လေ့လာရန် ဆောင်းပါး ၄၁
သင် စစ်မှန်တဲ့ ပျော်ရွှင်မှု ရရှိနိုင်
“ယေဟောဝါကို ကြောက်ရွံ့ရိုသေပြီး ကိုယ်တော်ရဲ့ လမ်းစဉ်တွေအတိုင်း လျှောက်လှမ်းသူဟာ ပျော်ရွှင်ချမ်းမြေ့တယ်။”—ဆာ. ၁၂၈:၁။
သီချင်း ၁၁၀ ‘ယေဟောဝါ ပေးတဲ့ ဝမ်းမြောက်ခြင်း’
အကြိုသုံးသပ်ချက် *
၁။ “ဘုရားသခင်ကို မှီခိုဖို့ လိုအပ်” တာနဲ့ ပျော်ရွှင်တာ ဘယ်လို ဆက်စပ်သလဲ။
စစ်မှန်တဲ့ ပျော်ရွှင်မှုဆိုတာ ပေါ်လာလိုက် ပျောက်သွားလိုက် ဖြစ်တတ်တဲ့ ခံစားချက်လောက်ပဲ မဟုတ်ဘူး။ တစ်ဘဝစာ ဖြစ်နိုင်တယ်။ ဘယ်လိုနည်းနဲ့လဲ။ “ဘုရားသခင်ကို မှီခိုဖို့ လိုအပ်မှန်း သိမြင်သူတွေ ပျော်ရွှင်ချမ်းမြေ့တယ်” လို့ တောင်ပေါ်တရားတော်မှာ ယေရှု ပြောတယ်။ (မ. ၅:၃) လူတွေဟာ ဖန်ဆင်းရှင် ယေဟောဝါဘုရားကို သိကျွမ်း၊ ဝတ်ပြု၊ မှီခိုအားကိုးချင်တဲ့ ပြင်းပြတဲ့ ဆန္ဒ ထည့်သွင်းဖန်ဆင်းခံရမှန်း ယေရှု သိတယ်။ ယေဟောဝါဟာ “ပျော်ရွှင်တဲ့ ဘုရားသခင်” ဖြစ်လို့ ဘုရားကို ဝတ်ပြုသူတွေ ပျော်ရွှင်နိုင်တယ်။—၁ တိ. ၁:၁၁။
၂-၃။ (က) ယေရှုရဲ့စကားအရ ဘယ်သူတွေ ပျော်ရွှင်နိုင်သလဲ။ (ခ) ဒီဆောင်းပါးမှာ ဘာအကြောင်း ဆွေးနွေးကြမလဲ။ ဘာကြောင့်လဲ။
၂ ပျော်ရွှင်မှုဟာ ဘဝအခြေအနေနဲ့ ဆိုင်သလား။ မဆိုင်ပါဘူး။ တောင်ပေါ်တရားတော်မှာ ထူးခြားတာတစ်ခု ယေရှု ပြောတယ်။ ကိုယ့်အပြစ်ကြောင့် ဖြစ်ဖြစ်၊ စိတ်ပျက်စရာ ဘဝအခြေအနေကြောင့် ဖြစ်ဖြစ် “ဝမ်းနည်းပူဆွေးသူတွေ” ပျော်ရွှင်နိုင်တယ်တဲ့။ “ဖြောင့်မှန်ရာကို လုပ်တဲ့အတွက် နှိပ်စက်ခံရသူတွေ၊” ခရစ်တော်နောက် လိုက်လို့ ‘ကဲ့ရဲ့ခံရသူတွေ’ လည်း ပျော်ရွှင်တယ်လို့ ယေရှု ဆက်ပြောတယ်။ (မ. ၅:၄၊ ၁၀၊ ၁၁) ဒါပေမဲ့ အဲဒီလို အခြေအနေမှာ အမှန်တကယ် ပျော်ရွှင်ဖို့ ဖြစ်နိုင်ပါ့မလား။
