လေ့လာရန် ဆောင်းပါး ၁၄
ဘုရားပေး တာဝန်ကို ကျေပွန်အောင် ဆောင်ရွက်နေသလား
“သတင်းကောင်းကို ဆက်ဟောပြောနေပါ။ ဘုရားပေး တာဝန်ကို ကျေပွန်အောင် ဆောင်ရွက်ပါ။”—၂ တိ. ၄:၅။
သီချင်း ၅၇ လူအမျိုးမျိုးကို ဟောပြောခြင်း
အကြိုသုံးသပ်ချက် *
ယေရှု ရှင်ပြန်ထမြောက်ပြီးနောက် ‘သွားပြီး တပည့် ဖြစ်လာအောင် သွန်သင်ပေးကြပါ’ လို့ တပည့်တွေကို မိန့်မှာနေ (အပိုဒ် ၁ ကိုကြည့်ပါ)
၁။ ဘုရားသခင့် ကျေးကျွန်အားလုံး ဘာလုပ်ချင်ကြသလဲ။ ဘာကြောင့်လဲ။ (မျက်နှာဖုံးပုံကို ကြည့်ပါ။)
“လူမျိုးတကာဆီ သွားပြီး . . . တပည့် ဖြစ်လာအောင် သွန်သင်ပေးကြပါ” လို့ နောက်လိုက်တွေကို ခရစ်တော်ယေရှု မိန့်မှာတယ်။ (မ. ၂၈:၁၉) ဘုရားသခင့် သစ္စာရှိ ကျေးကျွန်အားလုံးဟာ မိမိတို့ရထားတဲ့ အမှုဆောင်လုပ်ငန်းကို “ကျေပွန်အောင်” ဘယ်လို ဆောင်ရွက်ရမယ်ဆိုတာ သိချင်ကြတယ်။ (၂ တိ. ၄:၅) ဒီလုပ်ငန်းဟာ တခြားအလုပ်တွေထက် ပိုအရေးကြီးပြီး ပိုအကျိုးရှိလို့ပဲ။ ဒါပေမဲ့ ဆန္ဒရှိသလောက် အချိန်ပေးဖို့ ခက်နိုင်တယ်။
၂။ အမှုဆောင်လုပ်ငန်းကို ဆောင်ရွက်ရာမှာ ဘာအခက်အခဲတွေ ရှိသလဲ။
၂ အချိန်နဲ့ ခွန်အား စိုက်ထုတ်ရမယ့် တခြားအရေးကြီးကိစ္စတွေ ရှိသေးတယ်။ ကိုယ်တိုင်နဲ့ မိသားစုကို ထောက်ပံ့ဖို့ တစ်ရက်ကို နာရီပေါင်းများစွာ အလုပ်လုပ်နေရတာ ဖြစ်နိုင်တယ်။ မိသားစုတာဝန်၊ ကျန်းမာရေး ပြဿနာ၊ စိတ်ဓာတ်ကျမှု၊ ဇရာအရွယ်ရဲ့ နာကျင်ကိုက်ခဲမှုတွေနဲ့ လုံးပန်းနေရတာ ဖြစ်နိုင်တယ်။ အဲဒီလို အခက်အခဲတွေကြား အမှုဆောင်လုပ်ငန်းကို ကျေပွန်အောင် ဘယ်လို ဆောင်ရွက်နိုင်သလဲ။
၃။ မဿဲ ၁၃:၂၃ မှာပါတဲ့ ယေရှုရဲ့စကားအရ ဘာကောက်ချက်ချနိုင်သလဲ။
