၁။ ကျွန်တော်တို့ကို ယေဟောဝါ ဘယ်​မျှော်လင့်ချက် ပေးထားသလဲ။

 သိပ်ကောင်းတဲ့ ထာဝရ​အသက် မျှော်လင့်ချက် ယေဟောဝါ ပေးထားတယ်။ တချို့က ကောင်းကင်မှာ မသေနိုင်တဲ့ နာမ်ဝိညာဉ် ပုဂ္ဂိုလ်တွေ​အဖြစ် ထာဝစဉ် အသက်ရှင်ဖို့၊ အများစုကတော့ မြေကြီးပေါ်မှာ ဒေါင်ဒေါင်မြည် ကျန်းမာရေး​နဲ့ ပျော်ပျော်ရွှင်ရွှင် ထာဝစဉ် အသက်ရှင်ဖို့ မျှော်လင့်​နေ​ကြတယ်။ (၁ ကော. ၁၅:၅၀၊ ၅၃။ ဗျာ. ၂၁:၃၊ ၄) ကောင်းကင်မှာ ဖြစ်ဖြစ်၊ မြေကြီး​မှာ ဖြစ်ဖြစ် ကျွန်တော်တို့အတွက် ထာဝရ​အသက် မျှော်လင့်ချက်​ဟာ တကယ့်ကို အဖိုးတန်​တဲ့ မျှော်လင့်ချက်ပါပဲ။

၂။ ကျွန်တော်တို့ရဲ့ မျှော်လင့်ချက်က ဘယ်​အပေါ် အခြေခံသလဲ။ ဘာကြောင့် အဲဒီလို ပြော​နိုင်သလဲ။

^၂ ကျမ်းစာမှာ သုံးထားတဲ့ “မျှော်လင့်ချက်” ဆိုတဲ့ စကားလုံးကို “ကောင်းတာတွေ ဖြစ်​လာတော့​မယ့် မျှော်လင့်ချက်” လို့ အဓိပ္ပာယ် ဖွင့်နိုင်တယ်။ ယေဟောဝါဆီက လာတာ ဖြစ်လို့ ကျွန်တော်တို့ရဲ့ အနာဂတ် မျှော်လင့်ချက် သိပ်သေချာတယ်။ (ရော. ၁၅:၁၃) ဘုရား ဘာတွေ ကတိ​ပေးထားကြောင်း၊ အဲဒီကတိတွေကို အမြဲ ပြည့်စုံစေကြောင်း ကျွန်တော်တို့ သိကြတယ်။ (တော. ၂၃:၁၉) ကတိ မှန်သမျှကို ဖြည့်ဆည်း​ပေးချင်​တဲ့ ဆန္ဒ​နဲ့ တန်ခိုး ယေဟောဝါ​မှာ ရှိကြောင်း​လည်း သိကြတယ်။ ဒါကြောင့် ကျွန်တော်တို့ရဲ့ မျှော်လင့်ချက်​ဟာ စိတ်ကူးယဉ်​သက်​သက် မဟုတ်ဘူး။ အထောက်အထား​တွေ​နဲ့ အရှိတရားပေါ် အခြေခံ​တယ်။

၃။ ဒီဆောင်းပါးမှာ ဘာအကြောင်း ဆွေးနွေးကြမလဲ။ (ဆာလံ ၂၇:၁၄)

^၃ ကျွန်တော်တို့ကို ကောင်းကင်ဘုံစံ အဖ​ဘုရား ချစ်တယ်။ မိမိကို ယုံကြည်​ကိုးစားစေချင်တယ်။ (ဆာလံ ၂၇:၁၄ ကို ဖတ်ပါ။) ယေဟောဝါကို အခိုင်အမာ မျှော်လင့်​မယ်​ဆိုရင် အခက်အခဲတွေကို ခံရပ်နိုင်မယ်။ အနာဂတ်​ကို ပျော်ရွှင်စွာ သတ္တိရှိရှိ ရင်ဆိုင်နိုင်မယ်။ မျှော်လင့်ချက်က ဘယ်လို ကာကွယ်ပေးကြောင်း သုံးသပ်ကြစို့။ အရင်ဆုံး၊ မျှော်လင့်ချက်​ဟာ ကျောက်ဆူး၊ သံခမောက်​နဲ့ ဘယ်လို တူကြောင်း ဆွေးနွေးပါမယ်။ မျှော်လင့်ချက်ကို ဘယ်လို ခိုင်မာ​စေနိုင်​ကြောင်း​လည်း ဆွေးနွေးကြပါမယ်။

