လေ့လာရန် ဆောင်းပါး ၁၆
သေခြင်းနဲ့ပတ်သက်တဲ့ ကျမ်းစာအမှန်တရား
“မှန်တဲ့သတင်းစကားနဲ့ မှားတဲ့သတင်းစကားကို ခွဲခြားနိုင်တယ်။” —၁ ယော. ၄:၆။
သီချင်း ၇၃ ရဲစွမ်းသတ္တိ ပေးပါ
အကြိုသုံးသပ်ချက် *
၁-၂။ (က) လူတွေကို စာတန် ဘယ်နည်းတွေနဲ့ လှည့်စားထားသလဲ။ (ခ) ဒီဆောင်းပါးမှာ ဘာအကြောင်း ဆွေးနွေးကြမလဲ။
“မုသားရဲ့အဖ” စာတန်ဟာ လူ့သမိုင်း အစကတည်းက လူတွေကို လှည့်စားထားတယ်။ (ယော. ၈:၄၄) စာတန်ရဲ့ အလိမ်အညာတွေထဲမှာ သေခြင်းအကြောင်း၊ တမလွန်ဘဝအကြောင်း မှားယွင်းတဲ့ သွန်သင်ချက်တွေ ပါဝင်တယ်။ လူကြိုက်များတဲ့ ဓလေ့ထုံးစံတွေ၊ အယူသီးမှုတွေဟာ အဲဒီသွန်သင်ချက်အပေါ် အခြေခံတယ်။ ဒါကြောင့် ညီအစ်ကို/မ အတော်များများဟာ မိသားစုမှာ၊ ရပ်ကွက်မှာ တစ်ယောက်ယောက် သေဆုံးတဲ့အခါ “ယုံကြည်ခြင်းအတွက် ကြိုးစားတိုက်လှန်” ကြရမယ်။—ယု. ၃။
၂ အဲဒီအခြေအနေမျိုး သင် ကြုံရတဲ့အခါ သေခြင်းနဲ့ပတ်သက်တဲ့ ကျမ်းစာသွန်သင်ချက်တွေဘက် ဘယ်လို အခိုင်အမာ ရပ်တည်နိုင်မလဲ။ (ဧ. ၆:၁၁) ဘုရား မနှစ်သက်တဲ့ ဓလေ့ထုံးစံတွေမှာ ပါဝင်ဖို့ ဖိအားပေးခံရသူကို ဘယ်လို နှစ်သိမ့်အားပေးနိုင်မလဲ။ ယေဟောဝါပေးတဲ့ လမ်းညွှန်မှုအကြောင်း ဒီဆောင်းပါးမှာ ဆွေးနွေးပါမယ်။ ဦးဆုံး၊ သေခြင်းနဲ့ပတ်သက်တဲ့ ကျမ်းစာအဆိုကို ဆွေးနွေးကြစို့။
လူသေတွေရဲ့ အခြေအနေနဲ့ပတ်သက်တဲ့ အမှန်တရား
၃။ ဦးဆုံးလိမ်လည်မှုကြောင့် ဘာရလဒ် ရခဲ့သလဲ။
၃ လူတွေ သေဖို့ ဘုရားသခင် မရည်ရွယ်ဘူး။ ဒါပေမဲ့ ထာဝစဉ် အသက်ရှင်ဖို့ ယေဟောဝါကို နာခံရမယ်။ “အကောင်းအဆိုး သိကျွမ်းရာအပင်ရဲ့ အသီးကိုတော့ မစားနဲ့။ စားတဲ့နေ့မှာ မင်း သေကိုသေရမယ်” လို့ အာဒံနဲ့ ဧဝကို ဘုရား မိန့်မှာတယ်။ (က. ၂:၁၆၊ ၁၇) ဒါပေမဲ့ စာတန်က “မင်းတို့ လုံးဝ သေမှာ မဟုတ်ဘူး” လို့ မြွေကတစ်ဆင့် ဧဝကို ပြောတယ်။ အဲဒီအလိမ်အညာကို ဧဝ ယုံပြီး အသီးစားလိုက်တယ်။ အာဒံလည်း စားလိုက်တယ်။ (က. ၃:၄၊ ၆) ဒီနည်းအားဖြင့် လူတွေဟာ အပြစ်နဲ့ သေခြင်းအောက် ရောက်ခဲ့ရတယ်။—ရော. ၅:၁၂။
၄-၅။ လူတွေကို စာတန် ဘယ်လို ဆက်လှည့်စားနေသလဲ။
