ရောမ​ဘုရင်ခံ ပုန္တိပိလတ်​ကို ဝင်​တွေ့​ဖို့ သတ္တိ ဘယ်လို​ရခဲ့​မှန်း အ​ရိ​မ​သဲ​မြို့သား ယောသပ် မ​သိလိုက်​ဘူး။ ပုန္တိပိလတ်​ဟာ အတော်​ ခေါင်းမာ​သူ ဖြစ်တယ်။ ယေရှုကို သိက္ခာ​ရှိရှိ သင်္ဂြိုဟ်​ပေးဖို့ တစ်ယောက်ယောက်​က ယေရှုရဲ့​အလောင်း​ကို ပိလတ်​ဆီ ဝင်​တောင်း​ရမယ်။ မျက်နှာချင်းဆိုင် တွေ့ဆုံမှု​က ယောသပ်​အတွက် ထင်​သလောက်​တော့ မခက်​ခဲ့​ပါဘူး။ ယေရှု သေ​ပြီ​ဆိုတာ အတည်ပြု​ပြီးနောက် တောင်းဆိုချက်​ကို ပိလတ် လိုက်လျော​ပေး​လိုက်တယ်။ ယောသပ် ဝမ်းနည်း​နေ​ပေ​မဲ့ ကွပ်မျက်​တဲ့​နေရာ​ကို အမြန်​သွားတယ်။ —မာ. ၁၅:၄၂-၄၅။

• အ​ရိ​မ​သဲ​မြို့သား ယောသပ်​က ဘယ်သူ​လဲ။

• ယေရှုနဲ့ ဘယ်လို ပတ်သက်​သလဲ။

• သူ့​အကြောင်း ဘာကြောင့် စိတ်ဝင်စား​သင့်သလဲ။

မာကု​ခရစ်ဝင်ကျမ်း​မှာ ယောသပ်​ကို “ဂုဏ်အသရေ​ရှိသူ ကောင်စီ​အဖွဲ့ဝင်” လို့ ခေါ်​ထားတယ်။ ကောင်စီ​ဆိုတာ ဂျူး​တရားရုံးချုပ်​ကို ဆိုလိုတယ်။ (မာ. ၁၅:၁၊ ၄၃) ဒါကြောင့် ယောသပ်​ဟာ ဂျူး​လူမျိုးရဲ့ ခေါင်းဆောင်​တစ်ယောက် ဖြစ်တယ်။ ဒါကြောင့်​လည်း ရောမ​ဘုရင်ခံ​ကို ဝင်​တွေ့ခွင့် ရ​တာပေါ့။ ချမ်းသာ​ကြွယ်ဝသူ​လည်း ဖြစ်တယ်။—မ. ၂၇:၅၇။

အုပ်စု​လိုက်​အနေနဲ့ ဂျူး​တရားရုံးချုပ်​က ယေရှုကို ရန်လို​မုန်း​ထားတယ်။ အဖွဲ့ဝင်​တွေ​က ယေရှုကို သတ်ဖို့ ကြံစည်​ကြ​တ​ယ်။ ယောသပ်​က​တော့ “လူကောင်း၊ ဖြောင့်မတ်​တဲ့​သူ” ဖြစ်တယ်။ (လု. ၂၃:၅၀) ဂျူး​တရားရုံးချုပ် အဖွဲ့ဝင်​အများစု​နဲ့ မတူဘဲ ယောသပ်​ဟာ ရိုးသား​တယ်၊ ကိုယ်ကျင့်တရား ကောင်းတယ်၊ ဘုရားသခင့် ပညတ်​တွေကို အတတ်နိုင်ဆုံး နာခံ​တ​ယ်။ “ဘုရားသခင့် နိုင်ငံတော်ကို စောင့်မျှော်​နေ​သူ” လည်း ဖြစ်တယ်။ ဒါကြောင့်​လည်း ယေရှုရဲ့ တပည့် ဖြစ်လာ​တာပေါ့။ (မာ. ၁၅:၄၃။ မ. ၂၇:၅၇) အမှန်တရား​နဲ့ တရားမျှတမှု​ကို နှစ်သက်​တဲ့​အတွက် ယေရှုရဲ့ သတင်းစကား​ကို ကြိုက်နှစ်သက်​ခဲ့တယ်။