၄။ မျှော်လင့်ချက်က ကျောက်ဆူး​နဲ့ ဘယ်လို တူသလဲ။ (ဟီဘရူး ၆:၁၉)

^၄ ဟီဘရူး ခရစ်ယာန်တွေ​ဆီ တမန်တော် ပေါလု ရေးတဲ့ စာမှာ မျှော်လင့်ချက်ကို ကျောက်ဆူး​နဲ့ ခိုင်းနှိုင်း​တယ်။ (ဟီဘရူး ၆:၁၉ ကို ဖတ်ပါ။) ပေါလု​ဟာ ပင်လယ်​ခရီး သွားလေ့ ရှိသူ ဖြစ်လို့ သင်္ဘော မျောပါ မသွားအောင် ကျောက်ဆူး ချကြတာ သိတယ်။ တစ်ကြိမ်မှာ မုန်တိုင်း မိတယ်။ မုန်တိုင်း​အတွင်း ကျောက်ဆောင်​တွေ​နဲ့ မတိုက်မိအောင် သင်္ဘော​ကို ကာကွယ်ဖို့ သင်္ဘောသားတွေ ကျောက်ဆူး ချကြတာ ပေါလု မြင်တယ်။ (တ. ၂၇:၂၉၊ ၃၉-၄၁) ကျောက်ဆူး​က သင်္ဘော​ကို တည်ငြိမ်စေသလို မျှော်လင့်ချက်က ကျွန်တော်တို့ ဒုက္ခရောက်ချိန်မှာ တည်ငြိမ်စေပြီး ယေဟောဝါနဲ့ တရွေ့ရွေ့ ဝေးမသွားအောင် ကာကွယ်ပေးတယ်။ ခိုင်မာတဲ့ မျှော်လင့်ချက်က မုန်တိုင်း​ပြီးရင် လေပြေ လာမယ်​ဆိုတာ စိတ်ချစေလို့ အခက်အခဲတွေကို တည်တည်ငြိမ်ငြိမ် ရင်ဆိုင်နိုင်ဖို့ ကူညီပေးတယ်။ ကျွန်တော်တို့ ညှဉ်းဆဲ​ခံရမယ်လို့ ယေရှု သတိပေးခဲ့တာ မမေ့ပါနဲ့။ (ယော. ၁၅:၂၀) ဒါကြောင့် ယေဟောဝါ ကတိပေးထားတဲ့ အနာဂတ်အကြောင်း တွေးတောဆင်ခြင်တာက ခရစ်ယာန် လမ်းစဉ်​မှာ စွဲမြဲ​နေဖို့ ကူညီပေးတယ်။

၅။ သေခြင်းနဲ့ ရင်ဆိုင်​ရချိန်မှာ မျှော်လင့်ချက်က ယေရှုကို ဘယ်လို ခွန်အား ရှိစေသလဲ။