၄ ဘုရား ပြောတဲ့အတိုင်း အာဒံနဲ့ ဧဝ သေခဲ့ရတယ်။ ဒါပေမဲ့ သေခြင်းနဲ့ပတ်သက်ပြီး စာတန် ဆက်လိမ်တယ်။ နောက်ပိုင်းမှာ တခြား အလိမ်အညာတွေကို သုံးလာတယ်။ တစ်ခုကတော့ ပကတိခန္ဓာ သေသွားပေမဲ့ ဝိညာဉ် ဆက်အသက်ရှင်နေတယ်ဆိုတဲ့ သွန်သင်ချက်ပဲ။ အဲဒီအလိမ်အညာနဲ့ ဆက်နွှယ်နေတဲ့ အယူအဆတွေက ဒီနေ့ထိ လူတွေကို လှည့်စားနေတုန်းပဲ။—၁ တိ. ၄:၁။
၅ လူများစွာ ဘာကြောင့် လှည့်စားခံနေရသလဲ။ ဘာကြောင့်လဲဆိုတော့ စာတန်ရဲ့ အလိမ်အညာက သေခြင်းနဲ့ပတ်သက်တဲ့ လူတွေရဲ့ ပင်ကိုခံစားချက်ကို အမြတ်ထုတ်ထားလို့ပဲ။ လူတွေဟာ ထာဝစဉ် အသက်ရှင်ဖို့ ဖန်ဆင်းခံထားရလို့ မသေချင်ကြဘူး။ (ဒေ. ၃:၁၁) သေခြင်းကို ရန်သူအဖြစ် သဘောထားကြတယ်။—၁ ကော. ၁၅:၂၆။
၆-၇။ (က) လူသေတွေနဲ့ပတ်သက်တဲ့ အမှန်တရားကို ဖုံးကွယ်ရာမှာ စာတန် အောင်မြင်သလား။ ရှင်းပြပါ။ (ခ) ကျမ်းစာအမှန်တရားက မလိုအပ်တဲ့ ကြောက်ရွံ့မှုကို ဘယ်လို ဖယ်ရှားပေးသလဲ။
၆ စာတန် ဘယ်လောက်ပဲ ကြိုးစားပါစေ သေခြင်းနဲ့ပတ်သက်တဲ့ အမှန်တရားကိုတော့ မဖုံးကွယ်နိုင်ဘူး။ လူသေတွေရဲ့ အခြေအနေနဲ့ မျှော်လင့်ချက်အကြောင်း ကျမ်းစာသွန်သင်ချက်တွေကို လူတွေ အခု ပိုသိလာကြပြီ။ (ဒေ. ၉:၅၊ ၁၀။ တ. ၂၄:၁၅) အဲဒီအမှန်တရားတွေက ကျွန်တော်တို့ကို နှစ်သိမ့်ပေးတယ်။ မလိုအပ်တဲ့ ကြောက်ရွံ့မှု၊ မသေချာ မရေရာမှုတွေကနေ လွတ်ကင်းစေတယ်။ ဥပမာ၊ လူသေတွေကို ကျွန်တော်တို့ မကြောက်ဘူး။ သူတို့အတွက်လည်း မစိုးရိမ်ဘူး။ သူတို့ အသက်မရှင်တော့ကြောင်း၊ ဘယ်သူ့ကိုမှ အန္တရာယ် မပြုနိုင်ကြောင်း၊ အိပ်မောကျသလို ဖြစ်နေကြောင်း သိထားတယ်။ (ယော. ၁၁:၁၁-၁၄) လူသေတွေဟာ အချိန်ကုန်လို့ကုန်မှန်းလည်း မသိဘူး။ ဒါကြောင့် သေဆုံးတာ နှစ်ပေါင်း ရာနဲ့ချီ ရှိနေသူတွေတောင် ထမြောက်လာတဲ့အခါ မနေ့တစ်နေ့ကလိုပဲ ခံစားရလိမ့်မယ်။