၃ ကိုယ့်အခြေအနေအရ ယေဟောဝါရဲ့ အမှုတော်မှာ အချိန်အကန့်အသတ်ပဲ ပါဝင်နိုင်ရင်တောင် စိတ်ဓာတ်မကျသင့်ဘူး။ ယောက်တိုင်း တစ်ပုံစံတည်း သီးပွင့်ဖြစ်ထွန်းမှာ မဟုတ်ကြောင်း ယေရှု သိတယ်။ (မဿဲ ၁၃:၂၃ ကိုဖတ်ပါ။) အမှုတော်မှာ အတတ်နိုင်ဆုံး ပါဝင်နေသရွေ့ ကျွန်တော်တို့ လုပ်ဆောင်သမျှကို ယေဟောဝါ အလွန် တန်ဖိုးထားတယ်။ (ဟီ. ၆:၁၀-၁၂) ဒါပေမဲ့ ကိုယ့်အခြေအနေအရ ဒီထက်ပိုပြီး လုပ်နိုင်သေးတယ်လို့ ခံစားရနိုင်တယ်။ ဘဝမှာ အမှုဆောင်လုပ်ငန်းကို ဘယ်လို ဦးစားထားနိုင်ကြောင်း၊ ဘဝကို ဘယ်လို ရိုးရှင်း စေနိုင်ကြောင်း၊ ဟောပြောသွန်သင်ခြင်း စွမ်းရည်ကို ဘယ်လို တိုးတက်စေနိုင်ကြောင်း ဒီဆောင်းပါးမှာ ဆွေးနွေးပါမယ်။ အမှုဆောင်လုပ်ငန်းကို ကျေပွန်အောင် ဆောင်ရွက်ခြင်းဆိုတာ ဘာကို ဆိုလိုကြောင်း အရင် သုံးသပ်ကြစို့။
၄။ အမှုဆောင်လုပ်ငန်းကို ကျေပွန်အောင် ဆောင်ရွက်ခြင်းဆိုတာ ဘာကို ဆိုလိုသလဲ။
၄ အမှုဆောင်လုပ်ငန်းကို ကျေပွန်အောင် ဆောင်ရွက်ခြင်းဆိုတာ ဟောပြောသွန်သင်ခြင်းလုပ်ငန်းမှာ အတတ်နိုင်ဆုံး အပြည့်အဝ ပါဝင်ခြင်းကို ဆိုလိုတယ်။ ဒါပေမဲ့ အချိန်ပေးရုံထက်မက ပါဝင်တယ်။ စိတ်ရင်းကို ယေဟောဝါ အဓိကထားတယ်။ ယေဟောဝါနဲ့ လူလူချင်းကို ချစ်မယ်ဆိုရင် အမှုဆောင်လုပ်ငန်းမှာ * ကိုယ်စွမ်းရှိသမျှ ပါဝင်ပါလိမ့်မယ်။ (မာ. ၁၂:၃၀၊ ၃၁။ ကော. ၃:၂၃) ကိုယ်စွမ်းရှိသမျှဆိုတာ အမှုတော်မှာ အစွမ်းခွန်အား ရှိသမျှ အသုံးပြုခြင်းဖြစ်တယ်။ ဟောပြောခွင့်ကို တန်ဖိုးထားမယ်ဆိုရင် လူများနိုင်သမျှ များများကို သတင်းကောင်း ဝေမျှဖို့ ကြိုးစားပါလိမ့်မယ်။
၅-၆။ အချိန်အနည်းငယ်ပဲ ပေးနိုင်ရင်တောင် အမှုဆောင်လုပ်ငန်းကို ဦးစားထားနိုင်ကြောင်း ဥပမာပေးပါ။
၅ ဂီတာတီး ဝါသနာပါတဲ့ လူငယ်တစ်ယောက်အကြောင်း စဉ်းစားကြည့်ပါ။ အချိန်ရတိုင်း ဂီတာတီးလေ့ရှိတယ်။ နောက်ပိုင်း ကော်ဖီဆိုင်တစ်ဆိုင်မှာ စနေ၊ တနင်္ဂနွေနေ့တိုင်း ဂီတာတီးတဲ့အလုပ် ရတယ်။ ငွေမလောက်လို့ တနင်္လာနေ့ကနေ သောကြာနေ့အထိ စတိုးဆိုင်မှာ ငွေကိုင်အလုပ် လုပ်ရတယ်။ စတိုးဆိုင်မှာ အများဆုံး လုပ်ရပေမဲ့ စိတ်ကတော့ ဂီတာ တီးဖို့ပဲ။ လက်ရည်တက်အောင် ကြိုးစားပြီး အချိန်ပြည့် ဂီတာသမား ဖြစ်ချင်တဲ့အတွက် အချိန်ရတိုင်း ဂီတာတီးလေ့ရှိတယ်။