၃ ပျော်ရွှင်မှုဆိုတာ ဘဝအခြေအနေနဲ့ မဆိုင်ကြောင်း၊ ဘုရားရေးရာ လိုအပ်ချက်ကို ဖြည့်ဆည်းမှ၊ ဘုရားနဲ့ ရင်းနှီးနေမှ ရမှာ ဖြစ်ကြောင်း ယေရှု သင်ပေးတယ်။ (ယာ. ၄:၈) ဘယ်လိုနည်းနဲ့ အဲဒီလို လုပ်နိုင်သလဲ။ စစ်မှန်တဲ့ ပျော်ရွှင်မှု ရစေနိုင်တဲ့ အခြေခံ အချက်သုံးချက်ကို ဒီဆောင်းပါးမှာ ဆွေးနွေးပါမယ်။
ကျမ်းစာ ဖတ်ရှုလေ့လာပါ
၄။ စစ်မှန်တဲ့ ပျော်ရွှင်မှု ရစေတဲ့ ပထမအချက်က ဘာလဲ။ (ဆာလံ ၁:၁-၃)
၄ အချက် ၁– စစ်မှန်တဲ့ ပျော်ရွှင်မှု ရဖို့ ကျမ်းစာ ဖတ်ရှုလေ့လာရမယ်။ ကျမ်းစာကို အစာနဲ့ ယေရှု ခိုင်းနှိုင်းတယ်။ လူတွေ၊ တိရစ္ဆာန်တွေ အသက်ရှင်ဖို့ အစာစားရမယ်။ ဒါပေမဲ့ ကျမ်းစာကိုတော့ လူတွေပဲ ဖတ်နိုင်တယ်။ ဖတ်ဖို့လည်း လိုအပ်တယ်။ “လူဟာ အစားအစာနဲ့ပဲ အသက်ရှင်ရမှာ မဟုတ်ဘူး၊ ယေဟောဝါရဲ့ နှုတ်ထွက်စကား မှန်သမျှနဲ့ အသက်ရှင်ရမယ်” လို့ ယေရှု ပြောတယ်။ (မ. ၄:၄) ဒါကြောင့် ကျမ်းစာ မဖတ်လိုက်ဘဲ တစ်နေ့တာ မကုန်ပါစေနဲ့။ ‘ယေဟောဝါရဲ့ ပညတ်မှာ ပျော်မွေ့ပြီး ပညတ်တော်ကို နေ့ညမပြတ် ဖတ်ရွတ်ဆင်ခြင်သူဟာ ပျော်ရွှင်ချမ်းမြေ့တယ်’ လို့ ဆာလံဆရာ ပြောတယ်။—ဆာလံ ၁:၁-၃ ကို ဖတ်ပါ။
၅-၆။ (က) ကျမ်းစာကနေ ဘာတွေ သိရသလဲ။ (ခ) ကျမ်းစာဖတ်တာက ဘယ်လို ကူညီပေးနိုင်သလဲ။
၅ ပျော်ရွှင်တဲ့ ဘဝ ရနိုင်ပုံကို ကျမ်းစာမှာ ယေဟောဝါ မေတ္တာပါစွာ ဖော်ပြပေးတယ်။ ကျွန်တော်တို့ ဘဝအတွက် ဘုရားရည်ရွယ်ချက်က ဘာလဲ၊ ဘုရားနဲ့ ရင်းနှီးအောင်၊ အပြစ်တွေ ခွင့်လွှတ်ခံရအောင် ဘာလုပ်ရမလဲ၊ ဘုရားပေးထားတဲ့ အနာဂတ် မျှော်လင့်ချက်က ဘာလဲ ဆိုတာတွေ ကျွန်တော်တို့ သိလာတယ်။ (ယေ. ၂၉:၁၁) ကျမ်းစာကနေ သိလာတဲ့ အဲဒီအမှန်တရားတွေက ကျွန်တော်တို့ကို ပျော်ရွှင်စေတယ်။
၆ ကျမ်းစာမှာ နေ့စဉ်ဘဝအတွက် လက်တွေ့ကျ အကြံဉာဏ် အပြည့် ပါတယ်။ အဲဒီအတိုင်း လိုက်ရင် ပျော်ရွှင်နိုင်တယ်။ ဘဝပြဿနာတွေကြောင့် စိတ်ဓာတ်ကျတိုင်း ကျမ်းစာ ဖတ်ဖို့၊ တွေးတောဆင်ခြင်ဖို့ အချိန် ပိုယူပါ။ “ဘုရားသခင်ရဲ့ တရားစကားကို ကြားနာပြီး လိုက်လျှောက်တဲ့သူဟာ ပိုပြီး ပျော်ရွှင်ချမ်းမြေ့တယ်” လို့ ယေရှု ပြောတယ်။—လု. ၁၁:၂၈။