၇ လူသေတွေရဲ့ အခြေအနေနဲ့ပတ်သက်တဲ့ အမှန်တရားဟာ ရိုးရှင်းပြီး ယုတ္တိရှိမှန်း သင် သဘောတူတယ် မဟုတ်လား။ ရှုပ်ထွေးတဲ့ စာတန့် အလိမ်အညာတွေနဲ့တော့ တခြားစီပဲ။ အဲဒီအလိမ်အညာတွေက လူတွေကို လှည့်စားရုံမက ဖန်ဆင်းရှင်ကိုလည်း ရှုတ်ချတယ်။ စာတန် ဖြစ်ပေါ်စေတဲ့ ထိခိုက်နစ်နာမှုအကြောင်း ပိုနားလည်ဖို့ ဒီမေးခွန်းတွေကို သုံးသပ်ကြမယ်– စာတန့် လိမ်ညာမှုတွေက ယေဟောဝါကို ဘယ်လို ရှုတ်ချသလဲ။ ခရစ်တော်ရဲ့ ရွေးဖိုး ပူဇော်သက္ကာအပေါ် ယုံကြည်မှုကို ဘယ်လို ကင်းမဲ့စေသလဲ။ လူတွေရဲ့ ဝမ်းနည်းပူဆွေးမှုကို ဘယ်လို ပိုဆိုးစေသလဲ။
စာတန့်လိမ်ညာမှုကြောင့် ဖြစ်ပေါ်လာတဲ့ ထိခိုက်နစ်နာမှု
၈။ ယေရမိ ၁၉:၅ အရ လူသေတွေနဲ့ပတ်သက်တဲ့ စာတန့် လိမ်ညာမှုတွေဟာ ယေဟောဝါကို ဘယ်လို ရှုတ်ချသလဲ။
၈ လူသေတွေနဲ့ပတ်သက်တဲ့ စာတန့် လိမ်ညာမှုတွေက ယေဟောဝါကို ရှုတ်ချတယ်။ အဲဒီလိမ်ညာမှုတွေထဲမှာ လူသေတွေ မီးငရဲမှာ ဝေဒနာခံနေရတယ်ဆိုတဲ့ သွန်သင်ချက်အမှား ပါဝင်တယ်။ အဲဒါက ဘုရားကို ရှုတ်ချတာပဲ။ ဘယ်နည်းနဲ့လဲ။ မေတ္တာရှင် ဘုရားသခင်ဟာ မာရ်နတ်လိုပဲ ရက်စက်သူဖြစ်တယ်လို့ လူတွေကို ယုံကြည်စေလို့ပဲ။ (၁ ယော. ၄:၈) အဲဒီသွန်သင်ချက်အမှားကြောင့် သင် ဘယ်လို ခံစားရသလဲ။ ယေဟောဝါကော ဘယ်လို ခံစားရသလဲ။ တကယ်တော့ ရက်စက်မှု မှန်သမျှကို ဘုရား ရွံမုန်းတယ်။—ယေရမိ ၁၉:၅ ကိုဖတ်ပါ။
၉။ စာတန့် လိမ်ညာမှုတွေက ယောဟန် ၃:၁၆ နဲ့ ၁၅:၁၃ မှာ ဖော်ပြထားတဲ့ ခရစ်တော်ရဲ့ ရွေးဖိုးအပေါ် ယုံကြည်မှုကို ဘယ်လို ထိခိုက်စေသလဲ။
၉ သေခြင်းနဲ့ပတ်သက်တဲ့ စာတန်ရဲ့ လိမ်ညာမှုတွေဟာ ခရစ်တော်ရဲ့ ရွေးဖိုး ပူဇော်သက္ကာကို အယုံအကြည်မဲ့စေတယ်။ (မ. ၂၀:၂၈) စာတန့်လိမ်ညာမှု နောက်တစ်ခုက လူတွေမှာ မသေနိုင်တဲ့ ဝိညာဉ်ရှိတယ်ဆိုတာပဲ။ အဲဒီလိုသာဆိုရင် လူတွေ ထာဝစဉ် အသက်ရှင်နေကြတာပဲ။ လူတွေ ထာဝရအသက်ရအောင် ရွေးဖိုးအဖြစ် ခရစ်တော် အသေခံဖို့တောင် မလိုတော့ဘူး။ တကယ်တော့ ခရစ်တော်ရဲ့ ရွေးဖိုးဟာ လူတွေအပေါ် ပြတဲ့ အကြီးမားဆုံး မေတ္တာ ဖော်ပြချက်ပဲ။ (ယောဟန် ၃:၁၆။ ၁၅:၁၃ ကိုဖတ်ပါ။) အဲဒီအဖိုးတန် ဆုလက်ဆောင်ကို တန်ဖိုးမဲ့သွားစေတဲ့ သွန်သင်ချက်ကြောင့် ယေဟောဝါနဲ့ သားတော် ဘယ်လို ခံစားရမယ်ဆိုတာ စဉ်းစားကြည့်ပါ။
၁၀။ သေခြင်းနဲ့ပတ်သက်တဲ့ စာတန့် လိမ်ညာမှုတွေက ဝမ်းနည်းပူဆွေးမှုကို ဘယ်လို ပိုဆိုးစေသလဲ။