၆ သင်လည်း ဟောပြောခြင်းလုပ်ငန်းမှာ အချိန်အနည်းငယ်ပဲ ပေးနိုင်ရင်တောင် ဒီလုပ်ငန်းကို မြတ်နိုးတဲ့အတွက် ဟောပြောခြင်းစွမ်းရည် တိုးတက်အောင် ကြိုးစားတယ်။ အချိန်ပေးရမယ့် တာဝန်တွေ များပေမဲ့ ဟောပြောခြင်းလုပ်ငန်းကို ဘယ်လို ဦးစားထားရမလဲဆိုတာ စဉ်းစားနေမှာပဲ။
အမှုဆောင်လုပ်ငန်းကို ဦးစားထားနိုင်ပုံ
၇-၈။ အမှုဆောင်လုပ်ငန်းမှာ ယေရှုရဲ့ သဘောထားကို ဘယ်လို တုပနိုင်သလဲ။
၇ အမှုဆောင်လုပ်ငန်းမှာ ယေရှု ပုံသက်သေကောင်း ပြခဲ့တယ်။ ဘုရားနိုင်ငံတော်အကြောင်း အဓိက ဟောပြောတယ်။ (ယော. ၄:၃၄၊ ၃၅) မိုင်ပေါင်း ရာနဲ့ချီ ခြေကျင်လျှောက်ပြီး လူများနိုင်သမျှ များများကို ဟောခဲ့တယ်။ အိမ်တွေမှာဖြစ်ဖြစ်၊ ဘယ်နေရာမှာပဲဖြစ်ဖြစ် အခွင့်အရေးရတိုင်း ဟောတယ်။ ဘဝမှာ အမှုဆောင်လုပ်ငန်းကိုပဲ အဓိကထားတယ်။
၈ အချိန်မရွေး၊ နေရာမရွေး သတင်းကောင်း ဟောနိုင်မယ့် အခွင့်အရေး ရှာယူခြင်းအားဖြင့် ခရစ်တော်ကို ကျွန်တော်တို့ တုပနိုင်တယ်။ အမှုဆောင်လုပ်ငန်းမှာ ပါဝင်ဖို့ သက်သောင့်သက်သာ အခြေအနေတွေကို လိုလိုလားလား စွန့်လွှတ်ကြတယ်။ (မာ. ၆:၃၁-၃၄။ ၁ ပေ. ၂:၂၁) အသင်းတော်မှာ တချို့က အထူးရှေ့ဆောင်၊ မှန်မှန်ရှေ့ဆောင်၊ အရန်ရှေ့ဆောင်အဖြစ် အမှုဆောင်နိုင်ကြတယ်။ တချို့က ဘာသာခြားစကား သင်ယူကြတယ်။ ဟောပြောသူ ပိုလိုအပ်တဲ့ နေရာကို ပြောင်းရွှေ့ကြတယ်။ ဒါပေမဲ့ အမှုဆောင်လုပ်ငန်း ပြီးမြောက်မှုအများစုကတော့ အတတ်နိုင်ဆုံး ကြိုးစားနေတဲ့ ပုံမှန်ကြေညာသူတွေကြောင့်ပါပဲ။ ယေဟောဝါက ကျွန်တော်တို့ တတ်နိုင်တာထက် ပိုမတောင်းဆိုဘူး။ “ပျော်ရွှင်တဲ့ ဘုရားသခင်ဆီက လာတဲ့ ဘုန်းအသရေပြည့်ဝတဲ့ သတင်းကောင်း” ကို ကြေညာရင်း အမှုတော်မြတ်မှာ ပျော်ရွှင်စေချင်တယ်။—၁ တိ. ၁:၁၁။ တရား. ၃၀:၁၁။
