၁။ ဆုံးမမှု​ကို ကျမ်းစာမှာ ဘယ်လို ဖော်ပြ​လေ့​ရှိ​သလဲ။

“ဆုံးမမှု” ဆိုတဲ့ စကားလုံးကို ကြား​တာနဲ့ ဘာကို ပြေးမြင်​မိ​သလဲ။ ပြစ်ဒဏ်ပေး​ခြင်း​ကို မြင်​မိ​နိုင်တယ်။ ဒါပေမဲ့ ဆုံးမခြင်း​မှာ ဒါ့​ထက်မက ပါဝင်တယ်။ ကျမ်းစာမှာ ဆုံးမမှု​ကို နှစ်​လို့​ဖွယ် ဖော်ပြထားပြီး အသိပညာ၊ ဉာဏ်ပညာ၊ မေတ္တာ၊ အသက်​တို့​နဲ့ ဆက်စပ်​လေ့ရှိတယ်။ (ပညာ. ၁:၂-၇။ ၄:၁၁-၁၃) ဘုရားသခင့် ဆုံးမမှုက ကျွန်တော်တို့ကို ချစ်ကြောင်း၊ ထာဝရ​အသက် ရစေ​လို​ကြောင်း ဖော်ပြတယ်။ (ဟီ. ၁၂:၆) ဘုရားသခင့် ဆုံးမမှု​မှာ ပြစ်ဒဏ်ပေး​ခြင်း ပါဝင်​နိုင်​ပေ​မဲ့ ဘယ်တော့မှ ရက်စက်ကြမ်းကြုတ်​မှု မရှိဘူး။ “ဆုံးမမှု” မှာ အဓိက​အားဖြင့် မိဘ​က ကလေးကို သွန်သင်ပေး​သလို သင်ပေး​ခြင်း ပါဝင်တယ်။

၂၊ ၃။ ဆုံးမမှု​မှာ ဘာတွေ ပါဝင်​သလဲ။ ရှင်းပြပါ။ (ဆောင်းပါး​အစမှာ​ပါတဲ့ ပုံကို ကြည့်ပါ။)

^၂ ဒီ​ဥပမာ​ကို စဉ်းစားကြည့်ပါ။ ဂျွန်နီ​လို့ခေါ်တဲ့ ကလေး​တစ်ယောက် အိမ်​ထဲမှာ ဘောလုံး​ကန်​နေတယ်။ “အိမ်​ထဲမှာ ဘောလုံး မ​ကန်​နဲ့။ ပစ္စည်း​တွေ ကွဲ​ကုန်​မယ်” လို့ အမေက ပြောတယ်။ အမေ့​စကား နားမထောင်​ဘဲ ဆက်​ကန်​နေလို့ ပန်း​အိုး ကွဲ​သွားတယ်။ အမေ​ဖြစ်သူ ဘယ်လို ဆုံးမ​မ​လဲ။ သူ့​လုပ်ရပ် မှား​ကြောင်း သင်ပေး​မှာ ဖြစ်သလို ပြစ်ဒဏ်​လည်း ပေး​နိုင်တယ်။ မိဘ​ရဲ့ စည်းကမ်းတွေ​ဟာ လိုအပ်​ပြီး အကျိုးသင့်အကြောင်းသင့် ရှိကြောင်း၊ မိဘ​စကား နားထောင်​သင့်​ကြောင်း  သင်ပေးတယ်။ ပြီးမှ သင်ခန်းစာ​ရသွား​အောင် သင့်တော်​သလို ဒဏ်ပေး​တယ်။ ခဏလောက် ဘောလုံး​ကို သိမ်း​လိုက်တာ​မျိုး ဖြစ်နိုင်တယ်။ ဒါမှ မနာခံမှု​မှာ ဆိုးကျိုး​တွေ ရှိကြောင်း စွဲမှတ်​သွား​နိုင်မယ်။

^၃ ခရစ်ယာန်​တွေအနေနဲ့ ကျွန်တော်တို့ဟာ ဘုရားသခင်ရဲ့ အိမ်ထောင်စု​ဝင်​တွေ ဖြစ်တယ်။ (၁ တိ. ၃:၁၅) ဒါကြောင့် ဘုရားသခင်ရဲ့ စံနှုန်း​သတ်မှတ်​ပိုင်ခွင့်၊ ဆုံးမ​ပိုင်ခွင့်​ကို လေးစား​ကြ​တယ်။ အဲဒီအပြင် ကိုယ့်လုပ်ရပ်​ကြောင့် ဆိုးကျိုး​တွေ​ခံရ​တဲ့အခါ ဘုရား​သခင်​ကို နာခံဖို့ အရေးကြီးကြောင်း သတိရ​စေတယ်။ (ဂ​လ. ၆:၇) ကျွန်တော်တို့ကို ဘုရား​သခင် အလွန်​ဂရုစိုက်​တယ်၊ ဒုက္ခ​မ​ရောက်​စေချင်ဘူး။—၁ ပေ. ၅:၆၊ ၇။