၇။ ကျမ်းစာဖတ်တဲ့အခါ အကျိုး အများဆုံး ရဖို့ ဘာလုပ်နိုင်သလဲ။
၇ ကျမ်းစာ ဖတ်တဲ့အခါ အချိန်ပေးပြီး အရသာခံ ဖတ်ပါ။ ဥပမာ၊ တစ်ယောက်ယောက်က ကိုယ်အကြိုက်ဆုံး အစားအစာ ချက်ပေးတယ် ဆိုပါစို့။ အချိန် မရှိလို့ ဖြစ်ဖြစ်၊ အာရုံများနေလို့ ဖြစ်ဖြစ် သေသေချာချာ အရသာ မခံဘဲ မျိုချလိုက်တယ်။ စားပြီးမှ အလောတကြီး စားလိုက်မှန်း သိလိုက်တယ်။ အချိန်ယူပြီး တစ်လုတ်ချင်း အရသာခံ စားမိရင် ကောင်းသားလို့ တွေးမိတယ်။ ကျမ်းစာဖတ်တဲ့အခါလည်း သေသေချာချာ အရသာမခံဘဲ လောလောလောလော ဖတ်လိုက်တာမျိုး ဖြစ်ဖူးသလား။ ကျမ်းစာဖတ်တဲ့အခါ အချိန်ယူပြီး အရသာခံ ဖတ်ပါ။ အဖြစ်အပျက်ကို မြင်ယောင်ပါ။ အသံတွေ ကြားယောင်ပါ။ ဖတ်တာကို တွေးတောပါ။ ဒါဆိုရင် ဖတ်ရတာ ပိုပျော်ရွှင်လာပါလိမ့်မယ်။
၈။ “သစ္စာနဲ့ သတိပညာရှိတဲ့ ကျွန်” က မိမိတာဝန် ကျေအောင် ဘယ်လို လုပ်ဆောင်နေသလဲ။ (အောက်ခြေမှတ်ချက်ကိုလည်း ကြည့်ပါ။)
၈ ဘုရားနဲ့ပတ်သက်တဲ့ အချိန်တန်အစာ ကျွေးဖို့ “သစ္စာနဲ့ သတိပညာရှိတဲ့ ကျွန်” ကို ယေရှု ခန့်အပ်ထားလို့ ကျွန်တော်တို့ ဝဝလင်လင် စားနေရတယ်။ * (မ. ၂၄:၄၅) သစ္စာရှိကျွန် ပြင်ဆင်ပေးသမျှမှာ အဓိက ပါဝင်ပစ္စည်းဟာ စွမ်းအားတော် လမ်းညွှန်မှုနဲ့ ရေးထားတဲ့ ကျမ်းစာပါ။ (၁ သက်. ၂:၁၃) အချိန်တန်အစာက ကျမ်းစာမှာ ဖော်ပြထားတဲ့ ယေဟောဝါရဲ့ စဉ်းစားပုံကို သိအောင် ကူညီပေးတယ်။ ဒါကြောင့် ကင်းမျှော်စင်၊ နိုးလော့!၊ jw.org ဆောင်းပါးတွေ ကျွန်တော်တို့ ဖတ်ကြတယ်။ အစည်းအဝေးအားလုံးအတွက် ပြင်ဆင်ကြတယ်။ လတိုင်း JW ရုပ်သံထုတ်လွှင့်မှု® အစီအစဉ် ကြည့်ကြတယ်။ အဲဒါတွေက စစ်မှန်တဲ့ ပျော်ရွှင်မှု ရစေတဲ့ ဒုတိယအချက်ကို လုပ်ဆောင်ဖို့ ကူညီပေးပါလိမ့်မယ်။
ယေဟောဝါရဲ့ စံနှုန်းတွေအတိုင်း နေထိုင်ပါ
၉။ စစ်မှန်တဲ့ ပျော်ရွှင်မှု ရစေတဲ့ ဒုတိယအချက်က ဘာလဲ။