၁၀ စာတန့် လိမ်ညာမှုတွေက လူတွေရဲ့ ဝမ်းနည်းပူဆွေးမှုကို ပိုဆိုးစေတယ်။ ကလေးတစ်ယောက် သေဆုံးသွားလို့ ဝမ်းနည်းနေတဲ့ မိဘတွေကို ကောင်းကင်မှာ ကောင်းကင်တမန် လိုနေလို့ ဘုရား ခေါ်သွားတယ်ဆိုပြီး ပြောကြတယ်။ စာတန်ရဲ့ အဲဒီလိမ်ညာမှုဟာ ဝမ်းနည်းပူဆွေးမှုကို လျော့သွားစေသလား၊ ပိုဆိုးစေသလား။ ချာ့ချ်သွန်သင်ချက် ငြင်းပယ်သူတွေကို သစ်တိုင်မှာ မီးရှို့ခြင်း အပါအဝင် နှိပ်စက်မှုတွေကို ဆင်ခြေပေးဖို့ မီးငရဲ သွန်သင်ချက်အမှားကို လူတွေ သုံးကြတယ်။ အယူမှားသူတွေကို နှိပ်စက်ခြင်းဟာ မသေခင် နောင်တရပြီး ငရဲကနေ လွတ်အောင် “ငရဲကို မြည်းစမ်း” ခိုင်းခြင်းသာ ဖြစ်တယ်လို့ နှိပ်စက်သူတွေ ယူဆကြောင်း စပိန်ခုံရုံးဆိုင်ရာ စာအုပ်တစ်အုပ်က ဆိုတယ်။ နိုင်ငံများစွာမှာ လူတွေဟာ သေဆုံးသွားတဲ့ ဘိုးဘေးတွေကို ကိုးကွယ်ကြတယ်၊ အရိုအသေ ပေးကြတယ်၊ ကောင်းချီး တောင်းခံကြတယ်။ ကိုယ့်ကို ဒုက္ခမပေးစေဖို့ ဘိုးဘေးတွေ စိတ်ဆိုးအောင် မလုပ်ကြဘူး။ စာတန့် လိမ်ညာမှုတွေပေါ် အခြေခံတဲ့ အဲဒီယုံကြည်ချက်တွေဟာ စစ်မှန်တဲ့ နှစ်သိမ့်မှု ပေးမယ့်အစား မလိုအပ်တဲ့ စိုးရိမ်ပူပန်မှုနဲ့ ကြောက်ရွံ့မှုတွေကိုပဲ ဖြစ်ပေါ်စေတယ်။
ကျမ်းစာအမှန်တရားကို ခုခံကာကွယ်နိုင်ပုံ
၁၁။ ကျမ်းစာနဲ့ မညီတာတွေလုပ်ဖို့ ဆွေမျိုး၊ မိတ်ဆွေတွေ ဘယ်လို ဖိအားပေးနိုင်သလဲ။
၁၁ ယေဟောဝါနဲ့ ကျမ်းစာကို ချစ်မြတ်နိုးခြင်းက ကျမ်းစာနဲ့ မညီတဲ့ ဓလေ့ထုံးစံတွေမှာ ပါဝင်ဖို့ ဆွေမျိုး၊ မိတ်ဆွေတွေ စိတ်ရင်းမှန်နဲ့ ဖိအားပေးတဲ့အခါမှာတောင် ဘုရားကို နာခံဖို့ ခွန်အားရှိစေတယ်။ သေလွန်သူကို မချစ်ဘူး၊ မလေးစားဘူးလို့ သူတို့ စွပ်စွဲနိုင်တယ်။ ကိုယ့်လုပ်ရပ်ကြောင့် သေလွန်သူက ကျန်ရစ်သူတွေကို တစ်နည်းနည်းနဲ့ ဒုက္ခပေးလိမ့်မယ်လို့လည်း ပြောနိုင်တယ်။ အဲဒီအချိန်မှာ ကျမ်းစာအမှန်တရားကို ဘယ်လို ခုခံကာကွယ်နိုင်မလဲ။ ကျမ်းစာမူတွေကို ဘယ်လို ကျင့်သုံးနိုင်မလဲဆိုတာ သုံးသပ်ကြည့်ကြစို့။