ယောဟန် ၁၉:၃၈ မှာ ယောသပ်​ဟာ “ဂျူးတွေကို ကြောက်​လို့ ယေရှုရဲ့​တပည့်​ဖြစ်မှန်း လူ​သိ​မခံ​ရဲ​တဲ့​သူပဲ” လို့ ပြောထားတယ်။ ယောသပ် ဘာကို ကြောက်​တာလဲ။ ယေရှုကို ဂျူးတွေ အထင်သေး​မှန်း၊ ယေရှုကို ယုံကြည်​တယ်လို့ ပြောတဲ့​သူ​တိုင်း​ကို တရားဇရပ်​က​နေ နှင်ထုတ်ဖို့ ဆုံးဖြတ်​ထားကြ​မှန်း ယောသပ် သိတယ်။ (ယော. ၇:၄၅-၄၉။ ၉:၂၂) တရားဇရပ်​က​နေ နှင်ထုတ်​ခံရ​ရင် လှောင်ပြောင်​ခံရ​မယ်၊ အ​ကြ​ဉ်​ခံရ​မယ်၊ ပစ်ပယ်​ခံရ​မယ်။ ဒါကြောင့် ယေရှုကို ယုံကြည်​တယ်လို့ ယောသပ် အတိအလင်း ဝန်မခံ​ရဲ​တာပေါ့။ ဝန်ခံ​လိုက်ရင် ရာထူး​ပြုတ်​ပြီး သိက္ခာ​ကျ​သွားနိုင်တယ်။

ယောသပ်​တစ်ယောက်တည်း မဟုတ်ပါဘူး။ ယောဟန် ၁၂:၄၂ အရ “မင်းအရာရှိ အတော်များများ ယုံကြည်သက်ဝင်​လာ​ပေ​မဲ့ ဖာရိရှဲ​တွေကို ကြောက်​လို့ ယေရှုကို အသိအမှတ် မပြု​ကြဘူး။ တရားဇရပ်​ကနေ နှင်ထုတ်​ခံရ​မှာ​ကို စိုးရိမ်​ကြ​တ​ယ်။” ယောသပ်​လို နောက်​တစ်ယောက်က​တော့ နိ​ကော​ဒင်​ပါ။ သူ​လည်း ဂျူး​တရားရုံးချုပ် အဖွဲ့ဝင်​ပဲ။—ယော. ၃:၁-၁၀။ ၇:၅၀-၅၂။

ယောသပ်​က​တော့ တပည့် ဖြစ်ပေမဲ့ ပွင့်ပွင့်လင်းလင်း မ​ပြော​ရဲဘူး။ အဲဒါ တကယ့်​ပြဿနာ​ပဲ။ “လူတွေ​ရှေ့မှာ ကျွန်တော့်ကို အသိအမှတ်ပြု​သူ​တိုင်း​ကို ကောင်းကင်​အဖ​ရှေ့မှာ ကျွန်တော် အသိအမှတ်ပြု​မယ်။ လူတွေ​ရှေ့မှာ ကျွန်တော့်ကို ငြင်းပယ်​သူ​ကိုတော့ ကောင်းကင်​အဖ​ရှေ့မှာ ငြင်းပယ်​မယ်” လို့ ယေရှု ပြောခဲ့တယ်။ (မ. ၁၀:၃၂၊ ၃၃) ယောသပ်​က ယေရှုကို ငြင်းပယ်​တာ မဟုတ်​ပေ​မဲ့ ဝန်ခံ​ဖို့​လည်း သတ္တိ​မရှိ​ပြန်​ဘူး။ သင်ကော။

ယောသပ်​ရဲ့ ကောင်းကွက်​က​တော့ ယေရှုကို သတ်ဖို့ ဂျူး​တရားရုံးချုပ် ကြံစည်မှု​ကို မထောက်ခံ​ခဲ့တာ​ပဲ။  (လု. ၂၃:၅၁) တချို့​အဆို​အရ ယေရှုကို စစ်​မေး​ချိန်မှာ ယောသပ် မ​ရှိတာ ဖြစ်နိုင်တယ်။ ဘာ​ပဲ​ဖြစ်ဖြစ် ဒီလောက်​ဆိုးရွား​တဲ့​မတရားမှုကို ယောသပ် အတော်​ရွံမုန်း​ခဲ့မှာပဲ။ ဒါပေမဲ့ ဘာမှ မ​တတ်နိုင်​ခဲ့ဘူး။

ယေရှု သေဆုံး​ချိန်မှာ ယောသပ်​ဟာ ကြောက်စိတ်ကို အနိုင်ယူ​ပြီး ယေရှုရဲ့ နောက်လိုက်​တွေကို ကူညီပေးဖို့ ဆုံးဖြတ်​ခဲ့တယ်။ “ပိလတ်မင်း​ကို အရဲစွန့် ဝင်​တွေ့​ပြီး ယေရှု​အလောင်း​ကို တောင်း​တ​ယ်” ဆိုတဲ့ မာကု ၁၅:၄၃ ပါ​စကားက အဲဒီ​ဆုံးဖြတ်ချက်​ကို ဖော်ပြတယ်။