၄။ (က) ဘယ်လို​လေ့ကျင့်မှု​မျိုး​ကို ယေဟောဝါ ကောင်းချီး​ပေး​သလဲ။ (ခ) ဒီဆောင်းပါးမှာ ဘယ်​အကြောင်း ဆွေးနွေးကြမလဲ။

^၄ ကျမ်းစာကို အခြေခံ​တဲ့ ဆုံးမမှု​က ကလေး ဒါမှမဟုတ် ကျမ်းစာသင်သား​ကို ခရစ်တော်​တပည့်ဖြစ်​လာတဲ့​အထိ ကူညီ​ပေး​နိုင်တယ်။ လေ့ကျင့်ပေး​ရာမှာ အဓိက​သုံး​တဲ့ ကျမ်းစာ​ဟာ “ဖြောင့်မတ်​လာအောင် ဆုံးမ” ပေး​နိုင်တယ်။ ဒီနည်းနဲ့ ကလေး ဒါမှမဟုတ် သင်သား​ဟာ ယေရှု “မိန့်မှာ​ထားသမျှကို” နားလည်ပြီး “လိုက်နာ” တတ်လာ​မယ်။ (၂ တိ. ၃:၁၆။ မ. ၂၈:၁၉၊ ၂၀) သင်သားတွေ​ကို ခရစ်တော်ရဲ့ တပည့်ဖြစ်​လာ​စေတဲ့ အဲဒီလို လေ့ကျင့်မှု​ကို ယေဟောဝါ ကောင်းချီး​ပေးတယ်။ (တိတု ၂:၁၁-၁၄ ကို​ဖတ်ပါ။) အခု အရေးကြီးတဲ့ မေးခွန်း သုံးခု​ကို ဆွေးနွေး​ကြည့်ကြစို့– (၁) ဘုရားသခင့် ဆုံးမမှု​က မေတ္တာကို ဘယ်လို ဖော်ပြသလဲ။ (၂) အတိတ်​က ဘုရား​သခင် ဆုံးမ​ခဲ့​သူတွေ​ဆီကနေ ဘာသင်ယူနိုင်သလဲ။ (၃) ဆုံးမ​တဲ့အခါ ယေဟောဝါနဲ့ သားတော်​ကို ဘယ်လို တုပ​နိုင်သလဲ။

၅။ ယေဟောဝါရဲ့ ဆုံးမမှု​မှာ ဘယ်လိုနည်းတွေနဲ့ မေတ္တာ ပေါ်လွင်​သလဲ။

^၅ ယေဟောဝါ​က ကျွန်တော်တို့ကို မေတ္တာပါပါ ပဲ့ပြင်၊ သွန်သင်၊ လေ့ကျင့်ပေး​တဲ့အတွက် ဘုရားရဲ့​မေတ္တာကို ခံစား​နေရ​ပြီး အသက်​လမ်းပေါ် ဆက်ရှိ​နိုင်ကြ​တယ်။ (၁ ယော. ၄:၁၆) ဘုရားက ကျွန်တော်တို့ကို ဘယ်တော့မှ အထင်​မသေး​ဘူး၊ မ​စော်ကား​ဘူး။ (ပညာ. ၁၂:၁၈) ကျွန်တော်တို့ကို ဂုဏ်တင်​ပြီး ကောင်းကွက်​တွေကို အာရုံစိုက်​တယ်။ လွတ်လပ်​စွာ ရွေးချယ်ခွင့်​ကို လေးစား​တယ်။ ကျမ်းစာ၊ ကျမ်းစာအခြေပြု စာပေ၊ ခရစ်ယာန်​မိဘ၊ အသင်းတော် အကြီးအကဲ​တွေဆီက လာတဲ့ ဘုရားသခင့်​ဆုံးမမှု​ကို သင် အဲဒီလို ရှုမြင်​သလား။ မသိ​လိုက်​ဘဲ “ခြေလှမ်းမှား” မိ​တဲ့အခါ မေတ္တာနဲ့ နူးညံ့သိမ်မွေ့​စွာ တည့်မတ်ပေး​တဲ့ အကြီးအကဲ​တွေဟာ ယေဟောဝါရဲ့ မေတ္တာကို တုပ​နေကြတယ်။—ဂ​လ. ၆:၁။