^၅ ဝေဒနာ ခံစားပြီး သေရတော့မယ်ဆိုတာ သိတာ​တောင် ဆက်သစ္စာရှိနေဖို့ ယေရှုကို မျှော်လင့်ချက်က ဘယ်လို ကူညီပေးကြောင်း စဉ်းစားကြည့်ပါ။ ယေရှု ဘယ်လောက် စိတ်​တည်ငြိမ်​နေတယ်ဆိုတာ ပြောဖို့ အေဒီ ၃၃၊ ပင်တေကုတ္တေပွဲ​နေ့မှာ ဆာလံ​ကျမ်း ပရောဖက်ပြုချက်​တစ်ခုကို တမန်တော် ပေတရု ဒီလို​ကိုးကား​တယ်– “မျှော်လင့်ချက်​နဲ့ အသက်ရှင်​မယ်။ ကိုယ်တော်​က ကျွန်တော့်ကို သင်္ချိုင်း​မှာ ပစ်ထား​မှာ မဟုတ်ဘူး။ သစ္စာစောင့်သိ​သူကို ပုပ်ပျက်​သွားတဲ့​အဖြစ်မျိုး တွေ့ကြုံ​ခွင့်ပြုမှာ မဟုတ်ဘူး။ . . . ကျွန်တော့်ကို ရှေ့တော်မှာ နေခွင့်ပြုပြီး ဝမ်းမြောက်​စေတယ်။” (တ. ၂:၂၅-၂၈။ ဆာ. ၁၆:၈-၁၁) သေရတော့မယ်ဆိုတာ သိပေမဲ့ ဘုရား ထမြောက်​ပေးမယ်၊ ကောင်းကင်မှာ ဘုရားနဲ့ ပြန်ဆုံဆည်းခွင့် ရမယ်ဆိုတဲ့ ခိုင်မာတဲ့ မျှော်လင့်ချက် ယေရှုမှာ ရှိတယ်။—ဟီ. ၁၂:၂၊ ၃။

၆။ မျှော်လင့်ချက်​အကြောင်း ညီအစ်ကို​တစ်ယောက် ဘာပြောသလဲ။

^၆ ခရစ်ယာန် မျှော်လင့်ချက်က ညီအစ်ကို/မများစွာ​ကို ခံနိုင်ရည် ရှိစေတယ်။ အင်္ဂလန်​နိုင်ငံ​က သစ္စာရှိ ညီအစ်ကို လဲနာ့ဒ် ချင်း အကြောင်း စဉ်းစားကြည့်ပါ။ ပထမ ကမ္ဘာစစ်အတွင်း စစ်မှုမထမ်းလို့ ထောင်ချခံရတယ်။ နှစ်လ တိုက်ပိတ် ခံရ​ပြီးနောက် အလုပ်ကြမ်း လုပ်ရတယ်။ “ခံနိုင်ရည် ရှိစေတဲ့ မျှော်လင့်ချက် ရှိဖို့ ဘယ်လောက် အရေးကြီး​မှန်း ကျွန်တော့်​အဖြစ်​က နားလည်စေတယ်။ ယေရှု၊ တမန်တော်တွေ၊ ပရောဖက်တွေ​ရဲ့ ပုံသက်သေတွေ ကျွန်တော်တို့ သိထားတယ်။ ကျမ်းစာမှာ ပါတဲ့ အဖိုးတန် ကတိတွေ​လည်း ရထားတယ်။ အဲဒါတွေ​အားလုံးက အနာဂတ် မျှော်လင့်ချက်​နဲ့ ခံနိုင်ရည်​ခွန်အား ရှိစေတယ်” လို့ ပြောတယ်။ လဲနာ့ဒ်​အတွက် မျှော်လင့်ချက်​ဟာ ကျောက်ဆူးလို ဖြစ်ခဲ့​သ​လို ကျွန်တော်တို့အတွက်​လည်း ဖြစ်နိုင်ပါတယ်။

၇။ အခက်အခဲတွေ​က မျှော်လင့်ချက်ကို ဘယ်လို ပိုခိုင်မာစေသလဲ။ (ရောမ ၅:၃-၅။ ယာကုပ် ၁:၁၂)