၁၂။ လူသေတွေနဲ့ပတ်သက်ပြီး ကျမ်းစာနဲ့ မညီတဲ့ ဓလေ့ထုံးစံတချို့က ဘာတွေလဲ။
၁၂ ကျမ်းစာနဲ့ မညီတဲ့ ယုံကြည်ချက်၊ ဓလေ့ထုံးစံတွေနဲ့ “တသီးတခြားနေ” ဖို့ စိတ်ပိုင်းဖြတ်ထားပါ။ (၂ ကော. ၆:၁၇) လူတစ်ယောက် သေဆုံးပြီးနောက် “ဝိညာဉ်” ဟာ အနီးနားမှာ ရှိနေပြီး မလေးမစား လုပ်ခဲ့သူတွေကို ဒုက္ခပေးတယ်လို့ ကရစ်ဘီယံနိုင်ငံတစ်ခုမှာ ယုံကြည်ကြတယ်။ “ဝိညာဉ်ဟာ တစ်မျိုးလုံးကိုတောင် ဒုက္ခပေးနိုင်တယ်” လို့ စာအုပ်တစ်အုပ် ဆိုတယ်။ အာဖရိကထုံးစံတစ်ခုမှာ သေလွန်သူရဲ့ အိမ်မှာရှိတဲ့ မှန်တွေကို ဖုံးပြီး သူ့ဓာတ်ပုံတွေကို မှောက်ထားရတယ်။ ဘာကြောင့်လဲ။ လူသေတွေ ကိုယ့်ကိုယ်ကိုယ် မမြင်စေဖို့ပဲ ဆိုပြီး ပြောကြတယ်။ ယေဟောဝါရဲ့ ကျေးကျွန်တွေကတော့ စာတန့် လိမ်ညာမှုတွေကို အားပေးတဲ့ ယုံတမ်းစကားတွေ၊ ဓလေ့ထုံးစံတွေနဲ့ လုံးဝ မပတ်သက်ကြဘူး။—၁ ကော. ၁၀:၂၁၊ ၂၂။
၁၃။ ဓလေ့ထုံးစံတစ်ခုနဲ့ပတ်သက်ပြီး မသေမချာ ဖြစ်နေရင် ယာကုပ် ၁:၅ အရ ဘာလုပ်သင့်သလဲ။
၁၃ ဓလေ့ထုံးစံတစ်ခုနဲ့ပတ်သက်ပြီး မသေမချာ ဖြစ်နေရင် ဉာဏ်ပညာပေးဖို့ ယေဟောဝါဆီ ဆုတောင်းပါ။ (ယာကုပ် ၁:၅ ကိုဖတ်ပါ။) အဖွဲ့အစည်းထုတ် စာပေတွေမှာ ရှာဖွေလေ့လာပါ။ လိုအပ်ရင် အသင်းတော် အကြီးအကဲတွေနဲ့ တိုင်ပင်ပါ။ ဘာလုပ်ရမယ်ဆိုတာ သူတို့ ဆုံးဖြတ်ပေးမှာ မဟုတ်ပေမဲ့ ဒီဆောင်းပါးမှာ ဆွေးနွေးထားသလိုမျိုး ကျမ်းစာမူတွေကို ထောက်ပြပါလိမ့်မယ်။ အဲဒါတွေ လုပ်ဆောင်ခြင်းက သင့်ရဲ့ “ပိုင်းခြားသိမြင်နိုင်စွမ်း” ကို လေ့ကျင့်ပေးရာရောက်ပြီး “အမှားအမှန် ခွဲခြားသိနိုင်” စေပါလိမ့်မယ်။—ဟီ. ၅:၁၄။
၁၄။ တခြားသူတွေ တိုက်မိမလဲအောင် ကျွန်တော်တို့ ဘာလုပ်နိုင်သလဲ။
၁၄ “ဘုရားသခင်ရဲ့ ဘုန်းတော်ကို ထောက်ပြီး အရာရာကို လုပ်ဆောင်ကြပါ။ . . . တိုက်မိလဲစရာ မဖြစ်ပါစေနဲ့။” (၁ ကော. ၁၀:၃၁၊ ၃၂) ဓလေ့ထုံးစံတစ်ခုမှာ ပါဝင်ဖို့ ဆုံးဖြတ်တဲ့အခါ တခြားသူတွေ၊ အထူးသဖြင့် ခရစ်ယာန်ချင်းတွေရဲ့ သိစိတ်ကို တိုက်မိလဲစေမလားဆိုတာ စဉ်းစားသင့်တယ်။ ဘယ်သူ့ကိုမှ ကျွန်တော်တို့ တိုက်မိမလဲစေချင်ဘူး။ (မာ. ၉:၄၂) သက်သေခံမဟုတ်တဲ့သူတွေကိုလည်း