၆။ အခွင့်အရေး​တွေ ကန့်သတ်​လိုက်တဲ့ ဆုံးမမှု​က ဘုရားသခင်ရဲ့​မေတ္တာကို ဘယ်လို ဖော်ပြသလဲ။

^၆ ဆုံးမမှု​မှာ အကြံပြု​တာ၊ နှုတ်​နဲ့ တည့်မတ်​တာ​ထက် ပို​ပါဝင်​လေ့ရှိတယ်။ ကြီးလေး​တဲ့ အပြစ်​တွေ ဖြစ်မယ်ဆိုရင် အသင်းတော် အခွင့်ထူးတွေ ဆုံးရှုံးသွား​နိုင်တယ်။ အဲဒီလို ဆုံးမမှု​က​တောင် ဘုရားသခင့်​မေတ္တာကို ဖော်ပြတယ်။ ဥပမာ၊ အခွင့်အရေး​တွေ ဆုံးရှုံးသွားတဲ့​အခါ ကိုယ်ပိုင်လေ့လာမှု လုပ်ဖို့၊ တွေးတော​ဆင်ခြင်​ဖို့၊ ဆုတောင်း​ဖို့ ဘယ်လောက် အရေးကြီးကြောင်း သိလာ​နိုင်တယ်။ ယုံကြည်ခြင်း ပြန်​ခိုင်ခံ့​လာနိုင်တယ်။ (ဆာ. ၁၉:၇) အချိန်တန်​တဲ့အခါ အခွင့်ထူးတွေ ပြန်​ရလာ​နိုင်တယ်။ နှင်ထုတ်ခြင်း​ကလည်း ယေဟောဝါရဲ့​မေတ္တာကို ဖော်ပြတယ်။ အသင်းတော်ကို မကောင်းတဲ့​သြဇာ မသက်ရောက်​အောင် ကာကွယ်ပေးလို့ပဲ။ (၁ ကော. ၅:၆၊ ၇၊ ၁၁) ဘုရား​သခင် တော်သင့်ရုံ ဆုံးမ​တဲ့အတွက် နှင်ထုတ်​ခံရသူ​ဟာ အပြစ် ဘယ်လောက်​ကြီး​မှန်း သဘောပေါက်​ပြီး နောင်တ​ယူဖို့ လှုံ့ဆော်​ခံရ​နိုင်တယ်။—တ. ၃:၁၉။

၇။ ရှေဗန​ဆိုတာ ဘယ်သူ​လဲ။ ဘယ်​မကောင်းတဲ့​စိတ်​တွေ ဝင်လာ​သလဲ။

^၇ ဆုံးမမှု​ရဲ့​တန်ဖိုး​ကို နားလည်ဖို့ ယေဟောဝါ​ဆုံးမ​ ခဲ့​သူ နှစ်ယောက်​အကြောင်း သုံးသပ်ကြ​စို့။ ဘုရင် ဟေဇကိ​ခေတ်​မှာ အသက်ရှင်​ခဲ့တဲ့ ရှေဗန​နဲ့ အခုခေတ် ညီအစ်ကို ဂ​ရေ​ဟ​မ်​တို့ ဖြစ်တယ်။ ဟေဇကိရဲ့ “နန်းတော်အုပ်” ဖြစ်​ပုံ​ရတဲ့ ရှေဗန​ဟာ အခွင့်အာဏာ အတော်အတန် ရှိတယ်။ (ဟေရှာ. ၂၂:၁၅) ဒါပေမဲ့ မာနကြီး​လာပြီး ဂုဏ်တက်​ဖို့ ကြိုးစား​တယ်။ ကိုယ့်​အတွက် ခမ်းနား​တဲ့ သင်္ချိုင်းဂူ လုပ်​ထားပြီး ‘ဂုဏ်ကျက်သရေ​ရှိတဲ့ မြင်းရထား’ ကို စီး​တယ်။—ဟေရှာ. ၂၂:၁၆-၁၈။