^၇ အခက်အခဲတွေ ကြုံရတဲ့အခါ ယေဟောဝါရဲ့ အကူအညီနဲ့ ခံရပ်နိုင်​လို့ ဘုရား​မျက်နှာသာ ရ​နေမှန်း သိလာတယ်။ အဲဒါက မျှော်လင့်ချက် ပိုခိုင်မာစေတယ်။ (ရောမ ၅:၃-၅။ ယာကုပ် ၁:၁၂ ကို ဖတ်ပါ။) ဒီလိုနဲ့ သတင်းကောင်း ဦးဆုံး​လက်ခံချိန်ကထက် မျှော်လင့်ချက် ပိုခိုင်မာလာတယ်။ အခက်အခဲတွေ​ကြား ခေါင်း​မ​ထောင်​နိုင်အောင် စာတန် ဖြစ်စေချင်ပေမဲ့ ယေဟောဝါရဲ့ အကူအညီနဲ့ ကျွန်တော်တို့ အောင်မြင်စွာ ခံရပ်နိုင်ပါတယ်။

၈။ မျှော်လင့်ချက်က သံခမောက်​နဲ့ ဘယ်လို တူသလဲ။ (၁ သက်သာလောနိတ် ၅:၈)

^၈ ကျမ်းစာမှာ မျှော်လင့်ချက်ကို သံခမောက်​နဲ့ ခိုင်းနှိုင်းထားတယ်။ (၁ သက်သာလောနိတ် ၅:၈ ကို ဖတ်ပါ။) ရန်သူ့​လက်ချက်ကြောင့် ခေါင်း​မထိအောင် ကာကွယ်ဖို့  စစ်သားတွေ သံခမောက် ဆောင်းကြတယ်။ စာတန်နဲ့ တိုက်တဲ့ တိုက်ပွဲ​မှာ​လည်း ကျွန်တော်တို့ရဲ့ ဉာဏ်စွမ်း​ကို ကာကွယ်​ရမယ်။ အတွေးအခေါ်ကို ပျက်စီး​စေနိုင်​တဲ့ သွေးဆောင်မှု၊ အယူအဆ အမျိုးမျိုး စာတန် သုံး​နေ​တယ်။ သံခမောက်​က စစ်သားရဲ့ ခေါင်းကို ကာကွယ်ပေးသလို မျှော်လင့်ချက်က ယေဟောဝါကို ဆက်သစ္စာရှိနိုင်ဖို့ ကျွန်တော်တို့ရဲ့ အတွေးအခေါ်ကို ကာကွယ်ပေးတယ်။

၉။ လူတွေ မျှော်လင့်ချက် မရှိလို့ ဘာဖြစ်​နေ​ကြသလဲ။

^၉ ထာဝရ​အသက် မျှော်လင့်ချက်က ဉာဏ်ပညာ၊ ပိုင်းခြား​သိမြင်မှု ရှိရှိ လုပ်ဆောင်ဖို့ ကူညီပေးပါလိမ့်မယ်။ ဒါပေမဲ့ မျှော်လင့်ချက် မခိုင်မာဘူး၊ ကိုယ့်​အလိုဆန္ဒတွေကို​ပဲ စိတ်ထဲ စဉ်းစား​လာပြီ​ဆိုရင် ထာဝရ​အသက် ပန်းတိုင်ကို မျက်ခြည်ပြတ်​သွားနိုင်တယ်။ ကောရိန္သု​မြို့က ရှေးခရစ်ယာန်​တချို့​အကြောင်း စဉ်းစားကြည့်ပါ။ ဘုရားသခင် ပေးထားတဲ့ အဓိက ကတိ​တစ်ခု ဖြစ်တဲ့ ရှင်ပြန်ထမြောက်ခြင်း မျှော်လင့်ချက်ကို မယုံကြတော့ဘူး။ (၁ ကော. ၁၅:၁၂) ရှင်ပြန်ထမြောက်ခြင်း မျှော်လင့်ချက် မရှိသူတွေဟာ လက်ရှိ​အတွက်ပဲ အသက်ရှင်ကြတယ်လို့ ပေါလု ပြောတယ်။ (၁ ကော. ၁၅:၃၂) ဒီနေ့လည်း ဘုရား​ကတိတွေကို မ​မျှော်လင့်​သူ​များစွာ​ဟာ လောလောဆယ် ပျော်ပျော်​နေ​ရဖို့​လောက်​ပဲ စိတ်​ဝင်စား​ကြတယ်။ ကျွန်တော်တို့ကတော့ ဘုရား​ကတိပေးထားတဲ့ အနာဂတ်​ကို ယုံကြည်တယ်။ အဲဒီ​မျှော်လင့်ချက်​ဟာ သံခမောက်​လို​ပဲ အတွေးအခေါ် ကို ကာကွယ်ပေးတယ်။ ကိုယ့်​အတွက်ပဲ စဉ်းစားပြီး ယေဟောဝါနဲ့ ဆက်ဆံရေး ပျက်စေမယ့် ဘဝ​ပုံစံကို ရှောင်ဖို့ ကူညီပေးတယ်။—၁ ကော. ၁၅:၃၃၊ ၃၄။