စိတ်မဆိုးစေချင်ဘူး။ သူတို့ရဲ့ ဓလေ့ထုံးစံတွေနဲ့ပတ်သက်ပြီး ကျွန်တော်တို့ မငြင်းခုံဘူး၊ မကဲ့ရဲ့ဘူး။ မေတ္တာက လေးလေးစားစား ပြောဆိုဖို့ လှုံ့ဆော်ပေးပါလိမ့်မယ်။ အဲဒါက ယေဟောဝါရဲ့ ဘုန်းတော်ကို ထင်ရှားစေတယ်။ မေတ္တာဟာ တန်ခိုးပါတယ်။ ထောက်ထားစာနာစိတ်နဲ့ လေးစားစွာ မေတ္တာပြမယ်ဆိုရင် ဆန့်ကျင်သူတွေကိုတောင် စိတ်ပျော့ပျောင်းလာစေနိုင်တယ်။
၁၅-၁၆။ (က) ကိုယ့်ယုံကြည်ချက်အကြောင်း တခြားသူတွေကို အသိပေးထားတာက ဘာကြောင့် ပညာရှိရာရောက်သလဲ။ ဥပမာပေးပါ။ (ခ) ရောမ ၁:၁၆ မှာပါတဲ့ ပေါလုရဲ့စကားကို ဘယ်လို လိုက်နာနိုင်သလဲ။
၁၅ ယေဟောဝါသက်သေတစ်ဦး ဖြစ်ကြောင်း အသိပေးထားပါ။ (ဟေရှာ. ၄၃:၁၀) သင်ဟာ ယေဟောဝါသက်သေဖြစ်မှန်း ဆွေမျိုးတွေ၊ အိမ်နီးချင်းတွေကို ကြိုအသိပေး ထားမယ်ဆိုရင် စိတ်ဖိစီးစရာ အခြေအနေတွေကို ကိုင်တွယ်ရ ပိုလွယ်ကူပါလိမ့်မယ်။ မိုဇမ်ဘစ်မှာနေတဲ့ ဖရန်စ္စကို ဒီလိုရေးတယ်– “အမှန်တရား သိလာတဲ့အခါ ကျွန်တော်တို့ ဇနီးမောင်နှံက လူသေတွေကို မကိုးကွယ်တော့ဘူးလို့ မိသားစုကို ပြောထားလိုက်တယ်။ မကြာခင်မှာပဲ ကယ်ရိုလိုင်းနားရဲ့ အစ်မ ဆုံးသွားတယ်။ အလောင်းကို ဘာသာရေးထုံးတမ်းနဲ့အညီ ရေချိုးပေးတယ်။ ချိုးပေးတဲ့ရေကို သွန်တဲ့နေရာမှာ အနီးစပ်ဆုံး ဆွေမျိုးက သုံးည အိပ်ပေးရတယ်။ သေလွန်သူရဲ့ ဝိညာဉ် ကျေနပ်စေဖို့ပဲ။ မိသားစုက ကယ်ရိုလိုင်းနားကို အဲဒီလို လုပ်စေချင်ကြတယ်။”
၁၆ ဖရန်စ္စကိုနဲ့ ဇနီး ဘာလုပ်ခဲ့သလဲ။ “ယေဟောဝါကို ချစ်ပြီး ဘုရားရဲ့ နှစ်သက်မှု ရချင်လို့ အဲဒီဓလေ့မှာ မပါဝင်နိုင်ဘူးလို့ ငြင်းတော့ သူတို့ အရမ်းဒေါသထွက်တယ်။ သေလွန်သူကို မလေးစားဘူးလို့ စွပ်စွဲကြတယ်။ ကျွန်တော်တို့ကို မကူညီတော့ဘူး၊ ဆွေပြတ်မျိုးပြတ်ပဲလို့ ပြောကြတယ်။ ကိုယ့်ယုံကြည်ချက်ကို ကြိုပြောပြီးသားဖြစ်လို့ သူတို့ ဒေါသထွက်နေချိန်မှာ မငြင်းခုံတော့ဘူး။ ကျွန်တော်တို့ ကြိုပြောထားတာပဲလို့ ဆွေမျိုးတချို့ ကူပြောပေးကြတယ်။ နောက်ပိုင်း ကယ်ရိုလိုင်းနားရဲ့ ဆွေမျိုးတွေ စိတ်ပြေသွားတယ်။ တချို့ဆိုရင် အိမ်ကိုလာပြီး ကျမ်းစာစာပေတွေတောင် တောင်းကြတယ်။” သေခြင်းနဲ့ပတ်သက်တဲ့ အမှန်တရားကို ခုခံကာကွယ်ဖို့ ဘယ်တော့မှ မရှက်ပါနဲ့။—ရောမ ၁:၁၆ ကိုဖတ်ပါ။