၈။ ရှေဗန​ကို ယေဟောဝါ ဘယ်လို ဆုံးမ​သလဲ။ ဘာ​ရလဒ် ရသလဲ။

^၈ ကိုယ့်ဂုဏ်တက်ဖို့ ကြိုးစား​တဲ့ ရှေဗန​ကို ဘုရား​သခင် “ရာထူး​ဖြုတ်” ပြီး ဧလျာကိမ်​နဲ့ အစားထိုး​လိုက်တယ်။ (ဟေရှာ. ၂၂:၁၉-၂၁) ဂျေရုဆလင်​မြို့​ကို​တိုက်​ဖို့ အဆီးရီးယား​ဘုရင် သနာခရိပ် ခြိမ်းခြောက်​ချိန်မှာ အဲဒီလို ဖြစ်ခဲ့​တာ။ နောက်ပိုင်း သနာခရိပ်​က ဂျူးတွေ​နဲ့ ကြောက်လန့်​နေတဲ့ ဟေဇကိ အ​ညံ့​ခံစေ​ဖို့ ဂျေရုဆလင်​မြို့​ကို အရာရှိ​တွေနဲ့​အတူ စစ်တပ်​တစ်တပ် စေလွှတ်​ခဲ့တယ်။ (၂ ဘု. ၁၈:၁၇-၂၅) ဧလျာကိမ်​က အရာရှိ​တွေကို ထွက်​တွေ့ရတယ်။ ဒါပေမဲ့ တစ်ယောက်တည်း​တော့ မဟုတ်ဘူး။ သူနဲ့​အတူ နောက်​နှစ်ယောက် ပါတယ်။ တစ်ယောက်က စာရေးတော် ရှေဗန​ပါပဲ။ ဒါက ရှေဗန နာကြည်း​မနေ​ဘဲ ပို​နိမ့်ကျတဲ့​တာဝန်ကို နှိမ့်ချ​စွာ လက်ခံခဲ့​ကြောင်း ဖော်ပြတယ်။ ဒီ​ဖြစ်ရပ်​က​နေ ဘာသင်ယူနိုင်သလဲ။ သင်ခန်းစာ သုံးခု​ကို သုံးသပ်ကြည့်​ကြစို့။

၉-၁၁။ (က) ရှေဗန​ရဲ့ ဖြစ်ရပ်​က​နေ ဘယ်​အရေးကြီး သင်ခန်းစာ​တွေ သင်ယူ​နိုင်သလဲ။ (ခ) ရှေဗန​ကို ယေဟောဝါ ဆက်ဆံပုံ​က သင့်ကို ဘယ်လို အားရှိ​စေ​သလဲ။

^၉ ဦးဆုံး၊ ရှေဗန ရာထူး​ပြုတ်​သွားတယ်။ ဒါက “မာန​ရဲ့​နောက်မှာ ပျက်စီးခြင်း လိုက်​လာတယ်။ မောက်မာ​တဲ့​စိတ်​ရဲ့ နောက်မှာ ပြိုလဲခြင်း လိုက်​လာတယ်” ဆိုတဲ့ စကားကို အမှတ်ရ​စေတယ်။ (ပညာ. ၁၆:၁၈) သင်ဟာ အသင်းတော် အခွင့်ထူးတွေ ရထား​ပြီး အတော်အတန် ထင်ပေါ်​နေတယ်​ဆိုရင် နှိမ့်ချ​တဲ့​စိတ် ဆက်​ထိန်းထား​မလား။ ရထားတဲ့ ဆုကျေးဇူး​တွေ၊ အောင်မြင်ပြီးမြောက်​မှုတွေ​အတွက် ယေဟောဝါ​ကို ဂုဏ်တင်​မလား။ (၁ ကော. ၄:၇) “ခင်ဗျားတို့​ယောက်တိုင်း​ကို ပြော​ချင်​တယ်။ ကိုယ့်ကိုယ်ကိုယ် ထင်​သင့်​တာ​ထက် ပိုပြီး​မထင်​ကြပါ​နဲ့။ အဲဒီအစား . . . ကိုယ့်ကိုယ်ကိုယ် တော်သင့်ရုံ​ပဲ ထင်ကြ​ပါ” လို့ တမန်တော် ပေါလု ပြောခဲ့တယ်။—ရော. ၁၂:၃။