၉ အချက် ၂– စစ်မှန်တဲ့ ပျော်ရွှင်မှု ရဖို့ ယေဟောဝါရဲ့ စံနှုန်းတွေအတိုင်း နေထိုင်ဖို့ လိုတယ်။ “ယေဟောဝါကို ကြောက်ရွံ့ရိုသေပြီး ကိုယ်တော်ရဲ့ လမ်းစဉ်တွေအတိုင်း လျှောက်လှမ်းသူဟာ ပျော်ရွှင်ချမ်းမြေ့တယ်” လို့ ဆာလံဆရာ ရေးတယ်။ (ဆာ. ၁၂၈:၁) ယေဟောဝါကို ကြောက်ရွံ့တယ်ဆိုတာ ဘုရားကို ရိုသေလေးစားလွန်းလို့ ဘုရား မကြိုက်တာ မလုပ်မိအောင် ရှောင်တာကို ဆိုလိုတယ်။ (ပညာ. ၁၆:၆) ဒါကြောင့် ကျမ်းစာပါ ဘုရားရဲ့ အမှားအမှန် စံနှုန်းတွေအတိုင်း ကျွန်တော်တို့ အတတ်နိုင်ဆုံး နေထိုင်ကြတယ်။ (၂ ကော. ၇:၁) ယေဟောဝါ နှစ်သက်မြတ်နိုးတာကို လုပ်ပြီး ဘုရား မုန်းတာကို ရှောင်မယ်ဆိုရင် ကျွန်တော်တို့ ပျော်ရွှင်ပါလိမ့်မယ်။—ဆာ. ၃၇:၂၇။ ၉၇:၁၀။ ရော. ၁၂:၉။
၁၀။ ရောမ ၁၂:၂ အရ ကျွန်တော်တို့ရဲ့ တာဝန်က ဘာလဲ။
၁၀ ရောမ ၁၂:၂ ကို ဖတ်ပါ။ အမှားအမှန် စံနှုန်း သတ်မှတ်ပိုင်ခွင့် ယေဟောဝါမှာ ရှိမှန်း လူတစ်ယောက် သိရုံနဲ့ မပြီးဘူး။ အဲဒီစံနှုန်းတွေကို လိုက်နာဖို့လည်း လိုတယ်။ ဥပမာ၊ အစိုးရမှာ အဝေးပြေးလမ်းအတွက် အမြန်နှုန်း သတ်မှတ်ပိုင်ခွင့် ရှိမှန်း သိပေမဲ့ မလိုက်နာဘူးဆိုရင် မောင်းသင့်တဲ့ နှုန်းထက် ပိုမြန်မြန် မောင်းမိနိုင်တယ်။ ကျွန်တော်တို့လည်း ယေဟောဝါရဲ့ စံနှုန်းတွေကို လိုက်လျှောက်တာ အကောင်းဆုံး ဘဝလမ်းစဉ် ဖြစ်မှန်း ယုံကြည်တယ်ဆိုတာကို ကိုယ့်အပြုအမူအားဖြင့် ပြကြတယ်။ (ပညာ. ၁၂:၂၈) “ကိုယ်တော်ကြောင့် အသက်လမ်းကို ကျွန်တော် သိရှိရတယ်။ ရှေ့တော်မှာ နေခွင့်ရလို့ သိပ်ပျော်တယ်။ ကိုယ်တော့်ညာဘက်မှာ နေခွင့်ရလို့ ထာဝစဉ် ကြည်နူးတယ်” လို့ ပြောခဲ့တဲ့ ဒါဝိဒ် အဲဒီလို ခံစားရတယ်။—ဆာ. ၁၆:၁၁။
၁၁-၁၂။ (က) အခက်အခဲ ကြုံတဲ့အခါ၊ စိတ်ဓာတ်ကျတဲ့အခါ ဘာကို သတိထားရမလဲ။ (ခ) ဖိလိပ္ပိ ၄:၈ မှာ ပါတဲ့ စကားတွေက ဖျော်ဖြေမှု ရွေးချယ်ရာမှာ ဘယ်လို ကူညီပေးနိုင်သလဲ။
