရွှင်လန်းစွာ သီချင်းဆိုပါ။—ဆာ. ၉၆:၁။
^ စာပိုဒ်၊ 11 အသံတိုးတက်ကောင်းမွန်စေတဲ့ ထပ်ဆင့်အကြံပြုချက်တွေကို ၂၀၁၄ ဒီဇင်ဘာ JW ရုပ်သံ အစီအစဉ် (ကျွန်ုပ်တို့ရဲ့ စတူဒီယိုမှ ဗီဒီယို) မှာ ကြည့်ပါ။
^ စာပိုဒ်၊ 18 သီချင်းရဲ့ သဘောတရားကို နားလည်အောင် ကူညီပေးဖို့ အစည်းအဝေးကြီးနဲ့ အစည်းအဝေးပွဲ အစီအစဉ်အပိုင်းတွေကို ဆယ်မိနစ်ကြာ တေးတင်ဆက်မှုနဲ့ အစပြုထားတယ်။ ကြားနာရမယ့် အစီအစဉ်အတွက် စိတ်နှလုံးကို ပြင်ဆင်ပေးဖို့ စီစဉ်ထားတာပါ။ ဒါကြောင့် ဒီတေးတင်ဆက်မှု စတာနဲ့ ထိုင်ခုံမှာ ထိုင်ပြီး အာရုံစိုက် နားထောင်ဖို့ အားပေးပါတယ်။