၉။ (က) လောကအလုပ် လုပ်ရချိန်မှာတောင် ဟောပြောခြင်းလုပ်ငန်းကို ပေါလု ဘယ်လို ဦးစားထားခဲ့သလဲ။ (ခ) တမန်တော် ၂၈:၁၆၊ ၃၀၊ ၃၁ က အမှုဆောင်လုပ်ငန်းအပေါ် ပေါလုရဲ့ သဘောထားကို ဘယ်လို ဖော်ပြသလဲ။
၉ တမန်တော် ပေါလုလည်း ဘဝမှာ အမှုဆောင်လုပ်ငန်းကို အဓိကထားခြင်းအားဖြင့် ပုံသက်သေကောင်း ပြခဲ့တယ်။ ဒုတိယ သာသနာပြုခရီးစဉ်အတွင်း ကောရိန္သုမြို့မှာ ငွေကြေးခက်ခဲလာလို့ ခဏလောက် တဲရှင်ချုပ်ခဲ့ရတယ်။ ဒါပေမဲ့ တဲရှင်ချုပ်တာကို အဓိက မထားဘူး။ “အဖိုးအခ မယူဘဲ” ကောရိန္သုမြို့သားတွေကို သတင်းကောင်း ဟောနိုင်အောင် ကိုယ့်ကိုယ်ကိုယ် ထောက်ပံ့ဖို့သာ အလုပ်လုပ်ခဲ့တာ ဖြစ်တယ်။ (၂ ကော. ၁၁:၇) ပေါလုဟာ လောကအလုပ် လုပ်ခဲ့ရပေမဲ့ အမှုဆောင်လုပ်ငန်းကို ဆက်ဦးစားထားပြီး ဥပုသ်နေ့တိုင်း ဟောပြောတယ်။ အခြေအနေ အဆင်ပြေလာတဲ့အခါ ဟောပြောခြင်းလုပ်ငန်းကို ပိုအာရုံစိုက်နိုင်ခဲ့တယ်။ ‘တရားစကား ဟောပြောတဲ့အလုပ်ကိုပဲ အာရုံစိုက်ပြီး ယေရှုဟာ ခရစ်တော်ဖြစ်တဲ့အကြောင်း ဂျူးတွေကို သက်သေခံတယ်။’ (တ. ၁၈:၃-၅။ ၂ ကော. ၁၁:၉) နောက်ပိုင်း ရောမမြို့မှာ နေအိမ် အကျယ်ချုပ်ဘဝနဲ့ နှစ်နှစ် နေရချိန် လာတဲ့ဧည့်သည်တွေကို သက်သေခံပြီး စာတွေ ရေးတယ်။ (တမန်တော် ၂၈:၁၆၊ ၃၀၊ ၃၁ ကိုဖတ်ပါ။) ဘာအကြောင်းကြောင့်မှ အမှုဆောင်လုပ်ငန်းကနေ အာရုံမလွဲသွားဖို့ စိတ်ပိုင်းဖြတ်ထားတယ်။ “ကရုဏာတော် ခံစားရလို့ ဒီအမှုတော်ကို ဆောင်ရွက်နေရတာ။ ဒါကြောင့် အရှုံးမပေးဘူး” လို့ သူရေးတယ်။ (၂ ကော. ၄:၁) ကျွန်တော်တို့လည်း လောကအလုပ်အတွက် အချိန်များစွာ ပေးရရင်တောင် ပေါလုလိုပဲ အမှုဆောင်လုပ်ငန်းကို အဓိကထားနိုင်တယ်။
အမှုဆောင်လုပ်ငန်းကို ကျေပွန်အောင် ဆောင်ရွက်နိုင်တဲ့ နည်းများစွာ ရှိတယ် (အပိုဒ် ၁၀-၁၁ ကိုကြည့်ပါ)
၁၀-၁၁။ ကျန်းမာရေး မကောင်းရင်တောင် အမှုဆောင်လုပ်ငန်းမှာ ဘယ်လို အပြည့်အဝ ပါဝင်နိုင်သလဲ။