၁၀။ မျှော်လင့်ချက်က မှားယွင်းတဲ့ အတွေးအခေါ် မဝင်အောင် ဘယ်လို ကာကွယ်​ပေးနိုင်သလဲ။

^၁၀ ယေဟောဝါရဲ့ နှစ်သက်မှု ရဖို့ ကြိုးစား​နေလို့လည်း ဘာမှ မထူးပါဘူးဆိုတဲ့ အတွေးအခေါ် ဝင်မလာအောင်လည်း မျှော်လင့်ချက်က ကာကွယ်ပေးတယ်။ ဥပမာ၊ ‘ထာဝစဉ် အသက်ရှင်​ရမယ့်​သူ​တွေ​ထဲ ငါ ဘယ်တော့မှ ပါ​မှာ မဟုတ်ဘူး။ အဲဒီလောက် ငါ မလိမ္မာဘူး။ ဘုရား​စံနှုန်းတွေကို ဘယ်တော့မှ ပြည့်မီမှာ မဟုတ်ဘူး’ လို့ တချို့ စဉ်းစားမိနိုင်တယ်။ ယောဘရဲ့ မိတ်ဆွေ အတုအယောင် ဧလိဖတ် အလားတူ ပြောခဲ့တာ သတိပြု​ပါ။ “သေမျိုး​ဖြစ်တဲ့​လူဟာ ဘယ်လို​လုပ် စင်ကြယ်နိုင်မှာလဲ။” “ကြည့်လေ။ ဘုရားက သန့်ရှင်းသူတွေကိုတောင် မယုံဘူး။ မိုးကောင်းကင်​တောင် ရှေ့တော်မှာ မစင်ကြယ်ဘူး” လို့ ဧလိဖတ် ပြောတယ်။ (ယောဘ ၁၅:၁၄၊ ၁၅) တကယ့် လိမ်လည်မှုကြီးပါပဲ။ အဲဒီလို အတွေးအခေါ်ရဲ့ နောက်ကွယ်​မှာ စာတန် ရှိနေတာ သတိရပါ။ သင် အဲဒီလို တွေးလာရင် မျှော်လင့်ချက် မှေးမှိန်​လာမယ်​ဆိုတာ စာတန် သိတယ်။ ဒါကြောင့် အဲဒီလို အလိမ်အညာတွေကို ငြင်းပယ်ပါ။ ယေဟောဝါရဲ့ ကတိတွေကို အာရုံစိုက်ပါ။ သင့်ကို ဘုရား ထာဝစဉ် အသက်ရှင်စေချင်ကြောင်း၊ အဲဒီလို ထာဝစဉ် အသက်ရှင်နိုင်ဖို့ ကူညီပေးမှာ ဖြစ်ကြောင်း ဘယ်တော့မှ သံသယ မဝင်ပါနဲ့။—၁ တိ. ၂:၃၊ ၄။

၁၁။ မျှော်လင့်ချက် ပြည့်စုံမယ့် အချိန်ကို စောင့်ဆိုင်းရင်း စိတ်ရှည်ဖို့ ဘာကြောင့် လိုသလဲ။