^၁၀ ဒုတိယ၊ ရှေဗန​ကို ယေဟောဝါ ပြင်းပြင်းထန်ထန် ဆုံးမ​တာ​က အဖတ်ဆယ်​လို့ မရ​တဲ့​သူ​အဖြစ် မယူမှတ်​ကြောင်း ဖော်ပြတယ်။ (ပညာ. ၃:၁၁၊ ၁၂) ဒါဟာ အသင်းတော်​အခွင့်ထူး ဆုံးရှုံးသွား​သူတွေ​အတွက် သင်ခန်းစာ​ပါပဲ။ ဒေါသထွက် နာကြည်း​မယ့်အစား ဆုံးမမှု​ကို ယေဟောဝါရဲ့ မေတ္တာ အထောက်အထား​အဖြစ် ရှုမြင်​ပြီး အခြေအနေ​သစ်​မှာ အကောင်းဆုံး ဆက်​အမှုဆောင်​သွား​နိုင်ပါတယ်။ နှိမ့်ချမှု ရှိမယ်​ဆိုရင် အဖတ်ဆယ်​လို့  မရ​တဲ့​သူ​အဖြစ် ဘုရား​သခင် ယူမှတ်​မှာ မဟုတ်​ကြောင်း သတိရပါ။ (၁ ပေတရု ၅:၆၊ ၇ ကို​ဖတ်ပါ။) မေတ္တာပါ ဆုံးမမှု​က ဘုရားသခင့် ပုံသွင်း​နည်း ဖြစ်နိုင်​တဲ့အတွက် ပုံသွင်း​လို့ရတဲ့​သူ ဖြစ်နေ​ကြပါစို့။

^၁၁ တတိယ၊ ရှေဗန​ကို ယေဟောဝါ ဆက်ဆံပုံ​က မိဘ၊ ခရစ်ယာန် ကြီးကြပ်မှူး​စတဲ့ အခွင့်အာဏာ​ရှိသူ​တွေအတွက် အဖိုးတန် သင်ခန်းစာ​ပါပဲ။ ယေဟောဝါရဲ့ ဆုံးမမှု​က အပြစ်​ကို မုန်း​ကြောင်း၊ အပြစ်ကျူးလွန်​သူ​အတွက် စိုးရိမ်မကင်း​ဖြစ်ကြောင်း ဖော်ပြတယ်။ မိဘ၊ ကြီးကြပ်မှူး​အဖြစ် ဆုံးမ​ရတော့​မယ်ဆိုရင် အမှား​ကို မုန်း​ပြီး ကလေး၊ ယုံကြည်သူချင်း​ရဲ့ ကောင်းကွက်​ကို ရှာ​ခြင်းအားဖြင့် ယေဟောဝါ​ကို တုပ​မလား။—ယု. ၂၂၊ ၂၃။

၁၂-၁၄။ (က) ဘုရားသခင်ရဲ့ ဆုံးမမှု​ကို တချို့ ဘယ်လို တုံ့ပြန်ကြသလဲ။ (ခ) ညီအစ်ကို​တစ်ယောက် သဘောထား ပြောင်းလဲဖို့ ကျမ်းစာက ဘယ်လို ကူညီပေးသလဲ။ ဘာ​ရလဒ် ရခဲ့​သလဲ။

^၁၂ တချို့​က ဆုံးမ​ခံရ​ပြီးနောက် နာကျင်ခံစား​ရပြီး ဘုရား​သခင်​နဲ့ အသင်းတော်ကို စွန့်ခွာ​သွား​ကြ​တယ်။ (ဟီ. ၃:၁၂၊ ၁၃) သူတို့ကို ကူညီပေး​လို့ မရနိုင်​တော့ဘူး​လား။ နှင်ထုတ်​ခံရပြီး​နောက်ပိုင်း အသင်းတော်​ထဲ ပြန်ရောက်​လာ​ပေ​မဲ့ မ​လှုပ်​မ​ရှား ပြန်​ဖြစ်သွား​တဲ့ ဂရေ​ဟ​မ်​အကြောင်း သုံးသပ်ကြည့်ပါ။ အကြီးအကဲ​တစ်ယောက်က သူနဲ့ ရင်းနှီး​ဖို့ ကြိုးစား​တယ်။ နောက်ပိုင်း ကျမ်းစာ​သင်ပေး​ဖို့ အဲဒီ​အကြီးအကဲ​ကို ဂ​ရေ​ဟ​မ် တောင်းဆို​ခဲ့တယ်။