၁၀ အသက်အရွယ်ကြောင့်၊ ကျန်းမာရေး ပြဿနာကြောင့် တစ်အိမ်တက်ဆင်း မသွားနိုင်ရင် တခြားဟောပြောခြင်းကဏ္ဍတွေမှာ ပါဝင်နိုင်ပါတယ်။ ပထမရာစု ခရစ်ယာန်တွေဟာ တစ်အိမ်တက်ဆင်း သွားပြီးတော့ဖြစ်စေ၊ လူအများရှေ့မှာဖြစ်စေ၊ အလွတ်သဘောဖြစ်စေ “တွေ့ရတဲ့သူတွေ” ကို အခွင့်အရေး ရတိုင်း ဟောပြောတယ်။ (တ. ၁၇:၁၇။ ၂၀:၂၀) ကျွန်တော်တို့လည်း လမ်းသိပ်မလျှောက်နိုင်ရင် လူသွားလူလာများတဲ့ နေရာမှာ ထိုင်ပြီး ဟောနိုင်တယ်။ အလွတ်သဘောဖြစ်စေ၊ စာနဲ့ဖြစ်စေ၊ ဖုန်းနဲ့ဖြစ်စေ သက်သေခံ နိုင်တယ်။ အခြေအနေ အကန့်အသတ်ရှိတဲ့ ကြေညာသူများစွာဟာ အဲဒီဟောပြောခြင်းကဏ္ဍတွေမှာ ပါဝင်ရင်း ပျော်ရွှင်နေကြတယ်။
၁၁ ကျန်းမာရေး မကောင်းရင်တောင် အမှုဆောင်လုပ်ငန်းမှာ အပြည့်အဝ ပါဝင်နိုင်ပါတယ်။ တမန်တော် ပေါလုအကြောင်း ပြန်စဉ်းစားကြည့်ပါ။ “ကျွန်တော့်ကို အစွမ်းခွန်အားပေးတဲ့ ဘုရားသခင်ကြောင့် အရာရာကို စွမ်းဆောင်နိုင်” တယ်လို့ သူပြောတယ်။ (ဖိ. ၄:၁၃) သာသနာပြု ခရီးစဉ်တစ်ခုမှာ ပေါလု နေမကောင်းဖြစ်တဲ့အခါ အဲဒီအစွမ်းခွန်အားကို လိုအပ်ခဲ့တယ်။ “ကျွန်တော် နေမကောင်းဖြစ်သွားတဲ့အတွက် ခင်ဗျားတို့ကို ဦးဆုံးအကြိမ် သတင်းကောင်း ဟောပြောခွင့်ရတာ” လို့ ဂလာတိမြို့သားတွေကို သူ ပြောတယ်။ (ဂလ. ၄:၁၃) သင်လည်း ကျန်းမာရေး ပြဿနာကြောင့် ဆရာဝန်၊ သူနာပြု၊ ကျန်းမာရေး စောင့်ရှောက်သူတွေကို ဟောပြောဖို့ အခွင့်အရေး ရနိုင်တယ်။ သူတို့အိမ်ကို ကြေညာသူတွေ ရောက်သွားချိန်မှာ သူတို့ဟာ အလုပ်ခွင်ထဲ ရောက်နေကြလို့ပဲ။
ဘဝကို ရိုးရှင်းစေနိုင်ပုံ
၁၂။ “တစ်ခုတည်းကိုပဲ အာရုံစိုက်” တယ်ဆိုတာ ဘာကို ဆိုလိုသလဲ။