ဝမ်းနည်းပူဆွေးနေသူတွေကို နှစ်သိမ့်ထောက်မပေးပါ
၁၇။ ဝမ်းနည်းပူဆွေးနေတဲ့ ခရစ်ယာန်ချင်းအတွက် ဘယ်နည်းနဲ့ မိတ်ဆွေစစ် ဖြစ်နိုင်သလဲ။
၁၇ ယုံကြည်သူချင်းတစ်ယောက်ရဲ့ ချစ်ရသူ သေဆုံးသွားတဲ့အခါ အကောင်းဆုံး ကူညီပေးခြင်းအားဖြင့် “ဒုက္ခရောက်ချိန်မှာ အားကိုးရတဲ့ ညီအစ်ကို၊” “မိတ်ဆွေစစ်” ဖြစ်ဖို့ ကြိုးစားပါ။ (ပညာ. ၁၇:၁၇) ဝမ်းနည်းပူဆွေးနေတဲ့ ညီအစ်ကို/မတစ်ယောက် ကျမ်းစာနဲ့ မညီတဲ့ ဓလေ့ထုံးစံတွေမှာ ပါဝင်ဖို့ ဖိအားပေးခံရတဲ့အခါ ကျွန်တော်တို့ ဘယ်နည်းနဲ့ “မိတ်ဆွေစစ်” ဖြစ်နိုင်သလဲ။ ဝမ်းနည်းသူကို နှစ်သိမ့်ပေးနိုင်တဲ့ အောက်ပါ ကျမ်းစာမူ နှစ်ခုကို ကျင့်သုံးခြင်းအားဖြင့်ပါပဲ။
၁၈။ ယေရှု ဘာကြောင့် မျက်ရည်ကျသလဲ။ ယေရှုရဲ့ ပုံသက်သေကနေ ဘာသင်ယူနိုင်သလဲ။
၁၈ “ငိုကြွေးသူတွေနဲ့အတူ ငိုကြွေးပါ။” (ရော. ၁၂:၁၅) ဝမ်းနည်းနေသူကို ဘာပြောရမှန်းမသိ ဖြစ်နေနိုင်တယ်။ အဲဒီအခါ သူတို့နဲ့အတူ ငိုကြွေးလိုက်တာက ကိုယ်လည်း ထပ်တူခံစားရကြောင်း သိစေတယ်။ ယေရှုရဲ့ မိတ်ဆွေ လာဇရု သေဆုံးတဲ့အခါ မာရိ၊ မာသနဲ့ တခြားသူတွေ ငိုကြတယ်။ လေးရက်ကြာပြီးမှ ယေရှု ရောက်လာတယ်။ လာဇရုကို ရှင်ပြန်ထမြောက်ပေးတော့မယ်ဆိုတာ သိနေပေမဲ့ ယေရှု “မျက်ရည်ကျ” ခဲ့တယ်။ (ယော. ၁၁:၁၇၊ ၃၃-၃၅) ယေရှုရဲ့ မျက်ရည်က ယေဟောဝါလည်း ဝမ်းနည်းကြောင်း၊ လာဇရုတို့မိသားစုကို ယေရှု ချစ်ကြောင်း ဖော်ပြတယ်။ အဲဒါက မာရိနဲ့ မာသကို နှစ်သိမ့်မှု ဖြစ်စေခဲ့တယ်။ အဲဒီလိုပဲ ကျွန်တော်တို့ရဲ့ မေတ္တာကို ညီအစ်ကိုတွေ ခံစားမိတဲ့အခါ သူတို့ တစ်ယောက်တည်း မဟုတ်မှန်း၊ ကူညီထောက်မပေးမယ့် မိတ်ဆွေတွေ ရှိနေမှန်း သိလာမယ်။
၁၉။ ဝမ်းနည်းနေတဲ့ ခရစ်ယာန်ချင်းတစ်ယောက်ကို နှစ်သိမ့်တဲ့အခါ ဒေသနာ ၃:၇ ကို ဘယ်လို ကျင့်သုံးနိုင်သလဲ။