^၁၃ အကြီးအကဲ ဒီလိုပြောတယ်– “ဂ​ရေ​ဟ​မ်​ဟာ မာနကြီး​တယ်။ သူ့ကို နှင်ထုတ်​ခဲ့တဲ့ အကြီးအကဲ​တွေကို ပြစ်တင်ဝေဖန်​တယ်။ ဒါကြောင့် မာန​နဲ့ မာန​ရဲ့ ဆိုးကျိုး​တွေအကြောင်း ဖော်ပြထားတဲ့ ကျမ်းချက်​တွေကို ဆွေးနွေး​ခဲ့ကြတယ်။ ကျမ်းစာ​ကြေး​မုံ​ထဲမှာ သူ့ကိုယ်သူ ရှင်းရှင်းလင်းလင်း မြင်​လာပြီး မကြိုက်​တော့ဘူး။ မာန​ဆိုတဲ့ ‘သစ်သား​ချောင်း’ ခံ​နေလို့ ဘာကိုမှ မမြင်နိုင်​အောင် ဖြစ်ခဲ့​ကြောင်း၊ ပြစ်တင်ဝေဖန်​တတ်တဲ့ အားနည်းချက်​ရှိကြောင်း သိလာ​ပြီး ချက်ချင်း ပြုပြင်​ပြောင်းလဲ​ခဲ့တယ်။ အစည်းအဝေး​တွေ ပုံမှန်​ပြန်​တက်​လာတယ်။ ကျမ်းစာကို ထက်ထက်သန်သန် လေ့လာပြီး နေ့တိုင်း ဆုတောင်း​တဲ့​အကျင့် ရှိ​လာတယ်။ အိမ်ထောင်ဦးစီး​အဖြစ် ဘုရားပေးတာဝန်​တွေကိုလည်း ကျေပွန်​အောင် ထမ်းဆောင်တဲ့​အတွက် မိသားစု​အားလုံး ပျော်ရွှင်​လာကြတယ်။”—လု. ၆:၄၁၊ ၄၂။ ယာ. ၁:၂၃-၂၅။

^၁၄ အကြီးအကဲ ဆက်​ပြောတယ်– “တစ်နေ့၊ ဂ​ရေ​ဟမ်​ရဲ့ စကား​ကြောင့် ကျွန်တော် စိတ်ထိမိ​သွားတယ်။ ‘အမှန်တရား သိလာ​တာ နှစ်ပေါင်း​များစွာ​ရှိပြီ။ ရှေ့ဆောင်​တောင် လုပ်ခဲ့​သေးတယ်။ ဒါပေမဲ့ ယေဟောဝါ​ကို ချစ်​တယ်လို့ အခု​မှ​ပဲ ပြောနိုင်​တော့​တယ်’ ဆိုပြီး ဂ​ရေ​ဟ​မ် ပြောတယ်။ သိပ်​မကြာခင်မှာ​ပဲ နိုင်ငံ​တော်​ခန်းမ​မှာ မိုက်​ခ​ရို​ဖုန်း​ကိုင်​ဖို့ တာဝန်​ရတယ်။ အဲဒီ​အခွင့်ထူး​ကို သူ သိပ်တန်ဖိုးထား​တယ်။ ဆုံးမမှု​ကို လက်ခံ​ပြီး ဘုရား​သခင်​ရှေ့ နှိမ့်ချ​မယ်ဆိုရင် ကောင်းချီးတွေ ခံစားရ​မှာ​ဖြစ်ကြောင်း သူ့​ပုံသက်သေ​က သင်ပေးတယ်။”

၁၅။ ထိရောက်​စွာ ဆုံးမ​နိုင်ဖို့ ဘာ​လုပ်​ရ​မ​လဲ။

^၁၅ ဆရာ​ကောင်း​ဖြစ်ဖို့ အရင်ဆုံး တပည့်​ကောင်း ဖြစ်​ရမယ်။ (၁ တိ. ၄:၁၅၊ ၁၆) အလားတူ​ပဲ ဆုံးမ​ဖို့ ဘုရားပေး​အခွင့်အာဏာ ရရှိထားသူ​တွေလည်း ဘုရားသခင့်​လမ်းညွှန်မှု​ကို ကိုယ်တိုင် လိုလိုလားလား လက်အောက်ခံ​ရမယ်။ ဒီနည်းအားဖြင့် တခြား​သူတွေကို လေ့ကျင့် တည့်မတ်​တဲ့အခါ လွတ်လပ်​စွာ ပြောဆိုခွင့်​ရှိပြီး လေးစား​ခံရ​မယ်။ ယေရှုရဲ့ ပုံသက်သေ​ကို သုံးသပ်ကြည့်ပါ။