ယေရှု သေဆုံး​ချိန်မှာ ယောသပ် ရှိနေ​ပုံ​ရတယ်။ ယေရှု သေဆုံး​ပြီ​ဖြစ်ကြောင်း ပိလတ်မင်း​ထက် အရင်​သိ​နေတယ်။ ဒါကြောင့် ရုပ်အလောင်း​ကို ယောသပ် ဝင်​တောင်း​တဲ့အခါ ပိလတ်​က “ယေရှု သေ​မသေ သိချင်” ခဲ့တယ်။ (မာ. ၁၅:၄၄) သစ်တိုင်​ပေါ် ယေရှု ဝေဒနာ​ခံ​ရတာ​ကို ယောသပ် မြင်ခဲ့​လို့ မိမိ​သိစိတ်​ကို ဆန်းစစ်​ဖို့၊ အမှန်တရား​ဘက် ရပ်တည်​ဖို့ ဆုံးဖြတ်​ခဲ့​တာလား။ ဖြစ်နိုင်​ပါတယ်။ ဘာ​ပဲ​ဖြစ်ဖြစ် ယောသပ် လက်တွေ့​လုပ်ပြ​လိုက်ပါ​ပြီ။ လူ​မသိ​သူ​မသိ တပည့် မဟုတ်​တော့ဘူး။

ဂျူး​ပညတ်​အရ သေဒဏ်​ခံရသူတွေ​ကို နေ​မဝင်​ခင် သင်္ဂြိုဟ်​ရမယ်။ (တရား. ၂၁:၂၂၊ ၂၃) ဒါပေမဲ့ ရောမတွေ​ကြောင့် ကွပ်မျက်​ခံရတဲ့ ရာဇဝတ်သား​တွေရဲ့ ရုပ်အလောင်း​ကို သစ်တိုင်​ပေါ်မှာ ပုပ်​တဲ့​အထိ ထားကြ​တယ်။ ဒါမှမဟုတ် သင်္ချိုင်း​မှာ ပစ်ထား​ကြ​တ​ယ်။ ယေရှု​ကိုတော့ ယောသပ် အဲဒီလို မ​ဖြစ်စေ​ချင်ဘူး။ ကွပ်မျက်​တဲ့​နေရာ​နား​မှာ ယောသပ်​ရဲ့ ကျောက်ထွင်း​ဂူ​အသစ်  ရှိတယ်။ ဂူ​ကို မ​သုံး​ရ​သေး​လို့ အ​ရိ​မ​သဲ​မြို့ကနေ * ဂျေရုဆလင်​ကို ယောသပ် ပြောင်းလာ​ခါ​စ​ဖြစ်ကြောင်း၊ ဒီ​ဂူ​ကို မိသားစု​သင်္ချိုင်း​အဖြစ် ရည်ရွယ်​ထားကြောင်း ဖော်ပြတယ်။ (လု. ၂၃:၅၃။ ယော. ၁၉:၄၁) ကိုယ့်​ဂူ​ထဲမှာ ယေရှုကို သင်္ဂြိုဟ်ခြင်း​က ယောသပ် ရက်ရော​ကြောင်း ဖော်ပြတယ်။ မေရှိယ​ဟာ “သူဌေး​တွေနဲ့” သင်္ဂြိုဟ်​ခံရ​မယ်ဆို​တဲ့ ပရောဖက်ပြုချက်​ကို ပြည့်စုံ​စေတယ်။—ဟေရှာ. ၅၃:၅၊ ၈၊ ၉။