^၁၁ မျှော်လင့်ချက် ခိုင်မာ​နေဖို့ အမြဲတော့ မလွယ်ဘူး။ ဘုရားကို စောင့်ဆိုင်းရင်း စိတ်မရှည် ဖြစ်လာနိုင်တယ်။ ဒါပေမဲ့ ယေဟောဝါဟာ ထာဝစဉ် တည်လို့ အချိန်နဲ့​ပတ်သက်တဲ့ ဘုရား​အမြင်ဟာ ကျွန်တော်တို့ အမြင်နဲ့ မတူဘူး။ (၂ ပေ. ၃:၈၊ ၉) မိမိ​ရည်ရွယ်ချက်ကို ဘုရား အကောင်းဆုံးနည်းနဲ့ အကောင်အထည် ဖော်မှာ ဖြစ်ပေမဲ့ ကျွန်တော်တို့ မျှော်လင့်​ထားတဲ့ အချိန်​အတိုင်း ဖြစ်ချင်​မှ ဖြစ်မယ်။ ကတိတွေ ဘုရား ပြည့်စုံစေမယ့် အချိန်ကို ကျွန်တော်တို့ စိတ်ရှည်ရှည် စောင့်ဆိုင်းရင်း မျှော်လင့်ချက် ခိုင်မာနေအောင် ဘာက ကူညီပေးနိုင်သလဲ။—ယာ. ၅:၇၊ ၈။

၁၂။ ဟီဘရူး ၁၁:၁၊ ၆ အရ မျှော်လင့်ချက်​ဟာ ယုံကြည်ခြင်း​နဲ့ ဘယ်လို ဆက်စပ်နေသလဲ။

^၁၂ မျှော်လင့်ချက် ပြည့်စုံအောင် လုပ်ပေးမယ်လို့ ကတိပြုထားတဲ့​အရှင် ယေဟောဝါနဲ့ ဆက်​ရင်းနှီးအောင် ကြိုးစား​နေမယ်​ဆိုရင် မျှော်လင့်ချက် ခိုင်မာ​နေပါလိမ့်မယ်။ “ဘုရားသခင် တည်ရှိတယ်၊” “မိမိကို ထက်ထက်သန်သန် ရှာဖွေသူကို  ဆုချ​တဲ့​အရှင်” ဖြစ်တယ်ဆိုတာ ယုံကြည်​မှ မျှော်လင့်ချက် ရှင်သန်​နေမယ်။ (ဟီဘရူး ၁၁:၁၊ ၆ ကို ဖတ်ပါ။) ယေဟောဝါကို ပိုယုံကြည်လေ ကတိ မှန်သမျှကို ပြည့်စုံစေမယ်ဆိုတာ ပိုစိတ်ချလေ ဖြစ်လာမယ်။ ယေဟောဝါနဲ့ ဆက်ဆံရေး ပိုကောင်းအောင်၊ မျှော်လင့်ချက် ပိုခိုင်မာအောင် ကူညီပေးမယ့် လက်တွေ့ကျ အချက်တွေကို ဆွေးနွေး​ကြည့်ကြစို့။