၁၆။ ထိရောက်တဲ့ ဆုံးမ​သွန်သင်မှု​အကြောင်း ယေရှု​ဆီကနေ ဘာသင်ယူနိုင်သလဲ။

^၁၆ ယေရှုဟာ ခက်ခဲတဲ့​အချိန်​တွေမှာ​တောင် ဖခင်​ကို အမြဲ နာခံခဲ့တယ်။ (မ. ၂၆:၃၉) မိမိရဲ့ သွန်သင်ချက်နဲ့ ဉာဏ်ပညာ​အတွက် ဖခင်​ကို အမြဲ​ဂုဏ်တင်​တယ်။  (ယော. ၅:၁၉၊ ၃၀) ယေရှုရဲ့ နှိမ့်ချမှု၊ နာခံမှု​က ထောက်ထားစာနာ၊ ယဉ်ကျေးသိမ်မွေ့​တဲ့ ဆရာ​ဖြစ်စေပြီး စိတ်​ရိုးဖြောင့်​သူတွေကို ဆွဲဆောင်​တယ်။ (မဿဲ ၁၁:၂၉ ကို​ဖတ်ပါ။) ကြင်နာမှု​ရှိတဲ့ စကား​တွေ​က နင်း​ခြေ​ခံရတဲ့ ကျူပင်​လို၊ ငြိမ်း​ခါနီး မီး​စာ​လို ဖြစ်နေ​သူတွေကို အားရှိ​စေတယ်။ (မ. ၁၂:၂၀) စိတ်ရှည်မှု စမ်းသပ်ခံရ​ချိန်မှာ​တောင် မေတ္တာနဲ့ ကြင်နာမှု တင်ပြ​ခဲ့တယ်။ အတ္တကြီး​ပြီး ရည်မှန်းချက်​ကြီး​တဲ့အတွက် တမန်တော်​တွေကို ဆုံးမ​ချိန်မှာ အဲဒီ​အချက် ထင်ရှားတယ်။—မာ. ၉:၃၃-၃၇။ လု. ၂၂:၂၄-၂၇။

၁၇။ ဘယ်အရည်အသွေးတွေ​က သိုးထိန်း​ကောင်း​ဖြစ်ဖို့ အကြီးအကဲ​တွေကို ကူညီပေး​မ​လဲ။

^၁၇ ကျမ်းစာကို အခြေခံပြီး ဆုံးမ​ဖို့ အခွင့်အာဏာ​ရထား​သူ​အားလုံး ခရစ်တော်ရဲ့ ပုံသက်သေ​ကို တုပ​သင့်တယ်။ ဒီနည်းအားဖြင့် ဘုရား​သခင်​နဲ့ သားတော်​ရဲ့ ပုံသွင်းမှု​ကို ခံယူ​လို​ကြောင်း တင်ပြ​ကြ​တယ်။ “ခင်ဗျားတို့​ဆီ ပေးအပ်​ထားတဲ့ ဘုရားသခင့် သိုးတော်စု​ကို ထိန်းကျောင်း​ကြပါ။ ကြီးကြပ်သူ​တွေအဖြစ် အမှုဆောင်​ကြပါ။ တာဝန်​အရ​လုပ်တာမျိုး မဟုတ်ဘဲ ဘုရား​သခင်​ရှေ့မှာ စိတ်ပါလက်ပါ လုပ်ဆောင်ကြ​ပါ၊ မ​သမာ​တဲ့​နည်းနဲ့ အမြတ်ထုတ်​ချင်​လို့ မဟုတ်ဘဲ စေတနာ​စိတ်နဲ့ လုပ်ဆောင်ကြ​ပါ။ ဘုရား​သခင်​ပိုင်ဆိုင်​တဲ့ လူတွေကို ပိုင်စိုးပိုင်နင်း မလုပ်ဘဲ သိုးတော်စု​ရှေ့မှာ စံနမူနာ​ပြ​ကြပါ” လို့ တမန်တော် ပေတရု ရေးခဲ့တယ်။ (၁ ပေ. ၅:၂-၄) ကြီးကြပ်မှူး​တွေဟာ ဘုရား​သခင်​နဲ့ အသင်းတော်ရဲ့ ဦးခေါင်း ခရစ်တော်​ကို ဝမ်းမြောက်​စွာ လက်အောက်ခံ​တဲ့အခါ ကိုယ်တိုင်​ကိုရော မိမိတို့ ထိန်းကျောင်း​နေ​သူတွေကို​ပါ အကျိုးပြု​တယ်။—ဟေရှာ. ၃၂:၁၊ ၂၊ ၁၇၊ ၁၈။

၁၈။ (က) မိဘတွေဆီက​နေ ယေဟောဝါ ဘာ​တောင်းဆို​သလဲ။ (ခ) မိဘ​တာဝန် ကျေပွန်​အောင် ဘုရား​သခင် ဘယ်လို ကူညီပေးသလဲ။