၁၁ အခက်အခဲ ကြုံတဲ့အခါ၊ စိတ်ဓာတ်ကျတဲ့အခါ တစ်နည်းနည်းနဲ့ စိတ်ကို ထွက်ပေါက်ပေးဖို့ လိုတယ်လို့ ခံစားရနိုင်တယ်။ အဲဒါ မမှားပါဘူး။ ဒါပေမဲ့ ယေဟောဝါ မုန်းတာကို မလုပ်မိဖို့ သတိထားရမယ်။—ဧ. ၅:၁၀-၁၂၊ ၁၅-၁၇။
၁၂ ဖိလိပ္ပိ အသင်းတော်ကို တမန်တော် ပေါလု ရေးတဲ့ စာမှာ ‘ဖြောင့်မတ်တဲ့အရာ၊ စင်ကြယ်တဲ့အရာ၊ မေတ္တာတိုးစေတဲ့အရာ၊ မွန်မြတ်တဲ့အရာ’ တွေကို အမြဲ ဆင်ခြင်သုံးသပ်နေဖို့ အားပေးထားတယ်။ (ဖိလိပ္ပိ ၄:၈ ကို ဖတ်ပါ။) ဖျော်ဖြေရေးအကြောင်း ပေါလု သတ်သတ်မှတ်မှတ် ပြောနေတာ မဟုတ်ပေမဲ့ သူပြောတဲ့ အချက်တွေက ကျွန်တော်တို့ ရွေးချယ်တဲ့ ဖျော်ဖြေမှုအပေါ် အကျိုးသက်ရောက်မှု ရှိသင့်တယ်။ ကျမ်းချက်မှာ ပါတဲ့ “အရာ” ဆိုတဲ့ နေရာတိုင်းမှာ “သီချင်း၊” “ရုပ်ရှင်၊” “ဝတ္ထု၊” “ဂိမ်း” ဆိုတဲ့ စကားလုံးတွေ အစားထိုးကြည့်ပါ။ အဲဒါက ဘုရားအမြင်မှာ လက်ခံနိုင်တာ၊ လက်မခံနိုင်တာကို သိဖို့ ကူညီပေးနိုင်တယ်။ ယေဟောဝါရဲ့ မြင့်မားတဲ့ စံနှုန်းတွေနဲ့အညီ ကျွန်တော်တို့ နေထိုင်ချင်ကြတယ်။ (ဆာ. ၁၁၉:၁-၃) ဒါဆိုရင် စစ်မှန်တဲ့ ပျော်ရွှင်မှု ရစေတဲ့ နောက်တစ်ချက်ကို ကြည်လင်တဲ့ သိစိတ်နဲ့ လုပ်ဆောင်နိုင်မယ်။—တ. ၂၃:၁။
ဝတ်ပြုရေးကို ဦးစားထားပါ
၁၃။ စစ်မှန်တဲ့ ပျော်ရွှင်မှု ရစေတဲ့ တတိယအချက်က ဘာလဲ။ (ယောဟန် ၄:၂၃၊ ၂၄)
၁၃ အချက် ၃– ဝတ်ပြုရေးကို ဘဝမှာ အမြဲ ဦးစားထားပါ။ ယေဟောဝါဟာ ဖန်ဆင်းရှင် ဖြစ်လို့ ကျွန်တော်တို့ရဲ့ ဝတ်ပြုမှု ရထိုက်တယ်။ (ဗျာ. ၄:၁၁။ ၁၄:၆၊ ၇) ဒါကြောင့် ဘဝမှာ အရေးကြီးဆုံးက “စွမ်းအားတော် လမ်းပြမှုနဲ့အညီ၊ အမှန်တရားနဲ့အညီ” ဘုရား နှစ်သက်တဲ့နည်းအတိုင်း ကိုးကွယ်ဖို့ ဖြစ်သင့်တယ်။ (ယောဟန် ၄:၂၃၊ ၂၄ ကို ဖတ်ပါ။) ကျမ်းစာ အမှန်တရားနဲ့အညီ ဝတ်ပြုနိုင်ဖို့ စွမ်းအားတော် လမ်းပြမှုကို ခံယူရမယ်။ အဖွဲ့အစည်း လုပ်ငန်း ကန့်သတ်ခံရ၊ ပိတ်ပင်ခံရတဲ့ နေရာမှာ နေထိုင်ရင်တောင် ဝတ်ပြုရေးကို အဓိကထားရမယ်။ ယေဟောဝါသက်သေ ဖြစ်ရုံနဲ့ ညီအစ်ကို/မ ၁၀၀ ကျော် လောလောဆယ် ထောင်ချခံထားရတယ်။ * ဒါတောင် ဆုတောင်းဖို့၊ လေ့လာဖို့၊ ဘုရားနဲ့ နိုင်ငံတော်အကြောင်း တခြားသူတွေကို ပြောပြဖို့ သူတို့ အတတ်နိုင်ဆုံး ပျော်ပျော်ရွှင်ရွှင် ကြိုးစားနေကြတယ်။ ကဲ့ရဲ့ခံရ၊ နှိပ်စက်ခံရချိန်မှာ ကျွန်တော်တို့နဲ့အတူ ယေဟောဝါ ရှိတယ်၊ ဆုချမယ်ဆိုတာ သိလို့ ပျော်ရွှင်ကြတယ်။—ယာ. ၁:၁၂။ ၁ ပေ. ၄:၁၄။
ဖြစ်ရပ်မှန် တွေ့ကြုံမှု
၁၄။ တာဂျစ်ကစ္စတန်က လူငယ်ညီအစ်ကို ဘာကြုံရသလဲ။ ဘာကြောင့်လဲ။
၁၄ ဖြစ်ရပ်မှန် တွေ့ကြုံမှုတွေက ကျွန်တော်တို့ရဲ့ ဘဝ အခြေအနေ ဘယ်လိုပဲ ရှိပါစေ အထက်မှာ လေ့လာခဲ့တဲ့ အချက်သုံးချက်ကြောင့် စစ်မှန်တဲ့ ပျော်ရွှင်မှု ရနိုင်ကြောင်း အတည်ပြုပေးတယ်။ တာဂျစ်ကစ္စတန်နိုင်ငံက အသက် ၁၉ နှစ်အရွယ် ညီအစ်ကို ဂျိုဗီဒွန် ဘာဘာဟာနို့ဗ် စစ်မှု မထမ်းလို့ ဘာကြုံရကြောင်း လေ့လာကြည့်ပါ။ ၂၀၁၉၊ အောက်တိုဘာ ၄ ရက်မှာ နေအိမ်ကနေ အတင်းအဓမ္မ ခေါ်ဆောင်သွားခံရပြီး လများစွာ ဖမ်းချုပ်ခံရတယ်။ ရာဇဝတ်သားတစ်ယောက်လို ဆက်ဆံခံရတယ်။ သူ ကြုံရတဲ့ မတရားမှုအကြောင်း နိုင်ငံအတော်များများရဲ့ သတင်းမှာ ပါလာတယ်။ စစ်တပ်ရဲ့ သစ္စာအဓိဋ္ဌာန် ဆိုဖို့၊ စစ်ယူနီဖောင်း ဝတ်ဖို့ အတင်းဖိအားပေးတဲ့အနေနဲ့ ရိုက်နှက်ခံရတယ်။ အပြစ်ရှိတယ်လို့ စီရင်ခံရပြီး အလုပ်ကြမ်း စခန်းကို ပို့ခံရတယ်။ နောက်ဆုံး၊ တာဂျစ်ကစ္စတန် သမ္မတအမိန့်နဲ့ လွတ်ငြိမ်းခွင့် ရပြီး လွတ်လာတယ်။ အဲဒီအချိန်တစ်လျှောက်လုံး ဂျိုဗီဒွန် သမာဓိ စောင့်ထိန်းပြီး ပျော်ရွှင်မှု မပျောက်ဆုံးအောင် ဆက်ထိန်းခဲ့တယ်။ ဘယ်လိုနည်းနဲ့လဲ။ ဘုရားကို မှီခိုဖို့ လိုအပ်မှန်း အမြဲ အသိအမှတ်ပြုပြီး အဲဒီလိုအပ်ချက်ကို ဖြည့်ဆည်းလို့ပါပဲ။
၁၅။ ဂျိုဗီဒွန် ထောင်ကျနေတုန်း ယေဟောဝါအကြောင်း ဘယ်လို ဆက်လေ့လာသလဲ။