၁၃။ ဘုရားနဲ့ ဘယ်လို ရင်းနှီး​နိုင်သလဲ။

^၁၃ ယေဟောဝါဆီ ဆုတောင်းပါ။ ကျမ်းစာ ဖတ်ပါ။ ယေဟောဝါကို မမြင်နိုင်ပေမဲ့ ဘုရားနဲ့ ရင်းနှီး​နိုင်တယ်။ ဘုရား နားထောင်ပေးမယ်ဆိုတာ စိတ်ချပြီး ဆုတောင်း​စကားပြောနိုင်တယ်။ (ယေ. ၂၉:၁၁၊ ၁၂) ကျမ်းစာ ဖတ်ခြင်း၊ တွေးတောဆင်ခြင်ခြင်းအားဖြင့် ဘုရား ပြောတာ နားထောင်နိုင်တယ်။ ရှေးသစ္စာရှိ ကျေးကျွန်တွေကို ယေဟောဝါ ဘယ်လို ဂရုစိုက်ကြောင်း ဖတ်ရတဲ့အခါ မျှော်လင့်ချက် ပိုခိုင်မာလာပါလိမ့်မယ်။ ကျမ်းစာမှာ ရေးထားသမျှဟာ “ကျွန်တော်တို့ကို သွန်သင်​ဆုံးမ​ဖို့ ဖြစ်တယ်။ ကျမ်းစာက ကျွန်တော်တို့ကို ခံနိုင်ရည်နဲ့ နှစ်သိမ့်မှု ပေးတဲ့အတွက် မျှော်လင့်ချက် ရှိစေတယ်။”—ရော. ၁၅:၄။

၁၄။ တခြားသူတွေ​အတွက် ယေဟောဝါ လုပ်ပေးတာ​တွေ​ကို ဘာကြောင့် တွေးတောသင့်သလဲ။

^၁၄ ကတိတွေကို ယေဟောဝါ ဘယ်လို ပြည့်စုံစေကြောင်း တွေးတောပါ။ အာဗြဟံ​နဲ့ စာရာ​အတွက် ဘုရား ဘာလုပ်​ပေးတယ်ဆိုတာ စဉ်းစားကြည့်ပါ။ သားသမီး မရနိုင်တော့တဲ့ အသက်အရွယ်မှာ သားတစ်ယောက် ရမယ်လို့ ဘုရား ကတိပေးတယ်။ (က. ၁၈:၁၀) အာဗြဟံ ဘယ်လို တုံ့ပြန်သလဲ။ ‘လူမျိုး​များစွာ​ရဲ့ ဖခင် ဖြစ်လာမယ် ဆိုတဲ့ ကတိတော်ကို’ အာဗြဟံ ‘ယုံကြည်တယ်’ လို့ ကျမ်းစာ ပြောတယ်။ (ရော. ၄:၁၈) လူ့ရှုထောင့်က ကြည့်ရင် မ​ဖြစ်နိုင်​ပုံ ပေါက်ပေမဲ့ ယေဟောဝါ ကတိ ပြည့်စုံစေမယ်ဆိုတာ အာဗြဟံ ယုံကြည်​စိတ်ချတယ်။ အဲဒီ​သစ္စာရှိသူ စိတ်မပျက်ခဲ့ရပါဘူး။ (ရော. ၄:၁၉-၂၁) ဘယ်လောက်ပဲ မ​ဖြစ်နိုင်​ပုံ ပေါက်နေရင်တောင် ကတိတွေကို ယေဟောဝါ ပြည့်စုံစေမယ်ဆိုတာ အမြဲ စိတ်ချနိုင်ကြောင်း အဲဒီလို မှတ်တမ်းတွေက သင်ပေးတယ်။