^၁၈ မိသားစု​မှာ​လည်း အလားတူ​ပဲ။ “သားသမီးတွေကို စိတ်ဆိုး​အောင် မလုပ်ပါနဲ့။ ယေဟောဝါ မိန့်မှာ​တဲ့​အတိုင်း သူတို့ကို ဆုံးမ​သွန်သင်​ပြီး ပြုစုပျိုးထောင်​ကြပါ” လို့ အိမ်ထောင်ဦးစီး​တွေကို မိန့်မှာ​ထားတယ်။ (ဧ. ၆:၄) ဒါ ဘယ်လောက် အရေးကြီး​သလဲ။ “မျှော်လင့်ချက်​ရှိနေတုန်း​မှာ သား​ကို ဆုံးမ​ပါ။ ကိုယ့်​ကြောင့် သူသေ​ရတာ​မျိုး မဖြစ်​ပါစေ​နဲ့” လို့ ပညာအလိမ္မာ ၁၉:၁၈ မှာ ဖော်ပြတယ်။ ခရစ်ယာန်​မိဘတွေဟာ သားသမီး​ကို လိုအပ်​သလို မဆုံးမ​ရင် ယေဟောဝါ​ရှေ့ စာရင်းရှင်း​ရမယ်။ (၁ ရှ. ၃:၁၂-၁၄) ဒါပေမဲ့ ယေဟောဝါ​ဆီ နှိမ့်ချ​စွာ ဆုတောင်း​မယ်၊ လမ်းညွှန်မှု​ရဖို့ ကျမ်းစာနဲ့ သန့်ရှင်းသော စွမ်းအားတော် အကူအညီ​ကို မျှော်ကိုး​မယ်ဆိုရင် လိုအပ်​တဲ့ ဉာဏ်​ပညာနဲ့ ခွန်အား ရ​နိုင်တယ်။—ယာကုပ် ၁:၅ ကို​ဖတ်ပါ။

၁၉၊ ၂၀။ (က) ဘုရားသခင့် ဆုံးမမှု​ကို လက်ခံ​ရင် ဘာ​ကောင်းချီးတွေ ရရှိ​သလဲ။ (ခ) နောက်​ဆောင်းပါး​မှာ ဘာအကြောင်း ဆွေးနွေးကြမလဲ။

^၁၉ ဘုရားသခင့်​ဆုံးမမှု​ကို လက်ခံခြင်း၊ ဆုံးမ​ရာမှာ ယေဟောဝါနဲ့ ယေရှုကို တုပခြင်း​က ကောင်းချီး​များစွာ ခံစားရ​စေပါလိမ့်မယ်။ မိသားစုနဲ့ အသင်းတော်​က ငြိမ်းချမ်း​တဲ့ ရိပ်မြုံ​လေး ဖြစ်လာမယ်။ လူတိုင်း မေတ္တာ၊ တန်ဖိုးထားမှု၊ လုံခြုံမှု ခံစား​ကြ​ရမယ်။ အနာဂတ်မှာ​ခံစားရမယ့် ကောင်းချီးတွေ​ရဲ့ အ​မြည်း​သဘော​ပါပဲ။ (ဆာ. ၇၂:၇) ဘုရားသခင့် ဆုံးမမှု​က ဖခင်​ယေဟောဝါရဲ့ ဦးစီးမှုအောက် ငြိမ်သက်​စည်းလုံး​တဲ့ မိသားစု​အဖြစ် အတူတကွ ထာဝစဉ် အသက်ရှင်​နိုင်အောင် သွန်သင်​ပေးတယ်။ (ဟေရှာယ ၁၁:၉ ကို​ဖတ်ပါ။) ဒါကို အမှတ်ရနေ​မယ်ဆိုရင် ဘုရားသခင့် မေတ္တာ​ဖော်ပြနည်း​ဖြစ်တဲ့ ဆုံးမမှု​ကို ပို​တန်ဖိုးထား​တတ်လာ​ပါလိမ့်မယ်။

^၂၀ မိသားစုနဲ့ အသင်းတော်​အတွင်း ဆုံးမမှု​အကြောင်း နောက်​ဆောင်းပါး​မှာ ထပ်​လေ့လာ​ကြပါ​မယ်။ ကိုယ့်ကိုယ်ကိုယ် ဆုံးမခြင်း​အကြောင်း၊ ဆုံးမမှု​ကြောင့် ခံရတဲ့ နာကျင်မှု​ထက် ပိုဆိုး​တဲ့​အရာ​အကြောင်း​လည်း ဆွေးနွေး​ကြပါ​မယ်။