၁၂ “မျက်လုံးဟာ ခန္ဓာကိုယ်ရဲ့ မီးခွက်ပဲ။ တစ်ခုတည်းကိုပဲ အာရုံစိုက်ကြည့်ရင် တစ်ကိုယ်လုံး လင်းနေလိမ့်မယ်” လို့ ယေရှု ပြောတယ်။ (မ. ၆:၂၂) ဘာကို ဆိုလိုသလဲ။ ဘဝကို ရိုးရှင်းစေတာ၊ ပန်းတိုင်၊ ရည်ရွယ်ချက် တစ်ခုတည်းကိုပဲ အာရုံစိုက်တာ၊ အာရုံလွဲမသွားတာကို ဆိုလိုတယ်။ အမှုဆောင်လုပ်ငန်းကိုပဲ အာရုံစိုက်ခြင်းအားဖြင့် ယေရှု ပုံသက်သေကောင်း ပြခဲ့တယ်။ ဘုရားအမှုဆောင်ခြင်းနဲ့ နိုင်ငံတော်ကို ဆက်အာရုံစိုက်နေဖို့ တပည့်တွေကို သင်ပေးတယ်။ ဘဝမှာ အမှုဆောင်လုပ်ငန်းကို အဓိကထားခြင်း၊ “နိုင်ငံတော်နဲ့ ဘုရားသခင်ရဲ့ ဖြောင့်မတ်ခြင်းကို အမြဲ ဦးစားထား” ခြင်းအားဖြင့် ယေရှုရဲ့ ပုံသက်သေကို ကျွန်တော်တို့ တုပနေကြတယ်။—မ. ၆:၃၃။
၁၃။ အမှုဆောင်လုပ်ငန်းကို အာရုံစိုက်ဖို့ ဘာက ကူညီနိုင်သလဲ။
၁၃ အမှုဆောင်လုပ်ငန်းကို အာရုံစိုက်နိုင်တဲ့ နည်းတစ်နည်းကတော့ ဘဝကို ရိုးရှင်းစွာ ထားခြင်း *ပါပဲ။ ဒါမှ ယေဟောဝါကို သိပြီး ချစ်လာအောင် တခြားသူတွေကို ကူညီနိုင်မယ်။ ဥပမာ၊ ကြားရက် အမှုဆောင်မှာ အချိန် ပိုပေးနိုင်ဖို့ လောကအလုပ်ကို ချိန်ညှိနိုင်မလား။ အလွန် အချိန်စားတဲ့ ဖျော်ဖြေရေးတချို့ကို လျှော့ချနိုင်မလား။
၁၄။ အမှုဆောင်လုပ်ငန်းကို ပိုအာရုံစိုက်နိုင်ဖို့ မောင်နှံတစ်စုံ ဘာအပြောင်းအလဲတွေ လုပ်ခဲ့သလဲ။
၁၄ အကြီးအကဲ ညီအစ်ကို အဲလီယက်နဲ့ ဇနီး အဲဒီလို လုပ်ခဲ့တယ်။ “ချက်ချင်း ရှေ့ဆောင် မလုပ်နိုင်ပေမဲ့ အမှုဆောင်မှာ ပိုအချိန်ပေးနိုင်အောင် တစ်ဆင့်ချင်း ကြိုးစားခဲ့ကြတယ်။ ဥပမာ၊ အသုံးစရိတ်တွေ၊ အလွန်အကျွံ အပန်းဖြေတာတွေကို လျှော့ချတယ်။ အလုပ်ချိန် ပြောင်းပေးဖို့ အလုပ်ရှင်ကို တောင်းဆိုတယ်။ ဒါကြောင့် ညနေပိုင်း အမှုဆောင်မှာ ပါဝင်နိုင်ပြီး သင်အံမှုတွေ ပိုလုပ်နိုင်ခဲ့တယ်။ ကြားရက် အမှုဆောင်မှာ တစ်လ နှစ်ကြိမ် ပါဝင်လာနိုင်တယ်” လို့ အဲလီယက် ပြောတယ်။
ဟောပြောသွန်သင်ခြင်း စွမ်းရည် တိုးတက်လာနိုင်ပုံ
ကြားရက် အစည်းအဝေးကနေ သိလာတာကို ကျင့်သုံးခြင်းက အမှုဆောင်လုပ်ငန်းမှာ တိုးတက်ဖို့ ကူညီပေး (အပိုဒ် ၁၅-၁၆ ကိုကြည့်ပါ) *