၁၅ ဂျိုဗီဒွန် ထောင်ကျနေတုန်း ကျမ်းစာ၊ ကျမ်းစာစာပေ တစ်ခုမှ မရှိတာတောင် ယေဟောဝါအကြောင်း ဆက်လေ့လာတယ်။ ဘယ်လိုနည်းနဲ့လဲ။ ဒေသခံ ညီအစ်ကို/မတွေက အစားအစာ ယူလာပေးတဲ့အခါ ထည့်ပေးတဲ့ အိတ်တွေပေါ်မှာ နေ့စဉ်ကျမ်းချက် ရေးပေးကြတယ်။ ဒါကြောင့် ဂျိုဗီဒွန် နေ့တိုင်း ကျမ်းစာ ဖတ်နိုင်ပြီး တွေးတောဆင်ခြင်နိုင်ခဲ့တယ်။ ထောင်ကနေ လွတ်လာပြီးနောက် “ကိုယ်လွတ်လပ်နေချိန်မှာ ကျမ်းစာနဲ့ ကျမ်းစာ စာပေတွေကို ဖတ်ရှုခြင်းအားဖြင့် ယေဟောဝါအကြောင်း ပိုသိကျွမ်းအောင် လုပ်ဖို့ သိပ်အရေးကြီးတယ်” လို့ ပြင်းထန်တဲ့ စမ်းသပ်မှု မကြုံရသေးသူတွေကို အကြံပေးတယ်။
၁၆။ ဂျိုဗီဒွန် ဘာကို အာရုံစိုက် တွေးတောသလဲ။
၁၆ ဂျိုဗီဒွန်ဟာ ယေဟောဝါရဲ့ စံနှုန်းတွေအတိုင်း နေထိုင်တယ်။ မကောင်းတဲ့ ဆန္ဒတွေအကြောင်းပဲ စဉ်းစားပြီး မကောင်းတာတွေ လုပ်မယ့်အစား ယေဟောဝါအကြောင်း၊ ဘုရား တန်ဖိုးထားတဲ့ အရာတွေအကြောင်း အဓိက စဉ်းစားတယ်။ ဘုရား ဖန်ဆင်းခြင်းလက်ရာတွေရဲ့ လှပမှုကို အံ့ဩမိတယ်။ မနက်တိုင်း ငှက်တေးသီသံနဲ့ နိုးထပြီး ညဘက်ဆိုရင်လည်း လနဲ့ ကြယ်တွေကို ငေးမောတယ်။ “ယေဟောဝါပေးတဲ့ အဲဒီလက်ဆောင်တွေက ကျွန်တော့်ကို ပျော်ရွှင်၊ အားတက်စေတယ်” လို့ ပြောတယ်။ ယေဟောဝါရဲ့ ဘုရားရေးရာပိုင်း၊ ရုပ်ပိုင်း ပြင်ဆင်ပေးချက်တွေကို ကျေးဇူးတင်တာက ကျွန်တော်တို့ကို ပျော်ရွှင်စေတယ်။ အဲဒီပျော်ရွှင်မှုက ခံရပ်နိုင်စွမ်း တိုးများစေနိုင်တယ်။
၁၇။ ၁ ပေတရု ၁:၆၊ ၇ မှာ ပါတဲ့ စကားတွေက ဂျိုဗီဒွန်လို အခြေအနေ ကြုံရသူတွေနဲ့ ဘယ်လို သက်ဆိုင်သလဲ။