ယောသပ်​က ယေရှုရဲ့​ရုပ်အလောင်း​ကို သစ်တိုင်​ပေါ်ကနေ ချ​ပြီးနောက် သန့်ရှင်း​တဲ့ ပိတ်ချော​နဲ့ ပတ်ရစ်၊ မိမိရဲ့ သင်္ချိုင်းဂူ​အသစ်​ထဲ ထည့်​တယ်လို့ ခရစ်ဝင်ကျမ်း လေး​ကျမ်း​စလုံး​မှာ ဖော်ပြထားတယ်။ (မ. ၂၇:၅၉-၆၁။ မာ. ၁၅:၄၆၊ ၄၇။ လု. ၂၃:၅၃၊ ၅၅။ ယော. ၁၉:၃၈-၄၀) ယောသပ်​ကို ကူညီ​ပေး​ခဲ့တယ်​လို့ ဖော်ပြ​ခံရသူ​တစ်ယောက်က​တော့ နိ​ကော​ဒင်​ပါပဲ။ နံ့သာပေါင်း​တွေကို ယူလာ​တ​ယ်။ လူကြီး​လူကောင်း​တွေ ဆိုတော့ ရုပ်အလောင်း​ကို နှစ်ယောက်​တည်း ရွှေ့​ခဲ့တာတော့ မဖြစ်နိုင်ဘူး။ သယ်​ဖို့၊ မြှုပ်​ဖို့ အစေခံ​တွေကို ခိုင်းစေ​ခဲ့မှာပဲ။ ဘာ​ပဲ​ဖြစ်ဖြစ် ဒီ​လူ​နှစ်ယောက်​ရဲ့ လုပ်ရပ်​ဟာ သေးသေး​သော​သော​တော့ မဟုတ်ဘူး။ လူသေ​ကို ကိုင်​မိ​သူဟာ ခုနစ်​ရက် ညစ်ညူး​သွားပြီး ထိ​သမျှ​လည်း မသန့်ရှင်း​တော့ဘူး။ (တော. ၁၉:၁၁။ ဟဂ္ဂဲ ၂:၁၃) ဒါကြောင့် ပသခါပွဲ​အပတ်​မှာ လူတွေနဲ့ သီးခြား​နေရ​မှာဖြစ်​ပြီး ပွဲတော်​မှာ ပါဝင်​လိုက်​ရမှာ မဟုတ်ဘူး။ (တော. ၉:၆) ယေရှုကို သင်္ဂြိုဟ်​ဖို့ စီစဉ်​ခြင်းအားဖြင့် အဖွဲ့ဝင်​တွေရဲ့ ကဲ့ရဲ့လှောင်ပြောင်​မှုကို​လည်း ယောသပ် ခံရ​နိုင်တယ်။ ဒီ​တစ်ကြိမ်​မှာတော့ ယေရှုကို သိက္ခာ​ရှိရှိ သင်္ဂြိုဟ်​ပေး​လို့၊ ခရစ်တော်ရဲ့ တပည့်​ဖြစ်ကြောင်း ပွင့်ပွင့်လင်းလင်း ဖော်ပြ​လို့ ရလာ​တဲ့​အကျိုးဆက်​တွေကို ခံယူ​ဖို့ အသင့်​ဖြစ်နေ​ပြီ။

ယေရှုကို သင်္ဂြိုဟ်​တဲ့​အကြောင်း ခရစ်ဝင်ကျမ်း မှတ်တမ်း​ကလွဲလို့ ကျမ်းစာမှာ အ​ရိ​မ​သဲ​မြို့သား ယောသပ်​အကြောင်း မ​တွေ့ရ​တော့ဘူး။ ဒါကြောင့် သူ ဘာဖြစ်​သွား​သလဲ​ဆိုတဲ့ မေးခွန်း ပေါ်လာတယ်။ အဖြေ​က​တော့ ကျွန်တော်တို့ မ​သိ​ရဘူး။ ဒါပေမဲ့ အထက်​မှာ ဆွေးနွေး​ခဲ့တာ​တွေ​အရ မိမိ​ကိုယ်​မိမိ ခရစ်ယာန်​အဖြစ် ပွင့်ပွင့်လင်းလင်း ဖွင့်ဟ​ကြေညာ​လိုက်​ပုံ​ရတယ်။ စမ်းသပ်​ခံရ​တဲ့အခါ ယောသပ်​ရဲ့ ယုံကြည်ခြင်း​နဲ့ သတ္တိ လျော့ပါး​မသွား​ဘဲ ပိုတိုးများလာတယ်။ အဲဒါ ကောင်းတဲ့​လက္ခဏာ​ပဲ။

ဒီ​အဖြစ်​က ရာထူး၊ အလုပ်အကိုင်၊ ချမ်းသာ​ကြွယ်ဝမှု၊ မိသားစု​သံယောဇဉ်၊ လွတ်လပ်မှု တစ်ခုခုကို ကျွန်တော်တို့​နဲ့ ယေဟောဝါရဲ့ ဆက်ဆံရေး​ထက် ပို​ဦးစားပေး​နေ​သလား​ဆိုတဲ့ စဉ်းစားစရာ မေးခွန်း ပေါ်လာ​စေတယ်။