၁၅-၁၆။ ၁ တိမောသေ ၄:၁၃၊ ၁၅ အရ ဟောပြောခြင်းစွမ်းရည်ကို ဘယ်လို ဆက်တိုးတက်စေနိုင်သလဲ။ (“ အမှုဆောင်လုပ်ငန်းကို ကျေပွန်အောင် ဆောင်ရွက်နိုင်ဖို့ ကူညီပေးတဲ့ ပန်းတိုင်များ” လေးထောင့်ကွက်ကို ကြည့်ပါ။)
၁၅ အမှုဆောင်လုပ်ငန်းမှာ အပြည့်အဝ ပါဝင်နိုင်တဲ့ နောက်တစ်နည်းကတော့ ဟောပြောခြင်းစွမ်းရည် တိုးတက်ပညာ. ၁:၅။ ၁ တိမောသေ ၄:၁၃၊ ၁၅ ကိုဖတ်ပါ။
စေခြင်းပါပဲ။ အတတ်ပညာရှင်တချို့ဟာ ပညာနဲ့ စွမ်းရည် တိုးတက်အောင် အမြဲ သင်ယူလေ့ကျင့်နေကြရတယ်။ သတင်းကောင်း ဟောပြောသူတွေလည်း အဲဒီလိုပဲ။ အမှုဆောင်လုပ်ငန်းမှာ စွမ်းရည် ပိုတိုးတက်အောင် ဆက်သင်ယူနေဖို့ လိုတယ်။—၁၆ အမှုဆောင်လုပ်ငန်းမှာ ဘယ်လို ဆက်တိုးတက်နိုင်မလဲ။ အပတ်စဉ် ခရစ်ယာန်အသက်တာနဲ့ အမှုဆောင်လုပ်ငန်း အစည်းအဝေးမှာရတဲ့ ညွှန်ကြားချက်တွေကို အာရုံစိုက်ခြင်းအားဖြင့်ပါပဲ။ အဲဒီအစည်းအဝေးဟာ အမှုဆောင်လုပ်ငန်းမှာ တိုးတက်ဖို့ တန်ဖိုးမဖြတ်နိုင်တဲ့ လေ့ကျင့်မှုတွေ ရရှိစေတယ်။ ဥပမာ၊ ကျောင်းသားတာဝန်ကျသူတွေကို သဘာပတိက သွန်သင်ချက်ပေးတဲ့အခါ လက်တွေ့ ကျင့်သုံးနိုင်မယ့်အချက်တွေကို သင်ယူနိုင်တယ်။ နောက်တစ်ကြိမ် အမှုဆောင်လုပ်ငန်းမှာ ပါဝင်တဲ့အခါ အဲဒီအကြံပြုချက်တွေကို လက်တွေ့ ကျင့်သုံးနိုင်တယ်။ အုပ်စု ကြီးကြပ်မှူးဆီမှာလည်း အကူအညီ တောင်းနိုင်တယ်။ သူနဲ့ဖြစ်စေ၊ အတွေ့အကြုံရင့် ကြေညာသူ၊ ရှေ့ဆောင်၊ တိုက်နယ်ကြီးကြပ်မှူးနဲ့ဖြစ်စေ တွဲအမှုဆောင်ဖို့ တောင်းဆိုနိုင်တယ်။ သွန်သင်ခြင်း ကိရိယာတိုင်းကို ကျွမ်းကျွမ်းကျင်ကျင် သုံးတတ်လာရင် ဟောပြောသွန်သင်ခြင်းလုပ်ငန်းမှာ ပိုပျော်ရွှင်လာမယ်။
၁၇။ အမှုဆောင်လုပ်ငန်းကို အပြည့်အဝ ဆောင်ရွက်တဲ့အခါ ဘာတွေ ခံစားရမလဲ။