၁၇ ဂျိုဗီဒွန်ဟာ ဝတ်ပြုရေးကိုလည်း ဦးစားထားတယ်။ စစ်မှန်တဲ့ ဘုရားကို သမာဓိ စောင့်သိဖို့ အရေးကြီးကြောင်း သိတယ်။ “ယေဟောဝါဘုရားကို ကိုးကွယ်ရမယ်။ ကိုယ်တော်တစ်ပါးတည်းကိုပဲ ဝတ်ပြုရမယ်” လို့ ယေရှု ပြောတယ်။ (လု. ၄:၈) စစ်ဘက် အရာရှိတွေ၊ စစ်သားတွေက ဂျိုဗီဒွန်ကို ယေဟောဝါသက်သေ အဖြစ်ကနေ နုတ်ထွက်စေချင်တယ်။ ဒါပေမဲ့ ယုံကြည်ချက်ကို အလျှော့မပေးမိအောင် ကူညီပေးဖို့ ယေဟောဝါဆီ နေ့တိုင်း၊ ညတိုင်း ဂျိုဗီဒွန် ဆုတောင်းတယ်။ မတရားဆက်ဆံခံရပေမဲ့ လုံးဝ အလျှော့မပေးဘူး။ ရလဒ်အနေနဲ့ အဖမ်းမခံရခင်၊ အရိုက်မခံရခင်၊ ထောင်ချ မခံရခင်က မရှိခဲ့တာကို အခု ပိုင်ဆိုင်ထားလို့ အလွန်ဝမ်းသာနေတယ်။ အဲဒါကတော့ အစမ်းသပ်ခံ ယုံကြည်ခြင်းပါပဲ။—၁ ပေတရု ၁:၆၊ ၇ ကို ဖတ်ပါ။
၁၈။ ပျော်ရွှင်မှု ဘယ်လို ဆက်ထိန်းထားနိုင်သလဲ။
၁၈ စစ်မှန်တဲ့ ပျော်ရွှင်မှု ရဖို့ ကျွန်တော်တို့ ဘာလိုတယ်ဆိုတာ ယေဟောဝါ သိတယ်။ ဒါကြောင့် စစ်မှန်တဲ့ ပျော်ရွှင်မှု ရစေတဲ့ အချက်သုံးချက်ကို လိုက်နာမယ်ဆိုရင် အခက်အခဲတွေကြားမှာတောင် သင် ပျော်ရွှင်မှု ဆက်ထိန်းထားနိုင်ပါလိမ့်မယ်။ “ယေဟောဝါကို ဘုရားသခင်အဖြစ် ကိုးကွယ်နေသူတွေ ပျော်ရွှင်ချမ်းမြေ့တယ်” လို့ ပြောနိုင်ပါလိမ့်မယ်။—ဆာ. ၁၄၄:၁၅။
သီချင်း ၈၉ နားထောင်၊ နာခံ၊ ကောင်းချီးစံ
^ လူများစွာက အပျော်အပါး၊ ချမ်းသာကြွယ်ဝမှု၊ နာမည်ကျော်ကြားမှု၊ ဩဇာအာဏာတို့ကနေ ပျော်ရွှင်မှု ရဖို့ ရှာနေတဲ့အတွက် စစ်မှန်တဲ့ ပျော်ရွှင်မှု ရဖို့ ခက်နေကြတယ်။ ယေရှု မြေကြီးပေါ် ရှိတုန်းက စစ်မှန်တဲ့ ပျော်ရွှင်မှု ဘယ်လို ရနိုင်မလဲဆိုတာ သွန်သင်ခဲ့တယ်။ စစ်မှန်တဲ့ ပျော်ရွှင်မှု ရအောင် ကူညီပေးနိုင်တဲ့ အချက် သုံးချက်ကို ဒီဆောင်းပါးမှာ ဆွေးနွေးကြပါမယ်။
^ ၂၀၁၄၊ ဩဂုတ် ၁၅ ကင်းမျှော်စင် “သင် ‘အချိန်တန်အစာ’ ရရှိနေသလား” ဆောင်းပါးကို ကြည့်ပါ။
^ အသေးစိတ် သိချင်ရင် jw.org မှာ တင်ထားတဲ့ “ယုံကြည်ချက်ကြောင့် ထောင်ချခံရ” မှာ ရှာဖွေပါ။
^ ပုံအညွှန်း– ပြန်သရုပ်ဖော်ထားတဲ့ ဒီပုံမှာ ညီအစ်ကိုတစ်ယောက် ဖမ်းဆီးခံရပြီး တရားရုံး ခေါ်သွားခံရ။ ညီအစ်ကို/မတွေ သူ့ကို အားပေးထောက်မနေ။