၁၉ “နှုတ်ဆိတ်နေရတဲ့အချိန်နဲ့ စကားပြောရတဲ့အချိန် ရှိတယ်။” (ဒေ. ၃:၇) ဝမ်းနည်းနေတဲ့ ခရစ်ယာန်တစ်ယောက်ကို နှစ်သိမ့်ပေးနိုင်တဲ့ နောက်တစ်နည်းက ကောင်းကောင်း နားထောင်ပေးခြင်း ဖြစ်တယ်။ သူ ရင်ဖွင့်လာတဲ့အခါ နားထောင်ပေးလိုက်ပါ။ “မဆင်မခြင် ပြော” တာကို ဗွေမယူပါနဲ့။ (ယောဘ ၆:၂၊ ၃) သက်သေခံမဟုတ်တဲ့ ဆွေမျိုးတွေကြောင့် သူ စိတ်ဖိစီးနေနိုင်တယ်။ သူနဲ့အတူ ဆုတောင်းပါ။ သူ့ကို ခွန်အားပေးဖို့၊ စိတ်ငြိမ်သက်မှု ပေးဖို့ “ဆုတောင်းသံကို နားထောင်တဲ့အရှင်” ဆီ အသနားခံပါ။ (ဆာ. ၆၅:၂) ဖြစ်နိုင်ရင် သူနဲ့အတူ ကျမ်းစာဖတ်ပါ။ အားရှိစေတဲ့ ဘဝအတ္ထုပ္ပတ္တိလို သင့်တော်တဲ့ ဆောင်းပါးတစ်ခုခု ဖတ်ပြပါ။
၂၀။ နောက်ဆောင်းပါးမှာ ဘာအကြောင်း ဆွေးနွေးကြမလဲ။
၂၀ လူသေတွေနဲ့ပတ်သက်တဲ့ အမှန်တရား၊ သူတို့အတွက် တောက်ပတဲ့ အနာဂတ်အကြောင်း သိထားရတာ အခွင့်ထူးပါပဲ။ (ယော. ၅:၂၈၊ ၂၉) ကျမ်းစာအမှန်တရားကို အပြော၊ အလုပ်နဲ့ သတ္တိရှိရှိ ခုခံကာကွယ်ပါ။ အခွင့်အရေးရတိုင်း ဝေမျှပါ။ စာတန်ဟာ အမှန်တရားကို ဖုံးကွယ်ဖို့ နတ်ဆိုးပညာကို သုံးတဲ့အကြောင်း နောက်ဆောင်းပါးမှာ ဆွေးနွေးကြပါမယ်။ နတ်ဆိုးတွေနဲ့ပတ်သက်တဲ့ ဓလေ့ထုံးစံတွေ၊ ဖျော်ဖြေမှုတွေကို ဘာကြောင့် ရှောင်သင့်ကြောင်း သိလာပါလိမ့်မယ်။
သီချင်း ၂၄ ယေဟောဝါရဲ့ တောင်တော်ဆီ လာကြ
^ အပိုဒ်၊ 5 စာတန်နဲ့ နတ်ဆိုးတွေဟာ လူသေတွေရဲ့ အခြေအနေနဲ့ ပတ်သက်ပြီး လူတွေကို လိမ်ညာလှည့်စားထားတယ်။ အဲဒီအလိမ် အညာတွေထဲမှာ ကျမ်းစာနဲ့ မညီတဲ့ ဓလေ့ထုံးစံတွေ ပါဝင်တယ်။ အဲဒီဓလေ့ထုံးစံတွေကို လိုက်ဖို့ ဖိအားပေးခံရတဲ့အခါ ယေဟောဝါကို ဆက်သစ္စာရှိနိုင်ဖို့ ဒီဆောင်းပါးက ကူညီပါလိမ့်မယ်။
^ အပိုဒ်၊ 55 ပုံအညွှန်း– သက်သေခံ မိသားစုဝင်တွေက ချစ်ရသူ သေဆုံးသွားလို့ ငိုနေတဲ့ ဆွေမျိုးတစ်ယောက်ကို နှစ်သိမ့်ပေးနေ။
^ အပိုဒ်၊ 57 ပုံအညွှန်း– သက်သေခံတစ်ယောက် အသုဘထုံးစံတွေအကြောင်း ရှာဖွေလေ့လာပြီးနောက် ဆွေမျိုးတွေကို ယုံကြည်ချက်အကြောင်း ရှင်းပြနေ။
^ အပိုဒ်၊ 59 ပုံအညွှန်း– ချစ်ရသူ သေဆုံးသွားတဲ့ သက်သေခံကို အသင်းတော် အကြီးအကဲတွေ နှစ်သိမ့်ပေးနေ။