၁၇ ဘုရားသခင်ရဲ့ “လုပ်ဖော်ဆောင်ဖက်” ဖြစ်ခွင့်ရတာ အခွင့်ထူးပါပဲ။ (၁ ကော. ၃:၉) “ပိုအရေးကြီးတဲ့အရာတွေကို ပိုင်းခြားသိ” ပြီး အမှုဆောင်လုပ်ငန်းကို အာရုံစိုက်မယ်ဆိုရင် “ယေဟောဝါကို ဝမ်းမြောက်စွာ ဝတ်ပြု” နိုင်ပါလိမ့်မယ်။ (ဖိ. ၁:၁၀။ ဆာ. ၁၀၀:၂) ဘယ်လို အခက်အခဲတွေ၊ ကန့်သတ်ချက်တွေပဲ ရှိပါစေ အမှုဆောင်လုပ်ငန်းကို ကျေပွန်အောင် ဆောင်ရွက်ဖို့ ဘုရား ခွန်အားပေးမယ်ဆိုတာ စိတ်ချနိုင်ပါတယ်။ (၂ ကော. ၄:၁၊ ၇။ ၆:၄) အခြေအနေကြောင့် အမှုဆောင်လုပ်ငန်းမှာ နည်းနည်းဖြစ်ဖြစ်၊ များများဖြစ်ဖြစ် ဘယ်လောက်ပဲ ပါဝင်နိုင်ပါစေ အကြွင်းမဲ့ လုပ်ဆောင်ခြင်းအားဖြင့် “ပျော်ရွှင်ကျေနပ်” နိုင်ပါတယ်။ (ဂလ. ၆:၄) အမှုဆောင်လုပ်ငန်းကို အပြည့်အဝ ဆောင်ရွက်ခြင်းက ယေဟောဝါနဲ့ လူလူချင်းကို ချစ်ကြောင်း ဖော်ပြရာရောက်တယ်။ “အဲဒီလိုလုပ်မယ်ဆိုရင် ကိုယ်တိုင်သာမက ကိုယ့်ရဲ့ သွန်သင်ချက်ကို နားထောင်သူတွေပါ ကယ်တင်ခြင်း ရလိမ့်မယ်။”—၁ တိ. ၄:၁၆။
သီချင်း ၅၈ ငြိမ်သက်ခြင်း မြတ်နိုးသူများကို ရှာဖွေခြင်း
^ အပိုဒ်၊ 5 နိုင်ငံတော်သတင်း ဟောဖို့၊ တပည့်ဖြစ်စေဖို့ ကျွန်တော်တို့ တာဝန်ရထားတယ်။ အခက်အခဲတွေကြားမှာတောင် အဲဒီတာဝန်ကို ကျေပွန်အောင် ဆောင်ရွက်နိုင်ပုံအကြောင်း ဒီဆောင်းပါးမှာ ဆွေးနွေးပါမယ်။ ဟောပြောခြင်းလုပ်ငန်းမှာ ပိုထိရောက်အောင်မြင်နိုင်ပုံကိုလည်း သုံးသပ်ပါမယ်။
^ အပိုဒ်၊ 4 စကားလုံး ရှင်းလင်းချက်– အမှုဆောင်လုပ်ငန်းမှာ ဟောပြောသွန်သင်ခြင်း၊ အဖွဲ့အစည်း အဆောက်အအုံတွေ ဆောက်လုပ် ထိန်းသိမ်းခြင်း၊ သဘာဝဘေး ကယ်ဆယ်ရေးလုပ်ငန်းစတဲ့ ကဏ္ဍအမျိုးမျိုး ပါဝင်တယ်။—၂ ကော. ၅:၁၈၊ ၁၉။ ၈:၄။
^ အပိုဒ်၊ 13 ၂၀၁၆၊ ဇူလိုင်လထုတ် ကင်းမျှော်စင် စာ. ၁၀၊ “ဘဝကို ရိုးရှင်းစေနိုင်ပုံ” လေးထောင့်ကွက်မှာ ပါတဲ့ အချက်ခုနစ်ချက်ကို ကြည့်ပါ။
^ အပိုဒ်၊ 62 ပုံအညွှန်း– ပြန်လည်ပတ်မှုလုပ်ပုံကို ကြားရက် အစည်းအဝေးမှာ ညီအစ်မတစ်ယောက် သရုပ်ပြနေ။ သဘာပတိ ပေးတဲ့ သွန်သင်ချက်ကို သွန်သင်ခြင်း ဘရိုရှာမှာ မှတ်စုယူနေ။ အဲဒီနောက် စနေ၊ တနင်္ဂနွေ အမှုဆောင်မှာ လက်တွေ့ သုံးနေ။