၁၅။ ကျွန်တော်တို့အတွက် ဘုရား လုပ်ပေးတာ​တွေ​ကို ဘာကြောင့် တွေးတောသင့်သလဲ။

 ^၁၅ သင့်အတွက် ယေဟောဝါ လုပ်ပေးတာ​တွေ​ကို တွေးတောပါ။ ကျမ်းစာပါ ဘုရား​ကတိတွေ ပြည့်စုံတာ​ကနေ သင် ဘယ်လို သတ်သတ်မှတ်မှတ် အကျိုးရသလဲဆိုတာ စဉ်းစားကြည့်ပါ။ ဥပမာ၊ ဘဝ လိုအပ်ရာတွေ ဘုရား ထောက်မ​ပေးမယ်​လို့ ယေရှု ကတိပေးတယ်။ (မ. ၆:၃၂၊ ၃၃) သန့်ရှင်းသော စွမ်းအားတော် တောင်းရင် ယေဟောဝါ ပေးမယ်လို့လည်း အာမခံတယ်။ (လု. ၁၁:၁၃) အဲဒီကတိတွေ ယေဟောဝါ တည်ပါတယ်။ သင့်အတွက် ဘုရား ပြည့်စုံစေခဲ့တဲ့ တခြား​ကတိတွေ​လည်း ရှိမှာ​ပါ။ ဥပမာ၊ သင့်ကို ခွင့်လွှတ်​မယ်၊ နှစ်သိမ့်ပေးမယ်၊ အချိန်တန် ဘုရားရေးရာ အစာ ကျွေးမယ်လို့ ကတိပေးထားတယ်။ (မ. ၆:၁၄။ ၂၄:၄၅။ ၂ ကော. ၁:၃) သင့်အတွက် ဘုရား လုပ်​ပေးခဲ့တာ​တွေ​ကို တွေးတော​မယ်​ဆိုရင် အနာဂတ်မှာ ဘုရား လုပ်ပေးမယ့် အရာတွေ​အပေါ် မျှော်လင့်ချက် ပိုခိုင်မာလာပါလိမ့်မယ်။

၁၆။ မျှော်လင့်ချက်​ဟာ ဘာကြောင့် အဖိုးတန် လက်ဆောင် ဖြစ်သလဲ။

^၁၆ ထာဝရ​အသက် မျှော်လင့်ချက်​ဟာ ဘုရားပေး အဖိုးတန် လက်ဆောင်​ပါ။ သိပ်ကောင်းတဲ့ အနာဂတ်​ကို ကျွန်တော်တို့ စောင့်မျှော်နေတယ်။ အဲဒီ​အနာဂတ် ကျိန်းသေ ရမယ်ဆိုတာ စိတ်ချနိုင်တယ်။ မျှော်လင့်ချက်​ဟာ ကျောက်ဆူး​လို​ပဲ အခက်အခဲ၊ နှိပ်စက်​ညှဉ်းပန်းမှု၊ သေခြင်းကိုတောင် တည်တည်ငြိမ်ငြိမ် ခံရပ်​စေနိုင်​တယ်။ သံခမောက်​လို​ပဲ အမှားကို ရှောင်ပြီး အမှန်အတိုင်း လုပ်နိုင်အောင် အတွေးအခေါ်ကို ကာကွယ်ပေးတယ်။ ကျမ်းစာ​အခြေပြု မျှော်လင့်ချက်က ဘုရားနဲ့ ရင်းနှီး​စေတယ်။ ကျွန်တော်တို့ကို ဘုရား ဘယ်လောက် ချစ်ကြောင်း သိစေတယ်။ မျှော်လင့်ချက် ခိုင်မာအောင် လုပ်နေ​ရင် အကျိုး များစွာ ရရှိမယ်။

၁၇။ မျှော်လင့်ချက်က ဘာကြောင့် ဝမ်းမြောက်စေသလဲ။

^၁၇ “မျှော်လင့်ချက်ကြောင့် ဝမ်းမြောက်နေပါ” လို့ ရောမ​အသင်းတော်ဆီ ရေးတဲ့ စာမှာ တမန်တော် ပေါလု အားပေးတယ်။ (ရော. ၁၂:၁၂) ဆက်သစ္စာရှိနေရင် ကောင်းကင်မှာ ထာဝရ​အသက် ရမယ်ဆိုတာ သေချာ​လို့ ပေါလု ဝမ်းမြောက်နိုင်တယ်။ ကျွန်တော်တို့လည်း ကတိတွေကို ယေဟောဝါ ပြည့်စုံစေမယ်ဆိုတာ စိတ်ချ​လို့ မျှော်လင့်ချက်ကြောင့် ဝမ်းမြောက်နိုင်ကြတယ်။ ဆာလံဆရာ ပြောသလို ‘အမြဲ သစ္စာရှိတဲ့​အရှင် ယေဟောဝါကို မျှော်လင့်တဲ့​သူဟာ ပျော်ရွှင်​ချမ်းမြေ့​ပါတယ်။’—ဆာ. ၁၄၆:၅၊ ၆။